Haapiiraa 30

Tatararaa au maitai o te hoê oreroraa parau

1-3. Eaha te tuhaa ta te au-maitai-raa e hauti ra i roto i te hoê oreroraa parau, e nafea ia roaa ia tatou i taua huru ra?

 ¹ E au maitai te hoê oreroraa parau ia nehenehe anaˈe te feia e faaroo ra e apee ma te ohie. Teie nei râ, ia erehia taua huru ra, eita oia e tapea maoro i te ara-maite-raa o te feia i putuputu mai. O te hoê ïa uiraa o te tia ia huti i to outou ara-maite-raa taatoa ia faaineine anaˈe outou i te hoê oreroraa parau; no reira ua faataa-ê-hia te tapao “Au-maite-raa maoti te mau taˈo faatuatiraa” i nia i te api iti Aˈoraa no te oreroraa.

² Te au-maite-raa o te tuatiraa ïa aore ra te tahoêraa papu i rotopu i te mau tuhaa na roto i te hoê faataaraa taa maitai. I te tahi taime, e au maite te hoê oreroraa parau na roto noa i te tereraa nahonaho o ta ˈna mau tuhaa tataitahi. Teie nei râ, aita e navai noa te faanahoraa i te mau manaˈo no te faariro i te hoê oreroraa parau ei huru au maitai. Te vai atoa ra te tahi mau eˈaturu no te faatuati te hoê tuhaa o te oreroraa parau i to muri iho. Mea titauhia te tahi mau taˈo aore ra te tahi mau pereota no te faaite i te tuatiraa i roto i te hoê manaˈo apî e te manaˈo i mahemo aore ra no te tapao i te hoê tauiraa te huru hiˈoraa aore ra te taime. E roaa mai te au-maite-raa na roto i te mau taˈo faatuatiraa.

³ Ei hiˈoraa, e mau tuhaa taa maitai te omuaraa parau, te tino, e te faahopearaa o te oreroraa parau. Tera râ, e tia ia tahoêhia ratou e te tahi mau taˈo arai. Oia atoa, e tahoêhia te mau manaˈo matamua o te hoê oreroraa e te mau taˈo arai, ia ore iho â râ te taairaa i rotopu ia ratou e ite-oioi-hia. I te tahi taime, e titau-atoa-hia e ia taaihia te tahi mau pereota aore ra te tahi mau paratarapha na roto i te tahi mau taˈo tuatiraa.

4-7. Eaha te tia ia taa na roto i te parau ra faaohipa i te mau taˈo arai?

 ⁴ Faaohiparaa i te tahi mau taˈo arai. No te faatuati i te mau manaˈo te tahi e te tahi, e navai noa i te tahi taime ia faaohipa i te hoê taati parau aore ra te hoê atiraa parau no te taati aore ra piri-ihoparau, mai te parau ra oia hoi, hau atu, oia atoa, inaha, no reira, i te mea hoi e, oia, tera râ, teie nei râ, i reira iho, i muri aˈe, e te vai atu â. Mea faufaa taua mau taˈo ra no te faatuati e piti pereota aore ra e piti paratarapha.

⁵ Mea pinepine râ e titau te au-maite-raa hau atu i te hoê noa taˈo tuatiraa. Aita anaˈe e navai te hoê taˈo aore ra i te hoê atiraa parau, e tia ïa ia tauturu i te feia e faaroo ra ia ouˈa mai te hoê manaˈo e tae atu i te tahi na roto i te hoê aore ra e rave rahi pereota no te faataa.

⁶ Te hoê ravea o te faaôraa ˈtu ïa te faataaraa o te manaˈo na mua ˈtu i roto i ta tatou e omua i muri iho. E pinepine tatou i te faaohipa i taua ravea ra i roto i ta tatou mau faaiteraa i tera e tera fare.

⁷ Eiaha noa e faatuati i te mau manaˈo o te apee mai, te tahi taime i rotopu atoa i na manaˈo taa ê e piti. Ei hiˈoraa, e tia e ia tuati te parau hopea o te hoê oreroraa parau i te omuaraa. E nehenehe e faaohipa i te hoê manaˈo aore ra te hoê faaauraa parau i faahitihia i te omuaraa i roto i te parau hopea, no te turai ia rave i te hoê ohipa aore ra no te faaite eaha te tapao o te oreroraa parau. E faaohipahia te hoê faahiti-faahou-raa i teie manaˈo aore ra faaauraa ei faatuatiraa, e e tauturu atu no te au-maite-raa o te oreroraa parau.

8. No te aha tei te huru o te feia e faaroo ra te mau taˈo arai?

⁸ Mau arai e tano i te feia e faaroo ra. Tei te huru o te feia e faaroo ra te maitiraa i te mau taˈo arai. Oia mau, eita te feia e faaroo ra e nehenehe e faaore taatoa i te reira, e tia râ e ia faaohipa-rahi-roa-hia mai te peu e aita te feia e faaroo ra i matau maitai i te mau manaˈo e vauvauhia ra. Ei hiˈoraa, eita te hoê ite no Iehova e haamarirau i te faatuati i te hoê irava no te hopea o te amuiraa o te mau mea iino i te tahi no nia i te Basileia. Teie nei râ, eita te taata e faaroo ra o te manaˈo ra e e huru feruriraa noa aore ra e huru o te mafatu te Basileia, e taa ohie i te tuatiraa; e tia e ia faaô te taata orero i te hoê taˈo aore ra manaˈo faatuati no te haamaramarama i te reira. I mua i te uputa, e titauhia e ia na reira tatou.

**********

9-13. Eaha te hoê tatararaa ferurihia ma te ohie, e eaha na ravea tumu e piti no te tatara i te hoê manaˈo?

⁹ Ua faahiti-atoa-hia te tapao ra “Tatararaa aravihi e te tuea maitai” tei taai piri roa e teie huru maitai i te pae o te  oreroraa i nia i te api iti aˈoraa. O te hoê ïa titauraa matamua ia nehenehe te hoê oreroraa parau ia tiaturihia.

¹⁰ Eaha te huru feruriraa ohie? I ǒ nei, e nehenehe tatou e parau e o te aravihi no te feruri ma te tia. E faaohie oia i te maramarama, no te mea maoti te reira e ite ai tatou i te taairaa i rotopu i te mau tuhaa o te hoê anairaa parau. Na te huru feruriraa ohie e faataa e no te aha e ua amui-maitai-hia te taatoaraa o taua mau tuhaa ra. E tuea maitai te hoê tatararaa mai te peu e e haere mǎrû noa te haaferuriraa, e nehenehe atu ai te mau tuhaa atoa e taai te tahi i muri aˈe i te tahi ma te au maitai. No te faahiti noa i te tahi mau ravea, e nehenehe e vauvau i te mau manaˈo ma te feruriraa ohie ia au i te huru faufaa roa ˈˈe, ia au i te tupuraa i roto i te tau aore ra ma te horoa i te hoê fifi e te ravea no te faatitiaifaro.

¹¹ Te vai ra e piti ravea tumu no te tatara i te hoê manaˈo: 1) Te faaite-tahaa-roa ˈtu-raa i te parau mau, e te mau haapapuraa. 2) Te patoiraa i te hoê hape, na te reira iho e faaite i te parau mau. Aita ˈtu ïa ohipa a te taata orero o te faaiteraa e nafea ia faaohipa i te parau mau o te matara mai roto mai i ta ˈna oreroraa parau.

¹² E ere hoê â huru feruriraa to e piti taata orero. Te hoê hiˈoraa maitai roa no nia i te huru taa ê no te tatara i te hoê â tumu parau tei roto ïa i na Evanelia e maha. Ua papai na pǐpǐ e maha a Iesu i te mau aamu no nia i ta ˈna taviniraa te tahi i to ˈna aˈe pae. Ua taa ê na faatiaraa e maha; te vai nei râ i roto i te hoê huru feruriraa ohie e te au maitai. Te vauvau nei na papai evanelia tataitahi i te tumu parau no te tapae i nia i te hoê tapao taa maitai e te tapae nei iho â.

¹³ E tia e ia ite te taeae aˈo i te tapao o ta outou oreroraa parau e ia haafaufaa i ta outou haaferuriraa tano. No reira, e nehenehe outou e tauturu ia ˈna, e te feia e faaroo ra ia outou, ma te faaite i ta outou tapao i roto i ta outou omuaraa parau e ma te faaohipa i te reira i roto i ta outou faaotiraa.

14, 15. A faaite e no te aha e mea faufaa roa ia vauvau i te mau manaˈo na roto i te hoê anairaa au maitai.

¹⁴ A faanaho i te mau manaˈo ma te huru feruriraa ohie. Ia faanaho maitai outou i ta outou mau manaˈo aore ra ia faatia outou i te hoê tino parau, a haapapu na mua e na te mau manaˈo i na mua ˈtu e faaineine i te manaˈo i muri iho. A aniani noa i teie mau uiraa: Eaha te manaˈo e apee ohie nei i ta ˈu i vauvau atu? I teie vahi o ta ˈu tatararaa, eaha te uiraa o te ô ohie i roto i te feruriraa o te feia e faaroo ra? Ia oti anaˈe outou i te ani i teie mau uiraa, te toe nei  ïa te mau pahonoraa. E tia e ia parau noa te feia e faaroo ra ia outou e: “Ia au i te mea o ta oe i faataa na mua ˈtu, te taa ra ia ˈu ta oe tapao hopea nei.” Mai te peu râ e eita outou e faaineine i te mau manaˈo, e faaoti paha ïa te taeae aˈo e aita te mau tapao i tatarahia na roto i te hoê faanahoraa ohie e te toe ra te tahi mea.

¹⁵ Ia faaineine outou i ta outou mau manaˈo, a haapao i te mau manaˈo e taai ra te tahi e te tahi. A tutava no te ite i te mau tuhaa taa ê, e a faanaho ia ratou ma te tano. Hoê â huru e te hoê hamaniraa fare. O vai ïa tamuta o te faatia i te mau papai ma te ore e haamau na mua i te niu aore ra e tuu i te faataheraa pape i muri aˈe i te ohipa a te feia pate? E tia i te taata orero ia na reira atoa. E tia i te tuhaa tataitahi o ta ˈna oreroraa parau ia haapaari i te ohipa atoa; e apee te mau manaˈo o tei anai-maitai-hia, ma te turu i to na mua ˈtu e ma te faaineine i to muri iho. E tia e ia tano noa te anairaa manaˈo o ta outou e faanaho.

16-20. Nafea tatou e ite ai e ua tuea te mau manaˈo atoa o te hoê oreroraa e te tumu parau?

¹⁶ A ape i te mau manaˈo taa ê i te tumu parau. E tia e ia tuea te mau manaˈo atoa e faaohipahia i te tumu parau, aita anaˈe e riro vetahi ei mau parau tumu ore, te tano ore e te tuea ore.

¹⁷ Peneiaˈe i te hiˈoraa matamua aita te hoê manaˈo e tu ra i te tumu parau, e te vai nei râ te hoê tumu outou e faahiti atu ai. Eita ïa te taeae aˈo e ite i te fifi, ia tuea râ i te upoo parau e ia faaite atu outou ma te aravihi i te vahi tano maitai.

¹⁸ Nafea tatou ia taa ohie noa e ma te vitiviti i te hoê manaˈo e to ˈna taairaa e te tumu parau, ia faaineine tatou i te hoê oreroraa parau? I ǒ nei e itehia ˈi te faufaaraa o te tino parau e te mau manaˈo tumu. Na taua tino parau ra e tauturu ia outou ia faanaho i to outou mau manaˈo. A tapao atu i nia i te tahi mau api parau o ta outou e faanaho i muri iho na roto i te feruriraa ohie. E tauturu te reira eiaha noa ia opua nafea ia tatara i te tumu parau, ia ite atoa râ teihea roa te mau manaˈo o te ore e tuea i te upoo parau. Area te mau manaˈo te ore e nehenehe e faanahohia ia hiˈo-noa-hia ra e tauiui outou i te reira mai te peu e mea faufaa no ta outou faataaraa. Taa ê atu, a faaore atu no te mea aita e tuea ra i te tumu parau.

¹⁹ Na te upoo parau o ta outou oreroraa parau, tei maitihia ia au i te feia e faaroo ra ia outou e ta outou tapao, e faaite mai te peu e ua tuea te hoê manaˈo aore ra aita i te tumu  parau. No te huru tupuraa aore ra te mau ite o te feia e faaroo ra ia outou, e riro te hoê manaˈo i te mea faufaa aore ra aita e tumu. Tei te huru ïa o te feia e faaroo ra aore ra o te upoo parau.

²⁰ Ia au i tei parauhia na mua ˈtu, i roto i teihea faito e tia ia tatou ia faahohonu i te tumu parau? Eita e tano ia faaore i te hoê tatararaa feruri-ohie-hia e te tuea o te tahi mau manaˈo, no te paraparau noa no nia i te mau manaˈo atoa e tano ra i te upoo parau. Teie nei râ, mea au aˈe ia maiti i te hoê huru tupuraa o te faatia ia outou ia vauvau maitai i te rahiraa manaˈo, ia riro te oreroraa a te taata haapii ei tuhaa o te horoa i te hoê haapiiraa. Eita e nehenehe e tuu i te hiti te mau manaˈo tumu faufaa no te tatararaa i te tumu parau.

21. No te aha e mea faufaa ia ore e haamoe i te hoê noa ˈˈe manaˈo tumu?

²¹ Eiaha e haamoe i te hoê noa ˈˈe manaˈo tumu. Na te aha e faaite mai te peu e te hoê tuhaa o te hoê ïa manaˈo tumu? Mai te peu e eita outou e nehenehe e tapae i nia i ta outou tapao ma te ore e tatara i te hoê tuhaa, te auraa e manaˈo faufaa ïa te reira. E tano roa te reira no te feruriraa ohie e te au maite. Eaha ta outou e rave mai te peu e ei hiˈoraa, e patu te hoê tamuta i te hoê fare hoê tahua aita râ e eˈa? Oia atoa no te hoê oreroraa parau te erehia ra i te tahi mau tuhaa faufaa, aita ïa i au maitai e aita i tuea maitai. Te erehia ra i te hoê mea. Eita te hoê pae o te feia faaroo e nehenehe e apee i te taata orero. Eita te reira e tupu mai te peu e te tuea ra te manaˈo o te oreroraa parau e te tatarahia ra ma te au maitai.

[Uiraa haapiiraa]