Haapiiraa 28

Taairaa e te feia e faaroo ra e faaohiparaa i te mau nota

1. A faataa i te faufaaraa o te taairaa e te feia e faaroo ra e eaha te tuhaa ta te faaohiparaa i te mau nota e hauti ra i roto i taua vahi ra.

 ¹ E faaohie te hoê taairaa maitai e te feia e faaroo ra i ta outou haapiiraa. E noaa ia outou i to ratou faatura e e nehenehe outou e haapii ma te aravihi atu â. Na ta outou aparauraa e te feia i putuputu mai e faatupu i te taairaa piri roa e o ratou e nehenehe atu ai outou e ite oioi i to ratou mau huru atoa. Na te huru faaohiparaa i ta outou mau nota e faaite e teihea roa te faito o ta outou taairaa e te feia e faaroo ra. E riro te mau nota e rave rahi roa faataaraa ei patu, e ere râ to ratou faaohiparaa aravihi i te mea huru ê, noa ˈtu e e titau te mau huru tupuraa e ia  roa rii aˈe i tei matauhia. E tupu te reira ia ore te hoê taata orero aravihi e hiˈo pinepine i ta ˈna mau nota eiaha atoa i te mau taime tano ore. E tuatapapahia taua tapao ra i nia i ta outou api iti Aˈoraa no te oreroraa i te tumu parau ra “Faatupuraa i te taairaa e te feia e faaroo ra, faaohiparaa i te mau nota.”

2-5. E tupu te hoê taairaa maitai ma te hiˈo i te feia e faaroo ra, maoti te aha?

² Taairaa ma te hiˈo i te feia e faaroo ra. Oia hoi te auraa, te ite nei outou i te feia e faaroo ra. Eita outou e hiˈo noa i to ratou ra pae, e hiˈo râ outou i te feia tataitahi i putuputu mai. E hiˈopoa outou i to ratou hohoˈa mata e e faatano outou i te parau.

³ Eita e navai noa i te mau hautiutiraa upoo ma te hiˈo na mua i te hoê pae o te piha, e i muri iho i te tahi pae. A hiˈo i te hoê noa taata e a paraparau ia ˈna na roto i te tahi pereota, e a hiˈo atu i te tahi e a paraparau atu i te tahi taime. Eiaha râ e hiˈo tamau i te hoê taata e ia huru ê roa oia. Eiaha e maiti i taua noâ taata e faaroo ra. A haaati i te taatoaraa o te feia e faaroo mai te reira, a horoa râ i to outou ara-maite-raa ma te roa ˈˈe i nia i te hoê taata no te paraparau atu ia ˈna e no te hiˈo i to ˈna huru. E a maiti atu i te tahi. E tuu outou i ta outou mau nota i nia i te pupiti, i roto i ta outou Bibilia, aore ra e tapea noa outou i roto i to outou rima ia nehenehe outou e hiˈo oioi na roto noa i te tahi amoraa mata. Mai te peu e e tia ia outou ia piˈo i te upoo i raro no te hiˈo i ta outou tino parau, e huru ê ïa outou e e motu te taairaa e te feia e faaroo ra.

⁴ E hiˈopoa te taeae e aˈo nei ia outou ehia taime outou e hiˈo ai i ta outou mau nota e oia atoa eaha te taime ta outou i maiti no te hiˈo atu. Mai te peu e e tiatonu noa to outou mata i nia i ta outou tino parau ia faataa outou i te hoê tuhaa faufaa, eita ïa outou e ite i te huru o te feia e faaroo ra. Oia atoa, mai te peu e e hiˈo pinepine outou i ta outou mau nota, e ore ïa te taairaa e te feia e faaroo ra. No roto mai taua paruparu ra i te hoê peu huru ê aore ra te erehia ra i te faaineineraa.

⁵ E titauhia i te tahi taime i te mau taata orero aravihi ia horoa i te hoê oreroraa tei papai-taatoa-hia. Papu maitai, e taotia te reira i to ratou taairaa ma te hiˈo i te feia e faaroo ra. Teie râ, mai te peu e maoti te hoê faaineineraa maitai, ua matau maitai ratou i te mau manaˈo, e nehenehe ïa ratou e hiˈo i te feia e faaroo ra i te tahi taime ma te ore e moe ia ratou i te tereraa o te oreroraa parau. E faaoraora te reira i ta ratou taioraa.

6-9. Eaha te tahi atu ravea no te taai atu e te feia e faaroo ra, e e tia ia haapao maitai i teihea fifi?

⁶ Taairaa na roto i te hoê oreroraa parau manaˈo afaro. E faufaa atoa to te reira mai te taairaa ma te hiˈo mata roa ˈtu. E tano no te mau parau ta outou e faaohipa no te paraparau i te feia e faaroo ra ia outou.

⁷ Ia paraparau outou i te hoê taata taa maitai, e faahiti outou i te parau ra “outou” e “ta outou” aore ra “tatou” e “ta tatou.” Ia tano anaˈe, e nehenehe outou e na reira ia paraparau outou i te hoê pǔpǔ taata. A rave mai te mea ra e o te hoê anairaa aparauraa ta outou oreroraa parau e te hoê aore ra e e piti taata i  te hoê â taime. A hiˈopoa maite i te feia e faaroo ra ia outou ia nehenehe outou e pahono mai te mea ra e ua paraparau mai iho â ratou. I reira, e faatano ïa outou i ta outou faaiteraa i te taata iho.

⁸ E tia râ ia haapao maitai. Eiaha e faatupu i te auraa matau aore ra piri roa e te feia e faaroo ra i ta outou aparauraa e e hoê aore ra e piti taata i te hoê uputa i te roaraa o ta outou ohipa pororaa. Teie nei râ, e nehenehe outou e e tia ia outou ia horoa i te manaˈo afaro.

⁹ Te tahi atu hape te tia ia ape, o te faaohiparaa ïa ma te tano ore i te mau mono iˈoa o te faahape i te hiˈoraa o te feia e faaroo ra ia outou. Ei hiˈoraa, mai te peu e e paraparau outou no nia i te auraro-ore-raa o te mau taata, eita ïa outou e faaohipa i te mau mono iˈoa o te faanaho i te feia e faaroo ra i roto i te pǔpǔ o te mau taata auraro ore. Oia atoa, mai te peu e, i roto i te hoê putuputuraa o te taviniraa, e tia ia outou ia paraparau no nia i te paruparu o te mau hora, mea maitai ia faaohipa i te mono iˈoa “tatou” maoti i te mono iˈoa “outou.” E ape ïa outou i te tahi mau hape rii mai te peu e e haapao maitai outou e e tâuˈa outou i te huru o te feia e faaroo ra ia outou.

**********

10, 11. Na te aha e faaitoito ia tatou ia haapii i te faaohipa i te hoê tino parau?

¹⁰ Faaohiparaa i te tino parau. Mea iti roa te feia orero apî o te nehenehe e paraparau e te tauturu o te hoê tino parau. I te rahiraa o te taime, e papai pauroa ratou i ta ratou oreroraa parau e e taio ratou aore ra e faahiti ratou ma te tamau aau. I te omuaraa, eita te taeae aˈo e parau atu ia outou no nia i taua tapao ra, ia tae anaˈe râ outou i te tapao “Faaohiparaa i te tino parau” o te api iti Aˈoraa no te oreroraa, e faaitoito oia ia outou ia paraparau e te tauturu o te mau nota. Ia tapae anaˈe outou, e taa ia outou e e taahiraa avae rahi ta outou i rave no te riro mai ei taata orero i mua i te taata.

¹¹ Te vai ra te mau tamarii e te mau taata paari e aita ratou i ite i te taio, te faahiti nei râ ratou i te tahi mau oreroraa parau ma te faaohipa i te mau faaauraa parau o te horoa mai i te tahi mau manaˈo. E nehenehe outou e faaineine i ta outou oreroraa parau ma te faaohipa i te hoê tino parau ohie, mai ta te mau faaiteraa bibilia o ta outou e ite ra i roto i Te taviniraa o te Basileia. I roto i te ohipa pororaa, e pinepine outou i te paraparau ma te ore e faaohipa i te parau papai. E nehenehe atoa outou e na reira i te haapiiraa ia rave anaˈe outou i taua faaotiraa ra.

12, 13. A horoa i te tahi aˈoraa no nia i te huru faaohiparaa i te hoê tino parau.

¹² I te mea te parau i ǒ nei o te vaiihoraa ïa i te mau parau papai i roto i te faaineineraa e te faaiteraa o ta outou oreroraa parau, eiaha e tamau aau i ta outou oreroraa parau. Eita outou e apee i te tapao o taua Haapiiraa ra.

¹³ Mai te peu e e faahiti outou i te tahi mau irava bibilia, e  nehenehe outou e uiui i teie mau uiraa: Nafea? O vai? Afea? Ihea? e te vai atu â, e e faaô i roto i ta outou mau nota mai te peu e e tano i nia i ta outou oreroraa parau. Ia faahiti anaˈe outou i ta outou oreroraa parau, e taio noa ïa outou i te irava bibilia, e ani i te mau uiraa, i roto noa i te feruriraa aore ra i te taata e faaroo ra ia outou, e e pahono atu. E ere i te mea fifi roa i tei manaˈohia!

14, 15. Eaha te mea o te ore roa ˈtu e faatoaruaru ia tatou?

¹⁴ E pinepine e mǎtaˈu te taata orero apî ia moe ia ˈna i te tahi mea, mai te peu râ e e faataa outou i ta outou oreroraa parau ma te nahonaho maitai, eita hoê aˈe taata e ite e ua moe ia outou i te hoê manaˈo i faanahohia i roto i ta outou mau nota. I teie nei râ taime, e ere ta outou tapao matamua ia ara i te vauvauraa i te parau, o te aravihi râ ia paraparau e te tauturu o te hoê tino parau.

¹⁵ Peneiaˈe te manaˈo nei outou e ia paraparau outou e te tauturu o te mau nota te ere nei outou i te tahi mau huru maitatai tei roaa aˈena ia outou. Eiaha e haapeapea. E hoˈi faahou mai taua mau huru ra, e e faaohipa maitai aˈe outou ia nehenehe outou e paraparau aita anaˈe e parau papaihia.

16, 17. Eaha te tia ia tatou ia haamanaˈo ia faaineine anaˈe tatou i ta tatou mau nota?

¹⁶ Te tahi mau taˈo iti no nia i te mau nota e faaohipahia no te mau oreroraa parau e horoahia i te Haapiiraa o te taviniraa. E horoa noa ratou i te tahi mau manaˈo, eita râ e faahiti taatoa roa ˈtu. A faaohipa i te hoê tino parau haapotohia. E ia mâ atoa, nahonaho maitai, e e nehenehe e taiohia. Mai te peu e e oreroraa parau no te hoê hoˈi-faahou-raa e farerei, e haapoto outou i ta outou mau nota ia nehenehe te reira e ô i roto i ta outou Bibilia. Ia paraparau outou na mua mai, eita ta outou mau nota e riro ei fifi. Mai te peu e aita outou i ite i roto i teihea huru tupuraa outou e paraparau ai, a faanaho maitai ia outou.

¹⁷ Mea faufaa atoa ia papai i te upoo parau o te oreroraa parau i te omuaraa o ta outou mau nota. Ia matara maitai te mau manaˈo matamua i nia i ta outou tino parau. A papai orarahi atu aore ra a reni i te reira.

18, 19. Nafea tatou ia faaineine ia tatou no te faaohipa i te hoê tino parau?

¹⁸ E ere no te mea e te faahiti nei outou i ta outou oreroraa parau e te tauturu o te tahi noa maa nota iti, e nehenehe ïa outou e haapoto i ta outou faaineineraa. A faaineine na mua i ta outou oreroraa parau i roto i te mau tuhaa iti haihai atoa, e i muri iho a papai i te taatoaraa o te parau o ta outou e hinaaro ra. I muri iho, a papai i te piti o te tino parau ma te poto rii aˈe. O te reira ta outou e faaohipa no te faahiti i ta outou oreroraa parau.

¹⁹ No te faaineine ia outou, a tuu i na tino parau e piti i mua ia outou. A hiˈo i te tino parau i haapotohia e a parau i ta outou e nehenehe no nia i te manaˈo faufaa matamua. A hiˈo i muri iho i te tino parau tei papai-taatoa-hia no te ite mai te peu e ua moe ia outou i te hoê mea. E i muri iho a haere i te piti o te manaˈo i nia i ta outou tino parau i haapotohia e a faaohipa i te hoê â  raveraa. Maoti teie ravea, e mau maitai ia outou i ta outou oreroraa parau e e navai noa e ia hiˈo outou i ta outou tino parau haapotohia no te haamanaˈo i te mau tuhaa atoa o te tino parau tei papai-taatoa-hia. Na te faaohiparaa e te aravihi e rave e ia haafaufaa outou i te mau haamaitairaa o te faatanoraa i te parau e e fatata roa e hinaaro outou e taio i te hoê parau papai mai te peu noa e e titauhia. E ohie aˈe outou i te horoa i ta outou oreroraa parau e e faaroo te feia i putuputu mai ia outou ma te faatura rahi.

[Uiraa haapiiraa]