Haapiiraa 15

Nafea ia haaputapû te mafatu o te feia e faaroo ra ia outou

1-4. No te aha, na roto i to tatou tiaraa tavini e mea faufaa roa no tatou te mafatu?

 ¹ Aita te aposetolo Paulo i faaea i te pure ia Iehova no te feia ta ˈna i poro i te parau apî maitai, ia ‘maramaramahia te mata o to ratou mafatu.’ (Eph. 1:16-18) A tapao na e aita o ˈna e parau ra no te feruriraa no te mafatu râ, ia maramarama mai. Eaha ta ˈna e hinaaro ra e parau? O tei tia hoi ia tatou ia taa mai te peu e te hinaaro nei tatou e riro ei feia faaroo aore ra ei feia haapii aravihi.

² Na roto i te arai o Paulo, ua faaite te varua o Iehova te mea ta ˈna i faaite aˈena na roto i te arai o te tahi mau tavini haapao maitai no nia i Tei faito i te mau mafatu. (Mas. 21:2) Ei  hiˈoraa, ma te parau atu i to ˈna arii mono, ua horoa te arii ra o Davida, tei ruhiruhia roa, i teie aˈoraa maitai: “E o oe hoi, e tau tamaiti, e Solomona, ia ite hua oe i te Atua o to metua nei, a haamori ai ia ˈna ma te aau mau, e ma te tia roa: e imi hoi Iehova i te mau aau atoa ra, e te ite ra oia i te mau manaˈo atoa. Ia imi oe ia ˈna ra, e itea ˈtu oia e oe; a faarue râ oe ia ˈna; e faarue roa mai oia ia oe.” (Par. 1, 28:9) Na te hoê haamoriraa rotahi no roto roa mai i te mafatu, e faaoaoa i te Poiete.

³ Ua pûpû o Iesu Mesia, te Davida Rahi, i te hoê â huru aˈoraa paari a horoa ˈi oia i teie faaueraa: “E e hinaaro oe i to Atua ia Iehova ma to aau atoa, e ma to varua atoa, e ma to manaˈo atoa, e ma to puai atoa.” (Mar. 12:28-30) Ia farii mai te Atua ia tatou, o te mea ïa e vai ra i roto i te mafatu o ta ˈna mau poieteraa ta ˈna e tâuˈa ra. Ia taa ia tatou i te reira, e taa maitai ia tatou i te faufaaraa o te mau parau i faahitihia i roto i te Maseli 4:23, i reira tatou e taio e: “E faaitoito i te tiai i to aau na; o te tumu hoi te reira o te ora.”

⁴ E tia i te feia atoa e poro nei e e haapii nei i te parau apî maitai o te Basileia o te Atua ia hepohepo no te haaputapû i te mafatu o te feia atoa e faaroo maira. Te reira te hepohepo o te mau metua kerisetiano ia haapii ratou i ta ratou mau tamarii aore ra o te tavini tataitahi e faatere nei i te hoê haapiiraa bibilia e te feia e hinaaro e ite i te parau apî maitai. E tano atoa teie tumu parau e ia haapao-maitai-hia e te mau taeae e haapii ra na mua mai. I roto i taua mau tupuraa atoa ra, e tutava tatou paatoa i te faaite i te poroi faufaa o te parau mau i roto i te feruriraa o to tatou taata-tupu. Teie nei râ, e tia ia tatou ia rave hau atu â. Te hinaaro nei tatou ia tapae ta tatou mau parau i roto i to ratou mafatu. Te hinaaro nei tatou e turai ia ratou ia ‘horoa i to ratou mafatu i te Metua i te raˈi ra.’—Mas. 23:26.

5, 6. No te aha eita noa tatou e faaô i te ite i roto i te feruriraa o te mau taata?

⁵ Mea taa ê te mafatu i te feruriraa. E nehenehe te hoê taata haapii aravihi i te parau apî maitai e faaô i te ite i roto i te feruriraa o te taata e faaroo ra. Fatata roa taua taata haapii ra e nehenehe e faahiti e e faataa te haapiiraa i horoahia. Ua taa ia ˈna te auraa e ua mau i roto i to ˈna feruriraa. Te matara nei râ teie na uiraa e piti: E nafea o ˈna i teie ite? Te hinaaro noa ra anei o ˈna e ia roaa to ˈna ite, aore ra te turai nei te reira ia ˈna ia ohipa?

⁶ I reira te mafatu e ô mai ai, no te mea i roto i te Bibilia ua taaihia oia i te mau opuaraa. E nehenehe te hoê taata haamori mau i te Atua e parau e te taata papai bibilia i faauruahia e: “Ua haaputu vau i ta oe parau i roto i tau aau, ia ore au ia hara ia oe ra.” (Sal. 119:11) Noa ˈtu e e nehenehe te hoê taata e faaô i roto i to ˈna feruriraa i te hoê ite papu i te mau opuaraa a te Atua e e taa e rave rahi faaueraa tumu faahiahia a te Bibilia,  aita paha o ˈna i ineine i roto i to ˈna mafatu ia faaohipa i roto i to ˈna oraraa taua mau faaueraa tumu ra e taua ite ra. E rave rahi taata o tei faaroo i te mau parau mau haumǎrû o te Parau a te Atua, ia tae ra i te taime no te faaohipa i roto i to ratou oraraa aore ra no te faaite atu i to ratou taata-tupu, aita to ratou mafatu i turai faahou ia ratou ia apiti i roto i taua ohipa ra no te faaora.

7, 8. A faataa i te taa-ê-raa i rotopu i te feruriraa e te mafatu.

⁷ E tia mau â e ia ô te mau haamaramaramaraa i roaa e ia mau i roto i te feruriraa. Te reira te pu o te maramarama e te pu no te amui i te mau ite. E haaputu o ˈna i te mau haamaramaramaraa e i muri iho, na roto i te feruriraa maitai e te nahonaho e huti oia i te mau faaotiraa. Tera râ, te faaite nei te mau Papai e maoti te tahi mau ravea faahiahia, ua taai-maite-hia te feruriraa i te mafatu. E tuhaa faufaa roa ta ˈna e hauti ra, no te mea e taairaa piri roa to ˈna i te huru i te pae o te here e te mau manaˈo hohonu o te taata. E ite-maitai-hia te mana ta te mafatu e faatupu ra i nia i te oraraa o te hoê taata e te feia e mataitai ra. E ite ratou i te pae hopea i to ˈna huru mau no roto roa mai. Taa ê atu, ua ite Iehova i te mau taime atoa, “te taata moe râ o te aau.”—Pet. 1, 3:3, 4.

⁸ I te tahi taime, e patoi te mafatu i te faaotiraa o te feruriraa, ma te faatia i to ˈna mau manaˈo hohonu ia faatupu i te hepohepo aore ra te hinaaro e ia tuuhia ˈtu na mua ˈˈe i te feruriraa ma te nahonaho. E tia i te hoê taata eiaha noa ia ite i te mea tano i mua i te aro o te Atua, ia hinaaro atoa ra to ˈna mafatu ia pee i taua eˈa ra. Te faataa ra te neheneheraa te mafatu e maiti i rotopu e rave rahi mau eˈa tano e te tuu i to ˈna mau hinaaro i nia i te hoê i rotopu ia ratou, e no te aha te Bibilia e parau ai e i roto i te mafatu o te taata “e rave rahi te manaˈo” e “te imi ra te aau taata [tiatonu ra te feruriraa o te taata i nia] i to ˈna haerea.” (Mas. 19:21; 16:9) Na te mau huru tupuraa paha e faahepo nei ia ratou ia ore e na reira, e pee ïa te mau taata i te eˈa e arataihia ra e to ratou mafatu. E tano iho â i roto i te tuhaa o te mau tumu parau i te pae morare e i te pae varua.—Mat. 5:28.

9, 10. Na te aha e tauturu ia tatou ia haaputapû i te mafatu o te hoê taata?

⁹ Nafea ia haaputapû i te mafatu. Nafea te hoê taata haapii kerisetiano ia haaputapû i te mafatu o te mau taata? Te hoê ravea o te faaitoitoraa ïa ia ratou ia feruri ma te haamauruuru i te mau mea ta ratou i haapii. A haamanaˈo i te aamu e faatia ra e mea nafea to Maria, te metua vahine i te pae tino a Iesu “vaiiho maite ihora . . . i taua mea atoa ra i roto i to ˈna aau.” (Luka 2:51) Aita i parauhia i roto i “to ˈna feruriraa,” noa ˈtu e mea titau-atoa-hia i te reira. Ua tapea oia i taua mau mea ra i roto i to ˈna mafatu, te pu o ta ˈna mau huru aroha e o ta ˈna mau opuaraa, e i muri iho riro mai nei oia ei kerisetiano taiva ore. No te tauturu i teie mahana i te mau taata ia faaô i te  parau mau i roto i to ratou mafatu, a rave i te taime no te faataa maitai i te mau tuhaa matamua. Eiaha roa e tuatapapa e rave rahi manaˈo.

¹⁰ Mea faufaa te mau uiraa no te ite mai te peu e te aa mau ra te mau parau mau bibilia i haapiihia i roto i te mafatu o te mau taata. I muri aˈe to outou tuatapaparaa i te mau manaˈo apî, e hinaaro paha outou e ui i teie mau uiraa: “Eaha to outou manaˈo i teie nei? Te tiaturi mau ra anei outou?” A tamata i te na reira ia horoa outou i te hoê oreroraa parau a te feia haapii. I te taime noa e ite ai outou eaha to roto i te mafatu o te taata e nehenehe ai outou e tauturu ia ˈna ia haere i mua i roto i te taviniraa a Iehova.

11. Nafea tatou ia faaite i te hoê taata i te faufaaraa o to ˈna mau taairaa e o Iehova?

¹¹ Ia ô te Parau a te Atua i roto i te mafatu o te mau taata ta outou e haapii ra, e tia ia outou ia tauturu ia ratou ia feruri i nia i to ratou mau taairaa e o Iehova. No te tamata i te faaohipa i teie raveraa, aita e ravea maitai aˈe maoti râ te horoaraa i te hoê oreroraa parau iti i te Haapiiraa o te taviniraa. A faaitoito i te feia ta outou e haapii ra ia tiaturi ma to ratou mafatu atoa i nia ia Iehova, no to tatou here ia ˈna e no te mea te here nei oia ia tatou. Na roto i te tahi mau uiraa i te tahi mau taime tano, a huti i to ratou ara-maite-raa i nia i te mea o ta ratou e haapii ra i roto i te Bibilia no ǒ mai ïa ia Iehova, to tatou Poiete here mau, o tei ‘î i te aroha, e te hamani maitai rahi.’ (Iak. 5:11) I roto i te haapiiraa, a tuu i te tapao tera hebedoma i muri aˈe i te tahi hebedoma i nia i te here e te paari o Iehova, itehia i roto i te mau parau mau faahiahia ta outou e tuatapapa ra. A tauturu i te taata ia taa e te fifi ra to ratou oraraa e e fifi â i te mau mahana e haere mai nei. A hiˈo pinepine e o ratou i te mau faaueraa tumu bibilia, ia riro te reira ei haapiiraa matauhia. A tauturu ia ratou ia imi noa ma te papu eaha mau na te hinaaro o te Metua i te raˈi na mua ˈˈe i te rave i te hoê opuaraa i roto i te mau huru tupuraa atoa. E tauturu ïa outou ia ratou ia taa iti mǎrû noa e no te Atua to tatou ora e te mau mea atoa e vai nei ia tatou, no te mea na ˈna i “horoa mai i te ora, e te aho, e te mau mea atoa,” e e tia ia tuu i ta ˈna haamoriraa i te parahiraa matamua i roto i to tatou mafatu e to tatou feruriraa.—Ohi. 17:25.

12-14. Eaha te tia i te mau taata ia haapii no nia i te tahi mau opuaraa, e nafea te hoê taata ia hiˈopoa i ta ˈna iho mau opuaraa?

¹² I te tahi atu taime, a huti i te ara-maite-raa o te taata i nia i te mea e i mua i te aro o te Atua te ohipa faufaa e ere noa te ohipa ta tatou e rave ra, ta tatou râ mau opuaraa. Te hinaaro nei oia e ia au noa tatou i te faatupu i to ˈna hinaaro. Mai te metua tane e parauhia ra i roto i te buka a te mau Maseli, te titau nei to tatou Metua no te raˈi ra ia tatou na roto i te parau e: “E tau tamaiti, e haapao maitai mai i ta ˈu nei parau; e fariu mai i to tariˈa i ta ˈu e parau atu nei. Eiaha te reira ia moe ê i to mata na; e vaiiho maite râ i te reira i roto i to aau na. O  te ora hoi te reira i te feia i ite atu ia ratou ra, e ora hoi to ratou mau tino atoa i te reira.”—Mas. 4:20-22.

¹³ Na reira, e itoitohia te feia ta outou e haapii ra ia hiˈopoa i te mau opuaraa o ta ratou mau ohipa e ia ui i te mau uiraa mai teie: No te aha vau e hinaaro ai e rave tera aore ra tera mea? Na te aha e turai ia ˈu ia maiti i teie huru eˈa? Ua ite au eaha ta to ˈu feruriraa e hinaaro ra, eaha râ te mea e faaî mau ra i to ˈu mafatu? Te imi ra anei au e ia au mai te Atua ia ˈu aore ra ia haamâha noa i to ˈu mau hinaaro? E aau rotahi anei to ˈu aore ra te imi nei au i te haavare ia ˈu iho na roto i te mau feruriraa hape?

¹⁴ E nehenehe atoa tatou e faaara i te feia e haapii ra i te mau ati e te mau haavare e haafifi nei te feia o te ore e feruri. Ei hiˈoraa, e nehenehe te hoê taata e hinaaro rahi i te tahi opuaraa, peneiaˈe mea tano iho â, o te haafifi paha ia ˈna i roto i te haamoriraa aore ra te taviniraa ta ˈna e horoa ra na Iehova. Te parau tahaa nei te buka faauruahia a te Maseli e: “O tei tiaturi i to ˈna iho aau, e maamaa ïa; o tei haapaari maite ra i to ˈna haerea, e ora ïa i te reira.”—Mas. 28:26.

15-17. Nafea te hiˈoraa o Iesu e te mau aparauraa no nia i te pure e haamaitai ai i te mafatu?

¹⁵ I te pae hopea, mea maitai e ia tapea noa mai i mua i te mata o te mau taata i te hiˈoraa tia i vaiihohia e te Fatu ra o Iesu. Ua faaite oia i te haapao maitai i to ˈna Metua i te raˈi. No te mea ua ‘here oia i te parau-tia e ua riri i te parau-tia ore i faatahinu ai te Atua ia ˈna i te monoˈi ra i te oaoa e hau ê atura i to te mau hoa ra.’ (Sal. 45:7) Mea nafea to ˈna tapea-noa-raa i to ˈna huru mafatu maitai? Ua haapii oia eiaha noa no te ite i te Atua, no te rave atoa i te mea e auhia ra e te Atua. Ua tapea noa mai oia i roto i to ˈna feruriraa i te hinaaro o to ˈna Metua e ua fariu tamau oia i pihai iho ia ˈna na roto i te pure. I roto i ta ˈna mau aniraa, ua ani oia i te Atua ia ‘hiˈopoa ia ˈna, ia tamata ia ˈna e ia perehahu i to ˈna aau e to ˈna manaˈo.’ (Sal. 26:2) Aita o ˈna e hinaaro ra e ia arataihia o ˈna e to ˈna iho mau manaˈo aore ra te mau hinaaro o to ˈna mafatu. Na mua noa ˈˈe i to ˈna pohe tusia, o tei tohuhia, ua faahiti oia i ta ˈna faaotiraa i roto i teie pure: “E tau Metua . . . ia tupu râ to oe hinaaro, eiaha to ˈu.”—Mar. 14:36.

¹⁶ E ere anei i te hiˈoraa maitai ia tuu i mua i te aro o te feia e haapii ra? E nehenehe atoa ratou e tauturuhia ia imi i te aratairaa a te Atua i roto i to ratou oraraa ma te faaohipa i te pure rotahi no roto mai i te mafatu no te ani i te paari e hinaarohia no te pee i te eˈa fariihia e te Atua. A taio atu ia ratou i te tahi mau pure a Iesu. A haere mai ai oia i nia i te fenua nei, na roto ïa i to ˈna tiaraa Tamaiti a te Atua to ˈna paraparauraa ia ˈna. Ma te faaite i ta ˈna mau pǐpǐ e nafea ia pure, ua haamata o Iesu i ta ˈna pure o tei riro ei hiˈoraa na roto i teie mau parau: “E to matou Metua i te ao ra.” (Mat. 6:9) E tia i te taata o te  pure i te Atua ia rave i te haerea o te hoê tamaiti o te haafatata ˈtu i to ˈna metua. Te faaite ra paha ta tatou mau pure hau atu i te mau mea atoa i te huru taairaa ta tatou e atuatu ra e o Iehova. Mea mahanahana anei, te faaite ra anei i te tiaturi e te auraa piri mai to te hoê tamaiti aore ra te hoê tamahine e atuatu ra e te hoê metua tane ta ratou e faatura ra e e here ra ma to ratou mafatu atoa? Aore ra o te mau taairaa rii noa, mai ta tatou e faatupu ra e te feia tapiri aore ra e te hoê hoa? Te tamata ra anei outou i te haaputapû i te mafatu o te mau taata ta outou e paraparau ra e ta outou e haapii ra ma te aparau e o ˈna no nia i te pure, no nia i te faufaaraa ta ˈna e horoa ra e no te aha oia e pure ai.—Mas. 15:8, 29.

¹⁷ I te mea e mea faufaa roa te mafatu no Iehova, e tia atoa ia tatou ia haapao maitai ia haapii tatou i te parau a te Atua. Ia horoa outou i te hoê oreroraa parau huiraatira aore ra te hoê oreroraa parau iti aore ra ia faatere outou i te hoê haapiiraa bibilia, e ere ta outou opuaraa matamua i te tuatapaparaa e rave rahi manaˈo. A rave i te taime e titauhia no te tauturu i te feia e faaroo ra ia haafatata ia Iehova e ia faaô hohonu i ta ˈna Parau i roto i to ratou mafatu.

[Uiraa haapiiraa]