Te mau tavana 21:1-25
-
Ravea ia ore te opu o Beniamina e mou (1-25)
21 I horeo na to Iseraela i Mizepa:+ “Eita hoê o matou e horoa i ta ˈna tamahine ei vahine faaipoipo na te tahi tane no Beniamina.”+
2 Haere maira ïa to Iseraela i Betela+ e parahi ihora i reira i mua i te Atua mau e ahiahi noa ˈtu, a taˈi ai e a auê ai no te peapea rahi.
3 E te parau ra ratou: “No te aha, e Iehova te Atua o Iseraela, i tupu ai teie ohipa i Iseraela? No te aha ia ere ai Iseraela i te tahi opu i teie mahana?”
4 E ananahi aˈe, tia oioi maira to Iseraela i te poipoi roa e hamani aˈera i te tahi fata i reira no te pûpû i te tusia taauahi e te tusia no te hau.+
5 Na ô aˈera to Iseraela: “O vai o te mau opu atoa o Iseraela aita i pauma no te putuputu i mua ia Iehova?” Ua horeo hoi ratou e haapohehia te taata aita i pauma i mua ia Iehova i Mizepa.
6 Oto ihora ïa to Iseraela no tei tupu no te ati Beniamina to ratou mau taeae. Na ô aˈera ratou: “I teie mahana, ua iriti-ê-hia hoê opu no roto ia Iseraela.
7 E nafea tatou no te horoa i te vahine faaipoipo na tei toe ra, inaha ua horeo tatou i te ora o Iehova+ eiaha e horoa i ta tatou mau tamahine ei vahine faaipoipo na ratou?”+
8 Ui aˈera ratou: “O vai i rotopu i te mau opu o Iseraela aita i pauma i mua ia Iehova i Mizepa?”+ Inaha, aita hoê no Iabesa-gileada i haere mai i roto i te puhapa to reira te amuiraa.
9 I te taioraahia to Iseraela, ite aˈera ratou e aita hoê o to Iabesa-gileada i reira.
10 Tono atura ïa te amuiraa 12 000 o te mau tane puai roa ˈˈe i reira a faaue ai ia ratou: “A haere e tairi i to Iabesa-gileada i te ˈoˈe, te vahine e te tamarii atoa.+
11 E na ô outou: E faataa outou no te haamouraa pauroa te tane e pauroa te vahine tei taoto i te tane.”
12 I rotopu i to Iabesa-gileada, itehia maira ia ratou e 400 tamahine aita i taoto aˈenei i te tane. Aratai maira ïa ratou i tera mau tamahine i te puhapa i Silo,+ tei te fenua o Kanaana.
13 Faatae atura te amuiraa taatoa i te tahi poroi i te ati Beniamina i te mato o Rimona+ e faatupu atura i te hau.
14 Hoˈi maira ïa Beniamina i taua taime ra. Horoahia ˈtura na ratou te mau vahine tei faahereherehia no rotopu i te mau vahine no Iabesa-gileada,+ aita râ i navai no ratou.
15 E oto ihora to Iseraela no tei tupu no Beniamina+ no te mea ua faaamahamaha Iehova i te mau opu o Iseraela.
16 Na ô aˈera te mau matahiapo o te amuiraa: “E nafea tatou no te horoa i te vahine faaipoipo na te mau tane e toe ra, i te mea ua mou pauroa te vahine no Beniamina?”
17 Pahono maira ratou: “E noaa iho â te tahi tuhaa i te ati Beniamina tei ora mai, ia ore hoê opu o Iseraela ia mou.
18 Aita râ matou i faatiahia e horoa i te vahine faaipoipo na ratou no rotopu i ta matou mau tamahine, no te mea ua horeo to Iseraela: ‘Ua ati te taata e horoa i te tahi vahine faaipoipo na te hoê tane ati Beniamina.’”+
19 Na ô aˈera ratou: “Inaha, e oroa no Iehova te tupu i tera e tera matahiti i Silo,+ tei apatoerau o Betela e tei hitia o te râ o te purumu rahi e pauma ra mai Betela tae roa i Sekema e tei apatoa o Lebona.”
20 Faaue aˈera ïa ratou i to Beniamina: “A haere e tamoemoe i roto i te mau faaapu vine.
21 E ia ite outou i te mau vahine apî* no Silo ia haere mai no te apiti i ta ratou mau oriraa, e haere mai outou tataitahi i rapae i te faaapu vine, e haru outou i te tahi vahine no rotopu i te mau vahine apî no Silo, e e hoˈi outou i te fenua no Beniamina.
22 E ia haere noa mai to ratou mau metua tane aore ra to ratou mau taeae e faahapa ia matou, e parau ïa matou ia ratou: ‘A hamani maitai na ia matou no ratou, no te mea eita ta matou e nehenehe e horoa na ratou tataitahi i te hoê vahine faaipoipo haruhia i te tamaˈi,+ e eita ta outou e nehenehe e horoa i te vahine faaipoipo na ratou a ore atu ai e hara.’”+
23 Na reira ihora ïa to Beniamina, e hopoi aˈera ratou tataitahi i te tahi vahine faaipoipo no rotopu i te mau vahine e ori ra. I muri iho, hoˈi maira ratou i to ratou tuhaa fenua, patu faahou aˈera i to ratou mau oire+ e parahi ihora i roto.
24 Purara aˈera te ati Iseraela mai reira mai i tera taime, te taata tataitahi i to ˈna opu e to ˈna fetii, e faarue maira ratou tataitahi i reira no te haere i to ratou tuhaa fenua.
25 I taua mau mahana ra, aita e arii i Iseraela.+ Te rave ra te taata tataitahi i te mea maitai i to ˈna manaˈo.
Nota i raro i te api
^ Heb: “tamahine.”