Haapiiraa 1

Nafea ia faahiti i te mau parau mau au maitai

1-3. Nohea mai te reo taata nei, e mea nafea to ˈna tupuraa mai?

 ¹ O Iehova te Poiete rahi o te parau. O ˈna te tia ia faahanahanahia i to ˈna hamaniraa i teie ravea faahiahia roa ia nehenehe ta ˈna mau poieteraa maramarama e paraparau i te tahi e te tahi. E mea maitai anaˈe te mau ohipa atoa e ravehia e te Atua, e no reira, ua riro mau â te aravihi no te paraparau o ta ˈna i horoa na te taata i te omuaraa ra, ei ‘ô tia roa’ ta te Bibilia e faahiti ra i roto i te Iakobo 1:17. No nia i te reo taata nei, ua papai te taata tuatapapa parau ra o Ludwig Koehler e: “Eita e naeahia ia tatou ia taa papu maitai i te ohipa e tupu ia paraparau anaˈe tatou, mea nafea te maramarama ia pura mai i roto i te feruriraa . . . e fa mai ai te parau. Ua riro te reo taata nei ei parau moe, ei ô no ǒ mai i te Atua ra, ei semeio.”

² Mai te taime a poietehia ˈi oia, te vai ra i roto ia Adamu te hoê pueraa parau e te aravihi no te faatupu i te mau parau apî. Oia hoi, ua noaa ia ˈna te aravihi no te paraparau e to ˈna mau taata-tupu. Ua ite oia i te faaite i to ˈna mau manaˈo ma te papu maitai e ua taa ia ˈna te mea e parauhia maira. Inaha, te ite ra tatou e ua paraparau te Atua ia Adamu e ua horoa ˈtu oia i te mau faaueraa, e ua nehenehe o Adamu e paraparau e o Eva.—Gen. 1:27-30; 2:16-20.

³ I te hoê râ tau a î roa ˈi te fenua i te ino, ua faahuru ê te Atua i te reo taata nei i te pare no Babela ra. (Gen. 11:4-9) No reira ïa e itehia ˈi i teie mahana e rave rahi mau reo, e te rahiraa, ua tufahia ïa na roto i te mau reo iti. Te paraparau-noa-hia nei vetahi o teie mau reo e te tahi mau opu taata iti, area vetahi ra, te paraparauhia ra e te mau mirioni taata. Mai te taata iho, ua atea ê roa te reo taata nei i to ˈna huru tia roa i te matamua ra. Mea pinepine oia i te faaohipahia no te haaparare i te hape e no te haafariu ê i te taata i te Atua.

4. Nafea tatou ia faaohipa i to tatou aravihi no te paraparau?

⁴ Tera râ, o tatou te mau tavini a Iehova, te hinaaro nei tatou e faaohipa maitai i te parau. Tei ia tatou nei te hopoia taa ê e paraparau no nia i te Atua mau e e tufa na to tatou mau taata-tupu i ta ˈna poroi faahiahia no nia i te ora mure ore i roto i te hoê ao apî e te parau-tia. Ua piahia teie Buka no te haapiiraa o te taviniraa teotaratia no te tauturu ia tatou ia rave i teie ohipa ma te aravihi.

5, 6. No te aha e mea faufaa roa ia faaite tatou i te parau mau?

⁵ Te mau parau mau. E titau te faaohipa-maitai-raa i te parau e ia faaite noa tatou i te parau mau, ia paraparau tatou  ia au maite i te Parau a te Atua. Eita te hape e nehenehe e horoa mai i te oraora-maitai-raa i te pae varua na te mau taata. No reira ïa teie aˈoraa i horoahia ˈi e te aposetolo Paulo: “E tapea maitai i te hiroa parau mau ta oe i ite ia ˈu nei ra.” No te aha? No te mea no ǒ mai teie “hiroa parau mau” i te Atua ra. (Tim. 2, 1:13) Ua faaite o Paulo e ‘e fariu ê’ vetahi ‘i to ratou tariˈa i te parau mau,’ ua faaite râ oia e, ta tatou hopoia, o te ‘pororaa ïa i te parau,’ oia hoi te Parau a te Atua. E tia ïa ia ati maite atu tatou i te parau mau a te Atua, e ia haamau i nia i te reira ta tatou pororaa taatoa e ta tatou haapiiraa taatoa.—Tim. 2, 4:1-5.

⁶ Ua ite tatou paatoa e e nehenehe te hoê parau e tano, faahitihia i te taime au, e faaite i te hoê taata i te eˈa e aratai i te ora mure ore aore ra e tauturu ia ˈna ia faaea i nia i teie eˈa. (Mas. 18:21; Iak. 5:19, 20) No reira, e mea faufaa ia ite te tavini tataitahi nafea ia faaohipa maitai i te mau parau, e te haamatarahia ra teie manaˈo i roto i te Haapiiraa o te taviniraa teotaratia.

7-9. I te rahiraa o te taime, eaha te mau parau aravihi roa ˈˈe?

⁷ Te maitiraa i te mau parau. Maoti te mau parau e nehenehe ai te taata e paraparau ra e horoa ˈtu i to ˈna mau manaˈo ia vetahi ê. E tia râ hoi ia maiti oia i te mau parau o te faaite ra i to ˈna mau manaˈo ma te tano e ia faaohipa oia i te hoê pueraa parau ta te feia e faaroo ra ia ˈna e taa ohie noa. I te omuaraa, e mea fifi paha ia maiti maitai i te mau parau. “Ua faito” te arii paari ra o Solomona iho, te orometua o Iseraela, “e ua maimi maite, no te faanaho e rave rahi mau maseli. Ua tutava te orometua ia itea mai te mau parau au maitai e te huru papairaa i te mau parau mau papu maitai.” (Koh. 12:9, 10, T.a.a.) E mea titauhia te mau tutavaraa i te pae feruriraa, te mau maimiraa e te ara-maite-raa ia itea mai te mau parau e tano. Te faaite ra te irava ahuru ma hoê o taua pene a te Bibilia ra i te aravihi rahi o te mau parau o tei maiti-maitai-hia. Ua faaauhia “te parau a te feia paari” i te mau “patia” o te faaitoito e o te turai i te mau taata ia tamau â i te haere na nia i te eˈa o te ora.

⁸ Hoê o te mau faaueraa tumu matamua te tia ia haamanaˈohia, o te faaohiparaa ïa i te mau parau ohie. Aita roa ˈtu te mau parau fifi roa e haafaufaa ra i ta tatou mau parau. Area ra, ua riro te ohieraa ei taviri no te maramarama e e tauturu ïa oia i te haamanaˈoraa o te feia e faaroo ra ia tatou. E ere anei te mau parau matamua a te Bibilia i te mea ohie roa, e te faahiahia roa atoa? Te na ôhia ra hoi e: “Hamani ihora te Atua i te raˈi e te fenua i te matamua ra.” Eita hoi e moehia ia tatou! Hoê â huru no te parau faaotiraa i noaa mai i te orometua paari, i muri aˈe i ta ˈna mau maimiraa atoa, oia hoi: “A mǎtaˈu i te Atua mau e a haapao i ta ˈna mau faaueraa. Tera hoi te hopoia taatoa a te taata nei.”—Koh. 12:13, T.a.a.

 ⁹ E ape tatou i te mau parau o te faahuru ê nei i te taˈi maramarama o te parau mau. Aita hoi tatou e hinaaro ra e ‘haapouri i te aˈoraa na roto i te mau oreroraa parau aore e ite.’ (Ioba 38:2, Darby) Inaha, o vai te nehenehe e faaroo ma te maramarama “ia ore hoi ia taa te oto o te pu ra”?—Kor. 1, 14:8.

10, 11. Mea nafea to Iesu horoaraa mai i te hiˈoraa i roto i ta ˈna huru paraparauraa?

¹⁰ E nehenehe tatou paatoa e pee ma te faufaahia i te hiˈoraa maitai roa o Iesu Mesia. Ua faatupu ta ˈna huru paraparauraa ohie e ta ˈna mau faahohoˈaraa no roto mai i te mau ohipa matauhia o te oraraa i te hoê mana puai i nia i te feia i faaroo ia ˈna. A haamanaˈo na i te oreroraa parau o ta ˈna i faahiti i nia i te hoê mouˈa i pihai iho ia Kaperenaumi, i papaihia i roto i te Evanelia a Mataio, mau pene pae tae atu i te hitu. E faaiteiteraa aravihi anei teie i te pae no te paraparau? Eita. E mau parau fifi anei ia taa? Aita hoê aˈe. Ua imi iho â râ o Iesu e ia ô hohonu te parau mau i roto i te feruriraa o te taata e ia haaputapû i to ratou mafatu. Ua î roa iho â o ˈna i te mau manaˈo o to ˈna Metua, o Iehova. No nia i te aravihi no te paraparau, o ˈna te hiˈoraa maitai roa ˈˈe te tia i te mau tavini atoa a Iehova ia pee.

¹¹ Eiaha roa tatou ia haafaufaa ore i te mana puai o te mau parau mau maramarama maitai, te ohie e te maiti-maitai-hia. E nehenehe te reira e faaoaoa roa i te taata e faaroo mai, e haaputapû ia ˈna e e turai ia ˈna ia ohipa. No nia ia Iesu, te faaite ra te Luka 4:22 e “ua faatia anaˈe ihora ratou atoa ia ˈna, maere ihora i te mau parau maitatai rahi ta ˈna i parau maira.” E rave rahi atoa mau taata o tei horoa i te tariˈa faaroo i ta ˈna mau aposetolo. Teie râ, “ite aˈera hoi [te mau raatira o te mau ati Iuda] e, e pue taata haapii-ore-hia raua e te itea ore.” (Ohi. 4:13) No te aha ïa e mai te reira ˈi? No te mea ïa ua pee ratou i te mau huru raveraa a to ratou Fatu, te Mesia. E ere anei teie i te hoê tumu faaitoitoraa rahi no te mau tavini a te Atua i teie nei tau, noa ˈtu e e feia apî ratou aore ra e feia paari?

12. Nafea te mau metua ia tauturu i ta ratou tamarii ia haapii i te paraparau maitai?

¹² E nehenehe te mau metua e tauturu rahi i ta ratou mau tamarii ia paraparau maitai. I te fare, e nehenehe ratou e haapii atu na roto i te horoaraa i te hiˈoraa e na roto i te haapiiraa i te mau peu maitatai i roto i te aparauraa i te mau mahana atoa. E nehenehe ratou e faaô i roto i to ratou feruriraa te mau faaueraa tumu a te Bibilia, o te tia ia aratai i ta tatou mau parau. (Deut. 6:6-9) E rave rahi mau utuafare o te faataa nei tau minuti i te mau poipoi atoa no te tauaparau no nia i te hoê irava bibilia i maitihia no te mahana tataitahi i roto i te vea iti E imi anaˈe na i te parau i papaihia ra i te mau mahana atoa e i te tahi atu mau taime, e taio amui ratou ma te reo puai i te tahi mau tuhaa o Te Pare Tiairaa aore ra o te A ara mai na!. Te fanaˈo nei ïa teie mau utuafare i te hoê faaineineraa maitai  roa, ma te apiti tamau noa i te mau parau apî i roto i ta ratou pueraa parau e ma te maimi i te taa e nafea teie mau parau ia faaohipahia ma te au no te faatupu i te hoê taairaa maitai aˈe e o vetahi ê. Hau atu, e faaô roa ratou i te mau manaˈo o Iehova i roto ia ratou, e e itehia te reira na roto i ta ratou huru paraparauraa.

13-16. No te huti i te faufaaraa rahi na roto i te Haapiiraa o te taviniraa teotaratia, eaha te tia ia tatou ia rave?

¹³ Ia haere noa tatou i mua na roto i te apitiraa ˈtu i te Haapiiraa o te taviniraa teotaratia. Maoti te mau haapiiraa i vauvauhia i roto i teie buka, e tauturuhia te feia atoa e hinaaro mau ra e haere i mua i roto i te taviniraa ia faaohipa i te mau “parau au maitai . . . e te mau parau mau papu.” Noa ˈtu eaha to outou matahiti aore ra eaha ta outou faito haapiiraa, mai te peu e e tiaturi outou i nia i te aratairaa e te varua o Iehova, e nehenehe outou e haere i mua i roto i te taviniraa kerisetiano. E titauhia râ e ia tutava outou. Te aˈo maira te Bibilia e: “E haamanaˈo papu i teie nei mau parau; o ta oe ïa e rave eiaha e faaea, ia ite te taata atoa i te tupuraa o to oe ite.”—Tim. 1, 4:15.

¹⁴ I rotopu i te mau tutavaraa e titauhia, e tia ia tatou tataitahi ia rave i te faaotiraa e ia tae mai tatou i te mau putuputuraa atoa i faanahohia e te mau amuiraa o te nunaa a Iehova, e i muri iho, ia ohipa ia au maite i teie faaotiraa. Oia iho â râ, e tauturu te mau putuputuraa i te mau hebedoma atoa a te Haapiiraa o te taviniraa teotaratia ia outou ia faaohipa i te aˈoraa i muri nei i horoahia e te aposetolo Paulo: “E faaitoito ia vai maite â oe i mua i te aro o te Atua ma te itehia mai, ei rave ohipa aita e haamaraa, e te tia hoi i te tufa i te parau mau ra.”—Tim. 2, 2:15.

¹⁵ E nehenehe te feia atoa, te tane e te vahine, te feia apî e te feia paari, tei bapetizohia aore ra aita, o te haere mai nei i te mau putuputuraa a te amuiraa, e tapao i to ratou iˈoa i teie haapiiraa e e fanaˈo i te mau haamaitairaa. E tia i te feia aita ratou i haere maoro i te haapiiraa ia haamanaˈo e ua faaite te Atua e eita te poroi o te Basileia e faaroohia e e rave rahi mau taata paari ia au i te auraa i te pae tino, te feia tiaraa teitei aore ra te mau taata faito haapiiraa teitei i mua i te aro o teie nei ao. (Kor. 1, 1:26-29) Ua opua atoa râ oia e e rave rahi o te feia i vahavahahia e teie nei ao, o ratou te faaroo i teie poroi e na ratou e faaite atu i te tahi atu mau taata e poihâ ra i te parau mau. Mai te peu e e tapao outou i to outou iˈoa i teie haapiiraa e e apee maite outou i ta ˈna mau aratairaa, e noaa mai ïa ia outou i te mau ite ia nehenehe outou e faaite atu i te mau taata aau haavare ore i te mau parau au maitai. E faaitoito te reira ia outou iho e i te feia e faaroo mai ia outou.

¹⁶ Hau atu râ, ia tuatapapa maite outou i teie haapiiraa, e maimi outou na roto i ta outou mau parau e ta outou mau ohipa  ia faariro i teie pure a Davida, arii no Iseraela, ei pure atoa na outou: “E tiahia mai te parau a tau vaha i reira, e te manaˈo o tau aau, i mua i te aro, e Iehova, e tau haapuraa e tau ora.” (Sal. 19:14) E tia i te kerisetiano tataitahi ia faatupu i te hinaaro uˈana e paraparau ma te tano i te mau taime atoa e ia faaohipa i te mau parau e auhia mai e te Poiete. E tauturu rahi mai te Haapiiraa o te taviniraa teotaratia ia outou ia naeahia i teie faito.

[Uiraa haapiiraa]