Pene 6

Te aroha, “taua tatua nehenehe mau ra”

1-6. a) Eaha te ohipa e tupu mai ia ore na taata faaipoipo e haavî i to raua mau manaˈo e horuhoru ai ra? b) Ia apeehia tei hea mau faaueraa tumu bibilia e nehenehe ai e ape ia ino roa ˈtu â te hoê tatamaˈiraa?

 NO TE aha hoi e ore ai e nehenehe e tamaa i te hora tia?”, ta ta ˈna tane ïa e parau mai ia ˈna, e ua fiu roa hoi e ua rohirohi roa i te tiai-noa-raa i muri aˈe i te hoê mahana ohipa roa.

² “A faaea na i te amuamu, fatata roa i te ineine”, ta ˈna ïa e pahono atu. No ˈna atoa, e ere roa ˈtu i te mea ohie roa i taua mahana ra.

³ “E taere noa oe. No te aha hoi oe e ore roa ˈi e ineine?”

⁴ “Haavare, ta ˈna ïa e tuô atu. Ahiri pai oe e haapao mai i te tamarii, eita paha ïa oe e amuamu noa. Na oe atoa hoi tera mau pueraa tamarii.”

⁵ Mai teie te huru, i muri aˈe i to raua faariroraa i taua fifi nei ei ati rahi, te hoê tane e ta ˈna vahine riri-roa-raa e te faaririraa te tahi e te tahi. Ua tamau noa ˈˈera raua i te haapepe maitai te tahi e te tahi, ua ino roa iho â ïa taua po ra. Inaha, e nehenehe hoi ta raua toopiti atoa e ape ia ore te mau mea ia ino roa ˈtu â. E, i te mea hoi e ua haapao noa te tahi e te tahi i to raua manaˈo, aita ˈtura ïa to te hoa i tâuˈahia. Ma te riri, ua tatamaˈi aˈera raua.

⁶ E nehenehe teie huru fifi e tupu mai no te mau tumu e rave rahi. I te tahi taime, o te moni ïa te tumu, aore ra e manaˈo te tane e mea tâuˈa roa ta ˈna vahine ia ˈna e eita o ˈna e hinaaro ia amuimui atu oia i roto i te tahi atu mau taata. E nehenehe te vahine e manaˈo e eita roa ˈtu ta ˈna tane e haapao maira ia ˈna e eita roa ˈtu hoi e tâuˈa mai ia  ˈna. E nehenehe to raua mau auraa e ino roa no te tahi fifi rahi aore ra ia haapue noa raua i te tahi mau fifi rii. Noa ˈtu e eaha râ, te mea ta tatou e tapea mai i teie nei, te iteraa ïa e nafea râ ia faatitiaifaro i taua huru fifi nei. Inaha hoi, e nehenehe na hoa tataitahi e ape ia ore te huru tupuraa ia ino roa ma te ineine i te ‘toro atu i te tahi paparia’, e ma te ore ‘e faahoˈi te ino i te ino’, ia “pohe râ te ino i te maitai”. (Mataio 5:39; Roma 12:17, 21.) No te reira, e tia ia tatou ia faaohipa i te hitahita ore e te paari. Ei aroha kerisetiano atoa râ e tia ˈi.

EAHA MAU NA TE AROHA

7-9. a) Mea nafea to te Korinetia 1, 13:4-8 faataaraa mai i te aroha? b) Eaha ïa taua huru aroha ra?

⁷ I roto i te Korinetia 1, 13:4-8, e ite tatou, ma te faauruahia mai e te Atua ra o Iehova, i te auraa mau o te aroha. Teie ta tatou e taio. “E faaoromairaa roa to te aroha, e te hamani maitai; e ore te aroha e feii: e ore te aroha e faarahi, e ore hoi e faaahaaha. Eita e rave i te mea au ore, eita e imi i te maitai no ˈna iho, eita e riri vave, eita e manaˈo ino ia vetahi ê; eita e oaoa i te parau-tia ore, e oaoa râ i te parau mau; e tapoˈi i te mau mea atoa ra, e faaroo i te mau mea atoa ra, e tia i te mau mea atoa ra, e tiai i te mau mea atoa ra, e haamahu i te mau mea atoa ra. E ore roa te aroha e mou.”

⁸ E nehenehe te aroha [here] e niuhia i nia i te hinaaro i te pae tino, i nia i te mau auraa fetii aore ra i nia i te oaoaraa ta te tahi mau amuimuiraa e faatupu mai. Te faaite maira râ te Bibilia e ia faufaa-mau-hia te aroha, ia na nia ˈtu ïa oia i te here iho aore ra i te hinaaroraa te tahi i te tahi; ia faaterehia ïa oia na te manaˈo ra oia hoi, te haaraa ia oaoa roa te taata e herehia ra. E nehenehe atoa taua aroha nei e titau i te aˈo, mai te mau metua e aˈo i ta ratou mau tamarii aore ra i te Atua ra o Iehova e aˈo mai i te feia e haamori ra ia ˈna (Hebera 12:6). E ô mai te mau manaˈo hohonu e te mau manaˈo e horuhoru ai ra, tera râ eita tatou e faatia e ia na nia te reira i te haavaraa feruri-maitai-hia aore ra i te mau faaueraa tumu maitai i roto i to tatou mau auraa e vetahi ê. E faaitoito taua aroha nei ia tatou ia haapao maitai tatou i te mau hinaaro o te taata e ia hiˈo ia ratou ma te parau-tia.

 ⁹ Ia nehenehe tatou e haafaahiahia hau atu â i te mau maitai atoa ta te aroha, mai tei faataahia mai i roto i te Korinetia 1, 13:4-8, e nehenehe e horoa mai na te hoê utuafare fetii, e hiˈopoa maite anaˈe na i taua faataaraa nei:

10, 11. Eaha te tiaihia ra i te hoê hoa faaipoipo faaoromai e te hamani maitai, ia rave?

¹⁰ “E faaoromairaa roa to te aroha, e te hamani maitai.” Te faaohipa ra anei outou i te faaoromai i nia i to outou hoa faaipoipo? Noa ˈtu e e tupu mai te tahi ohipa o te faairia ia outou aore ra ia parihia mai outou ma te hape paha, te tapea ra anei outou i to outou riri? E faaoromai rahi to Iehova i te mau taata atoa e ‘te hinaaro nei hoi te maitai a te Atua ra e faatupu i to outou tatarahapa’. Te faaoromai e te hamani maitai, e mau hotu anaˈe ïa e faatupuhia e te varua o te Atua. — Roma 2:4; Galatia 5:22.

¹¹ Eita te aroha e farii i te ino, eita râ oia e “tamoemoe i te mau hapa atoa”. Eita oia e ru haere noa. E haapao te aroha i te mau huru tupuraa taa ê (Petero 1, 4:8; Salamo 103:14; 130:3, 4). Ua ineine noa oia i te faaore i te hapa, e tae noa ˈtu i te mau hapa ino roa. I manaˈo na paha te aposetolo Petero e mea faaoromai mau â oia i to ˈna aniraa ˈtu ia Iesu e: “Ia tuatapapa tau taeae i te hamani ino mai ia ˈu, ia hia a ˈu faaoreraa ˈtu i ta ˈna hara? ia hitu anei?” Ua pahono atura râ Iesu e: “Aore au i parau atu ia oe e, Ia hitu; ia hitu râ ahuru i te hituraa.” (Mataio 18:21, 22; Luka 17:3, 4). Eita te aroha e fiu i te faaore i te hapa e eita hoi to ˈna e otia no te hamani maitai. Te faaite ra anei outou i taua huru aroha ra?

12, 13. Nafea te pohe hae e nehenehe ai e tupu mai, e no te aha e tia ˈi ia tutava no te haavî i te reira?

¹² “E ore te aroha e feii [pohe hae].” E ere roa ˈtu i te mea ohie ia ora e te hoê hoa e pohe hae haere noa inaha, aita hoi e tumu. Ua riro teie huru pohe hae ei tapao no te hoê huru taata tiaturi ore i te tahi e te haavî rahi roa. Ua riro ïa te reira ei huru e au i te tamarii e o te haafifi hoi i te taata i haavîhia ia faaite i to ˈna huru mau e te auhoa i nia i te tahi atu mau taata. E itea mai te oaoaraa mau maoti te horoaraa ma te faahepo-ore-hia, eiaha râ maoti te faatiaraa ˈtu i te mau hinaaro e faahepohia mai e te tahi taata pohe hae.

¹³ “O vai râ te taata e mau i te [pohe hae]?”, ta te Bibilia  ïa e ani ra. Te pohe hae, o te hoê ïa o te mau ohipa tia ore o te tino nei (Maseli 27:4; Galatia 5:19, 20). E nehenehe anei ta outou e ite mai i roto ia outou iho i te tahi tapao no taua huru pohe hae nei e tupu mai na roto i te manaˈo tiaturi ore o te faarahihia mai hoi na roto i te tahi mau manaˈo niu-ore-hia? I te paeau rahi, mea ohie roa ia tapao mai i te mau hape a vetahi ê, mea faufaa aˈe râ ia hiˈopoa ia tatou iho. “Te vai ra hoi te feii e te mârô, tei reira atoa te arepurepu, e te mau parau iino atoa ra.” (Iakobo 3:16). E nehenehe te pohe hae e faaino roa i te hoê faaipoiporaa. E ere na roto i to outou faaheporaa ˈtu ma te pohe hae i te tahi mau titauraa haavî e noaa ˈi ia outou te turu a to outou hoa faaipoipo, na roto râ i te faaiteraa ˈtu i te hoê aupururaa here mau, te tâuˈaraa ˈtu i to ˈna huru e te tiaturiraa ˈtu ia ˈna.

14, 15. a) No te aha aita te taata e faateitei ia ˈna iho e faaite ra i te here? b) Maoti hoi i te faahaehaa noa i to ˈna hoa, eaha te tia ia ravehia?

¹⁴ “E ore [te aroha] e faarahi, e ore hoi e faaahaaha.” Parau mau, e rave rahi mau taata mea au roa na ratou ia faatiatia ia ratou iho, mea iti roa râ te taata e au i te faaroo atu i taua huru taata ra. E nehenehe atoa hoi te hoê taata tei matau maitai i te taata e faatiatia ra ia ˈna iho e huru ê roa. Te faateitei nei vetahi mau taata ia ratou iho ma te faahiti mai i te tahi mau parau maitai roa no nia ia ratou iho, area vetahi pae ra, mea ê ïa ta ratou huru raveraa. E faaino e e faahaehaa roa ratou i te tahi atu mau taata, inaha, o ratou atura ïa te feia maitai roa ˈˈe. No reira, e faateitei ïa ratou ia ratou iho ma te faahaehaa roa ˈtu i te tahi pae. Te taata e faahaehaa i to ˈna hoa faaipoipo, te faatiatia nei ïa oia ia ˈna iho.

¹⁵ Aita anei outou i ite aˈenei i teie huru tupuraa oia hoi, to outou faahaehaaraa ˈtu i to outou hoa faaipoipo i mua i te aro o vetahi ê? I to outou manaˈoraa, eaha ïa to ˈna huru i taua taime ra? Ahiri e ua faaite-pauroa-hia to outou iho mau hape i mua ia vetahi ê, eaha ïa ta outou e manaˈo? E manaˈo anei outou e te herehia maira outou? Eita, e ore te aroha “e faaahaaha”, na roto i te faateiteiraa ia ˈna iho aore ra te faahaparaa ia vetahi ê. A faaite i te hoê huru feruriraa e au ia paraparau atu outou no to outou hoa faaipoipo; e  haapaari mai ïa te reira i te taairaa e vai ra i rotopu ia orua. Ia faahiti râ outou i te tahi parau no nia ia outou iho, a pee atu i teie aˈoraa paari mau i papaihia i roto i te Maseli 27:2 e na ô ra e: “Na te tahi ê oe e haamaitai, eiaha na to oe iho vaha: ei taata ê â, eiaha to oe iho vaha.”

16. Eaha vetahi o te mau ohipa tia ore te tia ia tatou ia ape ia hinaaro tatou e rave i te hoê haerea here mau?

¹⁶ “Eita [te aroha] e rave i te mea au ore.” I roto i te mau ohipa tia ore mau, e faahiti anaˈe na i te faaturi, te inu-hua-raa i te ava e te feii (Roma 13:13). Taa ê atu i ta te aroha e rave, e faaino mau â teie mau ohipa i te mau auraa o te faaipoiporaa. E mau ohipa tia ore atoa te mau parau e te tahi mau ohipa faufau e tae noa ˈtu te reporepo o te tino. Eaha ta outou e rave ra ia ore to outou hoa faaipoipo ia huru ê i roto i taua tuhaa ra? Te faaite ra anei outou i to outou haapao maitai e to outou faatura ia ˈna? E peu maitai anei ta outou? E tauturu mai teie mau mea atoa ia paari â te mau taairaa i rotopu i na taata faaipoipo e ia oaoa raua.

17. Nafea te taata e ore e imi i te maitai no ˈna iho, e nehenehe ai e rave ia ore te mau tatamaˈiraa ia tupu mai?

¹⁷ “Eita [te aroha] e imi i te maitai no ˈna iho, eita e riri vave.” Eita atoa oia e haapao noa ia ˈna iho. Mea maitai aˈe hoi mai te peu e tera te huru i faaohipahia e na taata faaipoipo i faahitihia i te omuaraa o teie pene. Eita ïa te tane e taora ˈtu i te parau i ta ˈna vahine no te mea aitâ te maa i ineine atura, e eita atoa ïa te vahine e iria ˈtu i nia i ta ˈna tane. Ahiri e ua taa ia ˈna e te tumu o te riri o ta ˈna tane, o to ˈna ïa rohirohi, eita ïa oia e inoino, e pahono atu râ oia e: “Fatata roa te maa i te oti. Ua rohirohi roa paha oe. Tera mai te tahi maa hapaina pape monamona toetoe maitai, a inu a faaineine ai au i te amuraa maa.” E te tane ra, i to ˈna aˈe pae, ahiri e ua faaite oia i te huru taa maitai i ta ˈna vahine maoti i te manaˈo-noa-raa ia ˈna iho, e ani atu ïa oia mai te peu e e nehenehe ta ˈna e rave i te tahi ohipa no te tauturu atu ia ˈna.

18. Nafea te here e nehenehe ai e tauturu ia tatou ia ore e riri vave noa?

¹⁸ E riri vave anei outou ia parau to outou hoa i te tahi mau parau aore ra ia rave oia i te tahi mau ohipa, aore ra  e tamata anei outou i te tapao mai i roto i ta ˈna mau parau aore ra ta ˈna mau ohipa i te tahi mau manaˈo rii huna? Peneiaˈe e ua parau oia aore ra ua rave oia i te tahi mea ma te haapao ore, ma te ore e feruri inaha, aita hoi oia e hinaaro ra e ia inoino outou. Mai te peu e e aroha to outou, ‘eita te mahana e mairi i to outou ririraa’. (Ephesia 4:26.) I teie nei râ, e feruri anaˈe na mai te peu e ua riri iho â to outou hoa faaipoipo e e parau mai oia i te tahi parau aore ra e rave oia i te tahi ohipa ma te hinaaro mau e haamauiui ia outou. No te aha orua e ore ai e tiai ia topa to orua hau a tauaparau atu ai? Ia paraparau orua no nia i te fifi ma te feruri maite i nia i to te tahi e to te tahi oaoa, mea ohie aˈe ïa na orua ia itea mai i te mau parau e tano maitai. “Na te aau o te taata paari i faaite i te vaha i te haapao.” “O tei tapoˈi i te hapa ra, e auhia mai ïa.” Eita taua taata ra e faarahi atu â i te tatamaˈiraa (Maseli 16:23; 17:9). Mai te peu e e patoi atu outou i te hinaaro e faarahi atu â i te paraparauraa e tae roa i te taime a faaite roa ˈi outou e outou iho â tei tano, e rave ïa outou ia upootia mai te aroha.

19. a) Nafea te hoê hoa faaipoipo e nehenehe ai e ‘oaoa i te parau-tia ore’? b) No te aha e tia ˈi ia ore roa ˈtu e rave i teie mau mea?

¹⁹ “Eita [te aroha mau] e oaoa i te parau-tia ore, e oaoa râ i te parau mau.” Eita te taata e here mau ra i to ˈna hoa, e manaˈo e mea aravihi roa ïa oia i to ˈna haavareraa ˈtu ia ˈna, no nia i ta ˈna tabula ohipa e ta ˈna moni aore ra no nia i te feia ta ˈna e farerei ra. Eita te aroha e taviri i te parau mau no te faatia ia ˈna iho. E faaino te haavare i te tiaturi. Ia vai mau â te hoê aroha haavare ore i rotopu ia orua, e tia ia orua ia oaoa i te faaite i te parau mau i te tahi e te tahi.

MEA PUAI E TE FAAOROMAI TE AROHA MAU

20. A faaite mai e nafea te here a) “e tapoˈi [ai] i te mau mea atoa ra”, b) “e faaroo [ai] i te mau mea atoa ra”, c) “e tiai [ai] i te mau mea atoa ra”, d) “e haamahu [ai] i te mau mea atoa ra”.

²⁰ “E tapoˈi i te mau mea atoa ra, e faaroo i te mau mea atoa ra, e tiai i te mau mea atoa ra, e haamahu i te mau mea atoa ra.” E mau maite te aroha i mua i te mau fifi e te mau ohipa teimaha o te oraraa o na taata faaipoipo, e e haapii raua nafea ia faaite i te mǎrû e ia faaau te tahi i te tahi i  roto i teie taairaa fatata roa oia hoi, te faaipoiporaa. E tiaturi mau â te aroha i te faufaaraa o te mau aˈoraa atoa e vai ra i roto i te Parau a te Atua e e tutava oia i te faaohipa i te reira, noa ˈtu e e ere i te mea ohie. Noa ˈtu e eita oia e vaiiho ia ˈna ia vare ia faaau oia i te tahi ohipa e te feia peu ino, eita te aroha e oioi noa i te faaite i te tiaturi ore ia vetahi ê, e ohie râ oia i te horoa i to ˈna tiaturiraa ia ratou. Hau atu, e tiaturi oia i te mau ohipa maitai roa ˈˈe, inaha, ua papu roa ia ˈna e ia faaohipahia te mau aˈoraa bibilia, e itea mai te mau faahopearaa maitai roa ˈˈe. E nehenehe ïa te aroha e faatupu i te feruriraa papu, te manaˈo maitai i te mau mea atoa e te tiaturi i roto i te mau tau i mua nei. I te pae hopea, eita oia e aueue noa e aita to ˈna e tuearaa e te mau here uˈana e morohi noa. E faaoromai rahi to te aroha mau. E faaruru oia i te mau tupuraa ino ia tupu mai te fifi. E turu puai mau â oia, teie râ, noa ˈtu to ˈna puai, mea maitai oia, e te mǎrû, e faatanotano oia ia ˈna iho i te mau tupuraa atoa e eita oia e faaohipa rahi ia vetahi ê.

21, 22. A faahiti mai na i te tahi mau tupuraa e faaite mai e e ore roa te aroha e mou.

²¹ “E ore roa [teie huru aroha] e mou.” Eaha ïa te ohipa e tupu mai mai te peu e, no te tahi mau fifi, e tia i na taata faaipoipo ia faatitiaifaro i te mau ereraa rahi i te pae no te moni? Eita roa ˈtu ïa te vahine, o te faaite i teie huru here i ta ˈna tane, e imi i te hoê oraraa ohie i te tahi vahi ê atu, e turu maite atu râ oia i ta ˈna tane, ma te haaputuraa i te moni e ma te rave-atoa-raa i te ohipa mai te peu e e titauhia, no te faahope roa i te tuhaa moni a ta ˈna tane (Maseli 31:18, 24). I te tahi aˈe pae, eaha ta te hoê tane, ua roohia hoi ta ˈna vahine i te hoê maˈi ino roa, e rave? Mai te peu e te vai ra ia ˈna teie huru here, e faaohipa ïa oia i te mau ravea atoa no te aupuru ia ˈna mai tei titauhia, no te rave i te mau ohipa i te fare o te ore e maraa faahou ia ˈna e no te haapapu atu ia ˈna i to ˈna here rahi. Te horoa mai nei hoi te Atua iho i te hiˈoraa i roto i teie tuhaa. Noa ˈtu e eaha te huru o ta ˈna mau tavini haapao maitai, eita hoê aˈe mea ‘e nehenehe e faataa ê ia ratou i te aroha o te Atua’. — Roma 8:38, 39.

²² Eaha ïa te mau fifi e nehenehe e upootia mai i nia i taua huru here ra? Tera anei te here e itehia ra i roto i to  outou utuafare? Te tutava ra anei outou i te faaohipa i te reira?

NAFEA IA FAARAHI I TE HERE

23. Na te aha e faataa mai e e ohipa anei tatou ma te here aore ra eita?

²³ Mai te hoê uaua o te tino, e puai roa ˈtu â te here ia faaohipahia oia, e mai te faaroo atoa, mai te peu e aita e ohipa e mea pohe ïa. Ia faatupuhia te mau parau e te mau ohipa na roto i te mau manaˈo hohonu mau, e parauhia ïa e no roto mai te reira i te mafatu o te faahohoˈa hoi i te mau manaˈo huna e turai ia tatou ia rave i te tahi ohipa. “No te î o te aau hoi i parau ai te vaha. E tuu mai te taata maitai i te mea maitai no roto i te pueraa maitai o te aau.” Ia atuatu râ tatou i te mau manaˈo hohonu iino mau, “no roto mai hoi i te aau te manaˈo iino, te taparahi taata, e te faaturi, te poreneia, e te eiâ, te haavare, e te faaino”. — Mataio 12:34, 35; 15:19; Iakobo 2:14-17.

24, 25. Nafea outou e nehenehe ai e faaitoito i te mau manaˈo e turai ia outou ia faaite i te here?

²⁴ Eaha te mau manaˈo e te mau hinaaro hohonu ta outou e atuatu nei i roto i to outou mafatu? Ia feruri maite outou i te mau mahana atoa mea nafea to te Atua faaiteraa mai i to ˈna here e ia tutava outou i te pee atu i to ˈna huru, e haapuai â ïa outou i to outou mau manaˈo maitatai. Ia rahi atu outou i te faaohipa i taua here ra e ia rahi atu outou i te ohipa e i te paraparau ia au i teie here, e hau roa ˈtu ïa oia i te mau i roto i to outou mafatu. E mataro maitai outou i taua here ra, ia faaohipa outou ia ˈna i te mau mahana atoa i roto i te mau mea iti haihai roa. E inaha, i mua i te mau fifi ino mau, e vai mai ïa taua here ra, tei paari maitai i roto ia outou, e e tauturu mai te reira ia faaruru atu i taua mau fifi ra. — Luka 16:10.

²⁵ Ua tapao anei outou i te tahi mea i nia i to outou hoa faaipoipo ta outou e nehenehe e haapopou? A parau atu ïa. Te hinaaro ra anei outou e faaite i te tapao o to outou here? A pee atu i taua hinaaro no outou ra. E tia ia tatou ia faaite i te here mai te peu e e hinaaro tatou ia herehia mai tatou iho. Ia na reira outou, e riro ïa to outou hoa e o outou iho i te piri roa ˈtu â; e riro ïa orua ei hoê e e rahi roa ˈtu â to orua here.

26, 27. Nafea to tatou here e rahi ai ia haafanaˈo atu tatou i te tahi mea e te hoê taata ê atu?

 ²⁶ No te faarahi i to outou here, a faaite atu ia vetahi ê. I ora na o Adamu, te taata matamua, i roto i te hoê paradaiso i reira to ˈna mau hinaaro atoa i te pae tino nei, i te haamâharaahia. Ei taata haapao i te fenua nei, ua haatihia oia i te mau taoˈa nehenehe mau: eiaha noa e te mau mahora matie e te mau tiare, te mau uru raau e te mau anavai pape, e te mau animala huru rau atoa râ tei auraro na ia ˈna. Hoê râ mea te erehia ra ia ˈna: te tahi hoa o te nehenehe e ora i roto i taua paradaiso ra e o ˈna. Aita anei outou i mataitai aˈenei i te hoê toparaa mahana faahiahia mau e o outou anaˈe, ma te hinaaro i te tahi taata i herehia e outou i pihai iho ia outou o te nehenehe atoa e fanaˈo i taua oaoaraa ra? Aore ra aita anei outou i faaitehia mai i te tahi parau apî oaoa mau e inaha, aita e taata i pihai iho ia outou no te oaoa atoa i teie nei parau? Ua ite maite hoi te Atua ra o Iehova i taua hinaaro ra i roto ia Adamu e ua horoa ˈtura oia i te tahi hoa no ˈna o ta ˈna e nehenehe e faaite atu i to ˈna mau manaˈo e to ˈna mau hinaaro hohonu. Na roto maoti i to raua tufaraa i te mau mea e vai ra aore ra e horoahia mai ia raua ra, e nehenehe ai e piti na taata faaipoipo e haapaari e e faarahi i to raua here te tahi i te tahi.

²⁷ E ite-atoa-hia i roto i te faaipoiporaa te tahi mau huru i rotopu i na taata faaipoipo mai te hiˈoraa ˈtu paha i te tahi ma te here, te tahi horomiriraa aore ra te hoê parau mǎrû, aore ra te parahi-noa-raa te tahi i pihai iho i te tahi ma te ore e paraparau. E nehenehe te mau huru ohipa atoa e riro ei tapao no te here, oia hoi, te faaneheneheraa i te roi aore ra te horoiraa i te auˈa repo, te haaputuraa i te moni no te hoo mai i te tahi taoˈa ta ˈna e hinaaro noa ra, aita râ oia e hinaaro ra e ani, no te moni rahi o taua taoˈa ra, te tautururaa ˈtu i to ˈna hoa ia taerehia oia i ta ˈna ohipa. Te hereraa i te hoê taata, te apitiraa ˈtu ïa i roto i ta ˈna ohipa e te mau mea e anaanatae ai oia, e te taa-maitai-atoa-raa ˈtu i to ˈna mau tapitapiraa e to ˈna mau oaoaraa, te mau manuïaraa e te mau mea i ore i manuïa, to ˈna mau manaˈo e te mau hinaaro hohonu o to ˈna mafatu. Ia hoê â na ta orua mau opuaraa e ia tahoê orua i roto i ta orua tutavaraa  no te faatupu i te reira e tia ˈi. E riro mai te hoê tane e te hoê vahine ei hoê, ia na reira raua; tera mau te faarahi i to raua here.

28. Nafea te here e rahi ai, ia tavini tatou i to tatou hoa faaipoipo?

²⁸ Ia tavini outou i to outou hoa, te rave ra ïa outou e ia rahi â to outou here no ˈna. I te paeau rahi, e tavini te hoê vahine i ta ˈna tane ia tunu oia i te maa, ia faanehenehe oia i te roi, ia atuatu oia i te fare, ia puˈa oia i te ahu e ia haapao oia i te mau ohipa no te fare. Area te tane ra, e tavini oia i ta ˈna vahine ma te raveraa i te ohipa no te aufau i te maa ta ˈna e faaineine, i te mau roi ta ˈna e faanehenehe, te fare ta ˈna e atuatu e te ahu ta ˈna e puˈa. Ma te tavini e ma te horoa ˈtu, e rave ïa te tahi e te tahi ia itea mai ia raua te oaoaraa e e atuatu raua i to raua here. Ua parau hoi Iesu e mea maitai aˈe i te horoa ˈtu i te rave mai. E nehenehe atoa e parau e mea oaoa aˈe ia tavini atu e ia tavinihia mai (Ohipa 20:35). Ua parau oia i ta ˈna mau pǐpǐ e “tei rahi ra i roto ia outou na, ei tavini ïa no outou”. (Mataio 23:11.) E faaore roa teie huru haerea nei i te mau manaˈo feii e e faatupu oia i te oaoa. Ia tavini atu tatou i to tatou hoa, e ite mai ïa tatou i te manaˈo e mea faufaa tatou, e e faatupu hoi te reira i te tahi manaˈo teoteo e te oaoa i roto ia tatou. I te mea e maoti te faaipoiporaa e nehenehe roa ˈi te tane e te vahine e turu te tahi i te tahi e e itea mai ai ia raua i te oaoaraa, e nehenehe atura ïa raua e haapaari hau atu â i to raua taatiraa maoti te here.

29. No te aha te mau taata e ere i te tavini no te Atua, e farii maitai atoa ˈi i te mau tapao no te here?

²⁹ Eaha ˈtura ïa mai te peu e e hoê anaˈe o na taata faaipoipo tei riro ei tavini kerisetiano na te Atua o te faaohipa i te mau faaueraa tumu a te Bibilia? E faataui anei te reira i te haerea e tia i te hoê kerisetiano ia faaite? Eita ïa. Parau mau, eita paha oia e paraparau rahi roa no nia i te mau opuaraa a te Atua, eita râ to ˈna haerea e taui. Hoê â mau hinaaro matamua to te hoa faaipoipo aita to roto i te parau mau e to te hoa e haamori ra ia Iehova, e i roto i te tahi tuhaa, hoê â to raua huru. O ta te Roma 2:14, 15 ïa e haapapu mai nei i te na ôraa e: “Te Etene hoi aita a ratou ture ra, ia rave noa ratou i ta te ture ra, ore noa ˈtu â ta ratou ture, o ratou iho â ta ratou ture: ua faaite hua hoi  ratou i ta te ture i papaihia i roto i to ratou ra aau, te faaite ra hoi to ratou aau, e to ratou manaˈo te pari ra, e te faatia ra, ratou ratou iho.” Mea pinepine te hoê haerea kerisetiano tia i te farii-maitai-hia e e rave te reira ia rahi te here i rotopu i na taata faaipoipo.

30. E tia anei ia faaite i te here i roto noa i te mau tupuraa ino? A faataa mai i ta outou pahonoraa.

³⁰ Eita te here e tiai i te mau tupuraa ino roa no te faaite i to ˈna huru. E au oia i roto i te tahi mau tuhaa, i te hoê ahu. Oia mau, na te aha e puoi i te mau tuhaa taa ê o te hoê ahu? Na te tuaina anei i puoihia aore ra na te mau tausani tuhaa nainai roa i nirahia e te taura? Na te mau tausani tuhaa nainai roa ïa. Hoê â ïa no te “ahu pae varua”. Maoti hoi te haapue-tamau-raahia i te tahi mau parau e te tahi mau huru raveraa i te mau mahana atoa, e “faaahuhia ˈi” tatou e e itea ˈi e o vai mau na tatou. Taa ê atu râ i te ahu iho, eita taua “ahu” pae varua ra e pau aore ra e faufaa ore, inaha, ia au i te Bibilia, e “mea tahuti ore” ïa. — Petero 1, 3:4.

31. Eaha te mau aˈoraa maitatai no nia i te here e itea mai ia tatou i roto i te Kolosa 3:9, 10, 12, 14?

³¹ Te hinaaro ra anei outou ia ati maite noa ˈtu i to outou hoa faaipoipo na roto i “te aroha o taua tatua nehenehe roa ra”? A pee ïa i teie mau aˈoraa i horoahia mai i roto i te Kolosa 3:9, 10, 12, 14, oia hoi: “[Ia] haapae hoi outou i te taata tahito e ta ˈna atoa ra mau parau; e [a] faa-taata-apî (...). E tena na, e faaau aroha noa, e te hamani maitai, e te haehaa, e te mǎrû, e te faaoromai rahi (...) e ei nia roa iho i taua mau mea atoa nei, o te aroha o taua tatua nehenehe roa ra ïa.”

[Uiraa haapiiraa]