Zekaria 8:1-23
8 Tae faahou mai ra te parau a Iehova o te mau nuu* e na ô ra:
2 “Teie ta Iehova o te mau nuu e parau ra: ‘E paruru vau ia Ziona ma te itoito rahi,+ e ma te riri rahi tahoo, e paruru vau ia ˈna.’”
3 “Teie ta Iehova e parau ra: ‘E hoˈi au i Ziona+ a parahi atu ai i Ierusalema.+ E piihia Ierusalema te oire o te parau mau,*+ e te mouˈa o Iehova o te mau nuu, te mouˈa moˈa.’”+
4 “Teie ta Iehova o te mau nuu e parau ra: ‘E parahi faahou te mau tane e vahine ruhiruhia na te mau mahora o Ierusalema, te taata tataitahi e ta ˈna turutootoo i te rima no te matahiti paari.*+
5 E î te mau mahora o te oire i te tamaroa e te tamahine e hauti ra.’”+
6 “Teie ta Iehova o te mau nuu e parau ra: ‘E manaˈo paha to te nunaa o te toe mai i taua tau ra e eita te reira e nehenehe e tupu. Eita anei râ ta ˈu e nehenehe e faatupu i te reira?’ Te na reira mai ra Iehova o te mau nuu.”
7 “Teie ta Iehova o te mau nuu e parau ra: ‘E faaora vau i to ˈu nunaa i te mau fenua o hitia o te râ e tooa o te râ.+
8 E aratai au ia ratou i Ierusalema+ e i reira ratou e parahi ai. E riro ratou ei nunaa no ˈu, e e riro vau no ratou ei Atua+ parau mau* e te parau-tia.’”
9 “Teie ta Iehova o te mau nuu e parau ra: ‘Ia puai to outou rima,*+ outou o te faaroo ra i teie nei i teie mau parau no roto i te vaha o te mau peropheta,+ teie mau parau tei faaitehia na i te mahana i haamauhia ˈi te niu o te fare o Iehova o te mau nuu no te paturaa o te hiero.
10 Inaha, na mua ˈtu, aita e aufauraa i te taata e te animara.+ E mea atâta ia haere e ia hoˈi mai ma te hau no te enemi, ua turai hoi au i te taata atoa ia aro te tahi i te tahi.’
11 “‘I teie nei râ, eita vau e faautua faahou i te toea o teie nunaa mai i mutaa ihora,’+ te na reira mai ra Iehova o te mau nuu.
12 ‘E tanuhia hoi te huero o te hau. E hotu mai te vine e e faatupu te fenua i te maa.+ E horoa mai te raˈi i te hupe e e faafanaˈo vau i te toea o teie nunaa i teie mau mea atoa.+
13 E mai ia outou i faahitihia na i roto i te mau faainoraa a te mau nunaa,+ e te nunaa o Iuda e te nunaa o Iseraela, e faaora vau ia outou e e faahitihia outou i roto i ta ratou mau haamaitairaa.+ Eiaha e mǎtaˈu!+ Ia puai to outou rima.’*+
14 “Teie hoi ta Iehova o te mau nuu e parau ra: ‘“Mai ia ˈu i faaoti e faatae mai i te ati i nia ia outou no te mea ua faariri to outou mau tupuna ia ˈu e aita vau i tatarahapa,”+ te parau mai ra Iehova o te mau nuu,
15 “i teie taime, ua faaoti au e hamani maitai ia Ierusalema e i te nunaa o Iuda.+ Eiaha e mǎtaˈu!”’+
16 “‘Teie te mau mea ta outou e rave: a faaite i te parau mau te tahi i te tahi+ e ia haava outou i te uputa o to outou mau oire, e rave outou i te mea tia e e faatupu outou i te hau.+
17 Eiaha e opua i roto i to outou aau+ e hamani ino te tahi i te tahi e eiaha e hinaaro i te horeo haavare.+ Mea hae hoi na ˈu i tera mau ohipa,’+ te na reira mai ra Iehova.”
18 Tae faahou maira te parau a Iehova o te mau nuu ia ˈu ra e na ô ra:
19 “Teie ta Iehova o te mau nuu e parau ra: ‘E riro te haapaeraa maa o te maha,+ o te pae,+ o te hitu+ e o te ahuru o te avaˈe+ ei oaoaraa no te nunaa o Iuda, ei oroa oaoa.+ A hinaaro ïa i te parau mau e te hau.’
20 “Teie ta Iehova o te mau nuu e parau ra: ‘E tae mai râ te tau e haere mai ai te nunaa e te taata no e rave rahi oire.
21 E haere te feia no te hoê oire i te feia ra no te tahi atu oire a na ô ai: “E haere anaˈe e taparu i te farii maitai a* Iehova. E haere anaˈe e imi ia Iehova o te mau nuu. Te haere ra matou.”+
22 E haere mai e rave rahi taata e nunaa puai e imi ia Iehova o te mau nuu i Ierusalema+ e e taparu i te farii maitai a* Iehova.’
23 “Teie ta Iehova o te mau nuu e parau ra: ‘Ia tae i taua mau mahana ra, e haru hoê ahuru taata no te mau reo atoa o te mau nunaa,+ oia mau, e haru maitai ratou i te ahu* o te hoê ati Iuda a na ô ai: “Te hinaaro ra matou e haere na muri ia outou,+ ua faaroo hoi matou e tei ia outou ra te Atua.”’”+
Nota i raro i te api
^ Aore ra “sabaota.”
^ Aore ra “haapao maitai.”
^ Heb: “no te mahana e rave rahi.”
^ Aore ra “haapao maitai.”
^ Aore ra “Ia itoito outou.”
^ Aore ra “Ia itoito outou.”
^ Aore ra “tamǎrû i te aro o.”
^ Aore ra “tamǎrû i te aro o.”
^ Aore ra “hiti ahu.”
