Haapiiraa 33

A faaite i te anaanatae rahi e te mahanahana

1. Na te aha e faaitoito i to outou anaanatae rahi?

 ¹ Te faaoraora nei te anaanatae rahi i te hoê oreroraa parau. Mai te peu e aita ta outou mau faahitiraa e faaanaanatae ra ia outou, eita atoa ïa e faaanaanatae i te feia e faaroo ra ia outou. Mai te peu e eita ta outou tumu parau e faaitoito ia outou, eita atoa ïa e faaitoito i te feia e faaroo ra ia outou. Ia nehenehe te hoê taata orero e faaite i te hoê anaanatae rotahi, e tia ia papu ia ˈna e te hinaaro nei te feia i amui mai e faaroo i te mea o ta ˈna e parau. Oia hoi te auraa, e haapao outou i te feia i amui mai ia faaineine anaˈe outou i ta outou oreroraa parau, e e maiti outou i te mau manaˈo maitatai no ratou e e faanaho outou  ia nehenehe te feia e faaroo ra e haafaahiahia oioi noa i te faufaaraa. Ia na reira outou, e turaihia outou ia paraparau ma te mahanahana e e ohipa te feia e faaroo ra ma te tano.

2-5. Nafea te hoê huru oreroraa au maitai ia faaite i te anaanatae rahi o te taata orero?

² Anaanatae rahi faaitehia na roto i te oraora o te huru oreroraa. Te faitohia ra to outou anaanatae rahi ia au i te oraora o ta outou huru oreroraa. Eita outou e nehenehe e riro ei taata tâuˈa ore aore ra huru haumani. E tia e ia faaite to outou hohoˈa mata, to outou reo e ta outou mau parau i to outou anaanatae rahi. E tia e ia paraparau outou ma te puai, te ieie e te putapû, ma te ore râ e riro ei taata manaˈo etaeta. Eiaha atoa râ e vaiiho ia outou ia arataihia e to outou ieie. Te taata orero o te erehia i te hitahita ore, e ere-atoa-hia oia i te mau taata e faaroo ra ia ˈna.

³ E faatupu te anaanatae rahi i te taairaa. Mai te peu e e anaanatae rahi to outou, e mai te reira atoa ïa te huru o te feia e faaroo ia outou, e mai te peu e e mea maitai ta outou taairaa e o ratou, e itehia to ratou anaanatae rahi i nia ia outou e e tapea noa te reira i to outou ieie. Tera râ, mai te peu e mea taahoa ta outou oreroraa parau, e fiu te feia e faaroo ra ia apee ia outou.

⁴ Te parau ra o Paulo e e tia ia tatou ia mahanahana i te varua o te Atua. Mai te peu e te reira to outou huru, e horoa-atoa-hia te varua o te Atua i te feia e faaroo ra e e turaihia ratou ia ohipa. Ua mahanahana atoa o Apolo i te varua, e te parau nei te Bibilia no ˈna mai te hoê taata manaˈo papu.—Roma 12:11; Ohi. 18:25; Ioba 32:18-20; Ier. 20:9.

⁵ Mai te peu e te hinaaro nei outou i te anaanatae rahi no te hoê oreroraa parau, e tia na mua e ia taa papu ia outou iho e e mau parau anaanatae roa ta outou e hinaaro ra e faaite. A tuatapapa i te tumu parau tae roa i te taime e noaa ˈi ia outou i te mau manaˈo o te faaanaanatae rahi ia outou. Aita e faufaa e ia riro ei mau manaˈo apî, e nehenehe râ outou e faahiti atu na roto i te hoê huru taa ê e tano noa ia outou iho. Mai te peu e ua papu ia outou e e mau parau ta outou no te faaitoito i te feia e faaroo ra i roto i ta ratou haamoriraa, i roto i ta ratou taviniraa, e i roto i to ratou oraraa kerisetiano, e tumu mau â te reira no outou no te anaanatae rahi, e eita e ore e oraora maitai ta outou oreroraa parau.

6-9. Eaha te faahopearaa o te mau manaˈo o te hoê oreroraa parau i nia i te anaanatae rahi o te taata orero?

⁶ Anaanatae rahi aifaito maitai i te tumu parau. Ia tauiui e ia faufaa ta outou tumu parau no te feia e faaroo ra, e tia ia ape i te tapea i to outou anaanatae rahi i te hoê faito teitei roa i te roaraa o te oreroraa, aita anaˈe, e faarohirohi outou i te feia e faaroo ra maoti i te turai ia ratou i te ohipa. Te haapapu faahou nei râ te reira i te faufaaraa ia faaineine i te tahi mau manaˈo huru rau no te horoa i te tauiuiraa i roto i te huru oreroraa. Oia hoi, e titau te tahi mau tuhaa hau atu i  te anaanatae rahi i te tahi atu; e tia mau â e ia faataa ê i te reira ma te aravihi.

⁷ O te mau manaˈo matamua iho â râ te tia ia vauvau ma te anaanatae rahi. Ia vai i roto i ta outou oreroraa parau i te tahi mau manaˈo matamua o tei riro ei mau tuhaa faufaa. I te rahiraa o te taime, o taua mau manaˈo ra te faaitoito i te feia e faaroo ra e o te turai ia huti i te mau faaotiraa o ta outou faataaraa, ta outou haaferuriraa aore ra ta outou mau aˈoraa. I to outou haaputapûraa i te feia e faaroo ra, e tia ia turai ia ratou i teie nei ia rave i te ohipa ma te faaite i te mau haamaitairaa, te mau oaoaraa e te mau hopoia e noaa mai ia faaohipahia taua mau parau mau ra. E tia mau â ïa ia paraparau ma te anaanatae rahi.

⁸ Teie nei râ, a ape i te vauvau i te tahi mau manaˈo ma te haapao ore. Eiaha roa ˈtu ia erehia ia outou i to outou anaanatae rahi no te tumu parau e eiaha e vaiiho e ia toetoe to outou ieie. A feruri i te hoê aili e amu ra i te aihere ma te hau i roto i te hoê uru raau; e huru hau mau to ˈna ia hiˈohia, ua ineine râ oia ia tupu te hoê noa ˈˈe ati ia rave i te hoê ohipa e ia atea na roto i te tahi mau ouˈaraa faahiahia mau. E huru hau to ˈna te vai ara noa ra râ oia. E nehenehe outou e pee i to ˈna hiˈoraa, i roto atoa i te mau tuhaa o te oreroraa parau aita e titau ra hau atu i te anaanatae rahi.

⁹ Eaha te auraa o te mau parau atoa na mua ˈtu? Eiaha roa ˈtu e faarahi noa i te oraora o te huru oreroraa. E tia e ia turaihia e te hoê tumu tano e vai ra i roto i te tumu parau. Na te taeae aˈo e haava mai te peu e ua faito maitai anei to outou anaanatae rahi i te tumu parau te tia ia outou ia vauvau. Ua rahi roa anei, navai ore aore ra tano ore? Oia mau, e haapao oia i to outou iho huru. Mai te peu e mea mamahu roa outou, e aˈo oia ia outou ia faaite hau atu i te anaanatae rahi, mai te peu râ e e ite oia e ua rahi roa, e ani oia ia outou ia haere mǎrû. A faito maitai i to outou anaanatae rahi i te tumu parau e a tauiui i to outou mau manaˈo ia aifaito maitai ta outou huru oreroraa mai te omuaraa e tae atu i te hopea o te oreroraa parau.

**********

10-12. Eaha ta tatou e taa ra na roto i te parau mahanahana e te putapû?

¹⁰ Ua tuati maitai te anaanatae rahi i te mahanahana e te putapû. Teie nei râ, e arataihia taua mau huru ra e te tahi mau huru taa ê o te aau e e faatupu i te tahi mau faahopearaa huru rau i rotopu i te feia e faaroo ra. I te rahiraa o te taime, e faaoaoa te tumu parau e vauvauhia e te hoê taata orero ia ˈna, e huru mahanahana râ to ˈna ia feruri oia i te feia e faaroo ra na roto i te hinaaro e tauturu ia ratou. E ani te tapao “Mahanahana e te putapû” i faahitihia i nia i ta outou api iti Aˈoraa no te oreroraa, i te hoê ara-maite-raa rahi.

¹¹ Mai te peu e e paraparau outou ma te mahanahana e te  putapû, e papu i te feia e faaroo ra ia outou e e taata outou tei î i te here, te haapao maitai e te aau mǎrû aroha noa. E huti outou i to ratou manaˈo mai te hoê auahi i te hoê po toetoe. E faaitoito te hoê faaiteraa ma te anaanatae rahi, e titau-atoa-hia râ te mahanahana e te putapû. Eita e navai noa ia faaitoito i te feruriraa; e tia atoa ia haaputapû i te mafatu.

¹² Ei hiˈoraa, e tano anei ia taio i te irava o te Galatia 5:22, 23, e parau ra no te here, te faaoromai rahi, te hamani maitai, e te mǎrû, ma te ore e faaite i taua mau huru ra na roto i te tahi mau ravea? A tapao atoa na i te aau mǎrû aroha noa ta Paulo e faaite ra i roto i te Tesalonia 1, 2:7, 8. E ani taua mau huru ra i te manaˈo mahanahana e te putapû. Nafea ia faaite i taua mau huru ra?

13, 14. Nafea e nehenehe ai e faaite i te mahanahana na roto i te hautiraa o te hohoˈa mata?

¹³ Na roto i te mau hautiraa o te hohoˈa mata. Mai te peu e e faaite outou i te manaˈo mahanahana no te feia e faaroo ra ia outou, e tia e ia itehia i nia i to outou hohoˈa mata, aita anaˈe e feaa ratou i to outou huru mahanahana. E tia râ e ia faaitehia ma te aau rotahi. Eita e nehenehe e amo mai te hoê tapoˈi hohoˈa mata. Eiaha atoa e hape i te mahanahana e te manaˈo horuhoru noa, eiaha atoa e te manaˈo hohonu e te huru putapû. E tia e ia faaite te mau hautiraa o te hohoˈa mata i to tatou aau rotahi.

¹⁴ I te rahiraa o te taime, e feia ineine i te faaroo to mua ia outou. Mea navai noa i te hiˈo atu i te feia i putuputu mai no te ite i te mau manaˈo mahanahana no ratou. E faatupu te reira i te hoê huru anaanatae e te auhoa. A imi i te hoê taata faaroo e huru auhoa taa ê to ˈna e a paraparau atu ia ˈna i te tahi tau minuti, e a imi atu i te tahi, e a na reira noa. E maitai mai to outou taairaa e te feia e faaroo ra e i te hoê â taime e itehia i roto i ta outou huru hiˈo i te mau manaˈo mahanahana ta outou e ite ra no te feia e faaroo ra e eita e ore e huti-atoa-hia to ratou manaˈo i nia ia outou.

15-19. A faahiti e na te aha e turai i te reo o te taata orero ia faaite i te mahanahana e te putapû.

¹⁵ Na roto i te taˈiraa reo. Ua haapapuhia e e nehenehe atoa te mau animala i roto i te tahi faito, e ite i to tatou mau manaˈo hohonu ia au i te taˈiraa o to tatou reo. Mai te peu e e parau mau no te mau animala, mea papu e e taa te feia e faaroo ra i te mahanahana e i te mau manaˈo putapû e faaitehia e te taˈiraa reo o te taata orero.

¹⁶ Mai te peu e te ite ra outou e aita e taairaa i rotopu ia outou e te feia e faaroo ra e te haapao rahi nei outou i te mau parau ta outou e faahiti maoti i to ratou faahopearaa, e fifi ïa outou i te huna i te reira i te feia haapao maitai e faaroo nei ia outou. Taa ê atu râ, mai te peu e te anaanatae mau nei outou i te feia i putuputu mai e te hinaaro nei outou e faaite ia ratou i te mau manaˈo e vai ra i roto i ta outou oreroraa parau, e itehia te reira i roto i te taˈiraa o to outou reo.

 ¹⁷ I reirâ, e tia ia faaite i te aau rotahi. Eiaha e faaite i te mahanahana ma te haavarevare, eiaha atoa e faahuru ê i to outou anaanatae rahi. Eiaha roa ˈtu te hoê taata orero ia horoa i te hoê huru mǎrû haavarevare. Aita roa ˈtu to te mahanahana e te putapû e auraa i te manaˈo horuhoru noa e te reo ruru o te feia poro na roto i te afata teata o te imi ra i te faataˈi i te nahoa taata.

¹⁸ Mai te peu e e reo teiaha e etaeta to outou, e fifi ïa outou i te paraparau ma te mahanahana. A tutava ma te haapao maitai i te haapaiuma i taua fifi ra. E titauhia i te taime no te haamaitai i to outou reo, e nehenehe râ ta outou mai te peu e e rave outou i te mau tutavaraa e titauhia.

¹⁹ Teie te tahi aˈoraa ohie: I te mea e e faariro te mau vauera e faahiti-poto-hia i te reo etaeta, a haapii i te faahiti ma te taere rii aˈe. E riro mai ïa te taˈiraa o to outou reo i te mahanahana aˈe.

20, 21. Nafea te tumu parau o te oreroraa parau ia hauti i nia i te mahanahana e te putapû e faaitehia e te taata orero?

²⁰ Faitohia ia au i te tumu parau. Mai no te anaanatae rahi, i roto i te rahiraa o te tupuraa, e itehia te mahanahana e te putapû ia au i te huru o te tumu parau. Te horoa nei te irava no te Mataio 23 i te hoê hiˈoraa maitai. I to Iesu faautuaraa i te mau papai parau e te mau Pharisea, mea papu e ua paraparau oia ma te puai e te ieie. I rotopu râ i ta ˈna mau faahitiraa parau au ore e te riri, te ite nei tatou i te hoê pereota î i te mahanahana e te mǎrû. Na roto i te aroha to ˈna parauraa e: “E rave rahi to ˈu haaputuraa i to tamarii, mai te moa e haaputu i to ˈna mau fanauˈa i raro aˈe i to ˈna pererau ra; aita râ i tia ia outou.” E ma te faarue i te toparaa reo mǎrû, ua parau faahou atura o Iesu Mesia e: “Ei teie nei, to outou utuafare e tuuhia ˈi i te ano.” I reira râ, e toparaa reo puai e te faahapa ïa.

²¹ I roto i teihea tupuraa e tia ia paraparau ma te mahanahana e te manaˈo putapû? E pinepine e nehenehe e faaohipa i taua huru ra i roto i te pororaa aore ra i roto i te hoê oreroraa parau a te feia haapii, e faaohipahia râ no te haaferuri iho â râ, no te faaitoito, no te aˈo, no te hiˈo aroha atoa ia vetahi pae, e te vai atu â. Ma te faaea mahanahana noa, eiaha ia moehia ia outou i te anaanatae rahi i te taime e titauhia. Ia vai aifaito noa outou i roto i te mau mea atoa e a paraparau i te mau taime atoa ma te faaite hua i to outou aau tae.

[Uiraa haapiiraa]