Eiaha na e faaea i te aparau atu e ta outou mau tamarii
Pene 11
Eiaha na e faaea i te aparau atu e ta outou mau tamarii
1, 2. Eaha mau na te aparauraa, e no te aha hoi e riro ai ei mea faufaa roa?
TE APARAURAA, e ere noa ïa te faahitiraa i te tahi mau parau. Mai ta te aposetolo Paulo e faataa maira, mai te peu e aita te taata e faaroo maira ia outou e taa maitai maira eaha ta outou e parau atura, e riro ïa outou i te “parau noa i roto i te reva”. (Korinetia 1, 14:9.) Te taa maitai ra anei i ta outou mau tamarii i te auraa o ta outou mau parau, e outou iho, te taa mau ra anei ia outou eaha ta ratou e tamata maira i te parau ia outou?
2 Ia tupu mau â te hoê aparauraa mau i rotopu ia outou, ei manaˈo ïa e ei manaˈo hohonu no roto mai i te hoê roro ia tae atu i roto i te tahi. Mai te peu e e nehenehe e faarirohia te here mai te mafatu o te oaoaraa i roto i te utuafare fetii, te aparauraa ra, o te taata iho ïa i roto i to ˈna taatoaraa. Ia faaea na taata faaipoipo i te aparau, e haamata mai ïa te mau fifi. Mai te peu e e faaea te aparauraa i rotopu te mau metua e te mau tamarii, mea ino roa ˈtu â ïa te mau fifi e iteahia mai.
IA ITE NA OUTOU NA MUA ˈˈE I TE OHIPA E TUPU MAI A MURI AˈE
3. E nehenehe te mau metua e farerei i te tahi mau fifi i te pae no te aparauraa i tei hea taime o te oraraa o te hoê tamarii?
3 E riro te aparauraa i rotopu i te mau metua e te mau tamarii i te fifi roa ˈtu â, eiaha i to ratou vai-nainai-raa ra, ia taurearea mai râ ratou. E tia hoi i te mau metua ia farii i te reira. E ere roa ˈtu i te mea tano ia manaˈo e no te mea e aita e fifi e farereihia i roto i te mau matahiti matamua o te oraraa o te hoê tamarii, mai te reira atoa ïa i roto i te mau matahiti a muri aˈe. E riro hoi te mau fifi i te tupu mai, e i reira te hoê aparauraa maitai e riro ai ei mea faufaa roa no te mea e nehenehe te reira e faatitiaifaro i te mau fifi aore ra e faaiti mai. Ma te papu maitai i te reira, e tia mau â i te mau metua ia ite eaha te ohipa e tupu a muri aˈe, inaha “e mea maitai aˈe te hopea ra i te matamehai ra”. — Koheleta 7:8.
4. E mau noa anei te faaiteraa te mau melo o te hoê utuafare fetii i to te tahi e to tahi manaˈo, i roto noa i te tauaparauraa? A faataa mai na.
4 E rave rahi roa mau mea e turu e e atuatu i te hoê aparauraa maitai i rotopu i te mau melo o te hoê utuafare fetii. I roto i te roaraa o te mau matahiti, e nehenehe te tane e ta ˈna vahine e tiaturi i te tahi e te tahi e e taa eaha to te tahi e to te tahi hinaaro e nehenehe roa ˈtu ai raua e papu e e noa ˈtu e aita e parau, na roto noa i te hiˈoraa mai, te ataraa mai aore ra te tahi ohipa, eaha ta raua e hinaaro ra. Ma to ratou tiaraa metua, e tia ia ratou ia faaitoito i te horoa i te hoê niu paari mau i roto i to ratou mau auraa e ta ratou mau tamarii. Hou aˈe hoi te hoê aiû iti e taa ˈi i te auraa o te mau parau, ua ite to ˈna metua nafea râ ia rave e ia ore oia ia mǎtaˈu e nafea atoa ia here ia ˈna. Mai te peu râ e, i roto i te tau paariraa o te mau tamarii, e rave te utuafare fetii te ohipa, e faaanaanatae ia ratou, e hau atu â e tavini amui i te Atua, e tupu mau â ïa i rotopu i to ˈna mau melo i te hoê aparauraa e vai maoro atu. Teie râ, ei mau tutavaraa e rave rahi ïa e ei paari no te tapea i te reira.
A FAAITOITO ATU I TA OUTOU TAMARII IA FAAITE MAI I TO ˈNA MANAˈO
5-7. a) No te aha e mea maitai roa ia ore te mau metua e tapea i te hoê tamarii ia faaite mai i to ˈna manaˈo? b) Nafea te mau metua e nehenehe ai e haapii i ta ratou mau tamarii i te peu?
5 Ia au i te tahi parau tahito, “ua hamanihia te tamarii ia ite-noa-hia ˈtu ratou, eiaha râ ia faaroohia ˈtu ratou”, parau mau hoi te reira i te tahi taime. E tia i te mau tamarii ia haapii, mai ta te Parau a te Atua e faahiti ra, “e taime i to te mâmû noa, e taime to te parau”. (Koheleta 3:7.) Mea hinaaro mau râ hoi na te mau tamarii rii ia haapaohia ratou. No reira, e tia ˈtura ïa i te mau metua ia ore ia haamâmû faufaa ore noa i to ratou hinaaro e faaite mai i to ratou manaˈo. Eiaha ïa outou e manaˈo e e hoê â huru to te hoê tamarii rii apî i mua i te mau ohipa i te hoê taata paari. No te taata paari, ua riro noa te hoê ohipa e tupu ei tuhaa no te mau ohipa rarahi o te oraraa nei. Area te tamarii ra, e nehenehe o ˈna e anaanatae oioi i te hoê mea e riro paha i te rave rahi i to ˈna feruriraa, e inaha, moe-roa-hia ˈtura ïa ia ˈna te toea. E tomo mai te hoê tamarii rii ma te anaanatae rahi i roto i te hoê piha no te faatia mai i te hoê aamu i to ˈna metua tane aore ra i to ˈna metua vahine. E tapea mai ïa to ˈna metua tane aore ra to ˈna metua vahine ia ˈna i te na ôraa mai ma te iria e “Mâmû!”, aore ra e riri oia e e mau roa ˈtura ïa te anaanatae o te tamarii. Peneiaˈe paha e ere e mea faufaa roa taua muhu a te tamarii ra. Teie râ, na roto i te faaitoitoraa outou i ta outou mau tamarii ia faaite mai i to ratou manaˈo e rave ïa outou e ia ore ratou e tapea na ratou iho i te mau mea ta outou e hinaaro ra ia faaite mai ratou ia outou e oia hoi, o ta outou e hinaaro mau e ite.
6 E riro te iteraa i te peu i te faatupu i te hoê aparauraa maitai. E tia ˈtura ïa i te mau metua ia haapii i ta ratou mau tamarii e ia horoa ratou iho i te hiˈoraa maitai i roto i taua tuhaa ra, i roto iho â râ i to ratou mau auraa e ta ratou mau tamarii. Mea faufaa roa ia aˈo atu ia ratou i te mau taime atoa e tia ˈi e i te tahi taime ma te aˈo papu (Maseli 3:11, 12; 15:31, 32; Tito 1:13). Teie râ, e riro te mau tamarii o te tâpû-tamau-noa-hia ˈtu ta ratou parau, e faatitiaifaro-noa-hia ta ratou huru paraparau aore ra mea ino roa ˈtu â, ia faainohia ratou aore ra ia haamaauhia ratou ia paraparau ratou, i te ore e faaite faahou mai i to ratou manaˈo aore ra i te fariu tia ˈtu i nia i te tahi atu taata ia hinaaro ratou e paraparau. Mai te reira hoi te huru ia paari mai ta outou tamaiti aore ra ta outou tamahine. No te aha ïa outou e ore ai e rave i te taime i teie po no te haamanaˈo faahou maa taime iti i ta outou mau tauaparauraa e ta outou tamaiti aore ra ta outou tamahine e a aniani ai e: E hia taime to ˈu fariiraa i to ˈna manaˈo, to ˈu faaitoitoraa ia ˈna aore ra to ˈu haapopouraa ia ˈna? I te tahi aˈe pae, e hia taime to ˈu faaiteraa ˈtu ia ˈna e aita roa ˈtu vau e farii ra i to ˈna manaˈo aore ra i to ˈu faahitiraa ˈtu ia ˈna i te mau parau no te tuu roa ia ˈna i raro aore ra no te faaite atu ia ˈna i to ˈu mauruuru ore, to ˈu iria? E riro te faahopearaa o taua hiˈopoaraa na outou ra i te faahitimahuta ia outou. — Maseli 12:18.
7 E pinepine e, e tia i te mau metua ia faaite i te faaoromai e te hitahita ore. Oia mau, e riro te mau taurearea i te ore e tapea ia ratou. E ohie roa hoi ratou i te tâpû i te mau tauaparauraa a te mau taata paari no te faaite noa ˈtu eaha ta ratou e hinaaro ra e parau. E nehenehe hoi te mau metua e aˈo papu atu ia ratou, mea maitai râ hoi i te tahi taime ia faaroo atu ia ratou, ma te horoa ˈtu hoi i te hoê hiˈoraa i te pae no te hitahita ore, i muri iho, i muri aˈe i te hoê pahonoraa poto noa, ia faahaamanaˈo atu ïa ia ratou ma te mǎrû e mea maitai ia ite i te mau peu maitatai e ia tâuˈa ˈtu i te tahi pae. No reira, i ô nei atoa, mea maitai ia “ru te taata atoa i te faaroo, ia haere maine i te parau, ia haere maine hoi i te riri”. — Iakobo 1:19.
8. Nafea te mau tamarii e nehenehe ai e faaitoito i ta ratou mau tamarii ia haere mai e ani ia ratou i te tahi tauturu?
8 E hinaaro outou ia haere mai ta outou mau tamarii e farerei ia outou ia fifi noa ˈtu ratou. No reira, a faaitoito atu ia ratou ia na reira i te faaiteraa ˈtu e o outou atoa, e hinaaro outou ia arataihia outou i roto i te oraraa, e te vai ra te hoê taata ta outou e fariu tia ˈtu i nia iho. Ma te faataa ˈtu e nafea râ hoi ia haamau i te hoê aparauraa maitai e ta ˈna mau tamarii, a vai aruaru noa ˈi ratou, teie ta te hoê metua tane i parau:
“Fatata pauroa te po, i te taime taotoraa, e pure vau e ta ˈu mau tamarii. E i te mea hoi e e pinepine ratou to nia i te roi, e tuturi ïa vau e e rave vau ia ratou i roto ia ˈu. E faahiti vau i te hoê pure e e pinepine ratou i te faahiti i te tahi i muri aˈe i ta ˈu. E ere i te mea varavara ia apa mai ratou ia ˈu e ia parau mai ratou ia ˈu e: ‘Papa, mea here roa na ˈu ia oe’, e i muri iho e faaite mai ratou eaha to roto i to ratou mafatu. I roto i to ratou roi veavea maitai e i roto i to ratou metua tane, e nehenehe ratou e paraparau no nia i te tahi mau fifi to ratou iho e ta ratou e hinaaro ra ia tauturuhia ratou aore ra e faaite noa mai ratou i to ratou mau manaˈo here ra.”
Mai te peu e eita te mau pure ta outou e faahiti i te taime tamaaraa aore ra i te tahi atu taime i te mau pure e na-nia-iho-noa-hia i te faahiti, no roto roa mai râ i te mafatu e e faaite mai i te haavare ore o to outou mau auraa e to outou Poiete, te Metua i te raˈi, e nehenehe te reira e turu rahi mai ia outou ia haamau i te mau auraa maitai roa e ta outou mau tamarii. — Ioane 1, 3:21; 4:17, 18.
TE MAU MATAHITI TAUIRAA
9. Eaha te nehenehe e parau no nia i te mau fifi e te mau hinaaro o te mau taurearea ia au i te mau hinaaro o te mau tamarii apî aˈe?
9 Ua riro te vai-taurearea-raa ei tau tauiraa, ei matahiti i reira ta outou tamaiti e ta outou tamahine, e ere faahou hoi i te tamarii, aitâ i riro mai atura ei taata paari. E ite to ratou tino i te tahi tauiraa, e e ohipa hoi taua mau tauiraa ra i nia i to ratou manaˈo e horuhoru ai ra. E ere atura ïa te mau fifi e te mau mea e hinaarohia e te mau taurearea hoê â e tau matahiti na mua ˈtu. No reira, e tia i te mau metua ia faaau ia ratou i taua mau huru apî ra, no te mea te ohipa i riro ei mea aravihi na mua ˈtu e riro ïa i te ore e tano faahou i teie nei. E hinaaro te mau taurearea hau atu i te mau haamaramaramaraa ia faaauhia i to ratou vai-nainai-raa ra, oia hoi te auraa, mea faufaa roa te hoê aparauraa maitai.
10. a) No te aha te tahi mau haamaramaramaraa poto noa no nia i te mau tumu parau i te pae no te taatiraa e ore ai e navai no te mau taurearea? b) Nafea te mau metua e nehenehe ai e faatupu i te tahi mau aparauraa e ta ratou mau tamarii no nia i te mau tumu parau i te pae no te taatiraa?
10 Ei hiˈoraa, eita te mau faataaraa poto noa ta outou e horoa ˈtu na ta outou aiû no nia i te taatiraa i te pae tino, e navai faahou no te mau taurearea. E haamata hoi ratou i te ite i te mau hinaaro i te pae no te taatiraa, e riro râ hoi ratou i te huru ê roa i te ui atu i te tahi mau uiraa i to ratou metua tane aore ra i to ratou metua vahine. Tei te mau metua ˈtura ïa te raveraa i te taahiraa avae matamua, e ere roa ˈtu hoi i te mea ohie mai te peu e aita ratou i haamau e i atuatu e o ratou i te hoê aparauraa maitai, i te riroraa iho râ ei mau hoa maitai roa no ta ratou mau tamarii i roto i te ohipa mai roto atoa i te mau hautiraa. E ite mai ïa te mau tamarii tamaroa i te peapea ia isahia ratou no te taime matamua, e ia roohia te mau tamarii tamahine i to ratou maˈi avae matamua, ia faataahia ˈtu ia ratou taua mau mea ra na mua ˈˈe (Levitiko 15:16, 17; 18:19). Ei hiˈoraa, i roto i te hoê ori-haere-raa e ta ˈna tamaiti, e nehenehe te metua tane e tuatapapa i te tumu parau no nia i te faanavenaveraa i to ˈna iho melo taatiraa. A faataa noa ˈtu ai oia ia ˈna e e farerei te rahiraa o te mau taurearea i teie fifi, e nehenehe ta ˈna e ani atu e: “Mai te reira atoa anei no oe?” E nehenehe atoa e tuatapapa i te tahi mau fifi no nia i te mau taurearea i roto i te mau aparauraa e te fetii i reira te metua tane e te metua vahine e horoa tahaa ˈi i te tahi mau aˈoraa, i roto râ hoi i te hoê huru tupuraa au maitai.
IA ITE NA OUTOU I TE MAU HINAARO O TE MAU TAUREAREA
11. E taa ê te mau taurearea i te mau taata paari i roto i tei hea tuhaa?
11 “E titau te paari; e te mau mea atoa i noaa ia oe ra e titau â i te haapao maitai.” (Maseli 4:7). E te mau metua, ia haapao maitai na outou i te mau ohipa a te mau taurearea e ia ite atoa na outou eaha to ratou mau manaˈo hohonu. Eiaha e moehia ia outou e i vai apî atoa na outou. Ia haamanaˈo atoa na outou e mai te peu e i vai apî na te hoê taata paari, e ua ite hoi eaha te vai-apî-raa, aita te hoê taurearea i riro aˈenei ei taata paari. Eita te hoê taurearea e hinaaro ia faarirohia o ˈna mai te tamarii te huru, noa ˈtu â ïa e aitâ oia i riro atura ei taata paari e e ere roa ˈtu na ˈna te mea anaanatae te mau ohipa a te taata paari. Mea au rahi aˈe na ˈna ia arearea e mea au aˈe na ˈna ia horoa i to ˈna taime no te arearea.
12. E hinaaro te mau taurearea ia nafea mai to ratou mau metua ia ratou?
12 I roto i taua faito o to ratou oraraa ra, te titau nei te mau taurearea i te tahi mau mea i to ratou mau metua iho. E hinaaro ratou ia taahia eaha ta ratou e hinaaro ra. Te hinaaro nei ratou, ia faarirohia ratou mai te mau taata taa maitai. Te titau nei ratou ia horoahia ˈtu te tahi mau faaueraa e te tahi mau aˈoraa tano maitai e faataa ˈtu e te paari ra ratou. E hinaaro iho â râ ratou ia haafaufaahia ratou e ia haapopouhia mai ratou.
13. Eaha hoi te huru o te mau taurearea ia faahepo mai to ratou mau metua i te tahi mau opaniraa, e no te aha?
13 Eita roa ˈtu e tia i te mau metua ia maere i te iteraa ˈtu i ta ratou mau tamarii taurearea ia ore e haapao i roto i te tahi faito i te mau opaniraa ta ratou e faahepo atu. Inaha te fatata ˈtura ratou i te matahiti e riro ai ratou ei mau taata e hinaaro e faatere noa ia ratou iho e te hinaaro ra hoi ratou e fanaˈo i te hoê tiamâraa rahi atu â i te pae no te raveraa i te tahi mau ohipa e i te pae no te opuaraa. Eita ta te mau aiû e nehenehe e paruru ia ratou e e hinaaro hoi ratou i te aupuru tamau a to ratou mau metua, e e tia ˈtura ïa ia haapao maitai i te mau tamarii rii. Teie râ, a paari noa ˈi te mau tamarii e rahi noa ˈtu â ta ratou tuhaa ohipa e e puai noa ˈtu â hoi to ratou mau auraa e te mau taata no rapaeau mai i te utuafare fetii iho. E nehenehe te perehahuraa ˈtu ta outou tamaiti e ta outou tamahine no te rave mai ta ratou e hinaaro, i te faariro ia ratou ei mau taata fifi mau ia ora ˈtu i pihai iho i te tahi taime. Parau mau, eita ta te mau metua e nehenehe e farii e ia ore roa ˈtu to ratou mana ia aurarohia, e te reira no te matai iho hoi o ta ratou mau tamarii. E nehenehe râ ta ratou e tuatapapa i taua fifi nei ma te paari e e tapea i te hoê aparauraa mau i rotopu ia ratou, ia tapea mai ratou i roto i to ratou feruriraa no te aha râ te mau taurearea e na reira ˈi.
14. Eaha ta te mau metua e nehenehe e rave ia hinaaro ta ratou mau tamarii e opua ia au i to ratou iho manaˈo?
14 Ia hinaaro ta ratou tamaiti aore ra ta ratou tamahine e ora mai ta ratou e hinaaro, eaha ïa te tia i te mau metua ia rave? Ua riro taua hinaaro ra mai te hoê niuniu ta outou e tapea i roto i to outou rima. Ia tuu taue outou i te reira, tera ˈtura ïa e reva ˈtura i te mau huru vahi atoa. Ia tapea maoro mai outou ia ˈna, e rohirohi ïa outou e e riro o ˈna i te paruparu mai. Ia tuu mǎrû râ outou ia ˈna ma te haapao maitai, e matara mǎrû noa ïa a faaea noa ˈi i to ˈna vahi.
15. Na te aha e faaite maira e ua hiˈopoa maitai te mau metua o Iesu i to ˈna tupuraa i te rahi?
15 Te horoa mai nei te vai-apî-raa o Iesu i te hoê hiˈoraa i te pae no te paariraa e tae atu ai i te taime e opua ˈi oia e rave mai ta ˈna e hinaaro. Te faaite maira te aamu ta Luka i papai i roto i te Luka 2:40 e i to ˈna vai-apî-raa ra “tupu atura taua tamaiti ra e itoito atura te aau, î aˈera hoi i te paari, e te vai ra te maitai a te Atua i nia ia ˈna”. Aita e feaaraa e e tiaraa faufaa roa to to ˈna mau metua i roto i to ˈna tupuraa i te rahi, inaha, noa ˈtu â ïa e e taata tia oia, aita te paari i tupu taue noa mai i roto ia ˈna. Ua haapao tamau oia e ia fanaˈo oia i te hoê huru tupuraa i te pae varua au maitai no ˈna, mai ta te toea o te aamu e haapapu maira. I te ahuru ma pitiraa o to ˈna matahiti, tei Ierusalema to ˈna utuafare fetii no te faatupu i te oroa o te Pasa, ua haere atura Iesu i te hiero e ua aparau atura e te mau taata haapii faaroo i reira. Ma te papu maitai, ua vaiiho Maria raua o Iosepha na ta raua tamaiti 12 matahiti i te tahi tiamâraa. Ua faarue maira raua ia Ierusalema ma te ore hoi i ite e ua faaea ˈtu Iesu i reira. Ua manaˈo paha ïa raua e tei te mau hoa aore ra tei te mau metua ra oia, te hoˈi atoa maira. Ua ite aˈera raua ia ˈna e toru mahana i muri aˈe, i te hiero eiaha e te haapii atura i to ˈna mau matahiapo “te faaroo atura [râ] e te ui atura ia ratou”. A parau atu ai to ˈna metua vahine e ua peapea roa raua no ˈna, ua pahono atura Iesu ma te faatura hoi, e ua manaˈo oia e ua ite raua e tei hea râ o ˈna i te taime ratou e faareva ˈtu ai. Noa ˈtu â ïa e ua fanaˈo Iesu i te tahi huru tiamâraa, te na ô râ te aamu e “Faaroo atura [oia] ia raua”, ma te auraro i ta raua mau faaueraa e ta raua mau opaniraa i to ˈna vai-taurearea-raa ra e ua “tupu atura Iesu i te rahi e te paari, e te herehia mai e te Atua e te taata atoa”. — Luka 2:41-52.
16. Eaha te tia i te mau metua e farerei ra i te tahi fifi e te hoê taurearea, ia tapea maitai i roto i to ratou feruriraa?
16 Oia atoa, e tia i te mau metua ia horoa na ta ratou mau tamarii i te tahi tiamâraa, o te rahi mǎrû noa ˈtu hoi a fatata noa ˈtu ai ratou i te matahiti paariraa, e ia vaiiho atoa ia ratou ia rave rahi noa ˈtu â i te tahi mau opuaraa, i raro aˈe iho â ïa i ta ratou aratairaa e ta ratou hiˈopoaraa. Ia tupu mai te tahi mau fifi, e tia i te mau metua ia ite e eaha râ te tumu, ia ore te tahi mau mea faufaa ore ia tupu mai. E pinepine e, e ere e no te mea te patoi ra te taurearea i to ˈna mau metua, te hinaaro ra râ oia i te tahi tiamâraa ma te ore hoi e ite e nafea râ o ˈna. E nehenehe atura ïa te mau metua e hape e eita ˈtura hoi ratou e tuatapapa i te fifi mau. Mai te peu e e ere te fifi i te mea ino roa, eiaha e tâuˈa, mai te peu râ e mea ino ra, a faaite papu atu ïa i to outou manaˈo. Eiaha na e ‘tamouu i te naonao, e e horomii noa i te kamela’. — Mataio 23:24.
17. E tia i te mau metua ia haapao maitai i te aha, ia faahepo ratou i te tahi mau opaniraa i ta ratou mau tamarii taurearea?
17 E nehenehe te mau metua e atuatu i te mau auraa maitai e ta ratou mau tamarii taurearea mai te peu e e mau opaniraa tano mau ta ratou e faahepo atu ia ratou. Ia haamanaˈo na outou e mai te peu “te paari no nia maira, e mea anoi-ore-hia”, mea “faaroo ohie” atoa râ oia e te “î i te aroha e te hamani maitai” (Iakobo 3:17.) Te faaite maira te Bibilia e eita roa ˈtu te eiâ, te poreneia, te haamori idolo e te tahi atu mau hara ino roa mai te reira te huru e fariihia (Korinetia 1, 6:9, 10). I roto i te tahi atu mau tuhaa, e rave te hoê taata i te hoê ohipa maitai aore ra i te hoê ohipa ino ia au i te huru e fariihia; tei te faito hoi teie huru tumu parau. No reira, mea maitai te amu i te maa, te taata râ e amu rahi, e riro ïa ei puhura. Mai te reira atoa te huru no vetahi mau peu faaanaanataeraa mai te ori, te mau hauti, te mau tamaaraa, e rave rau atu â. E pinepine te itehia e te fifi, e ere roa ˈtu ïa te mau peu faaanaanataeraa iho, te huru tupuraa râ e te mau huru taata ta tatou e amuimui atu. No reira, mai ta tatou e ore roa ˈtu e farii i te puhura aore ra i te amu-rahi-raa i te maa, eiaha râ i te amu-noa-raa i te maa, eita atoa e tia i te mau metua ia opani roa i te hoê ohipa e tano i te feia apî, inaha, i te parau mau e nehenehe noa ta ratou e parau atu i te tahi parau mai te peu e ua faarahi roa vetahi pae aore ra e mau huru hinaaro-ore-hia ta ˈna e faatupu mai. — A faaau e te Kolosa 2:23.
18. Nafea te mau metua e nehenehe ai e tauturu i ta ratou mau tamarii ia haapao maitai i ta ratou mau amuimuiraa?
18 Mea hinaaro na te taatoaraa o te mau taurearea i te hoa. E riro paha e mea iti roa o ratou te riro mai ei amuimuiraa “tano maitai” no ta outou mau tamarii. Inaha hoi, aita anei ratou iho e hapa ra? E tia paha ïa ia outou ia opani atu ia ratou ia ore roa ˈtu e amuimui atu i roto i te tahi mau taurearea o te riro hoi i te faaino roa ia ratou (Maseli 13:20; Tesalonia 2, 3:13, 14; Timoteo 2, 2:20, 21). Te vai atoa ra te tahi mau taurearea ta outou e au i te huru e vetahi o ta outou e ore au. Maoti hoi i te opani roa ˈtu i ta outou tamaiti aore ra i ta outou tamahine ia amuimui atu i roto i te hoê o ratou no te tahi mau hapa, e nehenehe paha ïa ta outou e faaite atu i ta outou tamarii e mea haapopou roa na outou i te mau huru maitai o to ˈna hoa, ma te faaara ˈtu ia ˈna i to ˈna mau huru paruparu. E nehenehe atoa ta outou faaitoito ia ˈna ia haa oia i te faatupu i te hoê huru maitai i roto i taua mau tuhaa ra, ei maitai no to ˈna hoa.
19. Ia au i te faaueraa tumu i roto i te Luka 12:48, nafea tatou e nehenehe ai e tauturu i te mau tamarii ia faaohipa i te hoê huru maitai i nia i te tiamâraa?
19 Te tahi atu â ravea no te tauturu i te hoê taurearea ia faatupu oia i te hoê hiˈoraa maitai i nia i te tiamâraa rahi e noaa riirii mai ia ˈna, te faataaraa ˈtu ïa ia ˈna e apitihia mai te hoê tiamâraa rahi e te mau hopoia rarahi atu â. “O tei tuuhia ˈtu te mea rahi ra, e mea rahi atoa te titauhia ˈtu.” (Luka 12:48). Rahi noa ˈtu â te hoê tamarii i te nehenehe e tiaturihia, rahi noa atoa to ˈna mau metua i te tiaturi ia ˈna. — Galatia 5:13; Petero 1, 2:16.
E ARA E IA APARAU OUTOU IA AˈO NOA ˈTU OUTOU E IA FAATITIAIFARO
20. Hau atu i te mana, eaha te mau huru maitai e tauturu i te mau metua ia tamau â i te aparau e ta ratou mau tamarii?
20 Mai te peu e e horoa noa mai te hoê taata i te tahi mau aˈoraa ma te ore hoi e ite eaha ta outou e farerei ra, e riro outou i te ore e faufaa-rahi-hia i taua mau aˈoraa ra. Mai te peu râ e e mana to ˈna no te faahepo mai ia outou ia rave i ta ˈna mau faaueraa, e nehenehe paha ïa te reira e riro ei mea tano ore no outou e i te faairia ia outou. E tia i te mau metua ia haamanaˈo e e “te imi ra te aau o te taata haapao ra i te ite” e “e te taata ite ra e haere ïa to ˈna puai i te rahiraa”. (Maseli 15:14; 24:5.) Parau mau, e mana to outou i nia i ta outou mau tamarii, ia amui atoa mai râ outou i te ite, e faufaahia ïa ta outou aparauraa e o ratou. Te taata e erehia i te maramarama i roto i ta ˈna huru aˈoraa i te mau taurearea, e riro ïa oia i te faatupu i te hoê “patu” i rotopu ia ratou e i te faaore roa i te tahi aparauraa i rotopu ia ratou.
21. Eaha hoi te huru o te mau metua i nia i te mau tamarii e rave i te mau hapa ino roa?
21 E nafea ïa outou ia fifi noa ˈtu ta outou tamaiti aore ra ta outou tamahine aore ra ia rave oia i te tahi hape ino roa aore ra i te tahi hapa o ta outou e ore roa ˈtu e manaˈo e e rave oia? Papu maitai, eiaha roa ˈtu outou e farii i te ino (Isaia 5:20; Malaki 2:17). Teie râ, ia papu na ia outou e teie te taime no te tauturu papu i ta outou tamarii e no te aratai ia ˈna ma te aravihi. Mai te Atua ra o Iehova, e nehenehe hoi ta outou e parau e: ‘Haere mai, e faatitiaifaro tâua i te mau mea; e ere paha i te mea ino roa, e nehenehe râ hoi e faaafaro.’ (Isaia 1:18). E nehenehe te riri uˈana aore ra te faahaparaa ˈtu ma te etaeta mau e tâpû roa i te aparauraa. E rave rahi mau taurearea tei rave i te hoê haerea ino i parau e: “Eita ta ˈu e nehenehe e parau atu i to ˈu mau metua, e riri mai raua ia ˈu.” Teie te taiohia i roto i te Ephesia 4:26: “E ia riri outou ra, eiaha ia harahia; eiaha ia mairi te mahana i to outou ririraa.” Ia haavî na outou i to outou mau manaˈo e horuhoru ai ra ia faaroo atu outou eaha ta ta outou tamaiti aore ra ta ta outou tamahine e parau mai. Ia faaroo atu outou ia ˈna ma te hau, e farii ohie mai ïa oia i te aˈo ta outou e faahepo atu ia ˈna.
22. No te aha te mau metua e ore ai e tia ia faaite e, aita e ravea faahou no te aˈo i ta ratou tamarii?
22 Teie râ, e riro paha e e ere te tahi fifi taa maitai teie, o te hoê râ taime fifi aore ra mau hapa e ite-tamau-hia. E tia ˈtura ïa i te mau metua ia aˈo i te tamarii, ma te ore roa ˈtu râ e parau atu ia ˈna aore ra ia ore hoi oia e manaˈo e aita e ravea faahou no ˈna. Tei to outou faaoromai te faito o te hohonuraa o to outou here (Korinetia 1, 13:4). Eiaha e aro i te ino i te ino, ia tamau râ outou i te aro i te reira i te maitai (Roma 12:21). Mea ino roa ia faahaehaa i te hoê taurearea i te parau-haere-noa-raa e e mea “hupehupe” roa o ˈna, “te orure”, “haapaoraa ore” aore ra “aita e ravea faahou no ˈna”. E tiaturiraa roa to te aroha (Korinetia 1, 13:7). E nehenehe te hoê taurearea e atea ê roa, e rave i te ohipa iino e e faarue mai i te utuafare. Ia ore ratou e faaite e te farii ra ratou i to ˈna huru, e nehenehe to ˈna mau metua e tatara noa i te uputa no to ˈna hoˈi-faahou-raa mai. Nafea hoi te reira? Na roto ïa i te faaiteraa ˈtu e ere o ˈna ta ratou e ore ra e farii o to ˈna râ haerea. E nehenehe ta ratou e tamau noâ i te haapapu atu ia ˈna e ua ite ratou e e mau huru maitai â to ˈna e te tiaturi nei ratou e e upootia te reira i nia i te ino. Mai te peu e mai te reira te huru, mai te tamaiti i haere i te fenua roa ra o te parabole a Iesu, e nehenehe ta ˈna e hoˈi faahou mai i te utuafare o to ˈna mau metua ma te papu maitai eita roa ˈtu taua hoˈiraa mai no ˈna ra faaitoitohia e te tatarahapa e fariihia ma te etaeta. — Luka 15:11-32.
A HAAPAPU ATU IA ˈNA E E FAUFAA MAU TO ˈNA
23. No te aha e mea faufaa roa ia papu maitai i te mau taurearea e e mau melo farii-maitai-hia ratou i roto i te utuafare?
23 Mea hinaaro na te taatoaraa o te mau taata e ia tâuˈahia mai ratou; te hinaaro nei ratou ia fariihia ratou, ia fariihia to ratou manaˈo. Parau mau, no te reira ra, eiaha ïa ratou e faaea rahi noa o ratou anaˈe. E tia ia ratou ia pee i te haerea e fariihia e te pǔpǔ o ta ratou e hinaaro e amui atu. Mea hinaaro na te mau taurearea i te hoê utuafare fetii. A faaite atu na ia ratou e e mau melo faufaa roa ratou no te utuafare fetii, o ratou te tahi tuhaa no te oaoaraa i roto i te utuafare, e e nehenehe atoa hoi ta ratou e apiti atu i roto i te faatupuraa i te tahi mau opuaraa e ravehia e te utuafare fetii.
24. Eaha te ore roa ˈtu e tia i te mau metua ia rave, mai te peu e hinaaro ratou e ia ore te hoê tamarii e pohehae i te tahi?
24 Teie ta te aposetolo e parau ra: “Eiaha tatou e faateitei faufaa ore noa, i te faaoooraa te tahi i te tahi, e te feiiraa te tahi i te tahi.” (Galatia 5:26). Te mau metua e haapopou i ta ratou tamaiti, aore ra i ta ratou tamahine, ia rave oia i te tahi ohipa maitai, te patoi ra ïa raua ia tupu te hoê huru feruriraa mai te reira te huru; ia faaau râ raua ia ˈna i te tahi atu taurearea, ma te rave e ia manaˈo oia e mea iti aˈe oia i te tahi, e riro ïa raua i te faatupu i roto ia ˈna i te pohehae e te inoino. Mea maitai aˈe, ia au i te aposetolo ia “hiˈopoa maite na râ te taata atoa i ta ˈna ihora ohipa, e riro tana oaoaraa ia ˈna iho i reira, eiaha ia vetahi ê”. (Galatia 6:4.) Te hinaaro nei te taurearea tataitahi ia fariihia oia e ia herehia oia e to ˈna mau metua no ˈna iho e no te mea ta ˈna e nehenehe e rave.
25. Nafea te mau metua e nehenehe ai e tauturu i ta ratou mau tamarii ia faaite mai e e nehenehe mau â ratou e tiaturihia?
25 E nehenehe te mau metua e tauturu i ta ratou mau tamarii ia faaite i to ratou faufaaraa na roto i te haamatauraa ia ratou ia amo i te tahi mau hopoia i roto i te mau tuhaa atoa o te oraraa nei. Ua faaô atu ratou i roto i to ratou feruriraa mai to ratou aruaruraa mai â i te manaˈo no te haerea tia, te faaiteraa i te parau mau e te faatura ia vetahi ê. E patu ïa ratou i nia i taua niu matamua ra ma te faaite atu ia ratou nafea râ ia faatupu i taua mau huru nei i roto i te totaiete taata nei, na roto iho â râ i te raveraa i te ohipa e te faaiteraa e e nehenehe ratou e tiaturihia. I to ˈna vai-taurearea-raa, a “tupu noa ˈi oia i te rahi i te paari”, ua haapii Iesu i te hoê toroa i pihai iho ia Iosepha, to ˈna metua tane faaamu. Oia mau, a toru ahuru ai to ˈna matahiti, ua rave aˈera oia i te ohipa pororaa i te Basileia, e e faahiti na hoi te taata i te parau i te na ôraa e e “tamuta” oia. (Mareko 6:3.) I to ratou vai-taurearea-raa ra, e tia i te mau tamarii tamaroa ia haapii e eaha te auraa e rave i te ohipa e te haamauruururaa i te hoê paoti ohipa aore ra te hoê taata e hinaaro ra ia ravehia ta ˈna ohipa noa ˈtu e e toroa hoohoo haere noa to ˈna. E nehenehe e faaite atu ia ratou e te riroraa ei mau rave ohipa itoito mau, te maitai e te nehenehe e tiaturihia, e noaa ïa ia ratou i te faatura ia ratou iho, e tae noa ˈtu hoi te faatura e te hanahana no ǒ mai ia vetahi ê ra, e eita noa ratou e faahanahana i to ratou mau metua e to ratou utuafare fetii, ‘ia nehenehe atoa râ te parau a te Atua a to ratou Ora ra ia ratou i te mau mea atoa ra’. — Tito 2:6-10.
26. Eaha te peu tahito e haapapu na e mea faufaa roa te hoê tamahine no to ˈna mau metua?
26 Area te mau tamarii tamahine ra, e nehenehe ïa ratou e haapii nafea ia faanehenehe i te fare e nafea ia riro ei mau vahine maitai i roto i te utuafare ra, o te riro hoi ratou i te haamaitaihia e te aruehia e te mau melo o to ratou utuafare e te mau taata no rapae. I te mau tau bibilia, e peu titauhia e ia ani te mau metua i te hoê tuhaa moni i te tane e hinaaro e faaipoipo i ta ratou mau tamahine. Te haapapu maitai maira ïa te reira i te faufaa mau o te hoê potii apî. Ma te papu maitai e faarirohia na taua tino moni ra ei monoraa i te mea e erehia i te utuafare fetii o te ore e fanaˈo faahou i te mau ohipa e ravehia e taua potii apî ra. — Genese 34:11, 12; Exodo 22:16.
27. No te aha e tia ˈi i te mau taurearea ia fanaˈo roa i te mau ravea no te haapii ia ratou e pûpûhia ˈtura ia ratou ra?
27 E tia i te mau taurearea ia fanaˈo roa i te mau ravea i mua ia ratou no te haapii ia ratou, ia nehenehe atoa ratou ia ineine maitai no te faaruru i te mau fifi o te amuiraa o te mau mea nei. Tei roto atoa ratou i te feia ta te aposetolo e horoa ra i te faaitoitoraa i muri nei: “E haapii atoa to tatou i te rave i te mau ohipa maitatai [i te ohipa tia, New English Bible] e ia hau atu ïa, i te mau vahi e au ia rave ra, ia ore hoi ratou ia riro mai te raau hotu ore ra.” — Tito 3:14.
TE HAAPUERAA TURE MORARE A TE BIBILIA, TE HOÊ PARURU
28, 29. a) Eaha te aˈoraa ta te Bibilia e horoa maira no nia i te mau amuimuiraa? b) Nafea te mau metua e nehenehe ai e tauturu i ta ratou mau tamarii ia pee i taua aˈoraa ra?
28 Mea tano mau hoi ia haapeapea te mau metua ia faahepo mai te vahi ta ratou e faaea ra aore ra te mau fare haapiiraa e haerehia ra e ta ratou mau tamarii, i te amuimui atu i roto i te mau taurearea ohipa iino o te ore roa ˈtu hoi e faatura i to ratou iho ora. Ua papu maitai ia ratou i te parau mau o te aˈoraa bibilia e na ô ra e “ino te parau maitai i te amuiraa ino ra”. Eita roa ˈtu ïa ratou e riro i teie manaˈo o ta ratou tamarii oia hoi: “I te mea hoi e na reira te taatoaraa, no te aha ïa vau e ore ai e na reira atoa ˈi?” E ere hoi i te mea papu e te na reira mau ra anei te taatoaraa, e noa ˈtu pai mai te reira te huru, e ere roa ˈtu ïa i te hoê tumu maitai no te faatia i ta outou tamarii ia na reira atoa, mai te peu e ohipa ino mau. “Eiaha oe e feii i te taata ino, eiaha oe e hinaaro i te amui atoa i roto ia ratou. Te imi ra hoi to ratou aau i te pohe, e te parau nei to ratou vaha i te hamani ino. E patuhia te fare i te paari e oti ai: e e papu hoi taua fare ra i te ite.” — Korinetia 1, 15:33; Maseli 24:1-3.
29 Eita ta outou e nehenehe e na muri muri noa i ta outou mau tamarii e tae noa ˈtu i te hopearaa o ta ratou tau haapiiraa aore ra i to ratou oraraa. Teie râ, ia faaitoito outou i to outou utuafare ma te paari, e nehenehe ta outou e horoa ˈtu i te tahi haapueraa ture morare e te tahi mau faaueraa tumu parau-tia e riro ei aratai no ratou. “E au te parau a te feia paari ra i te patia, e mai te auri haamau-maitai-hia ra.” (Koheleta 12:11). E faaohipahia te auri oeoe maitai i na hiti e piti, no te patia i te mau animala ia nehenehe ratou e haere na nia i te eˈa maitai. E turai te mau parau paari mau a te Atua ia tatou i nia i te eˈa tia, e, ia atea ê tatou ra, e riro ïa to tatou haava manaˈo i te patia mai ia tatou ia hoˈi faahou mai tatou i nia i te eˈa tia. Ia ite ta outou mau tamarii i te hoê oaoaraa e vai maoro atu, a haapii atu ia ratou i te paari mai te reira te huru. A horoa ˈtu i taua paari nei ma te parau e te hiˈoraa maitai. Ia haapii atu outou ia ratou eaha râ te mau mea faufaa mau, e riro ïa ta outou mau tamarii i te maimi i te reira i roto i te feia ta ratou e maiti ei mau hoa rahi roa. — Salamo 119:9, 63.
30. Nafea te mau metua e nehenehe ai e horoa na ta ratou mau tamarii i te hoê haapueraa ture morare no ǒ mai i te Atua ra?
30 Na mua roa ˈˈe, ia haamanaˈo na outou e e nehenehe ta outou e faaô i taua mau faufaa morare ra i roto i te hoê utuafare fetii i reira te reira e faaturahia ˈi. Ia faatupu na outou i te huru ta outou e hinaaro ra e ite i nia i ta outou mau tamarii. I roto i to outou utuafare, i roto i te utuafare fetii iho, ia papu na ia outou e te ite ra anei ta outou mau tamarii e te taa ra ia outou eaha ta ratou e hinaaro ra, ia ite atoa ratou i te here e te aroha faito ore, te fanaˈo ra anei ratou i roto i te hoê faito au noa i te tiamâraa, ia ite ratou i te parau-tia e ohipa ra e te huru paetahi ore, e oia hoi ia manaˈo ratou e tuhaa ratou no te utuafare fetii e te fariihia ra hoi ratou i roto. Ia na reira na outou i te faaite atu ia ratou i te haapueraa ture morare no ǒ mai i te Atua ra e e hopoi ratou i te reira na muri ia ratou i rapaeau mai i te pû o te utuafare fetii. Aita ˈtu faufaa faahiahia roa ˈˈe ta outou e nehenehe e horoa ˈtu na ratou. — Maseli 20:7.
[Uiraa haapiiraa]
