Te tiaraa o te mau metua
Pene 8
Te tiaraa o te mau metua
1-3. a) Eaha te huru ta te fanauraahia mai te hoê tamarii e faatupu i nia i to ˈna mau metua? b) No te aha e mea faufaa roa ia taa maitai te metua tane e te metua vahine eaha mau na to raua tiaraa?
I ROTO i te oraraa, e rave rahi mau ohipa ta tatou e ore roa ˈtu e tâuˈa, area vetahi ra, mai te fanauraa o te hoê tamarii, e vai maoro mai ïa te reira i roto i te feruriraa. No na taata faaipoipo, e ere atura hoi te oraraa mai mutaa ihora. Noa ˈtu e mea nainai roa oia, e faaroo-mau-â-hia te reo o te aiû iti e e haapapu mai oia e te vai mau ra oia i roto i te utuafare.
2 Ua riro râ teie ohipa faahiahia mau, o te tia hoi ia faarahi atu â i te faufaa e te oaoa o te oraraa o na metua, ei ohipa fifi mau e inaha, no te faatupu i te reira, e titauhia ïa ia tahoê maite te metua tane e te metua vahine. I te mea e na orua e piti i rave ia fanauhia mai to orua aiû iti, e hopoia faufaa roa ïa ta orua tataitahi i roto i to ˈna tupuraa, e te reira, mai to ˈna fanauraahia mai. Aitâ aˈenei hoi i hinaarohia i te hoê tahoê-maite-raa haavare ore e te haehaa mai teie te huru.
3 E mea faufaa roa ia taa maitai orua i to te tahi e to te tahi tiaraa e nafea ia faaau maitai i taua nau tiaraa nei ia itea mai i to orua aiû iti i te mau mea atoa ta ˈna e hinaaro no te tupu maitai. E titauhia i te huru aifaito maitai. Oia mau, e turai to tatou feruriraa ia tatou ia faaite i te hoê huru aifaito maitai, e nehenehe râ to tatou mau manaˈo e horuhoru ai ra e faaino i taua huru nei. E riro paha tatou i te ore roa ˈtu e aifaito i roto i to tatou haerea, oia hoi, e rahi roa te ohipa ta tatou e rave aore ra e iti roa paha. Inaha, e tia i te metua tane ia haapapu i to ˈna tiaraa, teie râ, ia ore oia e faaohipa maitai i to ˈna mana, e riro ïa oia ei taata haavî. I te tahi aˈe pae, e tia i te metua vahine ia apiti atu i roto i te haapiiraa e te aˈoraa i te mau tamarii, e ere râ i te mea maitai ia rave o ˈna anaˈe iho i taua hopoia ra, ma te patoi atu e ia tahoê mai te metua tane, inaha, ia na reira oia, e ino roa ïa te faanahonahoraa o te utuafare. Mea maitai te ohipa e tano, ia ore râ te reira e ravehia ma te au, e nehenehe taua ohipa maitai ra e riro mai ei ohipa ino. — Philipi 4:5.
TE TIARAA FAUFAA ROA O TE METUA VAHINE
4. Eaha vetahi mau hinaaro o te aiû iti te tia i to ˈna metua vahine ia haamâha?
4 Tei te metua vahine te ora o te hoê aiû fanau-apî-hia. Ia haamâha te metua vahine i to ˈna mau hinaaro ma te here, e ite ïa te aiû iti e te paruru-maitai-hia ra o ˈna (Salamo 22:9, 10). E tia oia ia paia maitai, ia tauihia e ia vai mahanahana noa. E tia atoa râ ia haamâhahia to ˈna mau hinaaro i te pae no te here tei riro hoi ei mea faufaa roa atoa. Mai te peu e e ite te aiû iti e aita o ˈna e herehia ra, e peapea roa ïa oia. E oioi noa te metua vahine i te ite e te hinaaro maira ta ˈna aiû ia ˈna, ia tamata oia i te huti i to ˈna manaˈo i nia ia ˈna. Teie râ, ia tamau noa oia i te ore e tâuˈa ˈtu i ta ˈna mau tuô, e nehenehe oia e pohehia i te maˈi. Ia ore te hoê tamarii e aupuru-maitai-hia ma te here te tahi tau taime, e nehenehe to ˈna tupu-maitai-raa i te pae no te here, e ino roa.
5-7. Ia au i te tahi mau tuatapaparaa apî, eaha ta te here e te aupururaa ta te metua vahine e horoa, e faatupu mai i nia i te aiû fanau-apî-hia?
5 Ua haapapu mai e rave rahi mau tuatapaparaa i ravehia i te mau vahi huru rau e, e nehenehe te mau aiû fanau-apî-hia e maˈihia e e pohe roa ˈtu ia erehia ratou i te here o to ratou metua vahine, o te faaitehia hoi na roto i te paraparauraa, te tapeapearaa, te horomiriraa e te faataotoraa ia ratou (a faaau e te Isaia 66:12; Tesalonia 1, 2:7). Noa ˈtu e e nehenehe te tahi taata e mono ia ˈna, aita e feaaraa e o te metua vahine iho â te tia ia rave i teie ohipa, tei roto hoi i to ˈna opu te tamarii i te tupuraa e te faaamuraahia i roto i na avae matamua o to ˈna oraraa. E tupu te hoê taairaa taa ê i rotopu i te metua vahine e te aiû. A itea ˈi te mama i te hoê hinaaro o te turai ia ˈna ia tuu i to ˈna aiû i roto ia ˈna, i to ˈna aˈe pae, e oioi noa ïa te aiû iti i te imi i te titi o to ˈna metua vahine.
6 Ua haapapu mai te tahi mau maimiraa e mea ohipa roa te roro o te hoê aiû iti e ia faaitoitohia to ˈna mau huru mai te fâfâraa, te faarooraa, te iteraa e te hâuˈaraa, e tupu maitai oia i te pae no te feruriraa. Ia ote te hoê aiû i te û o to ˈna metua vahine, e taa ia ˈna i te mahanahana e te hauˈa o to ˈna mama. E hiˈo tia ˈtu oia i nia i te mata o to ˈna metua vahine ia faaamu oia ia ˈna. Eita noa oia e faaroo i to ˈna reo ia paraparau mai oia aore ra ia himene oia i te tahi himene, e faaroo atoa râ oia ia otuitui to ˈna mafatu, ta ˈna hoi i faaroo ê na a vai ai oia i roto i to ˈna opu. I roto i te hoê vea norevetia, teie ta Anne-Marit Duve, taote tuatapapa i te pae no te feruriraa o te mau tamarii, i tapao mai:
“I te mea e e faaite mai te araara o te orio mata i te faito ohipa a te roro, te tiaturi nei matou e e nehenehe te mau faaitoitoraa puai i te pae no te fâfâraa, e tupu iho â râ i te taime e ote ai te aiû i te û, e faarahi i te ohipa a te roro o te aiû, e na te reira e faarahi atoa ˈtu i to ˈna maramarama ia riro mai oia ei taata paari.”
7 No reira, ia rave te hoê metua vahine i to ˈna aiû iti i roto ia ˈna, ia faataoto ia ˈna, ia faahopu i te pape aore ra ia taui ia ˈna, e faufaa rahi ïa to taua mau ohipa ra i nia i to ˈna tupuraa e i nia i to ˈna oraraa no a muri aˈe ia riro mai oia ei taata paari. Parau mau, e ere i te mea oaoa roa ia ara i te po e ia horoa i te taime no te tamǎrû i te aiû e taˈi noa ra, ia ferurihia râ i te mau haamaitairaa e itehia mai a muri aˈe, e hau atu ïa i te hoona ia faaauhia i te ereraa i te taoto.
E HAAPII OIA I TE HERE IA VETAHI Ê IA HEREHIA MAI OIA
8-10. a) Eaha ta te here o te hoê metua vahine e haapii atu i to ˈna aiû iti? b) No te aha e mea faufaa roa te reira?
8 Mea faufaa roa ia ite te hoê aiû fanau apî e te herehia ra oia, ia nehenehe oia e tupu maitai i te pae no te here. E haapii oia i te here ia vetahi ê ia herehia oia, no te mea te faaitehia ra te mau tapao no te here i nia ia ˈna. No nia i to tatou here i te Atua, teie ta te Ioane 1, 4:19 e parau ra: “Te hinaaro nei tatou ia ˈna, no te mea oia na tei hinaaro mai na ia tatou nei.” Na te metua vahine e horoa i te mau haapiiraa matamua i te pae no te here i te tamarii. Ia piˈo atu oia i nia i te roˈi o to ˈna pepe, ia tuu atu i to ˈna rima i nia i te ouma o te aiû e ia faataoto mǎrû noa ˈtu ia ˈna, ia haafatata ˈtu i to ˈna papariˈa i to ˈna ma te parau mǎrû atu ia ˈna, eita iho â ïa te pepe e taa mai i ta ˈna mau parau (e mea pinepine, aita hoi to taua mau parau ra e auraa), e hautiuti râ oia e e muhu oia ma te oaoa, no te mea te faaite atura te rima o to ˈna metua vahine e to ˈna taˈiraa reo e te here ra oia ia ˈna. Te ite ra oia e te paruru-maitai-hia ra oia.
9 Mea au roa na te mau pepe e te mau aiû ia herehia mai ratou, e e turai hoi te reira ia ratou ia na reira atoa. Ia tauahi to ratou rima iti nainai roa i te arapoa o to ratou mama e a apapa ˈtu ai ia ˈna, e oaoa roa ratou ia pahono maitai mai oia i taua mau tapao no to ratou here ra. Te haamata ra ratou i te haapii i te hoê haapiiraa faufaa roa, oia hoi e oaoa rahi te noaa mai ia faaite atu i te here ia vetahi ê e ia faaitehia mai te here i nia ia tatou e, ia ueue tatou i te here e ooti atoa mai ïa tatou i te here (Ohipa 20:35; Luka 6:38). Te faaite maira te mau ohipa i tupu e, ia ore te hoê metua vahine e to ˈna aiû e faatupu i teie mau huru taairaa fatata roa mai te tamarii-rii-raa mai â, e fifi roa ïa teie tamarii a muri aˈe i te ati maite atu i te tahi taata.
10 I te mea e e haamata te mau tamarii i te haapii i to ratou iho â fanauraahia mai, mea faufaa rahi mau â ïa te mau matahiti matamua o to ratou oraraa. I roto i taua area taime ra, mea faufaa roa te here o te metua vahine. Ia manuïa oia i te faaite i to ˈna here i to ˈna aiû (ma te ore râ e poihere rahi roa ˈtu ia ˈna) e i te haapii ia ˈna nafea râ ia faaite i te here, e riro ïa te reira i te haamaitai maoro ia ˈna; e mai te peu e aita ra, e faaino ïa oia ia ˈna. Te toroa metua vahine, o te hoê ïa o te mau toroa fifi roa ˈˈe no te hoê vahine, o te toroa râ o te horoa mai i te mau haamaitairaa faahiahia roa ˈˈe. Parau mau, mea rohirohi e te fifi atoa hoi teie hopoia no te hoê vahine, eaha râ te “toroa” i te ao nei, o te nehenehe e horoa i te hoê auraa i roto i to ˈna oraraa e e pûpû mai i te oaoaraa tamau mai teie te huru?
TE TIARAA FAUFAA ROA O TE METUA TANE
11. a) Eaha ta te metua tane e rave ia ô oia i roto i te feruriraa o te tamarii? b) Eaha te faufaaraa o te reira?
11 E ohipa matauhia iho â e, i te omuaraa, mea faufaa aˈe te tiaraa o te metua vahine i roto i te oraraa o te tamarii. E tia atoa râ i te metua tane ia faaô mai ia ˈna i roto i te oraraa o te aiû iti mai te fanauraa mai â. A vai nainai noa ˈi te tamarii, e nehenehe te metua tane, e e tia hoi ia ˈna ia na reira, e amo i ta ˈna hopoia, na roto i te haapaoraa ˈtu i te aiû, te hautiraa e o ˈna e te faanâraa ˈtu ia ˈna ia taˈi oia. Mea na reira te metua tane ia ô i roto i te feruriraa o te aiû iti. I roto i te roaraa o te tau, e rahi noa ˈtu te faufaa o to ˈna tiaraa. Ia tiai maoro oia, e nehenehe te reira e riro ei tumu no te tahi mau fifi e tupu mai i te taurearearaa iho â râ, inaha, mea fifi roa hoi ia aˈo i te mau tamarii i taua taime ra. I taua faito matahiti ra, e hinaaro mau â te mau tamaroa i te tauturu a to ratou metua tane. Mai te peu râ e aita te mau auraa maitatai i faatupuhia i te omuaraa ra iho, eiaha ïa e tiaturi e e nehenehe te apoo i faaatea ê i te metua e ta ˈna tamarii i roto i te roaraa o te mau matahiti, e faaîhia tau hebedoma noa.
12, 13. a) Eaha te tiaraa o te metua tane i roto i te utuafare fetii? b) Ia haapao maitai te metua tane i ta ˈna mau hopoia, nafea ïa te reira ia ohipa mai i nia i te huru o te mau tamarii i mua i te mana?
12 Maoti hoi to ˈna tiaraa tane, mea faufaa roa te tauturu ta te metua tane e hopoi mai i te pae no te tupu-maitai-raa o te huru o ta ˈna tamaiti aore ra ta ˈna tamahine. Ia au i te Parau a te Atua, e riro te metua tane ei upoo no te utuafare e tei nia ia ˈna te hopoia oia hoi, te aupururaa i to ˈna utuafare i te pae materia (Korinetia 1, 11:3; Timoteo 1, 5:8). Teie râ, “e ere o te pane anaˈe ra te mea e ora ˈi te taata nei, o te mau mea atoa râ i haapaohia e Iehova ra”. Te horoa-atoa-hia maira i te metua tane te faaueraa tumu oia hoi, e haapii i ta ˈna mau tamarii “e ia paari ma te aˈo a te Fatu ra”. (Deuteronomi 8:3; Ephesia 6:4.) Noa ˈtu e e turai to ˈna here no ta ˈna huaai ia ˈna ia rave i te reira, na mua roa ˈˈe râ, no te mea ïa e, ua papu ia ˈna i ta ˈna hopoia i mua i to ˈna Poiete, oia e tutava ˈi i te rave faahope roa i te ohipa ta ˈna i horoa mai.
13 E faaite te metua vahine i te mahanahana, te mǎrû e te hamani maitai, area te metua tane ra, e faaite mai oia i te puai e te aˈo e au, ma te faaohipa i te hoê mana o te faaaifaito i te mau mea i roto i te utuafare. E ohipa ta ˈna huru faatupuraa i te hopoia ta te Atua i horoa mai na ˈna, i nia i te haerea ta ta ˈna mau tamarii e faaite atu a muri aˈe i mua i te mana taata nei e te mana a te Atua, ia faaite ratou e e faatura anei ratou i taua mana ra aore ra ia faaite ratou i to ratou auraro i te hoê taata ma te ore e amuamu aore ra e patoi atu.
14. Eaha te faahopearaa maitatai ta te hiˈoraa maitai o te metua tane e nehenehe e faatupu i nia i ta ˈna tamaiti aore ra ta ˈna tamahine?
14 Maoti hoi te hiˈoraa o te metua tane e ta ˈna huru haapaoraa i te mau ohipa o te utuafare, e nehenehe ai, i roto i te hoê tuhaa rahi, te hoê tamaroa e riro mai ei taata paari paruparu e te papu ore, aore ra ei tane puai e te aueue ore, o te faaite papu i to ˈna mau manaˈo e tei ineine i te amo i ta ˈna mau hopoia. E nehenehe atoa te reira e turai ia ˈna ia riro mai ei tane e ei metua tane haavî, aifaito ore e te etaeta, aore ra, i te tahi aˈe pae, ei taata manaˈo papu, te maramarama e te hamani maitai. Maoti te mau auraa ta ˈna e faatupu e ta ˈna tamahine, e ohipa te metua tane i nia i to ˈna manaˈo no nia i te mau tane, e a muri aˈe, na te reira hoi e haamaitai aore ra e haapeapea i te manuïaraa o to ˈna faaipoiporaa. Inaha hoi, e haamata te ohipa a te metua tane i nia i te tamarii i te tamarii-rii-raa ra iho â.
15, 16. a) Ia au i ta te Bibilia e parau ra, eaha te hopoia a te metua tane no nia i te haapiiraa? b) Nafea oia ia haapao i taua hopoia nei?
15 Te haapapu maira te mau faaueraa ta te Atua i horoa i to ˈna nunaa i roto i te Deuteronomi 6:6, 7, i te faufaa o te hopoia a te metua tane i te pae no te haapiiraa i ta ˈna mau tamarii. Teie ta tatou e taio: “E teie nei mau parau ta ˈu e parau atu ia oe i teie nei mahana, ei roto i to aau e vai ai: e e haapii tamau maite oe i to mau tamarii i taua mau parau nei; o ta oe ïa e parau ia parahi noa oe i roto i te fare, e ia haere noa oe na te eˈatia ra, e ia taoto noa oe ra, e ia tia noa oe i nia ra.”
16 Eita noa e navai te faaôraa ˈtu i te mau mahana atoa i te mau parau a te Atua i roto i te feruriraa o te tamarii, e tia râ ia faaô atoa ˈtu i te poroi faufaa mau o taua mau parau nei. E rave rahi mau taime e nehenehe e faaohipahia no te rave i te reira. Te tahi mau tiare i roto i te aua, te mau manumanu, te mau manu e te mau animala iti i roto i te mau tumu raau, te mau pupu i te pae miti, te tahi mau maa o te aito rahi i nia i te mouˈa e te mau fetia e anaana ra i roto i te raˈi, te faahiti nei teie mau mea unauna mau i te parau no nia i te Poiete, e e tia ia outou ia faataa ˈtu i te reira i ta outou mau tamarii. Teie ta te papai salamo e parau nei: “Te parau hua nei te mau raˈi i te hanahana o te Atua! e te faaite nei te reva i te ohipa a tana rima! Te haapii nei te tahi ao i te tahi i te parau, e te faaite nei te tahi rui i te tahi i te ite.” (Salamo 19:1, 2). Ia ara oia i te faaohipa i te mau mea i poietehia e tae noa ˈtu i te tahi mau hiˈoraa i roto i te oraraa no te mau mahana atoa no te haafaufaa i te mau faaueraa tumu tia mau a te Atua e no te faaite i te paari e te faufaa o te mau aˈoraa a te Atua, e nehenehe atura ïa te hoê metua tane e faatupu i roto i te feruriraa e te mafatu o ta ˈna tamarii, i te niu faufaa roa ˈˈe no to ˈna oraraa a muri aˈe, oia hoi, te tiaturiraa e te vai mau ra te Atua e “o oia [atoa] te faautua [haamaitai] i te feia i imi papu ia ˈna ra”. — Hebera 11:6.
17, 18. a) Nafea te metua tane ia aˈo i ta ˈna mau tamarii? b) Eaha te mea faufaa roa ˈˈe ia faaauhia i te mau ture e rave rahi?
17 E hopoia atoa na te metua tane te aˈoraa i ta ˈna tamarii. “O vai hoi ïa tamaiti aore i aˈohia e te metua ra?”, ta te Hebera ïa 12:7 e ani ra. E tia râ ia ˈna ia aˈo atu ma te au, ma te ore hoi e faautua ino mau i te tamarii, inaha, e nehenehe hoi te reira e faaino roa i te tamarii aore ra e faataiâ ia ˈna. Teie ta te Parau a te Atua e parau nei i te mau metua tane: “Eiaha e faariri atu i ta outou tamarii, o te taiâ hoi ratou.” (Kolosa 3:21). E tia mau â hoi ia haamau-maitai-hia te tahi mau ture, e nehenehe râ tatou i te tahi taime, e faarahi roa i te reira, e inaha, e teimaha roa ˈtu ai teie mau ture e e taiâ roa te mau tamarii.
18 I mutaa ihora, e haafaufaa na te mau Pharisea i te mau ture; na roto i to ratou haapueraa e hia rahiraa ture, faatupu roa ˈˈera ratou i te mau ui taata haavare. Teie te tahi hape no te taata nei oia hoi, te manaˈoraa e e navai noa te faatupuraa i te mau ture apî no te arai i te mau fifi atoa. Ua faaite mai te mau mea i itehia i roto i te oraraa e, te ravea oia hoi, te haaputapûraa ïa i te mafatu. Ia iti mai na te mau ture ta outou e haamau e tia ˈi, e ia tutava na râ outou i te haapii i te mau faaueraa tumu i ta outou mau tamarii, ma te pee i te hiˈoraa o te Atua iho o tei parau hoi e: “E tuu vau i ta ˈu ra mau ture i roto i to ratou manaˈo, e papaihia e au i roto i to ratou aau.” — Hebera 8:10.
E MAU HOA TE METUA TANE E TE METUA VAHINE O TE TURU TE TAHI E TE TAHI
19. Eaha te nehenehe e rave no te paruru i te au-maite-raa o te utuafare?
19 Mea pinepine e na te metua tane e rave i te ohipa ia roaa mai te moni no te utuafare. Ia hoˈi mai oia mai te ohipa mai, ua rohirohi roa paha oia e e ohipa â paha ta ˈna. Teie râ, e tia ia ˈna ia faataa i te taime no ta ˈna vahine e ta ˈna mau tamarii, ia nehenehe oia e tauaparau e to ˈna utuafare, e faanaho i te tahi mau opuaraa e o ratou paatoa e e faaanaanatae atoa na muri iho ia ratou. Mea na reira oia e haapaari ai i te autahoêraa e te ati-maite-raa o te utuafare. Hou raua e fanau ai i te tamarii, peneiaˈe paha, e peu matauhia na te hoê tane e ta ˈna vahine ia haere pinepine i te tahi mau vahi. Ia tamau râ raua i te na reira, ma te haere i te tahi vahi e te tahi vahi e a hoˈi mai ai i te fare i te po roa, eita ïa e nehenehe e parau e te haapao maitai ra raua i ta raua hopoia metua. E ere roa ˈtu te reira i te mea tano no ta raua tamarii. Ia tae i te hoê taime, e tia i taua mau huru metua ra ia faaruru i te mau faahopearaa no to raua haapao-ore-raa e to raua tâuˈa-ore-raa. Mea maitai aˈe no te mau tamarii, e no te mau taata paari atoa hoi, ia fanaˈo ratou i te hoê oraraa papu e te nahonaho maitai e haamaitai mai ia ratou i te pae feruriraa, i te pae tino e i te pae no te here. Inaha, ua navai roa hoi te mau tapitapiraa o te oraraa utuafare fetii, e aita e faufaa ia faarahi te mau metua i te fifi. — A faaau e te Mataio 6:34; Kolosa 4:5.
20. Eaha ta te mau metua e nehenehe e rave ia tahoê raua i te pae no te aˈoraa ˈtu i ta raua tamarii?
20 E ohipa amui te metua tane e te metua vahine i te pae no te mau auraa e ta ratou mau tamarii, no te haapiiraa ia ratou, te aˈoraa, te faautuaraa aore ra te faaiteraa ˈtu i te here. ‘E te fetii hoi ia amahamaha e rave ia ˈna ihora, e ere hoi te reira fetii e mau.’ (Mareko 3:25). E tia i te mau metua ia aparau na mua ˈˈe, no nia i te huru aˈoraa ta raua e faaohipa i nia i ta raua tamarii, ia ore raua e faaite e aita raua e afaro ra i nia i taua tumu parau ra, i mua i te tamarii. Ia ore raua e haapao i te reira, e faaitoito atu ïa raua i ta raua tamarii ia tamata i te ‘faaamahamaha ia raua no te faatere’. E riro paha i te tahi taime e e ohipa oioi noa te hoê o na metua aore ra e riri taue noa oia e e aˈo atu oia i te tamarii ma te etaeta mau, a faautua ˈtu ai ia ˈna e inaha aita hoi i tano. I roto i taua huru tupuraa ra, e nehenehe paha na metua e paraparau raua anaˈe, e i muri aˈe, e opua ˈtu ai te metua tei ohipa ma te haapao ore, e na ˈna iho e faaafaro e te tamarii. Aore ra, mai te peu e eita e nehenehe e tauaparau raua anaˈe, e nehenehe paha te metua tane aore ra te metua vahine e manaˈo ra e mea hape mau â ia turu oia i to ˈna hoa, e parau atu e: “Te taa ra ia ˈu no te aha oe e riri ai e ahiri e o vau aˈe tera, e na reira atoa vau, teie râ peneiaˈe paha aita oe i ite e...” E i muri aˈe, e haamaramarama ˈtu o ˈna i te parau ta to ˈna hoa i ore i haapao. Ia na reira oia, e tamǎrû oia i te taatoaraa ma te ore e faaite tahaa roa mai i to ˈna mauruuru ore i mua i te tamarii i aˈohia. Teie ta te buka a te mau Maseli e parau ra no nia i taua tumu parau nei: “Tei te teoteo anaˈe ra e tupu ai te tamaˈi; area te feia i faaroo i te aˈo ra te reira te paari.” — Maseli 13:10; hiˈo atoa Koheleta 7:8.
21. Te aˈoraa i te mau tamarii, e tuhaa noa anei te reira na te hoê noa metua? A haapapu mai i ta outou pahonoraa.
21 Te faaite maira te mau Papai hebera e e faatupuhia te aˈo na roto e piti huru ohipa: “E faaroo mai, e tau tamaiti, i te aˈo a to metua tane, e eiaha e faarue i te faaitoito a to metua vahine ra.” Te haapapu râ te mau Papai heleni kerisetiano i taua manaˈo nei i te na ôraa e: “E te mau tamarii ra, e faaroo i to outou mau metua i te Fatu ra, e parau-tia hoi te reira.” I te tahi mau taime, e manaˈo te metua tane e tei ta ˈna vahine te hopoia no te aˈo i te mau tamarii. I te tahi aˈe pae, mea taa ê roa ïa te manaˈo o te metua vahine o te parau noa ˈtu ma te haamǎtaˈu i te tamarii i rave i te ohipa ino e: “Arauaˈe oe e farerei ai, ia hoˈi mai to oe papa!” Ia vai oaoa noa râ te utuafare e ia noaa i te metua tane e te metua vahine te here e te faatura o ta raua tamarii, e tia ia raua toopiti atoa ra, ia amo i ta raua hopoia i te pae no te aˈoraa ˈtu i ta raua mau tamarii. — Maseli 1:8; Ephesia 6:1.
22. Ia ani te hoê tamarii i te tahi ohipa, eaha te ore e tia ia rave, e no te aha?
22 E tia i te mau tamarii ia ite e te ohipa amui ra to ratou mau metua i roto i taua tuhaa ra e te farii ra te tahi e te tahi i te amo i ta ˈna iho hopoia. Ia faaroo te tamarii e ani ra i te tahi mea, i to ˈna metua tane e pahono mai e: “A haere atu e ani i to oe mama”, aore ra ia vaiiho noa te metua vahine e na te metua tane e faaoti, te hoa e parau e “eita”, e riro ïa oia i mua i te tamarii ei upoo ihuihu. Parau mau, e nehenehe paha te metua tane e na ô mai e: “E, e nehenehe oe e haere e hauti i rapae maa taime iti, a ani na mua râ i to oe mama e afea te maa e ineine ai.” Aore ra, ma te manaˈo e e ohipa tano ta te tamarii e ani ra, e faaoti paha te metua vahine e e tia i ta ˈna tane ia horoa mai i to ˈna manaˈo. Teie râ, e tia ia raua toopiti atoa ra ia haapao maitai ia ore te tamarii ia faaitoitohia aore ra ia faatiahia i te faaamahamaha i to ˈna metua tane e to ˈna metua vahine, ia noaa mai ia ˈna te mea ta ˈna e hinaaro ra. Hau atu, eita te hoê vahine maitai e faaohipa i to ˈna tiaraa no te aˈa ˈtu i ta ˈna tane ma te rave ia rahi aˈe te here o ta ˈna tamarii ia ˈna i ta ˈna tane, na roto hoi i te horoaraa ˈtu i ta te tamarii e hinaaro ra.
23. I roto i te hoê utuafare, o te metua tane noa anei te tia ia rave i te mau faaotiraa?
23 I te parau mau, te vai ra to te melo tataitahi o te utuafare te tahi mau tuhaa i reira e tia mau ai ia haapaohia to ˈna mau manaˈo. E hopoia na te metua tane, te faatitiaifaroraa i te mau fifi no nia i te maitairaa o to ˈna utuafare e e rave oia i teie mau faaotiraa i muri aˈe i to ˈna paraparauraa ˈtu ia ratou ma te haapao atoa hoi i to ratou mau hinaaro. I to ˈna aˈe pae, e rave te metua vahine i te mau faaotiraa no nia i te maa e te tahi atu ohipa no nia i te utuafare (Maseli 31:11, 27). Ia paari ratou, e faatiahia te mau tamarii ia rave i te tahi mau faaotiraa no nia i ta ratou mau faaanaanataeraa e te mau ahu aore ra te tahi mau taoˈa ta ratou e au. E ara râ te mau metua ia au maite te mau faaotiraa a ta ratou mau tamarii, i te mau faaueraa tumu maitai, ia ore te reira ia faaino atu ia ratou aore ra ia haapeapea ˈtu ia vetahi ê. Ia na reira te mau metua, e haapii mǎrû noa ïa ratou i ta ratou mau tamarii nafea râ ia rave i te mau opuaraa.
E TE MAU METUA, MEA OHIE ANEI IA FAATURA IA OUTOU?
24. I te mea e e tia i te mau tamarii ia faatura i to ratou metua tane e to ratou metua vahine, eaha ˈtura ïa te hopoia i nia i te mau metua?
24 Teie te parauhia ra i te mau tamarii: “E faatura ˈtu i to metua tane e to metua vahine.” (Ephesia 6:2; Exodo 20:12). Ia auraro ratou i teie faaueraa ra, te faatura atoa ˈtura ïa ratou i te Atua. Te rave ra anei outou e ia ohie ratou i te na reira? Te anihia ra i te vahine ia auraro e ia faatura i ta ˈna tane. E ere anei te reira i te mea fifi no ˈna mai te peu e eita te tane e rave i te mau tutavaraa no te faaau ia ˈna iho i ta te Parau a te Atua e faaue maira ia ˈna ia rave? I to ˈna aˈe pae, e tia i te tane ia here e ia faatura i ta ˈna vahine, ma te faariroraa ˈtu ia ˈna ei hoa here mau no ˈna. E ere anei râ i te mea fifi mai te peu e eita o ˈna e hinaaro e rave i ta ˈna tuhaa? A tauturu atu i ta outou mau tamarii ia auraro i te faaueraa a te Atua e titau ra ia ratou ia faatura ia outou, o outou, to ratou mau metua. No reira, ia noaa mai ia outou i to ratou faatura ma te raveraa ia ora ratou i roto i te hoê utuafare hau e tei faaterehia na roto i te mau faaueraa tumu maitai i reira ratou e hiˈo ai i to outou haerea nehenehe, e haapiihia ˈi e e aˈohia ˈi no to ratou maitai, e i reira ratou e faautuahia ˈi i te tahi taime ma te here.
25. Eaha te mau fifi e nehenehe e tupu ia ore te mau metua e afaro i nia i te huru raveraa i ta raua tamarii?
25 Teie ta te arii ra o Solomona i parau: “E maitai te taata toopiti i te taata hoê; no te mea e utua maitai ta raua i ta raua ohipa.” (Koheleta 4:9). Ia haere e piti na taata e ia topa te tahi, e nehenehe te tahi e turu i tei topa. Oia atoa, i roto i te utuafare fetii, e nehenehe te tane e te vahine e turu e e faaitoito te tahi e te tahi i roto i to raua tiaraa. I te mea e au maite taua nau tiaraa nei i roto e rave rahi mau tuhaa, e rahi roa ˈtu ïa te autahoêraa fetii i te etaeta. E tia i te mau tamarii ia haafatata i te mau metua ma te tahoê ia raua ia haapii raua ia ratou. Teie râ, e tupu mai te fifi ia ore na taata faaipoipo e afaro i nia i te huru raveraa e te huru aˈoraa i te tamarii. I te tahi taime, e aupuru rahi roa te metua vahine i ta ˈna tamarii e inaha, e manaˈo atura ïa te tane e te tuuhia ra oia i te hiti e e inoino roa oia. E faaite mai paha oia i teie huru i nia i te tamarii: eita oia e haafatata ˈtu ia ˈna aore ra, i te tahi aˈe pae, e here rahi oia ia ˈna, ma te ore râ e haapao faahou atu i ta ˈna vahine. Ia faaite te hoê tane, aore ra te hoê vahine, i teie huru aifaito ore, e nehenehe te fifi ino roa e tupu mai.
26. Ia fanauhia mai te hoê tamarii apî e tia hoi i te metua vahine ia haapao rahi roa ˈtu, eaha te tia ia rave ia ore te matahiapo ia pohe hae mai?
26 E nehenehe te hoê fifi ê atu e tupu mai ia fanauhia mai te piti o te tamarii. E riro iho â ïa te metua vahine i te haapao rahi i te aiû fanau apî. Ia ore te tamarii matahiapo ia manaˈo e te tuuhia ra oia i te hiti e ia pohe hae roa, e ara ïa te metua tane i te haapao hau atu â ia ˈna.
27. Mai te peu e aita te hoê o na hoa faaipoipo to roto i te parau mau, nafea te hoa kerisetiano e nehenehe ai e tauturu i ta ˈna mau tamarii i te pae varua?
27 Parau mau, mea maitai aˈe te taata toopiti i te taata hoê, mea maitai aˈe râ te taata hoê i te aore roa ˈtu. No te tahi mau huru tupuraa, e tia i te metua vahine, i te tahi taime, ia faaamu i ta ˈna mau tamarii o ˈna anaˈe iho, aore ra te metua tane ia na reira. E rave rahi mau utuafare fetii tei amahamaha i te pae faaroo i te mea e, hoê anaˈe o na hoa faaipoipo tei riro ei tavini no te Atua ra o Iehova o te tuu i to ˈna tiaturi i roto i te mau aˈoraa a te Bibilia. Mai te peu e o te tane te kerisetiano, ia au i to ˈna tiaraa upoo no te utuafare, na ˈna iho â ïa e faatere i te haapiiraa e e aˈo i te mau tamarii. E titauhia râ i te faaoromai rahi, te hitahita ore e te itoito. E tia ia ˈna ia faaite i te hoê tiaraa paari i nia i te mau tumu parau faufaa, ma te faaite atoa i te aifaito e te maitai noa ˈtu e e faainohia mai oia, e oia atoa i te mǎrû i te mau taime atoa e nehenehe ai oia e na reira. Mai te peu e o te vahine te kerisetiano, o te tia hoi ia auraro atu i ta ˈna tane, e faaau oia i to ˈna haerea i te huru o ta ˈna tane. Aita noa anei o ˈna e tâuˈa i te Bibilia, aore ra aita o ˈna e hinaaro ra ia faaohipa ta ˈna vahine i te kerisetianoraa e ia haapii i te reira i ta ˈna mau tamarii? I roto i te piti o te tupuraa, e tia ia ˈna ia pee i te haerea i faataahia mai e te aposetolo Petero, oia hoi te haapao-maitai-raa i ta ˈna hopoia vahine e te faaturaraa ˈtu i ta ˈna tane, ia ‘noaa mai ta ˈna tane eiaha ˈtu â te parau’. E faaohipa atoa oia i te mau ravea atoa no te haapii i te mau faaueraa tumu bibilia i ta ˈna mau tamarii. — Petero 1, 3:1-4.
TE HURU I ROTO I TE UTUAFARE FETII
28, 29. Eaha te huru te tia ia itehia i roto i te utuafare, e no te aha?
28 E tia i te metua tane e i te metua vahine atoa hoi, ia faatupu i te here i roto i te utuafare fetii. Ia nehenehe raua e na reira, eita te mau tamarii e huna i to ratou mau feaaraa e to ratou mau hape. Eita ratou e mǎtaˈu i te faataa ˈtu te reira ia raua, no te mea ua ite ratou e e nehenehe ta ratou e aparau atu ia raua, e e taahia mai to ratou manaˈo e e haapao mai to raua metua i to ratou mau fifi ma te maitai (a faaau e te Ioane 1, 4:17-19; Hebera 4:15, 16). I reira, eita noa te utuafare e riro ei fare no ratou, ei haapûraa atoa râ i reira te here o te metua tane e o te metua vahine e ohipa mai ai no te maitai e te tupu-maitai-raa o te huru o te tamarii.
29 Eita ta outou e nehenehe e tuu atu i te rimu i roto i te vinega e a tiai noa ˈtu ai e ia î roa i te pape. E î noa hoi oia i te pape i reira oia i te tuuraahia. E mau roa atoa hoi te huru o te utuafare fetii i nia i te mau tamarii. E ohipa te huru feruriraa o te feia e haaati ia ratou, i nia ratou, e hiˈopoa ratou i te mau mea e tupu ra i te utuafare e, mai te rimu ra te huru, e î roa ˈtu ai ratou i te reira. E ite iho â te mau tamarii mai te peu e te riri noa ra outou aore ra te vai hau ra outou. I te mea e e ohipa atoa te huru o te utuafare fetii i nia i te mau pepe aruaru, e riro te hoê utuafare i reira e itehia ˈi te faaroo, te here, te puai i te pae varua e te tiaturi i te Atua ra o Iehova, ei taoˈa faufaa eita e nehenehe e faaauhia.
30. Eaha te mau uiraa ta te mau metua e nehenehe e ui no te ite e te rave maitai ra anei ratou i ta ratou mau tamarii?
30 A feruri na i nia i teie mau uiraa: Eaha te huru haerea ta outou e hinaaro i ta outou tamarii ia rave mai? Tera atoa anei te huru haerea ta outou e apee ra? Eaha te mau mea ta te utuafare e haafaufaa nei? Eaha te hiˈoraa ta outou e horoa ˈtura i ta outou tamarii? Te amuamu noa ra anei outou aore ra te faaino noa ra anei outou ia vetahi ê e te na nia iho noa ra anei outou i te faahiti i te mau manaˈo ino? Tera anei te huru haerea ta outou e hinaaro i ta outou tamarii ia rave atoa mai? Area ra, te pee ra anei outou i te mau faaueraa tumu maitatai roa no ta outou utuafare? Te pee ra anei outou iho i taua mau faaeuraa tumu nei e te haapii ra anei outou i ta outou mau tamarii? Te taa ra anei ia ratou e, no te ati maite mai i roto i te hoê utuafare, e tia ia ratou ia haapao i te tahi mau titauraa, e e mea tano teie huru raveraa, area teie mau ohipa aore ra tera mau haerea, e ere ïa i te mea maitai? E hinaaro te mau tamarii ia aupuruhia ratou, e e ite hoi ratou i te reira mai te peu e ua taa ia ratou e e fatu to ratou. A haapapu atu ia ratou e te faatia ra outou i to ratou haerea e te farii ra outou ia ratou, ia pee maite ratou i te mau faaueraa tumu e faatere ra i te utuafare. Mea pinepine te mau taata i te pee i te mau mea e titauhia ra ia ratou. Mai te peu e e manaˈo haafaufaa ore to outou i ta outou tamarii, e rave paha ïa oia ia tano outou. A tiaturi atu na ia ˈna, a faaitoito atu ia ˈna, e oaoa outou ia ˈna.
31. E tia ia niuhia te mau parau a te mau metua i nia i te aha?
31 E pinepine te taata i te hiˈopoahia ia au i ta ratou ohipa e rave eiaha râ ia au i te mau parau ta ratou e faahiti. Oia atoa, mea haapao aˈe na te mau tamarii i te mau ohipa i te mau parau e e oioi noa ratou i te ite i te haavare. E nehenehe te tahi mau parau roa roa e faahuru ê i te tamarii; ia haapao na outou e te pee mau ra anei outou iho i te mau aˈoraa ta outou e horoa ˈtura. — Ioane 1, 3:18.
32. E tia ia pee i te mau aˈoraa a vai?
32 Noa ˈtu e e metua tane outou aore ra e metua vahine, e tiaraa fifi mau â to outou. E nehenehe râ outou e faatupu i te reira e e ite mai i te mau faahopearaa maitai ia pee outou i te mau aˈoraa a te Tumu no te ora. A haapao maite i to outou tiaraa mai te huru ra e na ˈna teie ohipa ta outou e rave ra (Kolosa 3:17). Eiaha outou e faaite i te aifaito ore, “ia itea to outou mǎrû e te taata atoa ra”, e oia hoi e ta outou mau tamarii. — Philipi 4:5.
[Uiraa haapiiraa]
[Hohoˈa i te api 100]
I te hiˈo-noa-raa ˈtu oia ia ˈna, i te tapearaa ˈtu ia ˈna e i to ˈna noa reo, te hoê metua-vahine e haapapu atu ai i ta ˈna aiû e mea here mau na ˈna ia ˈna mai te huru ra ïa e te parau atura oia e “Mea here roa na ˈu ia oe”.
[Hohoˈa i te api 104]
Te faataa ra anei outou i te tahi taime faaanaanataeraa e ta outou mau tamarii?
