Te mau tavana 18:1-31
18 I taua mau mahana ra, aita e arii i Iseraela.+ E i taua mau mahana ra, te imi ra te ati Dana+ i te hoê fenua no te parahi i reira, no te mea aita â ratou i fanaˈo atura i te hoê fenua i rotopu i te mau opu o Iseraela.+
2 Tono aˈera te ati Dana e pae tane no rotopu i to ratou fetii, e tane itoito no Zora e Esetaola,+ ei mata huna no te hiˈopoa i tera fenua. Na ô atura ratou: “A haere a hiˈopoa i tera fenua.” I te taeraa ratou i te tuhaa fenua mouˈa o Epheraima, i te fare o Mika,+ taoto ihora ratou i reira i taua po ra.
3 A tapiri ai ratou i te fare o Mika, taa aˈera ia ratou te reo* o te tane apî ati Levi, haere aˈera ratou ia ˈna e ui aˈera: “Na vai i aratai mai ia oe i ǒ nei? Eaha ta oe ohipa i teie vahi? Na te aha e tapea ra ia oe i ǒ nei?”
4 Faaite maira oia ia ratou i ta Mika i rave no ˈna e na ô maira: “Ua tarahu oia ia ˈu no te tavini ei tahuˈa na ˈna.”+
5 Na ô aˈera ratou ia ˈna: “A ui na i te Atua e manuïa anei to matou tere.”
6 Na ô maira te tahuˈa ia ratou: “A haere ma te hau. Tei ia outou ra Iehova i to outou tere.”
7 Tamau aˈera ïa na pae tane i to ratou tere e tae aˈera i Laisa.+ Ite aˈera ratou mea nafea te taata i ǒ, mai to Sidona, e ora ˈi ia ratou noa. I parahi na ratou ma te hau e te taiâ ore,+ e aita e faatere haavî e haru ra i to ratou fenua no te faahepo ia ratou. Mea atea ratou i to Sidona, e aita ratou i amui na i te mau taata ati aˈe.
8 I te hoˈiraa ratou i to ratou mau taeae i Zora e Esetaola,+ na ô maira to ratou mau taeae ia ratou: “Eaha ˈtura?”
9 Pahono atura ratou: “Pauma anaˈe e aro ia ratou, ua ite hoi matou e fenua maitai roa. Eaha outou e feaa ˈi? Eiaha e faataere i te haere e rave i tera fenua.
10 Ia tae atu outou, e ite outou i te hoê nunaa taiâ ore,+ e e fenua rahi. Ua tuu te Atua i tera fenua i to outou rima, e vahi te vai ra te mau mea atoa o te fenua nei.”+
11 Faareva aˈera 600 tane e mauhaa tamaˈi ta ratou no roto mai i te fetii o te ati Dana no Zora e Esetaola.+
12 Pauma aˈera ratou e puhapa ihora i Kiriata-iearima+ i Iuda. No reira taua vahi ra i tooa o te râ o Kiriata-iearima i parauhia ˈi Mahane-dana*+ tae roa mai i teie mahana.
13 Mai reira mai, haere aˈera ratou i te tuhaa fenua mouˈa o Epheraima e tae aˈera i te fare o Mika.+
14 Parau aˈera na pae tane tei hiˈopoa haere i te fenua o Laisa+ i to ratou mau taeae: “Ua ite anei outou e e tiputa, e mau tii o te mau atua o te utuafare,* e tii taraihia e e tii faatôhia*+ to roto i teie mau fare? A feruri eaha ta outou e rave.”
15 Faaea ihora ïa ratou i reira e haere aˈera i te fare o te tane apî ati Levi+ i te fare o Mika e ui aˈera eaha to ˈna huru.
16 I taua taime ra, te tia noa ra na 600 tane no Dana,+ ma te mauhaa tamaˈi, i te tomoraa o te uputa.
17 Tomo aˈera na pae tane tei hiˈopoa haere i te fenua+ no te rave i te tii taraihia, te tiputa,+ te mau tii o te mau atua o te utuafare+ e te tii faatôhia.+ (Te tia ra te tahuˈa+ i te tomoraa o te uputa e na 600 tane ma te mauhaa tamaˈi.)
18 Tomo aˈera ratou i roto i te fare o Mika e rave maira i te tii taraihia, te tiputa, te mau tii o te mau atua o te utuafare e te tii faatôhia. Na ô maira te tahuˈa ia ratou: “Te aha ra outou?”
19 Na ô atura râ ratou ia ˈna: “Mamû. A tuu i to rima i nia i to vaha, e a haere mai na muri ia matou ia riro oe ei metua* no matou e ei tahuˈa na matou. Eaha te mea maitai aˈe, e tahuˈa oe no te utuafare o te hoê noa taata+ aore ra ia riro ei tahuˈa no te hoê opu e fetii i Iseraela?”+
20 Farii ihora ïa te tahuˈa, e rave maira i te tiputa, te mau tii o te mau atua o te utuafare, e te tii taraihia+ e reva ˈtura na muri i tera mau taata.
21 Tamau noa ˈtura ratou i to ratou tere, a tuu ai i te mau tamarii, te mau animara e ta ratou mau faufaa na mua ia ratou.
22 Ua atea ratou i te fare o Mika, putuputu aˈera te mau taata e ora ra i roto i te mau fare na pihai iho i te fare o Mika e noaa ˈtura te ati Dana ia ratou.
23 I te tuôraa ratou i te ati Dana, fariu maira te ati Dana e na ô maira ia Mika: “Eaha tena? Eaha oe i haere mai ai e tera rahiraa taata?”
24 Na ô atura ïa oia: “Ua rave outou i to ˈu mau atua ta ˈu i hamani, e ua reva outou e ta ˈu tahuˈa atoa. Eaha te toe ra ia ˈu? Eaha ïa outou e ui mai ai: ‘Eaha tena?’”
25 Pahono maira te ati Dana: “Eiaha oe e vaha ia matou, aˈunei te mau tane tei riri e rave ino ai ia oe, a pohe atu ai oe e to utuafare.”
26 Reva aˈera ïa te ati Dana i to ratou tere. E i te iteraa Mika mea puai aˈe ratou ia ˈna, fariu ê ihora oia e hoˈi atura i to ˈna fare.
27 I muri iho i to ratou raveraa i ta Mika i hamani, e ta ˈna tahuˈa atoa, haere aˈera ratou i Laisa,+ i te hoê nunaa hau e te taiâ ore.+ Tairi aˈera ratou i tera mau taata i te ˈoˈe e tanina aˈera i te oire.
28 Aita hoê no te faaora i te oire, mea atea hoi te reira ia Sidona e aita ratou i amui na i te mau taata ati aˈe. Tei te peho fatuhia e Bete-rehoba+ te oire. Patu faahou aˈera ratou i te oire e parahi ihora i reira.
29 Hau atu â, topa aˈera ratou i te oire i te iˈoa Dana,+ te iˈoa o to ratou metua o Dana, te tamaiti a Iseraela.+ O Laisa râ te iˈoa o te oire na mua ˈˈe.+
30 I muri iho, faatia aˈera te ati Dana i te tii taraihia+ no ratou, e riro maira Ionatana,+ huaai na Geresoma,+ te tamaiti a Mose, e ta ˈna mau tamaiti ei tahuˈa no te opu o te ati Dana tae roa i te mahana i hopoi-ê-hia ˈi to tera fenua.
31 E faatia aˈera ratou i te tii taraihia ta Mika i hamani, e vai noa ˈtura taua tii ra i reira i te mau mahana atoa i vai ai te fare* o te Atua mau i Silo.+
Nota i raro i te api
^ Aore ra “taˈiraa reo.”
^ “Puhapa o Dana” te auraa.
^ Heb: “te teraphima.”
^ Aore ra “faatahehia.”
^ Aore ra “taata aˈo.”
^ Aore ra “sekene.”
