Haapiiraa 25

Taioraa e faaohiparaa i te mau irava

1-3. Ia horoa tatou i te tahi oreroraa parau, nafea tatou ia taio i te mau irava bibilia?

 ¹ Ia paraparau outou ia vetahi ê no nia i te mau opuaraa a te Atua, o orua anaˈe iho aore ra na mua mai, tei nia ïa ta outou aparauraa i te mau irava ta outou e taio ra i roto i te Bibilia. E tia ia outou ia taio maitai. Eiaha roa ia taio ma te tâuˈa ore. Taa ê atu, ia tapae taua taioraa ra i nia i ta ˈna tapao, e hopoi mai ïa oia i te hoê anaanataeraa apî i ta outou faahitiraa. No reira, te vai ra i roto i te api iti Aˈoraa no te oreroraa i te tuhaa “Irava i taiohia ma te faatano i te reo” o te huti taa ê i te ara-maite-raa o te feia e hinaaro ra e riro ei tavini aravihi.

² Ia taiohia te mau irava ma te manaˈo putapû, eiaha râ ia faarahi roa. Tei te huru ïa o te irava te manaˈo putapû e to ˈna vahi i roto i te oreroraa parau. E faateitei te taioraa o te mau irava i ta tatou mau haapapuraa eita râ e huti i te ara-maite-raa i nia i te taata taio.

³ Hau atu, e haamatara te reira i te tuhaa o te irava e faataa ra i te haapapuraa. E faataahia te manaˈo e paraparauhia ra no te haaputapû i te feia e faaroo ra. E horoa mai te irava i taiohia ma te faatano i te reo i te tiaturiraa. E faarahi te hoê taioraa maitai i te faufaaraa o te faahitiraa.

4, 5. Eaha ta tatou e taa ra na roto i te parau “Haapapuraa i te mau taˈo faufaa?” A horoa i te hoê hiˈoraa.

⁴ Haapapuraa i te mau taˈo faufaa. Na te tumu tatou e faahiti ai i te hoê irava e faataa eaha te taˈo te tia ia haapapuhia. Mai te peu e e haapapuhia te mau taˈo atoa, eita ïa hoê e matara mai e e erehia ïa ta tatou haapapuraa. Ia papu ia outou  te mau parau o te faaite ra i te manaˈo ta tatou e hinaaro ra e haamatara.

⁵ Ei hiˈoraa, ia faaite outou i te Ezekiela 18:4 no te haapapu e eita te hara e aratai i te mau haamauiuiraa mure ore, i te pohe râ, e taio ïa outou mai teie te huru: “Te taata o te hara, oia te pohe,” ma te haapapu taa ê i te taˈo i faaopahia. Tera râ, mai te peu e te hinaaro nei outou e faaite e ere noa te tino o te pohe, o te taata râ, e haapapu ïa outou i te tahi mau taˈo, ma te taio mai teie: “Te taata o te hara, oia te pohe.” E maitihia te mau taˈo e haapapuhia ia au i te tumu o te irava.

6-12. Nafea tatou e nehenehe ai e haapapu i te mau taˈo o te irava e faataa ra i te manaˈo matamua?

⁶ Ravea maitai i faaohipahia. E rave rahi mau ravea no te haapapu i te mau taˈo e faaite ra i te manaˈo tumu. Ia maitihia ïa te ravea ia au i te irava i faaitehia e te huru tupuraa tatou e faahiti ai i te oreroraa parau.

⁷ Eita e haapaohia i te mau ravea atoa no te haapapu i roto i te huru aravihi o te paraparauraa e te tuhaa “Irava i taiohia ma te faatano i te reo.” E hiˈopoa outou i taua tuhaa ra ma te hohonu atu â ia haapii outou no nia i te toparaa reo o te oreroraa. Te horoa ˈtu nei matou i ǒ nei i te tahi mau ravea no te tauturu ia outou ia taio ma te aravihi i te mau irava bibilia ta outou e faahiti.

⁸ Te toparaa reo. O te mau tauiuiraa atoa i te pae o te reo, o te rahiraa parau aore ra te puairaa o te reo no te haamatara na roto i te toea o te pereota i te mau taˈo e faaite ra i te manaˈo.

⁹ Te mau faafaaearaa. E nehenehe e faaea na mua aore ra i muri aˈe i te tuhaa matamua o te irava, i roto atoa i na tupuraa e piti. Ia faatupu-oioi-hia i te hoê faafaaearaa na mua ˈˈe e taio ai i te manaˈo matamua, e faaara tatou i te anaanatae; ia faatupu tatou i te hoê faafaaearaa i muri aˈe i te taioraa, e haamaraa tatou i te ohipa e titauhia ra e te taioraa.

¹⁰ Faahiti-faahou-raa i te mau parau. E nehenehe e haapapu vetahi mau parau ma te tâpû i te taioraa e ma te taio-faahou-raa i te hoê taˈo aore ra i te hoê pereota. Teie nei râ, eiaha e faaohipa pinepine i teie ravea.

¹¹ Te mau aparaa rima. E pinepine e tauturu te mau hautiutiraa o te tino e te hohoˈa mata ia tuu i te tapao i nia i te hoê taˈo aore ra i te hoê pereota.

¹² Tauiraa o te taˈiraa reo. I te tahi taime, e faaohipahia taua ravea ra no te haamatara i te auraa o te hoê taˈo, i reira e tia ia faaohipa ma te haapao maitai, mai te peu iho â râ e tia ia taio ma te huru faaooo rii.

13, 14. Ia taio te hoê taata i te hoê irava, nafea tatou e nehenehe ai e haapapu i te mau taˈo faufaa?

¹³ Te mau irava e taiohia e te taata. Ia horoa outou e na te taata e taio i te hoê irava, e taio o ˈna ma te ore e haapapu aore ra e haapapu o ˈna i te vahi tano ore. Eaha te tia ia rave  i roto i taua tupuraa ra? I te rahiraa o te taime, mea maitai aˈe ia haamatara i te mau tapao ma te faataa ˈtu i te irava. Ia oti anaˈe te taioraa a te taata, e nehenehe outou e huti i to ˈna ara-maite-raa i nia i te mau parau faufaa ma te faahiti-faahou-raa aore ra ma te ui i te tahi mau uiraa i nia i taua tumu parau ra.

¹⁴ Te vai atoa ra te tahi atu ravea, ia faaohipa i te reira ma te haapao maitai e te faaau ohie. Na roto ïa i te tâpûraa i te taioraa a te taata i te hoê vahi tano, ma te parau i te taata e eiaha e inoino e ia huti i to ˈna ara-maite-raa i nia i te taˈo aore ra i te pereota ta outou e hinaaro ra e haapapu. Mea aravihi taua ravea ra eiaha râ e faahuru ê aore ra e faariri i te taata. Eiaha e faaohipa pinepine i taua ravea ra.

**********

15-17. No te aha e mea faufaa ia faataa maitai i te faaohiparaa i te mau irava?

¹⁵ Eita e navai i te taio-noa-raa i te hoê irava, noa ˈtu e e haapapuhia no te tapae i nia te tapao e titauhia ra. Oia mau, e faaohipahia i te tahi taime i te irava iho no te faatano i te manaˈo o ta outou faataaraa. Mea pinepine râ, e tia e ia huti-faahou-hia i te ara-maite-raa o te taata i nia i te mau parau e faaite ra i te manaˈo matamua e ia faatuati i nia i te tumu parau e tuatapapahia ra. No reira te vai ra te tapao “Faaohiparaa i te mau irava tatara-maitai-hia” i nia i te api iti Aˈoraa no te oreroraa. Eiaha ia moehia e aita te rahiraa o te mau taata i ite i te Bibilia e nehenehe e taa i to outou manaˈo na roto i te hoê noa taioraa. E horoa te faataaraa i te tahi mau taˈo faufaa e nafea ia faaohipa i te ravea i te feia e faaroo ra ia taa i te manaˈo.

¹⁶ No te faatano maitai i te hoê irava, ia tuati ïa oia e te tumu parau e i te rahiraa o te taime, ia aratai-maitai-hia oia. Ma te haapao i te aravihi o te haapiiraa, e hinaaro outou i muri iho e rave i te hoê faatanoraa ohie roa ˈˈe.

¹⁷ Hau atu, ia taa maitai râ ia outou iho i te irava, e nehenehe ïa outou e faataa ˈtu ma te papu. A haapao i te mau irava na pihai iho, te tahi mau faaueraa tumu o te ô i roto, e ia titauhia te feia atoa e ô ra i roto. Eiaha roa ˈtu e parau i ta te taata papai e ore e parau ra. I roto i te faatanoraa i te tahi mau irava, a apee maite i te mau buka a te Taiete.

18. Nafea tatou e nehenehe ai e haamatara i te mau taˈo faufaa no te faaohipa?

¹⁸ Haamatara i te mau taˈo tumu. Na mua ˈˈe aore ra i muri aˈe i te faatanoraa i te irava, e tia e ia haamatarahia i te mau taˈo tumu. E tuuhia ïa i te piti o te parahiraa te mau parau atoa o te ore e tuati e te tuhaa o ta outou e hinaaro ra e haapapu. I te tanoraa mau, e na reirahia na roto i te faahiti-faahou-raa i te mau taˈo e vai ra i roto i te irava, e tapae râ tatou na roto i te tahi atu mau ravea. I roto i te tahi mau tupuraa,  e nehenehe outou e haamatara i te manaˈo matamua ma te ore e faahiti faahou i te mau parau o te irava. E faaohipa ïa outou i te mau parau hoê â auraa, na roto atoa i te aniraa i te tahi mau uiraa. Ia paraparau outou i te hoê noa taata, e nehenehe ta outou mau uiraa e turai ia ˈna ia parau i te mau manaˈo tumu.

19-22. Eaha ta tatou e taa ra na roto i te parau “A haapapu faahou â i te tumu o te irava?”

¹⁹ A haapapu faahou â i te tumu o te irava. No te ite noa e ua taa-papu-hia te tumu outou i faahiti ai i taua irava ra. Peneiaˈe no te tahi atu tumu, aita outou i manaˈo e aratai i te irava na roto i te hoê omuaraa parau. E ere ïa i te auraa e eiaha e faataa no te aha outou i faahiti ai i te irava. I te rahiraa o te taime, e aratai outou i te irava na roto i te omuaraa parau, e i muri aˈe i te taioraa o te irava, e tia ia haapapu faahou â i te tumu o taua faahitiraa ra.

²⁰ Tei te huru ïa o te feia faaroo te aanoraa o te faatanoraa te faufaaraa o te manaˈo ia faaauhia i te toea o te oreroraa parau. I te rahiraa o te taime, aita e navai noa i te faataa poto noa i te irava. Ia faaitehia râ i te tuatiraa i rotopu i te mau manaˈo i parauhia i roto i te irava i faahitihia e te haaferuriraa tei faataahia i roto i ta ˈna omuaraa parau. Ia haapapu-maitai-hia te taairaa.

²¹ E ohie noa outou i te tapae i taua tapao ra mai te peu e e ere i te mea fifi ta outou faaohiparaa i te irava. Eiaha e faarahi i te mau parau rii o te ore e tuati i te tumu parau. A haapoto i te haaferuriraa i nia i te mau parau faufaa roa e a amui noa mai i te mau parau hinaarohia no te faataa ia ratou. Ia vaiiho outou i te hoê uiraa ma te ore e pahonohia ia omua outou i te irava, e tia ia outou ia pahono ia faatano anaˈe outou i te irava.

²² Ia tapae outou i teie vahi o te porotarama o te Faaineineraa tamau i roto i te aravihi no te paraparau, e imi na mua outou i te ohie e eiaha e ape i te parau i roto i ta outou oreroraa. Ia tapae anaˈe outou, e faaite mai ta outou taioraa e ta outou faaohiparaa i te mau irava bibilia e e taata haapii aravihi outou e te paari.

[Uiraa haapiiraa]