Te mau tavana 3:1-31
3 Teie te mau nunaa ta Iehova i vaiiho ia faaea mai ia tamata ratou pauroa to Iseraela tei ore i faaruru aˈenei i te tahi tamaˈi o Kanaana+
2 (mea na reira ïa to muri iho mau uˈi o te ati Iseraela i faaruru ai i te tamaˈi, ratou tei ore i faaruru aˈenei i te reira na mua ˈˈe):
3 na faatere e pae o te mau Philiseti,+ e pauroa te ati Kanaana, te ati Sidona+ e te ati Hevi+ e faaea ra i te mouˈa Lebanona+ mai te mouˈa Baala-heremona tae roa i Lebo-Hamata.*+
4 Ua riro ratou ei tamataraa ia Iseraela no te ite e faaroo anei Iseraela i ta Iehova mau faaueraa ta ˈna i horoa i to ratou mau metua na roto ia Mose.+
5 Ora ihora ïa te ati Iseraela i rotopu i te ati Kanaana,+ te ati Heta, te ati Amori, te ati Perizi, te ati Hevi e te ati Iebusi.
6 Ua rave te ati Iseraela i te mau tamahine a tera mau nunaa ei vahine faaipoipo na ratou, e ta ratou iho mau tamahine ua horoa ïa na te mau tamaiti a tera mau nunaa, e haamori aˈera ratou i to ratou mau atua.+
7 Rave aˈera ïa te ati Iseraela i te mea ino i te aro o Iehova, moˈe aˈera ia ratou to ratou Atua ra o Iehova e tavini atura ratou ia Baala+ e te mau raau haamoriraa.*+
8 Ura ihora to Iehova riri ia Iseraela, e tuu atura oia ia ratou i te rima o Kusana-risataima te arii o Mesopotamia.* Tavini aˈera te ati Iseraela ia Kusana-risataima e vaˈu matahiti.
9 I to te ati Iseraela tiaororaa ia Iehova ia tauturu mai,+ horoa maira Iehova i te tahi faaora no ratou,+ o Oteniela+ te tamaiti a Kenaza, te teina o Kaleba.
10 Ohipa maira te varua o Iehova i nia ia ˈna,+ e riro maira oia ei tavana no Iseraela. I to ˈna haereraa i te tamaˈi, tuu atura Iehova ia Kusana-risataima te arii no Mesopotamia* i to ˈna rima ia upootia oia i nia ia Kusana-risataima.
11 I muri iho, ora hau ihora to taua fenua ra e 40 matahiti. E pohe ihora Oteniela te tamaiti a Kenaza.
12 Rave faahou aˈera te ati Iseraela i te mea ino i te aro o Iehova.+ Vaiiho atura Iehova ia Egalona te arii no Moabi+ ia upootia i nia ia Iseraela, no te mea ua rave ratou i te mea ino i te aro o Iehova.
13 Hau atu â, faahaere maira oia i te ati Amona+ e te ati Amaleka+ no te aro ia ratou. Aro aˈera ratou ia Iseraela e haru aˈera i te oire o te mau tamara.*+
14 Tavini aˈera te ati Iseraela ia Egalona te arii no Moabi 18 matahiti.+
15 Tiaoro aˈera te ati Iseraela ia Iehova ia tauturu mai,+ horoa maira ïa Iehova i te tahi faaora no ratou,+ o Ehuda+ te tamaiti a Gera, e ati Beniamina.+ E rima aui oia.+ I muri aˈe, poroi aˈera te ati Iseraela ia Ehuda ia hopoi atu i te ô ta Egalona te arii no Moabi i titau.
16 I tera taime, ua hamani Ehuda i te tahi ˈoˈe na ˈna mea oi na pae e piti, hoê kubiti* te roa. Taamu atura oia i te reira i nia i to ˈna huha atau, i raro aˈe i to ˈna ahu.
17 Hopoi atura oia i te ô ta Egalona te arii no Moabi i titau. E taata poria mau Egalona.
18 I te otiraa ia Ehuda i te hopoi atu i te ô titauhia, hoˈi atura oia e te mau taata tei amo i te ô titauhia.
19 I te taeraa râ oia i te mau tii taraihia* i Gilagala,+ hoˈi maira oia i muri e na ô maira ia Egalona: “E poroi huna ta ˈu na oe, e te arii.” Na ô ihora ïa te arii: “Mamû!” Vaiiho maira pauroa ta ˈna tavini ia ˈna.
20 Tapiri maira ïa Ehuda i te arii o te parahi ra o ˈna anaˈe i roto i to ˈna piha puvaivai i nia i te tafare. Parau maira Ehuda: “E poroi no ǒ mai i te Atua ta ˈu na oe.” Tia aˈera ïa te arii mai nia mai i to ˈna terono.*
21 Huti maira Ehuda i ta ˈna ˈoˈe mai nia i to ˈna huha atau i to ˈna rima aui e patia ˈtura i roto i te opu o te arii.
22 Mure roa ˈtura te ˈoˈe e te tapearaa atoa i roto i te opu, e poˈi ihora i te mii, aita hoi oia i huti i te ˈoˈe i rapae i te opu, e haere maira te tutae i rapae.
23 Haere ihora Ehuda i rapae na te taupee,* tapiri atura i na uputa o te piha i nia i te tafare e ponao atura i te reira.
24 I muri iho i to ˈna revaraa, hoˈi maira te mau tavini e ite aˈera e ua ponaohia na uputa o te piha i nia i te tafare. Na ô aˈera ïa ratou: “Papu, te haumiti ra oia* i roto i te piha puvaivai.”
25 Tiai noa ˈtura ratou. I to ratou râ iteraa e aita iho â oia na te tatara i na uputa o te piha, haapeapea ihora ratou. Rave maira ratou i te taviri, iriti atura i na uputa e ite aˈera i to ratou fatu i raro,* ua pohe!
26 Ua horo ê na Ehuda a faataere noa ˈi ratou, e na pihai iho atura oia i te mau tii taraihia*+ e tae maitai atura i Sêira.
27 I te taeraa oia, faaoto ihora oia i te pu tara+ i te tuhaa fenua mouˈa o Epheraima.+ Pou maira te ati Iseraela mai te tuhaa fenua mouˈa mai, e o ˈna to mua ia ratou.
28 Parau atura oia ia ratou: “A pee mai ia ˈu, no te mea ua tuu Iehova i to outou mau enemi, te ati Moabi, i to outou rima.” Pee atura ïa ratou ia ˈna e haru aˈera i te mau vahi papaˈu o Ioridana ia ore te ati Moabi ia na reira ˈtu. Aita iho â ratou i vaiiho i te tahi ia na reira ˈtu.
29 I tera taime, tairi aˈera ratou piri i te 10 000 ati Moabi,+ e tane puai anaˈe e te itoito, aita hoê i ora.+
30 Vî aˈera ïa Moabi i taua mahana ra i to Iseraela, e ora hau ihora taua fenua ra e 80 matahiti.+
31 I muri aˈe ia Ehuda, o Samagara+ ïa te tamaiti a Anata, tei haapohe e 600 tane Philiseti+ i te tahi patia puaatoro.+ Ua faaora atoa oia ia Iseraela.
Nota i raro i te api
^ Aore ra “te tomoraa o Hamata.”
^ Heb: “Arama-naharaima.”
^ Heb: “Arama.”
^ Oia hoi Ieriko.
^ Peneiaˈe e kubiti poto teie piri i te 38 cm. Hiˈo i te tuhaa hau B14.
^ Huri-atoa-hia “vahi paoraa ofai.”
^ Aore ra “parahiraa.”
^ Huri-atoa-hia “haereraa mataˈi.”
^ Heb: “te tapoˈi ra oia i to ˈna avae.”
^ Heb: “raro i te fenua.”
^ Huri-atoa-hia “vahi paoraa ofai.”
