Faahohoˈaraa tano
Haapiiraa 34
Faahohoˈaraa tano
1, 2. A faataa poto noa i te tuhaa ta te faahohoˈaraa e hauti ra i roto i te hoê oreroraa parau?
1 Ma te faaohipa i te mau faahohoˈaraa, te faaô mau nei te hoê taata orero i roto i te feruriraa o te feia e faaroo ra ia ˈna i te tahi mau hohoˈa e auraa hohonu to ratou. E faatupu te mau faahohoˈaraa i te anaanatae e e tuu i te tapao i nia i te mau manaˈo faufaa. E faaara i te feruriraa e e turai ia taa ohie noa i te mau manaˈo apî. E haaputapû te tahi mau faahohoˈaraa maiti-maitai-hia i te maramarama e tae noa ˈtu i te mau manaˈo hohonu. No reira, e horoahia te poroi i te feruriraa ma te puai mau, e i te rahiraa o te taime, eita e nehenehe na roto noa i te tahi mau faatiaraa parau. E parau mau râ te reira i te taime noa e tano ai te mau faahohoˈaraa. E tia e ia tuati i te tumu parau.
2 E nehenehe i te tahi taime e haapaiuma aore ra e haamatara i te tahi mau manaˈo paetahi na roto i te hoê faahohoˈaraa. Hou e faahiti ai i te hoê haapiiraa mârôhia, e nehenehe e faataa i te mau patoiraa na roto i te hoê faahohoˈaraa maitai. Ei hiˈoraa, e nehenehe paha e parau e: “Eita te hoê metua tane e tutui i te mau rima rii o ta ˈna tamarii no te faautua ia ˈna.” E haamatara mai taua faahohoˈaraa ra, tei faahitihia na mua i te aparauraa no nia i te haapiiraa o te “po auahi,” i te huru hairiiri o taua haapiiraa faaroo hape ra, o te faaohie i to ˈna patoiraa.
3-6. Ihea roa tatou e nehenehe ai e huti mai i te mau faahohoˈaraa?
3 E nehenehe te mau faahohoˈaraa e rave mai e rave rahi mau huru taa ê: manaˈo tuea, hiˈoraa, manaˈo taa ê, manaˈo hoê â auraa, parau faaau, ohipa i tupu, e te vai atu â. E hutihia te reira i roto e rave rahi mau pu. E nehenehe e tuea i te mau huru taoˈa ora atoa aore ra ora ore o te poieteraa. E nehenehe e hutihia i roto i te mau ohipa e rave rau o te tahi mau melo o te feia i putuputu mai, te tahi mau huru e tano i te mau taata atoa, i te tauihaa o te hoê fare, te tahi mau hamaniraa a te taata mai te mau fare tahua teitei, mau pahi, e te vai atu â. Noa ˈtu eaha te faahohoˈaraa e faaohipahia, e maiti te taata orero ia au i te tupuraa e i te tumu parau, eiaha noa no te mea e mea au roa na ˈna.
4 Haapao maitai râ! Eiaha e faarahi roa i ta outou oreroraa parau e e rave rahi mau hiˈoraa. A faaohipa, eiaha râ e faarahi roa!
5 E tia ia aravihi no te faaohipa maitai i te mau faahohoˈaraa. E tia ia roaa mai i te tahi mau ravea paari e te tahi aravihi. Mai te peu râ e e faaohipa-maitai-hia, eita e nehenehe e faaau i to ratou faufaa. No te haapii i te faaohipa ˈtu, a tamata i te feruri na roto i te mau hiˈoraa. A tapao i ta outou e farerei ra i roto i ta outou mau taioraa. Ma te hiˈo i te mau mea huru rau, a imi i te tahi mau faahohoˈaraa e te oraraa e te taviniraa o te kerisetiano. Mai te peu e, ei hiˈoraa, e ite outou i te hoê tiare o tei maheahea, e nehenehe outou e manaˈo e: “Ua riro te auhoaraa mai te hoê tiare; ia haapao-ore-anaˈe-hia, e maheahea oia.” Te ite nei e rave rahi mau taata i te avaˈe mai te hoê tapao o te tere i rapae i te palaneta. Area te kerisetiano ra, te ite nei oia i te hoê ohipa a te Atua, te hoê taoˈa poietehia e te Atua, te hoê tino o te raˈi o te vai noa e a muri noa ˈtu, o te ohipa i nia i to tatou oraraa na roto i te faatupuraa i te mau nanumiti.
6 Mai te peu e i te taime e faaineine ai outou i te hoê oreroraa parau, eita outou e ite i te tahi mau faahohoˈaraa maitatai no te faahiti atu, a hiˈo i te mau buka a te Taiete Watch Tower e a imi i te tahi mau hiˈoraa. A feruri atoa i nia i te mau parau tumu o te oreroraa parau e i te mau hohoˈa ta te reira e faatupu ra i roto i to outou feruriraa, e a huti mai i te tahi mau faahohoˈaraa. Eiaha râ ia moehia ia outou e e faatupu te hoê faahohoˈaraa tei ore i maiti-maitai-hia hau atu i te ino i te maitai. Te pûpû nei te tapao “Faahohoˈaraa e tano i te tumu parau,” i nia i te api iti Aˈoraa no te oreroraa, e rave rahi mau tuhaa te tia ia tapea mai i roto i te feruriraa.
7-9. No te aha e mea aravihi roa te mau faahohoˈaraa e mea ohie ia taa?
7 Ohie ia taa. E mau oioi te hoê faahohoˈaraa i roto i te feruriraa mai te peu e mea ohie. E tia ia ˈna ia haamaramarama i te faaiteraa matamua eiaha râ ia haapoiri ma te haafifi roa ˈtu. Mea pinepine, ua faahitihia te mau faahohoˈaraa i faaohipahia e Iesu na roto noa i te tahi mau parau. (A hiˈo Mataio 13:31-33; 24:32, 33.) Ia taa-ohie-noa-hia te mau parau atoa e faaohipahia. Mai te peu e e titau te hoê faahohoˈaraa e rave rahi faataaraa, e erehia oia i to ˈna faufaa. A faaore i te reira aore ra a haapoto atu.
8 Ua rave o Iesu i te tahi mau ohipa ohie no te faataa i te tahi mau mea faufaa, te tahi mau manaˈo ohie no te haamaramarama i te tahi mau manaˈo fifi roa. E tia e ia feruri-ohie-noa-hia te hohoˈa e horoahia na roto i te hoê faahohoˈaraa e eiaha e ia rahi roa te tuhaa rii. E mau manaˈo maramarama to roto e te taa maitai. I reira, eita ïa te feia i putuputu mai e faaohipa hape i te reira.
9 E tia i te hoê faahohoˈaraa i roto i te mau tuhaa atoa ia tuea i te tumu parau te tia ia ˈna ia haamaramarama. Mai te peu e te vai ra te tahi tuhaa o te faahohoˈaraa tei ore i tano maitai, mea au aˈe ia ore e faaohipa ˈtu. E nehenehe vetahi e manaˈo e aita i tano maitai te faahohoˈaraa, e eita te reira e tapae i nia i to ˈna tapao.
10, 11. A faaite e no te aha e tia ia faaohipa ma te maramarama i te tahi mau faahohoˈaraa vauvauhia.
10 Faaohiparaa i faataa-maramarama-hia. Mai te peu e eita outou e faaite e nafea ia faaohipa i te hoê faahohoˈaraa, e taa ia vetahi eaha ta outou e hinaaro ra e parau, eiaha râ te taatoaraa. E tia atoa i te taata orero ia ite e no teihea tumu oia e faahiti ai oia i taua faahohoˈaraa ra e ia faaite e nafea ia faaohipa na roto i te tahi mau parau ohie no te feia e faaroo ra. (Hiˈo Mataio 12:10-12.)
11 E nehenehe e faaohipa i te hoê faahohoˈaraa na roto e rave rahi huru taa ê. E nehenehe e faaohipahia no te haamaramarama i te hoê faaueraa tumu i faahitihia na mua ˈˈe aore ra i muri aˈe i te hohoˈa. E nehenehe e faaite i te faaohiparaa na roto i te hutiraa i te tahi mau faaotiraa o te faahohoˈaraa i faahitihia, ia au i te faataaraa ta tatou e hinaaro ra e haamatara. Aore ra, e nehenehe noa tatou e faaite i te tuearaa e vai ra i rotopu i te mau tuhaa rii o te faahohoˈaraa e o te tumu parau e tuatapapahia ra.
12-14. Na te aha e tauturu ia tatou ia ite mai te peu e e faahohoˈaraa tano anei te reira?
12 Mau manaˈo faufaa i haapapuhia. Eiaha e faaohipa i te hoê faahohoˈaraa i te taime noa outou e ite ai i te tahi. A hiˈopoa i ta outou tumu parau no te taa teihea te mau tuhaa matamua, e a maiti i te tahi mau faahohoˈaraa no te faataa maitai ia ratou. Mai te peu e e faahiti outou i te tahi mau hiˈoraa o te huti i te manaˈo i nia i te tahi mau tuhaa iti, o te reira te haamanaˈohia eiaha râ te mau tuhaa matamua. (Hiˈo Mataio 18:21-35; 7:24-27.)
13 Eiaha te faahohoˈaraa ia faaore i te faataaraa matamua. O te hohoˈa matamua paha te hoˈi pinepine mai i roto i te feruriraa o te feia i putuputu mai, i muri iho râ, e haamanaˈo atoa ratou i te manaˈo ta te reira e faahohoˈa ra. Aita anaˈe ua rave ïa te faahohoˈaraa i te parahiraa o te manaˈo.
14 Ia faaineine outou i te hoê oreroraa parau e ia maiti outou i te tahi mau faahohoˈaraa, a haafaufaa i te maitai o te tuhaa tataitahi ia faaauhia i te tapao te tia ia ˈna ia haapapu. Na te reira anei e haapapu e e haafaufaa? Te haamaramarama ra anei te reira e te faaohie ra anei no te tamau aau? Aita anaˈe e ere ïa i te hoê faahohoˈaraa tano.
**********
15, 16. A faataa no te aha e tia i te mau faahohoˈaraa ia tano i nia i te feia e faaroo ra.
15 Eiaha noa te mau faahohoˈaraa ia taaihia i te tumu parau, ia tano atoa râ i te feia e faaroo ra. Ua faataa-ê-hia te tuatapaparaa o taua tuhaa ra i nia i te api iti aˈoraa i raro aˈe i te tapao “Faahohoˈaraa e tano i te taata e faaroo ra.” I to Natana aˈoraa ia Davida no ta ˈna hara e o Bate-Seba, ua maiti oia ei faahohoˈaraa i te hoê taata veve e hoê anaˈe ta ˈna mamoe iti. (Sam. 2, 12:1-6) Aita noa te faahohoˈaraa i î i te aravihi, ua tano atoa râ i nia ia Davida o tei riro na ei tiai mamoe. Ua taa oioi ia ˈna eaha ta Natana e hinaaro ra e parau.
16 Mai te peu e te rahiraa o te feia e faaroo ra e feia paari, mea au aˈe ia ape i te mau faahohoˈaraa o te taa-noa-hia e te au-noa-hia e te mau taurearea. E tano roa ïa taua noâ hiˈoraa ra mai te peu e e paraparau outou i te hoê pǔpǔ feia haapii. I te tahi taime, e nehenehe e rave i te tahi mau faahohoˈaraa na roto e piti faito taa ê, ei hiˈoraa, ia au i to te mau taurearea e te feia paari, te mau tane e te mau vahine, e te vai atu â.
17-19. Ihea roa tatou e huti ai i ta tatou mau faahohoˈaraa no te haaputapû i te feia e faaroo ra?
17 Hutihia mai i roto i te mau tupuraa matauhia. Mai te peu e e huti outou i ta outou mau faahohoˈaraa i roto i te mau tupuraa matauhia, e pee ohie te feia i putuputu mai ia outou. O ta Iesu ïa i rave. Ma te paraparau atu i te vahine Samaria o tei haere mai i te apoo pape, ua faaau oia i to ˈna mau huru maitatai ora i te pape. Ua huti oia i ta ˈna mau faahohoˈaraa i te mau mea matauhia o te oraraa e eiaha râ i te tahi mau faatiaraa faahiahia. E faatupu oioi mai ta ˈna mau faaauraa i te hoê hohoˈa i roto i te feruriraa o te feia e faaroo ra ia ˈna aore ra e faahaamanaˈo i te tahi ohipa i tupu. Ua faaohipa oia i te mau faahohoˈaraa no te haapii.
18 E tia ia tatou ia na reira atoa. Peneiaˈe te taa rii ra i te mau vahine faaea ra i te fare i te tereraa o te tapihooraa tauihaa, e manuïa aˈe râ outou i pihai iho ia ratou mai te peu e e huti outou i ta outou mau hiˈoraa i roto i te mau ohipa matauhia o to ratou oraraa no te mau mahana atoa: ta ratou mau tamarii, ta ratou mau ohipa i roto i te fare oia atoa te mau tauihaa ta ratou e faaohipa nei i roto i to ratou fare.
19 I te tahi taime, mea aravihi aˈe te hoê faahohoˈaraa e tano no te fenua iho. E nehenehe atoa e faahiti i te tahi mau ohipa o tei tupu i roto i te tuhaa fenua e ua itehia e te taatoaraa, eiaha râ i te hoê aamu au ore.
20-22. A faaite i te tahi mau herepata te tia ia apehia ia faaohipa-anaˈe-hia i te tahi mau faahohoˈaraa.
20 Maiti-maitai-hia. Ia tano te faahohoˈaraa atoa i te hoê aparauraa o te Bibilia. E tia iho â ïa ia ape i te faahohoˈaraa “faufaa ore” atoa aore ra “e piti to ˈna auraa” eita paha e taa-maitai-hia. Teie te hoê ture maitai roa ia apee: Ia feaa anaˈe oe, a haapae.
21 Eiaha tatou na roto i ta tatou mau faahohoˈaraa ia faaturori faufaa ore noa i te feia e faaroo ra ia tatou, te feia haere apî mai iho â râ. No reira e ape tatou i te faahiti i te tahi mau uiraa no nia i te mau haapiiraa o te faatupu i te aimârôraa e aita hoê aˈe auraa e te tumu parau e vauvauhia ra. No reira eita e ravehia ei hiˈoraa i te pâmuraa toto eiaha atoa te faaturaraa i te reva mai te peu e e ere te reira te tumu o te oreroraa parau. E nehenehe taua huru faahohoˈaraa ra e faaturori i te tahi pae. E ere hoê â huru ia titau te tumu parau e ia tuatapapa outou i taua mau uiraa ra. I roto i taua tupuraa ra, e nehenehe outou e haaferuri te feia e faaroo ra e e faataa papu atu ia ratou. Eiaha râ outou e patoi i ta outou tapao ma te faaohipa i te tahi mau faahohoˈaraa o te rave e ia faahapa te feia e faaroo ra i te mau parau mau ta outou e hinaaro ra e vauvau atu.
22 A faaite i te huru aravihi ia maiti outou i ta outou mau faahohoˈaraa. A hiˈopoa maitai e ua tano iho â. O te ohipa ïa te tupu mai te peu e e tano i te tumu parau e i te feia e faaroo ra ia outou.
[Uiraa haapiiraa]
