Pene 4

Te hoê tane te tia mau â ia faaturahia

1, 2. Nafea hoi tatou ia faaturahia mai e vetahi ê, e mea nafea te hiˈoraa o Iesu i te haapapuraa mai i te reira?

 EITA te faatura e faahepohia. E noaa râ te reira maoti te mau tutavaraa. Oia mau, e noaa te reira maoti ta tatou mau parau e faahiti, ta tatou mau ohipa e rave e to tatou iho huru.

² Te haapapu maitai maira o Iesu Mesia i te reira. Ua riro hoi oia ei orometua faaturahia no ta ˈna huru haapiiraa. I muri aˈe i to ˈna faahitiraa i ta ˈna Aˈoraa i nia i te mouˈa, “ua maere anaˈe ihora te taata atoa i te huru o ta ˈna parau”. No te aha hoi oia i na reirahia ˈi i te faatura? No te mea i faaohipa na oia i te Parau a te Atua, te Bibilia, eiaha râ te manaˈo taata. Te pû otahi o ta ˈna haapiiraa, o te Atua ra ïa o Iehova e ta ˈna Parau mau. No reira, mea tia mau iho â ïa ia faatura ˈtu to ˈna mau hoa e tae noa ˈtu hoi to ˈna mau enemi ia ˈna. — Mataio 7:28, 29; 15:1-9; Ioane 7:32, 45, 46.

3. Ia au i te Ephesia 5:33, eaha te hopoia a te hoê vahine i ta ˈna tane, e eaha te tia i te tane ia rave?

³ I roto i te Ephesia 5:33, teie te faaueraa tumu ta tatou e ite: “E te vahine ra ia auraro oia i tana tane.” Oia mau, teie râ e tia ia ˈna, oia hoi te tane, ia rave i te mau tutavaraa e faaturahia ˈtu ai oia, mai te peu e eita ra, mea fifi roa ïa na ta ˈna vahine ia auraro i teie nei faaueraa. Nafea hoi te hoê tane e nehenehe ai e haapao i to ˈna tiaraa, mai tei faataahia i roto i te Bibilia, ia nehenehe ta ˈna vahine ia faatura ˈtu ia ˈna?

 E AMO OIA I TO ˈNA TIARAA UPOO

4. Eaha te tiaraa ta te Bibilia e horoa ra no te tane?

⁴ Te horoa nei te Bibilia na te tane, te tiaraa upoo i roto i te faaipoiporaa. Teie hoi ta ˈna e parau ra: “E te mau vahine ra, e auraro outou i ta outou ihora mau tane, mai ta tatou i auraro i te Fatu ra. O te tane hoi to te vahine ra upoo, mai te Mesia atoa ra ei upoo ïa no te ekalesia, e o te ora hoi oia o te tino ra. E teie nei, mai te ekalesia e auraro i te Mesia nei, ia na reira atoa te mau vahine i ta ratou iho mau tane i te mau mea atoa nei.” (Ephesia 5:22-24). E faatupu mau anei teie faanahoraa no ǒ mai i te Atua ra i te oaoaraa o te utuafare? Te patoi nei hoi vetahi mau vahine i ta ratou e parau ra e te “haavîraa a te tane”, oia hoi, te manaˈo teoteo mau o vetahi mau tane no nia i to ratou tiaraa i nia i te mau vahine. Ia faahiti oioi na râ tatou i te parau e, aita roa ˈtu te mau haapiiraa a te Bibilia e turu ra i te “haavîraa a te tane”.

5. Eaha te tia i te tane ia farii no nia i te mana, e eaha hoi te mau hiˈoraa ta ˈna e apee?

⁵ Te onoono ra te Bibilia i nia i te parau ra oia hoi, e upoo to te tane, mai te vahine atoa hoi. Oia mau, teie hoi ta te aposetolo Paulo i papai i roto i ta ˈna rata matamua i to Korinetia, i te pene 11, te irava 3: “Teie râ to ˈu hinaaro, ia haapao outou, e o te Mesia te upoo o te taata atoa nei, e o to te vahine ra upoo, o te tane ïa, e o to te Mesia ra upoo, o te Atua ïa.” No reira, e haapii atura ïa te tane, tei riro hoi te Mesia ei upoo no ˈna, ia faaohipa i to ˈna mana na roto i te apeeraa i te huru o te Atua e o te Mesia e na roto atoa i te faaohiparaa i ta raua haapiiraa.

6. Eaha ta te mau tane e haapii mai no nia i te huru faaohiparaa o te Atua ra o Iehova e o Iesu Mesia i to raua mana?

⁶ Ua faaohipa o Iehova i to ˈna mana i nia i te Mesia ma te maitai, e ua faaitoito aˈera hoi te reira i te Mesia ia parau e: “E mea au na ˈu te rave i to oe hinaaro, e tau Atua.” (Salamo 40:8; Hebera 10:7). O te here atoa hoi te itehia i roto i te mana o Iesu Mesia. I te feia te riro mai ei pǐpǐ na ˈna, teie ta ˈna i parau atu: “Te marû nei hoi au e te haehaa o te aau: e e noaa hoi te ora i [ia outou].” (Mataio 11:29). E faaitoitoraa mau â tei itea e te mau  melo o ta ˈna amuiraa, ta te mau Papai e faaau ra e te hoê vahine, i raro aˈe i ta ˈna aratairaa. Maoti hoi i te faahepo ia ratou, ua faaite atu râ oia i to ˈna here ia ratou e ua tae roa i te horoa i to ˈna ora ei tusia. Na reira atoa te tane ia amo i to ˈna tiaraa upoo i nia i ta ˈna vahine: “E te mau tane ra, e aroha outou i ta outou mau vahine, mai te Mesia atoa i aroha i te ekalesia, e ua horoa ia ˈna iho ei taui. (...) E aroha atoa te mau tane i ta ratou iho mau vahine e tia ˈi mai ta ratou i aroha i to ratou iho tino ra. O tei aroha i tana iho vahine ua aroha ïa ia ˈna iho. Aore roa hoi e taata i riri i to ˈna iho tino, area e faaamu, e te faaherehere maite, mai ta te Fatu i te ekalesia nei. (...) E aroha râ te taata atoa i tana iho vahine, mai te aroha ia ˈna ihora, e te vahine ra ia auraro oia i tana tane.” (Ephesia 5:25-29, 33). Mai te peu e e horoa outou i te hiˈoraa na roto i te auraroraa i te mana o te Mesia, e riro ïa ta outou vahine i te ore roa ˈtu e fifi i te faatura mai ia outou ei upoo. E na reira hoi oia ma te oaoa.

7, 8. A faaite mai mea nafea vetahi mau tane ia ore e faaohipa maitai i to ratou tiaraa.

⁷ Te fifi, oia hoi, no to ratou huru taata tia ore e to ratou huru miimii, aita te mau tane, o te hinaaro nei hoi e ia faaturahia mai ratou ei upoo no to ratou utuafare, e faaite noa nei i te here e te aupuru-maitai-raa e tia hoi ia ratou ia faaite no ta ratou mau vahine. Mea pinepine i te faaroohia i te tahi mau vahine ia parau e, mai te huru ra ïa e aita ta ratou tane e here maira ia ratou e te haapao noa ra hoi o ˈna e ia oaoa oia iho e i te haamâharaa i to ˈna mau hinaaro. Te parau nei vetahi mau vahine e e tane haavî roa ta ratou. I te tahi taime, e nehenehe te reira e tupu mai no te mea ua hinaaro te vahine e rave i te tiaraa o ta ˈna tane e inaha, ua patoi maira ïa oia. E riro atoa paha e ua paari te tane i roto i te hoê utuafare i reira mea rahi te mau tane haavî e te faahepo. Noa ˈtu e eaha te tumu, te tane e ore e faaohipa maitai i to ˈna mana, e ore roa ˈtu ïa o ˈna e faaturahia mai e te taata.

⁸ I te tahi aˈe pae, maoti hoi i te faaite papu i to ratou tiaraa upoo, te vaiiho noa nei vetahi mau tane e na ta ratou vahine e rave i te mau opuaraa atoa. Aore râ, a  taparu noa ˈtu ai i ta ratou vahine “eiaha e faahepo mai ia ratou”, e vaiiho noa ïa ratou i te mau mea ia taere noa e inaha, o te maitai o te utuafare atura ïa te ino. Noa ˈtu e e ere ratou i te taata hupehupe aore ra ohipa ore, ia ore ratou e rave i te tutavaraa i te pae no te feruriraa e titauhia, e riro ïa ratou i te farerei i te hoê faahopearaa mai tei faataahia mai i roto i te Maseli 24:33, 34, e na ô ra e: “Ei maa taoto iti â, ei faaearaa iti â, e tipae iti noa ˈtu â te rima ei faaearaa iti; e roohia mai oe i te veve mai te ratere ra, e to oe ra ati mai te taata mauhaa ra.”

9, 10. Ia rave oia i te tahi mau opuaraa no nia i te utuafare, e tia i te tane ia tâuˈa i te manaˈo o vai?

⁹ E no reira, e faatura mai ta outou vahine ia outou, mai te peu e e faaite atu outou e e taata manaˈo papu mau â outou, te puai e te aravihi no te rave i te mau opuaraa. E ere ïa te auraa e eiaha roa ˈtu outou e ani atu i te manaˈo o te tahi atu mau melo o to outou utuafare aore ra e tâuˈa ˈtu i te manaˈo o ta outou vahine, no te mea noa ïa e mea taa ê to ˈna manaˈo i to outou. I te omuaraa o te aamu bibilia, te haapii ra tatou e ua farerei o Aberahama raua Sara i te hoê fifi faufaa mau no nia i ta raua tamaiti ia Isaaka e te tamaiti a Hagara, ta raua tavini vahine. Ua faaau maira o Sara i te hoê ravea, e ere râ hoi hoê â manaˈo to Aberahama i to ˈna. Teie râ, ua na ô maira te Atua ia ˈna e: “E faaroo oe [i to ˈna] reo.” — Genese 21:9-12.

¹⁰ Eiaha ïa e faaoti e ia farii noa iho â ïa te hoê tane i te mau hinaaro o ta ˈna vahine. E riro râ i te faufaahia ia aparau e o ˈna no nia i te mau opuaraa e tia ia ravehia no te utuafare e ia faaitoito atu ia ˈna ia faaite roa mai i to ˈna manaˈo e to ˈna mau manaˈo hohonu no nia i taua tumu parau ra. Eiaha orua ia ore i te aparau. Ia nehenehe noa outou ia aparauhia mai e a tâuˈa maite atu i te mau mea e auhia e ta outou vahine hou outou e rave ai i te hoê opuaraa. A rave faahope roa i to outou tiaraa upoo ma te ore hoi e faaite e e taata haavî outou, e faaite râ outou i te haehaa. I te mea hoi e e ere outou i te taata tia, e hape iho â ïa outou. No reira, e tiaturi mau â ïa outou e e taa mai ta outou vahine i te reira. Mai te peu noa ˈtu e e tupu  mai te reira te huru, e riro ïa te vahine e tane haehaa ta ˈna, i te ohie roa ˈˈe i te faatura mai i to ˈna tiaraa upoo i te vahine e tane teoteo ta ˈna.

E HOROA MAI O ˈNA I TE MAU MEA E HINAAROHIA E TO ˈNA UTUAFARE FETII

11, 12. a) Eaha te hopoia a te tane no nia i te horoaraa mai i te mau mea materia na to ˈna utuafare fetii? b) No te aha e nehenehehia ˈi e parau e te tahoê mau ra te vahine ia ˈna i roto i taua tuhaa ra?

¹¹ E hopoia na te tane i te horoaraa mai i te mau mea e hinaarohia e to ˈna utuafare fetii. Teie hoi ta tatou e taio i roto i te Timoteo 1, 5:8: “O te taata hoi aore i hamani maitai i to ˈna ihora, e rahi atu â i to ˈna ihora utuafare, ua faarue ïa oia i te parau, e e rahi atu ïa to ˈna ino i to te taata mau ore ra.” I roto e rave rahi fenua, ei moni iho â ïa e rave rahi e titauhia no te ora, e tei ïa outou, te tane, te opuaraa e nafea te mau hinaaro o te utuafare fetii e mâha ˈi. Mai ta outou paha e ite atu, eita e navai noa te hopoiraa mai i ta outou moni ohipa i te fare, e tia atoa râ ia outou ia aparau e ta outou vahine no te haamau i te hoê tabula haamauˈaraa. Oia hoi, e tia ia outou ia rave i te tahi mau faanahoraa i te pae no ta outou mau haamauˈaraa. No reira, e ohie roa ˈtura ïa outou i te ora ia au i te mau ravea e vai ra ia outou ra, e e ape ïa outou i te mau tatamaˈiraa e tupu mai i te tahi taime mai te peu e aita e moni faahou hou aˈe e aufau-faahou-hia mai ai.

¹² Noa ˈtu â ïa e i roto e rave rahi mau huru tupuraa, na te tane e hopoi mai i te moni e hinaarohia e te utuafare fetii, e tia ia haamanaˈohia e ua noaa mai te reira maoti te tutavaraa a te tahi e te tahi. Te tane e manaˈo ra e o ˈna anaˈe teie e imi nei i te moni no te utuafare, e tia ïa ia ˈna ia feruri maa taime iti e ia numera maitai te haamauˈaraa mai te peu e e tia ia ˈna ia aufau i te hoê taata no te haere e hoohoo haere mai, no te tunu i te maa, no te horoi i te auˈa e no te faanehenehe i te fare, no te haapao i te mau tamarii, e e rave rau atu â. I te paeau rahi, e faaore ta outou vahine i teie mau huru haamauˈaraa i te raveraa oia iho i teie ohipa e oia mau, ua riro  atura ïa te reira ei tuhaa na ˈna i roto i te utuafare. Mai te peu e hau atu i te reira, e haapao o ˈna i te hoê parau no te pae o te mau haamauˈaraa o te utuafare, e nehenehe ta outou e amui mai i te ohipa o te taata numera i roto i te tabula i nia nei. Ua riro mau â teie mau parau i papaihia i roto i te Maseli 18:22 ei parau mau: “O tei noaa ia ˈna te vahine ra e maitai â ta ˈna i noaa.”

13. Eaha te huru no nia i te mau taoˈa materia ta na taata faaipoipo e tia ia faarue roa, e eaha ïa te mau haamaitairaa e noaa mai?

¹³ E pûpû maira râ, i te tahi taime, te mau tutavaraa ta outou e rave no te haamâha i te mau hinaaro materia o ta outou utuafare fetii, i te hoê fifi tamau, no outou e no ta outou vahine, oia hoi: te faatupu-rii-marû-noa-raa i te hoê manaˈo nounou taoˈa i nia i te oraraa. Mea iti roa hoi te mau mea e tairi mai nei taua huru feruriraa nei, i te niu o te oaoaraa i te pae no te utuafare. Teie ta Paulo, te hoê o te mau taata i papai i te Bibilia, i parau: “Aita roa hoi a tatou e taoˈa i hopoi mai i teie nei ao; e ua itea-papu-hia hoi e aita roa e taoˈa e tia ia hopoi atoa ia haere ê tatou ra. E teie nei, e maa ta tatou, e te ahu, ia mauruuru tatou i te reira. Area te feia e mârô e ia rahi te taoˈa, e roohia ïa i te ati, e te marei, e te nounou maamaa e rave rahi, e ino ai te taata ra, e topa taue ai te taata i roto i te ino rahi faarue roa ra, e te pohe mure ore. O te nounou moni hoi te tumu o te mau ino atoa nei, ua taa ê roa hoi te tahi pae i te parau nei i te titau-noa-raa i te reira, e ua patiatia pupu roa ia ratou iho i te oto e rave rahi.” Noa ˈtu eaha te mau maitai ta te hoê oraraa nounou taoˈa e nehenehe e horoa mai na tatou, eita roa ˈtu te reira e nehenehe e faahoona i te oto e itehia ia paruparu mai te mau taairaa i te pae no te utuafare e ia ore roa. Mea rahi roa ˈˈe te mau mea e erehia i te pae varua e i te pae no te here ia faaauhia i te mau mea e noaa i te pae materia. — Timoteo 1, 6:7-10.

14. Na te aha e tauturu mai ia faaoti e mai te peu e e parahiraa rahi roa to te mau taoˈa materia i roto i te oraraa o te hoê taata?

¹⁴ Te nounou taoˈa, e ere ïa te roaaraa mai te tahi mau taoˈa, te hinaaro-rahi-raa râ i te mau taoˈa materia. E  nehenehe te hoê taata e riro ei taata veve e te nounou taoˈa atoa hoi, e e nehenehe atoa te hoê taata e riro ei taata moni e mea hinaaro râ na ˈna i te mau taoˈa i te pae varua. Tei te huru hoi o to tatou mafatu. Teie ta Iesu i parau: “Eiaha e haapue noa i te taoˈa na outou i teie nei ao, i te vahi e pau ai i te huhu e te pe, i te vahi e tomohia ˈi e e eiâhia ˈi e te eiâ; e haapue râ i te taoˈa na outou i nia i te raˈi, i te vahi e ore e pau ai i te huhu e te pe, e ore hoi te eiâ e tomo i reira a eiâ ai. Te vahi hoi i vaiihohia ˈi ta outou taoˈa ra, e riro atoa i reira to outou aau.” — Mataio 6:19-21.

15, 16. Hau atu â i te horoaraa i te mau mea materia e au na to ˈna fetii, eaha ˈtu â te tia i te hoê tane ia rave no te faaoaoa i to ˈna utuafare fetii?

¹⁵ E tia mau â i te hoê tane maitai ia feruri hohonu i nia i te mau aˈoraa bibilia e, a horoa noa ˈi oia i te mau mea o te oraraa e hinaarohia e to ˈna utuafare, e rave atoa oia i te taime no te horoa ˈtu na ratou i te mau mea e hinaarohia e ratou i te pae varua. Eaha te faufaa ia horoa rahi i te taime no ta outou ohipa i te pae tino e roaa mai ai te mau taoˈa materia e hinaarohia ra e to outou utuafare fetii, mai te peu e aita faahou to outou e taime e aita atoa e puai no te patu ia ˈna i te pae varua? Ia noaa i to outou utuafare fetii i te paari e au no te arai i te mau fifi o te oraraa nei, ia horoa ˈtu ïa outou i to outou taime e ia faatupu atoa outou i roto ia ratou i te hinaaro papu e auraro i te mau faaueraa tumu tia roa. E tapae outou mai te peu e e faaherehere outou i te taime no te taio e no te tuatapapa i te Parau a te Atua e no te pure e o ratou. Tei ia outou, te tane e te upoo o te utuafare, te faanahonahoraa i te reira. E riro te mau haamaitairaa e itea mai i te hoona rahi roa i te taime e te mau tutavaraa ta outou i horoa. Ma te papu maitai, e tupu mau â teie parau tǎpǔ a te Atua: “Eiaha e haamoe ia ˈna i to oe atoa ra mau haerea; e na ˈna e faaite ia oe i to oe ra mau haerea.” — Maseli 3:6.

¹⁶ E riro te tane e vaiiho e na te Poiete e aratai ia ˈna i te farii popou i teie aˈoraa au maitai i faaitehia i roto i te Koheleta 7:12 e na ô ra: “E haapuraa hoi tei te paari,  e haapuraa tei te moni, teie râ te maitai o te paari ia noaa, na te reira e horoa mai i te ora i te feia fatu ra.” Mai te peu e e ohipa puai oia no te horoa i te mau mea materia na to ˈna utuafare fetii, eita râ oia e niu i to ˈna mau tiaturiraa i nia i te “taoˈa rahi itea ore, [i nia râ] i te Atua ora”. E horoa oia i te hiˈoraa na roto i te tuuraa i te mau mea i te pae varua i nia i te parahiraa matamua, ia nehenehe oia e ta ˈna vahine ‘ia rave i te ora mure ore ra’. (Timoteo 1, 6:17-19.) Mai te peu e e rave te hoê tane i te mau tutavaraa no te faatupu i te mau hinaaro materia e i te pae varua o to ˈna utuafare fetii, e riro oia i te faaturahia e ta ˈna vahine e mǎtaˈu ra i te Atua.

E FAATURA ˈTU OIA IA ˈNA

17-19. Mea nafea te aˈoraa bibilia e parau ra e ia “faatura” oia i ta ˈna vahine e tano ai i roto i te tuhaa no te taatiraa i te pae tino?

¹⁷ Ma te parau atu i te mau tane, te titau atura te aposetolo Petero ia ratou “[ia faatura ˈtu i ta ratou mau] vahine, i te farii paruparu ra”. (Petero 1, 3:7.) I roto i taua noâ irava nei, te faataa maira o Petero e, te mau tane e parahi ra i pihai iho i ta ratou mau vahine, ia faatura ˈtu ïa ratou ia ratou “ma te ite”.

¹⁸ Ma te papu maitai, e tano atoa teie aˈoraa i te pae no te taatiraa i te pae tino. E pinepine i te itehia e, eita roa ˈtu te vahine e oaoa i te pae no te taatiraa no te mea aita ta ratou mau tane e tâuˈa ra i to ratou huru i te pae tino e i te pae no te here. “[Ia] horoa te tane i te mea tia i te vahine”, ta te Parau ïa a te Atua e aˈo maira, e ia na reira o ˈna “ma te ite, i te faaturaraa ˈtu i te vahine, i te farii paruparu ra”. (Korinetia 1, 7:3.) Ia ‘faatura mau outou’ i ta outou vahine, eita ïa outou e riro ei taata etaeta aore ra ei taata faahepo i te onoonoraa i te haamâha i to outou iho mau hinaaro noa ˈtu â ïa e ua rohirohi roa ta outou vahine aore ra i te taime o to ˈna maˈi avae (faaau e te Levitiko 20:18). Ia taati atu outou i ta outou vahine, eiaha e haapao noa ia outou, ma te haamoe hoi ia ˈna. I roto i taua tuhaa ra, mea taere aˈe te vahine i te tane e mea hinaaro mau hoi na ˈna ia herehia o ˈna. Ia parau te  Bibilia i te tane e ‘ia horoa oia i te mea tia i te vahine’, te onoono ra ïa oia i nia i te faufaaraa ia horoa maoti hoi i te rave mai.

¹⁹ E tia iho â ïa i te hoê tane ia taotia i taua huru horoaraa ra i nia i ta ˈna vahine. Parau mau, i to tatou nei tau, e rave rahi mau tane, e mau vahine ê atu ta ratou. Eaha hoi te noaa mai ia ratou ia na reira ratou? Aita ˈtu ïa, te faainoraa i te oaoaraa o to ratou iho utuafare. Maoti i te ‘faatura ˈtu’ i ta ratou mau vahine, aita ratou e horoa ˈtu nei i te mau tumu papu maitai e faaturahia ˈi ratou. Hau atu â, aita ratou e faatura ra i te faaipoiporaa iho, o te Atua hoi te Tumu. No te mauiui e faatupuhia e te faaturi, e taa maitai atura ia tatou e no te aha te Hebera 13:4 e parau ai e: “Ia haamaitaihia te faaipoipo i te taata atoa ra, e te viivii ore hoi te roi; e haava hoi te Atua i te poreneia e te faaturi ra.”

20. Ia au i te Ephesia 5:28, e tia i te tane ia faatura ˈtu i ta ˈna vahine i roto i tei hea ˈtu â mau tuhaa?

²⁰ Eita te hoê tane e faatura ˈtu i ta ˈna vahine i roto noa i te tuhaa no te taatiraa i te pae tino. Te tane e faatura-mau-hia e ta ˈna vahine, e haapapu mai ïa oia e mea tâuˈa mau â na ˈna i ta ˈna vahine, i roto i te tahi atu mau tuhaa. E ere ïa te auraa e e tuu roa oia ia ˈna i nia roa e a riro mai ai oia ei tavini no ˈna. Eita, mai ta tatou râ i taio na mua ˈtu i roto i te Ephesia 5:28, “e aroha atoa te mau tane i ta ratou iho mau vahine e tia ˈi mai ta ratou i aroha i to ratou iho tino ra. O tei aroha i tana iho vahine ua aroha ïa ia ˈna iho.” Te tane e na reira, eita roa ˈtu ïa oia e faariro i ta ˈna vahine ei hoê taata haihai aˈe ia ˈna. Ia tamaa raua, eita roa ˈtu ïa oia e manaˈo e e hinaaro to ˈna tino i te mau maa maitatai roa ˈˈe, e te tino o ta ˈna vahine ra, i te mau toetoea ïa. Eita roa ˈtu oia e na reira mai te peu e e here oia i ta ˈna vahine ‘mai to ˈna iho tino’. Eita oia e haapao noa ia ˈna, e haapao rahi râ oia i ta ˈna vahine, ei hiˈoraa, e haa oia ia nehenehe ta ˈna vahine e oomo i te mau ahu ta ˈna e au. Eita te hoê tane e tupai ia ˈna iho ia ore oia e manuïa i te rave i te hoê mea mai ta ˈna i tiaturi e e na reira oia. Oia atoa, eita te hoê tane kerisetiano e tupai i ta ˈna  vahine no te mea eita oia e rave noa i te mau mea mai ta ˈna i manaˈo e ia na reirahia. Eita, ia hamani ino mai te hoê taata i ta ˈna vahine, e faaite ïa oia i to ˈna here ia ˈna e e haere mai hoi o ˈna e tauturu ia ˈna. E here oia ia ˈna mai to ˈna iho tino.

21, 22. Eaha ta te hoê tane e nehenehe e rave ia rave faaoti roa ta ˈna vahine i ta ˈna ohipa ma te oaoa?

 ²¹ No te ‘faatura’ i ta outou vahine, eiaha noa ïa outou e ite eaha te mau tuhaa hoê â to outou mau hinaaro e to ˈna, ia taa atoa râ ia outou i te mau taa-ê-raa e vai ra i rotopu ia ˈna e o outou i te pae no te manaˈo. I te paeau rahi, mea au na te mau vahine ia rave i te ohipa i raro aˈe i te faatereraa o te hoê tane, mai te peu iho â râ e e faatereraa maitai. Ua poiete mai hoi te Atua ra o Iehova ia ratou mai te reira te huru. Ua poietehia te vahine ia riro oia ‘ei tauturu au no te tane’. (Genese 2:18.) Teie râ, mai te peu e e etaeta roa te faatereraa, e mai te peu e eita e horoahia ˈtu na ˈna te ravea no te rave i te tahi mau ohipa ia au hoi i to ˈna iho manaˈo aore ra no te faaohipa i to ˈna aravihi, e riro ïa te hoê vahine i te manaˈo e aita e hinaarohia ra ia oaoa oia e e riro atoa hoi oia i te inoino.

²² Te tahi atu â tuhaa faufaa roa te tia ia tâuˈahia, o te hinaaro tano mau ïa o te vahine i te iteraa e mea faufaa mau oia. Mea au mau hoi na te rahiraa o te mau vahine i te hoê tane e tâuˈa mai ia ratou, o te taata râ e tuu i ta ˈna vahine i te hiti no te rave i te mau opuaraa atoa, e riro paha ïa oia i te ite e e rahi aˈe to ˈna itoito i te faaino i te haamaitai. E riro outou i te faufaa rahi atu â mai te peu e e titau outou i te tauturu haapao maitai o ta outou vahine, eiaha noa na roto i te hamani-maitai-raa ˈtu ia ˈna e i te faaiteraa ˈtu ia ˈna i to outou mauruuru ia ˈna, na roto atoa râ i te faaiteraa ˈtu e mea hinaaro mau â na outou ia ˈna, e te faatura ra outou ia ˈna e hoê â hoi orua, ei hiˈoraa, na roto i te parauraa e “taua” e “ta taua”, maoti hoi i te parau e “vau” e “oe” aore ra “ta ˈu” e “ta oe”. Te faaite mau ra anei outou i ta outou vahine e mea au mau â na outou ia ˈna e te hinaaro mau ra outou ia ˈna? E ere na roto i te horoaraa ˈtu i te hoê tuhaa moni na ˈna outou e faaite atu i te reira, na roto râ i te tahi atu mau ravea.

IA HAAPOPOU NA OUTOU I TO ˈNA MAU HURU VAHINE

23. I te paeau rahi, eaha te taa-ê-raa e vai ra i rotopu i te mau manaˈo e horuhoru ai ra o te mau tane e o te mau vahine?

²³ Teie ta hoê taote e tuatapapa i te parau i te pae no  te feruriraa i papai: “Inaha, te taa nei te mau vahine i te manaˈo area te mau tane ra, te feruri nei ïa.” Ia faaauhia te feruriraa e te taaraa i te manaˈo, eita e nehenehe e parauhia e mea faahiahia aˈe te tahi i te tahi. Inaha, mea taa ê hoi taua na ohipa e piti nei. Eita tatou e au i te mau taata aita e aroha, aita atoa hoi tatou e au i te feia aita e feruri maite. E nehenehe hoi ta te mau vahine e taa i te manaˈo mai te feruri atoa, e na reira atoa hoi te tane. Teie râ, i ô te vahine, e riro te mau manaˈo horuhoru i te upootia mai area te tane ra, e faaitoito ïa oia i te haavî i to ˈna mau manaˈo hohonu no te mea ta ˈna e manaˈo ra e e mea maitai aˈe. Noa ˈtu â ïa e e itehia te tahi mau huru tupuraa taa ê, na taua huru taa ê hau atu ra, e rave ra e ia au maite te tane e te vahine te tahi e te tahi. Taa ê atu i to ˈna huru horuhoru rahi aˈe, na to ˈna anaanatae i te tahi e turai i te vahine ia paraparau rahi aˈe i te tane. Te hinaaro atoa ra râ oia i te tahi taata tauaparau no ˈna. I roto i taua tuhaa ra, mea rahi roa ïa te mau tane o te ore e na reira nei.

24. No te aha e riro ai ei mea faufaa roa ia faaroo te hoê tane i ta ˈna vahine e ia aparau atu oia ia ˈna?

²⁴ Te paraparau ra anei outou i ta outou vahine, eiaha no nia i ta outou noa ohipa, no nia atoa râ i ta ˈna ohipa? Te anaanatae atura anei outou e te faaite atura anei outou i te reira ia ˈna? Eaha ta ˈna ohipa i rave i te mahana taatoa? Eaha te huru o te mau tamarii? Ia tae atu outou i te fare, eiaha ïa e ani oioi noa ˈtu e: “Eaha ta tatou maa i teie ahiahi?” Ia paia outou, eiaha e haere noa ˈtu e taio i ta outou vea e a riri atu ai i ta outou vahine ia tamata mai oia i te aparau mai ia outou. Ia anaanatae na outou ia ˈna, i to ˈna mau manaˈo, i ta ˈna mau ohipa i rave e i to ˈna mau manaˈo hohonu. A faaitoito ia ˈna i roto i te mau mea ta ˈna e rave e a haapopou ia ˈna no nia i te mau mea ta ˈna i nehenehe e rave. Ia haapopou atu outou ia ˈna no nia i te mea ta ˈna i rave, e riro paha ïa oia i te faatupu i te tahi atu mau mea ta ˈna i ore i tâuˈa e tae roa mai i teie nei. E nehenehe te mau parau faaino e haaparuparu e e riro ei raau taero, area te mau haapopouraa e horoahia na te aau tae ra, e riro ïa ei raau  e i te faaitoito rahi mau â i te feruriraa. — Maseli 12:18; 16:24.

25, 26. a) Eaha te auraa no te hoê vahine ia horoa ˈtu ta ˈna tane i te tahi taoˈa na ˈna? b) Eaha te huru ô faufaa roa ˈˈe no ˈna?

²⁵ Te horoa ˈtura anei outou i te tahi taime i te tahi taoˈa horoa na ˈna? Aita e faufaa ia riro ei taoˈa moni rahi roa; te tahi noa maa mea iti e riro ei tapao faaite e: “Ua manaˈonaˈo mai vau ia oe.” Te na reira ra anei outou no te mea te hinaaro mau ra outou e na reira e eiaha noa i te tahi mau oroa? Mea au mau hoi te mau taoˈa horoa manaˈo-ore-hia. Eita anei outou e oaoa ia faaineine mai ta outou vahine ma te ore hoi outou e tiai mai, i te tahi maa e au-maitai-hia e outou? Na reira atoa ˈtu ia ˈna. A faaoaoa ˈtu ia ˈna. Mea faufaa aˈe hoi te mau taoˈa iti tei horoahia ma te here i te mau taoˈa moni rarahi e horoahia ma te faahepohia aore ra ma te ore e tae te aau. “O te taata horoa noa hoi [ma te oaoa] ta te Atua e hinaaro.” (Korinetia 2, 9:7). Te mau vahine atoa. Noa ˈtu â ïa e e mau maa ohie roa tei faaineinehia, ia haamanaˈo na outou e “maitai ia amu ra i te [mau maa hotu] anaˈe ra ma te aroha, i te puaatoro poria ma te riri”. — Maseli 15:17.

²⁶ Teie râ, te ô nehenehe roa ta outou e nehenehe e horoa ˈtu na ta outou vahine, o outou iho ïa, oia hoi, te horoaraa ˈtu i to outou taime e to outou puai, i te tâuˈaraa ˈtu ia ˈna e i te faaiteraa ˈtu ia ˈna i to outou mau manaˈo, to outou iho â râ mau manaˈo faufaa roa ˈˈe. Mea fifi roa hoi na vetahi mau tane ia na reira. Mai te huru ra ïa e, ia faaite atu ratou i te hoê tapao no te here, e manaˈo maamaa roa ïa te reira e te paruparu hoi. Teie râ, mai te peu e mea here na outou ta outou vahine, ia manaˈo na outou e mea faufaa roa na ˈna te hiˈo-noa-raa ˈtu outou ia ˈna, te tahi ohipa ta outou e rave aore ra te tahi parau ta outou e faahiti. Ia faaere outou ia ˈna i te reira, e riro ïa oia i te inoino, i te rohirohi e i te ore hoi e oaoa. Ia pee na outou i te hiˈoraa ta te buka bibilia o te Sire a Solomona e horoa mai nei na tatou. Hau atu â, te taata e tâuˈa ˈtu i te tahi e e here atu i te tahi, e riro ïa oia iho i te huti mai i te mau haamaitairaa. Ma te papu maitai, mea au iho â na tatou te mau taata hamani maitai. Inaha,  eaha hoi te hoê taata hamani maitai? E ere anei ïa o te taata e faaite mai i to ˈna mau manaˈo hohonu e to ˈna anaanatae i te feia e herehia ra e a ˈna? Mea pee roa hoi teie huru hamani maitai, e te taata e horoa ˈtu i te reira, e riro ïa oia i te hamani-maitai-hia mai. — Sire a Solomona 1:2, 15; Luka 6:38.

27, 28. a) Eaha te mau uiraa ta te mau tane e nehenehe e ui no te faaoti e te faaohipa maitai ra anei ratou i to ratou tiaraa? b) No te aha hoi e mea maitai ia tapitapi no nia i taua mau mea ra?

²⁷ E te mau tane, ia uiui na outou i teie mau uiraa: Mea ohie anei na ta ˈu vahine ia faatura mai ia ˈu? Mea here anei na ˈu ia ˈna mai ia ˈu iho, aore ra, te haapao noa ra anei au e ia oaoa na mua vau e i te haamâha i to ˈu mau hinaaro? Nafea hoi ta ˈu huru tâuˈaraa ˈtu i to ˈna mau hinaaro? Hou aˈe e rave ai i te hoê opuaaraa no nia i te utuafare, e ani atu anei au ia ˈna i to ˈna manaˈo e e tâuˈa anei au i to ˈna mau hinaaro? E rave anei au i ta ˈu mau opuaraa ma te manaˈo i to ˈna oaoaraa? Te faatura ra anei au ia ˈna mai te hoê farii paruparu aˈe? Te aparau atura anei vau ia ˈna e te faaite atura anei vau i to ˈu mau manaˈo hohonu?

²⁸ Eita hoi ta outou e nehenehe e na reira ma te maitai roa. Mai te peu râ e, ma te haehaa, e rave outou i te mau tutavaraa tamau i roto i taua tuhaa ra, e nehenehe ïa outou e papu e e tauturu rahi mai te reira ia outou ia riro ei tane o te faatura-hohonu-hia e ta ˈna vahine e o te fariihia mai e te Atua.

[Uiraa haapiiraa]

[Hohoˈa i te api 49]

Mau mea rii faufaa roa hoi.