Haapiiraa 16

Te mau aparauraa o te faaitoito

1, 2. Eaha te huru o ta tatou mau aparauraa?

 ¹ I roto i ta tatou mau aparauraa i te mau mahana atoa, te vai ra ia tatou te ravea no te faahanahana i te Atua. Ua papai te hoê taata papai salamo a te Bibilia e: “Tei te Atua to matou nei faaahaaharaa e po noa ˈtu te mahana; e to oe te iˈoa ta matou e haamaitai e a muri noa ˈtu.” E ere anei te reira te hoê huru te tia ia faahanahanahia no te mau tavini atoa a te Atua? Oia hoi, te hinaaro nei ratou e faaohipa i to ratou vaha ia au i te hinaaro o te Atua.—Sal. 44:8.

² No to tatou ora taua huru faaotiraa ra, no te mea no to tatou huru taata tia ore no ǒ mai i to tatou metua matamua ra,  e nehenehe tatou e faahiti i te mau parau o te faateimaha ia vetahi pae maoti i te faaitoito ia ratou. (Iak. 3:8-12) Mea maitai ia tapea noa i roto i te feruriraa i te aˈoraa bibilia e faaitoito ra ia faahiti i te “parau maitai râ e tupu ai te maitai au ra, e maitai ai te feia e faaroo ra.”—Eph. 4:29.

3, 4. Taa ê atu i te paraparauraa, eaha atoa te hoê aparauraa, e ihea roa tatou e nehenehe ai e haamatau i te paraparau?

³ Oia mau, eiaha ia moehia e te vai atoa ra i roto i te hoê aparauraa te hoê taime no te faaroo, no te mea e horoaraa manaˈo te reira. A paraparau ma te faaitoito, a horoa atoa i te feia e faaroo ra i te ravea no te paraparau atoa. A faatupu i te aravihi no te horoa i te mau uiraa tano o te turai ia ratou ia paraparau. I muri iho, a haapao ma te aau rotahi i ta ratou parau maoti i te faaohipa i taua taime ra no te faaineine i ta outou e parau atu i muri iho. E faaitoito outou i te feia ta outou e paraparau ra ma te anaanatae atu i to ratou mau manaˈo.

⁴ Te vai ra e rave rahi ravea no te haamata i te hoê aparauraa o te faaitoito. E tupu, ei hiˈoraa, i ǒ outou e te mau melo o to outou utuafare, i rotopu i to outou mau hoa rave ohipa aore ra hoa haere haapiiraa, aore ra i rotopu i to outou mau taeae i roto i te faaroo. E horoa te hoê tuhaa rahi o ta tatou mau oreroraa parau e faahitihia i te Haapiiraa o te taviniraa i te ravea ia faaohipa i te aravihi i te pae o te aparauraa.

5-7. A horoa te tahi mau aˈoraa no te haamaitai i te huru o te mau aparauraa e te utuafare, i te mau taime tamaaraa iho â.

⁵ I te fare. E horoa te mau aparauraa i te fare i te oaoaraa o te fetii; mea tano ïa e ia tutava tatou no te haamaitai atu. Mea oaoa roa na te hoê tane aore ra te hoê vahine ia anaanatae ma te aau rotahi to ˈna hoa i te mea ta ˈna e parau ra. Mea au atoa na te mau tamarii ia faaroo to ratou metua ia ratou e ia anaanatae mau ia ratou. Taa ê atu, mai te peu e e hurihuri outou i te buka ia paraparau mai te hoê taata, ia tâpû outou i ta ˈna parau aore ra na roto i te tahi atu ravea, te faaite ra ïa outou e aita outou e anaanatae ra i ta ˈna mau parau, e vitiviti te mau aparauraa i te utuafare i te haafaufaa-ore-hia. Aita hoê aˈe taata e hinaaro e paraparau e te hoê taata o te ore e faaroo ra i tei parauhia ˈtu.

⁶ Te pûpû nei te mau tamaaraa i te mau mahana atoa e te mau melo o te hoê utuafare i te hoê taime maitai roa no te faatupu i te tahi mau aparauraa o te faaitoito. I te hoê taime tamaaraa, e nehenehe te hoê tuhaa o te aparauraa e arataihia i nia i te irava o te mahana e itehia i roto i te vea iti E imi anaˈe na i te parau i papaihia ra i te mau mahana atoa. I te tahi atu taime tamaaraa, e nehenehe te mau tumu parau i taiohia aˈenei i roto i Te Pare Tiairaa aore ra i te A ara mai na! e riro ei tumu parau tauaparauraa faaitoito e te faufaa. Teie nei râ, eiaha roa ˈtu e faanaho i taua huru aparauraa ra ma te etaeta roa e eita roa ˈtu e nehenehe e paraparau faahou ma te ohie, eita atoa e nehenehe e fanaˈo i roto i te hau te hoê maa au maitai.

 ⁷ Ia tupu te tamaaraa, e nehenehe iho â te mau melo tataitahi o te utuafare e apiti i roto i te aparauraa o te faaitoito. E ere ïa te taime no te faaite i to outou inoino; o te haafifi i ta outou faatoparaa maa. I te roaraa o te mahana, ua faaroo paha te hoê melo o te utuafare i te tahi mau haamaramaramaraa faufaa e te arearea atoa. Ua roaa paha ia ˈna i te hoê aamu pororaa anaanatae roa. Peneiaˈe ua haapii o ˈna i te hoê parau apî anaanatae mau i roto i te vea aore ra i te afata radio. No te aha eita o ˈna e tapea i roto i to ˈna feruriraa no te faaite atu i te tahi mau melo o te utuafare ia tamaa ratou? E ite outou i muri iho e maoti te tamaa haavitiviti noa, e te faarue oioi i te amuraa maa, e tiai ma te ru te mau melo atoa o te utuafare taua taime ra no te aparau ratou paatoa.

8-10. No te aha e mea faufaa te mau aparauraa i rotopu i te metua iho e te mau tamarii tataitahi, e nafea te mau metua ia faatupu i taua mau huru aparauraa ra?

⁸ Mea faufaa atoa ia roaa i te mau metua iho te tahi mau tauaparauraa e ta ratou mau tamarii tataitahi, ma te faataa ê atu i te tahi mau melo o te utuafare. E roaa mai te mau faahopearaa maitatai mai te peu e e tupu taua mau paraparauraa ra i roto i te hoê huru anaanatae mau, i te fare aore ra i nia i te purumu. E horoa te reira i te ravea no te faaineine te tamarii i te mau huru tupuraa i te pae tino o te faataui to ˈna tino a tupu noa ˈi oia. E faaite mai taua mau tauaparauraa ra eaha te mea e vai ra i roto i te mafatu o te tamarii, to ˈna mau hinaaro mau, e ta ˈna mau opuaraa i roto i te oraraa; e pûpû oia i te ravea no te tarai i te tamarii no to ˈna maitai.

⁹ Mai te peu e e faaite mai ta outou tamarii i te mau peapea tei roto atoa o ˈna, e tamaˈi oioi atu outou ia ˈna, papu maitai e hope te aparauraa i taua iho taime ra. Ma te haamanaˈo i taua paraparauraa ra, eita roa ˈtu o ˈna e faatia faahou ia outou i to ˈna mau fifi. Mea au aˈe ia faaroo ia ˈna e ia tuatapapa i to ˈna mau fifi ma te faahiti te tahi mau uiraa o te faaite to outou huru taa ohie. I muri iho, ma te hamani maitai e te papu atoa, e nehenehe outou e tauturu i ta outou tamarii ia faatitiaifaro i to ˈna haerea, mai te peu e ua atea oia i te mau faaueraa tumu bibilia.

¹⁰ Mea faufaa te mau tauaparauraa no te hoê oraraa utuafare oaoa, e ere ïa te auraa e e tia mau â e ia paraparau te hoê taata. I te parau mau, mea maitai atoa te tahi taime ia faaea rii noa o ˈna anaˈe iho e to ˈna mau manaˈo, no te feruri ma te mamû no nia i te tahi mau uiraa. Mea pinepine, mea au roa na te mau melo o te hoê utuafare te tahi mau taime faaea hau noa.

11, 12. Taa ê atu i te taviniraa tamau i roto i te pororaa, eaha te taime tatou e nehenehe ai e horoa i te faaiteraa?

¹¹ Nafea ia faatupu i te tahi mau huru tupuraa no te horoa i te faaiteraa. Eaha te taairaa e vai ra i roto i te aravihi no te paraparau ma te ohie e ta tatou taviniraa? Aitâ anei outou i aniani e no te aha râ vetahi mau ite e faatia noa ˈi te mau huru tupuraa maitatai? E ere anei no te mea e na ratou iho e haamata ra i te aparauraa? Te faaite ra te buka bibilia a  te mau Maseli e: “Te haapurara nei te vaha o te feia paari i te ite.”—Mas. 15:7.

¹² Taa ê atu i te taviniraa tamau i roto i te pororaa, e rave rahi tupuraa ta tatou e nehenehe e faatupu i te mau aparauraa e te hoê taata e te paraparau ia ˈna no nia ia Iehova. Ei hiˈoraa, e nehenehe te mau vahine faaea fare e horoa i te faaiteraa i te feia tapiri aore ra i te feia faaite tauihaa o te haere mai e farerei ia ratou. E nehenehe te mau tamarii e paraparau no nia i te Bibilia e to ratou mau hoa i nia i te eˈa o te haapiiraa aore ra i rotopu i te mau tuhaa haapiiraa. E nehenehe te mau kerisetiano e rave ra i te ohipa i rapaeau mai i to ratou fare e horoa i te faaiteraa i nia i ta ratou vahi raveraa ohipa, i te taime tamaaraa ei hiˈoraa. E nehenehe atoa e haamata i te mau aparauraa o te faaitoito ia haere outou e ori haere i roto i te hoê aua, ia tiai outou i roto i te hoê fare toa aore ra ia tiai outou te pereoo mataeinaa. I roto i te tahi mau fenua i reira ua opanihia te ohipa pororaa i te Basileia, e tupu noa te taviniraa na roto i te ravea tei ore i faanahohia e te amuiraa. Mea aravihi roa taua huru raveraa ra, no te mea e tapao-pinepine-hia i roto i taua mau fenua ra te hoê haereraa i mua oioi o te numera o te mau tavini o te Atua mau.

13-16. Eaha te ravea ta tatou e nehenehe e faaohipa no te haamatara i te mau aparauraa e tapae atu ai i nia i te faaiteraa?

¹³ No te horoa i te faaiteraa mai te mau huru tupuraa taa ê, mea navai noa ia faahiti te tahi mau parau auhoa no te “tuparari i te toetoe,” e ua ineine roa te hoê aparauraa. Ua horoa o Iesu i te hiˈoraa no nia i taua vahi ra. I te hoê mahana, ua hora ahuru ma piti, i te mea e ua tapae oia i pihai iho i te hoê pu pape no Samaria no te faafaaea, ua ani atura o ˈna i te inu i te hoê vahine o tei haere mai i reira no te huti i te pape. Ua faatupu te reira i te maere o teie vahine, no te mea e ere i te peu matau e ia paraparau te hoê ati Iuda e te mau taata no Samaria. Ua ui atura oia i te hoê uiraa ia Iesu. Ua pahono atura oia e ua faarahi te reira i to ˈna maere ma te parau e te vai ra ta ˈna te hoê pape o te horoa i te ora mure ore. Ua nehenehe o ˈna e horoa i te faaiteraa. A tapao na e noa ˈtu e aita o ˈna i faaroroa roa te faataaraa, ua faaineine oia i te eˈa no te hoê aparauraa auhoa.—Ioane 4:5-42.

¹⁴ E nehenehe atoa outou e faatupu i taua mau huru aparauraa faaitoito mau ra. Ia tiai outou i te hoê pereoo mataeinaa, e nehenehe outou e huti i te ara-maite-raa o te hoê taata i nia i te hoê vea aore ra te hoê tumu parau o te hoê vea e tuatapapa ra i te hoê fifi, no nia i te haaviiviiraa aore ra te tamaˈi ei hiˈoraa, e i te ani atu ia ˈna e: “I to oe manaˈo, no te aha te mau huru tupuraa i ino roa ˈi i teie mau matahiti hopea nei? Ia manaˈo oe, e riro anei te fenua atoa ia tae i te hoê mahana ei vahi faaearaa au mau?” Ua riro atoa teie huru raveraa ei mea aravihi roa no te haamata i te hoê aparauraa no nia i te hoê fifi o  te fenua. E nehenehe outou e parau faahou: “Ia au i to oe hiˈoraa, eaha te ravea?” E aratai te reira ma te ohie ia paraparau no nia i te ravea otahi roa oia hoi te Basileia o te Atua. Parau mau, e tia ia hiˈopoa ma te aravihi. E ere i te mea titauhia ia faatupu taua paraparauraa ra mai te peu e aita te taata e anaanatae ra. Teie nei râ, e ite outou e e faaroo vetahi ma te oaoa, mai te vahine Samaria i pihai iho i te pu pape.

¹⁵ Te tahi atu ravea no te faatupu i te hoê aparauraa no nia i te Parau a te Atua, o te tuuraa ïa i te mau buka bibilia ia ite-maitai-hia. Ia na reira outou i to outou fare, e horoa mai te feia e haere mai e farerei ia outou i te tahi mau hiˈopoaraa no nia i taua mau buka ra, o te haamatara i te eˈa no te hoê faaiteraa maitai. Mai te peu e te haere ra outou i te haapiiraa, e turai te hoê buka aore ra vea e vaiihohia i nia i te iri papairaa i te hoê ia ani e: “Eaha teie buka?” E nehenehe ïa outou e faataa ˈtu e e horoa i te faaiteraa. I te tahi aˈe pae, e horoa te taioraa i te hoê buka no nia i te Bibilia ia tamaa outou aore ra i nia i te pereoo mataeinaa i te ravea no te paraparau no nia i te Basileia o te Atua i te feia o te hinaaro ra e ite.

¹⁶ E aratai atoa te mau aparauraa e te feia o ta tatou i matau ia paraparau i nia i te mau parau mau a te Bibilia. I te roaraa o taua mau paraparauraa ra, e parau-pinepine-hia no nia i ta te mau taata i rave, nohea mai ratou, te mea ta ratou i faaroo aore ra i ite, aore ra ta ratou e opua ra e rave. No reira, ia ite outou taua mau huru tupuraa ra, no te aha outou e ore ai e faaite i ta outou ohipa i rave? Mai te peu e ua putuputu outou i te hoê tairururaa haaati, a parau i te hoê hoa aore ra te hoê taata tapiri ihea roa to outou haereraa e eaha te tumu parau o te oreroraa parau matamua. E ui mai paha oia i te tahi mau uiraa no nia i taua tumu parau ra. Mai ta te tahi pae e faaite ia outou eaha ta ratou e rave ra, a faaite atu ia ratou i te mea ta outou i taio i roto i Te Pare Tiairaa aore ra i roto i te A ara mai na!. Mai te peu e e hauti outou i to ratou vahi paruparu, e ani mai ratou i te tahi mau haamaramaramaraa. E nehenehe ïa outou e horoa ˈtu i te hoê faaiteraa aano aˈe. Mea anaanatae mau taua mau huru paraparauraa ra no te huti i te ara-maite-raa i nia i te mau opuaraa a te Atua.

17-20. Eaha te mau tumu parau o te riro ei aparauraa maitai i rotopu i te mau ite?

¹⁷ E to outou mau hoa kerisetiano. Ia putuputu outou e te mau taeae e te mau tuahine kerisetiano, mea tano mau e ia teitei te faito o te aparauraa e e au i te mau tavini o te parau apî maitai. E ere noa te tumu no te faaîraa i te taime, no te faaitoito râ.

¹⁸ E mau ravea maitai ta outou no te atuatu i te tahi mau aparauraa o te faaitoito na mua ˈˈe e i muri mai i te putuputuraa i te Piha no te Basileia. Eiaha e rave i te peu e hoˈi oioi ia oti anaˈe te mau putuputuraa. No te aha outou e ore ai e paraparau  e te mau taeae ruhiruhia aore ra aravihi aˈe, aore ra e te feia mamahu paha o te haere i te hiti? E rave rahi mau tumu parau tauaparauraa. E nehenehe outou e faahiti te mau manaˈo tei faaanaanatae taa ê ia outou i roto i te mau vea apî o Te Pare Tiairaa. A paraparau atu no ta outou oreroraa parau iti e fatata mai nei i te Haapiiraa o te taviniraa teotaratia. Peneiaˈe e mau manaˈo apî to vetahi o ta outou e nehenehe e faaohipa i roto i ta outou oreroraa parau aore ra e nehenehe outou e horoa i te tahi mau manaˈo o te tauturu te tahi pae ia faaineine i ta ˈna oreroraa parau. E nehenehe outou e faahiti i te mau ohipa i tupu i roto i te pororaa aore ra e faahiti poto noa i te mau manaˈo no nia i te tahi tuhaa o te putuputuraa ta outou iho i au. Mea faaitoito mau taua huru aparauraa ra.

¹⁹ I te mau tairururaa rahi aˈe, e nehenehe e paraparau e te mau taeae e tuahine no te mau vahi ê atu. Ua riro ei peu no vetahi mau Ite i te haamatara i te aparauraa ia tiai anaˈe ratou i te vahi hoohooraa maa, ia haere anaˈe i te vahi e tupu ai te tairururaa aore ra ia hoˈi ratou. Te ravea maitai aˈe o te horoaraa ïa to outou iˈoa i te taeae aore ra te tuahine ta outou e paraparau ra e ia ani atu to ˈna. A ani e mea nafea to ˈna riroraa mai ei ite no Iehova. I te mau taime atoa e haamatahia i te hoê aparauraa au maitai e o te faaitoito.

²⁰ Ia haere outou i te tuhaa fenua no te pororaa, o te tahi atu ïa ravea no te faatupu i te mau aparauraa o te faaitoito. Maoti i te faatupu i te mau aparauraa faufaa ore, no te aha e ore ai e paraparau no nia i te huru omuaraa parau te faaohipahia no te tahi feia no roto i te tahi tuhaa fenua aore ra te mau tumu parau tano maitai ia tuatapapa? Mea au atoa ia paraparau no nia i te huru ia pahono i te mau patoiraa. I roto i taua mau taime ra, mea haumǎrû e mea tano ia feruri i nia i taua mau uiraa ra i te pae varua e ia paraparau atu.—Phil. 4:8, 9.

21-24. Ia ore anaˈe te hoê aparauraa i rotopu i te mau kerisetiano e faaitoito faahou, eaha ta tatou iho e nehenehe e rave?

²¹ Mai te peu e tei rotopu outou i te hoê pǔpǔ taeae aore ra tuahine, e te faufaa ore roa ra te aparauraa aore ra e ere i te mea faaitoito roa, eaha ta outou e nehenehe e rave? No te aha e ore ai e ui i te hoê uiraa no te aratai i te paraparauraa i nia i te eˈa o te haafaufaa ia ˈna? A huti i te ara-maite-raa i nia i te hoê tumu parau taa maitai e a ui te tahi mau uiraa e tuati atu. E haamaitai mau â taua huru aparauraa ra mai te peu e e faaea te feia e apiti ra i te tahi taime i nia i te tumu parau, ma te horoa i te taata tataitahi te ravea no te paraparau.

²² Ia ô anaˈe te tahi atu melo o te amuiraa kerisetiano i roto i te hoê aparauraa, mea faufaa ia haapao eiaha te mau parau ia riro ei parau faatura ore eiaha atoa ia faaino, maoti i te riro mai ei mau parau faaitoito. Ia haamata anaˈe te tahi i te parau no nia i te hapa o te hoê taeae, e itoito anei outou no te faahoˈi  i te paraparauraa i nia i te hoê faito maitai? E faaite anei outou i te haapao maitai i nia i te faanahoraa a Iehova e e paruru anei outou i te hoê o to ˈna mau melo? E parau paha vetahi e aita e faufaa rahi to te reira, e taui ra to tatou feruriraa ia haamanaˈo anaˈe tatou e e nehenehe te taata e amuamu ra i te hoê tavini tei pûpû ia ˈna no Iehova e arataihia ia faaino i te mau faanahoraa i ravehia e te Atua iho.—Iak. 5:9; Kor. 2, 10:5.

²³ I te tahi taime, mea mǎrû aˈe te aparauraa e te vai ra te mau aamu arearea. E nehenehe taua mau huru parau ra e faufaahia e e faatupu i te taime faafaaearaa. Teie nei râ, e tia ia haapao e ia ore ia riro mai ei mau parau o te ore e tano i te mau tavini kerisetiano. A tapea i roto i to outou feruriraa i teie aˈoraa bibilia e: “Area te faaturi, e te mau parau faufau atoa, e te nounou taoˈa, eiaha roa ia faahitihia i roto ia outou, o te au ïa i te feia moˈa ra: eiaha hoi te parau tiaâ ra, e te parau rii maamaa ra, e te faaata rii iino ra, e ore ïa e au: ei haamaitai râ i te Atua.”—Eph. 5:3, 4.

²⁴ Ei tavini no Iehova, e haapao tatou e ia faahanahana noa tatou ia ˈna i roto i ta tatou mau aparauraa. Ia na reira tatou, e pee atoa ïa tatou i te aˈoraa maitai roa i horoahia e te aposetolo Paulo e na ô ra: “E haamauruuru tatou atoa nei ia vetahi ê, ia maitai oia, ia itoito.”—Roma 15:2.

[Uiraa haapiiraa]