Haapiiraa 7

Te mau haamaitairaa o te haapiiraa

1. Maoti te haapiiraa, te faaineine nei tatou ia tatou i te aha?

 ¹ E hinaaro anei outou e ite i to outou faaroo ia rahi, ia hohonu atu â to outou here no te Atua, ia aravihi atu â to outou maramarama e ia haere atu â te hotu o ta outou taviniraa i te rahiraa? Tei te huru ïa o ta outou haapiiraa tataitahi e te haapiiraa e to outou utuafare ta outou mau haereraa i mua i roto i teie mau tuhaa atoa. O te hoê tuhaa faufaa te haapiiraa i roto i te oraraa kerisetiano. Eita noa te reira e tauturu ia tatou ia tavini i te Atua i teie nei, e faaineine atoa râ ia tatou ia ora i roto i te ao apî i tǎpǔhia e te Atua. Te haapii maitai ra anei outou?—Mat. 4:4.

2, 3. Nafea e itehia ˈi ia tatou i te taime no te haapii?

² Nafea ia ite i te taime no te haapii? Mea pinepine e riro te reira ei fifi, e nehenehe râ te reira e faatitiaifarohia. Mai te peu e te ite ra outou e e ere ta outou porotarama haapiiraa i te mea ohie, a hiˈopoa i ta outou tabula taime o te hebedoma. E mea papu e, eita outou e ite e rave rahi taime vata, te faaitoito nei râ te Bibilia ia tatou ia ‘faaherehere i te taime’ e horoahia ra no te tahi atu mau ohipa. (Eph. 5:15-17) Mai te peu e te vai ra ta outou te hoê afata teata, a tamata i te tabula i te taime outou e faaea ˈi i mua i te hebedoma tataitahi. E maere paha outou i te hopearaa. Ehia taime outou e “tauaparau” ai i te niuniu  paraparau aore ra e te feia tapiri mai? E rave rahi anei vea aore ra vea iti ta outou e taio nei? Eita anei e nehenehe e mono i te tahi tuhaa o taua mau hora ra no te hoê aore ra e rave rahi mau taime haapiiraa o te horoa mai i te mau haamaitairaa o te vai maoro? E nehenehe e haapii i te roaraa o te mahana, te po aore ra i te hoê taime tano maitai. I te rahiraa o te taime, e itehia te taime no te rave i te ohipa o ta tatou i faaoti e mea faufaa; ma te papu hoi, ua riro te haapiiraa i te Parau a te Atua ei hoê o te mau “mea i hau i te maitai” i mua i te mata o te taata e hinaaro ra e atuatu i te mau auraa maitatai e o Iehova.—Phil. 1:9-11; Mas. 2:1-5.

³ I te omuaraa, peneiaˈe mea fifi roa na outou ia parahi e ia tiatonu to outou feruriraa i nia i te mea o ta outou e haapii ra, i te maororaa râ o te tau, e mea ohie aˈe na outou e e anaanatae hau aˈe outou. E tia râ ia outou ia farii i te faufaaraa o te haapiiraa, ia horoa tamau i te taime e ia rave i te mau tutavaraa ma te aau rotahi.

4, 5. Eaha ta te haapiiraa e titau ra, e no te aha e mea tano ia pure hou e haapii atu ai?

⁴ Te tapao o te haapiiraa o te tamauraa ïa i roto i te feruriraa te tahi mau manaˈo e ia nehenehe e faataa i te reira ma te maramarama maitai. Oia mau, e parahiraa atoa to te taioraa faaanaanatae i roto i to outou oraraa, e ere râ te reira i te haapiiraa. Te titau nei oia i te mau maimiraa, te feruriraa e te faaohiparaa. Eiaha e taio noa e rave rahi mau api, e riro ïa ta outou haapiiraa ei ohipa o tei na nia-noa-hia e te faufaa ore. A rave râ i te taime no te mau maimiraa e no te feruri-hohonu-raa. Teie râ, a haere oioi atoa i mua ia taa ia outou e te rave ra outou i te hoê ohipa.

⁵ Eita te taata haapii kerisetiano e taio noa i nia i to ˈna iho mau aravihi no te imi i te mau taoˈa hohonu a te Parau mau a te Atua. Ua taa ia ˈna e mea titauhia i te tauturu o te varua moˈa, o te faanahonahoraa a te Atua e to ˈna mau tavini haapao maitai, e o ta ˈna iho Parau. No reira mea tano mau e ia haamatahia te hoê taime haapiiraa na roto i te hoê pure no te ani i te haamaitairaa a te Atua.—Iak. 1:5; Luka 11:9-13.

6, 7. Eaha te mau aˈoraa ohie e nehenehe e tauturu ia tatou ia huti e rave rahi maitai na roto i te taioraa o te Bibilia e te utuafare?

⁶ Te haapiiraa o te Bibilia. Ma te tano, te vai ra i roto i te porotarama a te Haapiiraa o te taviniraa teotaratia i te taioraa i te mau hebedoma atoa o te tahi tuhaa o te Bibilia. Mea pinepine, e nehenehe e faatupu i teie taioraa e te utuafare fetii, hoê aore ra e piti pene taiohia i te mau po atoa. Ia hutihia i te maitai na roto i teie taioraa, e tia i te taata taio aore ra te tahi atu melo o te pǔpǔ ia faahiti i te hoê manaˈo poto i muri aˈe i te paratarapha tataitahi ma te horoa i te manaˈo tumu. Mai te peu e e taio muhu ore noa outou, a rave i te taime no te feruri hohonu i nia i te mau manaˈo i faahitihia, no nia i te taairaa e vai ra e te toea o te pene e nafea te reira e tano ai no outou iho.

 ⁷ I muri aˈe i te taioraa bibilia tataitahi, mai te peu e aita vetahi mau manaˈo faufaa i matara mai, a rave i te taime no te rave i te tahi mau maimiraa. Aita paha outou e taa ra i te auraa o te tahi tuhaa o te Papai. Nafea e roaa ˈi ia outou te mau haamaramaramaraa no nia i taua tumu parau ra? Na mua roa, e nehenehe outou e hiˈo i te tuhaa Faahororaa bibilia o te mau Index des publications de la Société Watch Tower, o te aratai ia outou i te mau api i reira e faataahia taua irava ra. Mai te peu e no nia ta outou uiraa i te hoê tumu parau bibilia mai “Te faaraaraa” aore ra “Babulonia Rahi,” a hiˈo ïa i te tuhaa Faahororaa o te mau tumu parau o te mau Index des publications de la Société Watch Tower e vai ra i roto i ta outou vairaa buka. E nehenehe atoa teie huru raveraa e faaohipahia no te haamaramarama ia outou no nia i te hoê taata aore ra te hoê vahi faahitihia i roto i te Bibilia. Aore ra, no te ite i teie mau huru haamaramaramaraa, e navai noa ïa ia hiˈo i te Auxiliaire pour une meilleure intelligence de la Bible i te tuhaa faahororaa faanaho-piapa-hia o te mau taˈo bibilia e vai ra i te pae hopea o ta outou Bibilia e ia imi i te mau irava i faahitihia.

8, 9. Nafea e itehia ˈi ia tatou te pahonoraa i te hoê uiraa bibilia, e eaha râ ta tatou e imi taa ê atu i te pahonoraa?

⁸ Te mau maimiraa no te pahono i te mau uiraa. Ia rave tatou i te mau hoˈi-faahou-raa e farerei aore ra ia faatere tatou i te hoê haapiiraa bibilia, e nehenehe te hoê uiraa e anihia mai e aita tatou i papu maitai i te pahonoraa. A haafaufaa i te taime o ta outou i faataa no te haapiiraa no te rave i te mau maimiraa i ǒ outou. I reira, e papu ïa ia outou e te faataa ra outou ‘ma te tano i te parau mau.’ (Tim. 2, 2:15) Mea navai noa ia rave i te tahi mau tutavaraa no te ite i te hoê pahonoraa tano maitai. Mai te peu e no nia i te hoê irava bibilia te uiraa, a haamata na mua i te taio i te mau irava tapiri. Eaha te parauhia ra na mua ˈˈe e i muri mai i teie irava? Mea maramarama anei i teie nei to ˈna auraa? I muri iho, e nehenehe outou e hiˈo i te tuhaa Faahororaa bibilia o te mau Index des publications de la Société Watch Tower no te ite i te tahi atu mau faataaraa. Te uiraa no nia anei i te hoê tuhaa o te haapiiraa tumu aore ra o te hoê parau tohu, aore ra no nia i te faaohiparaa i te mau faaueraa tumu bibilia i roto i te oraraa o te taata i faahiti i te uiraa? E tauturu te mau tuhaa Faahororaa o te mau tumu parau i tuatapapahia e te Faahororaa bibilia o te mau Index des publications de la Société Watch Tower ia ite outou i te haamaramaramaraa ta outou e titau ra.

⁹ Ia ite anaˈe outou i te pahonoraa, a aniani ia outou iho e mai te peu e e nehenehe ta outou e haapapu i te reira. E riro anei te pahonoraa ta outou e horoa ˈtu i te taata mai te hoê noa parau i faataahia ma te ore e haaferuri? Te taa ra anei ia outou i te mau faaotiraa parau i faataahia i roto i te mau buka a  te Taiete? E nehenehe anei ta outou e haapapu e mea tano iho â? E nehenehe te taata e ani e ia faataa outou i taua mau faaotiraa ra aore ra ia haapapu ma te rave i te Bibilia. E nehenehe anei ta outou e faataa ˈtu na roto i te mau faaauraa parau? Ua feruri anei outou i te mau uiraa ta outou e nehenehe e ui atu no te turai i te taata ia feruri e ia tapae i te hoê â mau faaotiraa? Mai te peu e e tuatapapa outou i te tumu parau, e nehenehe mau â outou e horoa i te hoê pahonoraa tano maitai.

10, 11. A horoa i te tahi mau aˈoraa no nia i te huru tano aˈe no te faaineine i Te Pare Tiairaa e te haapiiraa buka a te amuiraa.

¹⁰ Nafea ia faaineine i te haapiiraa o “Te Pare Tiairaa.” I roto i te tahi mau fenua, aita Te Pare Tiairaa e tae tamau ra, no te patoiraa i te ohipa a te mau ite no Iehova. I roto i taua mau fenua ra, e tia i te mau taeae ia rave faahou i te mau numera tahito aore ra ia faahaamanaˈo noa i te mea ta ratou i haapii i mutaa ihora. Te haamanaˈo ra anei outou i te mau manaˈo tumu o te mau numera hopea o Te Pare Tiairaa ta outou i haapii? E tia ia tatou ia haapii no te tapea i te mau manaˈo, ia nehenehe tatou e faaohipa i roto i to tatou oraraa aore ra i roto i te taviniraa.

¹¹ Mea tano ia taio i te vea mai te omuaraa e tae atu i te hopea ia tae anaˈe mai, ia nehenehe e matara mai te manaˈo rahi e vai ra i roto. I muri iho, na mua ˈˈe te hoê tumu parau ia haapiihia i roto i te hoê putuputuraa a te amuiraa, mea tano e ia taio faahou tatou anaˈe iho aore ra e te utuafare. I roto i teie taio-faahou-raa, a tapao na mua te upoo parau o te tumu parau, te irava tumu e te mau upoo parau iti i papai-meumeu-hia. E horoa mai te reira i te hoê manaˈo taatoa o te tumu parau e e tauturu ia outou ia taa i te taairaa e vai ra i rotopu i te mau tuhaa iti i faataahia i roto i te mau paratarapha. I teie nei, e nehenehe outou e taio i te haapiiraa paratarapha i muri mai i te tahi paratarapha, e imi i te mau pahonoraa o te mau uiraa e e reni i te tahi mau parau faufaa no te tauturu i to outou feruriraa. Mai te peu e i muri aˈe i te hoê paratarapha eita ta outou e nehenehe e pahono i te hoê uiraa na roto i ta outou iho mau parau, a taio faahou e a tamata faahou. A tapao te mau tumu bibilia o te mau faataaraa i horoahia, a imi te mau irava i horoa-noa-hia, e a tapao i ta outou e hinaaro e pahono i te putuputuraa. Ia oti anaˈe te mau paratarapha atoa i te tuatapapahia i raro aˈe i te hoê upoo parau iti, a faaea maa taime iti e a haamau i te mau taairaa e vai ra i rotopu i te mau manaˈo i faataahia e te tereraa manaˈo o te tumu parau. Ia na reira atoa outou i te hopea o te tumu parau. A feruri e nafea outou ia faaohipa i te mau manaˈo ta outou i haapii; a aniani e nafea te reira ia haa i nia i to outou oraraa e nafea outou ia faataa ˈtu i te hoê taata. I reira, eita ïa ta outou haapiiraa e riro ei tapaopaoraa pahonoraa noa, ia noaa râ te paari e te maramarama.  (Mas. 4:7) Hau atu, e rahi roa ˈtu to outou anaanatae ia apiti atu i te haapiiraa o Te Pare Tiairaa i roto i te amuiraa. A apee i te hoê â raveraa no te faaineine i te haapiiraa buka a te amuiraa.

12-14. No te aha e mea faufaa roa te haapiiraa e te utuafare, e eaha te mau tumu parau te nehenehe e tuatapapahia?

¹² Te haapiiraa e te utuafare fetii. Ia papu ia outou na mua e te apiti ra to outou utuafare i roto i ta outou porotarama haapiiraa e te huti nei te melo tataitahi i te rahiraa o te mau haamaitairaa. E tapao no te here anei mai te peu e e haapii maite te hoê upoo utuafare o ˈna anaˈe iho area ta ˈna vahine e ta ˈna mau tamarii ua poia roa ïa i te pae varua? E hopoia na te upoo utuafare ia horoa eiaha noa i te pae tino, i te pae varua atoa râ, “i to ˈna ihora, e rahi atu â i to ˈna ihora utuafare.” (Tim. 1, 5:8) Te faaite ra te aˈoraa i muri mai i horoahia i roto i te Maseli 22:6 i te paari ia haapii oioi i te Bibilia i te mau tamarii: “E haapii i te tamaiti i ta ˈna eˈa ia haere ra; e ia paari oia ra, e ore e faarue i taua eˈa ra.” Eiaha e manaˈo e mea aruaru roa ta outou tamarii. E nehenehe e haapii i te aruaruraa ra. (Tim. 2, 3:15) Te vai ra ta te mau utuafare fetii o te haere oioi ra i mua i te hoê porotarama taioraa e te haapiiraa. Te mea faufaa roa ˈˈe o te rave-tamau-raa ïa.

¹³ Te tuatapapa ra anei outou i te irava mahana e te mau melo o to outou utuafare, ma te faaroo i ta ratou mau pahonoraa e ma te horoa i te tahi mau uiraa no te ite e ua papu maitai anei ia ratou? O te reira te hoê haapueraa pu rahi maa pae varua. Te na reira ra e rave rahi mau utuafare i te taime tamaaraa. Hau atu, e tia ia faataa te utuafare tataitahi i te hoê taime tia i te mau hebedoma atoa no te hoê haapiiraa hohonu atu â. Peneiaˈe te hoê po aore ra te tahi atu taime tano. E titauhia i te taime ia papu te tahi mau tumu parau bibilia, ma te tuatapapa i te mau tuhaa atoa e te tapaoraa i te reira i roto i to tatou mafatu. E tauturu te haapiiraa faatupu-tamau-hia e te utuafare i te mau melo atoa ia haafaufaa i te reira. Te rave tamau ra anei to outou utuafare i taua huru haapiiraa ra? Ahiri e aita, mai teie atu nei a paraparau atu outou paatoa e a rave i te mau faanahoraa papu maitai ia riro atoa te haapiiraa ei tuhaa o to outou oraraa utuafare.—Eph. 6:4; Deut. 6:4-7.

¹⁴ Mai te peu e mea apî roa ta outou mau tamarii, mea tano ia haapii e o ratou i te tahi mau tumu parau e e nehenehe ta ratou e taa e o te tauturu ia ratou. Teie nei râ, e nehenehe atoa e faataa i te mau tumu parau fifi roa ˈˈe ma te faaanaanatae i te mau tamarii na roto i te mau uiraa ohie i nia i te tahi mau tuhaa ta ratou e nehenehe e taa. E rave rahi mau utuafare o te faaineine amui ra i Te Pare Tiairaa. E nehenehe râ te hoê haapiiraa utuafare e ravehia i nia i te mau huru buka atoa e tano ia au i te mau hinaaro o te utuafare. E haapuai te  haapiiraa e te utuafare i te mau taairaa e e faahohonu oia i te maramarama i te pae varua o to ˈna mau melo.

15-17. Eaha te mau haamaitairaa ta te haapiiraa tamau e horoa mai?

¹⁵ Te mau haamaitairaa o te haapiiraa tamau. I roto i te tahi atu mau haamaitairaa tupu oioi mai, e faatupu te haapiiraa tamau i te hoê feruriraa tamau ohie aˈe, no te mea ua faaohipahia e ua faaitoitohia. I roto i te taviniraa e i te mau putuputuraa a te amuiraa, e ohie aˈe tatou ia haamanaˈo e ia faataa i te mau tuhaa i haapii-aˈena-hia. E nehenehe tatou e pahono aau e rave rahi mau uiraa e anihia e te mau taata o tei anaanatae noa ˈtura i te poroi, e e ite oioi tatou i te mau irava bibilia no te haapapu i ta tatou mau pahonoraa. Te mea faufaa roa ˈtu â râ, e horoa mai te haapiiraa i te hoê ite taatoa maitai aˈe o te Parau a te Atua. E haapaari oia i to tatou faaroo, e faaaravihi atu â i to tatou maramarama no nia i te mau faaueraa tumu bibilia e e faarahi i to tatou oaoa i roto i te taviniraa a Iehova.—Heb. 5:14.

¹⁶ E horoa te taata paari i te parahiraa matamua i te mau mea e tano no to ˈna oraraa i te pae varua. No te ereraa i te taime, e tia paha ia ˈna ia haapae i te tahi mau ohipa faufaa iti aˈe, eita râ o ˈna e faarue i te haapiiraa o te Parau ora. I te taata e rave i taua haerea ra, te tǎpǔ ra o Iehova e: “E itea ˈtu oia e oe.” (Par. 1, 28:9) E tano mai te peu e e haapii outou eiaha noa no te faaî i to outou feruriraa i te ite, no te faaamu ra i to outou mafatu. Ia nehenehe to outou here e to outou aau mehara no Iehova no ta ˈna mau ohipa faahiahia ia rahi mai a tuatapapa noa ˈi outou i ta ˈna Parau!

¹⁷ Ua faaite-papu-hia te tapao mau o te mau haapiiraa e ravehia ra e te mau tavini a te Atua i roto i teie pure a te aposetolo Paulo i papaihia i roto i te Kolosa 1:9, 10: “I ore atoa ˈi matou i faaea ˈi i te pure ia outou, mai te mahana mai â i ite ai matou ra, e te aniraa ˈtu e ia faaîhia mai outou i te ite i to ˈna ra hinaaro, i te paari i te mau mea atoa, e te ite varua ra: ia au to outou haerea i to Iehova i te mau mea atoa e mauruuru ai ra, ia tupu te mau ohipa maitatai ia outou, e ia rahi hoi to outou ite i te Atua.”

[Uiraa haapiiraa]