Haapiiraa 22

Te mau omuaraa parau aravihi

1-3. I roto i te omuaraa parau o te hoê oreroraa, nafea outou e nehenehe ai e faaara i te anaanatae no te tumu parau?

 ¹Faaararaa i te anaanatae. E tia i te omuaraa parau o te hoê oreroraa ia faaara i te anaanatae no te tumu parau. Ta ˈna tapao o te haruraa ïa te ara-maite-raa o te feia e faaroo ra e te faaineineraa ia ratou ia haapao i te mau parau i muri iho. No te tapae i reira, mea tano ia faaite i te feia e faaroo ra i te faufaaraa o ta outou tumu parau.

² Te hoê o te mau ravea maitatai roa ˈˈe no te faaara i te anaanatae, ia faaite atu ïa i te feia e faaroo nei e ua tano te tumu parau no ratou e ia faataa ˈtu ia ratou e e nehenehe ratou e erehia i te ora. E tia ïa ia haamata na mua na nia i te faito ite o te feia i putuputu mai, no te mea e tia i te taata tataitahi i putuputu mai ia taa i ta outou omuaraa parau. E nehenehe e faaohipa i te hoê faaauraa parau, te hoê fifi, aore ra te hoê anairaa uiraa. Ia faaohipahia râ i te mau mea i matauhia e i taahia e te feia e faaroo ra, e nehenehe ïa ratou e faatano i nia ia ratou.

³ I te tahi taime, mea titauhia e ia faaohipa i te omuaraa parau no te faaruru i te tahi mau manaˈo paetahi, mai te peu iho â râ e e mârôhia te tumu parau. I roto i taua tupuraa ra, e faufaa taa ê to te omuaraa parau, no te mea maoti oia e tapea ˈi outou i te ara-maite-raa o te feia e faaroo ra a tiai noa ˈtu ai i te taime outou e haapapu ai i te manaˈo na roto i ta outou  mau maimiraa. I roto i te pororaa i tera e tera fare, e nehenehe e faaruruhia i te hoê patoiraa matauhia ma te faahiti na mua te reira ma te aravihi, e i muri iho ma te omua i te tumu parau ta outou e hinaaro ra e tuatapapa.

4-6. Eaha te tahi atu mau ravea o te tauturu ia outou ia rave i te mau omuaraa parau o te faaara i te anaanatae?

⁴ Mea faufaa roa i te mau taime atoa ta outou parau, i roto râ i te omuaraa parau o te faaara i te anaanatae, mea faufaa roa ˈtu â paha te huru e faaohipahia no te parau atu, ia faaauhia i te tahi mau vahi o te oreroraa parau. Ia faaineine-maitai-hia ïa te omuaraa parau eiaha noa no nia i ta outou e parau i te huru atoa râ outou e vauvau atu i te reira.

⁵ I te rahiraa o te taime, e tano aˈe te mau pereota poto e te ohie no te omuaraa parau. E tapao ta ˈna e titau ra i roto i te hoê taime poto, mea faufaa roa ïa te maitiraa i te mau parau; no reira mea maitai paha ia faaineine maite i na pereota e piti aore ra e toru matamua. A papai taatoa ˈtu i te haamataraa o ta outou nota. E nehenehe outou e taio aore ra e tamau aau roa ˈtu. I reira, e teiaha maitai ïa ta outou mau parau matamua. Hau atu, e noaa ia outou na roto i taua ravea ra rahi atu i te tiaturiraa e te ohieraa, no te tamau noa i ta outou oreroraa ma te faatano i te parau.

⁶ Teie â te tahi aˈoraa hau, eita paha te tiaau no te Haapiiraa e haapao i te reira ia aˈo oia ia outou i nia i taua tapao ra no te oreroraa parau. Mai te peu e e horuhoru to outou aau, a faataere i te parau e a haamǎrû i te taˈiraa o te reo. A paraparau ma te aueue ore, eiaha e horoa i te manaˈo e e taata etaeta outou, aita anaˈe, e au ore mai te feia e faaroo ra i te omuaraa iho o ta outou oreroraa.

7. Afea outou e faaineine ai i ta outou omuaraa parau?

⁷ Noa ˈtu e o te omuaraa parau te tuhaa matamua o te oreroraa parau, i te rahiraa o te taime, e faaineine-maitai-hia ia oti anaˈe te tino o te oreroraa i te faataahia. I reira, e ite tatou eaha te tano aˈe no te faaô i te mau manaˈo i faaineinehia.

**********

8-10. Eaha ta tatou e nehenehe e rave e ia tano ta tatou omuaraa parau i te tumu parau?

⁸ Omuaraa parau e tano i te tumu parau. No te faaô ma te aravihi i ta outou tumu parau, e tia i te omuaraa parau ia tano i te tumu parau. A haapao maitai e ia faaohipa noa outou i roto i ta outou omuaraa parau i te tahi mau manaˈo o te turu tahaa roa ˈtu i te tapao e imihia ra. E tia atoa e ia tano te mau parau haamataraa i te hanahana o te poroi o te Basileia e ia ore e faainoino i te mau taata ěê i rotopu i te feia e faaroo ra.

⁹ Eiaha ta outou omuaraa parau ia aratai noa i te oreroraa, ia haapapu atoa râ ma te maramarama e eaha te tuhaa ta ˈna e vauvau mai. No te na reira, e tia na mua ia taotia i ta outou oreroraa i nia i te hoê tumu parau taa maitai e mai te peu e e nehenehe, a imi i te ravea no te faaite i taua tumu parau ra i  roto i ta outou omuaraa parau. Noa ˈtu e aita outou e faahiti mai ta outou i papai, e nehenehe outou e faahiti i te tahi mau parau tumu i roto i ta outou omuaraa parau. I reira, eita te feia i putuputu mai e tiai e ia faataa outou i te tahi atu tuhaa o te oreroraa i ta te upoo parau o te oreroraa parau e faahiti ra.

¹⁰ E tia i te oreroraa tataitahi ia riro ei hoê e eiaha e haamata e te hoê huru e e faaoti e te tahi atu. Hau atu, mai te peu e e tia i te omuaraa parau ia faaara i te anaanatae no te tumu parau, e e tia atoa râ e ia tano i te tumu parau e ia ite e nafea ia amui i taua na titauraa e piti nei. Oia hoi, eiaha roa ˈtu e faaore i te tumu parau no te mea noa ua ite tatou i te hoê aamu maitai no te faatia ei omuaraa parau. Na te tapao o te oreroraa parau e faataa i te mau manaˈo e maitihia no te vauvau i roto i te omuaraa parau, e e tia e ia tano i te tino o te oreroraa parau.

**********

11-14. Nafea tatou e nehenehe ai e ite e ua tano te roaraa o ta tatou omuaraa parau?

¹¹ Roaraa tano noa o te omuaraa parau. Eaha te roaraa o te omuaraa parau? Aita e pahonoraa papu no teie nei uiraa. Tei te huru te faufaaraa o te omuaraa parau i te roaraa o te oreroraa parau, i te tapao e imihia ra, i te feia e faaroo mai e i te tahi atu â hiˈopoaraa.

¹² Oia mau, ia ore te oreroraa e mau, e mea fifi roa i te tahi taime ia faaroo i te hoê oreroraa parau e ia ite ma te maramarama e te papu i te amaharaa i rotopu i te omuaraa parau e te tino o te oreroraa parau. I reira te taeae aˈo e fifi ai ia tae anaˈe outou i taua tapao ra i nia i te api iti Aˈoraa no te oreroraa. E faahiti te taata haapii tataitahi i te tahi parau omuaraa i te haamataraa o ta ˈna oreroraa parau, e aniani râ te taeae aˈo i teie uiraa: Ua motumotu anei, e rave rahi manaˈo rii e mea roa roa anei ta outou omuaraa parau e aita te feia faaroo e anaanatae faahou ra i ta outou oreroraa na mua ˈˈe outou e vauvau ai i te mau manaˈo matamua?

¹³ Ia riro te omuaraa parau ei anairaa manaˈo vauvau-oioi-hia e faanaho-maitai-hia o te aratai i te oreroraa ma te faaara noa i te anaanatae o te feia faaroo. Ia riro oia ei taatoaraa aita e motumoturaa. Mea faufaa roa ïa te haaferuriraa. Mai te peu e aita e taairaa to te omuaraa parau i faanahohia e te oreroraa, e titau te reira i te tahi mau faataaraa roa o te tahi mau manaˈo rii, mea au aˈe e vaiiho te reira e e imi i te tahi atu.

¹⁴ Mai te peu e mea fifi ia ite i te amaharaa tano i rotopu i te omuaraa parau e te tino o ta tatou oreroraa parau, mea papu maitai e e ua tano te roaraa o ta outou omuaraa parau. Ua aratai maitai outou i te feia e faaroo ra i nia i te tino o te oreroraa  e e faaroo ratou i ta outou mau faataaraa ma te ore e tâuˈa roa e tei roto ratou i te vahi anaanatae roa o te oreroraa parau. Tera râ, mai te peu e e aniani ratou e afea roa outou e haamata ˈi, o te hoê tapao papu e ua roa roa ta outou omuaraa parau. E ite-pinepine-hia taua paruparu ra i roto i te mau faaiteraa e ravehia i tera e tera fare, no te mea e titau-pinepine-hia ia tauiui i te roaraa o te omuaraa parau mai tera uputa e te tahi atu.

15, 16. Eaha te roaraa o te omuaraa parau o te hoê oreroraa parau tei tatuhaahia?

¹⁵ Mai te peu e e horoa outou i taua noa oreroraa ra o te porotarama aore ra i te oreroraa taata haapii, ia tano noa te roaraa o ta outou omuaraa parau. Mai te peu râ o te hoê oreroraa i tatuhaahia, aore ra no te putuputuraa o te taviniraa, ia poto ïa ta outou omuaraa parau, no te mea ua amui-taatoa-hia ta outou omuaraa parau o tei vauvau-aˈena-hia i te omuaraa ra. E pau faufaa ore noa te taime no te mau omuaraa parau roa roa e te fifi. Na te tino o te oreroraa e faataa i te mau manaˈo tei tia ia outou ia tuatapapa.

¹⁶ Ei haapotoraa, te tapao o ta outou omuaraa parau, ia faatupu noa i te hoê taairaa e te feia e faaroo ra, ia faaara i to ratou anaanatae e ia aratai i te tumu o te oreroraa parau. A tapae oioi atu i taua tapao ra e i muri iho a tomo i roto i te vahi anaanatae o te tumu parau.

[Uiraa haapiiraa]