Haapiiraa 26

Faahiti-faahou-raa e aparaa rima

1-3. No te aha e tuhaa faufaa mau te faahiti-faahou-raa i roto i te aravihi no te haapii?

 ¹ Ia horoa anaˈe outou i te hoê oreroraa parau, ta outou tapao o te faaiteraa ˈtu ïa i te tahi mau haamaramaramaraa o te vai i roto i te feruriraa o te feia e faaroo ra e o ta ratou e nehenehe e faaohipa. Ia moe ia ratou i te reira, ua erehia ïa te faufaaraa atoa. Te hoê o te mau ravea matamua e tauturu i te feia e faaroo ra ia tapea mai i ta outou mau faahitiraa atoa i roto i to ratou feruriraa, na roto ïa i te faahiti-faahou-raa i te mau tuhaa faufaa roa ˈˈe. E parau tano mau teie e o te faahiti-faahou-raa te hoa o te mehara. O te hoê tuhaa faufaa roa i roto i te aravihi no te haapii. Ua ite outou i to ˈna faufaaraa na roto i te faaohiparaa i te tahi mau irava bibilia. Teie nei râ, ua faataa-ê-hia te tapao “Faahiti-faahou-raa no te haapapu” i nia i ta outou api iti Aˈoraa no te oreroraa, no te mea e tano atoa oia no te tahi atu tuhaa o ta outou oreroraa parau.

² No te tauturu ia outou ia aravihi i te pae o te faahiti-faahou-raa no te haapapu, e hiˈopoa tatou i teie uiraa na roto e piti tuhaa. No te hoê ravea faahiti-faahou-raa taa ê raua e piti atoa ra; e e tapao taa maitai ta raua. E faaohie te faahiti-faahou-raa i te tahi mau tapao matamua i te mehara. E tauturu te reira i te feia e faaroo ra ia taa i te mau tuhaa ta ratou i ore i taa maitai.

³ Tei te huru ïa eiaha noa i te tuhaa o te oreroraa parau, no te faaineineraa atoa. Mea titauhia ia ite na mua i te mau manaˈo te tia ia faahiti-faahou-hia e te taime tano no te na reira.

4-6. A faaite na e nafea ia faaohipa i te hoê haapotoraa “horoa-riirii-hia” aore ra “hopea” no te faahiti faahou i te mau manaˈo matamua.

⁴ Faahiti-faahou-raa i te mau tuhaa matamua. E pinepine e faahiti-faahou-hia te mau tuhaa faufaa na roto i te hoê haapotoraa manaˈo. E hiˈopoa tatou i ô nei e piti hiˈoraa: te haapotoraa “horoa-riirii-hia” e te haapotoraa “hopea.”

⁵ Te haapotoraa horoa-riirii-hia o te hoê ïa faahitiraa ohie noa i te tahi mau tuhaa matamua a hiˈopoa-noa-hia ˈi te reira. E faahaamanaˈo na faahitiraa ohie atoa te tahi i muri aˈe i te tahi i te manaˈo faufaa i faataahia na mua ˈˈe. No reira, e iti mai ïa te mau parau no muri iho o te oreroraa parau.

⁶ I te hopea o te oreroraa parau, te vai ra paha i te hoê haapotoraa horoa-riirii-hia aore ra aita, na te haapotoraa hopea e faahiti ohie noa i te mau manaˈo matamua atoa, e e hiˈopoa-poto-noa-hia te oreroraa parau na roto i te tahi mau pereota iti. I te tahi taime, e nehenehe atoa tatou e faahiti roa ˈtu ehia tapao ta tatou e faahaamanaˈo. O te hoê â ravea no te tauturu i te feia e faaroo ra ia tamau mai te reira.

7-10. Nafea tatou e nehenehe ai e ite e teihea roa te mau tuhaa matamua anaanatae mau ma te haapoto atu?

 ⁷ E ere noa te hoê haapotoraa i te hoê faahiti-faahou-raa manaˈo haumani, e ere atoa i te hoê faahiti-faahou-raa i te mau tuhaa aore ra i te tahi mau manaˈo. E rave rahi huru no te na reira: na roto i te hoê hohoˈa, te hoê irava bibilia, te hoê faaauraa, te hoê taa-ê-raa, te tahi mau manaˈo tuea, te faaohiparaa i te mau parau hoê â auraa aore ra i te mau uiraa. No te hoê oreroraa parau huiraatira, ei hiˈoraa, e nehenehe te haapotoraa ohie e ravehia ma te horoa e pae minuti no te faahaamanaˈo i te mau irava e te mau faataaraa matamua. Ua tuuhia te oreroraa parau atoa na roto i te tahi noa mau manaˈo poto ta te rahiraa e nehenehe e tamau ohie noa e e faaohipa i muri iho.

⁸ E faufaa taa ê to te faahiti-faahou-raa na roto i te hoê haapotoraa ia titau iho â râ te tumu parau i te feruriraa e te manaˈo taa ohie. E nehenehe te taime e faataa ê ra i te faataaraa i te tahi mau tuhaa e te faahitiraa poto e faatia i te feia e faaroo ra ia vaiiho i te mau manaˈo ia ô i roto i to ratou feruriraa. Teie nei râ, e ere i te mea titauhia i te mau taime atoa ia haapoto i te mau tuhaa atoa. I te tahi taime, e navai noa ia parau poto noa ˈtu ma te aratai i te tuhaa i muri iho.

⁹ Te tahi atu ravea no te faahiti faahou i te mau tuhaa faufaa na roto ïa i te faataa na mua i roto i te omuaraa parau e i muri iho e vauvau atu ai i roto i te tino o te oreroraa parau. E faaohipahia taua huru faahiti-faahou-raa ra no te tamau i te mau manaˈo faufaa i roto i te feruriraa o te feia e faaroo ra.

¹⁰ Ia haamatau outou e taua mau ravea huru rau ra no te faahiti faahou i te mau tuhaa matamua, e anaanatae atu â ta outou mau oreroraa parau, e e maitai aˈe, e e ohie aˈe ia tamau mai.

11-14. Eaha te mau tuhaa faufaa te tia ia haapao ia faahaamanaˈo tatou i te mau manaˈo tei ore i taa-maitai-hia?

¹¹ Faahiti-faahou-raa i te mau tuhaa tei ore i taahia. Na te taata orero e maiti ia au i te feia e faaroo ra mai te peu e e tia ia faahiti faahou â i te hoê tuhaa ia nehenehe oia e faataa maitai atu â. Mai te peu e o te hoê tuhaa faufaa eita e taahia ia ore anaˈe e faahiti-faahou-hia, e imi ïa outou i te ravea no te faahiti faahou, aita anaˈe eita te feia faaroo e apee ia outou e tae roa i te hopea. Hau atu, e faarahi roa te mau faahiti-faahou-raa tano ore, e ere i te mea faufaa no te haapapu i te mau manaˈo, i te parau e mea taahoa.

¹² A manaˈo i te feia e faaroo ia outou ia faaineine anaˈe outou i ta outou oreroraa parau. E taa ia outou i roto i te tahi faito eaha te manaˈo o te haafifi ia ratou. I roto i ta outou faaineineraa, a faahiti faahou i te tahi mau manaˈo ia nehenehe te feia faaroo e hiˈopoa i raro aˈe e rave rahi tupuraa.

¹³ Nafea outou e ite ai e aita te tahi mau tuhaa i  taa-maitai-hia? A hiˈo i te feia e faaroo ra ia outou. A hiˈopoa i te huru o to ratou hohoˈa mata. Mai te peu e e paraparau noa outou i te hoê aore ra e piti taata, a uiui atu i te tahi mau uiraa.

¹⁴ A tapao maitai râ: Eita outou e tapae i ta outou tapao i te mau taime atoa na roto i te faahitiraa i taua noâ mau taˈo ra. E ere te aravihi no te haapii i te mea ohie. Mai te peu e aita te feia faaroo i taa i te taime matamua outou i faahiti ai i te hoê manaˈo, aita ïa i navai ia faahiti faahou i taua noâ taˈo ra e taa atu ai ia ratou. Eaha te tia ia rave? Ia faatano ohie outou ia outou. Peneiaˈe e hinaaro outou e faaô i te tahi tuhaa rii manaˈo-ore-hia i roto i ta outou oreroraa parau. Tei te huru ïa o te aravihi o ta outou haapiiraa i te faito rahi i te ohieraa no outou ia faaau i te mau hinaaro o te feia e faaroo ra.

**********

15-18. Nafea tatou ia haapii i te rave i te mau aparaa rima no te faataa?

¹⁵ E haapapu e e haamaramarama te mau aparaa rima i ta outou mau parau. E horoa hoi i te ora i ta outou mau manaˈo, e e tuu faahou mai i te tahi mea. E apa fatata te taatoaraa i te rima ma te paraparau. Aita anaˈe outou e na reira na mua mai, e taa i te feia e faaroo ra e te huru ê ra outou. Teie nei râ, mai te peu e e faatupu outou i te mau aparaa rima tano, eita ïa oia e feruri i to outou huru, i te mea râ o ta outou e parau ra. E tauturu te mau aparaa rima no te faaoraora, no te faaite i to outou mau manaˈo hohonu e no te faaieie i ta outou faaiteraa. Eiaha roa ia haapiihia i roto i te hoê buka. Aitâ outou i haapii aˈenei ia hoata, ia ata, aore ra ia faaite i to outou riri; aita ïa e faufaa ia pee i ta te tahi huru aparaa rima. Rahi noa ratou i te faaite i te huru ohie no roto mai i te mafatu, rahi noa atoa i te maitai. E tuea noa te tereraa o te huru o te hohoˈa mata e to te mau aparaa rima no te faaora i te mau parau.

¹⁶ Te vai ra e piti huru anairaa rahi o te mau aparaa rima: te mau aparaa rima no te faataa e te mau aparaa rima no te haapapu.

¹⁷ Te mau aparaa rima no te faataa. E faaite oia i te ohipa, te mau faito, aore ra te vahi o ta tatou e paraparau ra. O te mea ohie roa ïa ia rave. Hau atu, mai te peu e mea fifi na outou ia apa i te rima na mua mai, a tamata i te rave i te mea ohie aˈe.

¹⁸ Ia topa anaˈe outou i nia i taua huru ra i te Haapiiraa o te taviniraa, eiaha e rave noa hoê aore ra e piti aparaa rima i te roaraa o ta outou tumu parau. A tutava i te rave i roto i te roaraa o ta outou oreroraa parau. No te tauturu ia outou, a imi i te mau parau e faaite ra i te eˈa, te faito, te aanoraa, te faito tuea, te tereraa, te vahi, te tahi mau taa-ê-raa, te tahi  mau faaauraa, te tahi mau tiaraa tauiui noa. Ia hinaarohia, a tapao i taua mau taˈo ra i nia i ta outou mau nota no te faahaamanaˈo ia outou ihea roa e tia ia outou ia rave i te hoê aparaa rima. Noa ˈtu e e “M” te roaa ia outou i te taime matamua, a tamau noa mai te reira. Ia tae anaˈe i te tahi atu oreroraa parau, aita outou e hinaaro faahou i taua mau tapao ra no te faahaamanaˈo ia outou e e tia ia outou ia rave i te tahi mau aparaa rima. E ohie noa outou i te rave ma te ore roa ˈtu e feruri.

19, 20. Eaha te tapao o te mau aparaa rima no te haapapu?

¹⁹ Te mau aparaa rima no te haapapu. E faaite oia i te mau manaˈo hohonu e te tiaturiraa. E faafaaea oia e faaitoito oia e e haapaari oia i te mau manaˈo e faahitihia ra. Mea faufaa mau â te reira. Haapao maitai râ! E ohie noa te mau aparaa rima no te haapapu i te riro ei mau hautiutiraa matauhia. A ape i te na nia iho noa i ta outou mau aparaa rima.

²⁰ Mai te peu e te vai ra ta outou i te tahi mau peu matau i roto i ta outou mau aparaa rima, a tamata noa i te tahi noa maa taime iti i te rave i te mau aparaa rima no te faataa. Ia rave maitai outou i taua mau aparaa rima ra, e haere ohie noa mai te mau aparaa rima no te haapapu. A aravihi noa ˈi outou e matau roa atoa outou i te paraparau na mua mai, e faaite ta outou mau aparaa rima no te haapapu ma te maitai atu â i to outou mau manaˈo hohonu, ta outou mau tiaturiraa e te rotahi o to outou aau. E auraa rahi ta ˈna e horoa no ta outou oreroraa parau.

[Uiraa haapiiraa]