Pene 1

Te ravea e oaoa ˈi i roto i te utuafare fetii

1, 2. Eaha te nehenehe e itehia e tatou i roto i te hoê utuafare fetii tahoê maitai? Eaha ˈtura ïa te mau uiraa e uihia?

 TE OAOARAA! E ere anei ïa i roto i to ˈna iho utuafare te hoê tane aore ra te hoê vahine e nehenehe ai e ite atu! Oia mau, i rotopu i to tatou iho utuafare tatou e nehenehe ai e ite e mea faufaa mau â tatou e te auhia maira e te herehia maira tatou, inaha, te reira hoi te mea ta te mau taata atoa hoi e titau nei. E ite tatou i taua oaoaraa rahi nei i roto i to tatou iho utuafare mai te peu e e tiaturi te tahi i te tahi e e ite te tahi eaha to te tahi e to te tahi hinaaro e ia here te tahi i te tahi. E riro mai atura ïa oia ei vahi hau mau i reira e moehia ˈi ia tatou i te mau fifi e te mau arepurepuraa no rapaeau mai. Area te mau tamarii ra, e ora ïa ratou ma te hau e e nehenehe atura hoi ratou e ora maitai.

² Tera te oraraa utuafare ta tatou e hinaaro nei. I te mea hoi e eita te reira e tupu noa mai, nafea hoi taua tapao ra e nehenehe ai e taeahia ia tatou? No te aha hoi, i roto e rave rahi tuhaa o te fenua nei, te utuafare fetii e farerei ai i te fifi? Eaha hoi te mea e oaoa ˈi tatou i roto i to tatou utuafare? Nafea hoi tatou ia iteahia te hoê huru oraraa mahanahana maitai e te autahoê?

3. Eaha ta te Tuatapaparaa e faaite maira no nia i te faufaaraa o te utuafare fetii?

³ Ua tano mau â outou i te haapeapea-mau-raa ia oaoa to outou utuafare e te hinaaroraa e manuïa i roto i to outou oraraa utuafare. Oia mau, teie ta te hoê buka (The World Book Encyclopedia, neneiraa o te matahiti  1973) e parau ra no nia i te faufaaraa o te oraraa utuafare:

“Ua riro te utuafare fetii ei faanahoraa tahito roa ˈˈe e i roto e rave rahi mau tuhaa, te faanahoraa faufaa roa ˈˈe. O ˈna te niu o te totaiete. E rave rahi mau nunaa taatoa tei ora mai aore ra tei moe, ia au maite te paari aore ra te paruparu o te utuafare fetii.”

4, 5. Eaha râ hoi ta tatou e ite nei i roto e rave rahi mau utuafare fetii?

⁴ E hia râ hoi rahiraa utuafare i teie mahana tei tahoê-maite-hia maoti te hoê here hohonu? E hia o ratou teie e ite nei i te hoê huru tupuraa mahanahana mau faatupuhia e te maitai, te mauruuru e te hamani maitai ta to ratou mau melo e faaite nei i te tahi e te tahi? E nehenehe anei e rave rahi mau utuafare fetii e haapapu i te parau mau o taua parau nei: “E mea maitai i te horoa ˈtu i te rave mai.”

⁵ I teie mahana, o te hoê huru feruriraa taa ê roa teie e parare nei na nia i te fenua taatoa nei. Mai te peu e e ite-rahi-hia te reira i te pae Tooa o te râ ma, te ô atoa nei ïa i te pae Hitia o te râ ma e i roto vetahi atu mau tuhaa o te ao nei mea titiaifaro maitai hoi te oraraa utuafare i mutaa ihora. E pinepine i te faaroohia i te mau parau mai teie te huru: “A rave mai ta oe e hinaaro e rave, eiaha râ oe e tapea i te tahi pae ia rave mai ta ratou e hinaaro e rave.” “Te aˈoraa, e ohipa tahito te reira; a vaiiho e na ta outou iho tamarii e maiti i to ratou eˈa.” “Eiaha roa ˈtu e haava noa ˈtu i te mea maitai aore ra i te mea ino.” Te faataaraa, te peu iino a te feia apî e te haerea tia ore i te pae no te taatiraa, o te mau mea ïa e rahi roa nei i roto i te mau fenua e rave rahi. Te horoa nei te feia rapaau i te pae no te feruriraa, tae noa ˈtu hoi te mau taote rapaau i te feia i inohia te upoo, te mau ekalesiatiko e vetahi atu mau taata horoa i te tahi mau aˈoraa, i to ratou manaˈo, e maoti hoi i te faaetaeta i te autahoêraa i roto i te utuafare, e rave rahi o ratou teie e imi nei i te hororaa, aore ra teie e faaitoito nei i te ohipa tia ore i te pae no te taatiraa ma te vauvau mai i te reira mai te hoê ravea no te ape i te mau fifi. Te haapapu maira hoi te mau hotu iino o taua huru haerea nei i teie nei faaueraa tumu e na ô ra e: “Ta te taata e ueue ra o ta ˈnâ ïa e ooti mai.”

 TE HAAPAPU MAIRA TE TUATAPAPARAA E MEA FAUFAA MAU Â TE UTUAFARE FETII

6. Mea nafea te ohipa i tupu i Heleni e i Roma i tahito ra ia faaite mai i te faufaaraa o te utuafare fetii?

⁶ Te horoa maira te Tuatapaparaa i te mau haapiiraa i nia i te tiaraa faufaa roa o te utuafare fetii te tia mau â ia feruri-maite-hia. No reira, i muri aˈe i to ˈna faataaraa mai (i roto i ta ˈna buka The Story of Civilization, tuhaa II) no nia i te topa-roa-raa te utuafare fetii i te fenua Heleni i tahito ra, te na ô râ te taata tuatapapa aamu ra o Will Durant e: “I haruhia ˈi te fenua Heleni na to Roma, no te mea ïa e ua topa roa te totaiete heleni i roto iho.” Te faaite maira taua buka nei e to roto atoa te puai o Roma i ta ˈna mau faanahonahoraa i te pae no te utuafare e a topa ˈi te reira no te ohipa taiata, ua haamata atoa aˈera te hau emepera i te topa.

7. No te aha vetahi mau taata i ora na i raro aˈe i te hau Emepera roma i ora ˈi i te hoê oraraa fetii oaoa mau, area vetahi pae ra, te farerei ra ïa i te mau fifi e rave rahi?

⁷ I te parau mau, te haapapu mai nei te Tuatapaparaa i teie faaiteraa tahito roa: “E ere tei te taata iho to ˈna haerea.” Te faaite atoa nei oia e te vai ra te hoê pû no te paari tei hau aˈe i te puai taata nei i reira hoi tatou e nehenehe ai e huti mai i te tahi mau aˈoraa e oaoa ˈi to tatou iho utuafare fetii. Te faaite maira te feia tuatapapa aamu e, a topa noa ˈtu ai te hau Emepera roma, ‘e oraraa utuafare faahiahia mau to te mau ati Iuda, e no to ratou paieti e to ratou haerea nehenehe, ua riro te mau totaiete kerisetiano iti ei fifi no te ao etene i ô hoi i roto i te hoê hororaa maamaa mau i te pae no te faaanaanataeraa i te tino’. (The Story of Civilization, tuhaa III, api 366.) No te aha hoi taua mau utuafare ra i taa ê ai? No te mea te vai ra ta ratou te hoê pû taa ê mau i reira i itea ˈi te mau aˈoraa, oia hoi te Bibilia. Ia tamau noa ratou i te pee i ta ˈna mau aˈoraa, ma te faariro hoi i te reira ei Parau na te Atua, e oaoa roa ïa ratou e e ora atoa hoi ratou i roto i te hau. Te horoa ra taua mau faahopearaa nei i te hoê huru faahaparaa i to Roma.

8. No te aha e mea faufaa mau â ia tuatapapa i te Bibilia no te faatitiaifaro i te mau fifi e farereihia i roto i te utuafare (Salamo 119:100-105)?

⁸ Te mau faautuaraa i faahitihia na mua ˈtu no roto mai  ïa i te Bibilia. Na Iesu i parau e e mea maitai i te horoa ˈtu i te rave mai. Ma te faauruahia e te Atua, ua papai maira te aposetolo Paulo e e ooti tatou i ta tatou i ueue, e o Ieremia, te peropheta a te Atua, ua faaite aˈera oia e e ere tei te taata iho to ˈna haerea (Ohipa 20:35; Galatia 6:7; Ieremia 10:23). I te mea hoi e ua itehia te tanoraa mau o taua mau faaueraa tumu ra, i nehenehe atoa ˈi Iesu e parau e: “E faatiahia râ te paari e ta ˈna ra [mau ohipa].” (Mataio 11:19). I te mea hoi e e nehenehe mau â te mau aˈoraa a te Bibilia e faatitiaifaro i te mau fifi o te utuafare, eita anei e tia ia tatou ia tuatapapa i te reira ma te tura?

9, 10. a) No te aha te tahi mau aˈoraa faufaa mau e te here e ore ai e navai no te faatupu i te hoê oraraa utuafare oaoa? b) E hinaaro atoa tatou i te aha (Apokalupo 4:11)?

⁹ Parau mau, te itehia nei i teie mahana e rave rahi mau tausani buka no nia i te faaipoiporaa e te oraraa utuafare, e i roto i te rahiraa o taua mau buka ra te vai ra ïa te tahi mau haamaramaramaraa faufaa mau. Tera râ hoi, aita te oraraa utuafare e faaea nei i te ino. E te titau ra te reira i te tahi atu mea, te tahi mea o te nehenehe e horoa mai i te puai no te faaruru atu i te mau fifi e haamǎtaˈu nei i teie mahana, i te oraraa utuafare. Ia here te tane e te vahine e tae noa ˈtu te mau metua e te mau tamarii te tahi e te tahi, e riro ïa te utuafare i te itoito maitai. No te utuafare fetii râ e rave rahi, eita te reira e navai no te tahoê noa ia ratou, ia tupu noa ˈtu te mau fifi ino roa. Eaha ïa te mea e toe ra?

¹⁰ Aita noa hoi ta tatou e hopoia e to tatou hoa faaipoipo, ta tatou mau tamarii, to tatou mau metua e a ati maite atu ia ratou, hau atu râ, ia ite atoa hoi tatou e e hopoia ta tatou e Ta te Bibilia e parau ra “te Metua (...) no ˈna hoi te iˈoa i mairihia i te fetii atoa, to te raˈi, e to te ao atoa nei”, oia mau, e te Atua ra o Iehova, te Tumu o te faaipoiporaa e o te utuafare fetii, tei Poiete i te huitaata nei. — Ephesia 3:14, 15.

TE ANAANATAE MAIRA TE ATUA I TE UTUAFARE FETII

11-13. Eaha te opuaraa a te Atua no nia i te fenua e te fetii taata nei?

¹¹ Te horoa maira ïa te Atua ra o Iehova i te tahi mau aˈoraa i nia i te oraraa utuafare no te mea ua ite oia eaha ta te taata e hinaaro ra e te hinaaro atoa nei hoi oia e ia  oaoa ratou. Tera râ, te itehia ra i roto i to ˈna anaanatae i te utuafare fetii, i te hoê opuaraa rahi aˈe, opuaraa ta te Bibilia e faaite mai nei ia tatou. Te haapapu atoa maira oia e aita te fenua i tupu noa mai, ua poiete râ te Atua ra o Iehova i te reira ia vai noa mai e a muri noa ˈtu e ia taatahia. Teie hoi ta te peropheta ra o Isaia i papai: “E na ˈna hoi i haamau: aita râ oia i hamani ia vaiiho-taata-ore-noa-hia, ua hamani râ oia ia taatahia.” — Isaia 45:18.

¹² No te faatupu i taua opuaraa nei, ua poiete aˈera te Atua na taata matamua, e ua faaue maira ia raua e faatupu i te hoê utuafare fetii: “I hamani oia ia raua, o te tane e te vahine. Ua haamaitai ihora te Atua ia raua, na ô maira te Atua, Ia fanau orua, e ia rahi roa, e faaî i te fenua nei.” (Genese 1:27, 28). Te titau atoa ra te opuaraa a te Atua i na taata matamua e ta raua huaai ia auraro ratou ia ˈna e ia atuatu atoa i te fenua. Teie hoi ta tatou e taio i roto i te Genese 2:15: “Ua rave ihora te Atua ra o Iehova i te taata, tuu ihora ia ratou i roto i taua ô i Edene ra, ei faaapu, e ei tiai.” I roto i te roaraa o te tau, e parare roa ˈtu ai te mau huru tupuraa i vai na i roto i taua ô nei na te fenua taatoa nei, e e horoa mai atura ïa te atuaturaa ratou i te fenua e te faaohiparaa i ta ˈna mau hotu i te mau ravea e rave rahi na te taata, no te haapii ia ˈna iho e no te ite atu i te oaoaraa maoti te faaohipa-maitai-raa ratou i to ratou aravihi.

¹³ I teie mahana, te vai ra hau atu i te maha miria taata, aita râ ratou e faatupu nei i te opuaraa a te Atua no te fenua nei. Aita te rahiraa o ratou e auraro nei ia ˈna e aita atoa hoi e atuatu nei i te fenua. Aita, te faaino nei râ ratou na roto i te haaviiviiraa i te reva, te pape e te repo. No reira, ia au i ta ˈna opuaraa matamua, ua faaite atea mai te Atua e eita noa oia e faaore roa i taua faainoraa ra, e ‘haamou râ oia i te feia e faaino nei i te fenua’. — Apokalupo 11:18.

MAU UIRAA E TIA IA TATOU IHO IA UIUI

14. No te aha tatou e nehenehe ai e papu e e upootia mau â te opuaraa a te Atua no nia i te utuafare fetii?

¹⁴ Ua faaite maira te Atua e e upootia mau â ta ˈna opuaraa no nia i te fenua e te fetii taata nei, i te na ôraa mai e: “Oia atoa te parau no roto i to ˈu nei vaha; e ore e hoˈi faufaa ore noa mai ia ˈu nei, e tupu râ tei opuahia e au  ra.” (Isaia 55:11). Aita noa te Atua i haamau i te utuafare fetii, ua horoa atoa mai râ oia i te tahi mau aˈoraa e nehenehe ai te fetii e oaoa. E riro te hoê tuatapaparaa i taua mau aˈoraa nei i te tauturu mai ia tatou ia pahono i te mau uiraa faufaa roa ta tatou e uiui nei no nia i te utuafare fetii.

15-17. a) Eaha, i to outou manaˈoraa, vetahi mau uiraa faufaa roa te uihia i te pae no te utuafare fetii? b) No te aha e mea maitai mau â ia itea mai te mau pahonoraa papu maitai i taua mau uiraa nei?

¹⁵ Ei hiˈoraa, nafea e itehia mai ai i te hoê tane aore ra i te hoê vahine i te hoa faaipoipo e tano maitai no ˈna? Nafea te manaˈo o e piti na hoa faaipoipo e nehenehe ai e tuea no te faatitiaifaro i te tahi mau fifi faufaa mau? Parau mau, e maitai aˈe e piti taata i te hoê, i muri aˈe râ i te horoaraa te tahi e te tahi i to raua manaˈo, na vai ïa e faaoti? Nafea te hoê tane e nehenehe ai e rave e ia faatura mai ta ˈna vahine ia ˈna e no te aha hoi e riro ai ei mea faufaa mau no ˈna? No te aha te hoê vahine e hinaaro ai e ia here mai ta ˈna tane ia ˈna e eaha ta ˈna e nehenehe e rave i roto i taua tuhaa ra?

¹⁶ Mea nafea ta outou huru hiˈoraa i te tamarii? No te rahiraa, e taipe ratou no te tahi huru tupuraa, e mau rave ohipa mâmâ roa ratou, te hoê paruru ia tae i te ruauraa aore ra e hopoia. Area te Bibilia ra, te faariro ra hoi oia ia ratou ei haamaitairaa. Na te aha e haapapu mai e tera aore ra tera te huru o te mau tamarii? Afea hoi e haamata ˈi i te haapii ia ratou? Mea tia mau anei ia aˈo ia ratou? Mai te peu e e, nafea ïa? Te vai mau ra anei te hoê patu i rotopu i te mau melo o te utuafare? E nehenehe anei e faaore i taua patu ra? Hau atu â, e nehenehe anei e ape e ia ore te reira ia tupu mai?

¹⁷ Ia itea mai ia outou i te hoê pahonoraa papu maitai i taua mau uiraa nei, e rave rahi ïa ohipa ta outou e rave e oaoa ˈi to outou utuafare. Hau atu â, e roaa atoa ia outou te haapapuraa e te vai mau ra te hoê taata tei ia ˈna te puai, te maitai e te paari faito ore, te hoê taata o ta outou e nehenehe e fariu tia ˈtu i nia iho, i te mau taime atoa outou e hinaaro ai e o te nehenehe e aratai i to outou utuafare fetii i te oaoaraa mure ore.

[Uiraa haapiiraa]

 [Hohoˈa api taatoa i te api 4]