Haapiiraa 5

Ia riro outou ei taata faaroo maitai

1-5. Eaha te auraa o te parau faaroo, e no te aha e mea faufaa ia faaroo, i te mau putuputuraa iho â râ a te amuiraa?

 ¹ Ua taaihia to outou mau haereraa i mua ei tavini no Iehova i roto i te hoê faito rahi i to outou aravihi no te faaroo. I roto i to outou oraraa, e hauti teie aravihi i te hoê tuhaa faufaa i roto i to outou aravihiraa ia haapii. E faaroo tatou ia tutava tatou i te horoa i te tariˈa, tera râ mai te peu e eita tatou e horoa i to tatou ara-maite-raa i te mea e parauhia ra, eita ïa tatou e faaroo mau i te mau parau e faahitihia ra. Peneiaˈe ua paraparau ê na outou i te hoê taata o tei faaroo noa i te afaraa o ta outou mau parau. Ua parau noa mai oia e e, tera râ ua ite maitai outou e aita oia i pee i te aparauraa e no reira aita oia i faufaahia i te mea o ta outou i parau atu. I reira, te taa ra ïa ia outou i te faufaaraa ia riro noa ei taata faaroo maitai, mai te peu iho â râ e te faaroo ra tatou i te hoê haapiiraa no ǒ mai i te Atua ra. Te taio ra tatou i roto i te Maseli 1:5 e: “E riro te feia paari i te [faaroo], e e tupu to ˈna ite.”

² Tei roto te mau putuputuraa a te amuiraa i te porotarama haapiiraa ta Iehova e horoa maira na roto i ta ˈna faanahonahoraa. Ia faaroo maite atu tatou, te faaite ra ïa tatou i te faatura i nia ia Iehova no te mau mea atoa o ta ˈna i rave no te haapii mai ia tatou. Teie râ, ua ite te Atua e eaha to tatou huru e i te tahi mau taime e paruparu to tatou ara-maite-raa. No reira, i to ˈna titauraa mai ia tatou ia amu i te maa e rave rahi i te pae varua o ta ˈna e horoa maira, te na ô maira oia ma te onoono e: “A  [faaroo] maitai mai na ia ˈu, a amu ai i te mea maitai . . . E faafariu mai i to outou tariˈa, a haere mai ai ia ˈu nei; e faaroo mai, e ora ïa to outou [nephe].” (Isa. 55:2, 3) Mai te peu e te hinaaro ra tatou e fanaˈo i te ora mure ore e e tauturu i to tatou taata-tupu ia noaa atoa i teie re, e tia ia ru tatou i te faaroo e ia apo mai i te mau manaˈo o te Atua.—Heb. 1:1, 2; 2:1.

³ E faaite te taata o te faaroo maitai i te haehaa, e e mau tumu maitatai roa to tatou paatoa no te faaite i te haehaa. Aita hoê i rotopu ia tatou i ite i te mau mea atoa, e e nehenehe to tatou taata-tupu e haapii mai i te tahi mea. Noa ˈtu e e ere i te mea ohie no te taata orero ia paraparau e aita o ˈna i aravihi roa i te pae no te oreroraa, e turai to tatou haehaa haavare ore ia tatou ia tauturu atu e ia faaitoito atu ia ˈna na roto i te faarooraa ma te ara maite i ta ˈna mau parau. Peneiaˈe e vauvau mai oia i ta ˈna tumu parau na roto i te hoê huru raveraa apî no tatou nei aore ra e faahiti oia i te hoê manaˈo iti taa ê o ta tatou i ore i haapao na mua ˈˈe. Na roto i te vaha o te mau aiû iti, ia au i te hoê auraa pae varua, e nehenehe Iehova e haamaramarama mai ia tatou.—Mat. 11:25.

⁴ E mea faufaa roa ia horoa i to tatou ara-maite-raa i roto i te mau putuputuraa a te amuiraa, no te mea e tia i te mau mea o ta tatou e haapii ra i reira ia faaohipahia i roto i to tatou oraraa. Mea na roto i te ‘ite mau’ tatou e nehenehe ai e ahu i te huru taata apî. (Kol. 3:9, 10) Mai te peu râ e eita tatou e faaroo maitai, mai te peu e eita tatou e haapao i te mau tuhaa iti, e riro tatou i te ore e taa eaha te mau tauiraa e titauhia ra i roto i to tatou oraraa, e e nehenehe to tatou tupuraa pae varua e taerehia. E mea faufaa atoa ia horoa i te mau pahonoraa tano i roto i te mau hiˈopoa-faahou-raa orerohia aore ra papaihia. E i roto i te taviniraa, e mea faufaa roa ˈtu â ia horoa ˈtu i te taata atoa e ani mai i te tumu o te tiaturiraa faahiahia e vai ra i roto ia tatou nei.

⁵ Rahi noa ˈtu outou i te haamatau i te haapao maite i te mau parau e faahitihia ra, e haamaitai atu â outou i to outou aravihi no te haamanaˈo i te parau o ta outou e faaroo ra.

6-8. Nafea tatou ia tapea i to tatou feruriraa ia ore ia ori haere noa i roto i te hoê oreroraa parau?

⁶ Nafea ia faaroo. E mea ohie ia nevaneva haere to tatou feruriraa i roto i te mau putuputuraa. E manaˈonaˈo paha outou i te mau ohipa i tupu i taua mahana ra aore ra i te mau mea o ta outou e rave ananahi. Mai te peu râ e eita tatou e faaroo maitai i te mea e parauhia ra, eaha ïa te faufaa ia haere mai i te putuputuraa? E tia ïa ia tatou tataitahi ia faatitiaifaro ia tatou iho ia ore to tatou mau manaˈo ia haere ê. E tia ia rave i te faaotiraa papu e horoa i te tariˈa faaroo i te mau mea e tauaparauhia ra e ia patoi i te vaiiho i to tatou feruriraa ia ori haere noa. Mai te mea ra ïa e e haamoe tatou i te mau manaˈo atoa aita i taaihia e te tumu parau e tauaparauhia ra. Tera te auraa o te haamauraa i to ˈna feruriraa i nia i te hoê mea.

 ⁷ Te hoê ravea maitai roa no te paruru ia outou i te moemoeâraa aore ra te ori-haere-raa o te feruriraa, o te tapaoraa ïa i te mau manaˈo e te mau irava bibilia e vauvauhia ra e te taata orero. Eiaha râ ia rahi roa ta outou mau tapaopaoraa, oia hoi, mai te peu e e tauturu te tapaoraa i te tahi noa maa manaˈo iti, ia rahi roa anaˈe e haere ê to outou feruriraa. E nehenehe outou e faaohipa i teie mau tapaopaoraa a muri aˈe; teie râ, noa ˈtu e eita roa ˈtu outou e hiˈo noa ˈtu a muri aˈe, ua tauturu ïa te reira ia outou ia haamau i to outou ara-maite-raa i nia i te mau parau a te taata orero. Ua anaanatae hohonu ïa outou i te tumu parau i vauvauhia e ua taa ïa ia outou i te mau parau haapapuraa matamua.

⁸ I roto i te aparauraa, i te rahiraa o te taime, e nehenehe e faito i te ara-maite-raa o te hoê taata ia au i te mau uiraa tano roa o ta ˈna e ui mai i nia i te tumu parau tauaparauraa. Oia atoa, ia faaroo anaˈe outou i te hoê oreroraa parau, e papu ïa ia outou e te pee maite ra outou mai te peu e e puta mai te tahi mau uiraa au maitai i roto i to outou feruriraa a tiai atu ai outou i te pahonoraa a te taata orero. Oia atoa, a feruri e mea nafea outou ia faaohipa i te mau manaˈo i vauvauhia mai.

9. Nafea te vitivitiraa o to tatou mau manaˈo ia faaohipa-maitai-hia ia faaroo anaˈe tatou i te hoê oreroraa parau?

⁹ I te rahiraa o te taime, e mea vitiviti aˈe to tatou mau manaˈo i te mau parau a te taata orero, e inaha e taime to te feruriraa no te manaˈo i te tahi atu mea. Ua numerahia e i roto i te faito au noa, e ohipa to tatou mau manaˈo i te vitivitiraa tau 400 parau i te minuti hoê, area ia paraparau tatou ra, e faahiti anaˈe tatou tau 125 parau i roto i te hoê â taime. E nehenehe râ tatou e faaohipa i te vitivitiraa o to tatou mau manaˈo mai te peu e e feruri tatou i nia i te mau manaˈo i vauvauhia, ma te haapoto mai e ma te na nia iho faahou i roto i to tatou feruriraa ia nenei-hohonu-roa-hia.

10, 11. Nafea te hoê feruriraa maitai ia tauturu ia tatou ia faaroo?

¹⁰ Te tahi atu ravea e nehenehe ai tatou e haamau i to tatou ara-maite-raa i nia i te mau manaˈo faufaa i vauvauhia mai e te taata orero, o te faarooraa ïa na roto i te hoê huru feruriraa maitai. Aita tatou e faaroo ra no te faahapa i te mau manaˈo o te taata orero e ta ˈna huru vauvauraa mai. Na te tiaau no te Haapiiraa o te taviniraa te hopoia e horoa i te mau aˈoraa. No reira, e nehenehe ta te tahi atu mau taata e haamau i to ratou feruriraa i nia i te mau manaˈo maitatai atoa e vauvauhia mai e te taata orero.

¹¹ Oia atoa, ia aˈo anaˈe te tiaau no te haapiiraa i te hoê taata orero haapii, e ere i te mea maitai e ia faaoti te tahi atu taata haapii ahiri e ua tano anei aore ra aita te mau aˈoraa i horoahia. E mea hau aˈe ia aniani ahiri e e tano atoa anei teie mau aˈoraa no ˈna iho e nafea oia ia faufaahia i te mau manaˈo e horoahia ra. No reira, e tauturuhia te hoê taata faaroo maitai i te mau tuhaa oreroraa atoa maoti i te rave i te mau haereraa i mua i te taime anaˈe oia e horoa ˈi ta ˈna iho mau oreroraa parau.

12. Nafea te mau tamarii ia haapii i te riro ei feia faaroo maitatai?

 ¹² E tia atoa i te mau taurearea e te mau tamarii apî ia haapii nafea ia riro ei mau taata faaroo haapao maitai. E tauturuhia ratou i roto i teie tuhaa mai te peu e e parahi ratou i te vahi e itehia mai ratou e to ratou mau metua. E faaitoitohia te feia o tei ite i te taio mai te peu e te vai ra ta ratou iho buka e tuatapapahia ra. I te rahiraa o te mau tupuraa, e ere i te mea maitai ia faatia ia ratou ia rave i te tahi mau mea aita hoê aˈe taairaa e te porotarama. No te faaitoito ia ratou ia faaroo, e nehenehe te mau metua e faaara ˈtu ia ratou e ia hoˈi anaˈe ratou i te fare, e titauhia ratou ia faahiti i te hoê o te mau manaˈo o ta ratou i haapii i te putuputuraa. Mai te peu e ua rave ratou i te mau tapaopaoraa aore ra te haamanaˈo ra ratou i te hoê manaˈo i faahitihia i roto i te putuputuraa, e tia ïa ia haapopou maitai ia ratou.—Deut. 31:12.

13, 14. Nafea te hoê tamaaraa ia ohipa i nia i to tatou aravihi no te faaroo?

¹³ E mea ohie aˈe ia haamau i to tatou feruriraa mai te peu e e haapae tatou i te amu rahi roa i te maa na mua noa ˈˈe i te putuputuraa. Oia mau, ia î roa anaˈe te opu, e varea ïa tatou i te taoto, no te mea e faaohipa to tatou tino i to ˈna puai no te faatopa i te maa, e e faaiti ïa te reira i te aravihi o to tatou feruriraa. I te mea e ua paruparu roa to tatou feruriraa, e faaroo hupehupe noa ïa tatou, e eita tatou e ara aore ra e haafaufaa i te mea e parauhia ra, aore ra te mea ino roa ˈtu â, e varea roa tatou i te taoto.

¹⁴ Peneiaˈe te mea faufaa roa ˈˈe, o te faanahoraa ïa i ta tatou mau ohipa ia tae tamau mai tatou no te fanaˈo i te haapiiraa e horoahia mai. I roto i te mau haapiiraa a teie nei ao, e rave rahi mau taurearea haere haapiiraa o te mairi nei i te mau tuhaa haapiiraa e i muri iho e tamata ratou i te tapapa i te tuhaa ta ratou i mairi na roto i te haapiiraa o ratou anaˈe. E nehenehe anei râ outou e fanaˈo i te mau haapiiraa o ta outou i ore i faaroo? Eiaha ïa outou e vaiiho i to outou mau fetii aore ra i to outou mau hoa ia tapea ia outou ia haere atu i te mau putuputuraa. A haapapu e e tae iho â outou no te faaroo tamau i te mau parau mau faaora no roto mai i te Parau a te Atua.

15, 16. A faataa mai na e mea nafea tatou ia tamata e ia haamaitai i to tatou aravihi no te faaroo i roto i te mau putuputuraa.

¹⁵ A tamata i to outou aravihi no te faaroo. E pae hora i te hebedoma ta tatou e horoa nei no te mau putuputuraa a te amuiraa, e i roto i te rahiraa o teie taime, te vai ra ia tatou te ravea no te haapii na roto i te faarooraa. Te huti ra anei outou iho i te faufaa rahi roa ˈˈe o teie taime? Ehia mau manaˈo maitatai roa i vauvauhia i te mau hebedoma atoa e te hoê taata orero huiraatira o tei naeahia ia outou ia haamanaˈo? I muri aˈe i te haereraa ˈtu i te Haapiiraa o te taviniraa e i te putuputuraa no te taviniraa, e nehenehe anei ta outou e faaite na roto i ta outou iho mau parau i te manaˈo matamua o te mau oreroraa tataitahi, aore ra i te tahi taime, eita ta outou e nehenehe e haamanaˈo o vai o tei apiti mai i roto i te porotarama? E hau atu  anei outou i te faufaahia mai te peu e e tutava ˈtu â outou no te haamau i to outou feruriraa, peneiaˈe na roto i te tapaoraa i te mau manaˈo? A tamata na. I muri iho, ia oti te mau putuputuraa, a paraparau e te tahi atu mau taata i te mau manaˈo tumu o tei vauvauhia.

¹⁶ I roto e rave rahi o ta tatou mau putuputuraa tahebedoma, e uihia te mau uiraa e e anihia te feia i tae mai ia pahono. Mea pinepine, e noaa mai teie mau pahonoraa i muri aˈe e rave rahi mau hora haapiiraa tataitahi e te faaite ra i te mau matahiti faaineineraa. Te faaroo maitai ra anei outou i te mau pahonoraa a vetahi ê? Ia oti anaˈe ta ratou pahonoraa, e nehenehe anei ta outou e faahiti faahou na roto i ta outou iho mau parau i te manaˈo tumu o ta ratou mau pahonoraa? A tamata, e e oaoa roa outou i te ite e te faaroo ra outou hau atu i na mua ˈˈenei.

17. Eaha te mea e nehenehe e tauturu ia tatou ia pee maite i te taioraa o te mau paratarapha?

¹⁷ E taio rahi atoa tatou i roto i taua mau putuputuraa ra. E taiohia te mau paratarapha i te haapiiraa o Te Pare Tiairaa e i te haapiiraa buka a te amuiraa. Te apee maitai ra anei outou i teie taioraa, aore ra e faaohipa anei outou i teie taime no te moemoeâ haere? E rave rahi mau tuhaa iti i roto i te mau paratarapha aita e taimehia no te faahiti i roto i te mau pahonoraa. E noa ˈtu e ua faaite-ê-na-hia vetahi mau manaˈo e te feia o tei pahono i te uiraa, e nehenehe te faahiti-faahou-raa e nenei roa i roto i te feruriraa. E rave rahi hoi mau mea o ta tatou e nehenehe e haapii mai te peu e e faaroo maitai tatou i roto i te mau putuputuraa! E mea ohie aˈe ïa mai te peu e e apee outou i te taioraa e to outou mata e to outou tariˈa atoa.

18-20. Nafea te mau taata faaroo ara maitai e haamauruuruhia ˈi?

¹⁸ E haamauruuruhia te feia faaroo maitai. Te farii nei te feia faaroo maitai e e rave rahi mau mea te tia ia ratou ia haapii e te hinaaro nei ratou e haaputu hau atu i te mau ite. Te faaroo nei ratou i teie mau parau a te Maseli 2:3, 4: “Ia titau hua oe i te haapao maitai, e ia faateitei i to reo ia noaa te ite ra; ia imi hua oe ia ˈna mai te ario ra, . . . .” E haamaitai mai Iehova i ta ratou mau maimiraa, no te mea te tǎpǔ nei oia e: “E ite ïa oe i te mǎtaˈu ia Iehova, e noaa ïa ia oe te ite i te Atua. . . . Ei reira oe e ite ai i te parau-tia, e te parau au, e te piˈo ore, e te mau eˈa maitatai atoa ra.”—Mas. 2:5, 9.

¹⁹ Oia mau, no te riro ei taata faaroo maitai, e mea titauhia ia faatitiaifaro ia tatou iho. A hiˈo na râ i te haamauruururaa! E ite-papu-hia to tatou tupuraa i te pae varua. E rave tatou i te mau tauiraa faufaa roa i roto i to tatou oraraa. E faarahi tatou i to tatou aravihi no te faaite i te parau apî maitai na mua mai i te tahua e tae noa ˈtu i roto i te taviniraa.

²⁰ Ma te papu maitai, e mea taotiahia te taime o ta tatou e nehenehe e horoa no te haapiiraa tataitahi, tera râ, e nehenehe ta tatou paatoa e faaroo e rave rahi mau mea i te mau putuputuraa o te amuiraa. No reira, e mea faufaa roa ia ite nafea ia faaroo!  E i te mea e te mau mea o ta tatou e faaroo ra, no nia ïa i te taviniraa o ta tatou e pûpû nei na Iehova e to tatou tiaturiraa e ora e a muri noa ˈtu, ua tano roa ïa teie aˈoraa a Iesu: “E ara i to outou faarooraa.”—Luka 8:18.

[Uiraa haapiiraa]