Te faufaa o te hoê aˈo here mau
Pene 10
Te faufaa o te hoê aˈo here mau
1. Eaha te titauhia ia faaroo mai te mau tamarii?
E ERE roa ˈtu te mau tamarii auraro, faatura e te peu maitai, i te mea tupu noa mai mai te reira. E faaineinehia ratou e e tupu mai ratou maoti te hiˈoraa maitai e te aˈo.
2. Nafea te mau manaˈo o te rahiraa o te mau taote i te pae feruriraa e haapao i te mau tamarii, e ore e tuea ra i te mau aˈoraa ta te Bibilia e horoa maira?
2 “Eiaha e hauti noa ˈtu i te tamarii!” O te parau ïa ta te mau taote e tuatapapa i te parau no te tamarii e horoa nei. Teie ta te hoê o ratou e parau ra: “E te mau metua vahine, te taa ra anei ia outou e te mau taime atoa outou e tairi atu ai i ta outou tamarii, te faaite atura outou ia ratou e mea riri roa na outou ia ratou?” Teie râ, i roto i ta ˈna Parau, teie ta te Atua e parau ra: “O tei vaiiho noa i te papai ra aore ïa i aroha i ta ˈna tamaiti; o tei aroha râ ia ˈna, e aˈo ïa ia ˈna i reira ra.” (Maseli 13:24). A hia ˈtura tau ahuru matahiti i teie nei, i roto i te mau nunaa i te pae tooa o te râ ma iho â râ, ua î roa te vahi hooraa tauihaa i te mau buka no nia i te haapiiraa i te mau tamarii, mau buka e haafaufaa ra i te farii-noa-raa i to ratou mau manaˈo. Ia au i to ratou mau taata papai, te mau taote tuatapapa i te parau no te feruriraa, e tapea te aˈo i te tamarii i roto i to ˈna tupuraa. Area i te tairiraa ia ˈna ra, e riaria roa ïa ratou ia manaˈo noa ˈtu ratou i te reira. Te patoi tia ra hoi to ratou mau manaˈo i te mau aˈoraa a te Atua ra o Iehova, te riro hoi te Parau i te na ôraa e ‘e ooti hoi tatou i te mea ta tatou e ueue’. (Galatia 6:7.) Eaha mau na ta te mau huero no nia i te farii-noa-raa i te mau mea atoa i ueuehia i roto i taua mau matahiti ra, i faatupu mai?
3, 4. Eaha te mau faahopearaa e faatupuhia i te oreraa te aˈo i roto i te utuafare, e, no reira, eaha ta te rahiraa o te taata e faaitoito ra i teie nei?
3 Papu maitai, ua ite tatou i teie mahana e te uˈana noa ˈtura te ohipa taparahi taata e te mau peu iino a te mau ui apî. I roto e rave rahi mau fenua maona, hau atu i te 50 i nia i te hanere o te mau ohipa iino roa e ravehia, na te mau taurearea ïa e rave. I roto i te tahi mau tuhaa o te ao nei, ua riro te mau fare haapiiraa ei vahi tatamaˈiraa, ei vahi parau-faufau-raa, ei vahi raveraa i te mau ohipa iino, ei vahi taparahiraa, ei vahi eiâraa, ei vahi tutuiraa i te auahi, ei vahi haruraa i te vahine e ei vahi taparahiraa i te taata, ma te ore hoi e faahiti i te parau no nia i te raau taero. Ua faaite maira te hoê tia no te hoê taatiraa feia haapii no te hoê fenua rarahi e, o te fare haapiiraa te tumu no te mau fifi i te pae no te aˈoraa, te ore hoi i ite nafea râ ia ohipa i nia i te mau tamarii i to ratou iho â nainairaa ra, e o te utuafare fetii te tumu no te mau peu iino a te ui apî e o te metua atoa hoi, i te oreraa e faahepo i ta ratou mau tamarii ia haapao i te tahi mau ture maitai i te pae no te haerea. I te uiraa ra: ‘No te aha vetahi mau melo o te utuafare e riro mai ai ei mau taata taparahi taata e eiaha râ vetahi?’, teie ta te hoê tumu parau no te Encyclopédie britannique e faaite ra: “E riro paha e te aˈo i roto i te utuafare, e ere roa ˈtu ïa i te mea etaeta roa, e aita hoi e haapaohia ra. Mai te huru ra ïa e te faaite mai nei te tahi mau tuatapaparaa i ravehia e te mau marite e fatata 70 i nia i te hanere o te mau tamarii ohipa iino tei ore i aˈo-maitai-hia.”
4 Ua faatupu te mau faahopearaa i itehia i te hoê tauiraa i roto i te mau manaˈo o e rave rahi mau taata e ua hoˈi faahou mai ratou i nia i te aˈo.
TE RAAU O TE AˈO
5. Eaha te manaˈo o te Bibilia i nia i te papai?
5 E nehenehe te tairiraa ˈtu i te hoê tamarii e riro ei mea maitai no ˈna, inaha te parau ra te Parau a te Atua e: “Eiaha e haamairi i te aˈo i te tamaiti; ua papai anaˈe oe ia ˈna i te raau ra, e ore ïa oia e pohe: oia ïa, ua papai anaˈe oe ia ˈna i te raau ra, ua ora to ˈna varua ia oe e ore e tae i hade [te pohe].” Te na ô atoa ra oia e: “Ua mau roa te maamaa i roto i te aau o te tamarii; na te papai râ na te aˈo ra e faataa ê atu ia ˈna.” (Maseli 23:13, 14; 22:15). Ia tapitapi mau te mau metua no te oraraa o ta ratou mau tamarii, eita roa ˈtu ïa ratou e aˈo atu i ta ratou mau tamarii ma te paruparu aore ra ma te haapao ore. E faaitoito te here ia ratou ia ohipa, ma te paari e te parau-tia, i te mau taime atoa e tia ˈi.
6. Eaha te auraa te parau ra aˈo?
6 Na roto i te parau ra aˈo, eiaha noa tatou e manaˈo i te parau ra faautuaraa. Te auraa matamua o taua parau nei, “te hoê ïa haapiiraa e te hoê faaineineraa e taaihia i nia i te tahi huru faanahoraa, aore ra te tahi huru vahi”. No reira te Maseli 8:33 e ore ai e parau e: “Ia taa na ia outou i te aˈo”, tera râ: “E faaroo mai i te aˈo ia paari.” Ia au i te Timoteo 2, 2:24, 25, e tia i te kerisetiano ia riro ei taata “mǎrû râ oia i te taata atoa nei, e te au hoi ia haapii ia vetahi ê, e te faaoromai maite i te ino, ma te haapii mǎrû maite i te feia i mârô maira”. I ǒ nei te parau ra “haapii”, o te huriraa ïa o te parau heleni ra ïa aˈo. Mai teie te huru o taua parau nei â i te huriraahia i roto i te Hebera 12:9: “E e metua hoi to tatou to te tino nei, o tei aˈo mai ia tatou, e ua faaiti hoi tatou, eiaha ia rahi atu to tatou auraro i te metua o te varua nei, e ia ora ˈtu?”
7. Eaha te mau haamaitairaa e noaa i te mau metua e aˈo i ta ratou mau tamarii?
7 Te mau metua e ore e aˈo i ta ratou mau tamarii e riro atoa ïa ratou i te ore e faaturahia mai, mai te mau faatereraa e faatia noa e ia ofatihia te ture ma te ore e faautua, e nehenehe e faaturahia e to ˈna mau taata. E haapapu maite te aˈo e faaohipahia ma te tia i te tamarii e mea anaanatae mau na ta ˈna mau metua ia ˈna. E faatupu oia i te hau i roto i te utuafare, inaha “o te maitai ra ïa o te parau-tia te tupu i taua aˈo ra, i te feia i haamatarohia i te reira”. (Hebera 12:11.) Ua riro te mau tamarii faaroo ore aore ra haerea ino ei mau tumu ririraa i roto i te utuafare. Hau atu, eita ratou e oaoa roa e eita atoa hoi ratou e oaoa roa ia ratou iho. “E aˈo atu oe i to tamaiti, e mauruuru oe ia ˈna i reira; oia â ïa, e oaoa to aau ia ˈna i reira.” (Maseli 29:17). E nehenehe te tamarii i aˈohia ma te etaeta e te here atoa râ, e taui i to ˈna haerea e e riro mai oia ei tamarii maitai aˈe. Ma te papu maitai, “o te maitai ra ïa (...) te tupu” i te aˈo.
8. Nafea te mau metua e nehenehe ai e aˈo i ta ratou mau tamarii na roto i te here?
8 “O ta [Iehova] e here ra, o ta ˈna ïa e aˈo mai.” (Hebera 12:6). E na reira atoa te mau metua e haapeapea mau ra no te oaoaraa o ta ratou mau tamarii. Na te here e faaitoito ia ratou ia aˈo atu i ta ratou mau tamarii. Ia rave te hoê tamarii i te tahi ohipa ino, mea tano iho â ïa ia riri tatou i te reira, te faaite maira râ te Bibilia e tia ia tatou ia ‘faaoromai maite i te ino’. (Timoteo 2, 2:24.) Ia mǎrû mai tatou, eita paha ïa te hape a te tamarii e riro mai ei mea ino roa. “Na te haapao o te taata e ore e riri vave ai; o to ˈna ïa maitai te faaore i te hara ra.” (Maseli 19:11; hiˈo atoa Koheleta 7:8, 9). E nehenehe atoa te tahi mau huru tupuraa taa ê e itehia mai. I te tahi taime, e rohirohi roa paha te tamarii aore ra eita o ˈna e anaanatae maitai ra. Aore ra ua moehia paha ia ˈna te mea i parauhia ˈtu ia ˈna. Eita anei te reira e ite-atoa-hia ra i nia i te mau taata paari? Noa ˈtu â ïa e eita ta tatou e nehenehe e vaiiho i ta ˈna hape ia mairi, eiaha roa ˈtu ïa te aˈo ia riro ei riri haavî-ore-hia aore ra ei ravea no te haamâha i te riri o te metua tane aore ra o te metua vahine. E faatupu mai te aˈo i te tahi haapiiraa. Inaha hoi, na roto i te riri rahi, eita tatou e haapii i te tamarii ia faaohipa i te hitahita ore, eita roa ˈtu. Mai te peu e mai te reira te huru, eita roa ˈtu te tamarii e manaˈo e te tapitapi mau ra tatou no ˈna, te hoê hoi te reira manaˈo o te faatupuhia na roto i te hoê aˈoraa e horoa-maitai-hia. Mea faufaa roa ˈtura ïa te hoê huru aifaito i roto i taua tuhaa ra e e riro hoi te reira i te faatupu i te hau.
A HAAMAU I TE TAHI MAU OTIA TAA MAITAI
9. Ia au i te Maseli 6:20-23, eaha te tia i te mau metua ia horoa na ta ratou mau tamarii?
9 E tia i te mau metua ia haamau i te tahi mau ture i te pae no te haerea na ta ratou mau tamarii. “E mau maitai, e tau tamaiti, i te parau a to metua tane, e eiaha e faarue i te aˈo a to metua vahine. E tapea tamau maite i te reira i roto i to aau; e haafifi maite i te reira i nia i to aˈî. Ia haere oe ra, na taua aˈo ra oe e aratai; e ia taoto oe ra, na ˈna oe e tiai, e ia ara oe ra, na ˈna e paraparau mai ia oe. E lamepa hoi te ture, e tiarama hoi te aˈo; e te haapiiraa e faaitoito ra, o te eˈa ora ïa.” Te tapao ta te mau faaueraa tumu e horoahia ra e te mau metua, te aratairaa ïa e te parururaa i ta ratou tamarii; te faaite maira hoi te reira e mea faufaa mau â na ratou to ˈna oaoaraa. — Maseli 6:20-23.
10. Eaha te nehenehe e tupu mai ia ore te mau metua e aˈo i ta ratou mau tamarii?
10 Te metua tane e ore e tâuˈa i roto i taua tuhaa ra, e hopoia teimaha roa ïa to nia ia ˈna. Ua vaiiho aˈera o Eli, tahuˈa rahi no te nunaa Iseraela i tahito ra, i ta ˈna mau tamarii ia riro ei mau tamarii nounou, paieti ore e te haerea tia ore. Ua patoi rii noa ˈtu iho â ïa oia, aita râ oia i rave i te hoê noa ˈˈe ohipa no te faaore i te mau ohipa iino a ta ˈna mau tamarii. Ua na ô aˈera te Atua e: “E tahoo atu vau i to ˈna ra utuafare e a muri noa ˈtu, no te mea, ite noâ oia i te hara a na tamarii no ˈna ra, o tei faariro ia raua iho ei mea faufau ra, aitâ oia i faaore i ta raua parau.” (Samuela 1, 2:12-17, 22-25; 3:13). Oia atoa, te metua vahine e ore e haapao i ta ˈna hopoia e riro ïa oia i te peapea roa. “Na te papai e na te aˈo e haapaari atu; o te tamaiti [aore ra te tamahine] râ ia faarue-taue-noa-hia ra, e riro te metua vahine i te haama.” — Maseli 29:15.
11. No te aha e tia ˈi ia haamau i te tahi mau otia no te mau tamarii?
11 Mea hinaaro na te mau tamarii ia haamauhia te tahi mau otia, mai te peu eita ra, eita ïa ratou e taa e nafea râ. Ia faaau ratou ia ratou i taua mau otia ra, e manaˈo atura ratou e tei roto ratou i te hoê pǔpǔ, te fariihia maira ratou e taua pǔpǔ ra no te mea e pee ratou i ta ˈna mau ture. Aita anaˈe e aˈo, e rave noa ïa te tamarii mai ta ˈna e hinaaro e e tia hoi ia ˈna ia faaitoito o ˈna anaˈe ra. Te faaite maira te mau ohipa i tupu e mea hinaaro mau â na te mau tamarii i te mau taata paari o tei papu maitai i te maitairaa o te mau otia ta ratou e faahepo atu e tei ineine i te faaohipa i te aˈo. E tia atoa ia ratou ia farii e i nia i te fenua nei, e otia to te tiamâraa o te taata tataitahi e e turu te reira i te oaoaraa no te taatoaraa. E nehenehe noa tatou e fanaˈo i te tiamâraa mai te peu e e faatura mai te tahi pae i to tatou iho tiamâraa e mai te peu e e farii tatou i to ratou. Te taata e ore e haapao i te mau otia e haamauhia, te faaite ra ïa oia e te “rave [ra oia] i te hapa e te mea tia ore i tana taeae i taua mea nei”. — Tesalonia 1, 4:6.
12. No te aha te aˈoraa ia ˈna iho e riro ai ei mea faufaa roa, e nafea te mau metua e nehenehe ai e tauturu i ta ratou mau tamarii ia faaohipa i te reira?
12 Ia haapii te mau tamarii e ia na nia ˈtu ratou i te mau otia e faatiahia e aˈohia ratou mai te reira aore ra mai te reira te huru, e papu ïa ia ratou e eaha taua mau otia ra e, maoti te huru papu e te mau aˈoraa o to ratou mau metua, ua ite atura ïa ratou i te aˈo ia ratou iho, aˈo e titauhia e oaoa ˈtu ai. Aore ra, e aˈo tatou ia tatou iho, aore ra, e aˈohia mai tatou e te tahi atu taata (Korinetia 1, 9:25, 27). Ia haapii tatou i te aˈo ia tatou iho e ia haapii tatou i ta tatou mau tamarii ia na reira atoa, e oaoa aˈe ïa to tatou oraraa, e to ratou atoa, e e riro tatou i te ape i te mau fifi e te mau peapea.
13. Eaha te mau tuhaa faufaa roa te tia i te mau metua ia tapea i roto i to ratou feruriraa ia horoa ratou i te hoê huru haerea na ta ratou tamarii?
13 E tia i te mau tamarii ia papu maitai eaha te mau ture i te pae no te haerea e te mau otia e faahepohia ˈtu ia ratou, e ia riro atoa hoi te reira ei mau ture e ei mau otia tia e te farii atoa hoi i te tahi mau mea. Eiaha e faahepo rahi atu aore ra iti mai i ta outou mau tamarii. Ia tâuˈa na outou i to ratou matahiti ia aˈo atu outou ia ratou. Eiaha e titau atu ia ratou ia riro ei mau taata paari iti. Te parau ra te aposetolo e, a vai haihai noa ˈi oia, e rave na o ˈna mai te taata haihai ra (Korinetia 1, 13:11). Teie râ, ia oti outou i te haamau i te tahi mau ture au maitai e ia ite ta outou tamarii i te reira, e ara outou i te haapao oioi e i te mau taime atoa e tia ˈi. “Ia riro râ ta outou oia ei oia, e ta outou aita ei aita.” (Mataio 5:37). I te parau mau, mea au roa na te mau tamarii ia haapao te mau metua i ta ratou parau, oia hoi ia faaohipa i tei parauhia ia ratou ra e e nehenehe hoi e taa ˈtu eaha râ to ratou huru i muri iho, inaha, te ite ra ratou i roto i to ratou mau metua te hoê huru etaeta mau e ua ite ratou e nehenehe ta ratou e faaite i to ratou manaˈo ia ratou, ia roo-noa-hia ˈtu ratou i te fifi aore ra mai te peu e e hinaaro ratou i te tahi tauturu. Ia faaite mai to ratou mau metua e e mau metua tia ratou e te manaˈo tano ia aˈo ratou i ta ratou mau tamarii, e riro ïa te mau tamarii i te manaˈo e te paruruhia ra ratou, no te mea mea au hoi na ratou ia ite e e tiaturi râ ratou ia vai e e nehenehe mau hoi ratou e na reira e te mau metua mai te reira te huru.
14. No te aha e riro ai ei mea faufaa roa ia haapapu maitai te mau metua i to ratou manaˈo ia ore ta ratou mau tamarii e farii maite mai i ta ratou mau faaueraa?
14 E tia i te mau metua ia faaite i to ratou mau-papu-raa ia nehenehe ratou ia faaite i to ratou manaˈo papu ia ore ta ratou tamarii ia farii i te rave i te mea ta ratou e titau atu ia ˈna. E faaohipa ˈtura ïa vetahi pae i te haamǎtaˈuraa, e e rave i te tahi mau aparauraa faufaa ore e te tamarii aore ra e haavarevare atu ia ˈna ia auraro mai oia. E pinepine i te itehia e e navai noa te manaˈo papu maitai e te parauraa ˈtu i te tamarii e e tia ia ˈna ia rave i tera ohipa e i taua iho taime ra. Ia faaineine te hoê tamarii i te haere i te tahi pae purumu a tere mai ai te hoê pereoo, ua ite te mau metua i te parau papu atu ia ˈna i te ohipa ta ˈna e rave. Teie ta vetahi mau taata maimi i parau: “Inaha, te faahepo nei te taatoaraa o te mau metua i ta ratou mau tamarii ia haere i te haapiiraa, (...) ia purumu i to ratou niho, eiaha ia paiuma ˈtu i nia i te tapoˈi fare, ia hopu i te pape, e e rave rau atu â. Mea pinepine te tamarii i te ore e faaroo oioi i te parau, teie râ, e auraro mai iho â ratou i muri aˈe no te mea ua ite ratou e mea etaeta mau te mau metua i nia i teie mau ohipa.” Eiaha outou e tiaturi e ‘e tapea tamau maite [ta outou mau tamarii] i ta outou mau ture e mau faaueraa i roto i to ratou aau’, mai te peu e eita outou e ara e ia faaohipa tamau ratou i te reira. — Maseli 6:21.
15. Ia ore te mau metua e haapao tamau i te mau ture ta ratou iho i haamau, eaha ïa ta te reira e faatupu i nia i te mau tamarii?
15 Ia rave te mau metua e ia faatura-noa-hia ta ratou mau faaueraa i te tahi taime, ia au i to ratou huru i taua taime ra, aore ra ia faataere ratou i te aˈo i ta ratou mau tamarii ia ore taua mau tamarii ra e faaroo mai ia ratou, te faaitoito atura ïa ratou i ta ratou mau tamarii ia ite e e nehenehe ratou e haere roa i hea i roto i te oreraa e auraro ma te ore e faautuahia ˈtu. Ia ore te aˈo e rave-oioi-hia, e pee ïa te mau tamarii i te feia paari na roto i te tamau-noa-raa i roto i te ino. “No te mea aore te utua no te parau ino ra i tuu-vave-hia ˈtu, i haapapuhia ˈi te aau o te taata nei i te rave i te parau ino ra.” (Koheleta 8:11). No reira, a faaite tahaa ˈtu i to outou manaˈo e ia ohipa na outou ia au i ta outou mau parau e faahiti. Ia ite ta outou tamarii e ia papu ia ˈna e eita e faufaa ia faariri, ia paraparau aore ra ia haa mai te huru ra ïa e e taata ino roa outou.
16. Eaha te tia i te mau metua ia rave ia ore ratou ia horoa ˈtu i te mau faaueraa au ore?
16 Mea faufaa roa ˈtura ïa ia feruri hou aˈe e ohipa ˈtu ai. E pinepine te mau ture aore ra te mau faaueraa e horoahia ma te haapaoraa ore i te riro ei mea au ore. “Ia ru te taata atoa i te faaroo, ia haere maine i te parau, ia haere maine hoi i te riri.” (Iakobo 1:19). Ia ore outou ia faaohipa i te aˈo ma te aifaito e ma te tano maitai, e riro te mau tamarii tei ite hoi eaha te mea tano, i te faariri e te inoino.
IA HIˈOPOA MAITAI NA OUTOU I TA RATOU MAU PEU FAAANAANATAERAA
17. Eaha te tia ia haapii i te mau tamarii no nia i te ohipa e te hauti?
17 Ua riro te hauti ei tuhaa no te oraraa o te hoê tamarii (Zekaria 8:5). E tia i te mau metua ia faˈi i te reira, a haapii rii rii noa ˈtu ai ratou i te tamarii ia farii popou i te ohipa e ia ite i te amo i te mau hopoia. E papu ïa ia ˈna e e na muri mai te hauti i te ohipa.
18. Eaha te faahopearaa ta te mau amuimuiraa a te mau tamarii e nehenehe e faatupu mai i nia ia ratou?
18 E riro vetahi mau tamarii i te ora ˈtu i roto i te mau aroâ aore ra i te riro mai ei mau taata ěê i roto i te utuafare no te mea e matau noa ratou i te hauti i te tahi atu vahi. Inaha, e mau faahopearaa iino to te mau amuiraa iino (Korinetia 1, 15:33). Parau mau, mea faufaa roa ia farerei atu te hoê tamarii i te tahi atu mau taata i rapaeau mai i to ˈna utuafare, no te faaaano atu â i to ˈna ite no nia i te taata, ia rahi roa râ taua mau amuimuiraa ra i rapae e ia ore e hiˈopoahia, e riro ïa te utuafare fetii i te paruparu mai e e nehenehe atoa hoi e amahamaha.
19. Eaha paha te tia i te mau metua ia hiˈo, e ite ratou e te faariro ra anei ratou i to ratou utuafare ei vahi au maitai no ta ratou mau tamarii?
19 E tia i te mau metua ia faaohipa i te aˈo no te faatitiaifaro i taua mau huru ra. E tia atoa râ hoi ia ratou ia aniani e eaha ta ratou e nehenehe e rave ia anaanatae mai ta ratou mau tamarii i roto i te utuafare e te horoa ra anei ratou i to ratou taime no ta ratou mau tamarii, eiaha noa no te haapii atu ia ratou e te aˈo atu ia ratou, ia riro atoa mai râ ratou ei mau hoa mau. Mea rahi noa anei ta outou ohipa no te horoa ˈtu i te taime no ratou e no te hauti atu e o ratou? Ia ore outou e horoa i te taime ta outou hoi e nehenehe e horoa no te rave i te tahi mea e ta outou tamarii, ia papu ïa ia outou e eita ta outou e nehenehe e na reira faahou. Eita te tau e hoˈi i muri e e taui hoi te tamarii: e haere noa o ˈna i te paariraa e e taui atu ai. E mairi noa te tau e, noa ˈtu â ïa e te manaˈo ra outou e i nanahi ra e pepe â ta outou tamaiti no haamata noa ˈtura hoi i te haere, te ite atura hoi outou e e taurearea oia i teie nei e ua riro mai ta outou tamahine iti ei potii apî. Na roto i te tapearaa i to outou huru aifaito e te aˈoraa ia outou iho no nia i te faaohiparaa i to outou taime, outou e ape ai i te haamairi i te mau ravea ta taua mau matahiti faufaa mau ra e pûpû maira na outou e te iteraa i ta outou mau tamarii ia atea ê ia outou, mea apî roâ hoi ratou. — Maseli 3:27.
20, 21. I roto i te mau utuafare te vai ra te hoê afata teata i reira, eaha te hopoia ta te mau metua e tia ia faatupu e no te aha?
20 I te vahi te afata teata e riro ai ei tuhaa matauhia i te pae no te faaanaanataeraa, e riro paha ïa ia taotia i te mataitai i te reira. No vetahi mau metua, ua riro te afata teata ei tiai no te mau tamarii. E riro paha te reira ei mea ohie roa e te tamoni ore, tera râ hoi, i te parau mau, e nehenehe taua ravea ra e riro ei ravea teimaha roa. E pinepine i te patahia mai na roto i te afata teata, i te mau hohoˈa no nia i te haavîraa puai e no nia i te melo taatiraa, e mai te huru ra ïa e te faaite maira taua mau hohoˈa ra e e ravea maitai roa te haavîraa puai no te faatitiaifaro i te mau fifi e ua riro te mau taatiraa tia ore i te pae tino ei tuhaa no te mau mea e fariihia i roto i te oraraa nei. E rave rahi mau tuatapaparaa i faaite mai e, aita te mau taata, te mau taurearea iho â râ, e tâuˈa faahou nei i taua mau ohipa ra. Aita e ore e te hinaaro ra outou ia amu ta outou mau tamarii i te hoê maa maitai tei ore i taero. E tia râ hoi ia outou ia haapeapea rahi atu â no nia i te mea e faatamaa ra i to ratou feruriraa. Mai ta Iesu i faaite, e ere te maa, te mea râ ta te feruriraa e rave mai te ô atu i roto i te mafatu. — Mareko 7:18-23.
21 E nehenehe te hiˈopoaraa outou i te mau tabula i te pae no te afata teata ta ta outou tamarii e mataitai e i te taime ta ˈna e horoa i mua i te afata teata, e ohipa rahi roa mai i nia i to ˈna tupuraa. Parau mau, e nehenehe te afata teata e riro ei mea anaanatae mau, ei haapiiraa atoa hoi, tera râ, ia ore e faaohipa-maitai-hia, e nehenehe oia e riro mai ei mea titauhia o te rave rahi i to tatou taime. Inaha hoi, te taime, o te ora ïa, e e nehenehe hoi te rahiraa o te taime e horoahia i mua i te afata teata ma te papu maitai, e faaohipahia ma te faufaa aˈe. Oia mau, ua riro te afata teata ei peu faaanaanataeraa o te rave e ia ore tatou ia ohipa. E mono oia eiaha noa te ohipa i te pae tino, te taioraa atoa râ e te aparauraa. Mea hinaaro hoi na te mau melo o te hoê utuafare ia putuputu amui ratou e ia aparau, e eita roa ˈtu hoi mai te reira te huru mai te peu e e parahi noa ˈtu ratou ma te ore e paraparau i mua i te afata teata. I roto i te mau utuafare e riro ai te mataitai-rahi-raa i te afata teata ei fifi, e nehenehe te mau metua e tauturu i ta ratou mau tamarii ia anaanatae i te tahi atu â mau peu faaanaanataeraa, mai te mau hauti au maitai, te taioraa aore ra te raveraa i te ohipa e te utuafare, mai te peu iho â râ e na ratou e aratai i te reira e e horoa i te hiˈoraa.
IA AˈO OUTOU I TA OUTOU MAU TAMARII, A APARAU E O RATOU
22. No te aha e riro ai ei mea faufaa roa ia taa maitai te mau tamarii i te mau parau e faaohipahia e to ratou metua?
22 Teie ta te hoê metua tane e faatia ra:
“Aita ta ˈu tamaiti iti i taeahia i te toru matahiti, a horoa ˈtu ai vau i te hoê aˈoraa no nia i te haavare. Ua faataa ˈtura vau ia ˈna e mea riri roa na te Atua i te mau taata haavare ma te faaohipa i te Maseli 6:16-19 e te tahi atu mau irava bibilia. Ua faaroo noa mai iho â o ˈna e mai te huru ra ïa e te taa ra ia ˈna eaha ta ˈu e parau atura ia ˈna. Tera râ, ia ˈu iho, mai te huru ra ïa e te ite atura vau e aita o ˈna e taa maitai ra eaha ta ˈu e hinaaro ra e parau. Inaha, ua ani atura vau ia ˈna: ‘Ua ite anei oe eaha te haavare?’ ‘Aita’, ta ˈna ïa i pahono mai. I muri iho, ua rave noa iho â vau e ia taa maitai o ˈna i te auraa o te mau parau ta ˈu e faaohipa e no te aha vau e aˈo ai ia ˈna.”
23. Eaha te nehenehe e rave no te aratai i te mau tamarii ia papu e no te aha tera huru haerea e riro ai ei haerea maitai?
23 A vai nainai noa ˈi te mau tamarii, e navai noa i te mau metua ia parau atu e “eiaha” no te opani atu ia ratou ia rave i te tahi mau mea, mai te tapearaa ˈtu paha i te hoê umu veavea. Teie râ, i roto atoa i teie mau faaararaa matamua, e nehenehe e faaite atu i te tumu. No reira, mea “veavea” te umu e te taata e tapea noa ˈtu i te reira ra, e “mauiui ïa oia”. Noa ˈtu e eaha râ, i te omuaraa ra iho â, ia faahaamanaˈo noa ˈtu na outou i ta outou tamarii e, taua mau opaniraa ra, ei maitai iho â ïa no ˈna. I muri iho, a faaite atu ia ˈna no te aha te tahi mau huru mai te maitai, te tâuˈaraa ˈtu i te tahi e te here e titauhia ˈi. A tauturu atu ia ˈna ia papu e, o te reira te niu no te mau faaueraa atoa e no te mau opaniraa atoa. A faaite atoa ˈtu e nafea vetahi mau ohipa ia haapapu mai i taua mau huru ra, area vetahi ra, aita ïa. Ia rave tamau outou i te reira, e riro mau â ïa outou i te manuïa i te haaputapû eiaha noa te feruriraa o te tamarii, i to ˈna atoa râ mafatu. — Mataio 7:12; Roma 13:10.
24. No te aha e riro ai ei mea faufaa roa no te hoê tamarii ia faatura i te mana?
24 Oia atoa, e tia ia faaô rii rii atu i roto i te feruriraa o te mau tamarii e, mea faufaa roa ia auraro e ia faatura i te mana. I te matahiti matamua iho â o to ˈna oraraa, e haamata te tamarii i te faaite e ua ineine anei o ˈna i te auraro i to ˈna metua aore ra aita. Ia ineine to ˈna feruriraa, a faataa maitai atu ia ˈna e e tia i te mau metua ia tia ˈtu i mua i te Atua. E nehenehe hoi te reira e ohipa rahi mai i nia i to ˈna huru. Aita anaˈe taua ite ra, e nehenehe te mau tamarii e manaˈo e e tia ia ratou ia auraro i to ratou mau metua no te mea noa ïa e mea paari aˈe ratou e mea puai aˈe ratou i taua mau tamarii ra. Mai te peu e, ei hiˈoraa, e faaite te mau metua i te tamarii e aita ratou e horoa ˈtura i to ratou iho mau manaˈo, te mau manaˈo râ o te Poiete, ta ta ˈna Parau e haapii ra, e horoa ˈtu ïa te mau aˈoraa e ta ratou aratairaa i ta ratou mau tamarii i te hoê mana o te ore roa e nehenehe e faaauhia. E nehenehe te tamarii e huti mai i te puai e au ia haamata oia i te farerei i te mau fifi i roto i to ˈna oraraa apî roa e ia farerei oia i te tahi mau faaheporaa no to ˈna ati-maite-raa ˈtu i te mau faaueraa tumu tia noa ˈtu te mau faahemaraa aore ra te mau hepoheporaa. — Salamo 119:109-111; Maseli 6:20-22.
25. Nafea te aˈoraa e faaitehia i roto i te Maseli 17:9 e nehenehe ai e tauturu i te mau metua ia aˈo maitai i ta ratou mau tamarii?
25 “O tei tapoˈi i te hapa ra, e auhia mai ïa; o tei faahiti râ i te parau ra, e taa te taua here ia ˈna.” (Maseli 17:9). E tano atoa taua faaueraa tumu nei i roto i te mau auraa i rotopu i te mau metua e te mau tamarii. Ia papu i te tamarii e ua hape o ˈna e no te aha hoi oia e aˈohia ˈi, e ia oti te aˈo i te ravehia, e tia ïa i te here ia faaitoito i te mau metua eiaha ia hoˈi noa mai i nia i te ohipa hape i ravehia. Noa ˈtu eaha te hape, a faaite maramarama ˈtu i te tamarii e e ere o ˈna ta outou e riri ra, te ino râ (Iuda 23). Te tamarii i aˈohia, e manaˈo ïa oia e ua “aufau” o ˈna i ta ˈna hape. Mai te peu râ e e faahaamanaˈo-pinepine-hia ˈtu taua hape ra, e riro ïa o ˈna i te manaˈo e te faahaehaa-noa-hia ra o ˈna ma te haapaoraa ore e e riro paha oia i te riri mai ia outou aore ra i ta ˈna mau tuaane e tuahine. Ia haapeapea te mau metua no te mea e rave tamau noa ta ratou tamarii i taua hape noa nei â, e nehenehe taua tumu parau ra e tuatapapahia i muri aˈe i roto i te hoê aparauraa e te utuafare. Eiaha na e faahiti noa ˈtu e e faahaamanaˈo atu i ta ˈna ohipa atoa i rave na mua ˈtu, ia hiˈopoa râ outou i te mau faaueraa tumu e hinaarohia ra, e oti, a faataa ˈtu e nafea râ te reira e nehenehehia ˈi e faaohipa e no te aha hoi e riro ai ei mea faufaa roa e nehenehe ai e oaoa maoro atu â.
MAU HURU AˈORAA TAA Ê
26. No te aha e ere hoê â huru to te mau tamarii i mua i te aˈo?
26 “E maitai to te aˈo i te taata haapao ra, i te papai i te maamaa e ia hanere noa ˈtu te tairiraa.” (Maseli 17:10). I te mea hoi e mea taa ê te tahi tamarii e te tahi tamarii, eita ˈtura ïa ratou e aˈohia i te hoê noa huru aˈoraa. E tia ia haapao maitai i te huru e te huru feruriraa o te tamarii tataitahi. Mai te peu e e inoino ohie noa te hoê tamarii, eita ïa e faufaa ia tairi atu ia ˈna. No te tahi ra, eita roa ˈtu ïa e faufaa te aˈo. I te tahi aˈe pae, e nehenehe te hoê tamarii e riro mai te tavini e faahitihia ra i roto i te Maseli 29:19 e “e ore ïa tavini e faaroo i te reo, tei ite i taua reo ra e aore e parau mai”. Mai te peu e mai te reira te huru ra, mea tia iho â ïa oia ia tairihia.
27. Nafea te hoê metua tane tautururaa i ta ˈna tamaiti iti ia ore e papai faahou i nia i te mau papai?
27 Teie ta te hoê metua vahine e faatia ra:
“Aitâ ta ˈu tamaiti iti i piti i te matahiti, ua papaipai aˈera oia i te tahi mau reni uteute i nia i te hoê papai, i pihai iho i te tahua. Ua faaite atura to ˈna metua tane ia ˈna i te reira e ua uiui atura ia ˈna. Ei pahonoraa, ua faaaraara aˈera te tamarii i to ˈna mata ma te ore noa ˈtu e parau. Ua na ô faahou maira te metua tane e: ‘Mai ia oe na vau, ua papaipai atoa vau i nia i te papai. Mea arearea roa?’ E inaha, ua hau roa aˈera taua tamaiti iti nei, ua ata aˈera e ua faatia aˈera ma te anaanatae maitai i te papaipairaa o ˈna i nia i te papai. Ua ite o ˈna e te taa maira to ˈna metua tane ia ˈna. Teie râ, ua faataa maira oia ia ˈna e noa ˈtu â ïa e mea arearea roa ia papaipai i nia i te mau papai, aita râ hoi tera mau papai i hamanihia no te papaipai i nia iho. Ua haamauhia aˈera hoi te hoê aparauraa maitai e ua horoa-faahou-hia ˈtura i te tahi mau haamaramaramaraa ta te tamarii e hinaaro ra no te huti mai i te tahi haapiiraa.
28. Nafea te mau metua e nehenehe ai e ape ia ore e aparau maoro e ta ratou tamarii?
28 Ia aˈohia te hoê tamarii, mea maitai ia faataa ˈtu ia ˈna e no te aha râ, ei haapiiraa ˈtu ia ˈna. Teie râ, i te rahiraa o te taime, eita e faufaa i te aparau atu. Ia amuamu ta ˈna tamarii i te rave i te tahi mau ohipa ta ˈna i horoa ˈtu na ˈna, e parau noa ˈtu te hoê metua vahine e: “Ia oti e haere ïa tâua e mataitai i te tahi aua tiare”, ta te tamarii hoi e tiai noa ra. E tupu iho â ïa te reira ia oti te ohipa i titauhia ˈtu ia ˈna. Mai te peu e, ia haere mai o ˈna e hiˈopoa eaha te ohipa i ravehia, e ite atu oia e aitâ i oti, e na ô atu ïa oia e: “Aitâ i oti? E reva ïa tâua ia oti anaˈe.” Aita o ˈna e aparau, e noaa mai râ i te mau faahopearaa.
29. Eaha te nehenehe e rave no te tauturu i te hoê tamarii ia ite i te mau faahopearaa iino o ta ˈna mau hape?
29 E nehenehe e tauturu i te mau tamarii ia haapii i te paari o te mau faaueraa tumu tia mau na roto i te faataaraa ˈtu ia ratou eaha te mau faahopearaa au ore o te hoê ohipa au ore i ravehia. Ua faarepo anei te tamarii i te tahi mea aore ra ua hue haere noa anei oia? E riro paha e te tamâ-pauroa-raa oia i te mau mea e te faanaho-pauroa-raa, i te haaputapû rahi aˈe ia ˈna. E ohipa hape anei ta ˈna i rave aore ra ua parau faufau anei o ˈna? Te ravea faahiahia roa ˈˈe no te aˈo i taua huru ino nei, e riro paha ïa e te haapiiraa ˈtu ia ˈna e nafea râ o ˈna ia tatarahapa. E feruri anaˈe na e ua tuparari o ˈna i te tahi mea no to ˈna riri. Mai te peu e mea paari oia, e nehenehe ïa e ani atu ia ˈna ia haere e imi i te moni no te mono i te taoˈa i parari. Te vai ra vetahi mau tamarii, oia hoi, ia faaerehia ratou i te tahi mau haamaitairaa no te hoê taime, e riro te reira i te haapii mai ia ratou i te tahi haapiiraa ta ratou e hinaaro. I roto i te amuiraa kerisetiano, e faaerehia te feia haerea iino i te amuimuiraa o te mau taeae ia nehenehe ratou ia haama (Tesalonia 2, 3:6, 14, 15). I te tahi taime, e nehenehe te mau faahopearaa maitai aˈe e noaa mai maoti hoi i te tairi atu i te tamarii apî, na roto i te faaereraa ˈtu ia ˈna i te tahi taime, i te amuimuiraa o te toea o te utuafare. Te mau huru mai te tiahiraa ˈtu paha ia ˈna i rapae, e ere roa ˈtu ïa na te here te reira e aratai ra. Noa ˈtu eaha te ravea e faaohipahia, e tia ia faataa ˈtu i te mau tamarii e e tia ia ratou ia faaoromai i te mau faahopearaa o to ratou haerea. Mea na reira hoi ia haapii atu ia ratou ia amo i ta ratou hopoia.
A AˈO MA TE HERE
30. No te aha e mea faufaa roa ei manaˈo aifaito to tatou ia haamau tatou i te tahi mau ture no ta tatou mau tamarii e tia ˈi?
30 “Ia au atu hoi outou i te mau mea i hau i te maitai ra” e a haamanaˈo e “te paari no nia maira, e mea anoi-ore-hia ïa”. (Philipi 1:10; Iakobo 3:17.) Ia haamanaˈo na outou e mea rahi to te mau tamarii apî puai e mea au roa na ratou ia haapii, ia hiˈopoa e ia tamata i te mau mea apî. Ia haamau outou na ratou i te tahi mau otia e te tahi mau ture, ia ohipa ïa outou ma te paari e ma te au. E tia ia outou ia ite i te aifaitoraa i rotopu i te mea e titauhia e te mea e ore e titauhia. I muri aˈe i to outou faaheporaa ˈtu i te mau otia, maoti hoi i te tamata i te hiˈopoa i ta ratou mau peu rii, ia faatia na outou i ta outou mau tamarii ia rave ma te tiamâ e ma te hau i roto i taua mau otia ra (Maseli 4:11, 12). Mai te peu e eita ra, e riro ïa outou i te ‘faariri’ ia ratou e i te ‘haaparuparu’ ia ratou, e e riro hoi outou iho i te rohirohi roa i te faariroraa outou i te tahi mau mea nainai roa ei ohipa rahi roa. — Kolosa 3:21.
31. Eaha te hiˈoraa ta te Atua ra o Iehova e horoa mai nei no te faaite mai e nafea râ ia faaohipa i te aˈo?
31 No reira, e te mau metua, ‘e aˈo atu i to tamaiti [aore ra i to tamahine] oi vai aˈe te fariuraa’, ia rave râ outou ma te here, mai te Atua ra te huru. “O tei herehia e Iehova ra, o ta ˈna ïa e aˈo mai, mai te metua e aˈo i te tamaiti ta ˈna e here ra.” Ia riro na ta outou aˈo ei aˈo aravihi mau e te here, mai te aˈo a to outou Poiete, inaha te mau “haapiiraa e faaitoito ra, o te eˈa ora ïa”! — Maseli 19:18; 3:12; 6:23.
[Uiraa haapiiraa]
