Haapiiraa 10

Nafea ia haamaitai i te aravihi no te haapii atu

1-3. Eaha te tia ia rave no te riro mai ei taata haapii maitai, e eaha te mau taime no te haapii atu e pûpûhia nei ia tatou?

 ¹ Ei mau kerisetiano mau, te farii nei tatou e o te Atua ra o Iehova e o Iesu Mesia te mau Orometua rahi. Hoê â to tatou manaˈo e to te papai salamo o tei parau ia Iehova na roto i te hoê pure e: “E haapii mai oe ia ˈu ia rave au i to oe ra hinaaro.” (Sal. 143:10) Hoê â atoa anei to tatou manaˈo e to te mau pǐpǐ a Iesu o te senekele matamua o tei pii ia ˈna e ‘Orometua.’ E auê ïa Orometua e! A faaoti ai oia i ta ˈna Aˈoraa i nia i te mouˈa, “ua maere anaˈe ihora te taata atoa i te huru o ta ˈna parau: i haapii hoi oia ia ratou ma te mana, e ere mai ta te mau papai parau ra.” (Mat. 7:28, 29) O raua na Orometua rahi roa ˈˈe, e te imi nei tatou ia pee ia raua.

² Ua riro te haapiiraa ei huru te tia ia atuatuhia. Mea faufaa ia faataa no te aha e nafea te tupuraa ohipa, te mau vahi e te mau tau. Tei te kerisetiano tataitahi te hopoia ia faarahi i to ˈna aravihi no te haapii atu, e hau atu ua horoa Iesu i teie faaueraa i ta ˈna mau pǐpǐ e: “E haere outou e faariro i te mau fenua atoa ei pǐpǐ, . . . ma te haapii atu ia ratou.” (Mat. 28:19, 20) E ohipa teie o te ani ra i te aravihi, te reira ïa te matara ra i roto i te aˈoraa ta te aposetolo Paulo i faatae atu ia Timoteo: “E faaitoito atu, ma te faaoromai rahi, e te haapii-maite-raa ˈtu.”—Tim. 2, 4:2.

 ³ E rave rahi mau taime tatou e nehenehe ai e haapii atu. E tia i te mau metua ia haapii atu i ta ratou mau tamarii. E tia i te feia poro i te parau apî maitai ia haapii atu i te feia e anaanatae ra i te poroi na roto i te mau haapiiraa bibilia i te fare. Mea pinepine e tia ia haapii atu i te feia poro apî. E haamaitairaa taa ê ta te mau taeae e rave rahi no te horoa i te mau oreroraa parau faaitoito i te putuputuraa no te taviniraa aore ra na roto i te mau oreroraa parau huiraatira. E tia i te feia atoa i tapaohia i te Haapiiraa o te taviniraa teotaratia ia hinaaro e faaite e te haere ra ratou i mua ei feia haapii. A haere noa ˈi ta outou ravea no te haapii atu i mua, e a apiti noa ˈi outou i roto i teie huru taviniraa, e ite ïa outou i te hoê mauruuru rahi e te hoê oaoa hohonu. Aita ˈtu ohipa faahiahia roa ˈˈe maoti râ i te haapiiraa ˈtu i te hoê taata no nia i te Parau a te Atua e te iteraa ia ˈna ia haere maitai i mua i te pae varua.

4, 5. I nia ia vai e i nia i te aha e tia ia tatou ia turui ia haapii atu tatou?

⁴ A tiaturi ia Iehova. No te riro ei taata haapii aravihi i te parau apî maitai, mea faufaa mau ia turui i nia ia Iehova, ia haapao, ia imi i ta ˈna aratairaa e ia ani i ta ˈna tauturu. (Mas. 3:5, 6) Ua parau atoa o Iesu e: “Ere i ta ˈu ta ˈu e haapii nei, na ˈna râ, na tei tono mai ia ˈu nei.” (Ioane 7:16) Ua faahiti tamau oia i te Parau a te Atua, ma te faahiti fatata i te afaraa o te mau buka o te mau Papai hebera aore ra ma te faahaamanaˈo i te reira i roto i ta ˈna mau tauaparauraa o tei papaihia. A pee na i te hiˈoraa o Iesu ia haapii anaˈe outou i te tahi, ma te niu i nia i te Parau mau a te Atua. A imi i ta outou mau pahonoraa i roto, no te mea hoê anaˈe buka tumu o te tauturu ia haapii i te mau taata nafea ia riro mai ei mau pǐpǐ na Iesu: Te Bibilia moˈa.—Tim. 2, 3:16.

⁵ Ia tiaturi mau outou ia Iehova, eita outou e haafaufaa ore ia outou. E horoa mai te Atua i te maramarama o ta ˈna mau opuaraa mai tei faataahia i roto i te Parau mau. Ia opere outou i to outou ite o taua mau parau mau ra, e turu Iehova ia outou. Eiaha e tapea ia outou ma te parau e: “E ere au i te hoê taata haapii.” E nehenehe outou e riro mai mai te peu e e pure outou ia Iehova e e tiaturi outou ia ˈna.—Kor. 2, 3:5.

6-8. E tia anei ia faaineine maitai no te haapii atu ma te maitai?

⁶ Te faaineineraa. Oia mau, aita ˈtu e mea e nehenehe e mono mai i te ite o te tumu parau. Na mua ˈˈe e haapii atu ai, e tia ia outou ia taa papu na mua. (Roma 2:21) A rahi noa ˈi i to outou ite, e riro mai outou ei taata haapii maitai aˈe. Teie nei râ, noa ˈtu e o te tahi noa parau mau tumu ta outou i ite, e nehenehe outou e riro ei taata haapii. A paraparau no nia i te mea ta outou i ite. E nehenehe atoa te mau tamarii apî e haapii atu i to ratou mau hoa haapiiraa te mau parau mau ta to ratou mau metua i haapii atu ia ratou. E tauturu te Haapiiraa  o te taviniraa teotaratia ia outou ia haamaitai i ta outou ravea ia haapii atu.

⁷ Mai te peu e e tia ia outou ia faatere i te hoê haapiiraa bibilia aore ra ia faahiti i te hoê oreroraa parau, a faaau na mua te mau haapapuraa i horoahia no te turu i te faataaraa parau. A tamata i te taa e no te aha râ e mea nafea. A tutava i te faahiti te mau manaˈo na roto i ta outou iho mau parau. A haapii no te taa maitai te mau haapapuraa bibilia o te mau tuhaa i faahitihia. A faaineine ia outou no te faaohipa ohie i te mau irava i horoahia.

⁸ Te faaineineraa o te hiˈopoaraa na mua atoa ïa i te mau uiraa te nehenehe e matara mai i roto i te feruriraa o te hoê taata no ta ˈna haapiiraa faaroo. Maoti te reira, e nehenehe outou e imi i te mau manaˈo no nia i te mea e faaanaanatae taa ê ra i te taata. Ia tapea noa outou i roto i te feruriraa ta ˈna i ite aˈena, e nehenehe outou e haamau i te hoê niu ia roaa faahou ia ˈna te tahi atu mau ite e ia tauturu ia ˈna ia haere i mua. E hinaaro paha te hoê taata tei haapii-taa-ê-hia i te tahi atu anairaa haapapuraa. Mai te peu e ua matau ia outou i te taata, e nehenehe outou e faaineine maitai atu â ia outou no te tauturu ia ˈna.

9. Nafea outou ia tauturu i te hoê taata ia pahono na roto i ta ˈna iho mau parau?

⁹ Te mau uiraa. Mai ta Iesu i faaite pinepine, mea faufaa te mau uiraa no te haapii atu ma te maitai. (Luka 10:36) Te faaohipa nei outou i teie huru raveraa ia faatere anaˈe outou i te hoê haapiiraa bibilia, ma te ani i te mau uiraa i papaihia i roto i ta tatou mau buka. Eita te taata haapii maitai e mauruuru mai te peu e e taio noa mai te taata haapii i te mau pahonoraa a te buka. E ui atu oia i te tahi atu mau uiraa o te turai ia ˈna ia paraparau na roto i ta ˈna iho mau parau. Te tahi taime mea navai noa ia parau e: “Ua tano ta oe pahonoraa, tera râ e nehenehe anei ta oe e faataa mai ma te taa ê, na roto i ta oe iho mau parau?”

10. A faataa nafea ia faaohipa i te mau uiraa arataihia.

¹⁰ E tauturu atoa te mau uiraa i arataihia ia haapii atu ma te maitai. E mau uiraa ïa o te tauturu ia outou ia aratai i te feruriraa o te taata, i nia i te mea ta ˈna i ite aˈena, i nia i te hoê faaotiraa aitâ paha oia i manaˈo. (Mat. 17:25, 26; 22:41-46) Mai te huru ra e te parau ra outou ia outou iho e: ‘Ua ite au e te vai ra ta teie taata te tahi ite; no reira, mai te peu e e ani atu vau i te mau uiraa na roto i te hoê tereraa nahonaho maitai, e tapae oia i te faaotiraa tano. Taa ê atu râ, mai te peu e eita vau e ui na mua i te mau uiraa arataihia, i te haamataraa iho â te uiraa matamua, e nehenehe o ˈna e tapae i te hoê faaotiraa hape.’ Na roto i te tahi atu parau, ua navai maitai ta te taata te mau haamaramaramaraa no te tapae i te hoê faaotiraa tano, e tia râ ia tauturuhia oia. Papu maitai, te mea ohie  aˈe o te horoaraa ˈtu ïa i te pahonoraa. Ia rave anaˈe râ outou i te mau uiraa i arataihia, eita noa oia e farii ohie noa i te pahonoraa, no te mea na ˈna iho i horoa mai, ua tauturu râ outou ia ˈna ia faaaravihi to ˈna mau maitai no te pae feruriraa. Ua aratai ta outou mau uiraa i to ˈna feruriraa e ua afai na roto i te mau taahiraa nahonaho maitai ia tapae i te faaotiraa tano. E riro teie ravea ei tautururaa faufaa roa no ˈna no a muri aˈe.

11. No te aha e mea tano ia ani i te manaˈo o te taata?

¹¹ Te tahi taime, e manaˈo paha outou e mea tano ia ani i te manaˈo o te taata. E ui noa ïa i te mau uiraa no te taa eaha ta ˈna e tiaturi ra. Ei hiˈoraa, e nehenehe outou e ani e eaha te ture a te Atua no nia i te poreneia. E faahiti mai paha o ˈna i te hoê irava bibilia no te faaite e mea ino te poreneia. Ua putapû mau ra anei oia? Eaha to ˈna iho manaˈo? E nehenehe ïa outou e ui atu i te hoê uiraa no te ite i to ˈna iho manaˈo no nia i te poreneia, ma te parau atu ei hiˈoraa e: “E uiraa faufaa anei te reira?” Ia au i ta ˈna pahonoraa, e nehenehe outou e ite eaha te mea ta ˈna i ore i taa, e e tauturu ia ˈna. E turai teie mau huru uiraa ia haaputapû i te mafatu o te taata.

12, 13. No te aha e mea faufaa ia faaohipa i te mau uiraa ia haere tatou i tera e tera fare aore ra ia faahiti tatou i te hoê oreroraa parau na mua mai?

¹² E faufaa atoa to te mau uiraa ia haere anaˈe outou i tera e tera fare. Ei hiˈoraa, no te tauturu i te hoê taata ia taa i te mau parau mau bibilia, e tia ia outou ia ite i to ˈna manaˈo. Ua ite atoa outou e, mai te peu e ia ui outou i te tahi mau uiraa, e horoa outou ia ˈna i te ravea ia faaite i to ˈna iho manaˈo, e ineine ïa oia ia faaroo i ta outou poroi.

¹³ Ia faahiti atoa outou i te hoê oreroraa parau na mua mai, e ui outou i te tahi taime i te mau uiraa ma te titau i te feia faaroo ia pahono mai. E nehenehe atoa râ outou e faaohipa i te mau uiraa mai te hoê ravea aravihi no te faahiti i te parau, te tahi mau uiraa no te faaara noa i te feruriraa o te feia e faaroo ra, ma te ore e tiai e ia pahonohia mai. (Luka 12:49-51) E pahono outou iho i teie mau uiraa. Ia ui outou i te hoê anairaa uiraa, e nehenehe outou e opua e pahono i te uiraa hopea. Tei te huru ïa o te feia faaroo e te mau manaˈo ta outou e hinaaro ra e haapii atu te huru o te mau uiraa e horoahia.

14, 15. Eaha te faufaaraa o te mau faaauraa parau e te faahiti-faahou-raa i te parau?

¹⁴ Te mau faaauraa parau. Ua hauti na te mau hohoˈa i te hoê tuhaa rahi i roto i te haapiiraa a Iesu. I teie mahana atoa, e nehenehe te feia haapii kerisetiano e huti i roto i te mau ohipa e te mau tupuraa o te oraraa no te ite i te mau faaauraa parau o te tauturu i te feia e faaroo maira ia tamau te tahi mau haapiiraa faufaa i roto i to ratou feruriraa. (Mat. 13:34, 35) A maiti i te mau faaauraa parau ohie, no te mea ia fifi roa anaˈe, eita ïa e ohie ia apee atu, e nehenehe atoa e faaore i te ara-maite-raa i nia i ta outou mau haapapuraa matamua. Te vai ra i roto i te rata a Iakobo e rave rahi mau hohoˈa: te are miti, te hoe o te hoê pahi, te tavaha o te hoê puaahorofenua, te hoê  hiˈo, e te vai atu â. Ua hutihia te taatoaraa o teie mau hiˈoraa i roto i te mau mea matauhia o te oraraa. E maiti te hoê taata haapii feruriraa itoito i ta ˈna mau faaauraa ia au i te huru tupuraa, i te matahiti, i te haapaoraa, e i te iho tumu o te taata. Oia mau, e nehenehe e faaohipa i te reira i roto i te mau oreroraa parau mai i roto i te haapiiraa tataitahi.

¹⁵ Te faahiti-faahou-raa i te parau. Na mua mai anei aore ra i mua i te hoê anaˈe taata i to ˈna fare, mea faufaa te faahiti-faahou-raa i te parau no te haapii atu ma te maitai. A imi i te tapao i roto i te feruriraa o te taata te mau parau aore ra te mau pereota faufaa roa ˈˈe, e te mau irava bibilia iho â râ. Mai te peu e e tia ia outou ia faahiti i te hoê oreroraa parau iti e te hoê taata apiti, a haafaufaa te tahi mau tuhaa ma te ui atu i te tahi mau uiraa no te faahaamanaˈo faahou. I reira, e papu ïa ia outou e ua taa maitai i te taata. E pee ïa outou ia Iesu, o tei ui i teie nei uiraa: “Ua ite outou i teie atoa nei mau parau?”—Mat. 13:51.

16. Mai te peu e e taata haapii aravihi te hoê taata orero, eaha te tia i te feia faaroo ia haamanaˈo i muri aˈe i ta ˈna oreroraa parau?

¹⁶ Te mau oreroraa parau o te haapii. E haamanaˈo outou ma te au i te mau oreroraa parau o tei haapii rahi mai ia outou. A tamata i te hiˈopoa e no te aha ua riro vetahi feia orero ei feia haapii maitai e no te aha e haamanaˈo ohie noa tatou i ta ratou mau oreroraa parau. Aita ratou e paraparau vitiviti noa. E tuu ratou i te mau uiraa, ma te ani i te feia i putuputu mai ia pahono, aore ra mai te hoê ravea aravihi no te faahiti i te parau, no te faaara i te mau manaˈo. E titau ratou ia outou ia apee mai i roto i ta outou Bibilia te taioraa o te tahi mau irava faufaa e e haaferuri ratou i nia iho, ma te faataa ˈtu e ma te tapao i te mau manaˈo matamua. E faaohipa te tahi feia orero i te mau hohoˈa itehia. Noa ˈtu râ eaha te mau ravea e faaohipahia, ua taa ïa outou e e tamau-ohie-noa-hia te tahi mau tuhaa i tatara-maitai-hia i te mau manaˈo e rave rahi tei tuatapapahia na nia noa. Mai te peu e e taata haapii maitai te taata orero, e haamanaˈo ohie noa te feia faaroo i ta ˈna upoo parau, te mau tuhaa matamua e peneiaˈe hoê aore ra e piti irava o te Papai ta ˈna i faahiti.

17, 18. Nafea e no te aha e tia ia tatou ia aratai i te ara-maite-raa o te mau taata i nia i te mau Orometua rahi?

¹⁷ Ia arataihia te ara-maite-raa i nia i te mau Orometua rahi. E tia i te taata haapii kerisetiano ia farii i te mau taime atoa e mea faufaa mau ia huti i te ara-maite-raa o te mau taata i nia i te Atua ra o Iehova, te Tumu o te ora, e i nia ia Iesu Mesia, na roto ia ˈna te Atua e horoa ˈi i te ora e te mau haamaitairaa. (Ioane 17:3) A tamata i te faatupu i roto i te feruriraa o to outou mau taata-tupu i te hoê mauruuru hohonu no teie mau Orometua rahi.

¹⁸ A rahi noa ˈi to outou aravihi ia haapii atu, e farii outou i te faufaaraa o te here. Ia haapii mau te hoê taata ia here i te Atua ra o Iehova, e tavini oia ia ˈna ma te haapao maitai.  No reira, i roto i te roaraa o te haapiiraa, a faahoona i te mau taime tano no te huti i te ara-maite-raa o te taata i nia i te mau mea atoa ta te Atua i rave e e rave â no te mau taata hara. A tapao i te paari, te parau-tia, te here e te puai o te Atua, mau ateributi e tuati ma te faahiahia no te maitai o te mau taata faaroo. Mai te peu e e mafatu maitai to te taata, na roto i te roaraa o te taime e roaa ia ˈna te hinaaro ia riro ei taata haavare ore i mua ia Iehova e te apitiraa ˈtu no te faahanahana i to ˈna iˈoa.

[Uiraa haapiiraa]