Haapiiraa 27

Haapapuraa i te upoo parau e te tahi mau manaˈo faufaa

1-4. A faataa eaha te upoo parau o te hoê oreroraa parau.

 ¹ E upoo parau to te oreroraa parau atoa o te horoa i te hoê aratairaa e o te faatuati ma te au maite ta ˈna mau tuhaa taa ê atoa. Noa ˈtu eaha ta outou upoo parau, e tia e ia ite-maitai-hia i roto i ta outou oreroraa parau. Na te reira e faatere. E nehenehe e faatuatihia na roto i te hoê noa pereota, e tia râ e  ia ô atu te mau tuhaa tataitahi o te mau manaˈo i vauvauhia. Ia ite-maitai-hia te upoo parau e te feia atoa i putuputu mai, o te reira mau mai te peu e e haapapu-maitai-hia.

² Aita noa te upoo parau o te hoê oreroraa parau e faaite i te tumu taatoa, mai te “faaroo.” Te faaite nei râ i te tuhaa taa ê ta te tumu parau e vauvau. Ei hiˈoraa, o “Te aanoraa o te faaroo” paha ta outou upoo parau, “Mea faufaa te faaroo ia here mai te Atua ia tatou,” “Te niu o to outou faaroo,” aore ra “Eiaha e faaea i te paari i roto i te faaroo.” Noa ˈtu e e tano taua mau upoo parau taa ê atoa ra no te faaroo, te vauvau nei râ tatou tataitahi i nia i te hoê faito taa maitai e te titau ra i te hoê faataaraa taa ê roa.

³ I te tahi taime, mea titauhia e ia haaputuputu tatou i te mau mauhaa atoa no te hoê oreroraa parau na mua ˈˈe e maiti atu ai i te hoê upoo parau. E tia ia ite na mua hou e maiti atu ai i te mau manaˈo matamua e e faaineine ai i te tino o te oreroraa parau. Ei hiˈoraa, i muri aˈe i te haapiiraa bibilia tataitahi i te fare o te taata, e hinaaro paha outou e paraparau no nia i te faanahonahoraa a te mau ite no Iehova. E tumu parau aano mau teie. No te taa eaha ta outou e parau, a feruri i te feia e faaroo ra ia outou e i te tapao o ta outou oreroraa parau, e a maiti atu ai i te hoê upoo parau. Mai te peu e no te titau i te hoê taata ia apiti i roto i te taviniraa, e nehenehe outou e faaite e te pee nei te mau ite no Iehova ia Iesu Mesia ma te poro i tera e tera fare. Tera ïa ta outou upoo parau. Te mau mea atoa o ta outou e parau no te faaaano ïa i taua huru o te tumu parau ra: te mau ite no Iehova.

⁴ Nafea outou e nehenehe ai e haapapu i te upoo parau o ta outou oreroraa parau? E tia na mua e ia tano e ia tuati i te tapao ta tatou e imi ra. No reira, e tia ia outou ia faaineine na mua. Mai te peu e e faatano outou i ta outou oreroraa parau i nia i taua upoo parau ra e tia ïa ia outou ia haapapu atu, e pee rii paha outou i te tino parau ta outou i faaineine. Teie nei râ, i te roaraa o te tumu parau, mea maitai ia faahiti i te tahi taime i te mau parau faufaa aore ra te manaˈo matamua o te oreroraa parau ia matara maitai te reira.

5, 6. Nafea outou e ite ai e mai te peu e ua tano te hoê upoo parau?

⁵ Upoo parau tano. I te Haapiiraa o te taviniraa teotaratia, aita roa e fifi no te imi i te hoê upoo parau tano, i te mea e i te rahiraa o te taime e horoahia mai. E ere râ mai te reira no te taatoaraa o te mau oreroraa parau e titauhia ia outou ia imi. Mea paari mau â e ia hiˈopoa maite outou i te upoo parau.

⁶ Na te aha e haapapu mai e ua tano anei te upoo parau aore ra aita? E rave rahi mau tuhaa. E tia ia outou ia haapao i te feia e faaroo ra ia outou, ta outou tapao e ia au i te tupuraa i  te tuhaa i horoahia na outou. Mai te peu e e ite outou e aita outou e haapapu ra i te hoê upoo parau i roto i ta outou mau oreroraa parau no te mea paha aita outou e vauvau mau ra na pihai iho i te hoê manaˈo tumu. Peneiaˈe te tuu rahi nei outou i roto i ta outou oreroraa parau i te mau manaˈo o te ore ra e haapapu i te upoo parau.

7, 8. A faataa na e nafea te hoê upoo parau ia haapapuhia.

⁷ Faahiti-faahou-raa i te parau tumu aore ra i te manaˈo tumu. Te hoê ravea maitai roa ˈˈe no te haapapu i te upoo parau i te roaraa o te oreroraa na roto ïa i te faahiti-faahou-raa i te mau parau aore ra te manaˈo tumu o te upoo parau. I roto i te upaupa, te tumu parau o te pehepehe ïa e faaroo-pinepine-hia no te tapao i te pehe taatoa. I te rahiraa o te taime, te tahi noa maa nota rii te navai no te faataa i te hoê ohipa. Eita e faaroohia te pehepehe i te mau taime atoa na roto i te hoê â taˈiraa. I te tahi taime, hoê noa pereota aore ra tauiuiraa o te upoo parau te faahitihia, e tamata râ te taata hamani pehe i te faanehenehe na te hiti i te upoo parau o te faataa ra i ta ˈna ohipa.

⁸ Hoê ïa huru no te upoo parau o te hoê oreroraa parau. Mai te hoê pehe o te hoˈi pinepine mai te mau parau aore ra te manaˈo tumu. Ua riro te mau parau hoê â auraa aore ra te manaˈo tumu i vauvauhia na roto i te tahi mau parau ei mau tauiuiraa atoa o te upoo parau. Eiaha roa ia taahoa taua huru faahiti-faahou-raa ra, mai te peu râ e e rave-omoe-hia, e faataa te taatoaraa o te oreroraa i te upoo parau e e vai mai i roto i te feruriraa o te feia faaroo i taua manaˈo matamua ra.

**********

9-13. A faaite mai na eaha te mau tuhaa matamua o te hoê oreroraa parau. A horoa i te hoê hiˈoraa.

⁹ I muri aˈe to outou faataaraa i te upoo parau o ta outou oreroraa, te tuhaa i muri iho o ta outou faaineineraa oia ïa te maitiraa i te mau manaˈo matamua ta outou e opua ra e faaohipa no te tuatapapa. Tei nia taua huru ra i ta outou api iti Aˈoraa no te oreroraa, i raro aˈe i te tuhaa “Manaˈo faufaa roa ˈˈe i haamatarahia.”

¹⁰ Eaha te mau manaˈo matamua i roto i te hoê oreroraa parau? E ere noa i te tahi mau manaˈo anaanatae aore ra te mau manaˈo i haru-noa-hia mai i taua taime ra. O te mau tuhaa faufaa o te hoê oreroraa parau, te mau manaˈo o te faaaano i te tuatapaparaa. Ua riro ratou mai te mau titeti aore ra te mau tapaopaoraa ta tatou e ite i roto i te mau fare toa rarahi e o te tauturu i te feia hoo ia faataa i te mau maa i apǎpǎhia i nia i te mau paepae. Te faaite nei te mea o ta tatou e faanaho i nia i taua mau paepae ra e te tia ia tuu i te tahi atu vahi. I raro aˈe i te tapaopaoraa TARO eita ïa e tuuhia i te faraoa, e e maere te taata hoo ia ite atu i te reira i taua vahi ra. Eita atoa  tatou e ite i te raiti i nia i te paepae i tapaohia TAOFE E TI. Mai te peu e ua hunahia te tapaopaoraa no te mea ua rahi roa te maa i nia i te paepae, e e fifi te taata hoo ia maimi i ta ˈna e hinaaro. Mai te peu râ e e ite-maramarama-hia te mau tapaopaoraa, e faataa oioi oia i te mau maa. Hoê â huru atoa no te mau manaˈo matamua o te hoê oreroraa parau. Ia nehenehe te feia e faaroo ra ia outou e taa oioi e e tapea mai i roto i to ratou feruriraa, e navai noa ratou i te tahi maa nota iti no te apee ia outou e tae roa i ta outou faaotiraa.

¹¹ Te tahi atu mea. E tauiui te maitiraa e te faaohiparaa o te tahi mau manaˈo tumu ia au i te huru o te feia faaroo e te tumu o te oreroraa parau. No reira e haava te tiaau no te haapiiraa i te faufaaraa o te mau manaˈo matamua i maitihia e te taata haapii ia au i ta ˈna faaohiparaa eiaha râ na roto i ta ˈna iho maitiraa ia au i to ˈna hinaaro.

¹² Ma te maiti te mau manaˈo no te haamatara, a tapea noa mai te mea faufaa. Na te aha râ e faaite mai te peu e e manaˈo faufaa teie? Mai te peu e eita outou e tapae i nia i te tapao o ta outou oreroraa parau ma te ore e tuatapapa i te hoê noa iho tuhaa, mea faufaa ïa. Ei hiˈoraa, e paraparau outou no nia i te hoo e te hoê taata o te ore roa e ite i taua haapiiraa ra, mea faufaa ia haapapu e e taata noa Iesu i nia i te fenua nei, aita anaˈe eita ïa outou e nehenehe e faaite i te faufaaraa tano o to ˈna tusia. O te hoê ïa o te mau manaˈo faufaa o ta outou aparauraa. Teie nei râ, mai te peu e na mua ˈtu ua haapapu outou i te taata e ua hape te haapiiraa no nia i te toru tahi, e iti ïa te faufaaraa o te manaˈo ta tatou i faahiti ihora i te mea e ua farii-aˈena-hia. I roto i taua tupuraa ra, mea ohie aˈe ïa ia haapapu i te faufaaraa tano o te tusia taraehara a Iesu, e e ere ïa te tuatapaparaa i to ˈna tiaraa taata i te manaˈo matamua.

¹³ A ui i teie huru uiraa: Eaha te ite i vai aˈena i te feia e faaroo ra ia ˈu? No te tapae i nia i ta ˈu tapao, eaha te tia ia ˈu ia haapapu? Mai te peu e ua ite outou i te pahonoraa i te uiraa matamua, no te pahono i te piti e tia ia outou ia haaputu i te mauhaa o ta outou oreroraa parau, ia tuu i te hiti i te mau manaˈo ta te feia e faaroo ra i ite, e ia haaputu i te tahi mau manaˈo eiaha ia rahi roa te parau tatara i roto. Ua riro te reira ei tabula o te mau maa i te pae varua ta outou e hinaaro ra e vauvau atu i mua i te feia e faaroo ra. Eiaha roa ˈtu ia hunahia te mau titeti aore ra te mau manaˈo faufaa. E tia e ia ite-maitai-hia te reira.

14-17. No te aha eita e tano ia vauvau rahi roa tatou i te mau manaˈo faufaa?

¹⁴ Eiaha ia rahi roa. Te vai ra i roto i te rahiraa o te mau tumu parau i te tahi noa mau manaˈo faufaa. I te rahiraa o te taime, e nehenehe e taio i nia i te manimani rima. E tano te  reira noa ˈtu ehia taime ta outou no te vauvau atu. Eiaha e rave i te hape e ite-pinepine-hia oia hoi te haamatararaa e rave rahi manaˈo. Ia rarahi roa anaˈe te hoê fare toa e ia pûpû mai i te mau maa huru rau, e moe te taata hoo. Eita e tano ia ani i te feia faaroo ia tamau mai e rave rahi manaˈo i te hoê noa taime. Rahi noa ˈi te roaraa o ta outou oreroraa parau, rahi atoa oia i te faaohiehia e rahi atoa te mau manaˈo matamua i te haamatara-papu-hia. Eiaha e faahepo i te feia e faaroo ra ia tapea mai i te mau tuhaa e rave rahi. A maiti ia au i to outou manaˈo te mau tuhaa te tia mau â e ia haamanaˈohia e a faaohipa i te taime taatoa i horoahia no te vauvau atu.

¹⁵ Nafea ia ite e ua rahi roa te mau manaˈo i roto i te hoê oreroraa parau? Ia haapoto-noa-hia, mai te peu e e nehenehe e tuu i te hiti i te hoê manaˈo e e roaa noa ia tatou i te tapao o te oreroraa parau, e ere ïa taua manaˈo ra i te hoê tuhaa matamua. No te faananea ˈtu â i te oreroraa aore ra no te faatupu i te hoê amaharaa, e nehenehe outou e faahiti i teie manaˈo, ma te ore e haapapu roa ˈtu ia faaauhia i te mau manaˈo te tia ia haafaufaahia.

¹⁶ Ia navai atoa to outou taime no te vauvau maitai i te mau manaˈo tataitahi e no te aratai i to ˈna faaotiraa. Mai te peu e e ua iti to outou taime no te faahiti e rave rahi mau parau, a haapoto noa i te parau no nia i te mau manaˈo ta te feia e faaroo ra i ite aˈena. A tapea noa te mau manaˈo ta ratou i ore i matau maitai e a faataa ma te maramarama ia ore ia moe ia ratou.

¹⁷ I te pae hopea, ia horoa ta outou oreroraa parau i te hoê huru ohie. E ere ïa tei te huru o te rahiraa o te mau manaˈo e vauvauhia. Mea pinepine, te ohieraa tei te huru ïa o te anairaa manaˈo. Ei hiˈoraa, mai te peu e ua anoi-noa-hia e ua haaputuhia te mau maa atoa o te hoê fare toa rarahi i ropu i te fare toa, e horoa ïa te reira i te hoê huru nahonaho ore e e fifi te taata hoo ia imi i ta ˈna e hinaaro. Mai te peu râ e ua faanahohia te mau maa atoa ia au i to ˈna tuhaa e e titeti to nia iho, e maitai mai ïa te huru o te mata, e eita te taata hoo e fifi ia imi atu. A faaohie ta outou mau oreroraa parau ma te haaputu i te mau manaˈo i raro aˈe e rave rahi mau manaˈo rii matamua.

18. Nafea ia vauvau i te mau manaˈo faufaa?

¹⁸ Manaˈo matamua vauvau-taa-ê-hia. E tia i te mau manaˈo matamua atoa ia matara e ia vauvau-taa-ê-hia. Eita ïa te reira e tapea ia outou ia haapoto i te tahi mau manaˈo matamua i roto i ta outou omuaraa parau aore ra i roto i ta outou mau parau faaotiraa. I roto râ i te tino o te oreroraa parau, e paraparauhia i te hoê noa manaˈo i te hoê taime, taa ê atu i te tahi mau haamanaˈoraa no te haapapu atu â i te tahi tuhaa  aore ra no te faatupu i te hoê amaharaa. Ma te haapii ia rave i te hoê tabula no te mau parau tumu, e ohie ïa outou ia faataa ê i te mau manaˈo matamua.

19-21. Nafea ia faaohipa i te mau manaˈo iti aˈe i te faufaa?

¹⁹ Mau tuhaa iti o te haapapu i te mau manaˈo matamua. E tia i te mau haapapuraa, te mau irava, e te tahi atu mau manaˈo ia haamatara i te manaˈo matamua e ia faarahi i te tuatapaparaa.

²⁰ Ma te faaineine ia outou, a maiti i te mau tuhaa iti atoa e a tapea mai i te mau manaˈo o te faataa maramarama ˈtu â ia ratou aore ra o te faarahi i to ratou tuatapaparaa. A faaore i te mau manaˈo o te ore e tuati e o te faaarepurepu i te oreroraa parau.

²¹ Ia faatuati-roa-hia te mau manaˈo iti aˈe i te faufaa atoa e tano e te manaˈo matamua. A faataa i te tuatiraa; eiaha e vaiiho e na te feia faaroo e horoa i te faataaraa. Te mau manaˈo tei ore i haapapuhia, mea pinepine aita i taa-maitai-hia. E nehenehe outou e haamau i taua tuatiraa ra ma te faahiti faahou i te tahi mau taime i te manaˈo matamua aore ra te mau parau matamua. Ia haavî outou i te aravihi ia faatuati i te mau manaˈo iti aˈe i te faufaa atoa na mua i nia i te mau manaˈo matamua o te oreroraa parau, e na tuhaa e piti i nia i te upoo parau, e faahiahia mau â te ohieraa o ta outou mau oreroraa parau. Eita ïa e riro ei fifiraa no te vauvau atu e eita ïa e moe ohie noa.

[Uiraa haapiiraa]