Haapiiraa 23

Puairaa o te reo e mau faafaaearaa

1, 2. No te aha e tia ˈi ia tatou ia paraparau puai maitai?

 ¹ E ore te faufaaraa o ta outou parau ia ore anaˈe outou e faaroo-maitai-hia. Teie râ, ia puai roa ta outou parau, e nehenehe e turituri te tariˈa o te feia e faaroo ra e eita ratou e apee i te mau manaˈo maitatai ta outou i faaineine. Te taahia ra te faufaaraa o te puairaa o te reo i roto e rave rahi Piha no te Basileia, e mea pinepine eita te feia e parahi i muri roa o te piha e faaroo i te mau pahonoraa o te feia e parahi ra i mua. I te tahi taime, aita i puai maitai te reo o te taata orero, e aita iho â ïa oia e tapea i te ara-maite-raa o te feia e faaroo ra. I  roto i te pororaa, te farerei nei tatou i te tahi mau taata o te ore e faaroo maitai, e e rave rahi maniania i roto aore ra i rapae i te fare to reira tatou. Te faaite ra te reira e e tia ia haapao maitai e ia puai tano noa to tatou reo.

² Ia faaroohia tatou ma te fifi ore. No te ite e ua faaohipa tatou i te puairaa reo tano, e nehenehe na mua e ui i teie mau uiraa: Ua faaohipa anei au i te puairaa reo tei anihia? Oia hoi, ua faaroohia anei au e te feia i muri roa o te piha, ma te ore e faaturituri i te tariˈa o te feia i mua? Mea navai noa taua hiˈopoaraa ra no te taata e haamata ra, e tutava râ te taata haapii maoro aˈe no te haavî i te tahi atu tuhaa o taua uiraa ra e tuatapapahia i muri iho. E faaau te tiaau no te haapiiraa ta ˈna mau aˈoraa no te taata haapii tataitahi i roto i taua tupuraa ra.

3-10. Na te aha e tauturu mai ia tatou ia maiti i te puairaa reo tano?

³ E tano i te mau huru tupuraa. E tia i te hoê taata orero ia taa e e nehenehe e tauiui te mau tupuraa ia paraparau oia. E faarahi te reira i te aravihi o to ˈna ite, e roaa ia ˈna te faaau ohie, e e tapea ohie aˈe oia i te ara-maite-raa o te feia e faaroo ra.

⁴ E tauiui te mau huru ia au i te piha e te rahiraa o te feia e faaroo ra. Ia haavî maitai outou i te tupuraa, e tia ia outou ia haapao i te puairaa o to outou reo. E ani te hoê oreroraa parau e horoahia i te Piha no te Basileia e ia puai aˈe te reo ahiri e te paraparau nei tatou i roto i te hoê piha faafaaearaa. Oia atoa, eita tatou e haapuai i te parau mai te peu e o te tahi noa mau taeae tei amui mai i pihai iho i te tahua no te putuputuraa o te pororaa, ia faaauhia i te taime a î ai te piha i te putuputuraa o te taviniraa ei hiˈoraa.

⁵ E nehenehe atoa râ taua huru tupuraa ra e taui. E nehenehe te tahi mau maniania taue e haapeapea i te hau o te piha. Te tere ra te hoê pereoo aore ra te hoê pereoo auahi, te aoa nei te hoê urî, te taˈi nei te hoê tamarii aore ra te tae mai ra te hoê taata i muri aˈe i te hora, o te mau haruru manaˈo-ore-hia o te titau i te hoê tauiraa o te puairaa o te reo. Ia ore te taata orero e tâuˈa, eita paha vetahi mau tuhaa faufaa e faaroohia e te feia i putuputu mai.

⁶ Te fanaˈo ra e rave rahi amuiraa i te hoê haapueraa taoˈa haapuai reo. I roto atoa i taua tupuraa ra, e nehenehe te tiaau e aˈo i te taata haapii, ia ore oia e tâuˈa i te huru tupuraa, e te paraparau puai ra anei oia aore ra aita e navai te puai (hiˈo te Haapiiraa 13 no nia i te faaohiparaa i te taoˈa haapuai reo.)

⁷ E riro i te tahi taime e ere i te mea ohie no te hoê taata orero ia paraparau ma te puai no te huru o to ˈna reo. Mai te peu e te reira to outou fifi, e aita to outou reo e maraa ra, a  pee i te mau aˈoraa a te tiaau no te haapiiraa. Peneiaˈe e faaitoito oia ia outou ia rave i te tahi mau faaineineraa no te faarahi e no te faaitoito i to outou reo. Teie nei râ, e mau tuhaa taa ê te puairaa o te reo e te huru o te reo, e mau aˈoraa taa ê ta raua.

⁸ Aita te mau huru tupuraa e farereihia e nehenehe e tuatapapahia i roto i te hoê noa oreroraa parau. E horoa te tiaau i te tahi mau aˈoraa no nia i te oreroraa i vauvauhia eiaha râ i nia i te mau tupuraa te nehenehe e farereihia. Teie râ, mai te peu e mea titauhia, e nehenehe oia e faaite i te taata haapii i te tahi mau fifi ta ˈna e nehenehe e farerei i roto i te mau tupuraa taa ê, noa ˈtu e e haapopou oia ia ˈna no te oreroraa parau ta ˈna i horoa e noa ˈtu e e tuu oia i te hoê “M” i nia i ta ˈna api iti.

⁹ Nafea te hoê taata haapii e ite ai e ua navai te puairaa o to ˈna reo? Na te huru o te feia e faaroo ra e faaite mai. E hiˈopoa maite te taata orero aravihi i te feia e faaroo ra i muri roa i te piha i te roaraa o ta ˈna omuaraa parau. E taa ïa ia ˈna ia au i to ratou huru e to ratou haerea mai te peu e te faaroo maitai ra ratou, e e taui oia i te puairaa o to ˈna reo mai te peu e e titauhia. Ia “faaau” maitai anaˈe oia ia ˈna i te piha, eita ïa o ˈna e fifi faahou.

¹⁰ Te tahi atu ravea o te hiˈopoaraa ïa i te feia orero na mua ˈtu. Te faaroo-maitai-hia ra anei e eaha te puairaa o te reo ta ratou e faaohipa ra? A faatano atu i to outou reo.

11, 12. No te aha e mea faufaa ia maiti i te hoê puairaa reo e tano i te mau manaˈo e vauvauhia?

¹¹ E tano i te mau manaˈo e vauvauhia ra. Eiaha e hape i nia i ta tatou e tuatapapa ra no nia i te puairaa o te reo e te faatomatomaraa i te reo. O te tauiuiraa noa i te puairaa o te reo ia au i te mau manaˈo i vauvauhia. Ei hiˈoraa, mea papu e ia taiohia i te hoê irava o te Papai, eita tatou e faaohipa i te hoê â puairaa o te reo no te faaite i te hoê poroi no te haavaraa e no te faaitoitoraa i te here autaeae. A hiˈo Isaia 36:11, e te mau irava 12 e 13. Te taa ohie ra ia tatou e aita teie na toopiti faahitiraa i parauhia e te hoê â puairaa o te reo. E tia ia taui i te puairaa ia au i te mau manaˈo i vauvauhia, ma te ore râ e topa i roto i te tahi otia.

**********

 ¹² No te maiti i te puairaa o te reo tano, a hiˈopoa maite i to outou mau manaˈo e ta outou tapao. Mai te peu e te hinaaro nei outou e turai i te feia e faaroo ra i te ohipa, eiaha e faahaumani ia ratou ma te paraparau puai. Teie râ, mai te peu e te hinaaro nei outou e turai ia ratou ia apiti i roto i te hoê ohipa oaoa, e tia paha ia haamaraa rii te puairaa o te reo. Mai te peu e e faaitoitoraa tei roto i te mau manaˈo e vauvauhia ra, eiaha ïa e paraparau mǎrû roa.

13-16. A faaite mai i te faufaaraa o te mau faafaaearaa.

¹³ Ia vauvau outou i ta outou oreroraa parau, hoê â faufaa to te mau faafaaearaa tano i te hoê puairaa reo papu maitai. Aita anaˈe, e poiri mai te auraa o ta outou mau parau e eita te mau manaˈo tumu te tia i te feia e faaroo ra ia tapea mai i roto i to ratou feruriraa, e ohipa maoro mai i nia ia ratou. E tapea mai outou na roto i te mau faafaaearaa i to outou mǎtaˈu ore, e hiˈopoa i to outou hutiraa aho e e ite outou i to outou aravihi i te mau taime fifi o te oreroraa parau. E ite te feia e faaroo ra e te haavî maitai ra outou i te oreroraa parau e aita outou e rahi ra i te horuhoru, e te haapao nei outou ia ratou, e te vai ra ta outou parau no ratou e te hinaaro nei outou e ia haamanaˈo ratou.

¹⁴ E tia i te taata orero apî ia haamatau oioi i te rave i te mau faafaaearaa tano. E tia na mua e ia papu ia outou iho i te faufaaraa o ta outou parau e ia mau i roto i te feruriraa o te feia e faaroo nei ia outou. Ia aˈo te hoê metua vahine i ta ˈna tamarii, e haamata na mua oia i te parau i te hoê mea o te tapea i to ˈna ara-maite-raa. Eita o ˈna e faahiti faahou i te hoê parau tae roa i te taime e faaroo maite te tamarii. E i muri iho e faahiti oia i te parau i roto i to ˈna mafatu. Te hinaaro nei oia e papu e ua taa anei i te tamarii i ta ˈna mau parau e e haamanaˈo anei oia.

¹⁵ Te vai ra te mau taata o te ore roa e faafaaea, i roto atoa i ta ratou mau aparauraa i te mau mahana atoa. Mai te peu e tera to ratou fifi, mea maitai ia haamatau i te rave i te mau faafaaearaa; e maitai mai te aravihi o ta outou taviniraa. I roto i te pororaa, e paraparau tatou i nia i te toparaa reo o te aparauraa. E tia ia tatou ia ite ihea roa e tia ˈi ia faafaaea ia ore te taata e faaroo ra ia tâpû i ta tatou parau, ia tiai râ i muri iho. Ia aravihi atoa ïa tatou no te rave i te mau faafaaearaa i roto i te aparauraa e na mua mai. I roto i na tupuraa e piti, e huru faufaa to te mau faafaaearaa o te haamaitai te taata o te faaohipa ra.

¹⁶ Te tahi atu fifi, ia rahi anaˈe ta tatou parau te tia ia faaruru no te rave i te mau faafaaearaa tano. Eiaha e faateimaha roa i ta outou oreroraa parau. A rave i te taime no te faafaaea rii; mea faufaa roa.

17-21. A faataa i te faufaaraa o te mau faafaaearaa no te faatomaraa.

¹⁷ Faafaaearaa no te faatomaraa. Te tumu o te mau faafaaearaa no te faatomaraa no te haamaramarama ˈtu â ïa te manaˈo. E haamatarahia te mau manaˈo te tahi i muri aˈe i te tahi, e faataa i te mau pereota e te mau anairaa pereota e e faaite i te hopea o te paratarapha. Mea pinepine, e navai noa te haamǎrûraa i te reo, i te rahiraa râ o te taime, o te mau faafaaearaa tei riro ei faatomaraa na roto i te parau o te oreroraa. I te mea e e mau tapao taa ê te toma e te temitoro, oia  atoa e ere hoê â huru te mau faafaaearaa o teie mau tapao.

¹⁸ E nehenehe te hoê faafaaearaa hape e taui roa te auraa o te hoê pereota. Te horoa ra te mau parau a Iesu i papaihia i roto i te Luka 23:43 i te hoê hiˈoraa maitai: “E parau mau ta ˈu e faahiti ra i teie mahana: Ei te paradaiso ïa oe e o vau.” Mai te peu e e tauihia te temitoro aore ra te faafaaearaa no te tuu na mua ˈˈe “i teie mahana” maoti i te tuu i muri iho, e taui roa ïa te manaˈo; e rave rahi mau huriraa tei faatupu i taua hape ra. Te ite nei tatou e mea faufaa te mau faafaaearaa no te faataa maitai ia tatou.

¹⁹ Ia faatura outou i te faatomaraa i papaihia ia taio outou, e haapii outou e nafea ia faatoma i te parau i roto i ta outou oreroraa parau tei faatanohia i te reira iho â taime. O te toma anaˈe te tapao faatomaraa te nehenehe i te tahi taime e haamoe i roto i te taioraa. I roto i taua tupuraa ra, na te taata taio e maiti ihea oia e faafaaea ˈi. Tera râ, e tia ia faaturahia te mau temitoro, te mau periota, te mau tapao no te paraparau, te mau irava.

²⁰ Ia taio outou i te hoê parau papai aore ra te hoê tuhaa o te Bibilia, e manaˈo paha outou e e mea faufaa ia tapao i te mau irava i papaihia. A tuu i te hoê reni i rotopu i te mau pereota te tia ia faataa-ê-hia e te tahi faafaaearaa iti (noa ˈtu e mea poto) e e piti reni aore ra te hoê “X” i te vahi e faafaaea maoro aˈe.

²¹ Tera râ, mai te peu e i roto i ta outou faaineineraa i te taioraa, e ite outou i te tahi mau pereota fifi e e faafaaea noa outou i te vahi tei ore i tano, a faatuati e te hoê tapao e te penitara i te mau parau atoa e riro ra ei tuhaa o te pereota. Ia taio anaˈe outou, eita outou e faafaaea aore ra e haamarirau na mua ˈˈe outou e tapae atu ai i te parau hopea tei taatihia. E rave rahi feia orero aravihi o te faaohipa nei i taua raveraa ra.

22-24. No te aha e titauhia ˈi ia faafaaea no te tapao i te hoê tauiraa manaˈo?

²² Faafaaearaa no te tauiraa i te manaˈo. Ia ouˈa-anaˈe-hia i te manaˈo matamua i te tahi atu, e vaiiho te faafaaearaa i te taime no te feia e faaroo ra ia feruri. E ape te reira i te mau parau e piti auraa. E horoa oia i te taime i te feia i putuputu mai ia faaafaro i to ratou mau manaˈo, ia taa e te tupu nei te hoê tauiraa e e vauvauhia te hoê manaˈo apî. Mai te hoê taata faahoro pereoo e tia ia ˈna ia haere mǎrû no te hoê tipuuraa, oia atoa te taata orero e tia ia ˈna ia faafaaea na mua ˈˈe e omua ˈtu i te hoê tuhaa taa ê.

²³ I roto i te hoê oreroraa parau tei faatanohia i te reira iho â taime, e tia ia faanaho i te tabula ia nehenehe e faafaaea i rotopu i te mau manaˈo matamua. Ma te ore e faaea aore ra ma te tapea i te hoêraa o te oreroraa parau, e nehenehe outou  e faarahi i te manaˈo, e aratai i to ˈna vahi hopea, e e faafaaea na mua ˈˈe e haere atu ai i te manaˈo i muri iho. Ia hinaarohia, e nehenehe outou e tapao i taua mau tauiraa manaˈo ra i nia i ta outou tino parau no te faahaamanaˈo ia outou ihea roa e faafaaea ˈi.

²⁴ I te rahiraa o te taime, mea roa ˈˈe te hoê faafaaearaa e tapao ra i te hoê tauiraa manaˈo i te hoê faafaaearaa no te faatoma. Teie nei râ, eiaha e faarahi i te mau faafaaearaa roa roa, aita anaˈe e maoro roa ïa ta outou faaiteraa, e e manaˈohia ïa e te hinaaro nei outou e huti i te ara-maite-raa i nia ia outou.

25-28. A faaite e nafea te mau faafaaearaa ia tauturu ia tatou ia haamatara i te hoê tuhaa e ia faaruru i te mau huru tupuraa taa ê.

²⁵ Faafaaearaa no te haamatara i te parau. Ua riro te faafaaearaa no te haamatara i te parau ei faafaaearaa o te haaferuri. E hinaaro te feia i putuputu mai e taa eaha te manaˈo i muri iho e horoa te reira i te taime no te feruri.

²⁶ E tapea te hoê faafaaearaa i muri aˈe i te hoê faahitiraa faufaa i te feruriraa o te feia e faaroo ra i roto i te hoê tupuraa maitai. E horoa te hoê taime faaearaa i muri aˈe i te hoê manaˈo mai te reira i te feia i putuputu mai i te taime no te faaôraa i roto i te feruriraa. Te reira na faaohiparaa e piti o te faafaaearaa i roto i te hoê oreroraa, e i roto i te tupuraa atoa, e tia ia outou ia maiti teihea ta outou e rave aore ra mai te peu e e tia ia faaohipa toopiti atoa ra.

²⁷ E taotiahia te mau faafaaearaa no te haamatara i te parau, i te mau manaˈo tumu, aita anaˈe, e erehia i to ˈna faufaa.

²⁸ Faafaaearaa e faahepohia e te mau tupuraa. I te tahi taime, e tia i te taata orero ia faaea i te paraparau maa taime rii no te tahi arepurepuraa. Mai te peu e aita i rahi roa, mea au aˈe ïa ia haapuai i te reo e ia tamau â i te parau. Mai te peu râ e aita te feia i putuputu mai e faaroo faahou ra ia outou no te rahi o te maniania, mea au aˈe ïa ia faafaaea. E haamauruuru te feia i putuputu mai ia outou. Inaha, eita ratou e faaroo faahou ia outou no te mea te haapeapeahia ra ratou e te maniania. A faaohipa i te mau faafaaearaa ma te aravihi, no te papu e te fanaˈo rahi nei te feia i putuputu mai i te mau parau maitatai ta outou e hinaaro ra e faaite ia ratou.

[Uiraa haapiiraa]