Haapiiraa 24

Nafea ia huti i te ara-maite-raa i nia i te Bibilia

1, 2. No te aha e tia ia tatou ia huti i te ara-maite-raa o te feia e faaroo ia tatou i nia i te Bibilia?

 ¹ I roto i ta tatou taviniraa, te hinaaro nei tatou e aratai i te ara-maite-raa o te feia e faaroo ra i nia i te Bibilia, te Parau a te Atua. Tei roto te poroi ta tatou e poro ra, e te hinaaro nei tatou e ia ite te mau taata e te mea ta tatou e parau ra e ere na tatou, na te Atua râ. Te tiaturi nei te feia e here nei i te Atua i te Bibilia. Ia taio-anaˈe-hia te tahi mau irava, e faaroo e e haafaufaa ratou i ta ˈna mau aˈoraa. E hau atu â ratou i te putapû ia apee anaˈe ratou i te taioraa i roto i ta ratou iho Bibilia. No reira, ia faatia anaˈe te mau huru tupuraa i roto i te pororaa, e mea paari mau â ia faaitoito tatou i te taata ia apee i roto i ta ˈna Bibilia ia taio tatou i te tahi mau irava bibilia. Oia atoa, mai te peu e i roto i te mau putuputuraa e titau-paatoa-hia tatou ia faaohipa i te Bibilia, e ite oioi te feia apî eaha te pu o ta tatou mau tiaturiraa, e e fanaˈo te feia atoa i putuputu mai i te faatomaraa hau e itehia i nia i te hohoˈa mata.

² E tapae ohie noa outou i te tapao o ta outou oreroraa parau, mai te peu e i te mau vahi atoa e nehenehe, e faaitoito outou te feia e faaroo ra ia apee i ta outou taioraa o te mau irava bibilia i roto i ta ratou Bibilia. Tei te huru ïa ta outou manuïaraa i roto i taua tuhaa ra o ta outou titauraa. E tano te tapao “Titauraa i te taata ia rave mai i te Bibilia” i nia i ta outou api iti Aˈoraa no te oreroraa.

3, 4. Nafea tatou e nehenehe ai e na reira ma te aravihi?

³ Ma te titau tahaa roa ˈtu. Te hoê o te mau ravea maitatai roa ˈˈe o te titau-tahaa-roa-raa i te feia i putuputu mai ia rave mai i ta ratou Bibilia; o taua ravea ra te faaohipa-pinepine-hia. E nehenehe râ i te tahi taime e noaa i te hoê â faahopearaa ia faataa noa ihea roa te irava bibilia i te tupuraa na mua ˈˈe e taio ai; ei hiˈoraa, e nehenehe e parau e “A taio noa ˈi tatou i te Timoteo 2, 3:1-5, a feruri na i te mau huru tupuraa e haaati ra ia tatou.” E ma te imi i te irava, e nehenehe outou e hiˈo te feia e faaroo ra no te ite e mai te peu e ua taa ia ratou i ta outou e hinaaro ra. I te rahiraa o te taime, e imi atoa te feia i putuputu mai i te irava.

⁴ Na te taata orero e maiti mai te peu e te hinaaro ra o ˈna e haapapu vetahi irava ma te titau i te feia ia imi atu. A hiˈo i te feia e faaroo ra no te ite e te apee ra anei ratou. Noa ˈtu e no te tahi tumu ê, e tia ia outou ia taio i te hoê oreroraa parau papaihia, e faahiti outou i te mau irava faufaa ia nehenehe te feia i putuputu mai e apee i roto i te Bibilia.

5, 6. A faataa e no te aha e mea faufaa ia vaiiho i te taime i te feia e faaroo ra ia ite i te mau irava ta tatou e hinaaro ra e taio?

 ⁵ Ma te vaiiho i te taime no te imi i te irava. Aita e navai noa ia faahiti i te hoê irava. Mai te peu e e taio outou i te hoê irava, e e haere outou i te irava i muri iho ma te ore e horoa i te feia i putuputu mai i te taime no te imi, e fiu ratou e eita ratou e imi faahou i roto i te Bibilia. A hiˈopoa i te feia e faaroo ra e a taio i te irava ia itehia e te rahiraa.

⁶ I te rahiraa o te taime, mea au aˈe ia horoa oioi i te irava ia roaa i te feia i putuputu mai i te taime no te imi i te irava a tamau noa ˈi outou i te paraparau. No reira, eita e mâuˈa te hoê taime faufaa eita e titauhia ia tâpû i te vai muhu noa na roto i te tahi mau parau faufaa ore a tiai noa ˈtu ai e ia ite te feia i putuputu mai i te irava. Teie nei râ, mea tano te hoê faafaaearaa na mua ˈˈe i te hoê irava. Eiaha e moe ia outou, i te tahi aˈe pae, eita e faaroo-maitai-hia i te mau pereota ta outou e faahiti i muri aˈe i te irava e na mua ˈˈe e taiohia te irava. E tia mau â e ia faahitihia te mau manaˈo faufaa na mua ˈˈe i te irava.

**********

7-18. Eaha te ravea ta tatou e nehenehe e faaohipa no te aratai maitai i te mau irava bibilia?

⁷ I te rahiraa o te taime, ua riro te mau irava bibilia e faahitihia i roto i te hoê oreroraa parau ei tuhaa matamua. E arataihia te mau haapapuraa rarahi i nia i taua mau irava ra. Tei te huru o te tauturu ta ˈna e horoa ra i te aravihi o te faaohiparaa. E tia mau â e ia haapao-maitai-hia te tuhaa “Irava aratai-maitai-hia” i faahitihia i nia i te api iti Aˈoraa no te oreroraa.

⁸ E rave rahi huru ravea no te aratai i te hoê irava bibilia, no te taio e no te faaohipa. Ei hiˈoraa, e nehenehe e arataihia te hoê irava e e faaohipahia i taua iho â taime ra e ua navai noa te taioraa no te faatomaraa i te tapao. Taa ê atu, e faaohipahia i te tahi taime ma te aravihi te tahi mau irava ma te taio atu ma te ore e rave i te hoê omuaraa parau, ei haamataraa i te hoê oreroraa parau ei hiˈoraa.

⁹ No te haapii ia aratai maitai i te mau irava, a hiˈopoa i te ohipa a te mau taata orero aravihi. A tutava i te faataa i te mau ravea taa ê ta ratou e faaohipa no te faaô i te mau irava bibilia. A hiˈopoa i to ratou aravihi. Ia faaineine outou i ta outou oreroraa parau, a hiˈopoa na mua eaha te manaˈo faufaa o te irava, mai te peu iho â râ e o te irava matamua tei tuati i te tahi atu tuhaa. A faaineine maite i ta outou omuaraa parau, ia huti rahi i te ara-maite-raa. Teie te tahi mau aˈoraa:

¹⁰ Te hoê uiraa. E titau te uiraa atoa i te hoê pahonoraa. E faaara oia i te anaanatae. Na te irava e aore ra to ˈna faahopearaa e horoa mai i te pahonoraa. Ei hiˈoraa, mai te peu  e e paraparau outou no nia i te pâmuraa toto e ua faaite aˈena outou i te opaniraa i faahitihia i roto i te mau Papai hebera, e nehenehe outou e aratai i te Ohipa 15:28, 29, ma te ani i teie nei uiraa e: “Tei raro aˈe anei te mau kerisetiano i teie opaniraa? A tapao na i teie faahitiraa i fariihia e te tino aratai o te amuiraa matamua i horoahia i raro aˈe i te aratairaa o te varua moˈa.”

¹¹ Te faaôraa i te hoê aamu aore ra te hoê faaueraa tumu i haapapuhia e te irava. Mai te peu e o te orureraa hau o te mau taurearea te tumu parau, e nehenehe outou e parau e: “E tuhaa faufaa mau to ta tatou mau amuimuiraa i roto i to tatou huru i nia i te maitai e te ino.” E i muri iho, e nehenehe outou e faataa i taua faahitiraa ra e te mau parau a Paulo i faaitehia i roto i te Korinetia 1, 15:33.

¹² O te Bibilia te mana. No te mau irava iti aˈe te faufaa, e nehenehe noa outou e parau e: “A tapao na ta te Parau a te Atua e faahiti ra no nia i taua tumu parau nei.” E navai noa te taioraa i te irava ma te anaanatae e no te haapapu i to ˈna faaohiparaa.

¹³ Te hoê fifi. Ia paraparauhia no nia i te “po auahi,” e nehenehe tatou e parau e: “Ia mauiui te hoê taata i roto i te hoê auahi mure ore, e tia e ia vai ora noa oia i muri aˈe i te pohe. Tera râ, te parau ra Koheleta 9:5, 10 e.”

¹⁴ Te hoê maitiraa. Mai te peu e e mau ravea fifi roa te aniraa i te hoê uiraa aore ra te faahitiraa i te hoê fifi no te feia e faaroo ra ia outou, e nehenehe outou e pûpû i te hoê maitiraa i rotopu e rave rahi mau ravea e e vaiiho e na te irava e na ta ˈna faaohiparaa e faaite e eaha te mea maitai. Ei hiˈoraa, mai te peu e te hinaaro nei outou e faahiti i te Mataio 6:9 no te faaite i te hoê katolika e e faatae tatou i ta tatou mau pure ia vai ra, e aratai paha te hoê uiraa e horoa-tahaa-noa-hia no nia i te hoê fifi i to ˈna ara-maite-raa i nia i te hoê feruriraa tano ore. E nehenehe ïa outou e parau e: “E rave rahi mau manaˈo no te ite e ia vai ra e faatae atu ai i te pure. Te parau nei vetahi e e tia ia pure ia Maria, area vetahi e faatae ïa i te mau “peata” vetahi râ e tia ia faatae i ta tatou mau aniraa i te Atua anaˈe. Teie ta Iesu i parau.”

¹⁵ Te hohonuraa o te aamu. Mai te peu e te hinaaro nei outou e faahiti i te Hebera 9:12 i roto i te hoê oreroraa parau no nia i te hoo no te faaite e na roto i to Iesu pûpûraa i to ˈna toto ua roaa ia tatou i te hoê “ora mure ore,” mea au aˈe paha na mua ia faataa poto noa eaha te “vahi moˈa” o te sekene, o tei faahohoˈa ra ia au i te parau a Paulo, i te vahi Iesu i tomo ai.

 ¹⁶ Te mau irava na mua ˈtu aore ra i muri iho. I te tahi taime, mea faufaa te mau irava na mua noa ˈtu aore ra i muri noa iho i te irava ta tatou e hinaaro ra e faahiti no te faaô atu i te reira. Ei hiˈoraa, na mua ˈˈe e taio ai i te Luka 20:25 no te faaite eaha te auraa e faahoˈi i “ta Kaisara ra ia Kaisara,” peneiaˈe e manaˈo outou e mea faufaa ia faataa mea nafea to Iesu faaohiparaa i te hoê moni veo e te hohoˈa o Kaisara, mai tei faatiahia i roto i te mau irava na mua ˈtu.

¹⁷ Te ravea amui. Oia mau, e nehenehe e amui i teie na ravea e piti, e i te tahi taime mea faufaa roa.

¹⁸ E tia i te faaôraa mai i te hoê irava ia faaara maitai i te anaanatae no te huti i te ara-maite-raa o te feia e faaroo ra i te roaraa o te taioraa o te irava, e e tia ia haapapu i te tumu o teie faahitiraa o te irava iho.

19, 20. Nafea tatou e ite ai e mai te peu e ua faaara tatou i te anaanatae no te irava ta tatou e hinaaro ra e faahiti?

¹⁹ Faaara i te anaanatae no te mau irava. Nafea outou e ite ai e mai te peu e ua faaara outou i te anaanatae o te feia e faaroo ra no te hoê irava? A tahi, na nia i te huru o te feia e faaroo ra, na roto atoa râ i te tuatapapa-maitai-raa i ta outou huru aratairaa i te irava. Mai te peu e eita outou e taio i te irava ta outou i faahiti, e faaea maere noa anei te feia i putuputu mai, ma te tiai i te pahonoraa i te hoê uiraa i faahitihia i roto i ta outou omuaraa parau? Ua faaara maitai ïa outou i te anaanatae no taua irava ra. Oia mau, e tia e ia tuea ta outou omuaraa parau e te tumu parau e te irava ta outou e taio atu. E tia e na te irava iho aore ra na te faaohiparaa ta outou e horoa e pahono i te mau uiraa atoa i faahitihia i roto i ta outou omuaraa parau.

²⁰ E nehenehe e faaau i te ohipa no te aratai i te hoê irava i te hoê tairiraa pǎhǔ na mua ˈˈe i te hoê faahitiraa parau i mua i te huiraatira. Eita te taata tairi pǎhǔ e horoa i te hoê himeneraa. Te faaohipa nei oia i ta ˈna pǎhǔ no te huti noa i te ara-maite-raa o te huiraatira i nia i te faahitiraa ta ˈna e horoa. Oia atoa, e aratai tatou i ta tatou mau irava e ia faaroohia ma te au e ia hutihia i te hoê haamaitairaa.

21. No te aha e tia ia tatou ia huti i te ara-maite-raa i nia i te tumu o te irava?

²¹ Huti i te ara-maite-raa i nia i te tumu o te irava. Noa ˈtu e na roto i te aratairaa i te hoê irava e nehenehe e faahiti i te hoê uiraa ma te ore e pahono, e tia râ e ia faaite te uiraa no te aha e tano ai te irava e no te aha e mea anaanatae roa. Ei hiˈoraa, mai te peu e e parau outou i te fenua mai te vahi nohoraa tamau o te taata, e nehenehe outou e aratai i te Apokalupo 21:3, 4 na roto i te mau parau i muri nei: “A taio noa ˈi tatou i te Apokalupo 21:3, 4, a tapao na e teihea roa te sekene o te Atua i muri aˈe te oreraa te oto e te pohe.” Aita noa outou i faaara i te anaanatae o te feia e faaroo  ra ma te vaiiho i te hoê tuhaa ma te pahono-ore-hia o te faaitehia na roto i te taioraa o te irava, e huti atoa ïa outou i te ara-maite-raa i nia i te hoê vahi faufaa o te irava, e ohie noa outou i te faaite i to ˈna faaohiparaa i muri aˈe i to ˈna taioraa. Ma te aratai atu i te ara-maite-raa i nia i te mea mau e vai ra i roto i te irava, te haafaufaa ra ïa outou i te Parau a te Atua.

[Uiraa haapiiraa]