Te Bibilia—ta tatou buka matamua
Haapiiraa 3
Te Bibilia—ta tatou buka matamua
1, 2. Afea te papairaa o te Bibilia i te haamataraa e i te faaotiraa, e ehia rahiraa Bibilia o tei neneihia?
1 O te Bibilia te buka matamua o te Haapiiraa o te taviniraa teotaratia, e ei mau tavini no te parau apî maitai, e tia ia tatou ia ite maitai i te reira. E tia ia tatou ia ite e mea nafea to ˈna papairaahia, eaha to roto e nafea ia faaohipa i te reira.
2 Ua haamata te papairaa o te Bibilia i te matahiti 1513 hou to tatou nei tau, taio matahiti i reira to Mose faaueraahia ia papai. Ua faaoti te aposetolo Ioane i ta ˈna mau papairaa i te hopea o te senekele matamua o to tatou nei tau, ma te faahope i te papairaa o te Bibilia, o tei naeahia ïa tau ahuru ma ono senekele. I teie mahana, te vai nei te Bibilia, i roto i to ˈna taatoaraa aore ra te tahi tuhaa, na roto hau atu i te 2 000 reo. Mea iti roa te mau buka o tei naeahia i te faito e mau mirioni buka neneihia, area no te Bibilia ra, e rave rahi mau miria buka i neneihia. O te hoê ïa numera hau aˈe teie tei ore i naeahia e te tahi atu buka. Parau mau, i te mea e ua faahereherehia te hoê buka faaroo i roto i te roaraa o te mau senekele e te faaturahia nei oia e te mau mirioni taata, aita ïa te reira anaˈe e haapapu ra e no ǒ mai oia i te Atua ra. E tia ia tapaohia i roto e e buka faauruahia mai e ia haapapu e o te Atua te Tumu. Inaha, maoti te tuatapapa-maite-raa i te Bibilia, te noaa nei i te mau taata aau haavare ore te tiaturiraa papu e te vai ra teie tapao i roto ia ˈna.
3, 4. Eaha te huru o te Bibilia i to ˈna papairaahia i te omuaraa ra, e i teihea anotau to ˈna vahiraahia na roto i te mau pene e te mau irava?
3 I te omuaraa ra, ua papaihia te Bibilia na roto i te mau reo hebera, aramea, e heleni, e te vai ra e ono ahuru ma ono buka i roto i ta tatou nei. Teie râ, te numera tia o te mau buka (vetahi o tei amuihia aore ra o tei faataa-ê-hia) e ere ïa te reira i te mea faufaa, aore ra mea nafea to ratou faanahoraahia te tahi i muri aˈe i te tahi. E mea maoro i muri aˈe i te otiraa te taatoaraa o te mau papai faauruahia a te Bibilia, ua papaihia â te mau buka bibilia i roto i te mau otaro taa ê, e e nehenehe te faanahoraa e apeehia no te faahiti ia ratou i roto i te mau haapueraa buka tahito e taui. Te mea faufaa râ, o te iteraa ïa eaha te mau buka o te tia mau â e ia tapaohia i roto i te haapueraa buka. Inaha, o te mau buka anaˈe e vai ra i roto i te haapueraa buka no teie nei tau o te nehenehe e faarirohia ei mau buka faauruahia. Mai mutaa ihora mai â, ua manuïa te aroraa no te parururaa ia ore te mau papai ê ia anoihia mai i roto.
4 I te omuaraa ra, ua papaihia te Bibilia na roto i te hoê papairaa aore e area i rotopu i te mau reta. I te ivaraa anaˈe o te senekele o to tatou nei tau te faataa-ê-raahia te mau pereota na roto i te hoê faanahoraa tapao tomaraa. Ua fa mai te mau tapao o te faanahoraa tapao tomaraa no teie nei tau i te senekele ahuru ma pae, ma te faaohiehia e te iteraahia mai te ravea neneiraa. E ere na te feia papai matamua i tatuhaa i te Bibilia na nia i te mau pene e te mau irava (te vai ra e 1 189 pene e e 31 102 irava i roto i te tatararaa King James Version). Ua ravehia teie mau tatuhaaraa e rave rahi mau senekele i muri iho. Ua tatuhaa te mau Massorètes, te mau orometua ati Iuda, i te mau Papai hebera na roto i te mau irava. I muri iho, i te ahuru ma toruraa o te senekele, ua tatuhaahia te Bibilia na roto i te mau pene.
5, 6. Ua faauruahia te Bibilia i roto i teihea auraa, e eaha te tumu e itehia ˈi te mau huru papairaa taa ê i roto i ta ˈna mau tuhaa parau?
5 Te hoê anairaa buka faauruahia. Tau maha ahuru taata taa ê o tei faaohipahia ei mau papai parau e Iehova, te Tumu rahi otahi o ta ˈna Parau faauruahia. “Te mau parau moˈa atoa i papaihia ra e mea faaurua mai ïa e te Atua,” e tae noa ˈtu te mau Papai heleni kerisetiano e te ‘tahi atu mau Papai.’ (Tim. 2, 3:16; Pet. 2, 3:15, 16) I roto i teie anairaa parau, te parau ra “faaurua” e ere ïa te manaˈo poieteraa o te puhipuhi nei i roto i te tahi mau taata peu aravihi e te feia papai, o te turai ia ratou ia haere noa ˈtu i mua, o te faatupuraa râ i te mau papai hapa ore o te nehenehe e tiaturihia mai te mea e ua papai-mau-hia ratou e te Atua iho. Ua faaohipa te Atua i to ˈna varua i nia i te mau taata haapao maitai o ta ˈna i faaohipa no te papai i raro aˈe i ta ˈna aratairaa. No reira ïa te aposetolo Petero i parau ai e: “E ere hoi i to te hinaaro o te taata i tae mai ai te tohu i tahito ra; o te mau taata moˈa râ o te Atua tei parau i ta te [varua moˈa] i tuu mai ia ratou ra.” (Pet. 2, 1:21) I te hoê râ taime, ua horoa mai te Atua iho i te hoê parau papaihia. O na Ture Ahuru ïa tei horoahia mai ia Mose ra i nia e piti “pǎpǎ ofai; i papaihia e te rima o te Atua ra.”—Exo. 31:18.
6 I roto i te tahi mau tupuraa, ua faahitihia mai te mau parau tataitahi, ma te piiraa parau. (Exo. 34:27) Mea pinepine, ua faataehia mai i te mau peropheta ra te mau poroi papu maitai te tia ia ratou ia tufa ˈtu. (Arii 1, 22:14; Ier. 1:7) Te vai nei râ e rave rahi mau haapapuraa e aita te mau taata tei faaohipahia e te Atua no te papai i te mau Papai i titauhia ia papai i te mau parau i faahiti-tataitahi-hia mai. Ei hiˈoraa, ua tuuhia mai te Apokalupo ia Ioane ra ‘na roto i te mau tapao’ na roto i te arai o te hoê melahi a te Atua, e ua faaroo te aposetolo i teie faaueraa: “E ta oe e ite nei, e papai i roto i te hoê [otaro].” (Apo. 1:1, 2, 10, 11) E au ra ïa e ua manaˈo te Atua e vaiiho i te feia papai bibilia ia maiti i ta ratou iho mau parau e mau pereota no te faataa i te mau orama o tei tuuhia mai ia ratou ra, ma te ara atoa râ i te aratai ia ratou ia papu maitai e ia tuea maite iho â te papairaa i ta ˈna opuaraa. (Koh. 12:10) No reira ïa e itehia ˈi i te mau huru papairaa taa ê i roto i te mau buka a te Bibilia.
7. O vai vetahi mau taata o tei papai i te mau Papai hebera, e eaha te mau huru maitatai e titauhia ra i te mau peropheta mau o ta ratou paatoa i faaî?
7 Te haapapu ra te mau parau iho i roto i te mau papai a Mose e mea faauruahia mai ratou e te Atua. Aita o Mose i ani e ia riro oia ei raatira i nia i te mau Iseraela. I te omuaraa, aita oia i farii i te titauraa e na reira. (Exo. 3:10, 11; 4:10-14) Na te Atua râ i tono ia Mose e i horoa ˈtu i te mau mana semeio. Inaha, ua tae roa te mau tahuˈa tahutahu i te farii e no ǒ mai te mau semeio i ravehia e Mose i te Atua ra. (Exo. 4:1-9; 8:16-19) Ma te auraro i te faaueraa a te Atua e ma te vehîhia i te tapao a te Atua oia hoi te varua moˈa, ua turaihia na mua o Mose ia faaite ma te parau e i muri iho ia papai i te hoê tuhaa o te Bibilia. (Exo. 17:14) I muri aˈe i to ˈna poheraa, ua apitihia mai te mau papai a Iosua, a Samuela, a Gada e a Natana (Iosua, Te mau tavana, Ruta, e Samuela 1, e te 2) i te mau parau o ta ˈna i papai. E tuhaa atoa ta te mau arii ra o Davida e o Solomona i roto i te papairaa i te haapueraa buka e rahi noa ra o te mau Papai moˈa. I muri iho, ua tuu atoa mai te mau peropheta, mai ia Iona tae atu ia Malaki i ta ratou mau papai. Ua faaî ratou pauroa i te mau mea e titauhia ra i te mau peropheta mau a Iehova, oia hoi: ua paraparau ratou na nia i te iˈoa o Iehova, e parau mau iho â ta ratou mau parau tohu e ua aratai ratou i te mau taata i te Atua ra.—Deut. 13:1-3; 18:20-22.
8. Eaha te tapao papu roa ˈˈe e mea faauruahia mai te mau buka o te mau Papai hebera?
8 E mea tano ia manaˈo e, mai ta Iehova i faaurua i te tahi mau taata ia papai ratou, oia atoa ua aratai oia i te haaputuputuraa i teie mau papai i faauruahia mai. Ia au i te hoê tutuu ati Iuda, ua rave atoa o Ezera i teie ohipa haaputuputuraa i muri aˈe i to te mau ati Iuda tei hopoi-tîtî-hia hoˈiraa mai i Iuda. E mea tano iho â e na Ezera e rave i teie ohipa, no te mea e tahuˈa oia iho, e taata papai bibilia tei faauruahia e “e papai parau ite i te ture a Mose.” (Eze. 7:1-11) I te hopea o te senekele pae hou to tatou nei tau, ua hope te haapueraa o te mau Papai hebera. Te vai ra i roto te hoê â mau papai e vai nei ia tatou i teie mahana e o tei tatuhaahia i teie nei na roto e toru ahuru ma iva buka. Aita hoê apooraa taata i faaoti e e mau buka faauruahia teie. Mai te omuaraa mai â, ua fariihia teie nei haapueraa buka e te Atua. Te tapao papu roa ˈˈe e mea faauruahia mai te mau Papai hebera, o te faaiteraa ïa o te ore e tia ia patoihia a Iesu Mesia e te feia papai i te mau Papai heleni kerisetiano. Ua faahiti hua ratou i te mau Papai hebera faauruahia tera râ aita hoê aˈe taime to ratou faahitiraa i te mau buka apokirifa.—Luka 24:44, 45.
9, 10. Eaha te haapapuraa e vai ra ia tatou nei e tei roto mau iho â te mau buka a te mau Papai heleni kerisetiano i te haapueraa buka a te Bibilia?
9 Ua ravehia te papairaa e te haaputuputuraa i na buka e piti ahuru ma hitu o te mau Papai heleni kerisetiano mai to te mau Papai hebera. Ua horoa mai te Mesia i te mau ‘ô taata,’ oia mau, “ua haapao oia i te tahi pae ei aposetolo; e te tahi pae ei peropheta; e te tahi pae ei haapii evanelia; e te tahi pae ei tiai e ei orometua.” (Eph. 4:8, 11-13) Vehîhia i te varua moˈa o te Atua, ua hohora ratou i te mau haapiiraa tumu maitatai na te amuiraa kerisetiano. Ua horoa ˈtu o Iesu na ta ˈna mau aposetolo i te haapapuraa e e tauturu mai te varua o te Atua ia ratou, e haapii mai oia, e aratai mai, e faahaamanaˈo mai ia ratou i te mea o ta ratou i faaroo, e e faaite mai i te mau mea e tupu a muri aˈe. (Ioane 14:26; 16:13) No reira, e mea papu maitai te tiaraa e te parau mau o ta ratou mau Evanelia.
10 Eita te tiaraa o te hoê buka i roto i te haapueraa faauruahia e faitohia na nia i te rahiraa taime to ˈna faahitiraahia aore ra no te mea ua faahiti tera taata papai e ere i te aposetolo i teie buka. Na te parau e vai ra i roto i teie buka e haapapu e ua papaihia oia i raro aˈe i te varua moˈa. Eiaha ïa teie papai ia faaitoito i te tiaturiraa tahutahu, te ohipa demoni, te haamoriraa i te taata. Hau atu, e tia ia tuea maitai oia e te toea o te Bibilia. E tia i te buka tataitahi ia au maite i te “hiroa parau mau” a te Atua e ia tuea maite e te mau haapiiraa a Iesu. (Tim. 2, 1:13) Ma te feaa ore, ua paraparau te mau aposetolo na roto i te mana o te Atua. Maoti te varua moˈa, ua noaa ia ratou ‘te maramarama o te mau parau i faauruahia mai,’ e nehenehe ai ratou e ite ahiri e no ǒ mai anei i te Atua ra aore ra eita. (Kor. 1, 12:4, 10) Ua tapao te poheraa o Ioane, te aposetolo hopea, i te hopea o taua reni taata ra o tei faauruahia mai e te Atua. Ua faaoti ïa te Apokalupo, te Evanelia e te mau episetole a Ioane i te haapueraa buka a te Bibilia. Te haapapu ra te au-maite-raa o na buka e ono ahuru ma ono o ta tatou Bibilia i to ˈna hoêraa e te faaite ra e ua riro mau oia ei parau mau i faauruahia mai e Iehova.
11. Eaha te mau haamaramaramaraa e itehia i roto anaˈe i te Bibilia?
11 Te parau e vai ra i roto. Te vai ra i roto i te Bibilia te mau haamaramaramaraa aore roa e itehia i te tahi atu vahi. Ei hiˈoraa, te haamaramarama maira te Genese ia tatou no nia i te poieteraa o te fenua e te faatia ra oia i te mau ohipa i tupu hou te poieteraa o te taata. (Gen. 1:1-31) Te faataa atoa ra te Bibilia i te mau aparauraa i tupu i roto i te raˈi aore roa e itehia e te taata ahiri e aita te Atua i faaite mai.—Ioba 1:6-12; Arii 1, 22:19-23.
12, 13. Eaha ta te mau Papai e haapii maira no nia ia Iehova e ia Iesu Mesia?
12 Te mea faufaa roa ˈtu â, te faaite maira te Bibilia e o vai o Iehova. Te faatia huˈahuˈa ra oia i te mau orama semeio a Iehova ta vetahi o ta ˈna mau tavini i fanaˈo. (Dan. 7:9, 10) Hau atu, te faaite maira te Bibilia i te iˈoa o te Atua, o “Iehova,” o tei papaihia hau atu i te 6 800 taime i roto i te papai a te mau Massorètes no nia i te mau Papai hebera. Te haapii atoa maira oia i te mau huru maitatai faahiahia o Iehova, mai te here, te paari, te parau-tia, te aroha, te hamani maitai, te aau horoa maitai, te ite tia roa e te huru taui ore. (Exo. 34:6, 7) Te haapii atoa nei tatou e rave rahi mau parau no nia i te Tamaiti a te Atua e i to ˈna tiaraa faufaa roa i roto i te mau opuaraa a te Atua. (Kol. 1:17, 18; 2:3; Kor. 2, 1:20) Hau atu i te tahi atu taata, ua faarahi atu â te Tamaiti a te Atua, i to ˈna parahiraa mai i nia i te fenua nei, i to tatou ite no nia ia Iehova, e ua nehenehe oia e parau e: “O tei hiˈo mai ia ˈu ra, ua hiˈo ïa i te Metua.”—Ioane 14:9.
13 Te faaitehia ra te mau parau no nia i te tupuraa o te mau opuaraa a te Atua i roto i te Bibilia. Ua niuhia te mau haamaitairaa atoa i faaitehia no te maitai o te mau taata auraro i nia i te hoê Faaora i tǎpǔhia mai e na Iehova e tono mai. I te ô i Edene ra, ua faahiti te Atua i teie Faaora mai te “huaai” o ta ˈna vahine. (Gen. 3:15) I muri iho, ua tǎpǔ te Atua e e fa mai teie Huaai na roto mai ia Aberahama. (Gen. 22:18) Ua faaite oia e e riro te Faaora i tǎpǔhia mai ei arii e ei tahuˈa mure ore “ia au i te parau a Melekisedeka.” (Sal. 110:4; Heb. 7:1-28) Ua fafau te Atua ia Iseraela i te hoê faufaa o te Ture maoti te hoê autahuˈaraa e te mau tusia, e ua riro hoi teie mau faanahoraa atoa ei “ata anaˈe . . . no te mau mea maitatai a muri atu.” (Heb. 10:1; Kol. 2:17) Ua tǎpǔ atu oia ia Davida e e vai te mana arii i roto i to ˈna utuafare e a muri noa ˈtu. (Sam. 2, 7:11-16) Inaha, te Taata aiˈa o teie parau tǎpǔ e te Faaora i faaitehia mai e te mau parau tohu ê atu atoa, ia au i te Bibilia, o Iesu Mesia ïa. Oia mau, i roto i te mau api o te Bibilia, te itehia ra te tumu parau o te mau papai i faauruahia, oia hoi te Basileia o Iehova ta ˈna i horoa ˈtu ia Iesu Mesia ra no te faatupu i ta ˈna mau opuaraa.
14-17. No te aha te mau parau tohu a te Bibilia e ta ˈna mau aˈoraa no nia i te pae morare e riro ai ei mea faufaa roa no tatou paatoa?
14 Ei buka parau tohu, e mea faahiahia roa te Bibilia. Te faataa ra oia i te auraa o te mau ohipa o te Aamu e te faaite ra oia e no te aha ratou i tupu ai. (Luka 19:41-44) Te faaite atea ra oia i te ohipa e tupu a muri aˈe i nia i te mau faatereraa atoa o teie nei ao. (Dan. 2:44) Te faataa ra oia i te mau tupuraa o to tatou nei tau, te faaite ra oia e te ora nei tatou i te tau hopea o teie nei faanahoraa e te faaite atea ra e fatata roa te Atua i te haamou i te feia iino atoa.—Tim. 2, 3:1-5; Sal. 37:9, 10.
15 Ahiri e aita te Bibilia, eita roa ˈtu ïa tatou e ite e eaha te tumu mau o to tatou oraraa. (Koh. 12:13) Te faataa papu ra oia e aita te taata i fa mai na roto i te tahi tupuraa matapo, ua poietehia râ oia e te Atua, e opuaraa maitai ta ˈna no te taata nei. Te vauvau maira oia e eaha te hinaaro o te Atua no tatou nei e nafea tatou e ite ai i te oaoaraa mau.—Apo. 4:11; Tim. 1, 2:3, 4; Sal. 16:11.
16 Te faaite ra te Aamu taata nei e taa ê atu i te Atua, eita ta te taata e nehenehe e aratai i to ˈna mau taahiraa avae ma te manuïa. O te Bibilia anaˈe te horoa mai nei na te taata i te aratairaa o ta ˈna e titau ra. Te aratai nei oia ia ˈna i te pae no te mau tuhaa morare, ma te faaite e eaha ta te Atua e opani ra e eaha ta ˈna e farii ra. (Gal. 5:19-23) Te tauturu nei oia ia ˈna ma te ohie roa i roto i te hoê ao o te patoi nei i te mau ture morare atoa. Maoti oia e nehenehe ai tatou e ite i te mau manaˈo o te Atua e e faaoaoa ia ˈna. E i te pae hopea, te faaite maira oia i te eˈa e aratai i te ora mure ore i roto i te ao apî i tǎpǔhia mai e te Atua.—Ioane 17:3.
17 No reira, e ere anei i te mea papu e e tia i teie Buka tei hau aˈe i te mau buka atoa ia riro ei buka matamua na tatou? Hau atu i te tahi atu mau taata, te hinaaro nei te mau kerisetiano e rave i te mau maimiraa no nia i teie Buka, e ua parau atu te Tamaiti a te Atua i nia i to ˈna Tumu e: “O to parau na te parau mau.” (Ioane 17:17) No reira ïa te Bibilia e rave ai i te parahiraa matamua i roto i te haapiiraa e pûpûhia ra e te Haapiiraa o te taviniraa teotaratia.
[Uiraa haapiiraa]
