Haapiiraa 21

Manaˈo o te horoa i te haapiiraa, vauvauhia ma te maramarama

1-3. No te aha e mea titauhia te mau manaˈo papu ia riro te hoê oreroraa parau ei haapiiraa?

 ¹ No te horoa i te hoê oreroraa parau faufaa, e tia na mua ia faaineine maitai, e e titau te reira i te taime e te mau tutavaraa. Auê râ te oaoa e! E faarahi outou i to outou ite mau e te vai ra ia outou i te tahi mea faufaa ia tufa ˈtu i te feia e faaroo  ra ia outou. Maoti i te horoa noa ˈtu i te mau manaˈo o te ore e faahohonu, te horoa ˈtura outou i te mau haamaramaramaraa e ua ite outou e e parau mau ta outou e faataa ˈtura. E faarahi te reira i te anaanatae o te feia e faaroo ra ia outou no te Parau a te Atua e e faahanahana atoa ia Iehova. E tuatapapa iho â râ ta outou tatararaa no nia i te mau manaˈo o te horoa i te haapiiraa i te mea o ta outou e faaite i roto i ta outou oreroraa parau. A hiˈopoa poto noa i te mau tuhaa taa ê o teie uiraa. O te tapao matamua teie o te api iti Aˈoraa no te oreroraa.

² Mau manaˈo papu. Mai te peu e e faataa noa te taata orero i te mau manaˈo tei ore i faahohonuhia, eita ïa ta ˈna oreroraa parau e tiaturihia. Mai te peu e mea papu ore roa te mau manaˈo, e riro ïa te feia e faaroo maira i te feaa. Ia vai mai i roto i te feruriraa, e tia ia faataa i te mau manaˈo papu e te tia. E faaite te reira e ua rave te taata orero i te mau maimiraa e ua mataro maitai oia i ta ˈna tumu parau.

³ E nehenehe teie aravihi e noaa mai ia outou na roto i te faaineineraa i ta outou mau oreroraa parau. E nehenehe outou e aniani e: No te aha? Afea? Ihea roa? e te vai aturâ. I te rahiraa o te taime, eita e navai ia parau noa ˈtu e ua tupu tera aore ra tera ohipa. A haapapu roa ˈtu i te vahi, te taime e peneiaˈe atoa te tumu o teie ohipa. Oia atoa, eita e navai ia faahiti noa i te tahi mau parau mau. E tia ia faaite e no te aha te reira e riro ai ei parau mau e no te aha e mea faufaa ia ite i te reira. Mai te peu e e horoa outou i te tahi mau faaueraa, a faataa e mea nafea ia rave i te ohipa. E faitohia te rahiraa o teie mau faataaraa ia au i te ite o te feia e faaroo ra. E tia ia haapao ia ratou ma te maiti e eaha te mau haamaramaramaraa e vauvauhia i roto i te oreroraa parau.

4-6. Ia huti mai te feia e faaroo ra ia outou i te hoê haapiiraa na roto i ta outou oreroraa parau, eaha te mau titauraa te tia ia outou ia haapao?

⁴ Mau manaˈo e tano i te feia e faaroo ra. E nehenehe te tahi mau taata e fanaˈo i te hoê manaˈo, area ra, aita roa e faufaa no te tahi atu pǔpǔ feia faaroo aore ra e haafeaa roa ia ratou. No reira, e tia ia faatano i te mau manaˈo ia au i te feia e faaroo ra. Ei hiˈoraa, e tia ia faatano i te mau manaˈo vauvauhia i roto i te hoê oreroraa parau no nia i ta tatou ohipa mai te peu e te paraparau ra tatou i te hoê putuputuraa o te taviniraa, i te hoê taata e opua ra e pûpû ia ˈna no Iehova aore ra i te hoê pǔpǔ taata no teie nei ao.

⁵ E tia atoa ia haapao i teie mau titauraa ia faaineine tatou i te hoê oreroraa parau no te Haapiiraa o te taviniraa teotaratia. E maitihia ïa te mau manaˈo e vauvauhia ia au i te feia e faaroo ra, te huru tupuraa e te tapao e tapapahia ra. E au atoa i te huru oreroraa parau e vauvauhia e te huru tupuraa e maitihia. Oia mau, e hohorahia te oreroraa parau haapiiraa i mua i te aro o te amuiraa. Area te tahi atu mau oreroraa parau ra, e nehenehe te huru tupuraa tei maitihia e taui; na te reira e  faataa i te huru taata o ta outou e paraparau e te tapao o ta outou oreroraa parau. No te mau oreroraa atoa, e nehenehe te taata haapii e te taeae aˈo e ui i teie mau uiraa: Ua faatanohia anei te mau manaˈo i te taata faaroo i maitihia? E huti mai anei oia i te tahi haapiiraa?

⁶ Ia faaineine anaˈe outou ia outou, a feruri i teie mau uiraa: Eaha mau na te tapao o ta ˈu oreroraa? I rotopu i te mau manaˈo ta ˈu e opua ra e hohora, ehia tei ite-ê-na-hia e te taata o ta ˈu e paraparau ra aore ra i te feia e faaroo maira? Eaha te niu te tia ia ˈu ia haamau ia maramarama aˈe teie mau manaˈo? Nafea vau e nehenehe ai e faataa na roto i te tahi atu ravea, i te hoê pǔpǔ taata taa ê? Mea pinepine te mau faahohoˈaraa parau i te tauturu ia tatou ia maramarama te mau manaˈo no tatou iho. Ia faaineine outou i ta outou oreroraa parau, a feruri e nafea outou ia faataa i te tumu parau mai te peu e e paraparau outou i te mau taata huru rau. E tauturu te reira ia outou ia ite i te mau ravea taa ê e vai ra, e ia vauvau i te mau manaˈo o te horoa i te haapiiraa papu aˈe no te feia ta outou e paraparau atu.

7, 8. Eaha ta tatou e rave ia faataa ta tatou mau oreroraa parau i te mau manaˈo ohie ia faaohipa?

⁷ Faufaaraa o te mau manaˈo ohie ia faaohipa. E nehenehe tatou e haapue e rave rahi mau ite, teie râ, e ere teie mau ite atoa i te mea ohie ia faaohipa. No tatou, te mau manaˈo o te horoa i te haapiiraa, o te mau manaˈo ïa no nia i te mau mea faufaa o te oraraa o te kerisetiano e o ta tatou taviniraa. Te hinaaro nei tatou e ite nafea ia faaohipa i te mau ite o te noaa mai ia tatou.

⁸ E nehenehe te taata haapii e faaineine ra ia ˈna e te tiaau no te haapiiraa e horoa i te mau aˈoraa, e hiˈopoa i teie manaˈo ma te ui i teie mau uiraa: Eaha te mau manaˈo aratai o teie oreroraa parau? E tauturu anei te mau manaˈo i vauvauhia ia rave i te mau faaotiraa? E nehenehe anei e faaohipahia i roto i te taviniraa? Te faahanahana ra anei te reira i te Parau e te mau opuaraa a te Atua? Aita i rahi te mau oreroraa parau o te nehenehe e faaî i teie mau titauraa atoa, teie râ, e tia i te mau manaˈo e vauvauhia ia ohie noa i te faaohipahia e te feia e faaroo maira.

9-11. No te aha e mea faufaa roa ia tano te mau parau e faahitihia?

⁹ Tanoraa o te mau parau. Ua niuhia te faanahonahoraa a te mau Ite no Iehova i nia i te parau mau. To tatou hinaaro, o te faaiteraa ïa i te parau mau e te araraa ia tano ta tatou parau i te mau taime atoa e i roto i te mau tuhaa iti atoa. E te reira, eiaha noa no te mau haapiiraa, no te mau faahitiraa parau atoa râ, te mau haamaramaramaraa o ta tatou e vauvau no nia i te mau taata ê atu, te mau parau i te pae ite aivanaa e te mau parau apî.

¹⁰ E nehenehe te mau taata e faaroo ra e faahiti atoa i ta tatou mau parau tano ore e e anoi atoa ˈtu ta ratou. Mai te peu e  e faahiti te taata orero i te mau parau tano ore, eita ïa te feia e faaroo ra e tiaturi faahou ia ˈna e e tae roa ratou i te feaa no nia i te parau mau o te poroi iho. E riro te hoê taata farii maitai o te faaroo i teie mau huru parau hape e o tei faaroo na mua ˈtu i te tahi atu taeae i te faahitiraa i te hoê parau taa ê roa, i te faaoti e aita te manaˈo o te mau Ite no Iehova e tuea ra te tahi e te tahi, e e faaea o ˈna i te amuimui mai ia tatou ma te ore e faataa mai i te tumu.

¹¹ Eita te taeae aˈo e faahapa i te mau parau atoa a te taata haapii, mai te peu iho â râ e e taata apî teie o te ore e taa papu ra i te hohonuraa o te mau faaiteraa a te Parau a te Atua. E tutava râ oia i te aratai i to ˈna mau manaˈo na roto i te faaiteraa ˈtu na roto i te mau parau e au, nafea ia hiˈopoa i te tanoraa o to ˈna mau manaˈo maoti te faaineine-maitai-raa.

12, 13. Eaha te faufaaraa o te mau haamaramaramaraa ê atu?

¹² Mau haamaramaramaraa hau atu. E nehenehe te mau manaˈo tei noaa mai na roto i te feruri-hohonu-raa aore ra te mau maimiraa e faarahi atu â i te faufaaraa o te hoê oreroraa parau e i te tahi taime, e ape ia na nia iho i te faahiti faufaa ore noa i te mau haamaramaramaraa ta te feia e faaroo maira i ite ê na. Mea oraora maitai te oreroraa, e faaara faahou i te anaanatae o te feia faaroo, e maoti te reira, e nehenehe te hoê tumu parau matau-maitai-hia e huti i te anaanatae. E rahi atu te taata orero i te tiaturi ia ˈna iho. E faaite oia i te aau tae, no te mea ua ite oia e e vauvau oia i te mau mea ia au i te hoê huru raveraa taa ê.

¹³ E tia ia ara i te atâtaraa no roto mai i ta tatou iho mau faahitiraa. E nehenehe outou e tiaturi i te mau buka a te Taiete. A maimi i roto i te mau Tabula faahororaa a te Taiete, e tae noa ˈtu te mau nota i te hiti api a te mau Papai. A haapapu maitai e ua riro te parau o ta outou e faahiti ra ei haamaramaramaraa eiaha râ ei tatararaa hape.

**********

14-16. Eaha te tia ia rave i roto i te faaineineraa i te hoê oreroraa parau ia nehenehe tatou e vauvau i te mau manaˈo ma te faaohie i te parau?

¹⁴ Ia faaineine outou i to outou mau manaˈo, mea faufaa atoa ia ara maitai i ta outou huru vauvauraa i te reira. Te tuatapapahia ra teie tapao i nia i te api iti Aˈoraa no te oreroraa i raro aˈe i te tuhaa ra “Maramarama, taa-maitai-hia.” Mai te peu e eita outou e haapao maitai i te reira, e riro ïa ta outou mau parau i te ore e taa-papu-hia e te feia e faaroo maira aore ra eita ratou e haamanaˈo i te parau o ta ratou i faaroo. Te vauvau nei teie tuhaa e toru tumu matamua o ta tatou e tuatapapa mai.

¹⁵ Faaohie noa i te parau. Aita matou e hinaaro ra e parau e e tia ia faaineinehia te mau pereota na mua ˈˈe. Teie râ, e tia ia hiˈopoa i te mau manaˈo e vauvauhia e e ara i te tahi mau titauraa. E noaa mai ïa te hoê oreroraa parau o te hohora i te mau manaˈo tia, faataa-poto-hia e te ohie ia taa i te auraa. Mai te peu e aita te hoê manaˈo i maramarama maitai i roto i  te feruriraa o te taata orero, eita atoa ïa e papuhia e te feia e faaroo ra.

¹⁶ E tia ia ape i te faaineine i te taime hopea roa. E tia ia feruri i nia i te mau tuhaa tataitahi o te oreroraa parau e e vauvau i te manaˈo mai te omuaraa e tae atu i te hopea, e tae roa i te taime e maramarama ˈi i roto i to tatou feruriraa. Na roto i te hiˈopoa-faahou-raa i te mau tuhaa hou e horoa ˈi i te oreroraa parau, e matara maitai ïa i roto i to tatou feruriraa e e nehenehe tatou e faataa ˈtu i te feia e faaroo maira ia au i ta tatou iho i maramarama.

17, 18. No te aha e tia ˈi ia tatara i te mau parau matau-ore-hia?

¹⁷ Te tatararaa i te mau parau matau-ore-hia. Na roto i to tatou tuatapaparaa i te mau Papai e te mau buka a te Taiete Watch Tower, ua noaa mai ia tatou te tahi pueraa parau tei ore i itehia i te feia o te ore i matau i ta tatou ohipa. Mai te peu e e faaohipa tatou i teie pueraa parau no te faataa ˈtu i te mau parau mau bibilia i mua i te tahi mau taata, peneiaˈe eita ratou e taa maitai aore ra eita roa ˈtu ratou e taa i ta tatou parau.

¹⁸ A haapao i te huru o te taata e faaroo maira ia outou. Eaha te faito o to ˈna ite? Ua matau anei oia i ta tatou ohipa? Ua taa anei ia ˈna i te mau parau o ta tatou e faaohipa ra? Peneiaˈe i roto i te feruriraa o te feia e faaroo mai ia tatou, e ere hoê â auraa aore ra eita roa ˈtu ratou e taa i te auraa o te mau parau mai teie te huru, “teotaratia,” “toea,” “mamoe ê atu,” e oia atoa “Aramagedo” aore ra “Basileia.” Mai te peu e aita ratou i matau i ta tatou ohipa, e tia ia faataa ˈtu i te mau parau mai “te nephe,” “te po auahi,” e “te pohe-ore-raa.” Oia mau, mai te peu e e vauvauhia te oreroraa parau i mua i te amuiraa, aita e faufaa ia tatara ˈtu i teie mau parau. E haapao ïa te tiaau i te huru tupuraa o te oreroraa parau.

19, 20. Nafea tatou e ape ai ia rahi roa te mau manaˈo e hohorahia i roto i ta tatou oreroraa parau?

¹⁹ Eiaha ia rahi roa te mau manaˈo. Mai te peu e e rahi roa te mau manaˈo e vauvauhia i roto i te hoê oreroraa parau, e huenane roa te feia e faaroo ra e aita hoê rea mea o ta ratou e tapea mai. Ia naeahia te hoê oreroraa parau i to ˈna tapao, eiaha ia hau atu te mau manaˈo o ta te taata orero e nehenehe e vauvau ma te au i roto i te taime i faataahia. Oia atoa, eiaha e vauvau hau atu i ta te taata e faaroo ra e nehenehe e apo mai. Hau atu, mai te peu e e vauvauhia ˈtu vetahi mau manaˈo, a tahi, i te hoê taata ê aore ra i te hoê taata aau tae, e i te tahi aˈe pae i te amuiraa, e tia ïa ia faataa-ohie-hia i te taata matamua. I reira atoa, e tia i te taeae aˈo ia haapao i te feia e faaroo ra ta te taata orero i maiti.

²⁰ Nafea te taata haapii e ite ai e ehia rahiraa manaˈo ta ˈna e vauvau i roto i ta ˈna oreroraa parau? Mea maitai ia rave oia i te mau faaauraa i roto i ta ˈna faaineineraa e ia hiˈopoa maitai i te mau manaˈo o ta ˈna e vauvau. Ehia mau manaˈo ta te taata i ite ê na, i roto i te taatoaraa aore ra te tahi tuhaa? Ehia  o tei riro ei manaˈo apî no ˈna? Rahi noa ˈtu te faito ite i noaa mai e te taata e faaroo mai, rahi atoa ïa te pueraa manaˈo e nehenehe e patuhia i nia iho i roto i te taime i faataahia. Hau atu, mai te peu e aita te feia e faaroo mai i ite noa ˈˈe i te tumu parau, e tia ïa ia ara i te rahiraa manaˈo e vauvauhia e e feruri i te taime e titauhia ia taa maitai ia ratou.

[Uiraa haapiiraa]