Haapiiraa 31

Ia tiaturi te feia e faaroo ra ia outou, a haaferuri ia ratou

1, 2. Eaha te hoê faataaraa maitai?

 ¹ Ia paraparau outou i te hoê pǔpǔ taata, te tumu ia faaroohia ïa outou; e ere noa râ no te reira. Te hinaaro atoa ra  outou e ia farii ratou i ta outou mau faataaraa e ia ohipa ratou ia au i te reira. O te ohipa e ravehia e te feia i putuputu mai, mai te peu e ua papu ia ratou i te parau mau o ta outou mau faahitiraa e ua afaro to ratou mafatu. Haapapu i te manaˈo oia hoi te auraa te faataaraa na roto i te tahi mau haapapuraa. Eita râ e navai noa i te reira. I te rahiraa o te taime, e tia ia faahuˈahuˈa i te reira na roto i te hoê faataaraa maitai. Te vai ra e toru niu no te hoê faataaraa maitai: a tahi, te mau haapapuraa iho; a piti, te anairaa ta outou e pee no te vauvau atu; a toru, te huru e te ravea e faaohipahia no te faataa. I roto i teie Haapiiraa, e tuati i te tapao “Faataaraa papu” o te api iti Aˈoraa no te oreroraa, e hiˈopoa tatou i tei parauhia, oia hoi te mau haapapuraa i horoahia, maoti i te huru e vauvauhia ˈtu.

² E titau te hoê faataaraa papu i te tahi mau tumu tano e o te haaputapû; o te reira ta te taeae aˈo e haapao. E tia e ia matara maitai ta outou mau faataaraa tae noa ˈtu i te taioraa. Mai te peu e ta outou faataaraa e haapao-rahi-hia i te huru outou e vauvau ai i te mau tupuraa i faaohipahia ei haapapuraa, e tia ïa ia outou ia faataa i taua huru ra no te faariro i ta outou faataaraa ei mea paari mau e te aravihi.

3-6. A faaite e no te aha e tia ia tuu i te niu o te hoê faataaraa.

³ A tuu i te mau niu. Na mua ˈˈe outou e faataa ˈi i ta outou mau haapapuraa, e tia e ia tuu outou i te mau niu o ta outou faataaraa. Ia faataa maitai outou i te tumu o te aparauraa e ia tuea to outou manaˈo ma te haapapu i te omuaraa iho te mau tapao ta outou e farii ra.

⁴ I te tahi taime, e tia ia faataa ma te maramarama i te auraa o te mau taˈo. E faaore outou i te mau mea atoa o te ore e tano i te aparauraa. A rave i te taime no te tuu i te niu o ta outou faataaraa. E tia e ia paari maitai te niu, eiaha râ ia moe ia outou e ere te reira i te fare rahi. Ia patoi outou i te hoê faaiteraa, a hiˈopoa i te mau manaˈo huru rau o te turu atu ra, ia nehenehe outou e ite i te mau vahi paruparu e ia taa ma te ohie atu â i te mau faaiteraa ta outou e faaohipa e oia atoa i te hohonuraa o te fifi.

⁵ Ia faaineine outou i ta outou oreroraa parau, a tamata i te taa eaha ta te feia e faaroo ra ia outou i ite aˈena no nia i te tumu parau ta outou e vauvau atu. E tauturu te reira ia outou ia hiˈo eaha te niu te tia e ia tuuhia ˈtu no te faataa i ta outou mau faaiteraa.

⁶ E titau te aravihi e te peu maitai kerisetiano e ia faaite tatou i te mǎrû e ia haapao tatou i ta tatou faaiteraa, noa ˈtu e aita taua mau tapao ra e tuatapapahia ra i roto i teie Haapiiraa. A haafaufaa i te mau taime atoa i to outou ite i te mau  faaueraa tumu kerisetiano, ia matara mai te feruriraa o te feia e faaroo ra ia outou e to ratou mafatu.

7-13. A faataa eaha te auraa o te parau ra e “Haapapuraa putapû.”

⁷ Mau haapapuraa putapû mau. Aita te hoê tapao i “haapapuhia” no te mea noa e te tiaturi papu ra te taata orero e te parau ra oia. Eiaha e moehia ia outou e nehenehe te feia e faaroo ra e uiui e: “No te aha e e parau mau te reira? No te aha oia e parau ai i te reira?” Na te taata orero te hopoia ia horoa ˈtu i te mau tumu.

⁸ E horoa te pahonoraa i te mau uiraa “Nafea?,” “O vai?,” “Ihea?,” “Afea?” e “Eaha?” i te tahi mau tupuraa, e horoa râ te pahonoraa i te uiraa ra “No te aha?” i te mau tumu. E uiraa otahi roa teie; e titau oia hau atu i te tahi noa mau tupuraa. E tamata oia i to outou aravihi no te feruri. No reira, ia faaineine outou i ta outou mau oreroraa parau, a aniani pinepine i te uiraa ra “No te aha?” e ia papu ia outou e e nehenehe outou e horoa i te pahonoraa.

⁹ E faarahi atu â outou i ta outou mau faatiaraa ma te faahiti i te hoê taata papai buka tei fariihia te mau parau mai te hoê mana papu. I te mea e te farii nei te taatoaraa i to ˈna aravihi, e navai noa i te faahiti atu no te haapapu i te parau mau o te hoê tuhaa. O te hoê tumu tano maitai no te tiaturi atu. Oia mau, o te Atua ra o Iehova ïa te Mana teitei i roto i taua tuhaa ra. No reira, ua riro te hoê faahitiraa a te Bibilia ei haapapuraa. O te hoê haapapuraa “papaihia,” no te mea o te “faaiteraa” te reira o te hoê taata o tei riro ei ite papu.

¹⁰ No te faaite i te tahi mau haapapuraa papaihia, e tia na mua ia papu e ia farii te feia e faaroo ra i te mana o te mau taata ta tatou e faahiti ra. Mea faufaa mau â te reira mai te peu e e faahiti outou i te mau taata papai buka. Area te mau faahitiraa bibilia ra, te farii nei te rahiraa o te mau taata e no ǒ mai te mau Papai i te Atua ra, area vetahi te hiˈo nei ïa mai te hoê buka i papaihia e te mau taata e aita e faufaa. No ratou, e tia ia faahiti atu i te tahi mau haapapuraa aore ra e faataa na mua i te parau mau o te Bibilia.

¹¹ Haapao maitai râ! E tia ia faahiti i te mau haapapuraa atoa ma te haavare ore. Eiaha e faahiti i te hoê faahitiraa o te ore e tuea i ta ˈna tumu parau. Ia papu maitai ia outou e te parau nei outou i te manaˈo mau a te taata papai. A horoa i te mau faahororaa e te mau numera tano. Mai te peu e aita e vauvauhia ˈtu ma te papu, e nehenehe te reira e faatupu hau atu i te ino i te maitai. A haamanaˈo i te taata, o tei ore i ite i te au, ua paremo oia i roto i te hoê anavai e te hohonuraa au noa e hoê ïa metera. Ua moehia ia ˈna e i ropu te vai ra te hoê apoo e toru metera!

 ¹² Taa ê atu i te mau haapapuraa a te mau taata aore ra a te Atua, te vai ra te mau haapapuraa o te ore e haere tia i nia i te tapao. O te tahi mau faaotiraa hutihia na roto i te tahi mau tupuraa. No te haaputapû, e tia iho â ïa e ia turuhia ta outou mau haapapuraa e te tahi mau tupuraa e te mau faataaraa o te ore roa e nehenehe e patoihia.

¹³ Mai te peu e e navai maitai ta outou mau haapapuraa (noa ˈtu eaha te anairaa outou e vauvau atu ai) no te haaputapû i te feia e faaroo ra ia outou, e farii ïa te taeae o te aˈo ia outou e mea maitai. E rave ïa oia i te parahiraa o te feia e faaroo ra e e uiui i teie nei uiraa: “Ua haaputapû anei oia ia ˈu?” Mai te peu e e nehenehe ta ˈna e pahono e e, e haapopou ïa oia ia outou no ta outou faataaraa.

14. Eaha te hoê haapotoraa parau maitai?

¹⁴ Haapotoraa maitai. Mea titauhia te hoê haapotoraa na roto i te tahi ravea no te faariro i te hoê faataaraa ei parau putapû. O te hoê titauraa hopea no te haaferuri e no te farii i te mau haapapuraa i faahitihia. E ere noa i te hoê faahitiraa poto i te tahi mau tupuraa, noa ˈtu e e parau-noa-hia i roto i taua huru haapotoraa ra e: “No teie ohipa hoi aore ra i tera, e tupu mai iho â ïa . . .” Te tapao o te haapotoraa no te haaputu i te mau manaˈo i vauvauhia e ia huti i te tahi mau faaotiraa. Mea pinepine e na roto i te hoê haapotoraa maitai e nehenehe ai tatou e rave e ia fariihia te mau faataaraa i faaohipahia e ia haaputapû i te feia e faaroo ra ia tatou.

**********

15, 16. No te aha e tia ia tatou ia aratai i te feia e faaroo ra ia tatou ia feruri?

¹⁵ Noa ˈtu e mea maitai te mau faataaraa ta outou e faaohipa ra i roto i te hoê oreroraa parau, aita ïa e navai noa e ia faahiti outou i te mau tupuraa. E vauvau outou ia nehenehe te reira e tauturu i te feia e faaroo ra ia outou ia feruri, ia taa i ta outou mau faataaraa e ia tapae i te hoê â faaotiraa e ta outou. O te reira ïa tei anihia i roto i te tapao “Aratai i te feia faaroo ia feruri” i tapaohia i nia i te api iti Aˈoraa no te oreroraa.

¹⁶ Te hinaaro nei tatou e faaohipa i taua huru ra, no te mea te haaferuri atoa nei te Atua iho e o tatou. Ua faataa atoa o Iesu i ta ˈna mau parabole i ta ˈna mau pǐpǐ e ua nehenehe ratou e haapii atoa ia vetahi pae i taua iho mau parau mau ra. No te aratai i te feia faaroo ia feruri, e tia ia faaohipa i te mau ravea atoa o te tauturu ia ˈna ia apee i ta outou mau faataaraa, e ia huti i te hoê â faaotiraa i ta outou e ia faaohipa no te haapii atu ia vetahi pae.

17, 18. Nafea tatou ia vai i nia i te hoê manaˈo faatuea?

¹⁷ A tapea i te hoê manaˈo faatuea. Ia roaa mai i te hoê manaˈo faatuea mai te omuaraa iho â o te oreroraa parau, e  tia ia haapao maitai eaha ta outou e parau e i te huru outou e parau ai. E e tia ia vai noa i nia i taua manaˈo faatuea ra i te roaraa o te oreroraa parau, aita anaˈe eita te feia e faaroo faahou ia outou i muri iho. A faahiti i te mau tapao o ta outou oreroraa ia nehenehe te feia e faaroo ra e farii. A tapea noa mai i roto i to outou feruriraa i to ratou huru manaˈo e a haapao atu i te reira ia nehenehe outou e tauturu ia ratou ia ite e mea tano ta outou haaferuriraa.

¹⁸ I roto i te Ohipa 17:22-31, te horoa nei te aposetolo Paulo i te hoê hiˈoraa maitai e nafea ia ite mai i te hoê manaˈo faatuea, ia vai noa mai te reira i te roaraa o te oreroraa parau e ia aratai i te feia faaroo ia feruri. A tapao na e mea nafea, i te omuaraa iho, to ˈna imiraa ma te aravihi ia haamau i te hoê manaˈo faatuea e ua manuïa i te tapea noa mai te omuaraa e tae atu i te hopea o ta ˈna oreroraa parau. Ia tapae oia i te hopea o ta ˈna oreroraa parau, ua noaa mai vetahi pae i te parau mau, hoê atoa haava.—Ohipa 17:33, 34.

19-23. A faahiti i te tahi mau ravea no te faataa ma te navai maitai i te mau manaˈo.

¹⁹ Faataaraa navai maitai i te mau manaˈo. No te aratai i te hoê pǔpǔ feia e faaroo ra ia feruri i nia i te hoê tumu parau, e tia ia faaite atu ia ratou i te tahi mau haamaramaramaraa navai maitai e ia na reira ia ore ratou e patoi i ta outou mau faaiteraa no te mea noa aita ratou e taa ra. Na outou e tauturu ia ˈna i roto i taua tuhaa ra.

²⁰ Ia tapae outou i reira, a haapao e eiaha e faataa e rave rahi mau manaˈo. E erehia ratou i to ratou faufaa mai te peu e e faaite-vitiviti-hia. A rave i te taime no te faataa i te mau manaˈo tataitahi ma te hohonu, ia ore noa te feia i putuputu mai ia faaroo, ia taa atoa râ. Ia tae anaˈe outou i te hoê manaˈo faufaa, a rave i te taime no te faataa. A pahono i te mau uiraa: No te aha? O vai? Nafea? Eaha? Afea? e Ihea? A tauturu i te feia e faaroo ra ia outou ia taa i te taatoaraa o to outou manaˈo. No te faaite e mea tano ta outou faataaraa, e nehenehe atoa outou e faaite i na manaˈo taa ê e piti. I muri aˈe to outou faaiteraa i te hoê faaueraa tumu, mea maitai atoa ia faaite i te hoê hiˈoraa no te hoê faaohiparaa ohie. Oia mau, e tia ia haapao maitai. Tei te huru ïa te faataaraa o te hoê manaˈo i te taime e vai ra e i te tahi atu pae i to ˈna faufaaraa i roto i te tumu parau o te oreroraa parau.

²¹ Mea maitai roa te mau uiraa no te aratai i te feia e faaroo ra ia feruri. Vetahi, i faahitihia ma te ore e tiai e ia pahono mai te feia e faaroo ra e o te apeehia ra e te hoê faafaaearaa, e faaanaanatae te reira i te feruriraa. Mai te peu e e paraparau outou i te hoê aore ra e piti taata, mai i roto i te taviniraa, e nehenehe outou e haaparaparau ia raua na roto  i te tahi mau uiraa e faahitihia i te roaraa o te tumu parau e ia haapapu e te taa ra ia raua i ta outou parau e te apee nei i ta outou haaferuriraa.

²² I te mea e te hinaaro nei outou e aratai i te feia e faaroo ra ia outou ia feruri, e tia ia outou ia rave ei tapao matamua i te mea o ta ratou i ite aˈena, na roto i ta ratou iho mau maimiraa, aore ra na roto i ta outou mau faataaraa na mua ˈtu. No te taa e ua faataa outou ma te navai maitai i te tahi mau manaˈo, e tia ia outou ia haapao i te mea i ite-aˈena-hia e te feia e faaroo ra ia outou i nia i taua tumu parau ra.

²³ Mea faufaa ia hiˈopoa i te feia e faaroo ra ia outou no te papu e te apee nei ratou ia outou i roto i ta outou mau faataaraa. Mai te peu e e titauhia, a rave faahou mai i te hoê manaˈo e a faataa faahou atu hou e haere ai i to muri iho. Mai te peu e eita outou e aratai i te feia faaroo ia feruri, eita oia e apee i te tereraa o ta outou mau manaˈo.

24. No teihea tumu maitai roa e tia ˈi ia outou ia faaite e nafea ia faaohipa i te tahi mau faataaraa i te feia e faaroo ra ia outou?

²⁴ Faaohiparaa i nia i te feia faaroo. Noa ˈtu eaha te faataaraa e vauvauhia, a hohora ma te maramarama maitai e nafea ia faaohipa i te manaˈo ta outou e paraparau ra. Eiaha ia moe ia outou ia turai i te feia e faaroo ra ia outou ia ohipa e ia huti i te mau faahopearaa o te mau tupuraa o ta outou i vauvau atu. Mai te peu e ua putapû mau â ratou na roto i ta outou mau faaiteraa, e ineine ïa ratou no te ohipa.

[Uiraa haapiiraa]