Haapiiraa 13

Nafea ia haamaitai te reo e ia faaohipa te taoˈa haapuai reo

1-3. Eaha vetahi mau paruparu o te reo, e na te aha e tauturu ia tatou ia hiˈopoa i to tatou iho fifi?

 ¹ Ma te parau atu ia Mose, ua horoa te Poiete te Atua ra o Iehova i teie uiraa: “O vai tei hamani i te vaha no te taata nei?” (Exo. 4:10, 11) E nehenehe tatou e parau faahou: Na vai i horoa no te taata te mau melo faahiahia o te turai ia ˈna ia paraparau? Noa ˈtu e e “reo maromaroâ e te maumau” to Mose, ua haapii o ˈna i te pae hopea e nehenehe te Atua e turai ia ˈna ia haamaitai i to ˈna reo, o ta ˈna ïa i rave. Ua nehenehe te peropheta e paraparau ma te mana i mua i te nunaa Iseraela.

² I teie mahana, e rave rahi mau tavini a te Atua o te ite ra  i to ratou paruparu i roto i te faaohiparaa i te parau. E reo paruparu to vetahi, area to vetahi ra mea teitei ïa, teiaha, aore ra piri roa. Eita e faaroohia ma te anaanatae te hoê taata e paraparau ra ma te reo mihi aore ra teiaha aore ra na roto i te ihu. Aita te hoê taata orero e faaitoito te tahi pae ia paraparau o ˈna ma te reo haumani, aita e ora. Mai te peu e mai te reira te huru o to outou reo, a faaitoito. Aita e tumu e farii noa outou i te reira tupuraa, mai te huru e eita e nehenehe e rapaau aore ra e haamaitai.

³ Oia mau, te taata e hinaaro ra e haere i mua e tia ia ˈna ia farii i te paruparu taa ê te tia ia ˈna ia haapao. E nehenehe te Haapiiraa o te taviniraa teotaratia e te mau aˈoraa faaitoito e horoahia ra e te tiaau e tauturu ia outou ia hiˈopoa i te mau paruparu atoa o to outou reo. Mea maitai atoa ia faaroo i te hoê ripene haruharuhia o to outou reo. Mai te peu e aitâ outou i na reira, e maere paha outou. Oia mau, ia paraparau outou e ite outou i te tahi mau haruru o te mau ivi o to outou upoo, o te horoa i te mau taˈiraa puai, area te matini haruharu parau e faaite ïa oia eaha mau na to outou reo mai tei faaroohia e te feia e faaroo ra ia outou. No te haamau i te niu o te haamaitai i te reo, mea maitai ia hiˈopoa i te hoê taime te tereraa o te melo ta outou e faaohipa ra ma te ore e feruri.

4-6. Nafea te reo ia matara mai?

⁴ Nafea te reo ia matara mai. Te niu o te reo atoa o te haapueraa mataˈi ta outou e faarue i rapaeau i to outou mahaha o te ohipa ra mai te hoê hîo. Ma te haere na roto i te hoê eˈa tuatiraa, e tomo te mataˈi i roto i te aratona te melo e vai ra i ropu i to outou arapoa. I roto i te aratona te vai ra e piti uaua iti menemene piihia taura o te reo. O te reira te mau pu matamua o te mau taˈiraa o to outou reo. E au taua mau taura ra aore ra “uaua o te reo,” tei pii-atoa-hia te mau haamaramarama te nehenehe e hauti e vai ra i nia i te hiti o te aratona. No te haamatara aore ra faaapǐapǐ no te faaô aore ra no te tapea i te mataˈi, ta ratou hopoia matamua, ia ore te tahi taoˈa hinaaro-ore-hia e ô i roto i te mahaha. Na te mataˈi no roto mai i te mahaha e faahautiuti taua mau taura ra. Ia haere puai anaˈe te mataˈi na roto ia ˈna e hautiuti e e matara mai te taˈi. E faahohoˈa anaˈe i te reira e te hoê hiˈoraa: A puhipuhi na i te hoê popo mataˈi, e i muri iho a vaiiho i te mataˈi ia mahere ma te umiumi te omuaraa o te popo mataˈi; e hautiuti te popo e e faaroohia te hoê taˈi. Oia atoa, ia paraparau outou, e piri roa te mau uaua menemene aore ra te mau taura o to outou aratona. E piri roa ïa te apoo mai te V ra te huru. Rahi atu te mau taura i te tô, rahi atoa ratou i te hautiuti oioi e rahi noa ˈtu te mau taˈi i te teitei. Taa ê atu, rahi noa ˈtu te mau taura i te paruparu, rahi atoa ïa te taˈi i te haruru.

⁵ I muri aˈe oia e faarue ai te aratona, e tae te rahiraa mataˈi  i roto i te tuhaa o to outou arapoa e tae roa i te vahi toparaa maa. I muri iho e ô mai i roto i to outou vaha e to outou apoo ihu. I reira, e taui te tahi mau taˈi e e puai te taˈi matamua, ma te horoa i to ˈna haruru. E rave amui te vaha, te arero, te mau niho, te tie niho, te mau taa e te mau utu no te tatuhaa te mau taˈi teitei e hautiuti ra e ia taui i te reira ei vauera e ei piri vauera ia nehenehe te mau taˈi ia matara, mai te hoê parau taa-maitai-hia.

⁶ Mea papu e e melo faahiahia roa te reo taata e eita e nehenehe e faaauhia to ˈna mau ravea taa ê e te hoê taoˈa i hamanihia e te taata. E nehenehe oia e faaite i te tahi mau manaˈo hohonu e te mau manaˈo horuhoru mai te here aupuru e te hamani maitai tae atu i te riri mâha ore e te riri uˈana. Noa ˈtu to tatou huru taata tia ore, e nehenehe te reo taata, ia faaineine-maitai-hia e ia faaohipa-maitai-atoa-hia, e tapae e tae atu i te toru faito taˈiraa o te reo e ia faataˈi eiaha noa te mau nota pehepehe haviti mau oia atoa râ te mau parau o te haaputapû i te mafatu. Mai ta tatou e ite, e tia ia haapao e piti tuhaa faufaa no te haamaitai i te reo.

7-10. Nafea tatou ia haapao i ta tatou haapueraa mataˈi, e no te aha?

⁷ A hiˈopoa maite i ta outou vairaa mataˈi. Ia noaa te mau faahopearaa maitatai, e tia ia roaa tamau i te taata orero i te hoê haapueraa mataˈi tano maitai e ia taa maitai e nafea ia faaohipa i to ˈna aho. Aita te rahiraa o te mau taata e ite ra e nafea ia huti i te aho e ia faarue maitai i te aho ia paraparau ratou. E faaohipa noa ratou i te vahi i nia noa ˈˈe o to ratou mahaha, e ia paraparau anaˈe ratou ma te vitiviti e tia ia ratou ia faafaaea rii no te huti faahou i te aho. Taa ê atu i te manaˈo o te rahiraa, aita e itehia te tuhaa rahi o te mahaha i nia i te ouma; mai te peu e mea rahi aˈe taua vahi o te tino ra, no te mau ivi noa ïa o to tatou tapono. Ua rahi aˈe to tatou mau mahaha i nia noa ˈˈe i te uaua e faataa ê ra i te ivi ouma e te opu. Te ohipa ra teie uaua rahi hohoˈa hatua mai te hoê pâmu, ma te tauturu i to outou mahaha ia huti i te aho haumǎrû e ia faarue i te mataˈi ino. Ma te noho i raro aˈe i te ivi aoao, te paruru nei te uaua e faataa ra i te ivi ouma e te opu, i te tuhaa poopoo o te opu. Te hauti nei teie uaua orapa rii i te hoê tuhaa faufaa roa i roto i te hutiraa aho. Ia maraa anaˈe te uaua e faataa ê ra i te ivi ouma e te opu i nia, e faarue oia i te mataˈi i rapaeau i to outou mahaha. Ia haere anaˈe i raro, e tomo ïa te mataˈi.

⁸ No te haamaitai i to outou reo, te ohipa matamua te tia ia ravehia o te haapao-maitai-raa ïa ta outou haapueraa mataˈi. Ia huti outou i te aho no te paraparau, a tutava ia ore outou e faaoru i te vahi i nia e te nainai aˈe hoi o to outou ouma. A faaoru râ te vahi i raro o to outou mahaha. E i muri iho a haapao  maitai i ta outou faarueraa aho, ma te vaiiho i te mataˈi ia matara rii mǎrû noa na roto i te tahi taumi iti o te uaua e faataa ra i te ivi ouma e te opu e ravehia i nia i te mau uaua o te opu. E tapea te reira i te mataˈi ia haere oioi noa i rapae. E pau oioi te aho o te taata orero o te ore e haapao ra i to ˈna hutiraa aho, e paraparau oia ma te vitiviti roa, e eita te reo e matara.

⁹ Te tamata nei e rave rahi feia orero i te haapao i ta ratou haapueraa mataˈi ma te tapiri i te arapoa, e piri roa ïa to ratou reo e e rohirohi atoa ratou. No te ape i te reira, a tutava ia ore te mau uaua o to outou arapoa ia etaeta roa.

¹⁰ Mai te hoê taata e faaineine ra no te hoê hororaa, e tia i te hoê taata orero ia haapao maitai i ta ˈna huru hutiraa aho na roto i te tahi mau faaineineraa. E nehenehe oia e faaafaro maitai ia ˈna, ma te huti faahope roa te aho e te faarue-mǎrû-raa ma te paraparau ma te maumau ore e ma te faahiti i te rahiraa reta o te piapa ta ˈna e nehenehe aore ra ma te taio i te numera te rahiraa ta ˈna e nehenehe ma te ore e huti i te aho. E nehenehe atoa e na reira ma te taio puai.

11-15. No te aha te etaeta o te uaua e faatupu ai i te hoê reo teitei, na roto mai i te ihu aore ra te hoê reo tei uumihia?

¹¹ A tuu i te mau uaua tei faaetaetahia. Eiaha e faaetaeta ia outou! Mea faufaa atoa teie aˈoraa iti no te aro i te rahiraa o te mau paruparu i te pae o te reo. Eita tatou e nehenehe e rave hau atu no te tauturu i te hoê taata ia haamaitai i to ˈna reo mai te peu e eita o ˈna e haapii ia ore e faaetaeta ia ˈna. Hau atu, e faahiahia atoa outou ia ite i te mau haereraa i mua ta outou e nehenehe e rave ma te haapii ia tamǎrû ia outou iho ia paraparau anaˈe outou. Eiaha e faaetaeta i to outou feruriraa mai to outou tino atoa, no te mea e faatupu te etaeta o te feruriraa i te etaeta o te uaua. Eiaha e faaetaeta i to outou feruriraa e faatupu râ i te hoê hiˈoraa tano no nia i te feia e faaroo maira, o tei riro i te rahiraa o te taime, ei mau melo o te nunaa o Iehova. E riro taue anei to outou mau hoa ei mau enemi no outou no te mea noa tei rotopu ratou i te feia tei parahi i mua ia outou? Eita iho â ïa. Aita ˈtu nunaa o te ao atoa nei o te nehenehe e fanaˈo i te feia faaroo manaˈo auhoa e tei î i te aroha mai te feia ta tatou e paraparau tamau ra.

¹² I te omuaraa, e tia paha ia outou ia tutava ma te feruri maitai no te tamǎrû ia outou. E ite paha outou na mua ˈˈe outou e paraparau ai, ua paupau to outou aho, no to outou riaria? E nehenehe outou e faaafaro ma te faaohipa i te hoê hutiraa aho mǎrû e faataimehia, ma te tutava i te tuu i te mau uaua o to outou arapoa.

¹³ Mai ta tatou i haapii iho nei, e horoa te etaeta rahi o te mau taura o te reo i te hoê taˈi teitei; no reira, rahi noa ˈtu outou i te haapaari ia ˈna, rahi atoa te taˈi i te teitei mai. E nehenehe e matara mai i te hoê reo teitei, mai te huru e ua umiumihia  e o te faairiâ te feia i putuputu mai. Eaha te tia ia rave no te aro i teie paruparu? A haamanaˈo e e hautiuti te mau taura o to outou reo ia tomo anaˈe te mataˈi i roto. E taui te taˈi ia au i te huru o te uaua ua etaeta aore ra ua tamǎrûhia, mai te mau taˈi o te hoê fira na te mau taura e taui i te taˈi ia au i to ˈna huru etaeta aore ra i te huru paruparu rii. Ia haaparuparu outou i te mau taura o to outou reo, e haruru ïa to outou reo. E tia ïa ia outou ia haaparuparu te mau uaua o to outou arapoa. I raro aˈe i te neˈiraa toto, e nehenehe te mau uaua no te momi e patoi i te ohipa o te mau taoˈa e hiˈopoa ra te mau taura o te reo, o te horoa i te hoê reo maramarama ore. E haere outou i mua mai te peu e e feruri outou ia tamǎrû ia outou.

¹⁴ I te tahi taime, ma te haapaari te mau uaua o te arapoa e o te vaha, e tapiri te hoê taata i te apoo ihu, i reira râ eita ïa te mataˈi e nehenehe faahou e ô atu ma te ohie. E matara mai ïa te hoê reo paraparau na roto i te ihu. No te ape i te reira, mea maitai roa ia tamǎrû ia outou. Teie nei râ, i roto i te tahi mau tupuraa, e nehenehe teie fifi e tupu mai no te mea ua piri te mau apoo ihu.

¹⁵ E tia atoa ia tamǎrû i te taa. Mai te peu e ua etaeta, eita ïa te vaha e matara maitai, e e fifi atura ïa te taˈi i te haere na roto i te mau niho. E matara mai ïa te hoê reo papu ore eita e faaroo-maramarama-hia. E ere ïa te auraa te oreraa e faaetaeta te taa, te faahupehuperaa ïa i roto i ta tatou mau peu no te tauaparauraa. Mea titauhia te aifaito i roto i te ravea no te faatupu i te mau taˈi ia nehenehe e hamǎmǎ maitai te vaha.

16, 17. Na te aha e tauturu ia tatou ia haamaitai i te taˈi o to tatou reo, e no te aha e mea faufaa roa te reira?

¹⁶ I te rahiraa o te taime, na te tamǎrûraa i te mau uaua e horoa mai i te maniania. Ia matara mai te hoê taˈi maramarama na roto i te hoê arapoa etaeta ore, e tia i te tahi mau taˈi faatupuhia e te maniania ia turu i te taˈi matamua, ia matara maitai te reo. Na te tino taatoa e faatupu i te reira mai te afata maniania; eita te faaetaetaraa e faatupu i taua faahopearaa ra. Eita noa te mau taˈi e faatupuhia e te aratona e hoˈi i roto i te apoo ihu, i nia atoa râ i te mau ivi o te ouma, i nia i te mau niho, te niaraa o te vaha e i nia i te mau apoo ivi o te hohoˈa mata. Na taua mau tuhaa atoa o te tino ra e faaitoito i te maitairaa o te maniania. Mai te peu e e tuuhia te hoê taoˈa teiaha i nia i te afata o te fira, e uumihia te taˈi; e tia e ia hautiuti oia ma te ohie noa. Hoê â huru no te mau ivi o to tatou tino e tapea-maitai-hia ra e te mau uaua. Maoti te hoê taˈiraa maitai, e nehenehe outou e paraparau ma te ohie e te rahiraa o te feia e faaroo ra, ma te ore e faahepo i to outou reo. Mai te peu e aita taua taˈi ra, mea fifi roa ïa no to outou reo ia matara mai, e mea fifi no outou ia tauiui te taˈi aore ra ia faahiti i te mau manaˈo hohonu taa ê.

 ¹⁷ E nehenehe e haamaitai i te taˈi ma te tamata i te himene ma te tutava atoa i te tamǎrû i te tino atoa. Eiaha ïa ia tapiri roa i te utu, ia matara rii noa mai. I reira, eita ïa te mau taˈi teitei e tapeahia i roto e te mau uaua etaeta eita atoa e faaruehia ma te faahepo na roto i te ihu. Te hoê ohipa maitai o te parau-noa-raa te tahi mau parau e ia faataˈi maoro te maniania o te mau reta m, n, e r. No te haamaitai te huru o to outou reo, e nehenehe atoa outou e faahiti te mau vauera ma te faaiti noa te taˈi e ma te faataere roa, te arapoa matara maitai, e te taa etaeta ore.

18-22. Eaha te mau aˈoraa ta tatou e tapea mai i roto i te feruriraa no te faaohipa maitai i te taoˈa haapuai reo?

¹⁸ A faaohipa maitai i te taoˈa haapuai reo. Ia aano anaˈe te hoê vahi putuputuraa, mea titauhia e ia haapuaihia to tatou reo na roto i te hoê matini haapuai reo, o te faaohie te ohipa o te taata orero e o te faatia i te feia i putuputu mai ia faaroo maitai. Eita ïa te taata orero e tutava ia faaroo-maitai-hia oia, eita te feia i putuputu mai e toro i te tariˈa no te taa eaha ta ˈna e parau ra. I roto e rave rahi mau amuiraa, te faaohipahia ra te mau taoˈa haapuai reo eiaha noa i nia i te tahua, e oia atoa i rotopu i te feia i putuputu mai ia faaroohia ta ratou mau pahonoraa e te taatoaraa. Mai te peu e eita e faaohipahia te mau taoˈa haapuai reo i roto i te Piha no te Basileia i ǒ outou, e faaohipa-pinepine-hia i roto i te mau tairururaa. Mea tano ïa e ia ite tatou e nafea ia faaohipa.

¹⁹ I teihea atearaa i to outou vaha e tuuhia ˈi te taoˈa haapuai reo? I te rahiraa o te taime, i rotopu e ahuru e ahuru ma pae tenetimetera. Te mau fifi e ite-pinepine-hia i roto i te faaohiparaa i te taoˈa haapuai reo, ua atea roa te taata orero. A haapao ïa i te atea i rotopu i te vaha e te taoˈa haapuai reo. A haapao atoa e ia paraparau outou i roto, ma te tâuˈa atoa i to ˈna vahi, aita anaˈe e fifi te taata haapao taoˈa haapuai reo ia haapuai ia nehenehe te mau taˈi e tapae maramarama i rotopu i te feia e faaroo nei. Oia mau, eiaha e hota, e maitihe aore ra e haamatara to outou reo i pihai iho i te taoˈa haapuai reo.

²⁰ Ia faaohipa outou i te hoê taoˈa haapuai reo, a faaroo i to outou reo mai tei faaroohia i roto i te mau matini horoa parau. E nehenehe ïa outou e faatano te puairaa o to outou reo e to outou atearaa mai te peu e e titauhia. E nehenehe outou e faatitiaifaro ma te tapiri atu i pihai iho i te taoˈa haapuai reo aore ra ma te faaatea i te tahi noa tenetimetera. E tia i te tahi feia orero ia ore e parau puai roa, no te mea e taui te reira i te huru o to ratou reo, e e au ore e e taahoa te feia i putuputu mai. Mai te peu e no te faatupu te tahi mau faatauiraa parau, e hinaaro outou e haamǎrû i te reo i te hoê taime o ta outou oreroraa parau, a tapea mai i roto i te feruriraa e maoti teie taoˈa apî faahiahia o te haapurororaa reo, e nehenehe atoa te feia faaroo e  haru i te hoê taˈi iti.

²¹ E tia ia outou ia rave te tahi atu â mau arairaa no nia i te huru raveraa i te taoˈa haapuai reo. Ua tapao anei outou e te reta “p” e faatupu ra i te hoê taˈi o te mau taue? E tupu te reira mai te peu e ua piri roa te taata orero i te taoˈa haapuai reo. E nehenehe atoa te mau “reta” teitei e faatupu i te tahi mau fifi. E tia ïa ia parau-mǎrû-hia, no te mea e puai roa te taˈi i roto i te taoˈa haapuroro reo e e au atura ïa i te mau hîoraa ia matara mai mai roto atu i te mau matini horoa parau. Eita outou e fifi no te ape teie raveraa mai te peu e e pee outou i te mau aˈoraa i horoahia i nia nei.

²² E ô faahiahia mau te tereraa o to tatou nei reo no ǒ mai i to tatou Poiete. Na ˈna atoa i horoa mai i te uira e te feruriraa no te manaˈo e hamani te taoˈa haapuai reo. I te mau taime atoa e faaohipa ˈi tatou i to tatou reo, ia faaohipa tatou i te hoê taoˈa haapuroro reo aore ra eita, e haapao e ia faahanahana tatou i te Poiete o te reo.

[Uiraa haapiiraa]