Pene 7

Te mau tamarii — e hopoia e e haamauruuru atoa

1-4. a) Eaha vetahi mau huru maere mau o te tupuraa te hoê aiû i roto i te opu o to ˈna metua vahine? b) Nafea te iteraa outou i taua mau mea nei ia tauturu ia outou ia farii maitai i te Salamo 127:3?

 E RIRO hoi te fanauraa i te tamarii i te faatupu i te oaoa e i te haaferuri. Noa ˈtu â ïa e e ohipa matauhia i roto i te ao nei, e faahopearaa te fanauraa no te hoê ohipa faahiahia mau. Ia ite tatou e nafea te reira ia tupu, e papu maitai atu â ïa ia tatou e no te aha râ te papai salamo i faauruahia, i parau ai e: “Inaha hoi te tamarii ra, e tufaa ïa no ǒ ia Iehova ra; e ta te opu i fanau ra, e utua [haamauruururaa aore ra faufaa] ïa.” (Salamo 127:3). E hiˈopoa anaˈe na eaha te ohipa e tupu.

² E ati atu te hoê huero otane no roto mai i te tane i te huero ovahine no roto mai i te vahine a riro atu ai ei hoê aˈe puea. E amaha te reira i roto e piti tuhaa o te riro atu i muri iho ei maha, ei vau e na reira noa, e inaha a riro roa ˈtu ai te hoê anaˈe ra puea i te omuaraa ra ei tino taata paari e te tahi tau 60 000 000 000 000 mau puea rii (cellules). I te omuaraa ra, hoê â huru taua mau puea apî ra, e ua haamata aˈera hoi i te taa ê ei mau puea ivi, ei mau iˈo paari aore ra uaua, ei mau puea upaa, ei mata, ei iri, e rave rau atu â.

³ Ua nehenehe te tahi mau vahi moe no nia i te fanauraa e te taa-ê-raa te mau puea rii (cellules), i maramaramahia, e rave rahi râ aitâ e taahia ra i te auraa.  No reira, na te aha hoi e rave e ia amaha te mau puea rii? I muri aˈe, e haamata te mau puea rii (cellules) i te taa ê te tahi e te tahi. Na te aha hoi e faatupu ra i taua ohipa nei? Na te aha e faatupu i te mau pǔpǔ puea rii (cellules) e rave rahi te vai ra to ratou iho huru, to ratou aano e ta ratou mau ohipa taa ê mau no te riro atu ei upaa, ei ihu aore ra ei manimani avae? E tupu taua mau tauiraa nei ia au i te hoê kalena i haamau-ê-na-hia. Teie râ, na te aha i haamau i te reira? Hau atu â, e tino ěê hoi te aiû i roto i te opu o te metua vahine, te vai ra ta ˈna iho tabura. Inaha, eita te tino taata e farii i te mau mea ěê, mai te puoiraa mai i te iri ěê aore ra te monoraa i te tahi mau haapueraa puea rii (cellules) mai te mafatu. No te aha te tino o te metua vahine e farii ai i taua huero aiû oti ore ra tei taa ê hoi to ˈna tabura e e faaamu ai ia ˈna i te tahi tau 280 mahana?

⁴ E tupu taua ohipa maere mau ra i te tau i haapaohia no te mea ua tuu atu te Atua ra o Iehova i te reira i roto i te puea (cellule) rii otahi i faatupuhia i te omuaraa ra e te hoê huero otane e te hoê huero ovahine. O ta te papai salamo ïa e haapapu maira ia parau oia e: “Ua ite to mata ia ˈu i to ˈu vai-oti-ore-raa ra; e ua oti to ˈu mau melo atoa ra i te papaihia i roto i te buka na oe.” — Salamo 139:16.

TUPURAA E FANAURAA

5-8. A faaite mai na i te tahi mau parau no nia i te tupuraa te aiû i roto i te opu mai te maha o te hebedoma e tae atu i te mahana fanauraa o te aiû.

⁵ E tupu oioi noa hoi te aiû oti ore ra. E maha hebedoma i muri aˈe, e roro to ˈna, e mafatu o te pâmû i te toto e e hopoi atu ai i roto i te mau uaua rarahi. E ono hebedoma te maoro, e hamanihia te toto i roto i te puohu vitellin e tae roa ˈtu i te taime te upaa e mono mai ai ia ˈna i roto i taua ohipa ra e faaotihia i muri iho e te mea i roto i te ivi. I te pae o te hebedoma, e haamata mai te rima e te avae i te tupu, e, e toru hebedoma i muri iho, e faura mai te manimani rima e te manimani avae. Ia hope te hitu hebedoma, ua oti ïa te mau iˈo amui matamua, te mata, te tariˈa, te ihu e te vaha.

 ⁶ Te na ô râ te papai salamo i faahitihia na mua ˈtu e: “To ˈu nei huru, aore ïa i moe ia oe, a hamanihia ˈi au i te vahi moe ra.” (Salamo 139:15). I te iva o te hebedoma, e riro mai te mau mea e parauhia cartilages ei ivi a tupu mǎrû noa ˈi te mau ivi atoa o te tino, e eita ˈtura hoi te aiû e taui ra e parauhia aiû oti ore ra e parauhia râ ei aiû tei oti roa. “Na oe i hamani i to roto ia ˈu ra.” (Salamo 139:13). E tupu taua ohipa ra i hamanihia e te Atua i te maha o te avae, e e haamata hoi te mau mâpe i te titiˈa i te toto.

⁷ I taua taime ra, e hautiuti te aiû e tupu ra, e hurihuri, e e ofati te manimani rima e te mau manimani avae ia û mai te tahi mea i nia i to ˈna apu rima aore ra i to ˈna avae. E nehenehe ta ˈna e uumi i te tahi mea i roto i to ˈna mau manimani rima e to ˈna manimani rima rarahi, ta ˈna hoi e haamata i te oteote, ma te faaohipa i te mau iˈo amui ta ˈna e hinaaro ra, no te ote i te tîtî o to ˈna metua vahine. E taa hoi i te metua vahine e ua tuˈihia o ˈna. Ia hope te ono avae, e rave rahi atura ïa mau melo tei oti. Ua hamama te apoo ihu, e tupu te huruhuru mata, fatata roa te mata i te araara e te tariˈa i te faaroo, e inaha e nehenehe atura ïa te hoê maniania rahi e faahitimaue i te aiû i roto i te opu.

⁸ E maha ahuru hebedoma i muri aˈe te ohipa e haamata ˈi. E hamama te vairaa tamarii e te faaineine ra te aiû i te haere mai i te ao nei. Ia turaihia mai oia i rapae, e riro i te tahi taime te upoo o te aiû i te oru mai, i te mea râ hoi e aita te mau ivi o te apu upoo i ati amui maitai, e rave ïa oia i to ˈna huru mau i muri aˈe i te fanauraa. E tae roa mai i teie nei, ua horoa te metua vahine i te mau mea atoa e hinaarohia ra e te aiû. Ua horoa mai oia i te mataˈi ora maitai, te maa, te aupuru e te mahanahana ta ˈna e hinaaro ra, e ua rave atoa hoi oia e ia nehenehe to ˈna mau ino ia haere i rapae. E teie nei, e tia hoi i te aiû ia ora oioi o ˈna anaˈe iho, mai te peu eita ra e nehenehe ïa oia e pohe.

9. Eaha te mau tauiraa e tupu oioi noa mai ia nehenehe te hoê aiû ia ora i rapaeau i te opu o to ˈna metua vahine?

 ⁹ E tia hoi i te aiû fanau-apî-hia ia haamata i te hutihuti i te aho ia nehenehe to ˈna mau mahaha ia horoa mai i te mataˈi ora no to ˈna toto. No te reira ra, e tupu ïa te hoê tauiraa taa ê mau i taua iho taime ra: e rave te toto o te tamarii i te hoê tereraa apî. Tei roto noâ te aiû i te opu o to ˈna metua vahine, e rave te mea i ropu, te vai ra to ˈna te hoê apoo, e faataa ê i te tuhaa atau i te tuhaa aui o te mafatu, ia ore te toto e rave rahi ia tere atu i roto i te mau mahaha. Area te toto e na reira atu, e tere atu ïa na roto i te hoê uaua rarahi, e inaha, fatata ahuru anaˈe i nia i te hanere o te toto o te aiû i roto i te opu, ta te mau mahaha e farii. I muri noa ˈˈe i te fanauraa, e tia hoi i te toto o te aiû fanau-apî-hia ia haere atu i teie nei i roto i te mau mahaha. No reira, i roto i te mau tetoni i muri aˈe, e hamama ˈtura ïa te uaua rarahi i haafariu ê na i te toto i te mau mahaha, e inaha matara ˈtu ai te tereraa o te toto e haere tia ˈtu i te mau mahaha ra. I taua atoa taime ra, e piri te apoo o te mea e faataa ê ra i te tuhaa atau e te tuhaa aui o te mafatu, e pauroa te toto e pâmûhia e te tuhaa atau o te mafatu, e faahaerehia ˈtu ïa i teie nei i roto i te mau mahaha, ia nehenehe te mataˈi ia ô mai i roto. E hutihuti te aiû i te aho, e ua oti te toto i te haapuaiaihia. Ua tupu te mau tauiraa faahiahia mau, e te ora ra te aiû. Ua faataa-poto-hia mai hoi taua ohipa faahiahia mau ra e taua nei â papai salamo ra i parau mai e: “Na oe i tapoˈi ia ˈu i roto i te opu o tau metua vahine ra. E haamaitai au ia oe, ua taa ê hoi to ˈu hamaniraahia.” — Salamo 139:13, 14.

10. Ia hiˈohia i te huru faahiahia mau no nia i te tupuraa te aiû i roto i te opu o to ˈna metua vahine, eaha ïa to te mau metua manaˈo i ta ratou mau tamarii?

¹⁰ Auê ïa te hoê tane e ta ˈna vahine i te mauruuru i taua ô a Iehova e, oia hoi i te neheneheraa raua e fanau i te hoê taata apî, te hoê tamarii o te riro ei tuhaa no raua iho, noa ˈtu to ˈna huru taa ê mau! E “tufaa [mau â teie] no ǒ ia Iehova ra”.

 A AUPURU I TAUA “TUFAA” RA

11. Eaha te mau uiraa ta te feia e manaˈo ra e fanau i te hoê tamarii e tia ia ui, e no te aha?

¹¹ E ere no te hoê tumu parau i te pae morare noa o Iehova i faaoti ai e o te mau hoa faaipoipo anaˈe te nehenehe e taati i te pae tino. Te manaˈo atoa ra oia i te mau tamarii e fanauhia mai, inaha, e hinaaro hoi ratou i te hoê metua tane e te hoê metua vahine e here te tahi e te tahi e e here mai i to raua huaai. E hinaaro atoa ratou i te mahanahana e te hau o te hoê utuafare i reira to ratou mau metua e farii mai ai ia ratou ma te oaoa e e horoa mai ai i te mea e au no ratou a paari noa ˈi ratou. E tia i te hoê tane e te hoê vahine e manaˈo e fanau i te hoê tamarii, ia uiui i teie nei mau uiraa: Te hinaaro mau ra anei mâua ia ˈna? E nehenehe anei ta mâua e horoa i te mau mea atoa e hinaarohia ra e ana, eiaha noa i te pae tino, i te pae no te here e i te pae varua atoa râ? E nehenehe anei ta mâua e rave maitai ia ˈna e a horoa ˈtu ai i te hiˈoraa maitai? Ua ineine anei mâua i te amo i te mau hopoia e itea mai ia fanauhia mai te hoê tamarii e i te farii mau i te mau hopoia atoa ta te reira e titau ra? A vai tamarii rii noa ˈi tatou, peneiaˈe paha ua manaˈo tatou e ua haavî noa to tatou mau metua ia tatou, ia riro mai râ tatou iho ei metua, e ite ïa tatou e e ere roa ˈtu i te mea ohie ia rave i te tamarii. E hopoia faufaa mau hoi te reira, o te faatupu atoa mai râ i te mau oaoaraa e rave rahi.

12-14. No te aha te hoê vahine hapû e turu ai i te tupu-maitai-raa o ta ˈna tamarii a) ia haapao o ˈna i ta ˈna maa e amu? b) ia ore oia ia inu i te ava, ia puhipuhi i te avaava e ia rave i te raau taero? c) ia haavî oia i to ˈna mau manaˈo e horuhoru ai ra?

¹² E teie nei ua hapû outou, no te mea ua hinaaro mau outou iho e ta outou tane, aore ra ma te opua-ore-hia i muri aˈe i te tahi mau huru tupuraa a te natura. E tia hoi ia outou ia haamata i te aupuru i “te tufaa [faufaa] a Iehova”. E haapao maitai ïa outou, e amu outou i te tahi mau maa e eita e amu i te tahi aore ra eita outou e amu rahi i te maa. Mea faufaa roa te mau maa mea rahi te  fer * i roto, no te mea, i roto i te vairaa tamarii, e haapue te aiû i te fer no na avae matamua e ono i muri aˈe i to ˈna fanauraahia. E tia atoa ia outou ia inu rahi i te û (aore ra ia amu i te pata paari) no te horoa na ta outou aiû i te calcium e au no to ˈna mau ivi. E riro atoa te faaau-noa-raa i te amu i te mau maa mea rahi te hydrates de carbone * i roto, i te tauturu ia outou ia ore ia poria roa. E riro paha outou i te tamaa no e piti taata, tera râ mea nainai roa te hoê.

¹³ E tia atoa paha ia outou ia haapao maitai i te tahi atu mau mea, tei taa ê i tei matauhia e outou. No reira, i te mea hoi e e ô atu te ava ta te metua vahine e inu i roto i te aiû, e tia ˈtura ïa ia ˈna ia inu ma te au, no te mea e nehenehe te inu-hua-raa i te mau ava taero e faahuru ê i te mau melo o ta ˈna aiû aore ra e faataere mai i ta ˈna aiû i te pae feruriraa. Ia puhipuhi oia i te avaava, e faaô mai te metua vahine i te nicotine i roto i te toto o te aiû, ma te mono atura hoi i te mataˈi ora o to ˈna toto ei mataˈi ino. No reira, hou aˈe oia e fanauhia mai ai, e nehenehe te hoê aiû e ere-roa-hia i te ihiora maitai. Mea pinepine aˈe i te itehia i te mau tamarii i marua e te mau tamarii pohe i to ratou iho â fanauraahia, i roto i te mau vahine e puhipuhi ra i te avaava. E nehenehe te metua vahine e rave i te mau raau taero, e fanau mai i te hoê tamarii tei taero i te raau. E nehenehe atoa te tahi mau raau e riro ei mau raau atâata roa e e faaino i te tamarii. Te manaˈo atoa ra hoi vetahi pae e te inu-rahi-raa i te taofe, e riro ïa i te faatupu mai i te mau faahopearaa ino mau.

¹⁴ Hau atu, e nehenehe te hoê manaˈo horuhoru rahi e faaoioi i te tupuraa o te mau oromona i roto i te metua vahine e e riro hoi te reira i te faairia i te aiû i roto i te opu. Parau mau, e paruruhia te aiû e tupu ra i roto i te opu o to ˈna metua vahine, eiaha râ ïa e manaˈo e ua tâpû-ê-roa-hia oia i te ao e haaati ra ia ˈna. E ohipa mai  taua ao ra na roto i te arai o to ˈna metua vahine, i nia ia ˈna. I te mea hoi e o ˈna anaˈe te mea e taati ra ia ˈna e te ao i rapae, na ˈna iho â e opua e e faaohiparaa maitai anei aore ra e faaohiparaa ino. Tei te huru hoi o ta ˈna atuaturaa ia ˈna iho e tei to ˈna mau huru i mua i te mau ohipa e tupu nei i roto i te oraraa. Aita iho â ïa e faufaa ia parau e, mea hinaaro na ˈna i te tauturu a te feia e haaati ra ia ˈna, e oia hoi te here rahi o ta ˈna tane. — A faaau e te Samuela 1, 4:19.

TE MAU OPUARAA TE TIA IA RAVEHIA

15, 16. Eaha te mau opuaraa te tia paha ia ravehia no nia i te vahi e fanau ai e te ravea e faaohipahia?

¹⁵ E fanauhia anei ta outou tamarii i te fare maˈi aore ra i te fare? I te tahi taime, eita hoi e nehenehe e maiti. Oia mau, i roto e rave rahi mau vahi, aita paha e fare maˈi fatata roa. I te tahi atu râ mau vahi, e ohipa taa ê roa ïa ia fanau i te fare, ia hiˈohia te mau faahopearaa e nehenehe e itehia mai te peu e aita e taata aravihi i pihai iho ia tatou, mai te mau vahine faafanau tama. I te mau vahi atoa e nehenehe te reira e ravehia, mea maitai aˈe ia hiˈopoa-tamau-hia te vahine hapû e te taote, ia papu ia ˈna e e fanau maitai anei o ˈna aore ra e eita.

¹⁶ E fanau anei outou ma te faataotohia aore ra eita? Na outou e ta outou ïa tane e opua i muri aˈe i to orua aparauraa. Mai te peu e eita outou e faataotohia, e nehenehe te tane e faaea mai i pihai iho ia outou ia fanau outou e e tuu-oioi-hia mai te aiû i pihai iho i to ˈna metua vahine. Te manaˈo nei vetahi e e mau ravea faahiahia mau â te reira, ia haapapu mai iho â râ te mau hiˈopoaraa a te taote e eita te fanauraa e fifi. Te parau nei te tahi mau taata maimi e, mea iti aˈe te mau fifi e farereihia e te mau aiû i te pae no te here, i te pae tino e i te pae feruriraa, ia fanauhia mai ratou i roto i te mau huru tupuraa hau mau, ma te ore te vahine e faataotohia.

17-19. Ia au i te tahi mau tuatapaparaa, no te aha e mea maitai mau â ia tuu oioi atu i te tamarii i pihai iho i to ˈna metua vahine i muri noa ˈˈe i to ˈna fanauraa?

¹⁷ Teie ta te vea ra Psychology Today no titema 1977 e parau ra:

 “Ua papu i te mau taote e tuatapapa i te parau no te feruriraa a hia ˈtura ahuru matahiti i teie nei e e nehenehe te matahiti matamua o te oraraa o te hoê aiû e ohipa maoro i nia i to ˈna tupuraa a muri aˈe, i te pae feruriraa e i te pae tino. Te itehia ra râ i teie nei e mea faufaa roa te mahana matamua o te aiû (peneiaˈe to ˈna hora matamua). Mea faufaa roa hoi te here ta te metua vahine e faatupu e te tamarii e te huru aupururaa ta ˈna e haamata i te horoa ˈtu i muri aˈe i te fanauraa. Te faaite atoa maira te tahi mau tuatapaparaa i ravehia aita i maoro aˈenei e mea faufaa roa taua mau hora matamua ra i roto i te huru ta te metua vahine e faaite atu i nia i te tamarii e i roto i te puai no to ˈna ati-maite-raa ˈtu ia ˈna e tae noa ˈtu i to ˈna huru metua vahine.”

¹⁸ Mai te peu e aita te metua vahine i faataotohia i te taime oia e fanau ai, e ara noa ïa te aiû, e faaaraara hoi oia i to ˈna mata, e hiˈo haere na te hiti ia ˈna, e tae noa ˈtu i te mau mea e hautiuti ra na pihai iho ia ˈna, e faaroo oia i te mau reo taata e mea tâuˈa aˈe hoi na ˈna i te reo vahine. E nehenehe atura ïa te metua vahine e te tamarii e ite oioi te tahi e te tahi. Mai te huru ra ïa e mea faufaa roa te reira, no te mea i roto i te tahi mau tuatapaparaa i ravehia, ua parau vetahi mau metua vahine e i te taime iho ta ratou mau aiû e hiˈo mai ai ia ratou, ua fatata roa ˈtu â ratou ia ˈna. Te manaˈo-atoa-hia ra e ia tuuhia te aiû i nia i te opu o te metua vahine i muri noa ˈˈe i te fanauraa, mea maitai roa te reira no raua.

¹⁹ Te parau nei te tahi mau taata maimi e e haamata vetahi mau fifi o te tamarii te tia hoi ia rapaauhia, i te mau hora matamua o to ˈna oraraa. A faaauhia ˈi te mau tamarii i fanauhia i roto i te mau fare maˈi, i reira e tapeahia ˈi te mau aiû fanau-apî-hia ma te faaatea-ê-hia hoi i te metua vahine, i te tahi mau tamarii tei tuu-oioi-hia i pihai iho i to ratou metua vahine, ua itehia e e hoê avae i muri iho, mea maitai aˈe taua mau aiû nei. Te parau ra te vea ra Psychology Today e: “Te vahi maere roa ˈtu â, ia taeahia ratou i te paeraa o to ratou matahiti, mea hau aˈe to ˈna maramarama e e mau faahopearaa maitai aˈe te noaa mai ia ratou ia ravehia te tahi mau hiˈopoaraa no nia i to ratou aravihi i te pae no te parau ia faaauhia ratou i te mau tamarii e ravehia nei mai tei matauhia i roto i te mau fare maˈi.”

20. Eaha te tia ia tapea mai i roto i te feruriraa no te rave i te hoê opuaraa maitai?

 ²⁰ Teie râ, na mua ˈˈe tatou e rave ai i ta tatou opuaraa, mea faufaa roa ia haapao maitai tatou i te mau tuhaa taa ê e ô mai. Eiaha ia moehia ia tatou e ua vaiiho mai to tatou na metua matamua no tatou i te huru taata tia ore. E riro iho â ïa te “fanauraa ma te ore e faataotohia” i te faatupu mai i te mau fifi no roto mai i te tupuna (Genese 3:16; 35:16-19; 38:27-29). Ia rave na ïa outou i ta outou opuaraa ma te haapao maitai i to outou iho huru e ia au i ta outou e manaˈo ra e e mea maitai aˈe no outou, noa ˈtu e e tano te reira aore ra eita, i te fanauraa “maitai roa ˈˈe e aita ˈtu” ta vetahi pae e faatiatia ra.

21, 22. Eaha vetahi o te mau haamaitairaa o te û mama?

²¹ E faaote anei outou na ta outou aiû i to outou û? E rave rahi mau haamaitairaa ta taua ravea nei e faatupu i nia ia outou e ta outou aiû. Oia mau, e maa au roa ˈˈe hoi te û mama no te aiû fanau-apî-hia. Mea ohie roa hoi ia faatopa e e mau mea to roto o te nehenehe e paruru mai ia ˈna i te haape, i te fifi i te pae no te mau aau e i te pae no te mahaha. I te mau mahana matamua i muri aˈe i te fanauraa, e hamani te û mama i te colostrum (te û matamua o te vahine fanau), te hoê û marearea, maitai roa hoi no te aiû fanau-apî-hia no te mea 1) mea iti roa te mau mea meˈi to roto e te hydrates de carbone, e ohie aˈe hoi ia topa, 2) mea faahiahia aˈe ta ˈna ohipa paruru i te û ta te metua vahine e horoa mai te tahi tau mahana i muri aˈe e 3) e nehenehe oia e tahee, o te faaohie hoi i te faarueraa i te mau puea rii, te mau ino matamua o te aiû e te pape i faatupuhia e te upaa i te taime te maa e topa ˈi, tei haaputu noa i roto i te mau aau o te aiû na mua ˈˈe i to ˈna fanauraa.

²² E mau haamaitairaa atoa te noaa mai i te mau metua vahine e horoa i to ratou û na ta ratou aiû. E faaiti mai te û mama i te tapahi no te mea ia ote te aiû i te tîtî, e api mai ïa te vairaa tamarii. E e horoa noa atoa mai te oteraa te aiû i te tîtî, i te û, e inaha ua ite te tahi mau metua vahine e mǎtaˈu ra, e aita to ratou û e navai maitai ra, e mea navai maitai. E nehenehe atoa te horoaraa i te  û mama i te tahi taime, e faataere i te mau huero ovahine i roto i ta ratou ohipa, e faataere i te maˈi avae e e rave e ia ore ia hapû. Hau atu, te parau ra te Totaiete marite e aro ra i te mariri aitaata e “mea iti aˈe te mariri i nia i te tîtî o te vahine e faaote i to ratou û”. E, eita te û mama e hoohia.

TE TUPURAA O TE AIÛ — NAFEA OUTOU IA ARATAI I TE OHE?

23. Eaha te mau faaueraa tumu no nia i te haapiiraa i te mau tamarii tei ore e haapapuhia i roto i te Salamo 127:4, 5?

²³ “Mai te ohe i te rima o te feia puai ra, oia atoa te tamarii a te taata itoito ra. E ao to te taata i î to ˈna piha ohe ia ratou!” (Salamo 127:4, 5). Tei te aravihi o te taata teˈa te faufaa o te hoê ohe. Ia haapao maitai oia e ia aravihi atoa hoi oia no te teˈa ˈtu i te tapao ta ˈna e titau ra e tia ˈi. Mea faufaa roa atoa, ia au i to outou tiaraa metua, ia feruri outou ma te paari, a pure noa ˈi i te Atua, i te mau mea ta outou e haamata i te horoa na ta outou tamarii. Inaha, e riro mai anei oia a muri aˈe ei taata paari ma te huru aifaito, paari e te faaturahia, o te faahanahana i to ˈna Atua?

24. a) Eaha te huru oraraa fetii ta te mau metua e tia ia faaitoito i te faatupu no ta ratou mau tamarii? b) No te aha hoi e mea faufaa roa?

²⁴ Na mua ˈˈe hoi i te fanauraa o te tamarii e tia ˈi ia rave i te tahi mau opuaraa no nia i te huru aupururaa e te haapiiraa e horoa ˈtu na ˈna. No te aiû fanau-apî-hia ra, o to ˈna mau metua ïa to ˈna oraraa taatoa. Eaha hoi taua oraraa ra? E faaite anei oia e ua haafaufaa te mau metua i te aˈoraa o te Parau a te Atua i muri nei: “Ia haapae-roa-hia te mamahu ore, e te iria, e te riri, e te avau e te faaino, e te tairoiro, eiaha roa atoa ïa. Ia hamani maitai outou ia outou iho, ma te aau mǎrû aroha noa, ma te faaore hoi i te hara te tahi e te tahi, mai ta te Atua i faaore mai i ta outou i te Mesia ra.” (Ephesia 4:31, 32). Noa ˈtu eaha te mea e farereihia, e itehia iho â te huru o te fetii i nia i te tamarii. Ia rave na outou e ia paari oia i roto i te hoê ao hau mau e te papu, i roto i te hoê oraraa mahanahana mau e te here. E ohipa mau â hoi taua mau  huru tupuraa maitai atoa ra i nia i te tamarii here-roa-hia e i nia i to ˈna huru maitai. E farii oia i to outou mau manaˈo hohonu e e pee oia i to outou hiˈoraa. Ua tauturu te mau huru no roto mai i te mau tupuna i haapaohia e to tatou Poiete, i te tamarii, ia tupu ma te faahiahia mau i roto i te opu o to ˈna metua vahine, teie râ nafea hoi outou ia rave ia ˈna ia pu mai oia i roto i teie nei ao? Tei te oraraa fetii ïa o ta outou e faatupu, inaha na ˈna e faaite mai e, mai te tabura iho o te tamarii, eaha to ˈna huru ia paari mai oia. “E haapii i te tamaiti i tana eˈa ia haere ra; e ia paari oia ra, e ore e faarue i taua eˈa ra.” — Maseli 22:6.

25, 26. No te aha hoi e mea tano mau â ia horoa rahi te mau metua i to ratou taime e ta ratou mau aupururaa na ta ratou mau tamarii?

²⁵ Eita ta te tane e ta te vahine e nehenehe e faatupu i te aihere, e nehenehe râ hoi ta raua e fanau mai i te hoê taata apî, te hoê taata faahiahia mau e te taa ê hoi i te mau taata atoa i nia i te fenua nei. No te faahiahia taua ohipa ra e riro ai ei mea maere mau ia ore te rahiraa o te taata e haapopou i teie mahana i te huru faufaa mau o te hopoia e itea mai. E tanu ratou i te tiare, e pîpî atu, e tuu i te raau faatupu, e hutihuti i te aihere, e te reira ia nehenehe maitai te aua. Eita anei e tia ia tatou ia horoa rahi atu i te taime e ia rave hau atu â i te mau tutavaraa no te faatupu mai i te mau tamarii nehenehe roa?

²⁶ Mai te peu e e tiamâraa to na taata faaipoipo no te fanau i te tamarii, e tiamâraa atoa ïa to te mau tamarii ia roaa to ratou mau metua eiaha noa i te iˈoa, o te rave faahope roa râ i ta ratou mau hopoia. E riro paha te hoê kerisetiano tei pûpû ia ˈna no te Atua i te horoa rahi i to ˈna taime e to ˈna puai no te haapii i te tahi atu mau taata i te Bibilia, ma te tiaturi e e riro mai ratou ei pǐpǐ, e eita râ hoi e tapae noa. Eita anei ïa e tia i te mau metua kerisetiano ia horoa rahi atu â i to ratou taime no te ‘haapii i ta ratou iho mau tamarii e ia paari ma te aˈo a Iehova’? (Ephesia 6:4.) Mai te peu e, maoti te haapiiraa ta ratou i horoa ˈtu, e riro mai ta ratou tamarii ei tavini haapao maitai no te Atua ra o Iehova, te Tumu o te ora,  eita anei ïa ratou e oaoa? Mai te peu e e, e riro paha ïa ratou i te mauruuru roa i te mea e ua fanau mai ratou i te hoê tamarii tamaroa aore ra i te hoê tamarii tamahine. — Maseli 23:24, 25.

27. A aratai noa ˈi i te tupuraa o te hoê tamarii, no te aha hoi e tia ˈi ia haapao atoa i to ˈna iho huru?

²⁷ I roto i te Salamo 128:3, ua faaauhia te mau tamarii i te mau tumu olive. Teie hoi ta tatou e taio: “E riro to vahine mai te vine hotu i to oe ra pae fare; e to mau tamarii, i te haaatiraa i ta oe ra amuraa, mai te ohi olive ïa.” Ua rau huru hohoˈa to te mau tumu raau. E apapa noa vetahi i pihai iho i te patu e e ere i te mea rarahi roa; area vetahi ra mea haehaa roa ïa. E nehenehe atoa hoi e rave e ia vai nainai noa te tahi mau tumu raau ia tâpûpûhia to ratou mau aˈa, mai te mau “bonsaï”. Ei haapapuraa e e ohipa mau iho â te haapiiraa matamua i nia i te tupuraa o te hoê tamarii, e parau ïa vetahi pae e: “Mai te huru o te ohi, mai te reira atoa te huru o te tumu raau.” Ei manaˈo aifaito râ e tia ˈi i roto i taua tuhaa nei. Mai te peu e e tia i te mau metua ia aratai i te tamarii ia nehenehe oia ia pee i te hoê haerea maitai, eiaha ïa ratou e manaˈo e ia tano maitai iho â to ˈna huru e to ˈna haerea i nia i ta ratou i titau no ˈna. Eita ta outou e nehenehe e rave e ia hotu mai te suke i nia i te tumu olive. A haapii i ta outou tamarii ia rave i te maitai, eiaha e tutava i te faariro ia ˈna mai te hoê mea taa maitai o te ore hoi e tauturu ia ˈna ia faatupu mai i to ˈna iho huru mau. A rave i te taime, ia nehenehe outou ia matau maitai i te tamarii ta outou i fanau. I muri iho, mai te hoê tumu raau iti paruparu, a aratai papu ia ˈna ia nehenehe oia ia paruruhia e ia tapea-maitai-hia i nia i te eˈa maitai, ma te au râ hoi ia ore to ˈna aravihi no te faatupu i te maitai, ia fifi.

TE HOÊ HAAMAITAIRAA NO Ǒ MAI IA IEHOVA RA

28. Eaha te haapiiraa ta tatou e nehenehe e huti mai i te Genese 33:5, 13, 14, i reira i te faaiteraahia i te huru o Iakoba i nia i ta ˈna mau tamarii?

²⁸ I te tau tahito, ua faaite o Iakoba e mea faufaa roa na ˈna i ta ˈna mau tamarii. A faaau mai ai to ˈna tuaana  o Esau ia ˈna i te hoê huru haerea o te nehenehe hoi e riro ei mea vitiviti roa na ta ˈna mau tamarii, ua na ô atura o Iakoba ia ˈna e: “Ua ite hoi oe, e tau raatira e, e mea paruparu te tamarii; e e mamoe na te pinia teie, e te puaatoro ma te pinia; e ia tiaha-ru-noa-hia ra, e mahana hoê nei â, ua pohe ïa taua tiaa puaa atoa nei: a haere oe, e tau raatira, na mua i to tavini nei; e na ˈu teie e aratai maite atu, i te aratai e au i te mau puaa e na mua ia ˈu nei, e te mau tamarii.” Na mua iti noa ˈˈe, ia ˈna i farerei ia Esau e a ani mai ai oia e: “O vai teie nei feia e pee ia oe nei?”, ua pahono atura Iakoba e: “ E tamarii ïa na te Atua i horoa mai na to tavini nei.” (Genese 33:5, 13, 14). I to tatou nei tau, eita noa e tia i te mau metua ia poihere i ta ratou mau tamarii, e tia atoa râ ia ratou mai ia Iakoba, ia faariro i ta ratou mau tamarii mai te hoê haamaitairaa no ǒ mai ia Iehova ra. Parau mau, hou aˈe oia e faaipoipo ai, e tia i te hoê tane ia feruri maitai e e nehenehe anei ta ˈna e faaamu i te hoê utuafare fetii. Teie hoi te aˈoraa ta te Bibilia e horoa mai nei: “E imi oe i ta oe ra mau ravea i te atea ê, a faaau maite ai ia au ta oe i rapae au; a faatia ˈi i to oe fare i muri aˈe.” (Maseli 24:27). Ia au i taua aˈoraa faufaa mau nei, e tia i te hoê tane ia faaineine ia ˈna na mua ˈˈe, ia nehenehe to ˈna faaipoiporaa e to ˈna oraraa utuafare ia manuïa. Ia na reira oia, e riro ïa te hoê tamarii i ore i opuahia e na metua, i te fariihia ma te oaoa eiaha râ mai te hoê hopoia teimaha roa i te pae no te haamauˈaraa.

29. No te aha hoi e tia ˈi ia feruri maitai hou aˈe e opua ˈi e fanau i te hoê tamarii?

²⁹ Mea papu maitai iho â ïa e e tia mau â ia feruri maitai hou aˈe e opua ˈi e fanau i te hoê tamarii, e te reira e ere noa ïa no te tamarii matamua. Mea fifi anei na te mau metua ia faaamu, ia rave e ia haapii i ta ratou mau tamarii? No reira, mai te peu e mea faatura na ratou i to ratou Poiete e mai te peu e e here mau to ratou, e riro ïa ratou i te feruri e nafea râ ratou e nehenehe ai e faaohipa i te hitahita ore, ia ore to ratou utuafare ia rahi roa.

30. a) No te aha hoi e nehenehe ai e parau e i te parau mau o te Atua te fatu o te tamarii? b) Nafea hoi te reira ia ohipa mai i nia i te huru o te mau metua?

 ³⁰ I te parau mau, o vai hoi te fatu i ta outou tamarii? O outou iho â ïa mea papu maitai, teie râ o te Poiete atoa. Ua horoa mai oia ia ˈna i roto i to outou rima, mai ta ˈna i horoa mai ia outou i roto i te rima o to outou metua, i to outou vai-tamarii-rii-raa ra. E ere râ hoi to outou metua to outou fatu mau, e eita ta ratou e nehenehe e rave ia outou mai ta ratou e hinaaro. E ere atoa outou te fatu i ta outou tamarii, ia au i teie nei manaˈo. Eita ta te mau metua e nehenehe e opua eaha te taime mau raua e hamani ai e e aratai ai i te tupuraa o te tamarii i roto i te opu o to ˈna metua vahine. Eita atoa hoi ta ratou e nehenehe e ite e e taa maitai i taua ohipa faahiahia mau ra (Salamo 139:13, 15; Koheleta 11:5). Mai te peu, no te tahi fifi i te pae tino, eita e taea-roa-hia te avae o te aiû aore ra e pohe oia i to ˈna iho â fanauraahia, eita ta te mau metua e nehenehe e faaora faahou mai ia ˈna. E tia hoi ia ratou ia farii ma te haehaa e o te Atua te Tumu o te mau huru ora atoa e na ˈna tatou. “No Iehova te fenua e te î atoa i nia iho; te mau fenua o te ao nei, e te feia atoa e parahi i reira.” — Salamo 24:1.

31, 32. a) Eaha te hopoia a te mau metua i mua i te Atua? b) Eaha ïa te faahopearaa ia faatupu maitai ratou i taua hopoia nei?

³¹ Tei nia ia outou te hopoia no te rave i te mau tamarii ta outou e fanau mai e e titau atoa mai hoi te Poiete ia outou e mea nafea ta outou huru raveraa ia ratou. I te mea hoi e ua poiete oia i te fenua ia taatahia, ua tuu maira oia i roto i to tatou na metua matamua i te mana no te fanau i te tamarii. I to raua râ faarueraa i te Atua, ua tia ˈtura raua i te pae o te Enemi i patoi i te parau-tia o te faatereraa a te Atua i nia i to ˈna utuafare oia hoi te mau melahi e te mau taata. Mai te peu e te rave ra outou i ta outou mau tamarii ia nehenehe ratou ia riro mai ei mau taata paari e tapea i to ratou haapao maitai no to ratou Poiete, e nehenehe ïa ta outou, outou e to outou utuafare fetii, e haapapu e e haavare mau te Enemi e e parau mau te Atua ra o Iehova. Inaha, teie hoi ta tatou e  taio i roto i te Maseli 27:11: “E tau tamaiti, ia paari hoi oe, ia oaoa tau aau, ia tia ia ˈu ia patoi atu i tei faaino mai ia ˈu nei.”

³² Ia rave faahope roa outou i ta outou hopoia i nia i ta outou mau tamarii e ta outou hopoia i mua i te Atua, e riro mau ïa outou i te oaoa roa i te manaˈoraa e ua rave outou i te tahi ohipa i roto i to outou oraraa. E nehenehe mau atura outou e rave no outou i teie mau parau mauruuru mau i papaihia i roto i te Salamo 127:3 e na ô ra e: “E ta te opu i fanau ra, e utua [haamauruururaa] ïa.”

[Uiraa haapiiraa]

[Nota i raro i te api]

 [Hohoˈa i te api 93]

E riro te mau auraa fatata roa i teie nei i te ore e faaatea te mau metua i te mau tamarii, a muri aˈe.