Te mau tavana 8:1-35
8 Na ô maira te mau taata o Epheraima ia ˈna: “Ua nafea oe ia matou? Eaha oe i ore ai i titau ia matou i to oe haereraa e aro i te ati Midiana?”+ E imi peapea roa maira ratou ia ˈna.+
2 Na ô atura râ oia ia ratou: “Eaha ta ˈu i rave ia faaauhia i ta outou? E ere anei mea maitai aˈe ta Epheraima+ e ohi haere ra ia faaauhia i te ootiraa vine a Abi-ezera?+
3 I to outou rima te tuuraa te Atua i na huiarii no Midiana o Oreba raua Zeeba,+ e eaha ta ˈu i rave ia faaauhia i ta outou?” I te na reiraraa oia i te parau, mǎrû maira ratou.*
4 Tae atura Gideona i Ioridana e haere atura i te tahi atu pae. Ua rohirohi o ˈna e na 300 tane na muri ia ˈna, tamau noa ˈtura râ ratou i ta ratou aˈuaˈuraa.
5 Na ô atura ïa oia i te mau tane no Sukota: “A horoa mai na i te tahi tâpû faraoa na te mau tane e pee ra ia ˈu, ua rohirohi hoi ratou e te aˈuaˈu nei au ia Zeba raua Zalamuna, na arii no Midiana.”
6 Na ô maira râ te mau raatira no Sukota: “Tei roto ê na anei o Zeba raua Zalamuna i to rima e horoa ˈi matou i te faraoa na ta oe nuu?”
7 Na ô atura Gideona: “Na reira, ia tuu Iehova ia Zeba raua Zalamuna i to ˈu rima, e hui au ia outou i te raau taratara o te medebara.”+
8 E mai reira mai, pauma aˈera oia i Penuela e hoê â aniraa ta ˈna ia ratou. Tera râ, hoê â pahonoraa ta te mau tane no Penuela ia ˈna e ta te mau tane no Sukota.
9 Na ô atoa ˈtura ïa oia i te mau tane no Penuela: “Ia hoˈi mai au ma te hau, e vavahi au i to outou pare.”+
10 E tei Karakora o Zeba raua Zalamuna e ta raua mau nuu, piri i te 15 000 tane. Tera noa tei toe o te nuu taatoa a to hitia o te râ,+ ua pohe hoi 120 000 tane e ˈoˈe ta ratou.
11 Pauma noa aˈera Gideona na te eˈa o tei noho ra i raro aˈe i te fare ie i hitia o te râ o Noba e Iogebeha+ e aro atura i te puhapa, tei ore i tiaihia.
12 I to na piti arii ati Midiana o Zeba raua Zalamuna horo-ê-raa, aˈuaˈu e haru atura oia ia raua. Ua mǎtaˈu to te puhapa taatoa.
13 Hoˈi maira Gideona te tamaiti a Ioasa na te tamaˈi mai na te purumu mouˈa e pauma i Heresi.
14 Na nia i te purumu, haru e uiui atura oia i te tahi tane apî no Sukota. Papai ihora ïa te tane apî i te iˈoa o te mau raatira e matahiapo no Sukota, e 77 tane.
15 Haere atura ïa oia i te mau tane no Sukota e na ô atura: “Teie o Zeba raua Zalamuna ta outou i faaooo mai ia ˈu, a na ô ai: ‘Tei roto ê na anei o Zeba raua Zalamuna i to rima e horoa ˈi matou i te faraoa na to oe mau taata tei rohirohi roa?’”+
16 Rave maira oia i te mau matahiapo o te oire e, i te raau taratara o te medebara, horoa ˈtura oia i te tahi haapiiraa i taua mau tane ra no Sukota.+
17 E vavahi atura oia i te pare i Penuela+ e haapohe ihora i te mau taata o te oire.
18 Ui atura oia ia Zeba raua Zalamuna: “Teihea huru taata ta orua i haapohe i Tabora?” Na ô maira raua: “Te taata mai ia oe, e hohoˈa ratou i te tamaiti a te hoê arii.”
19 Na ô atura oia: “O to ˈu ïa mau taeae, te mau tamaiti a to ˈu metua vahine. Te horeo nei au i te ora o Iehova, ahani orua i faaherehere i to ratou ora, eita vau e haapohe ia orua.”
20 Na ô atura oia ia Ietera ta ˈna matahiapo: “A tia, a haapohe ia raua.” Aita râ te tane apî i tatara i ta ˈna ˈoˈe. Te mǎtaˈu ra oia, mea apî noa â hoi o ˈna.
21 Na ô maira ïa Zeba raua Zalamuna: “O oe te tia e te haapohe ia mâua, e haavahia hoi hoê tane i to ˈna puai.”* Tia aˈera ïa Gideona, haapohe ihora ia Zeba raua Zalamuna+ e rave atura i te mau taoˈa faaunauna hohoˈa avaˈe apî mai nia mai i te aˈî o ta raua mau kamela.
22 I muri iho, na ô maira te mau tane no Iseraela ia Gideona: “Na oe e faatere ia matou, na oe e ta oe tamaiti e ta oe mootua atoa, ua faaora hoi oe ia matou i te rima o te ati Midiana.”+
23 Na ô atura râ Gideona ia ratou: “E ere na ˈu e faatere ia outou, e ere atoa na ta ˈu tamaiti e faatere ia outou. Na Iehova e faatere ia outou.”+
24 Na ô faahou atura Gideona: “E aniraa ta ˈu ia outou: a horoa mai na ˈu i te tahi tapea ihu no roto i ta outou mau taoˈa haruhia.” (E tapea ihu auro hoi to ratou no te mea e ati Isemaela ratou.)+
25 Pahono maira ratou: “Na reira, e horoa matou i te reira na oe.” Vauvau aˈera ratou i te tahi ahu roa e taora ihora te tane tataitahi i nia iho i te tahi tapea ihu no roto i ta ˈna mau taoˈa haruhia.
26 Te teiaha o te mau tapea ihu auro ta ˈna i ani, 1 700 sekela* auro, hau atu i te mau taoˈa faaunauna hohoˈa avaˈe apî, te mau tapea tariˈa, te ahu huruhuru mamoe vareau oomohia e te mau arii no Midiana e te mau fifi faaunauna o te kamela.+
27 Hamani ihora Gideona i te reira ei tiputa+ e faaiteite atura i te reira i roto i to ˈna oire i Ophera.+ Rave aˈera Iseraela taatoa i te taiataraa pae varua i te reira i Ophera,+ e riro atura te reira ei marei no Gideona e to ˈna utuafare.+
28 Vî aˈera ïa te ati Midiana+ i te ati Iseraela, e aita ˈtura i aa faahou ia ratou.* Ora hau ihora to taua fenua ra e 40 matahiti i te mau mahana o Gideona.+
29 Hoˈi ihora ïa Ierubaala+ te tamaiti a Ioasa i to ˈna fare e faaea ihora i reira.
30 Ua fanau mai ta Gideona e 70 tamaiti,* mea rahi hoi ta ˈna vahine faaipoipo.
31 Ua fanau atoa mai ta ˈna vahine faaipoipo tavini i Sekema i te hoê tamaiti na ˈna, e ua topa oia ia ˈna i te iˈoa ra o Abimeleka.+
32 Pohe ihora Gideona te tamaiti a Ioasa i to ˈna ruhiruhia-roa-raa e hunahia ihora oia i te menema o Ioasa to ˈna metua tane i Ophera o te ati Abi-ezera.+
33 I te poheraa iho â Gideona, rave faahou aˈera te ati Iseraela i te taiataraa pae varua e te mau Baala,+ e maiti aˈera ia Baala-berita ei atua no ratou.+
34 Aita ˈtura te ati Iseraela i haamanaˈo ia Iehova to ratou Atua,+ tei faaora ia ratou i te rima o to ratou mau enemi atoa ati aˈe ia ratou.+
35 Aita atoa ˈtura ratou i faaite i te here taiva ore i te utuafare o Ierubaala, oia hoi Gideona, no te maitai ta ˈna i rave no Iseraela.+
Nota i raro i te api
^ Heb: “to ratou aau.”
^ Aore ra “te huru hoi o te hoê tane, te huru ïa o to ˈna puai.”
^ 1 sekela: 11,4 g. Hiˈo i te tuhaa hau B14.
^ Heb: “i faateitei faahou i to ratou upoo.”
^ Heb: “E 70 tamaiti ta Gideona no roto mai i to ˈna huha.”
