Haapiiraa 35

Manaˈo e tano no te pororaa

1-3. No te aha e mea faufaa ia haapii ia faatano i te mau manaˈo i roto i te pororaa?

 ¹ Na nia i to tatou tiaraa tavini kerisetiano, ta tatou ohipa i teie mahana, o te pororaa ïa e te haapiiraa i te Parau a te Atua i te mau taata e mea iti roa to ratou ite no nia i te Bibilia. Aita roa ˈˈe ta vetahi; area te vai ra ta vetahi i te hoê Bibilia o te vai noa i nia i ta ratou vairaa buka. No reira, mai te peu e te hinaaro nei tatou e ia fanaˈo hau atu â taua mau taata ra i ta tatou haapiiraa, e tia ia tatou ia faatano ia au i te huru tupuraa. Eita tatou e taui i ta tatou poroi, e rave râ tatou i te hoê tutavaraa taa ê no te faaite atu na roto i te hoê reo ta te mau taata e taa. I te parau mau, e tamata taua titauraa ra e faatano i te mau manaˈo ia au i te huru tupuraa i to tatou iho maramarama no nia i te tumu parau.

² Te auraa o te parau faatanoraa oia hoi e faatupu i te tahi tauiraa no te faaau atu i te tahi mau huru tupuraa apî. E faatano tatou i te hoê ohipa i nia i to tatou iho hinaaro aore ra i nia i ta vetahi ê. I roto i taua tupuraa ra, o te faatanoraa ïa i te mau manaˈo i nia i te mau hinaaro o te taviniraa, oia hoi te iteraa i te faufaaraa ia paraparau i te uputa o te mau taata aore ra te faahitiraa i te tahi mau oreroraa parau ia nehenehe te feia e faaroo ra ia taa, mai te peu iho â râ o te mau taata i farereihia i roto i te pororaa. Ia ohipa-anaˈe-hia taua tapao ra i te haapiiraa, a hiˈo i te feia e faaroo ra ia outou mai te mau taata ta outou e horoa ra i te faaiteraa ia haere outou i tera e tera fare.

³ E ere ïa te auraa e e tia iho â e ia riro ta outou oreroraa mai ta outou e horoa i te hoê uputa. E rave-noa-hia taua mau haamataroraa ra ia au noa i te mau faaueraa hopea o te haapiiraa. Tera râ, noa ˈtu eaha te oreroraa e vauvauhia, e rave  outou i te tahi mau faataaraa e te tahi mau parau e nehenehe e faaohipahia i mua i te mau taata ta outou e farerei i roto i te pororaa. I te mea e te faahiti nei tatou i te rahiraa o ta tatou oreroraa i roto i ta tatou taviniraa, e tia ia tatou ia farii i te faufaaraa ia paraparau ma te ohie, ia nehenehe tatou e taahia e te rahiraa taata o ta tatou e farerei nei i te mau uputa. Ua tuatapapa aˈena outou i roto i te tahi faito i taua huru ra i roto i te Haapiiraa 21. I teie nei, e tumu parau taa ê ïa no to ˈna faufaaraa rahi.

4, 5. A faataa e no te aha e tia ia haamaramarama i mua i te huiraatira i te mau parau ta tatou e faaohipa.

⁴ Parau i haamaramaramahia i mua i te huiraatira. Mea navai noa ia faaroo i te tahi mau parau e faaohipahia e vetahi mau taeae ia haere anaˈe ratou i tera e tera fare aore ra ia haamata ratou i te mau haapiiraa apî no te taa i te faufaaraa ia ara i te mau parau ta tatou e maiti. Te horoa nei to tatou maramarama no nia i te mau Papai i te tahi mau haapueraa parau aita te taatoaraa e taa ra. E pinepine tatou i te faaohipa i te mau parau mai “te toea” aore ra “te mau mamoe ê atu.” E nehenehe e tupu e eita teie mau parau e taahia aore ra e taa-hape-hia e te feia o ta tatou e farerei i roto i te pororaa. No reira ïa te faufaaraa ia haamaramarama ˈtu na roto i te tahi mau parau hoê â auraa aore ra na roto i te tahi mau faataaraa. Oia atoa te mau parau mai “Aramagedo” aore ra “te haamauraahia te Basileia,” e auraa iti haihai roa no te mau taata e te titau nei i te tahi mau haamaramaramaraa.

⁵ I roto i taua tuhaa ra, e aniani te taeae aˈo ia ˈna iho e mai te peu e e taa i te hoê taata o te ore i ite i te Bibilia i tera parau aore ra tera faahitiraa. Eita oia e parau mai ia outou ia ape i te faaohipa i te mau parau teotaratia, no te mea tei roto ratou i ta tatou huru paraparau e te hinaaro nei tatou e ia matau maitai te feia farii i taua mau parau ra. Ia faaohipa anaˈe râ outou i taua mau huru faahitiraa parau ra, e hiˈopoa oia ia outou no te ite e ua faataa anei outou i te reira.

6-8. Ia faaineine tatou i te hoê oreroraa parau, no te aha e tia ia tatou ia maiti i te tahi mau manaˈo tano?

⁶ Maiti i te tahi mau manaˈo tano. Mai te mau parau, e tauiui tatou i ta tatou mau manaˈo e vauvau i roto i te pororaa ia au i te ohipa e te huru tupuraa. Oia mau, te vai ra iho â te tahi mau tumu parau ta tatou e ore e paraparau e te feia tei anaanatae noa maira. I te rahiraa o te taime, na outou e maiti i te mau manaˈo. I te haapiiraa râ, e horoahia ˈtu ta outou tumu parau e e nehenehe outou e maiti i te mau manaˈo noa e tuati ra e te tumu parau. Eaha ïa te tia ia rave?

⁷ I te mea e e mau tapao noa ta outou tei taotiahia, e tia na mua e ia maiti outou i te hoê huru tupuraa o te tauturu ia outou ia vauvau hau atu â i te mau manaˈo tano. E anaanatae to outou taeae aˈo i ta outou maitiraa i te tahi mau manaˈo e e hiˈo oia mai te peu e ua tuati i te huru tupuraa. Ma te haamaitai i taua huru ra o te aravihi o te oreroraa, te faaite nei ïa outou e  te titau nei te mau ohipa taa ê o te taviniraa i te mau manaˈo taa ê. Ei hiˈoraa, eita outou e vauvau i te hoê â manaˈo ia titau manihini outou i te hoê taata ia haere mai i te putuputuraa mai ta outou faaiteraa ia haere outou i tera e tera uputa. No reira, e nehenehe e faataa e o vai te feia e faaroo ra ia au i te mau manaˈo ta outou i maiti e vauvau atu, ia titau ta outou oreroraa e ia paraparau outou i mua i te hoê uputa aore ra ia faahiti outou i te hoê oreroraa parau na mua mai.

⁸ No te ite mai te peu e ua tano ta outou mau manaˈo, e haapao te taeae aˈo i te tapao o ta outou oreroraa parau. I mua i te uputa, ta tatou tapao o te haapiiraa ïa i te taata e ia turai ia ˈna ia haapii. I roto i te mau hoˈi-faahou-raa e farerei, e tamata tatou i te faarahi i to ˈna anaanatae e mai te peu e e nehenehe e haamata i te hoê haapiiraa bibilia. Te tapao o te hoê oreroraa e vauvauhia i te hopea o te hoê haapiiraa, no te faaitoitoraa ïa i te taata ia haere mai i te mau putuputuraa aore ra ia apiti i roto i te pororaa.

9, 10. Nafea tatou e ite ai e mea tano anei te mau tuhaa ta tatou i maiti?

⁹ Oia mau, i roto i te tuhaa tataitahi o te taviniraa e nehenehe ta tatou maitiraa i te mau manaˈo e taui ia au râ i te taata aore ra te tahi atu. E tia ïa ia haapao-atoa-hia te reira. E tuu outou i te hiti i te mau manaˈo te ore e tuea ra e te tapao o ta outou oreroraa parau.

¹⁰ No taua mau tumu atoa ra, e tia ia outou ia maiti i te tupuraa na mua ˈˈe e faaineine ai i te oreroraa. A uiui i te mau uiraa i muri nei: Eaha ta ˈu tapao? Eaha te mau manaˈo e hinaarohia no te tapae, e nafea vau ia faatano atu i te mau ohipa e tupu ra? Ia oti anaˈe taua mau uiraa ra i te pahonohia, e maiti outou ma te fifi ore i te mau manaˈo tano e e nehenehe atu ai outou e faatano i roto i te pororaa.

11-13. No te aha e mea faufaa ia haapapu i te faufaaraa ohie o te tahi mau manaˈo o ta tatou i vauvau?

¹¹ Haapapu i te faufaaraa ia faaohipa i te mau manaˈo. No te haapapu i te faufaaraa ia faaohipa i te mau manaˈo, e tia ia faaite i te taata, ma te ore roa ˈtu e feaa e no ˈna taua parau ra e e faufaahia o ˈna. I te omuaraa iho â o te oreroraa parau, e tia e ia ite te taata e tumu parau teie o te “tano atoa na ˈna,” aita anaˈe eita outou e faaara i to ˈna anaanatae. No te tapea râ i to ˈna ara-maite-raa, e tia ia outou ia faaohipa i te mau manaˈo i nia i te taata i te roaraa o te oreroraa.

¹² Aita e navai noa ia faatupu i te taairaa e te feia e faaroo ra e ia tauturu ia ratou ia feruri. E tia ia haere i mua ˈtu â e ia faatano i te mau manaˈo i nia ia ratou. I roto i te pororaa, te tapao o te faaiteraa ïa i te parau mau o te Parau a te Atua e te eˈa o te ora. No reira, ma te faaohipa i te aravihi e te haapao maitai, e tia ia tatou ia faaite i te mau taata e e huti ratou i te mau haamaitairaa ia faaroo ratou ia tatou e ia faaohipa ratou i te mau ohipa i haapiihia.

¹³ Mai te peu e ua tuatapapa tatou i taua tuhaa ra o te uiraa  i te pae hopea, e ere no te mea e faufaa iti aˈe to ˈna. E tuhaa faufaa roa te tia ia ore roa ˈtu ia haamoehia. A tamata i te haamaitai i taua huru faufaa ra i roto i te taviniraa. Eita outou e nehenehe e tapea i te ara-maite-raa o te hoê taata i te hoê taime roa, mai te peu e eita o ˈna e taa ma te maramarama e e faufaa rahi no ˈna ta outou mau parau.

[Uiraa haapiiraa]