Nafea ia papai i te hoê rata
Haapiiraa 17
Nafea ia papai i te hoê rata
1, 2. E faahopearaa maitai to te mau rata i roto i teihea tuhaa?
1 Ua faaohipa maitai te amuiraa kerisetiano no te senekele matamua i te mau rata i roto e rave rahi mau tuhaa. Ua riro ei ravea no te tapea i te mau taairaa i rotopu i te mau amuiraa. (Phil. 1:1) Ua faaohipa-atoa-hia no te faaitoito i te mau kerisetiano o tei horoahia i te mau hopoia taa ê. (Tim. 2, 1:1, 2, 6) Ua faaitoito te tahi mau rata i te feia o tei riro apî mai ei feia faaroo aore ra o tei faaruru i te mau fifi. (Tes. 1, 1:1-7; 3:1-7) Ua papai te mau kerisetiano matamua i te tahi mau rata i te tahi atu feia faaroo ta ratou i taai maite atu i roto i te ohipa a te Fatu, ia nehenehe noa ratou e faatupu i te mau auraa piri roa e o ratou.—Ioane 3, 1, 14.
2 I to tatou nei tau, e rave rahi tumu e ia papai te mau tavini teotaratia i te mau rata, e e faatupu te reira e rave rahi haamaitairaa. Mea titauhia i te tahi mau taime e ia papaihia i te hoê rata i te pae o te ohipa. E tia atoa paha e ia faataehia ˈtu i te hoê rata i te tahi atu taata toroa no te hau no nia i te ohipa o te Basileia. E nehenehe noa paha te tahi mau taata e noho ra i roto i te mau aorai aore ra i te tahi mau tuhaa atea e faaroo i te “parau apî maitai” maoti noa i te mau rata. Ua taui paha te vahi nohoraa o te tahi feia poro o ta outou amuiraa, aore ra te ora nei te tahi o to outou mau metua i te vahi atea o to outou vahi faaearaa. Te hinaaro nei outou e faaite e te manaˈo aroha nei outou ia ratou na roto i te rata. I te tahi taime, e nehenehe atoa outou e hapono i te hoê rata no te faaite i to outou mauruuru aore ra to outou tapao aroha.
3. Eaha te tuu i roto i ta tatou mau rata ia tano i ta tatou taviniraa?
3 E tia e ia au ta tatou mau rata i te taviniraa ta te Atua i horoa mai na tatou. E mau rata ïa e faaite ra i te huru auhoa, te ite i te peu maitai e o te haapapu ra i to tatou haapao maitai î i te aroha no te feia o te taio atu. Ei mau rata manaˈo papu, faaitoito eiaha râ te manaˈo tano ore, eiaha atoa ia faaite i te hoê huru feruriraa faaino o te nehenehe paha e faateimaha i te taata taio e e faaore i to ˈna faaroo. Te parau nei te Parau a te Atua e ‘te here e faarahi ïa i te maitai.’ (Kor. 1, 8:1) A haapao atoa i te huru papairaa taatoa o te rata e i te huru manaˈo ta ˈna e horoa ra. Ia nehenehe te reira e papai-maitai-hia, mea tano e ia vaiiho i te hoê hiti, tano maitai i na pae e piti e i raro i te api. Eita e tano te mau tafetafeta. Hau atu, mea maitai ia haapaohia te papairaa reta e te tarame. Teie nei râ, mai te peu e aita outou i aravihi maitai i roto i taua mau tuhaa ra, eiaha ïa te reira ia tapea ia outou ia papai i to outou mau hoa. I te rahiraa o te tupuraa, na te mahanahana, te ieie, e te anaanatae ta outou e faaite e faaore roa i te mau hape o te reta papai aore ra o te tarame. E nehenehe râ outou e haamaitai atu i roto i taua mau tuhaa ra ma te faaohipa i te hoê titionare e ma te tapao e mea nafea te tahi mau taeae ia amui i te mau parau e te mau pereota. Ma te tapea noa i taua mau tuhaa ra i roto i te feruriraa, e hiˈo ïa tatou i teie nei te mau huru rata taa ê te tia paha ia tatou ia papai atu no nia i ta tatou taviniraa.
4. A faataa i te papairaa tano no te hoê rata ohipa.
4 Te mau rata ohipa. Ia papai outou i te hoê rata ohipa, mea titauhia ia tuu i to outou iˈoa e to outou vahi nohoraa i nia i te pae aui o te api, e te taio mahana i te pae atau. O te piihia te upoo o te hoê rata. (No te mau rata e faataehia i te Taiete Watch Tower e no nia i te mau ohipa a te amuiraa, e tuuhia i nia i te api te iˈoa o te amuiraa a te taata hapono i te rata.) E papaihia te vahi nohoraa o te taata e hapono ra i nia i te pae atau o te api, i raro aˈe râ i te taio mahana. I reira, e faaite outou i te iˈoa e te vahi nohoraa o te taiete aore ra o te taata ta outou e papai ra. I muri iho e tuu atu ai te parau aroha. Ia papai outou i te hoê taiete aore ra i te mau taata e ere i te mau ite no Iehova, mea tano ia faaohipa i te tahi mau faahitiraa parau mai “Tane” aore ra “Te mau tane.” Ia papai outou i te Taiete aore ra i te tahi atu ite no Iehova, e matauhia i te faaohipa i te mau parau faatau aroha mai “E au mau taeae here e” aore ra “E to ˈu taeae here e.” E faaoti te rata na roto i te faahitiraa parau mai “A farii mai, i te tapao o to ˈu mau manaˈo hohonu taa ê.” Ia papai râ outou i te tahi atu mau melo o te amuiraa a Iehova, e nehenehe outou e faaoti i ta outou rata na roto i te parau e “To outou taeae” aore ra “To outou hoa i roto i te taviniraa.” E tia e ia faataa-ê-hia te faahitiraa parau hopea. E tuu outou i ta outou tarimaraa i raro aˈe noa iho. Mai te peu e e faataehia ta outou rata i te Taiete na roto i te iˈoa o te amuiraa aore ra o te hoê haaatiraa, e horoa atoa te taata papai i ta ˈna hopoia, “tiaau-peretiteni” aore ra “tiaau haaati,” ei hiˈoraa, i raro aˈe noa mai i ta ˈna tarimaraa.
5, 6. Eaha ta tatou e tuatapapa na mua roa i roto i te hoê rata, e na te aha i te rahiraa o te taime e haamatara mai i te hoê pahonoraa maitai?
5 I te omuaraa iho o ta outou rata, a faaite oioi i te tumu. I reira, e taa oioi ïa i te taata i faataehia i te rata e no te aha outou e papai ai ia ˈna. Mai te peu e te vai ra te hoê rata tei papai-na-mua-hia, mea tano ia faahiti atu e ia haapapu i te tumu parau i tuatapapahia i roto. Mai te peu e e rata o te faataehia i te hoê taiete rahi e rave rahi tuhaa ohipa ta ˈna, mea tano atoa ia faahaamanaˈo i te faahitiraa i papaihia i nia i te rata hopea i haponohia mai e taua taiete ra. Area no te tino o te rata, mea maitai ia faaherehere outou i te hoê paratarapha no te ohipa tataitahi aore ra uiraa taa ê. Na roto i taua raveraa ra, e matara maitai ïa te mau tuhaa tataitahi, o te faaohie ïa i te ohipa. Mai te peu e te vai ra i roto i te rata te hoê tuhaa no te ohipa e te hoê tuhaa no ta outou iho mau uiraa, mea maitai ia faahiti na mua i te tuhaa no te ohipa.
6 Ia papaihia i te hoê rata, mea maitai aˈe e ia haapoto noa, noa ˈtu e e mau haamaramaramaraa papu e te taatoa te tia ia faahitihia. Ia faaore outou i te mau parau faufaa ore, aore ra te mau faahiti-faahou-raa i te manaˈo, e aravihi aˈe ta outou rata. Ia faaatea ê outou i te mau manaˈo o te ore e tuea ra e te tumu parau, e papu maitai aˈe ïa te tumu o ta outou rata. I te rahiraa o te tupuraa, mea maitai e ia faaite outou ma te aau rotahi i to outou mauruuru no te mau tutavaraa i ravehia e te taata ta outou i faatae atu i te rata. Noa ˈtu e e tuatapapa te hoê rata ohipa i te hoê fifi, e maitai aˈe te pahonoraa ia faaohipa outou te mau faahitiraa parau mai teie te huru: “Ua mauruuru roa vau i ta oe e rave ra (aore ra i te mea ta oe e nehenehe e rave) no ˈu i roto i taua tuhaa ra.”
7-9. Eaha ta tatou e nehenehe e tuu i roto i te hoê rata no te horoa i te faaiteraa?
7 No te horoa i te hoê faaiteraa. E faufaa rahi atoa to te mau rata no te poro i te poroi o te Basileia. I roto i te tahi mau tuhaa fenua, te vai ra te mau fare tahua aore ra te mau aorai aita hoi tatou e nehenehe e tomo atu mai ta tatou e hinaaro no te faatupu i ta tatou taviniraa. Tera râ, e nehenehe tatou e papai i te hoê rata i te feia e noho ra i reira. Oia atoa, te vai ra te taata e mea pinepine, aita ratou i te fare ia haere tatou e farerei ia ratou i roto i ta tatou ohipa i tera e i tera fare, te haere mai nei râ ratou e tii i ta ratou mau rata. No reira, e papai te hoê taata poro o te ore e nehenehe e haere i rapae i to ˈna fare i taua taata ra, o ta ˈna anaˈe paha ravea apitiraa i roto i te pororaa i te poroi o te Basileia.
8 Ia papai outou i te hoê rata no te horoa i te faaiteraa no nia i te Basileia o te Atua, mea tano e ia faaite outou na mua roa e o vai ra outou. E hinaaro atoa paha outou e faataa e no te aha outou e papai ai i taua taata ra maoti i te haere e farerei ia ˈna. E nehenehe te taata o ta outou e papai nei e putapû roa i to outou aau rotahi. E, a faaite atu i te mea ta outou i hinaaro e parau atu ia ˈna ahiri outou i farerei ia ˈna. E ere i te mea fifi mai te peu e e faaohipa outou i te mau aratairaa i haapiihia i te Haapiiraa o te taviniraa. E nehenehe outou e faaohipa i te hoê pûpûraa bibilia i hutihia i roto i te hoê vea apî o Te taviniraa o te Basileia aore ra na roto i te haapoto-noa-raa e ta outou iho mau parau i te hoê tuhaa o te vea hopea o Te Pare Tiairaa aore ra o te A ara mai na!, aore ra o te buka E nehenehe oe e ora e a muri noa ˈtu i roto i te paradaiso i nia i te fenua nei. E nehenehe outou e apiti atu i ta outou rata i te hoê api parau iti, te hoê vea aore ra vea iti, e e titau i te taata ia taio atu te reira. A faataa ia ˈna e no te aha e mea faufaa roa taua mau haamaramaramaraa ra. Mai ta outou e rave ra i tera e tera fare, e nehenehe outou e faaitoito atu ia ˈna ia imi i te mau irava i faahitihia i roto i ta ˈna iho Bibilia. E, no te atuatu i te anaanatae o te matara mai, a parau atu e nafea o ˈna e nehenehe ai e faatupu i te taairaa e o outou, ma te titau ia ˈna ia na reira. A haapapu maitai i to outou iˈoa e to outou vahi nohoraa, ia nehenehe te taata e haamauruuru ia outou aore ra e ani i te hoê tamatahitiraa i Te Pare Tiairaa aore ra i te A ara mai na!, ia ite o ˈna ihea roa e papai ai.
9 A faahiti i te mau taime atoa i to outou vahi nohoraa i rapaeau mai o te rata. Ia papu ia oe e ua tano maitai te titiroraahia ta oe rata. Mai te peu e aita i navai maitai te titiro, e tia paha i te taata i faataehia te rata ia aufau i te moni hau, o te faaino i ta outou mau tutavaraa e horoa i te hoê faaiteraa maitai roa.
10, 11. No te aha e mea maitai ia papai i te mau melo o to tatou utuafare, e i to tatou mau hoa, e eaha ta tatou e nehenehe e tuu i roto i taua mau rata ra?
10 I te mau melo o to outou utuafare e to outou mau hoa piri roa. Tera mahana e tera mahana, e horoa tatou i te taime e to tatou haapao maitai i te ohipa ta tatou i faaoti e mea faufaa roa. Teie râ, te rave ra anei tatou i te taime no te tapea i te taairaa e te mau metua e here nei ia tatou e te tahi mau hoa piri ma te papai atu ia ratou? E mauruuru roa te hoê metua tane e te hoê metua vahine i te hoê rata no ǒ mai i ta ratou mau tamarii e te fanaˈo nei ratou i te mau rata e papaihia e to ratou mau metua. E faatupu taua huru “tauaparauraa” ra i papaihia i te tahoêraa o te mau melo o te hoê utuafare, noa ˈtu e i te pae tino, ua atea roa te tahi e te tahi. E anaanatae roa paha to outou mau hoa e to outou mau metua ia ite e te oraora maitai ra outou, na roto i te hoê rata e faahiti ra te tahi atu mau parau apî o te faaitoito, noa ˈtu e ua papai-rima-hia aore ra ua patapatahia. Te feaa ra anei to outou manaˈo? A feruri ïa ia outou iho. Mea anaanatae mau â e ia tae anaˈe mai te hoê rata maitai. E faatupu te reira i te hoê huru maitai. E oaoa outou e ua manaˈo te hoê taata ia outou e ere anei? Eiaha ia moehia e te huru matamua o te mau kerisetiano o te here ïa ta ratou e faaite i te tahi e te tahi; teie râ te hoê ravea no te faaite papu i te reira, ia vai noa ïa te taairaa maoti te mau rata, e te feia i atea ê.
11 Eaha râ ta outou e papai atu? Ua farerei anei outou i te hoê oaoaraa taa ê? I te rahiraa o te tupuraa, te ohipa o te faaoaoa ia outou e faaoaoa atoa ïa i to outou mau hoa. O te hoê tupuraa taa ê paha i roto i ta outou ohipa pororaa aore ra tei faatiahia ia outou. (Teie râ, e ere i te mea paari ia faaite i te tahi parau apî e aita i papu-maitai-hia i to ˈna parau mau.) E hinaaro paha outou e faahaamanaˈo i te mau taime au maitai ta outou i fanaˈo e taua taata ra ta outou e papai ra. E haapaari te reira i te auhoaraa. E nehenehe atoa outou e faahiti i te mau ohipa apî tei haapiihia. A parau atoa i ta outou i rave aita i maoro aˈenei, peneiaˈe te mau vahi ta outou i mataitai. Mea anaanatae atoa na te mau hoa taua mau faatiaraa ra. E maˈi anei to te taata ta outou e papai ra? A pûpû atu i te tahi mau parau faaitoito. A faaite e te anaanatae ra outou ia ˈna e a parau i to outou hinaaro e ia ora oioi oia. E nehenehe atoa outou e faatia i te hoê ohipa taa ê i tupu i te putuputuraa o te amuiraa, te hoê ohipa faaitoito o te faaoaoa te mau mahana o teie taata maˈi. No reira, mai te peu e mea fifi no outou ia haamanaˈo i te tahi mau tuhaa iti o te tahi mau ohipa i tupu noa aˈenei aore ra ta outou e manaˈo ra, no te aha outou e ore ai e papai i nia i te hoê nota parau ia haere anaˈe mai i roto i to outou feruriraa? Mai te reira, ia parahi outou no te papai, tei raro aˈe ïa taua mau haamaramaramaraa ra i to outou rima.
12, 13. Nafea ta tatou mau rata ia faaitoito ia vetahi ê ia tamau noa i nia i te eˈa o te parau mau?
12 No nia noâ i te mau mea e nehenehe e tuu i roto i te hoê rata, i to outou manaˈo te vai ra anei i te tahi mea faufaa aˈe no te taata e faataehia ra i te rata i te mau faaitoitoraa ia vai noa i nia i te eˈa o te parau mau? Ua taui paha te hoê taata ta outou i faatere i te haapiiraa bibilia i to ˈna fare. Ia papai outou i te hoê rata faaitoito e haapapu ra i to outou anaanatae atoa no ˈna, eita anei te reira e tauturu ia ˈna ia tamau â i te faaara i to ˈna here no te parau mau? A feruri atoa na i te mau manaˈo o te tahi mau metua ia hapono anaˈe te tamaiti aore ra te tamahine i te atea ê i te hoê rata no te haamauruuru ia raua i to raua faaiteraa i te haapao maitai i te roaraa o te mau matahiti e te haapiiraa ia ˈna ia here i te mau eˈa o Iehova. Te vai atoa ra te mau kerisetiano o tei haere i te mau vahi e hinaaro-rahi-hia ra aore ra e tavini ra ei mitionare aore ra i roto i te Betela. E itoitohia ratou ia tae anaˈe mai ta ratou rata no te haapopou ia ratou no te taviniraa ta ratou e pûpû nei na Iehova ma te haapao maitai. (Te mau tavana 11:40) E oaoa ratou ia faatae outou i te parau apî no nia i te amuiraa ta ratou i apiti atu i mutaa ihora.
13 E haamaraa outou i te maitai o ta outou rata ia ore outou e huti i te manaˈo i nia noa ia outou. A anaanatae atoa i te taata ta outou e papai ra ma te uiui no nia i to ˈna oraora-maitai-raa aore ra ta ˈna mau opuaraa, ma te ani atu i te huru tauiraa o te mau ohipa ta ˈna i faahiti i roto i te rata na mua ˈtu, e ma te paraparau no nia i te mau hoa ta ˈna i matau atoa, e te mau haereraa i mua o te mau taata e haapii ra i te Bibilia e o ˈna. Ia anaanatae outou ia vetahi ê mai te reira, e faaitoito ta outou rata e e faatupu oia i te oaoa e e turai e ia pahonohia mai te hinaaroraa i te tahi atu â mau horoaraa parau apî.
14, 15. Nafea outou ia haapapu i to outou manaˈo i roto i te tuhaa hopea o ta outou rata?
14 Ia oti te tino o ta outou rata, nafea outou ia faaoti? Mea tano e ia rave maitai i te hoê faaotiraa. Ia parau noa anaˈe tatou e: “E tia ia ˈu ia faaea, aita e vahi papairaa faahou,” aita ïa e faahanahana ra ia outou. No te aha outou e ore ai e imi i te tahi parau e faaite maitai ra i to outou manaˈo? Ua faaoti te aposetolo Paulo i te mau rata ma te huru taa ê e te anaanatae. Ei hiˈoraa, ua papai oia e: “E au mau taeae e, ei to outou varua te aroha mau o to tatou Fatu ra o Iesu Mesia ra.” (Gal. 6:18; Kor. 2, 13:14) Ua faaoti te aposetolo Ioane i ta ˈna rata mai teie: “Ei hau to oe. Te aroha ˈtu nei te mau taua nei ia oe. E aroha ˈtu oe i te mau taua ra ma te faahiti hau i te iˈoa.” (Ioane 3, 14) A papai i te hoê faaotiraa ia au i te tumu parau i tuatapapahia i roto i ta outou rata e e tano i te mau taairaa ta outou e faatupu nei e te taata ta outou e faatae ra i te rata.
15 E ere i te mea fifi ia papai i te hoê rata, ia hiˈopoa outou i tera e tera mahana i te mau ohipa e tupu nei na pihai iho ia outou. E rave rahi ohipa e faatupu nei i te mau parau tohu bibilia. Te ino roa nei te amuiraa o te mau mea e vai nei, oia atoa to ˈna tuhaa i te pae faaroo. Te haere nei râ te ohipa a Iehova i mua ma te faahiahia mau maoti ta ˈna haamaitairaa. E oaoa to outou mau taeae ia tae anaˈe te mau parau apî no nia i te haereraa i mua i roto i ta outou tuhaa fenua. Noa ˈtu eaha ta outou hopoia, e oaoa roa te tahi mau kerisetiano ia tae anaˈe ta ratou rata e te faaite ra outou i to outou iho anaanatae no ratou ma te mahanahana. Tei roto mau te reira i ta tatou taviniraa, eiaha roa e ia moe to tatou here no to tatou mau taeae no te mea noa e tei te atea ê ratou. No reira, e nehenehe tatou e haapapu i to tatou here, ma te papai i te mau rata.
[Uiraa haapiiraa]
