Zekaria 5:1-11
5 Hiˈo faahou atura vau e ite atura vau i te hoê otaro o te rere ra.
2 Ui maira te melahi ia ˈu: “Eaha ta oe e ite ra?”
Pahono atura vau: “Te ite ra vau i te hoê otaro o te rere ra, e 20 kubiti* te roa e 10 kubiti te aano.”
3 Na ô maira oia ia ˈu: “O te faainoraa teie e parare ra na te fenua taatoa, aita hoi te mau taata o te eiâ ra i faautuahia,+ mai tei papaihia i nia i te hoê pae o te otaro, e aita te mau taata o te horeo+ ra ma te haavare i faautuahia, mai tei papaihia i nia i te tahi atu pae.
4 ‘Na ˈu i tono i tera faainoraa,’ te parau ra Iehova o te mau nuu,* ‘e e tomo te reira i roto i te fare o te taata eiâ e i roto i te fare o te taata o te horeo ra i to ˈu iˈoa ma te haavare. E vai te reira i roto i tera fare, a haamou atu ai i tera fare, to ˈna mau pou e to ˈna mau ofai.’”
5 Tapiri maira te melahi o te paraparau ra ia ˈu e na ô maira ia ˈu: “A nânâ na i to mata e a hiˈo eaha te haere mai ra i rapae.”
6 Ui atura ïa vau: “Eaha teie?”
Pahono maira oia: “O te farii faito epha* tera e haere ra i rapae.” Na ô faahou maira oia: “Tera to ratou huru i nia i te fenua taatoa.”
7 Ite atura vau i te tapoˈi tapau menemene i te amoraahia i nia, e e vahine te parahi ra i roto i te oini.
8 Na ô maira ïa te melahi: “O Ino te iˈoa o tera vahine.” Faahoˈi ihora oia ia ˈna i roto i te oini e huri ihora oia i te tapoˈi tapau teiaha i nia i te auvaha o te oini.
9 Hiˈo atura vau i nia e ite atura vau e piti vahine te reva ˈtu ra, te maue ra raua i roto i te mataˈi. E pererau mai to te heside to raua. Ua rave raua i te oini e ua amo raua i te reira i nia i te raˈi.*
10 Ui atura ïa vau i te melahi o te paraparau ra ia ˈu: “Ihea raua e afai ai i tera oini?”
11 Pahono maira oia: “I te fenua o Sinara.*+ I ǒ, e patu raua i te hoê fare no ˈna. E ua oti anaˈe tera fare, e tuuhia tera vahine i roto, tei reira to ˈna vairaa.”
Nota i raro i te api
^ 1 kubiti: 44,5 cm. Hiˈo i te tuhaa hau B14.
^ Aore ra “sabaota.”
^ Heb: “te epha,” e farii aore ra e oini teie no te faito i te epha tapihoo. 1 epha: 22 L. Hiˈo i te tuhaa hau B14.
^ Heb: “i ropu i te fenua e te raˈi.”
^ Oia hoi Babulonia.