Te mau tavana 7:1-25
7 Tia aˈera Ierubaala, oia hoi Gideona,+ e pauroa te faehau na muri ia ˈna i te poipoi roa e puhapa ihora i te pape pihaa i Haroda, a puhapa ˈi te ati Midiana i apatoerau o te puhapa o Gideona i te aivi i More i te peho.
2 Na ô maira Iehova ia Gideona: “Mea rahi roa te faehau na muri ia oe ia tuu vau i te ati Midiana i to ratou rima.+ Aˈunei Iseraela e faatietie ai ia ˈna a na ô ai ia ˈu: ‘Na to matou iho rima i faaora ia matou.’+
3 I teie nei, a parau na i te mau faehau: ‘Te taata e mǎtaˈu ra e e rûrû ra, ia hoˈi oia i te fare.’”+ Na reira ˈtura Gideona no te tamata ia ratou. E 22 000 faehau tei hoˈi i te fare, e 10 000 tei faaea mai.
4 Na ô faahou maira Iehova ia Gideona: “Mea rahi roa â te faehau. A haapou ia ratou i te pape ia nehenehe au e tamata ia ratou no oe i reira. Ia parau vau ia oe: ‘E haere teie na muri ia oe,’ e haere oia na muri ia oe. Ia parau râ vau ia oe: ‘Eita teie e haere na muri ia oe,’ eita oia e haere.”
5 Haapou ihora ïa oia i te mau faehau i te pape.
Na ô maira Iehova ia Gideona: “A faataa i tei mitimiti i te pape i to ˈna arero mai te urî ia mitimiti, i tei tuturi no te inu.”
6 Te rahiraa o tei mitimiti i te pape, a tuu ai i to ratou rima i to ratou vaha, e 300 ïa tane. Te toea o te faehau, ua tuturi ïa no te inu.
7 Na ô maira ïa Iehova ia Gideona: “E faaora vau ia outou i na 300 tane tei mitimiti i te pape, e e tuu vau i te ati Midiana i to outou rima.+ Ia hoˈi râ pauroa te tahi atu faehau i te fare.”
8 I muri iho ïa i to ratou raveraa mai i te maa e te mau pu tara a te tahi atu mau faehau, parau atura oia pauroa te tahi atu mau faehau no Iseraela ia hoˈi i te fare, e tapea maira oia i na 300 noa tane. To raro te puhapa o te ati Midiana i te puhapa o Gideona i te peho.+
9 I taua po ra, na ô maira Iehova ia ˈna: “A tia i nia, a aro i te puhapa, ua tuu hoi au i te reira i to rima.+
10 Mai te peu râ te mǎtaˈu ra oe i te aro atu, a pou orua Pura ta oe tavini i te puhapa.
11 A faaroo eaha ta ratou e parau, i muri iho e itoitohia oe* no te aro i te puhapa.” Pou ihora raua Pura ta ˈna tavini i pihai iho roa i te puhapa o te nuu.
12 Ua poˈi te peho i te ati Midiana, te ati Amaleka e to hitia o te râ taatoa+ mai te aere vivi. Eita e nehenehe e taio i ta ratou mau kamela,+ mai te one tahatai te rahi.
13 Tae maira Gideona, e te faatia ra te tahi tane i te tahi moemoeâ i to ˈna hoa: “Teie ta ˈu i moemoeâ. E faraoa kerite menemene te ohu ra a haere ai i roto i te puhapa o te ati Midiana. Tere atura te faraoa, tano atura i nia iho i te tahi fare ie e marua ˈtura te reira.+ Oia, taahuri roa ˈtura te fare ie i te reira, e marua ˈtura te fare ie.”
14 Na ô maira to ˈna hoa: “Papu, o te ˈoˈe a Gideona+ te tamaiti a Ioasa te reira, e tane no Iseraela. Ua tuu te Atua i te ati Midiana e pauroa te puhapa i to ˈna rima.”+
15 I te faarooraa iho â Gideona ia ˈna i te faatiaraa i te moemoeâ e to ˈna tatararaa,+ piˈo ihora oia i raro no te haamori. I muri iho, hoˈi atura oia i te puhapa o Iseraela e na ô atura: “A tia i nia, ua tuu hoi Iehova i te puhapa o te ati Midiana i to outou rima.”
16 Vahi atura oia i na 300 tane ei toru pǔpǔ e horoa ˈtura ia ratou pauroa te pu tara+ e te farii rahi, e e mori to roto i te mau farii.
17 Na ô atura oia ia ratou: “A hiˈo mai ia ˈu e a rave mai ta ˈu e rave. Ia tae au i pihai iho roa i te puhapa, e rave outou mai ta ˈu e rave.
18 Ia faaoto vau i te pu tara, o vau e pauroa tei na muri ia ˈu, e faaoto atoa ïa outou i te pu tara ati aˈe te puhapa e e tuô outou: ‘No Iehova e no Gideona!’”
19 Hou rii te tuiraa po,* i muri iho noa i te tuuraahia te feia tiai, tae atura Gideona e na 100 tane na muri ia ˈna i pihai iho roa i te puhapa. Faaoto aˈera ratou i te pu tara+ e tuparari aˈera i te mau farii rahi i roto i to ratou rima.+
20 Ua faaoto ïa na toru pǔpǔ i te pu tara e ua tuparari i te mau farii rahi. Tapea aˈera ratou i te mori i to ratou rima aui e faaoto aˈera i te pu tara i to ratou rima atau e tuô aˈera: “Te ˈoˈe a Iehova e a Gideona!”
21 I taua taime ra, tia noa ihora te taata tataitahi i to ˈna vahi ati aˈe te puhapa, e horo ê aˈera te nuu taatoa o te ati Midiana a tuô noa ˈi.+
22 Faaoto noa aˈera na 300 i te pu tara, e faafariu ihora Iehova i te ˈoˈe a te tahi i nia iho i te tahi na te puhapa taatoa.+ E horo ê aˈera te nuu tae roa i Bete-sita, e i Zerera, e tae roa i te mau otia o Abela-mehola+ i pihai iho ia Tabata.
23 Titauhia aˈera te mau tane no Iseraela no roto mai ia Naphatali, Asera e ia Manase taatoa,+ e aˈuaˈu aˈera ratou i te ati Midiana.
24 Tono atura Gideona i te vea na te tuhaa fenua mouˈa taatoa o Epheraima, a na ô ai: “A pou e aro i te ati Midiana, e a haru i te mau anavai tae roa i Bete-bara e Ioridana.” Amui aˈera ïa pauroa te tane o te opu o Epheraima, e haru aˈera ratou i te mau anavai tae roa i Bete-bara e Ioridana.
25 Haru atoa ˈtura ratou na piti huiarii no Midiana, Oreba raua Zeeba. Haapohe atura ratou ia Oreba i nia i te mato o Oreba,+ e haapohe atura ia Zeeba i te apoo taataahiraa vine o Zeeba. Aˈuaˈu noa ˈtura ratou i te ati Midiana,+ e hopoi maira i te upoo o Oreba e to Zeeba ia Gideona i te tuhaa fenua o Ioridana.
Nota i raro i te api
^ Heb: “puaihia to rima.”
^ Mai te area hora 10 i te po i te area hora 2 i te aahiata.
