Pene 14

Ia faaineine na te utuafare taatoa i to ˈna oraraa mure ore

1. Ia ohipa tatou no te oaoaraa o to tatou utuafare fetii, no te aha e mea maitai ia manaˈo tatou i te tau a muri aˈe?

 IA POIHERE tatou e rave rahi mau manaˈo faufaa mau i tupu e ia nehenehe tatou e huti mai i te tahi mau haapiiraa no nia i taua mau ohipa i tupu ra, e tae noa ˈtu hoi i nia i ta tatou iho mau hape i rave, e tia ia tatou ia ora no teie mahana. Tera râ, noa ˈtu e mea afaro roa to tatou utuafare fetii, e morohi oioi noa te mau ohipa e tupu i teie nei. E riro hoi teie mahana mai te mahana i nanahi ra, e e oioi roa te tau e tupu ra i te riro ei tau i mairi. I te mea hoi e te hinaaro ra tatou ia oaoa to tatou utuafare fetii, mea faufaa roa ˈtura ïa ia hiˈo tia tatou i nia i te tau i mua ia tatou nei, ia faaineine tatou i te reira. Inaha, i roto i te hoê faito rahi, tei te mau opuaraa ta tatou e rave i teie mahana to tatou oraraa no a muri aˈe e te oraraa atoa hoi o to tatou utuafare fetii.

2. a) No te aha e rave rahi mau taata e ore ai e farii i te manaˈo i nia i te tau a muri aˈe? b) Mai te peu e e hinaaro tatou e ite i te hoê oraraa oaoa no a muri aˈe, e tia ia tatou ia faaroo ia vai?

² Eaha ïa te mau tiaturiraa no te tau a muri aˈe? Eita hoi te mau opuaraa e ravehia e te rahiraa o te taata e hau atu i te tahi noa tau matahiti. Eita e rave rahi mau taata e au ia hiˈo atea roa ˈtu no te mea e hopea ino to a muri aˈe, oia hoi: te pohe o te faaamahamaha i te utuafare fetii. No te rahiraa o te taata, e oioi noa te mau tapitapiraa o te oraraa nei i te haapoiri i te mau taime oaoaraa poto roa. Teie râ, ia faaroo tatou i te taata “no ˈna hoi te iˈoa i mairihia i te fetii atoa, to te raˈi, e to te ao atoa nei”, e  nehenehe ïa e noaa ia tatou i te tiaturiraa maitai roa ˈtu â no nia i te oraraa nei. — Ephesia 3:14, 15.

3. a) Eaha te tiaturiraa ta te Atua i pûpû atu i na taata matamua? b) No te aha hoi te mau mea i huru ê ai?

³ A poiete ai te Atua ia Adamu raua o Eva, ta ˈna opuaraa e ere ïa ia ora noa na taata nei e ta raua mau tamarii te tahi noa tau matahiti fifi e a pohe atu ai. Ua tuu atura râ oia ia raua i roto i te hoê paradaiso e ua pûpû maira no raua i te tiaturiraa oia hoi, te oraraa e a muri noa ˈtu (Genese 2:7-9, 15-17). Aita aˈera râ raua i farii i taua oraraa no raua ra e no ta raua huaai inaha, ua orure aˈera raua i te ture a te Atua, te reira hoi te ora. Teie ta te Bibilia e parau ra: “No te taata hoê ra [o Adamu] i ô mai ai te ino i te ao nei, e no te ino hoi te pohe; e ua taea-atoa-hia te taata atoa e te pohe i te mea ua hara paatoa.” — Roma 5:12.

4. Eaha te mau faanahoraa ta Iehova i rave ia tupu mau â ta ˈna opuaraa matamua no nia i te huitaata nei?

⁴ Teie râ, i roto i to ˈna aroha, ua rave te Atua i te tahi mau faanahoraa no te hoo faahou mai i te fetii taata nei. Ua horoa aˈera ta ˈna Tamaiti o Iesu Mesia i to ˈna ora taata tia no te mau huaai atoa a Adamu (Timoteo 1, 2:5, 6). Ua hoo mai atura ïa Iesu ta Adamu i faaere ia tatou e ua faatia aˈera oia i te taata ia atuatu i to ratou faaroo i roto i taua faanahoraa ra oia hoi, te iteraa i te oraraa ta te Atua i faaau mai i na taata matamua. I to tatou nei tau, te feia tei ore i pohe oioi no te hoê maˈi ino paha aore ra no te hoê ati i tupu, e nehenehe ratou e ora e hitu ahuru aore ra fatata e vau ahuru matahiti, e vetahi pae te tahi tau matahiti hau atu. “Te ora mure ore ra, e mea horoa-noa-hia mai ïa e te Atua i roto i to tatou ra Fatu ia Iesu Mesia.” — Roma 6:23.

5-7. a) Mai te peu e e rave tatou mai teie atu nei i te hinaaro o te Atua, eaha ta tatou e nehenehe e tiaturi no te oraraa no a muri aˈe? b) Eaha te uiraa ta tatou e nehenehe e ui no nia i te tauturu ta tatou e horoa no to tatou utuafare fetii?

⁵ Eaha ïa te auraa o te reira no to tatou utuafare fetii? O te hoê ïa oraraa mure ore, ia faaroo iho â râ tatou e ia auraro atoa i te mau faaueraa a te Atua (Ioane 3:36). I roto i ta ˈna Parau aueue ore, te tǎpǔ maira te Atua e e  haamou oia i te amuiraa o te mau mea haavî nei e e rave oia ia faaterehia mai te huitaata nei na te faatereraa parau-tia e te hapa ore ta ˈna i haamau (Daniela 2:44). Te parau ra hoi taua Parau nei e ta ˈna opuaraa, te “[amuiraa] i te mau mea atoa i te Mesia ra, to te raˈi, e to te ao nei”. (Ephesia 1:10.) Oia mau, e tupu te hoê au-maite-raa i roto i te ao taatoa nei, e e tahoê te fetii taata nei e tiamâ mai hoi i te mau aroraa e tupu nei i roto i tera nunaa e tera nunaa, i te mau amahamaharaa politita, i te mau ohipa taparahi taata taehae mau e te mau ohipa riaria a te tamaˈi. E faaea hau noa te mau utuafare atoa e “aore roa e taata e haamǎtaˈu mai ia ratou”. (Salamo 37:29, 34; Mika 4:3, 4.) E tupu mau â taua mau mea nei no te mea te mau taata atoa e ora i taua tau ra, e riro mai hoi ratou ei mau taata e “pee (...) i te Atua mai te tamarii herehia ra”, e e tamau â ratou i “[te haere ma te aroha]”. — Ephesia 5:1, 2.

⁶ I raro aˈe i te faatereraa a te Basileia o te Atua, e rave te fetii taata nei i te ohipa i roto i te autahoê e te oaoa, i te faariroraa i te fenua nei ei paradaiso, mai ta te Poiete i manaˈo na, te hoê ô o te faahotu mai i te maa e rave rahi no te huitaata taatoa nei. E auraro te mau manu e rave rahi, te mau iˈa e te mau animala i nia i te fenua nei i te taata e e tavini ia ˈna ei maitai no ˈna, inaha, o te hinaaro haapapuhia mai hoi te reira e te Atua (Genese 2:9; 1:26-28). Eita roa ˈtu te maˈi, te mauiui, te ruhiruhia aore ra te mǎtaˈuraa i te pohe e faaarepurepu faahou i te oaoaraa o te fetii taata nei. Te mau taata “i roto i te apoo” e faatiahia mai ratou ia fanaˈo ratou i te mau mea nehenehe atoa ta te oraraa e pûpû mai na ratou i reira. — Ioane 5:28, 29; Apokalupo 21:1-5.

⁷ Eaha ta outou e nehenehe e rave no te tauturu i to outou utuafare fetii ia amui atoa mai i roto i te mau utuafare e apiti atu i roto i te tupuraa o taua opuaraa a te Atua ra?

TE TIA IA TATOU IA RAVE

8. Eaha te tia ia tatou ia rave ia farii mai te Atua ia tatou?

⁸ Eiaha roa ˈtu te hoê noa ˈˈe o tatou ia riro noa ˈtu i te  haavare i te manaˈoraa e e tia noa ia ˈna ia ora mai tei parauhia e “te hoê oraraa afaro” e nehenehe atu ai oia e ô i roto i te amuiraa apî o te mau mea i tǎpǔhia mai e te Atua. E ere na tatou e opua e eaha te mau huru e titauhia; mea tia râ e na te Atua e opua. A haapii atu ai Iesu i te hoê mahana i Iudea, ua ani maira te hoê taata ia ˈna i te na ôraa mai e: “Eaha vau e noaa ˈi te ora mure ore?” Ua pahono atura Iesu ia ˈna: “E hinaaro oe i to Atua ia Iehova ma to aau atoa e ma to varua atoa, e ma to puai atoa, e ma to manaˈo atoa ia hope, e aroha hoi oe i to taata-tupu mai te aroha ia oe iho na.” (Luka 10:25-28). Ma te papu maitai, eita roa ˈtu e navai te parau-noa-raa e te tiaturi ra tatou i te Atua, te haere ra hoi tatou i te mau putuputuraa i reira e faahitihia ˈi te parau no te Bibilia aore ra te hamani maitai ra tatou i te tahi taime vetahi mau taata. E tia râ te faaroo ta tatou e faaite nei, ia ohipa hohonu i nia i to tatou mau manaˈo, to tatou mau hinaaro e ta tatou mau ohipa e rave, e te reira, i te mau mahana atoa e i te mau taime atoa o to tatou nei oraraa.

9. Eaha te mau faaueraa tumu bibilia e tauturu mai ia tatou ia hiˈo i te mau mea o te oraraa nei ma te hoê huru hiˈoraa aifaito maitai?

⁹ Ia tapea mai tatou i roto i to tatou feruriraa, to tatou mau auraa e te Atua, ma te faariro i te reira ei mea faufaa roa, mea ohie aˈe ïa no tatou ia ohipa ma te paari, e nehenehe atu ai tatou e tiaturi e e farii mai e e tauturu mai te Atua ia tatou (Maseli 4:10). Ia faahoˈi mai tatou i te mau mea atoa i nia i te Atua e ta ˈna opuaraa, e nehenehe ïa tatou e faaohipa i to tatou oraraa ma te au maitai. Parau mau, e tia ia tatou ia rave i te ohipa no te haamâha i to tatou mau hinaaro i te pae materia, te faahaamanaˈo maira râ te Tamaiti a te Atua e e ere na roto i te tapitapiraa aore ra i te maimi-uˈana-raa i te mau taoˈa materia tatou e nehenehe ai e haamaoro atu â i to tatou oraraa. Tera râ, ia maimi na mua tatou i te Basileia o te Atua e ta ˈna parau-tia, e haamaoro roa ˈtu â ïa tatou i te reira e a muri noa ˈtu (Mataio 6:25-33; Timoteo 1, 6:7-12; Hebera 13:5). Te hinaaro maira te Atua ia ora tatou i te hoê oraraa utuafare oaoa. Teie râ, ia tapitapi  rahi roa ˈtu â tatou no te reira e ore roa ˈtu ai tatou e faaite i te here mau no te mau taata no rapae, e riro ïa tatou i te faaino ia tatou iho, inaha, te horoa ˈtura tatou na to tatou utuafare fetii i te hoê hiˈoraa haihai roa no nia i te oraraa e e faaere tatou ia tatou i te haamaitairaa a te Atua. O te mau oaoaraa rahi roa ˈˈe ta te mau peu faaanaanataeraa i rotopu i te mau melo o te utuafare, e faatupu mai ia horoa iho â râ tatou no te reira i te parahiraa e au oia hoi, ia ore tatou ia tuu i to tatou here i te Atua i te piti o te parahiraa (Korinetia 1, 7:29-31; Timoteo 2, 3:4, 5). Ia ohipa noa tatou, i te pae tataitahi e i te pae no te utuafare fetii, ia au maite i te mau faaueraa tumu paari a te Parau a te Atua, e riro ïa to tatou oraraa i te faatupu mai i te mau oaoaraa rarahi, e riro atoa tatou i te manaˈo e te faatupu ra tatou i te tahi mea e hau atu â, te haamau ra tatou i te hoê niu maitai no te oraraa mure ore. No reira, “ta outou mau mea atoa e rave ra, e rave ma te aau atoa mai te mea e e na te Fatu [Iehova], (...) Ua itea hoi e, e noaa mai ta outou ra utua i te aiˈa no ǒ mai i te Fatu ra [ia Iehova]”. — Kolosa 3:18-24.

IA PATU NA OUTOU E TE MAU MELO O TE UTUAFARE

10. Eaha te faufaaraa o te mau aparauraa tamau no nia i te Bibilia i roto i te utuafare?

¹⁰ Ia tamau â te mau melo o te hoê utuafare i te titau i te hoê â tapao, mea faufaa roa ia aparau amui ratou i roto i te utuafare iho no nia i te Parau a te Atua. Mea rahi hoi ta ratou mau ravea i te mau mahana atoa o te faataa mai i te parau no nia i te mau mea ta ratou i ite aore ra i rave e, no nia atoa i te opuaraa a te Poiete (Deuteronomi 6:4-9). Mea maitai roa ia faaherehere tamau i te hoê taime i reira te mau melo atoa o te hoê utuafare e taio ai i te Bibilia e e aparau amui ai, ma te faaohipa atoa hoi i te tahi mau buka bibilia. E faaetaeta te reira i te autahoêraa o te utuafare fetii. E nehenehe ïa to ˈna mau melo e faaohipa i te Parau a te Atua no te tauturu i te tahi e te tahi ia faatitiaifaro i te mau fifi e farereihia e ratou. Ia horoa te mau metua i te hiˈoraa maitai, ma te ore e rave i te taime i faahereherehia no te aparauraa no nia i te Bibilia e te  utuafare fetii, no te faatupu i te tahi atu mau ohipa, te haapapu atura ïa ratou i ta ratou mau tamarii e mea faufaa mau â ia faatura e ia haafaufaa rahi i te Parau a te Atua. Inaha, te parau ra te Tamaiti a te Atua iho e: “E ore te taata e ora i te maa anaˈe ra, i te mau mea atoa râ i haapaohia e te Atua.” — Mataio 4:4.

11. E tia i te mau melo o te hoê utuafare ia ape i tei hea mau huru e maitai ai ratou i te pae varua?

¹¹ Mea faufaa roa “ia ore roa te au ore i te tino nei, ia faito atoa râ to te mau melo haapao ia ratou iho”. (Korinetia 1, 12:25.) E na reira atoa hoi i te tupu i roto i taua tino ra o te utuafare fetii. Eita te tane aore ra te vahine e haapeapea rahi no nia i ta ˈna iho mau mea i rave i te pae no te ite e te maramaramaraa no nia i te mau mea i te pae varua a haamoe roa ˈtu ai i te mau maitai o to ˈna hoa. Mai te peu e ei hiˈoraa, eita te tane e haapeapea rahi no te mau hinaaro i te pae varua o ta ˈna vahine, e riro ïa ta ˈna vahine i roto i te roaraa o te tau, i te ore faahou e faatupu i te mau opuaraa ta ˈna iho e opua ra. Mai te peu e eita te mau metua e anaanatae maitai no nia i te tupuraa i te pae varua o ta ratou mau tamarii, ia ore ratou e tauturu atu ia ratou ia taa nafea râ ia faaohipa i te mau faaueraa tumu o te Parau a te Atua e e faataa ˈtu e o te oaoaraa te itehia ia faaohipa ratou i te reira, e riro ïa ratou i te ite i te hoê mahana e, ua hutihia to ratou mafatu e to ratou feruriraa e te manaˈo nounou taoˈa o te ao nei. No te oraraa mure ore o to outou fetii taatoa, ia haapao maitai na outou ia horoa tamau oia i te taime no te tuatapapa i te Parau a te Atua e ia faariro oia i taua ohipa ra mai te hoê ohipa faufaa mau o te faaora.

12. Eiaha roa ˈtu ia moehia ia tatou i te apiti atu i roto ia vai?

¹² Mai te peu e “e haamata te here i te fare”, eita noa e faaea i reira. I roto i ta ˈna Parau, ua faaite atea mai te Atua e e riro ta ˈna mau tavini mau, i roto atoa hoi i te amuiraa o te mau mea nei, ei fetii rahi taeae e tuahine. Te aˈo maira oia ia tatou, “e teie nei, te vai nei ta tatou ravea”, ia ‘hamani maitai tatou i te taata atoa, ia rahi atu râ i to te fetii faaroo ra’, oia hoi i nia i “to [tatou] mau taeae atoa i te ao nei”. (Galatia 6:10; Petero 1, 5:9.) E tia  i to tatou utuafare fetii ia oaoa, ia putuputu tamau ratou e taua “fetii” rahi roa ˈtu â ra e e tia ia ˈna ia faariro i te reira mai te hoê oaoaraa ta ˈna e ore e faarue ohie noa no te tahi atu mau mea. — Hebera 10:23-25; Luka 21:34-36.

13. Eaha ta tatou hopoia no nia i te mau taata aita i roto i te amuiraa kerisetiano?

¹³ Eita râ to tatou here e taotia-noa-hia i nia i te feia i roto i “te fare o te Atua”, oia hoi i nia i te mau melo o ta ˈna amuiraa (Timoteo 1, 3:15). Mai ta te Tamaiti a te Atua iho i parau, mai te peu e e here tatou i te feia e here mai ia tatou e mai te peu e e taotiahia to tatou here i nia i to tatou mau taeae, ‘eaha ta tatou vahi hau i reira’? No te riro mai mai to tatou Metua i te raˈi ra, e tia ia tatou ia anaanatae mau i te taatoaraa o te mau taata e ia hamani maitai ia ratou ma te faaitoito tamau i te faaite atu ia ratou i te parau apî maitai no nia i te Basileia o te Atua e na roto i te haaraa i roto i taua tuhaa ra. Ia faaite to tatou utuafare fetii i taua huru here ra, e auraa mau â ïa to to tatou oraraa e e tapao atoa ta ˈna e titau ra. I roto i te rahiraa o te mau ohipa e farereihia e ratou, te haapii nei to ˈna mau melo atoa, te mau metua e te mau tamarii, eaha mau na te auraa te faatupuraa i te here, oia hoi, te peeraa i te hiˈoraa ta te Atua e horoa maira no nia i taua tumu parau ra (Mataio 5:43-48; 24:14). Te ite atoa ra ratou i te oaoaraa mau ta te ô anaˈe ra e faaohipahia ma te aau tae e nehenehe e faatupu mai. — Ohipa 20:35.

14. Eaha te mau aˈoraa te tia ia tatou ia faaohipa no te faatupu i te hoê oraraa utuafare oaoa?

¹⁴ Auê ïa mau tiaturiraa faahiahia mau e no te mau fetii e faaohipa i taua huru here nei! Ua haapii ratou e mea na roto i te peeraa i te mau aˈoraa a te Parau a te Atua ratou e nehenehe ai e faatupu i te hoê oraraa oaoa mau. Noa ˈtu te mau fifi e te mau ati e farereihia nei e te mau taata atoa, e noaa i te mau fetii e na reira nei i te mau faahopearaa maitatai mai teie atu nei. E hiˈo râ ratou i mua ia ratou e aita hoi ratou e manaˈo noa ra i te tahi tau matahiti e faaotihia e te pohe. Ma te papu maitai e e nehenehe mau â te mau parau tǎpǔ a te Atua e tiaturihia, te patu nei te mau melo o taua mau utuafare fetii ra ma te oaoa i te hoê oraraa mure ore no a muri aˈe.

15. Eaha te mau uiraa ta outou e nehenehe e ui no nia i te mau haamaitairaa ia faaohipa outou i te mau aˈoraa i faahitihia ˈtu i roto i teie nei buka?

 ¹⁵ Ua faaite teie buka e, maoti te tauturu a te Bibilia, a poiete ai oia i te fenua, te opuaraa a te Atua, ia taatahia ïa. No taua tumu ra oia i haamau ai i te utuafare fetii. Ua haamau atoa te Atua ra o Iehova i te mau ture i te pae no te haerea no te mau metua tane, no te mau metua vahine e no te mau tamarii, mau ture tei tuatapapahia i roto i taua buka nei. Ua nehenehe anei outou e faaohipa vetahi o taua mau faaueraa tumu ra i roto i to outou utuafare? Ua tauturu anei te reira ia outou ia faariro i to outou oraraa utuafare ei oraraa oaoa aˈe? O ta matou ïa e tiaturi nei. Eaha râ hoi ta te tau a muri aˈe e faaherehere maira no outou e no to outou utuafare?

16-18. Eaha te mau huru nehenehe mau ta Iehova i faaineine no te fenua?

¹⁶ E hinaaro anei outou e apiti atu i roto i te ohipa atuaturaa i te fenua? E hinaaro anei outou e atuatu ia ˈna ia nehenehe oia e faahotu mai e hia rahiraa hotu e ia nehenehe atoa te mau medebera ia hotu mai? E hinaaro outou ia monohia te mau tataramoa e te mau ovine e te mau uru raau heuri maitai? E oaoa anei outou, outou e to outou utuafare ia haavî i te mau animala o te fenua nei, eiaha noa ma te faaohipa i te mau pupuhi, te mau taura no te rutu aore ra te mau tapu raau, na roto râ i te here e te tiaturi i te tahi e te tahi?

¹⁷ Mai te peu e te hinaaro ra outou e ite i te tau i reira te mau ˈoˈe e riro ai ei auri arote e te mau mahae ei tipi tope vine, aita hoi e taata e hamani faahou i te mau paura atomi e eita atoa te taata e opua faahou e faatupu i te tamaˈi, i reira ïa outou e oaoa ˈi i roto i te amuiraa apî o te mau mea i tǎpǔhia mai e Iehova. E riro te faatereraa politita haavî, te huru feruriraa i te pae no te tapihooraa tauihaa e tae noa ˈtu hoi te haavarevare i te pae faaroo ei mau mea no te tau tahito. E ora te mau utuafare fetii tataitahi i roto i te hau i raro aˈe i ta ˈna o vine e ta ˈna suke. E faaroohia i nia i te fenua nei i te mau pii oaoa a te mau tamarii i faatia-faahou-hia mai mai te pohe mai e te himene a te mau manu e rave rau, e e huti tatou i te  mataˈi o te mau tiare noanoa maoti hoi i te mataˈi o te mau mea viivii i te pae maona. — Mika 4:1-4.

¹⁸ Mai te peu e e hinaaro mau outou e ite i te mau pirioi ia ouaoua mai te lia ra te huru e te mata o te mau matapo ia araara, e faaroo i te mau vava ia himene, e ite e te faaroo faahou ra te mau tariˈa turi e ia ite atoa e ua mono mai te ataata i te autâ e te oto, ua mono mai te ata i te roimata e te heva, ua mono mai te oraora-maitai-raa e te ora mure ore i te maˈi e te pohe, a faaitoito, outou e to outou utuafare fetii, i te faaî i te mau huru e titauhia e Iehova no te ora e a muri noa ˈtu i roto i te amuiraa o te mau mea ta ˈna e tǎpǔ maira e i reira teie mau huru tupuraa e vai mai ai e a muri noa ˈtu. — Apokalupo 21:1-4.

19. Nafea to outou utuafare e o outou e nehenehe ai e amui atu i roto i te feia e fanaˈo i te mau haamaitairaa a te amuiraa o te mau mea ta te Atua e haamau?

¹⁹ Tei roto atoa anei to outou utuafare fetii i te mau tiaa rahi taata oaoa e faaî i te fenua? Tei ia outou noa ïa? A faaohipa mai teie atu nei, i roto i to outou utuafare fetii, i te mau aˈoraa ta Iehova e horoa mai nei. A faaitoito amui, te mau metua e te mau tamarii, i te faaiteraa i teie nei e ua ite outou i te faaau ia outou i nia i te mau ture e ora ˈi outou i roto i taua amuiraa apî ra. A tuatapapa i te Parau a te Atua, a faaohipa e a faaite atu i to outou tiaturiraa i to outou mau taata-tupu. Ia na reira outou, e noaa ïa i to outou utuafare fetii i “te iˈoa maitai” i pihai iho i te Atua. Inaha hoi, “O te iˈoa maitai tei hau i te taoˈa rahi ra; e te ite-maitai-hia mai i te ario e te auro ra”. Eita roa ˈtu e moehia ia Iehova i te hoê iˈoa mai te reira te huru. “E haamaitaihia te feia parau-tia ia manaˈohia ra.” (Maseli 22:1; 10:7). Maoti te aroha faito ore o Iehova e nehenehe atura ïa outou e faatupu, outou e te taatoaraa o to outou utuafare fetii, i te hoê oraraa oaoa e te mure ore.

[Uiraa haapiiraa]

 [Hohoˈa api taatoa i te api 189]