HAAMANAˈO ra oe no te aha te hoê melahi a te Atua i riro mai ai ei Diabolo pii-atoa-hia Satani?— Ua hinaaro tera melahi ia haamorihia o ˈna, eiaha râ te Atua. I tera taime, ua patoi oia i te Atua. Ua apee anei te tahi atu mau melahi ia Satani?— E. Te parau ra hoi te Bibilia, ‘ua pee ta Satani mau melahi ia ˈna.’ E parau-atoa-hia ratou demoni.—Apokalupo 12:9.

Te tiaturi ra anei tera mau melahi ino, aore ra demoni, i te Atua?— Te pahono ra te Bibilia i roto i te Iakobo 2:19: ‘Te tiaturi atoa ra te mau demoni te vai ra te Atua.’ Teie nei râ, te riaria ra ratou. E faautua hoi te Atua ia ratou no te mau ohipa ino ta ratou i rave. Eaha hoi ta ratou i rave?—

Te parau ra te Bibilia ua faarue tera mau melahi i to ratou parahiraa i te raˈi no te ora ei taata i nia i te fenua. Ua hinaaro ratou e taoto i te mau tamahine nehenehe a te taata. (Genese 6:1, 2; Iuda 6) Eaha ta oe i ite no nia i te taatiraa, oia hoi te taotoraa te hoê tane i te hoê vahine?—

Ia taoto te hoê tane i te hoê vahine, e ohipa taa ê te tupu i rotopu ia raua. E i muri iho, e nehenehe te vahine e fanau mai i te aiû. Aita te Atua i faatia ia na reira te mau melahi. Ta te Atua i hinaaro, ia tupu noa tera huru taotoraa i rotopu i te tane e ta ˈna vahine faaipoipo. Ia fanau mai te aiû, e nehenehe ïa te tane e ta ˈna vahine e aupuru ia ˈna.

I te raveraa te mau melahi i te tino taata no te taoto i te mau tamahine i nia i te fenua, ua riro mai ta ratou mau aiû i muri aˈe ei tiapai taata. Mea ino ratou e te haamauiui i te taata. No reira, ua faatupu te Atua i te ûa rahi no te haapohe i tera mau tiapai taata e te feia ino atoa. Ua faaue râ oia ia Noa ia hamani i te hoê araka, te hoê pahi rahi, no te faaora i te feia e rave i te maitai. Ua parau te Orometua Rahi, mea faufaa ia haamanaˈo i te ohipa i tupu i te diluvi.—Genese 6:3, 4, 13, 14; Luka 17:26, 27.

Ua ite anei oe eaha ta te mau melahi ino i rave i te diluvi?— Ua faarue ratou i to ratou tino taata e ua hoˈi i te raˈi. E ere faahou ratou i te melahi na te Atua, e melahi râ na Satani, e demoni! E ta ratou mau tamarii, tera mau tiapai taata?— Ua pohe ratou i te diluvi, e oia atoa te feia tei ore i faaroo i te Atua.

I muri aˈe i te diluvi, aita te Atua i faatia faahou i te mau demoni ia riro mai ei taata. Noa ˈtu eita tatou e ite ia ratou, te tamau noa ra te mau demoni i te turai i te taata ia rave i te mea ino. Ua rahi atu â te ohipa ino ta ratou e rave nei no te mea ua hurihia mai ratou i raro i te fenua.

Ua ite anei oe no te aha eita tatou e nehenehe e ite i te mau demoni?— No te mea e ere to ratou tino mai to tatou, mea mau râ ratou. Te parau ra te Bibilia ‘te haavare nei Satani i te mau taata atoa i nia i te fenua’ e te tauturu ra ta ˈna mau demoni ia ˈna.—Apokalupo 12:9, 12.

E nehenehe anei Satani e ta ˈna mau demoni e haavare atoa ia tatou?— E, mai te peu eita tatou e ara! Eiaha râ tatou ia riaria! Ua parau te Orometua Rahi ‘aita to te Diabolo e mana i nia ia ˈu.’ Ia riro noa tatou ei hoa no te Atua, e paruru oia ia tatou i te Diabolo e ta ˈna mau demoni.—Ioane 14:30.

Mea faufaa ia ite eaha te mau ohipa ino ta te mau demoni e turai ia tatou ia rave. Eaha te mau ohipa ino ta ratou i rave a haere mai ai i nia i te fenua?— Hou te diluvi, ua taoto ratou i te mau tamahine a te taata, aita te Atua i faatia i te reira! I teie mahana, mea au roa na te mau demoni ia ore te taata e faaroo i ta te Atua mau ture no nia i te taotoraa te tane i te vahine. Ahani na, o vai te nehenehe e taoto i te tane aore ra i te vahine?— Ua tano oe, o te tane anaˈe e ta ˈna vahine faaipoipo.

I teie mahana, e taoto te tahi mau tamaroa i te tamahine, e ere râ i te mea tano! Te faaite ra te Bibilia ua hamani te Atua i te mero taatiraa o te tane e o te vahine no te tahi tumu papu, oia hoi ia taoto te tane faaipoipo i ta ˈna iho vahine. (Levitiko 15:1-3) Mea au roa na te mau demoni ia rave te taata i te mau mea opanihia e Iehova. Ei hiˈoraa, mea au na te mau demoni ia mirimiri te hoê tamaroa e tamahine i to te tahi e te tahi mero taatiraa. E hinaaro anei oe e faaoaoa i te mau demoni?—

Ua ite anei oe eaha te tahi atu mea mea au na te mau demoni, mea hae râ na Iehova?— O te hamani-ino-raa i te taata. (Salamo 11:5) Haamanaˈo ra oe te mau tamaiti a te mau demoni, tera mau tiapai taata? Eaha ta ratou i rave?—

Mea au atoa na te mau demoni e faariaria i te taata. I te tahi taime, e faatiaturi ratou te ora noa ra te hoê taata tei pohe. E nehenehe ratou e paraparau mai te taata i pohe ia manaˈo tatou te ora noa ra te taata pohe. No reira e rave rahi taata e tiaturi ai te vai ra te tupapau.

A haapao maitai ïa eiaha Satani e ta ˈna mau demoni ia haavare ia oe! Ua faaara te Bibilia ‘e faahua melahi maitai Satani e ta ˈna mau demoni ia ratou.’ (Korinetia 2, 11:14, 15) Mea ino râ ratou! E hiˈo anaˈe eaha ta ratou e rave nei ia riro tatou mai ia ratou.

Ihea te taata e haapii ai ia hamani ino, ia rave i te peu taotoraa tia ore e ia tiaturi i te tupapau?— E ere anei i roto i te afata teata, te mau hauti roro uira, i nia i te natirara e i roto i te mau buka arearea? E tauturu anei te reira ia riro ei hoa no te Atua, aore ra ei hoa no te Diabolo e ta ˈna mau demoni? Eaha to oe manaˈo?—

O vai te hinaaro ra ia faaroo e ia mataitai tatou i te mau mea ino?— E, o Satani e ta ˈna mau demoni. Eaha ïa ta oe, aore ra ta ˈu, e nehenehe e rave?— Mea faufaa ia taio, ia faaroo e ia mataitai i te mau mea e maitai ai tatou e o te tauturu mai ia tavini ia Iehova. Eaha te tahi o tera mau mea maitai ta tatou e nehenehe e rave?—

Ia rave tatou i te mea maitai, eita tatou e riaria i te mau demoni. Mea puai aˈe Iesu ia ratou e te riaria ra ratou ia ˈna! I te hoê mahana, ua parau te mau demoni ia Iesu: “Ua haere mai oe e haamou ia matou?” (Mareko 1:24) Eita anei tatou e oaoa ia haamou Iesu ia Satani e ta ˈna mau demoni?— A tiai noa ˈi i tera taime, e paruru Iesu ia tatou i te mau demoni ia tamau tatou i te here ia ˈna e i to ˈna Metua i te raˈi.