Pene 3

I muri aˈe i te mahana faaipoiporaa

1. Nafea te huru autahoêraa e faataahia maira i roto i te Koheleta 4:9, 10, e nehenehe ai e faufaahia i roto i te hoê faaipoiporaa?

 TEIE nei, ua mairi te mahana faaipoiporaa. Ua riro atura ïa outou e to outou hoa faaipoipo ei utuafare fetii apî. Te oaoa roa ra anei outou? E ere atura ïa outou anaˈe, inaha, e hoa to outou ta outou e nehenehe e faaite atu i to outou manaˈo e ta outou e nehenehe e faaite atu i to outou mau oaoaraa e tae noa ˈtu i to outou mau tapitapiraa. Te ite ra anei outou i te faufaaraa o te mau parau i papaihia i roto i te Koheleta 4:9, 10, oia hoi: “E maitai te taata toopiti i te taata hoê; no te mea e utua maitai ta raua i ta raua ohipa. Ia hiˈa hoi te tahi ra, na te hoa e rave e faatia i nia; te taata hoê râ ia hiˈa ra, atae hoi oia, aita hoi o ˈna e taua ei faatia ia ˈna i nia!” Te maitai roa ra anei to outou taatiraa maoti te hoê autahoêraa mai te reira te huru? Ei taime iho â ïa e ei mau tutavaraa e tapae ai i reira, tera râ hoi, e rave rahi mau taata faaipoipo o te ore roa ˈtu e ite i taua oaoaraa nei.

2, 3. a) Tei mua ˈtura ïa tatou i tei hea mau mea o te oraraa nei i muri noa ˈˈe i te faaipoiporaa? b) No te aha hoi e mea tano mau â ia rave i te tahi mau tauiraa i muri aˈe i to ˈna faaipoiporaa?

² I te paeau rahi, i roto i te mau aamu herehere, te ohipa fifi roa te tahoêraa ïa te tane e te vahine e here ra te tahi e te tahi. I muri iho, e ora raua ma te oaoa. I roto râ i te parau mau, e fifi, te ora-amui-raa ïa ma te oaoa i tera mahana e i tera mahana. I muri aˈe i te mahana faaipoiporaa e haamata ˈi te mau ohipa matauhia i te mau mahana atoa: te tiaraa i te poipoi roa, te revaraa i te ohipa, te haereraa e hoohoo haere, te faaineineraa i te maa, te horoiraa i te auˈa, te faaneheneheraa i te fare, e rave rau atu â.

 ³ E titau mau â te faaipoiporaa i te tahi mau tutavaraa. Oia mau, i te mahana faaipoiporaa i titau na orua i te tahi mau ohipa e i tiaturi atoa na hoi orua e rave i te tahi mau ohipa mea fifi roa hoi ia faatupu. Mai te peu e, i muri aˈe i te tahi taime, eita te reira e tupu, o te peapea iho â ïa o te mono mai i ta outou mau tiaturiraa. Eiaha râ ia moehia ia outou e ua taui roa to outou oraraa. Eita outou e ora outou anaˈe i teie nei aore ra i roto i te hoê fetii i reira paha to outou ora-noa-raa. I teie nei, te ora ra outou e te tahi atu taata e e riro paha outou i te ite e aita outou i matau maitai ia ˈna mai ta outou i manaˈo. E tabula ohipa apî ta outou, peneiaˈe paha e ohipa apî, e ere hoi hoê â tuhaa moni ta outou e e tia ˈtura ia outou ia haamatau i te mau hoa apî e i te fetii o to outou hoa faaipoipo. Tei te manaˈo maitai hoi ta outou e horoa no te faaau atu ia outou, te manuïaraa o to outou faaipoiporaa e to outou oaoaraa.

TE FAAAU MAITAI RA ANEI OUTOU I TO OUTOU MANAˈO?

4. Eaha te mau faaueraa tumu a te mau Papai o te nehenehe e tauturu i te feia faaipoipo apî ia au maite te tahi e te tahi (Korinetia 1, 10:24; Philipi 4:5)?

⁴ Mea fifi roa hoi na vetahi pae ia faaau maite i to ratou manaˈo no to ratou teoteo. Teie râ, mai ta te Bibilia e parau ra, “o te teoteo to te pohe ra na mua, e te aau faateitei to te hiˈa”. E nehenehe te upoo etaeta e faatupu mai i te mau faahopearaa ino mau (Maseli 16:18). Ua aˈo maira Iesu i te feia e faaroo atura ia ˈna e ia haapao ratou i te hinaaro o vetahi pae, ia faatia maite atu i to ratou manaˈo. Teie ta ˈna e parau ra: “E ia [hinaaro] te hoê taata (...) e rave i to ahu oomo ra, e tuu atoa ˈtu i to pereue. E o te faaue mai ia oe e haere i te hoê maile, e haere atoa orua e ia piti noa ˈtu.” Maoti hoi i te tatamaˈi atu e to outou mau fetii fatata roa, “eaha outou, mai ta Paulo e parau ra, i ore i faaoromai ai ia faaerehia”? (Mataio 5:40, 41; Korinetia 1, 6:7.) Mai te peu e ua ineine te mau kerisetiano i te rave i te mau haapaeraa mai te reira te huru ia vai hau noa ratou e to ratou mau taata-tupu, eaha ïa faahiahiaraa e ia rave na taata faaipoipo apî tei here hoi te tahi i te tahi, i te mau tauiraa e au ia nehenehe to raua taatiraa apî ia riro ei manuïaraa.

5. Nafea hoi tatou e nehenehe ai e faatupu i te hoê huru feruriraa maitai aore ra ino i nia i to tatou hoa?

 ⁵ Tei te huru o ta tatou e faatupu e oaoa ˈi tatou aore ra e peapea ˈi. E riro anei ta outou mau tutavaraa i te faaoaoa ia outou aore ra i te haapeapea ia outou? E haamau anei outou i to outou feruriraa i nia i te paeau maitai aore ra i nia i te paeau ino o te mau mea? E parau anei te vahine faaipoipo apî e: “I teie nei, ua oti mâua i te faaipoipohia, tei hea ˈtura hoi te tane here mau e aratai pinepine na ia ˈu i roto i te mau vahi faahiahia e mea au hoi na ˈna ia faaea noa i pihai iho ia ˈu? Ua topa hoi oia i roto i te mau ohipa matauhia i te mau mahana atoa e ua riro atura ïa vau ei faaunauna. E ere roa ˈtu hoi te taata ta ˈu i matau na.” Aore ra te taa ra anei ia ˈna ma te mauruuru e te ohipa puai ra ta ˈna tane ia noaa mai te mau mea e hinaarohia e to ˈna fetii? E te tane faaipoipo apî, te ite ra anei o ˈna e mea ohipa roa ta ˈna vahine, i te faaineineraa paha i te maa, te faaneheneheraa i te fare, e i te tahi taime e rohirohi roa ïa o ˈna e aita ˈtura hoi to ˈna taime no te faanehenehe maitai ia ˈna? Aore ra te parau ra anei oia e: “Tei hea ˈtura hoi te potii nehenehe roa ta ˈu i faaipoipo? E ere hoi oia mai mutaa ihora, i teie nei ua riro vau ia ˈna.”

6. Ia tahoê mau te hoê tane e ta ˈna vahine ia manuïa to raua faaipoiporaa, eaha te faahopearaa o te reira i nia i to raua mau auraa?

⁶ Ia paari ïa te feruriraa o na taata faaipoipo toopiti atoa ra no te ite e aita to te tahi e to te tahi taime e puai no te rave i te mau mea atoa ta raua i rave na hou raua e faaipoipo ai. Teie ïa te taime no te faaau i to raua manaˈo e no te rave i ta raua hopoia ia tere maitai to raua faaipoiporaa, e riro hoi taua haerea nei i te faatupu mai i te hoê oaoaraa hohonu mau. Ia haamanaˈo na outou e mai te peu e e nehenehe ta hoê anaˈe iho hoa e rave e ia ore te hoê faaipoiporaa ia manuïa, ia toopiti ïa orua no te haamanuïa. E ohipa faahiahia mau te manuïaraa to orua faaipoiporaa, oia hoi ïa, te faatupuraa i te tahi mea noa ˈtu te mau fifi. Ia apiti orua toopiti atoa ra i roto i taua ohipa ra, e riro orua toopiti atoa ra i te tahoê i to ˈna manuïaraa. E taati hoi ta orua mau tutavaraa e tapae atu ai i te opuaraa ta orua i opua i te tahi e te tahi; e haafatata ia orua, e riro roa ˈtu ai hoi orua ei hoê. I roto i te roaraa o te tau, e faatupu mai ta orua tutavaraa i  te hoê taairaa here o te na nia ˈˈe i te mau mea ta orua e nehenehe i manaˈo hou to orua faaipoiporaa. Ia ite orua i te hoê oaoaraa o te tahoê, e riro iho â ïa orua i te oaoa ia faaau atu i to orua huru i nia i te huru o to outou hoa.

7. Mai te peu e e tia ia rave i te hoê opuaraa, afea ïa e tia ˈi ia tuu i te manaˈo?

⁷ E ore te teoteo ia rahi atu â te here, e e oaoa ïa tatou eiaha noa i te horoa, i te faatia atoa râ i te manaˈo o te tahi aore ra i te haapae i te tahi mea mai te peu iho â râ e aita te reira e û ra i nia i te mau faaueraa tumu, i nia râ i te mau mea e auhia e tatou tataitahi ei hiˈoraa, te hooraa mai paha i te hoê taoˈa no te utuafare aore ra te manaˈoraa e rave i te tau faafaaearaa. Ia faaite te tahi e te tahi e mea anaanatae mau na te tahi i te tahi, e haamata ïa na taata faaipoipo i te faatupu i te huru feruriraa i faataahia mai mai teie te huru e te aposetolo Paulo e na ô ra e: “Eiaha hoi te taata atoa e haapao i ta ˈna anaˈe iho ra, e haapao atoa râ i ta vetahi ê ra maitai.” — Philipi 2:4.

TE HOE HURU TANO MAITAI NO NIA I TE TAATIRAA I TE PAE TINO

8, 9. Eaha te manaˈo o te mau Papai no nia i te mau taatiraa i te pae tino?

⁸ Te faahiti tahaa ra hoi te Bibilia i te parau no te mau taatiraa i te pae tino. Ma te nehenehe mau, te faataa maira o ˈna i te oaoaraa rahi e iteahia e na hoa toopiti, ma te haapapu mai e e taotiahia te reira i te feia faaipoipo anaˈe ra. Teie ta tatou e taio i roto i te Maseli 5:15-21:

“E inu i te pape i ta oe ihora farii, e te pape tahe ra no roto i ta oe ihora apoo. Ia faatahe-haere-noa-hia ta oe ra pape pihaa, e ta oe ra pape tahe, na roto i te mau aroâ. E vaiiho i te reira na oe anaˈe iho, eiaha ei taata ěê e rave atoa. Ia haamaitaihia ta oe pape pihaa, e ia oaoa oe i te vahine o te apîraa ra. Ia riro oia mai te aili te hinaaro! e mai te iale te nehenehe! ia popou maite oe i to ˈna hinaaro, to ˈna anaˈe ra; e ia mauruuru roa oe i to ˈna aroha. Eaha hoi oe, e tau tamaiti, i au atu ai i te faaturi, i tauahi atu ai i nia i te vahine ěê? Te vai noa nei hoi to te taata haerea i mua i te mata o Iehova, e te manaˈo ra oia i to ˈna atoa ra mau haerea.”

⁹ Teie râ, e ere roa ˈtu i te mea tano ia haafaufaa-rahi-hia te mau taatiraa i te pae tino e a manaˈo atu ai e tei te oraraa  i te pae no te taatiraa o na taata faaipoipo e manuïa ˈi to raua faaipoiporaa, aore ra e nehenehe te reira e faatitiaifaro i te tahi mau hapa ino roa i roto i te tahi atu mau tuhaa o te oraraa o na taata faaipoipo. Mai te huru ra ïa e te faariro ra te rahiraa buka e te mau hohoˈa e tae noa ˈtu te mau parau faatiani e rave rahi, e faateitei nei i te melo taatiraa, e te rahiraa o te taime no te faaaraara i te mau hinaaro e taati, e mea faufaa roa te parau no te taatiraa i te pae tino. Teie râ, e ere roa ˈtu hoi te reira te manaˈo o te Parau a te Atua e faaue maira e ia faaohipahia te hitahita ore i roto i te mau tuhaa atoa o te oraraa. I roto atoa i te faaipoiporaa, e nehenehe te oreraa e faaohipa maitai i te mau melo taatiraa e aratai tia e ia ravehia te tahi mau peu o te faaino roa i te huru maitai o te mau auraa i rotopu i na taata faaipoipo. — Galatia 5:22, 23; Hebera 13:4.

10. Eaha te mau mea te tia mau â ia tuatapapahia e oaoa roa ˈi na taata toopiti i te pae no te taatiraa i te pae tino nei?

¹⁰ E pinepine e mea fifi roa ia oaoa roa toopiti atoa ra na taata i te pae taatiraa e e riro hoi te reira i te titau i te taime i na taata faaipoipo apî. E pinepine te reira i te tupu no te mea te erehia ra i na taata faaipoipo i te aravihi e te ite atoa hoi e eaha to te tahi e to te tahi mau hinaaro. E nehenehe e riro ei mea faufaa na mua ˈˈe i te faaipoiporaa ia aparau no nia i taua tumu parau nei e te hoê taata tei oti i te faaipoipo e o te nehenehe hoi e tiaturihia. Ia ite atoa na outou e mai te peu mea taa ê te tane e te vahine i te pae tino, mea taa ê atoa hoi raua i te pae no te here. Mea faufaa roa ˈtura ïa ia haamanaˈo e mea hinaaro mau â na te hoê vahine e ia aupuruhia mai oia. I te tahi aˈe pae eiaha roa ˈtu ïa ei huru tano ore no nia i te mau taatiraa i te pae tino i te manaˈoraa e e ohipa haama hoi te reira. Eiaha atoa te tane e haapao noa ia ˈna iho, mai te itehia ra i te tahi mau taime. “E horoa te tane i te mea tia i te vahine”, ta te Bibilia ïa e parau ra, e “e na reira atoa te vahine i te tane”. Inaha, mea tano atura ïa ia faaohipahia i te faaueraa tumu bibilia i muri nei e na ô ra e: “Eiaha roa e taata e imi i to ˈna anaˈe iho maitai, e imi râ te taata atoa i te maitai o vetahi ê atoa.” Ia faaite na hoa toopiti i te hoê here mai te reira te huru e ma te hinaaro ia au te tahi e te tahi, e riro ïa raua i te oaoa roa i roto i to raua mau taatiraa i te pae tino nei. — Korinetia 1, 7:3; 10:24.

 EIAHA NA TO OUTOU EI HURU AU ORE NOA ˈTU Â ÏA E AITA TO TE TAHI E TO TE TAHI MANAˈO E TU RA

11-13. E tia ia tatou ia haamanaˈo i te aha ia ore te tahi mau mea e ore ai outou e afaro ia faatupu mai i te faataa?

¹¹ Aita hoi i itehia aˈenei i nia i te fenua nei e piti na taata hoê â to raua huru. Mea taa ê hoi tatou paatoa te tahi e te tahi, te auraa ra eita te manaˈo o e piti na taata e nehenehe e tu i nia i te mau mea atoa. Mai te peu e e riro te rahiraa o te mau manaˈo ei mea faufaa ore, e riro râ vetahi ei mea faufaa roa. I roto i te tahi mau utuafare, e faatupu oioi noa te mau au-ore-raa i te tuô, e e tupai hoi te tahi i te tahi mai te peu e eita e taorahia te tahi mau taoˈa i nia i te tahi e te tahi. E te tahi taime, e riro te hoê aore ra te tahi o na hoa faaipoipo i te faarue mai i te utuafare tau mahana aore ra tau hebedoma, aore ra e ore roa ˈtu hoi na hoa faaipoipo e paraparau faahou. I te parau mau, e nehenehe to te tahi e to te tahi manaˈo e ore e tu, ma te ore râ hoi e tapae roa i reira. Nafea ïa te reira? Na roto ïa i te fariiraa i te hoê parau mau tumu.

¹² E mau taata tia ore anaˈe tatou paatoa; e hapa anaˈe hoi ta tatou paatoa, e noa ˈtu to tatou mau manaˈo maitai roa ˈˈe, e itehia mai iho â i muri iho. Teie ta te aposetolo Paulo i parau no nia ia ˈna iho: “O te maitai hoi ta ˈu i hinaaro ra, aore ïa vau i rave: area te ino hinaaro-ore-hia e au ra, o ta ˈu ïa e rave nei.” (Roma 7:19). I te mea hoi e, ua vaiiho mai to tatou na metua matamua i te hara na tatou, eita roa ˈtu ïa te huru taata tia roa e noaa ia tatou. No reira, “o vai te tia ia parau e, ua mâ ta ˈu aau ia ˈu, ua tamâ vau ia ˈu iho i ta ˈu nei hara?” — Maseli 20:9; Salamo 51:5; Roma 5:12.

¹³ E farii tatou e e faaiti atoa mai hoi tatou i te ino o ta tatou hapa. No reira, no te aha ïa e ore ai e na reira atoa i nia i to tatou hoa? E farii mau hoi tatou e e mau taata hara tatou, teie râ, e mea etaeta rii anei tatou mai te peu e e tia ia tatou ia farii i te hoê hapa taa maitai? Ua noaa anei ia tatou i te ite e au, ia papu maitai ia tatou e te oreraa e farii maitai e ua hape tatou, o te mea ïa e ite-atoa-hia nei e te mau taata, oia hoi e to tatou taata-tupu, e e hau atu anei tatou i te ite e eaha ta ˈna e hinaaro ra? Te na ô ra te buka a te mau Maseli e: “Na te haapao o te taata e ore e riri vave ai; o to ˈna ïa maitai te faaore i te hara ra.” Papu maitai, te farii ra  outou mai te taatoaraa o te taata, i te “ture auro” ta Iesu i faahiti i roto i ta ˈna Aˈoraa tuiroo roa i nia i te mouˈa ra i te na ôraa e: “E te mau mea atoa ta outou e hinaaro ia vetahi ê ra, e na reira atoa ˈtu outou ia ratou.” Te haapopou nei hoi te rahiraa o te taata i teie mau parau, mea iti roa râ teie e faaohipa nei. Inaha hoi, te faaohipa-mau-raa i taua “ture auro” ra, e riro ïa i te faatitiaifaro i te mau fifi e itea mai i rotopu i te mau taata, e tae noa ˈtu hoi i te mau fifi o te mau taata faaipoipo. — Maseli 19:11; Mataio 7:12.

14, 15. a) Eaha te mea e nehenehe e tupu mai mai te peu e e faaau tatou i to tatou hoa, ma te au ore hoi, i te tahi atu taata? b) E rave tatou i taua mau faaauraa tano ore ra no te faahiti i tei hea tumu parau?

¹⁴ Te hinaaro nei hoi tatou tataitahi e ia faarirohia tatou ei taata taa maitai. No reira, eaha ïa to tatou huru ia faaauhia mai tatou, e e ere hoi i te mea maitai no tatou, i te hoê taata ê atu tei hau aˈe i te faahiahia aore ra i te aravihi aˈe ia tatou? I te paeau rahi, e riro ïa te reira i te haamauiui ia tatou aore ra e riro hoi tatou i te inoino. Mai te huru ra ïa e e parau tatou e: “O VAU râ, e ere vau o mea.” Inaha, e ere roa ˈtu taua mau huru faaauraa nei i te mea maitai no tatou no te mea te hinaaro nei tatou paatoa ia papuhia mai e eaha ta tatou e hinaaro ra.

¹⁵ E faahohoˈa anaˈe na i ta tatou parau. E te tane, te haapopou ra anei outou i ta outou vahine no te maa ta ˈna e faaineine aore ra te amuamu noa ra outou no te mea e ere ta ˈna maa mai ta to outou metua vahine? Teie râ, ua ite anei outou e eaha te huru o te maa e faaineinehia na e to outou metua vahine i muri noa ˈˈe i to ˈna faaipoiporaa? Mea maitai aˈe paha ta outou vahine ia ˈna. No reira, a vaiiho atu na outou i te taime no ˈna ia haamatau oia i ta ˈna mau hopoia apî e ia riro mai oia ei vahine aravihi. E outou e te mau vahine, te faahapa ra anei outou i ta outou tane no te mea mea iti aˈe te moni e noaa mai ia ˈna ia faaauhia i te moni e noaa mai e to outou metua tane? Inaha hoi, eaha te moni i noaa mai na ia ˈna i te omuaraa o to ˈna faaipoiporaa? E ere hoi te reira i te mea faufaa roa. Te mea faufaa roa, o te tauturu ïa ta outou e horoa ˈtu na ta outou tane. Te tia ra anei outou i te poipoi roa no te faaineine i ta ˈna taofe hou oia e reva ˈtu ai i te ohipa, ei faaiteraa ˈtu ia ˈna e mea anaanatae mau na outou ia ˈna e te turu ra outou i ta ˈna  mau tutavaraa? Te faaino noa ra anei te hoê aore ra te tahi o orua i te fetii o to ˈna hoa aore ra aita anei to ˈna manaˈo e tu ra i nia i te parau no te mau hoa aore ra te parau no te faaanaanataeraa i te pae tino? E nehenehe hoi taua mau tumu e amahamaha ˈi te manaˈo ra, e tupu mai. E nafea ïa outou mai te peu e mai te reira te huru?

16. No te aha te manaˈo ra oia hoi, e tauturu te mau tatamaˈiraa uˈana mau no te faatitiaifaro i te tahi mau fifi, e riro ai ei mea atâata roa?

¹⁶ Ia au i te tahi mau taote i te pae no te feruriraa o teie nei tau, e tauturu te mau tatamaˈiraa no te faatitiaifaro i te mau fifi. Teie hoi to ratou manaˈo: e pue noa te inoino e inaha, e riro hoi te reira i te faatupu mai i te hoê tatamaˈiraa rahi. I roto i te tatamaˈiraa, o te mau manaˈo inoino ïa i tapea-noa-hia na te itea mai, e riro atura hoi ei ravea maitai roa no te faaore roa i te reira. Oia hoi, ia au i taua mau taote e rapaau i te pae no te feruriraa ra, ia tapea noa ïa tatou i te inoino i roto ia tatou iho e tae roa ˈtu i te taime e eita e nehenehe faahou ta tatou. Teie râ, e nehenehe te hoê tatamaˈiraa taue mai teie te huru e aratai ia outou ia parau i te mau mea ta outou i ore roa ˈtu e manaˈo ra, e e riro atura ïa te reira i te haapepe maitai i to outou hoa i te hoê pepe eita e nehenehe e rapaau faahou. E nehenehe hoi te ino ta outou e faatupu i nia ia ˈna e riro ei mea hohonu roa e e tupu atu ai te hoê patu i rotopu ia orua. Te horoa mai nei te Maseli 18:19 i teie nei faaararaa: “Te taeae ra ia riri, e au ïa i te oire etaeta; e to ratou râ mârôraa e au i te teˈa auri o te pare ra.” Te horoa atoa mai nei te Bibilia i teie aˈoraa maitai roa: “E faarue râ i te avau ra, a riro ei parau faaino.” — Maseli 17:14.

IA APARAU NA OUTOU

17. Nafea tatou ia ape ia ore te tahi mau mea e ore ai tatou e afaro ia rahi roa mai e a riri roa ˈtu ai tatou?

¹⁷ Maoti hoi i te vaiiho i te mau tumu parau e amahamaha ˈi ia haapue noa i roto i to outou mafatu e tae roa ˈtu i te taime outou e riri ai, mea maitai aˈe ia paraparau i te taime iho â e tupu ai. Ia na nia iho noa tatou i te faahiti i te hapa i nehenehe paha e ravehia i nia ia tatou, e pinepine tatou i te faarahi roa ˈtu â i te parau. Ia aparau oioi na outou aore ra eiaha e haamanaˈo faahou. Mai te peu e e parau rii  haapaoraa ore noa, eiaha e haapao atu. Mea maitai anei ia aparauhia? Ua rave anei to outou hoa i te hoê mea e haapeapea ra i to outou manaˈo? Eiaha na e faahapa oioi atu ia ˈna, e tamata râ i te tuatapapa i te fifi na roto i te uiraa ˈtu i te hoê uiraa aore ra na roto i te horoaraa ˈtu i te hoê manaˈo o te nehenehe paha e faatupu i te aparauraa. E nehenehe hoi ta outou e parau atu ei hiˈoraa: “E ta ˈu here, te vai ra te hoê mea ta ˈu e ore e taa maitai ra. E nehenehe anei ta oe e tauturu mai ia ˈu?” I muri iho, a faaroo atu i to outou hoa e a tamata i te ite eaha to ˈna manaˈo. Ia haapao na outou i te faaararaa i horoahia i roto i te Maseli 18:13, oia hoi: “O tei parau vave mai aitâ i faaitehia ˈtu, ua faaite oia e maamaa to ˈna, e au ia ˈna te vahavaha.” Aita hoi e taata e mea au na ˈna ia faaoti-oioi-hia i te hoê manaˈo hape no nia ia ˈna. No reira, ia haere maine na outou, ia tamata na outou i te ite i te mau manaˈo hohonu e turai i to outou hoa ia na reira. A faaroo i teie nei aˈoraa i papaihia i roto i te Maseli 20:5 e na ô ra e: “Te parau i roto i te aau taata, mai te moana ïa; e noaa mai râ taua parau ra i te taata i ite.”

18. Na te aha e nehenehe e tauturu mai ia tatou ia faarue roa i te huru ino?

¹⁸ E tauiui noa anei to outou huru? E ere roa ˈtu i te mea ohie ia ora i pihai iho i te hoê taata e tauiui noa te huru. Te parau nei hoi vetahi e e ere to tatou huru maitai aore ra to tatou huru ino tei ia tatou noa, tei te tahi atoa râ mau mea e vai ra i roto i te roro. Noa ˈtu e eaha, e maˈi pee roa te mau manaˈo hohonu. E nehenehe te feia e haaati ra ia tatou e faaoaoa aore ra e haapeapea ia tatou. E faaaraara mai hoi te tahi aore ra te tahi mau aamu e rave rahi mau huru taa ê i roto ia tatou. E ohipa atoa to tatou mau manaˈo i nia i to tatou huru. Ia atuatu noa outou i te mau manaˈo ino, e riro ïa outou i te peapea, tera râ, mai te peu e e hinaaro maitai to outou, e nehenehe outou e faahepo i to outou feruriraa ia atuatu i te mau manaˈo maitai. A fariu na i to outou feruriraa i nia i taua mau huru manaˈo nei (Philipi 4:8). Mai te peu e mea fifi roa na outou, ia faaitoito na outou i te rave i te hoê ohipa i te pae tino noa ˈtu â ïa e mea rohirohi roa, mai te hutihutiraa paha i te aihere aore ra i te uˈuraa i te tahua. A haere i rapae i ǒ outou, a haere e ori haere aore ra a haere e horohoro haere na roto i te mau uru raau. Hau atu â, a rave i te hoê ohipa faufaa no vetahi ê. Oia hoi, a rave i  te mau huru mea atoa ia fariu ê to outou manaˈo e to outou puai i te mau manaˈo iino atoa. E maitai aˈe ia atuatu i te huru maitai i te atuatu i te huru ino. Mea au aˈe hoi no outou e oia atoa no to outou hoa.

19. Nafea tatou e nehenehe ai e faaite e te ite ra tatou eaha ta to tatou hoa e hinaaro ra mai te peu e aita o ˈna e anaanatae maitai ra?

¹⁹ Teie râ, e riro hoi te tahi mau ohipa i te haapeapea rahi ia outou aore ra e riro atoa paha outou i te roohia i te hoê maˈi ino roa e te mauiui mau. I te tahi aˈe pae, e nehenehe te maˈi avae e tae noa ˈtu hoi te hapûraa o te vahine e faahuru ê rahi i te tupuraa o te mau oromona puai mau e vai ra i roto i te tino, e faairia e e faahoruhoru atoa i to ˈna mafatu. E nehenehe te hoê vahine e iria noa na mua noa ˈˈe i to ˈna maˈi avae ma te ore hoi o ˈna e ite. Te hoê tumu faufaa roa te reira te tia i te tane ia haapao maitai, ia ore oia ia iria no te huru o ta ˈna vahine. I roto i taua mau taime taa ê maitai ra, e tia i te tane e te vahine ia ite raua toopiti atoa ra i te tumu o taua tauiraa ra e ia faaitoito hoi te tahi i te tahi. “Na te aau o te taata paari i faaite i te vaha i te haapao, e na te reira e faaite i te vaha i te ite.” Hau atu â, “e aroha mai â te taua i te mau mahana atoa ra, i fanau mai râ te taeae no te anotau e ati ai ra”. — Maseli 16:23; 17:17.

20-22. a) No te aha hoi tatou e tia ˈi ia ape i te pohehae noa e aita e tumu? b) Eaha ta tatou e nehenehe e rave ia nehenehe to tatou hoa e tiaturi mai ia tatou?

²⁰ Mea pohehae anei to outou hoa? Mea tano hoi ia pohehae no to ˈna iho roo e tae noa ˈtu no to ˈna iho faaipoiporaa. Mai te adrénaline e faaitoito i te hoê mafatu i te faaea i te tupai, na reira atoa te pohehae i te faaitoito i te taata ia paruru i te tahi mea faufaa roa no ˈna. Te manaˈo patoi i te pohehae o te ore-roa-raa ïa e tâuˈa. Inaha hoi, ia ore roa na tatou e riro ei mau taata o te ore roa ˈtu e tâuˈa i to tatou faaipoiporaa.

²¹ Teie râ, te vai ra te tahi atu huru pohehae, no roto mai i te manaˈo papu ore e atuatuhia e te feruriraa. E faariro hoi taua huru pohehae nei i te faaipoiporaa ei fare auri riaria mau i reira hoi te tiaturiraa i te tahi e te tahi e te here mau e ore ai e nehenehe e ora mai. “E ore te aroha e feii” mai te reira te huru, e ua riro hoi te pohehae tia ore “o to te ivi ïa tahuti”. — Korinetia 1, 13:4; Maseli 14:30.

²² Mai te peu e te vai ra te tahi tumu e pohehae ai to outou  hoa, ia haavitiviti na outou i te faaore i te mea i faatupu mai i te reira. Mai te peu râ e aita e tumu oia e pohehae ai, ia faaitoito na outou i te rave e ia tiaturi mai â o ˈna ia outou na roto i ta outou mau parau e na roto atoa iho â râ i ta outou mau ohipa e rave. Ia faaitoito na outou i te haaputapû i to ˈna mafatu.

23. Eaha te mea e tia ia haapao maitai mai te peu e e imi tatou i te tauturu a te tahi atu taata no te faatitiaifaro i to tatou mau fifi i roto i te faaipoiporaa?

²³ E nehenehe anei te tahi atu taata e tauturu mai i na hoa faaipoipo no te faatitiaifaro i te mau manaˈo e ore ai raua e afaro? E riro paha e e faaô mai o ˈna ia ˈna i roto mai te peu e e titau atu na taata faaipoipo toopiti atoa ra i ta ˈna tauturu. Na mua ˈˈe, “e parau noa ˈtu oe i ta oe parau i to taata-tupu ra, eiaha râ e faˈihia e oe ta ˈna ra parau moe”. (Maseli 25:9.) E tia hoi ia haapao maitai i te imi atu i te tauturu a te mau melo o te fetii o te hoa faaipoipo; e nehenehe hoi ratou e paetahi atu no te tahi. Te na ô ra te Bibilia ma te paari e: “No reira e faarue ai te taata i tana metua tane e tana metua vahine, a ati atu ai i ta ˈna vahine.” (Genese 2:24). Parau mau, e tano atoa teie ture no te vahine. Maoti hoi i te maiti i te mau metua aore ra te mau metua hoovai o te riro paha i te paetahi no te tahi aore ra no te tahi, mea maitai aˈe i te mau hoa faaipoipo ia tahoê maitai e ia faˈi e no raua te fifi e e tia iho â ïa ia raua ia faatitiaifaro i to raua fifi. O te titau i te tauturu a te tahi atu taata ma te ore hoi e ani i to ˈna hoa, te faahaehaa ra ïa oia ia ˈna iho e te faahaehaa atoa ra i to ˈna hoa i mua i te aro o te tahi pae. Ia farii outou i te aparau tahaa noa, ma te aau tae e ma te here, aita roa ˈtu e tumu e vai ra e ore ai outou e nehenehe e faatitiaifaro outou iho i to outou mau fifi. E nehenehe ta outou e ani atu i te manaˈo i te mau taata tei paari i te pae no te feruriraa, na outou râ hoi e rave i te opuaraa hopea.

24, 25. Eaha ta tatou e nehenehe e rave mai te peu e e tapea te teoteo ia tatou ia faatitiaifaro i te hoê fifi i tupu e to tatou hoa?

²⁴ “Eiaha ia hau te manaˈo ia ˈna iho, i te au ia ˈna ia manaˈo ra.” Tera ta te aposetolo Paulo e aˈo maira ia tatou (Roma 12:3). E te na ô râ oia e: “[I te faaturaraa ˈtu te tahi e te tahi, ia horoa na outou i te hiˈoraa.]” (Roma 12:10). Mai te peu e e inoino roa outou, mea faufaa roa ia haamanaˈo tatou e mea haihai roa hoi tatou ia faaauhia i te fenua, e te fenua iho ia faaauhia i te faanahonahoraa iho o te mau  palaneta e na te hiti ra i te ohu i te mahana o te riro hoi ei tuhaa iti haihai atoa i roto i te ao nei. I mua i te aro o Iehova, “e au hoi te mau fenua atoa mai te mea aore ra ia ˈna; e ua haapaohia e ana mai te mea aore e te faufaa ore”. (Isaia 40:17.) E riro te mau manaˈo mai te reira te huru i te tauturu mai ia tatou ia hiˈo i te mau mea ia au i to ratou auraa mau e ia papu maitai e inaha hoi, e ere te mau mea e ore ai tatou e afaro i te mea faufaa roa.

²⁵ I te tahi taime, e riro atoa to tatou huru faaataata i te ore e faariro ia tatou ei mea faufaa roa. Ia nehenehe tatou e ata ia tatou iho, e faaite ïa tatou e e mau taata paari tatou, e e riro hoi te reira i te faaiti mai e hia rahiraa fifi o te oraraa nei.

“A UEUE TA OE SITONA I NIA I TE PAPE”

26, 27. Eaha te mau faaueraa tumu bibilia te tia ia faaohipahia ia ore to tatou hoa e tâuˈa mai i te mau tutavaraa ta tatou e rave no te faatitiaifaro i te mau mea e ore ai tatou e afaro i roto i te hau, e no te aha?

²⁶ E nafea ïa outou mai te peu e eita to outou hoa e tâuˈa mai i te mau tutavaraa ta outou e rave no te faatitiaifaro i te mau mea e ore ai outou e afaro, i roto i te hau? A pee na i teie aˈoraa bibilia e na ô ra e: “Eiaha roa te ino e tahoohia i te ino i te taata atoa nei.” Ia pee na outou i te hiˈoraa o Iesu: “O tei ore i faaino atu, ia faainohia mai oia.” E peu matauhia hoi e te taata i te tahooraa ˈtu, ia na reira râ hoi outou ra, te vaiiho ra ïa outou i te tahi pae ia ohipa mai i nia i to outou huru, oia hoi, ia faariro ia outou mai ia ratou ra te huru. Mai te mea ra ïa e te haapae ra outou ia outou iho, oia hoi, te haapae ra outou i to outou iho huru e te mau faaueraa tumu faufaa roa no outou. Ia pee na outou i te hiˈoraa o Iesu tei tapea i to ˈna haapao maitai ia ˈna iho noa ˈtu te mau hapa a te mau taata e haaati ra ia ˈna. “Ore noâ tatou i te haapao i te parau mau, e parau mau â ta ˈna; e ore oia e tahuna i ta ˈna iho.” — Roma 12:17; Petero 1, 2:23; Timoteo 2, 2:13.

²⁷ Mai te peu e mea puai outou no te tuparari i te huru tupuraa fifi mau oia hoi, te faahoˈiraa te ino i te ino, e riro paha ïa i te noaa mai ia outou i te hoê huru tupuraa apî te faahoˈiraa i te maitai i te maitai. “O te parau mǎrû ra e faaore i te riri.” (Maseli 15:1). E ere roa ˈtu te hoê pahonoraa mǎrû i te tapao no te paruparu, no te puai râ e e riro to outou  hoa i te ite atu i te reira. I te mea hoi e te tahoo nei e rave rahi mau taata, ia faaite outou i te huru maitai e nehenehe ïa ta outou e taui i te huru tupuraa o te ino ei maitai. Ta te tahi ïa mau irava o te mau Papai mai teie te huru e faaite maira i te na ôraa mai e: “Te taata horoa ra, e poria ïa.” “A ueue i ta oe sitona i nia i te pape; e rave rahi aˈera te mahana i mairi, noaa faahou atura ia oe.” (Maseli 11:25; Luka 6:38; Koheleta 11:1). E riro paha e ei taime iho â ïa ia nehenehe to outou hamani maitai ia faahotu mai i te mau huru maitai no ǒ mai i to outou hoa ra. Eita râ hoi ta tatou e nehenehe e ooti mai i teie mahana i te mea ta tatou i ueue noa i nanahi ra. Inaha hoi, “o ta te taata e ueue ra, o ta ˈna â ïa e ooti mai (...). E eiaha tatou e rohirohi i te parau maitai, ei te tau mau ra hoi tatou e ooti ai ia ore tatou ia toaruaru”. — Galatia 6:7-9.

28. Eaha vetahi mau faaueraa tumu faahiahia roa e vai ra i roto i te buka bibilia a te mau Maseli, o te nehenehe e tauturu mai ia tatou ia haamanuïa i to tatou faaipoiporaa, e nafea hoi te reira ia tauturu mai ia tatou?

²⁸ E ite outou i raro nei te tahi mau irava bibilia e apeehia ˈtu e te tahi mau uiraa ta matou e titau atu nei i te mau taata faaipoipo atoa ia tuatapapa.

Maseli 14:29: “O te ore e riri vave ra e ite rahi to ˈna; o tei ru râ te aau ra, ua faateitei ïa i te parau maamaa.” Ia rave outou i te taime no te feruri, eita anei te rahiraa o to outou taime e mâuˈa ia riri outou?

Maseli 17:27: “O tei ore e ru i te parau ra, ua noaa ia ˈna te ite; e te taata i noaa ia ˈna te ite ra e aau maitai to ˈna.” Te faaea hau noa ra anei outou e te ore ra anei outou e taoraora ˈtu i te tahi mau parau e riro ai to outou hoa i te riri mai?

Maseli 25:11: “Mai te lemoni auro i roto i te vairaa ario ra, o te parau ïa ia parauhia i te taime mau ra.” E riro te hoê parau au e horoahia i te hoê taime i te ore e au i te tahi atu taime. Ua noaa anei ia outou i te aravihi no te parau i te mea e au i te taime e au?

Maseli 12:18: “Te taata vavi noa ra, e au ïa i te ˈoˈe patiatia ra; o te arero râ o te taata paari ra, mai te raau rapaau maˈi ra ïa.” Te feruri ra anei outou hou outou e paraparau ai, i te faahopearaa o ta outou mau parau e faahiti atu i nia i to outou hoa?

 Maseli 10:19: “Te rahi ra te parau ra, eita e ore te hara; i parauhia ˈi e paari to ˈna to tei tapea i to ˈna vaha.” I te tahi taime, e riro ta tatou mau parau i te ore e tuea i to tatou mau manaˈo, e e riro hoi tatou i te tatarahapa i muri iho. Te haapao maitai ra anei outou ia ore te reira ia tupu mai?

Maseli 20:3: “E tura te taata ia faarue i te mârô; area te feia maamaa ra, ei parau faaino â ïa.” Ei taata toopiti iho â ïa no te tatamaˈi. Ua noaa anei ia outou i te paari no te haapae atu i te riri?

Maseli 10:12: “Na te riri e faatupu i te mârô; area te aroha ra, e faaore ïa i te mau hara atoa ra.” E hoˈi tamau noa mai anei outou i nia i te mau riri tahito aore ra mea here anei na outou i to outou hoa e moehia ˈtu ai ia outou i te reira?

Maseli 14:9: “Te ata ra te feia maamaa i te hara ra; tei ǒ te feia parau-tia râ, te itehia mai ratou ratou iho.” Mea teoteo roa anei outou no te tuu i te manaˈo e no te maimi i te hau i roto i to outou utuafare?

Maseli 26:20: “Aore e vahie ra, e pohe ïa auahi.” Ua ite anei outou nafea râ ia faaore i te riri, aore ra e rave anei outou e o outou iho â tei tano?

Ephesia 4:26: “Eiaha ia mairi te mahana i to outou ririraa.” E faaea noa anei outou i nia i te mau mea e ore ai outou e afaro ma te haamaoro atu â ïa i to outou peapea e te peapea o to outou hoa?

29. Eaha te mau faaueraa tumu faufaa mau te tia ia tatou ia tapea mai i roto i te feruriraa mai te peu e e hinaaro tatou ia oaoa to tatou faaipoiporaa?

²⁹ E riro te mau aˈoraa maitai i te faufaahia ia faaohipahia. Ia tamata na outou i te faaohipa i te reira e tae noa ˈtu hoi i te mau manaˈo ta to outou paha hoa e nehenehe e horoa mai. Na outou iho â ïa e ite atu e mea tano anei aore ra mea hape. Mai te peu e eita e afaro, te vahi faufaa roa e ere te iteraa e o vai te tumu e ino ai te mau mea, te iteraa râ nafea ia faatitiaifaro i te reira. Ia faaau atu na outou i to outou manaˈo, a aparau i to outou hoa no nia i te mau mea e ore ai orua e afaro e eiaha e haafaufaa rahi roa ia outou. A aparau te tahi e te tahi. Mai te peu e ‘mea here na outou i to outou hoa mai ia outou iho’, eita roa ˈtu ïa e riro ei mea fifi roa ia haamau i te mau auraa maitai i roto i te faaipoiporaa e oia hoi ia faariro i to outou faaipoiporaa ei faaipoiporaa oaoa mau. — Mataio 19:19.

[Uiraa haapiiraa]