Haapiiraa 6

‘E rohi â i te taio i te parau i mua i te taata’

1, 2. Eaha te mau taime i reira tatou e taio ai i mua i te taata?

 ¹ Ua aˈo atu te aposetolo Paulo ia Timoteo e: ‘E rohi â i te taio i te parau i mua i te taata,’ ma te faaue atoa e haapii atu i teie aravihi i to ˈna mau taeae kerisetiano ia noaa mai ia ratou te mau huru maitatai atoa e titauhia no te rave i te taviniraa. (Tim. 1, 4:13) E tano teie aˈoraa i faauruahia i teie mahana no te mau tavini tataitahi a te Atua, e e mea maitai ia faaroo tatou.

² E titau-pinepine-hia te tavini teotaratia ia taio i mua i te taata. I te haapiiraa o Te Pare Tiairaa e i te haapiiraa buka a te amuiraa, e taiohia te mau irava bibilia e te mau paratarapha ma te reo puai. E taio-atoa-hia te mau irava bibilia i te putuputuraa no te taviniraa, i te Haapiiraa o te taviniraa teotaratia, e i roto atoa i te taviniraa. E mea maitai ïa no te tavini tataitahi, no ˈna iho e no te feia e faaroo mai ia ˈna, ia ite maitai i te taio i mua i te taata.

3. No te aha e mea faufaa ia faaineine?

³ Na roto i te parau taioraa i mua i te taata, te faahiti nei matou i te mau taioraa atoa ma te reo puai e ravehia no te hoê aore ra e rave rahi mau taata e faaroo mai. E faufaahia anei ratou i te taioraa mai te peu e e faahiti hape te taata taio i te mau parau, e faaea oia i te mau vahi eita e tano aore ra na roto i to ˈna tuuraa reo, e haapouri oia i te auraa o te pereota? E haapao maitai anei ratou mai te peu e eita oia e taio ma te aau tae, ma te haumani râ? No te taio maitai i mua i te hoê pǔpǔ  taata, e tia ia faaineine na mua ˈˈe. Ia titauhia tatou ia rave i te hoê taioraa ma te reo puai, te faaitoitohia ra ia taio na mua i te parau, noa ˈtu e o te taio-noa-raa i te mau paratarapha i te haapiiraa buka. Aita anaˈe, eita te feia i tae mai e faufaahia, e e haapii paha ratou i te mau faahitiraa parau hape. No reira ïa e mea faufaa roa no te tavini tataitahi ia rohi â i te taioraa i mua i te taata.—Hab. 2:2.

4, 5. Eaha te mau huru maitatai te tia ia noaa no te taio i mua i te taata e ia taa mai te taata i ta tatou parau e ia itoitohia ratou?

⁴ Te mau huru maitatai titauhia. Ia taio outou ma te reo puai, a faaite i te aau tae. A taio ma te mahanahana, ma te faaite i te mau manaˈo putapû ta te mau parau e faahiti ra. E ape ïa outou i te taio noa ma te reo toetoe e te oraora ore. A ara ia ore outou ia faaiti i te puairaa o te reo e aita ˈtura vetahi mau tuhaa faufaa roa o te parau e faaroohia e te taata i putuputu mai. E tia ia haapuai maitai i te reo ia faaroohia mai i muri roa i te piha. E ere hoi i te mea maitai ia titau-anaˈe-hia te taata ia faatoro i te tariˈa no te faaroo, noa ˈtu e no te hoê noa taime.

⁵ E tia ia faahiti maitai i te parau, ma te ore e ouˈa i te tahi mau reta parau aore ra ia tâpû i te tahi mau parau e aita ˈtura e taa-faahou-hia. Tera râ, eiaha atoa ia tuu rahi roa i te tapao i nia i te faahitiraa parau e eita ˈtura e haapao-faahou-hia te poroi. E mea maitai te faahitiraa parau ia taa ohie noa i te taata tataitahi e faaroo ra i te mau parau atoa o te tuhaa e taiohia ra. Mai te peu e eita e taa-maitai-hia ia paraparau anaˈe te hoê taata taio, e mea pinepine no te mea ïa e aita oia e haapuroro ra i to ˈna reo i nia i te feia e faaroo ra. A haamatau ïa i te taio ma te afai i to outou upoo i nia. A hamama i te vaha ia haere maitai mai te mau taˈiraa reo i rapae ma te ore e haafifihia.

6. Nafea tatou e ite ai e ihea tatou e faateiaha ˈi i te reo, e nafea te mau faafaaearaa ia riro ei ravea faateiaharaa?

⁶ E mea faufaa atoa te faateiaharaa i te reo. Na ˈna hoi e haamatara i te maramarama o te taioraa. Ua ite-papu-hia hoi e e nehenehe te tauiraa i te teiaharaa o te reo e taui roa i te auraa o te hoê pereota i roto i te feruriraa o te feia e faaroo ra. I te tahi mau taime, e tia ia faateiaha i te reo i nia i te hoê anaˈe parau, e mea pinepine râ e tia ia faateiaha i te hoê pǔpǔ parau, e tae noa ˈtu i te hoê pereota taatoa. Na te auraa e faataa e ihea roa e faateiaha ˈi i te reo; eiaha noa râ te auraa o te pereota, te auraa taatoa râ o te parau haapapuraa. E tuhaa atoa ta te mau faafaaearaa i te vahi e tano maitai i roto i te faateiaharaa i te reo. E haamatara te mau taime faaearaa poto i te tahi mau pǔpǔ parau e e haapapu atoa i te mau manaˈo tumu. E tapao te mau faaearaa roa ˈˈe i te hopearaa o te hoê tuhaa faufaa o te parau haapapuraa.

7. Eaha te mea e nehenehe ai tatou e taio mai te mea ra e te paraparau ra tatou?

⁷ E tutava atoa te taata taio maitai i te tauiui i to ˈna tuuraa reo e te vitivitiraa o ta ˈna mau parau. Mai te peu e aita teie mau tauiuiraa, e mea pohe ïa te taioraa e te au ore ia faaroo.  Ia faaohipa-maitai-hia, e tauturu rahi teie mau faaiteraa huru rau ia taio ma te reo o te tahe noa, mai te mea e te aparau noa ra tatou.

8. Eaha te mau taime e tano ai ia taio i te hoê oreroraa parau?

⁸ Te taioraa i te hoê parau papaihia. Hoê o te mau taime faufaa roa e titauhia ˈi ia ite i te taio i mua i te taata, o te taioraa ïa i te hoê oreroraa parau papaihia. I te tahi mau taime, e titauhia teie huru oreroraa. Ei hiˈoraa, i te tahi mau taime te faataa nei te Taiete e ia vauvau te mau amuiraa atoa o te nunaa a te Atua i roto i te hoê fenua i te hoê poroi i te hoê â taime. Aore ra, e tia ia taio i te tahi mau oreroraa parau i te mau tairururaa rahi, no te mea paha e e nehenehe te mau vea e faahiti faahou i te tahi mau tuhaa, aore ra no te mea e mea fifi roa te tumu parau e e tia ia vauvauhia ma te ore roa e hape i te parau.

9, 10. Eaha te fifi matamua e farereihia ia titauhia tatou ia taio i te hoê parau papaihia ma te reo puai, e nafea tatou ia faatitiaifaro i te reira?

⁹ Te fifi matamua, o te taioraa ïa i te parau papaihia mai te mea e te patu ra tatou i ta tatou mau pereota mai i roto i te hoê aparauraa. Teie râ, e tia ia faarahi-roa-hia te tuuraa reo. I te rahiraa o te mau tupuraa, mea taa ê rii te mau pereota o te hoê parau papaihia i ta tatou i matau i te faaohipa; e mea roa ˈˈe paha e mea fifi aˈe. E mea maiti-maitai-hia te mau pueraa parau e mea taa ê te huru tâpûraa i te mau parau i ta tatou huru paraparauraa i matau. Peneiaˈe te manaˈo ra outou e mea hau aˈe ta outou oreroraa parau mai te peu e e orero mai outou na roto i ta outou iho mau parau. Tera râ, mai te peu e e faaineine outou, e noaa mai ïa te aravihi e e rave outou i te mau haereraa i mua papu i roto i te aravihi no te taio i te hoê oreroraa parau papaihia.

¹⁰ O te faaineineraa te taviri o te manuïaraa. A rave i te taime no te haamatau ia outou e te parau. A taio i te oreroraa parau papaihia e rave rahi taime hou outou e taa maramarama ˈi i te mau manaˈo matamua. Mai te peu e e farerei outou i te mau parau o ta outou i ore i ite, a maimi i roto i te hoê titionare maitai e a nota i nia i te parau papaihia nafea ia faahiti. I muri iho, a haamatau ia outou ia taio i te parau ma te reo puai ia taa maitai ia outou te huru papairaa a te taata papai. Te taio nei vetahi i mua i te hoê hiˈo no te haamataro ia ratou i te mataitai tamau atu i te taata e faaroo maira, e tuhaa iti faufaa roa hoi te reira mai te peu e e vauvauhia te oreroraa parau i roto i te hoê piha nainai.

11. Eaha te mau tapao e tuuhia i nia i te parau papaihia o te nehenehe e tauturu ia tatou?

¹¹ E mea faufaa atoa ia reni aore ra ia tapao i te mau parau faufaa o ta outou e hinaaro ra e haamatara. E mea au roa na vetahi taata taio ia faataa ê i te mau pereota na roto i te tahi mau reni tia. Hau atu, e nehenehe e faatuati i te mau parau no roto i te hoê pereota fifi roa aore ra matau-ore-hia te tia ia taio ma te tapiri i te tahi e te tahi, na roto i te tahi mau tapao  menemene rii no te faahaamanaˈo ia outou e eiaha outou ia faafaaea aˈe i roto i teie pǔpǔ parau. E tahe noa ïa ta outou mau parau e e ape outou i te faahape i te auraa. A haamanaˈo atoa i te tapao i te parau papaihia i te vahi e tia ia tuu i te mau faafaaearaa maoro aˈe. Ia faafaaea anaˈe tatou, e tiai ïa te feia e faaroo ra e eaha to muri iho, e haamatara te reira i te tahi mau manaˈo e e vaiiho atoa i te taime ia ô te reira i roto i te feruriraa o te feia e faaroo ra. E mea faufaa atoa ia imi i te mau manaˈo tumu o te oreroraa e ia tapao roa, ia nehenehe outou e haamatara ˈtu na roto i te faateiaharaa i to outou reo, e i muri iho, e taui i te vitivitiraa o ta outou mau parau.

12-15. No te aha e mea faufaa roa ia faaineine maitai i te hoê taioraa o te Bibilia?

¹² Te taioraa o te Bibilia. E mea faufaa roa ia taio paatoa tatou, te feia apî e te feia paari, i te Bibilia. E mea pinepine tatou i te titauhia ia taio i te Bibilia ma te reo puai. I te tahi taime, tei roto te mau taioraa i te Bibilia i te porotarama o te Haapiiraa o te taviniraa teotaratia. Hau atu, te taio nei tatou i te mau irava bibilia ia paraparau anaˈe tatou i te mau taata i roto i ta tatou taviniraa. Tera râ, te taio maitai ra anei tatou i teie mau irava? Ua faaineine anei tatou i te taio ma te reo tahe noa o te tauaparauraa e ma te ore e maumau ia nehenehe tatou e haapapu i te mau parau o te turu ra i te manaˈo o ta tatou e vauvau ra?

¹³ E tia mau â ia faaineine no te taio i te Bibilia. Eiaha ia moehia e o te Parau teie a te Atua, e ua î roa to ˈna mau api i te mau irava nehenehe roa e aita e faaauraa, o te haaputapû i te mau manaˈo hohonu ma te haaferuri atoa râ ma te tia e te tuea maitai. E tia ia tatou ia tutava i te iriti i te auraa ma te tia roa ˈˈe ia maitaihia te feia e faaroo maira ia tatou. Mai te peu e ua ite aˈena tatou e e tia ia tatou ia taio i te Bibilia ma te reo puai, e tia ia tatou ia faaineine maitai, ia taio tatou ma te maumau ore i te mau parau, te mau pereota aore ra te mau huru parau o ta tatou i ore i matau.

¹⁴ A haamanaˈo na i te taime faahiahia mau i reira to te mau ati Iseraela o tei hoˈi atu i Ierusalema e o tei haaputuputu i nia i te mahora i mua i te uputa o te mau Pape faaroo-maite-raa ˈtu i te mau parau a to ratou Atua. Ua rave anei te mau ati Levi o tei nominohia no te taio, i teie ohipa ma te haapao ore e ma te faaineine ore? Te pahono ra te Bibilia e: “Taio maramarama maite ihora ratou i te ture a te Atua, e ua faaite i te auraa, e ite aˈera ratou i taua parau i taiohia ra.” (Neh. 8:8) E faatura hohonu to taua mau taata taio ra no te Atua teitei no ˈna hoi te mau parau o ta ratou i tufa i to ratou mau hoa haamori.

¹⁵ Noa ˈtu e e taio tatou ma te reo puai no tatou iho, i roto i te utuafare, i te Piha no te Basileia aore ra na te mau fare, e taio tatou ma te tapao e iriti ma te haapao maitai i te auraa o  te parau tumu, ma te haamatara i te puai o te mau manaˈo hohonu o ta ˈna e faaite ra e to ˈna mana no te faaitoito i te faaroo. Ua haafaufaahia teie mana e vai ra i te taioraa i mua i te taata ia turai ia ratou ia ohipa i roto i te mau parau i muri nei a te aposetolo Ioane: “E ao to ˈna to te taio, e to te feia e faaroo i teie nei parau tohu, e te haapao i tei papaihia i roto ra: ua fatata te tau e tupu ai.”—Apo. 1:3.

[Uiraa haapiiraa]