Pene 2

A faahanahana ia Iehova, te Atua mau

1. a) O vai mau na te Atua mau? b) E ohipa te mau mea atoa ta tatou e haapii no nia ia ˈna i nia i to tatou oraraa, i roto i tei hea auraa?

 I TO ˈNA mau taeae kerisetiano, ua papai atura Paulo e, mai te peu e e rave rahi tei faahua atua, “hoê roa ïa Atua, o te Metua (...); hoê hoi Fatu o Iesu Mesia”. (Kor. 1, 8:5, 6.) Te “[Atua hoê roa]” ta Paulo e faahiti ra o Iehova ïa, Tei Poiete i te mau mea atoa (Deut. 6:4; Apo. 4:11). No to ratou mauruuru i te iteraa ratou i to ˈna mau huru e te mau mea atoa ta ˈna i rave no te huitaata nei, te mau tane e te mau vahine e haere ai ia ˈna ra. Eaha ihora ïa te faahopearaa? E hinaaro iho â ïa ratou e faahanahana i te Atua o ta ratou e haafaahiahia nei, e te reira na roto i ta ratou parau e ta ratou ohipa. A rahi noa ˈtu ai to ratou here i te Atua, e hinaaro iho â ïa ratou e paraparau no ˈna i te tahi atu mau taata e e apee i to ˈna huru ma to ratou puai atoa. Te faaitoito maira hoi te Bibilia ia tatou paatoa i te na ôraa mai e: “E teie nei, ei pee outou i te Atua mai te tamarii herehia ra; ei haerea aroha to outou.” (Eph. 5:1, 2). No te apee i taua aˈoraa nei, e tia ia tatou ia ite e o vai mau na te Atua.

Te huru o Iehova

2. Eaha te tahi mau huru faahiahia o te Atua o te turai ia tatou ia faahanahana ia ˈna?

² I roto i te mau api o te Bibilia, e ite tatou e rave rahi mau parau o te faaite mai ia tatou i te mau huru faahiahia o te Atua. Ia taio outou, a rave na i te taime no te feruri i nia i taua mau huru ra, ia nehenehe outou ia faaoti eaha mau na to ratou auraa e to ratou faufaaraa  no outou. Ei hiˈoraa, “E aroha hoi te Atua”. (Ioane 1, 4:8.) “[E parau-tia to ˈna atoa mau haerea.]” (Deut. 32:4). ‘Tei ia ˈna hoi te paari.’ (Ioba 12:13). “No to ˈna ra puai rahi”. (Isa. 40:26.) Ia feruri hohonu outou i nia i taua mau atiributi ra o te Atua, no to outou faahiahia ia ˈna, e turai anei ïa te reira ia outou ia arue ia ˈna?

3. Eaha ˈtu â te tahi atu mau huru o Iehova tei riro ei mau huru faufaa mau?

³ E faarahi atu â te Bibilia i to tatou ite i te huru faahiahia o Iehova ia parau mai oia e “e Atua aroha noa [oia], e te hamani maitai rahi, e te faaoromai rahi, e te maitai rahi”. (Ex. 34:6.) “Te maitai ra hoi oe, e te Fatu [Iehova], e ua tia ia oe i te faaore mai i te hara nei.” (Sal. 86:5). “Te hiˈo nei te mata o Iehova i to te ao atoa nei, ia horoa mai oia i te etaeta i te feia i tia i te aau ia ˈna.” (Par. 2, 16:9). “E ore te Atua e haapao i te huru o te taata. O tei mǎtaˈu râ ia ˈna, e o tei rave i te parau-tia i te mau fenua atoa ra, o te itehia mai ïa e ana.” (Ohi. 10:34, 35). E “horoa hua mai” Iehova “i te maitai i te taata atoa ra” e “[e Atua oaoa]” oia. (Iak. 1:5; Tim. 1, 1:11.) E mea oaoa mau ia tavini i teie Atua faito ore e ia riro ei tumu no to ˈna haapao maitai tei î hoi i te aroha!

4. a) Eaha te huru haamoriraa ta Iehova e titau maira, e no te aha e riro ai ei mea faufaa roa? b) Eaha ta te Salamo 34:3 e titau maira ia tatou?

⁴ A vai noa mai ai i roto ia ˈna taua mau hotu ra, ua riro atoa o Iehova “ei Atua [o te titau e ia haamorihia oia anaˈe ra]”. (Ex. 20:5.) Ia tia ta tatou taviniraa ia ˈna, ia haamori ïa tatou ia ˈna anaˈe ra e tia ˈi. Eita ta tatou e nehenehe e here i te ao o Satani te atua, e e here atoa ia ˈna (Ioane 1, 2:15-17; Kor. 2, 4:3, 4). Mai te peu e e faahua faaohipa te hoê taata i te parau-tia, e ite mai Iehova i te reira. Ua ite maitai o ˈna eaha ta tatou e rave ra, e eaha atoa to tatou manaˈo e eaha te huru taata ta tatou e titau ra ia riro tatou. Mai te peu e mea here mau na tatou te parau-tia, e tauturu mai oia ia tatou (Ier. 17:10; Mas. 15:9). No te mea hoi e mai te reira te huru o Iehova, ua farii e rave rahi mirioni tane e vahine i roto  i te ao taatoa nei ma te oaoa i taua titauraa nei ta te papai salamo i parau i te na ôraa mai e: “E haamaitai tatou ia Iehova; tatou atoa te faateitei i to ˈna iˈoa.” (Sal. 34:3). Ua pahono anei outou i taua titauraa nei?

5. Na te aha e tauturu ia tatou ia fanaˈo roa i ta tatou tuatapapa-hohonu-raa no nia i te huru o Iehova?

⁵ E rahi atu â to outou hinaaro e paraparau no nia i te Atua e e ohie noa atoa hoi outou i te pee i to ˈna huru ia feruri maite outou i nia i to ˈna mau huru faahiahia mau. 1) A imi i te auraa mau o to ˈna mau huru tataitahi ia ite outou e eaha te taa-ê-raa e vai ra i roto i tera e tera huru. 2) A hiˈo mea nafea to Iehova faaohiparaa i taua huru ra e i nia ia vai. 3) A aniani ia outou iho e nafea outou iho e nehenehe ai e faaohipa i taua huru ra aore ra nafea te reira ia ohipa i nia i ta outou huru hiˈoraa i te mau mea.

6. Ia hiˈopoa outou i te huru o te aroha, a faaite mai e nafea outou e nehenehe ai e feruri i nia i te mau huru o Iehova. No te reira, a pahono mai i te mau uiraa i faaitehia ˈtu i te hopearaa o te paratarapha ma te faaohipa i te mau irava i horoahia ˈtu ei faahororaa.

⁶ E rave anaˈe na hoê noa hiˈoraa. Ia parau te Bibilia e “E aroha te Atua”, eaha ïa te auraa (Ioane 1, 4:8)? E rave rahi iho â ïa huru aroha. I roto i teie nei irava, te parau heleni i faaohipahia o agapê ïa, oia hoi te huru aroha teitei roa ˈˈe, ta Iehova iho i faaite ma te tia roa. Te auraa no taua aroha ra o te horoa-roa-raa ïa. A tapea te reira i roto i to outou feruriraa e a pahono mai i te mau uiraa i raro nei ma te faaohipa i te mau irava i horoahia ˈtu ei faahororaa.

 Nafea taua huru ra ia ite-papu-hia i roto i te mau mea ta Iehova i poiete (Ohi. 14:16, 17)?

 Eaha te ohipa faahiahia roa ˈˈe o te here o Iehova no te huitaata nei (Ioane 3:16)? Ua na reira anei Iehova no te maitai o te taata (Roma 5:8)?

 Te ohipa ta Iehova i rave na roto i te arai o ta ˈna Tamaiti, eaha ïa ta te reira e faatupu i roto i to tatou oraraa (Kor. 2, 5:14, 15, 18, 19)?

 Nafea tatou e nehenehe ai, ma to tatou tiaraa kerisetiano,  e faaite i taua huru aroha ra i nia i to tatou mau taeae (Kor. 1, 13:4-7; Ioane 1, 4:10, 11; 3:16-18)?

 E faaite â tatou i taua huru here nei ia vai, e nafea (Mat. 5:43-48; 28:19, 20; Gal. 6:10)?

7. Nafea outou e nehenehe ai, i roto i ta outou haapiiraa tataitahi, e ite i te mau manaˈo mai te reira no nia i te tahi atu mau huru o Iehova?

⁷ E hinaaro anei outou e na reira â i te tuatapapa i te tahi atu mau huru o Iehova? I roto i ta outou haapiiraa tataitahi, no te aha ïa e ore ai e haamata na nia i te “parau-tia” e te “paari”, e i muri iho “te maitai o te mafatu” e te “aroha faito ore”? Ma te faaohipa i te mau index (buka faahororaa o te mau vea aore ra buka tei neneihia e te Taiete Watch Tower) e te hoê buka faahororaa no nia i te Bibilia, e ite ïa outou e rave rahi mau manaˈo faahiahia mau e faufaahia ˈi outou.

A tauturu ia vetahi ê ia ite atoa ratou i te parau mau no nia i te Atua

8. a) Eaha te mau huru atua ta teie nei ao e haamori nei? b) O vai to muri mai i taua arepurepuraa ra, e no te aha outou e pahono mai ai mai te reira te huru?

⁸ E rave rahi mau taata, o te ore e haamori i te Atua mau, teie e pûpû nei i te hoê haamoriraa no te mau mirioni atua ê atu. I te IVraa o te senekele, ua rave aˈera te amuiraa faaroo kerisetiano i te haapiiraa no nia i te “torutahi”, tei haapii-aˈena-hia hoi e to Babulonia, to Aiphiti, te mau hindous e te mau bouddhistes. Taa ê atu taua huru atua ra, te haamori nei te mau taata, mai te mau atua, i te mau hui mana puai, te feia e rave nei i te ohipa faaetaetaraa tino e te feia himene tuiroo. Ua riro atoa te moni, te haapaoraa ia ˈna iho e te melo taatiraa ei mau atua teie e haamori-rahi-hia nei. Teie râ, o vai to muri mai i taua mau mea ra, e ere anei ïa o “te atua o teie nei ao”, oia hoi o te Diabolo ra o Satani (Kor. 2, 4:4; Kor. 1, 10:20)? Na roto i te mau huru raveraa haavarevare atoa, te tamata nei oia i te haafariu ê i te mau taata ia Iehova aore ra i te faaamahamaha ia ratou i roto i ta ratou haamoriraa.

9. Eaha te ravea faahiahia roa ˈˈe no te tauturu i te hoê taata ia haapii i te parau mau no nia i te Atua?

 ⁹ Nafea tatou e nehenehe ai e tauturu i taua mau taata ra, e mau kerisetiano ratou aore ra eita, ia ite i te parau mau no nia i te Atua? Te hoê o te mau ravea faahiahia roa ˈˈe o te faaiteraa ˈtu ïa ia ratou ma te maitai, mea nafea te Bibilia iho i te faaiteraa mai i te Atua mau e te faataaraa mai i to ˈna huru. Ia apee-atoa-hia râ ta tatou mau parau e te hoê haerea o te haapapu mai i te mau huru o te Atua. — Pet. 1, 2:12.

10. Ia paraparau tatou e te hoê taata e turu ra i te haapiiraa no nia i te torutahi, no te aha e ere i te mea maitai ia faahua ite tatou i te mea o ta ˈna e tiaturi mau ra?

¹⁰ E nafea râ ïa outou ia patoi mai te hoê melo o te hoê Ekalesia o te amuiraa faaroo kerisetiano ia outou i te na ôraa mai e ua haapapuhia to ˈna tiaturiraa no nia i te “torutahi” e te Bibilia? Na mua ˈˈe, ia ite ïa outou e, mai te peu e ua haamau taua Ekalesia ra i te “torutahi” ei haapiiraa tumu, e rave rahi ïa mau taata te vai ra to ratou iho manaˈo no nia i taua tumu parau ra. A titau i taua taata ra ia faaite mai i to ˈna manaˈo, e i muri iho, a tauturu ia ˈna ia faaau te mea o ta ˈna e tiaturi ra e te mea ta ta ˈna iho Bibilia e parau ra. E i te taime mau ra, a faaitoito ia ˈna ia faaau i te haapiiraa tumu a ta ˈna Ekalesia e te Parau a te Atua.

11. A tuatapapa noa ˈi outou i na tumu parau tataitahi e pae, a rave i te mau uiraa e te mau irava bibilia i faaitehia ˈtu i roto i te paratarapha no te haapapu mai e e ere te haapiiraa no nia i te torutahi no roto mai i te Bibilia.

¹¹ Ma te tapea mai i roto i to tatou feruriraa i to tatou hinaaro e tauturu i te mau taata aau tae, a hiˈo nafea râ outou e nehenehe ai e feruri i nia i te mau manaˈo i raro nei ma te faaohipa i te mau irava e faaauhia ˈtu:

 1) Te parau nei te tahi mau taata e turu ra i te haapiiraa no nia i te torutahi e te vai ra e toru huru atua (te Metua, te Tamaiti e te Varua Maitai) hoê anaˈe râ Atua.

 Te faaite ra anei te Ohipa 2:4, 17 e e taata te “Varua Maitai” aore ra te varua moˈa?

 No te aha e mea faufaa roa ia tapao mai e e hia rahiraa  taata te faahitihia ra te parau i roto i te mau irava i muri nei (Ioane 17:20-22; Ohi. 7:56; Apo. 7:10)?

 2) Te tiaturi nei vetahi pae e hoê â hanahana to te mau melo o te “torutahi”, hoê â to ratou faito, hoê â puai to ratou e e mea mure ore anaˈe ratou.

 Te haapapu maira anei te mau Papai i te reira (no te pahonoraa, a hiˈo i te Ioane 14:28; Mataio 24:36; Apokalupo 3:14)?

 3) Te faahiti nei te tahi pae i te Ioane 1:1 no te haapapu e mea tano iho â te haapiiraa no nia i te “torutahi” e te haapapu nei ratou e e tia ia hurihia taua irava nei mai teie te huru: “O te Atua te Logo”, eiaha râ e “atua” te Logo.

 E hia râ rahiraa taata teie e faahitihia ra i roto i te Ioane 1:1? E toru aore ra e piti? I te tahi aˈe pae, no te aha ïa te Ioane 1:18 e patoi ai i te haapiiraa no nia i te “torutahi”?

 I roto i te huriraa heleni, aita te faataa parau ra i mua i te parau i hurihia na roto i te parau ra “Atua” aore ra “atua”, ahiri aita ra e parauhia: “te Atua”. I te mea hoi e aita to taua iˈoa ra te faataa parau ra, e ateributi ïa oia, mai i roto i te Ohipa 28:6. (No reira, i roto i te huriraa a te Bible du Centenaire, teie ta tatou e taio i roto i te Ioane 1:1: “E atua hoi te Logo”, oia hoi te auraa e mau huru atua to ˈna mai te Atua teitei ra.)

 4) Te parau atoa nei te feia e turu ra i te haapiiraa no nia i te “torutahi” e i roto i te Genese 1:1, 26, te parau hebera i hurihia na roto i te parau ra “Atua” o “Elohim” ïa oia hoi te auraa “mea rahi te Atua”.

 No te aha aita te reira e turu ra i te haapiiraa e parau ra e te vai ra e toru atua i roto i “[te hoê anaˈe ra Atua]”?

 Mai te peu e te turu ra te Genese 1:1 i te hoê “torutahi”, eaha ïa te tia ia parauhia no te Mau Tavana 16:23, ua hurihia hoi te parau ra élohim i reira na roto i te parau ra “atua” e te ihoparau haa hebera ra i roto i te huru otahi eiaha râ otini (mea rahi)?

 No te aha ïa te huru otini o te parau hebera i hurihia na roto i te parau ra Atua i faaohipahia ˈi i roto i taua  mau irava ra? No te mau ati Hebera, ei haapapuraa mai ïa i te hanahana aore ra i te teitei. Ahiri e te hinaaro ra taua parau e haapapu mai i te parau no e rave rahi otini ra taata, e haapapu atoa mai ïa te mau ihoparau i te reira, e ere râ hoi te reira tei faaitehia i roto i te mau irava i faahitihia ˈtu.

 5) I te mea hoi e ua faahanahana rahi te mau Ekalesia ia Iesu (e ua iritihia te iˈoa o Iehova i roto e rave rahi mau tatararaa o te Bibilia), e manaˈo iho â ïa vetahi mau taata ia Iesu anaˈe ra ia parauhia no nia i te Atua.

 Eaha râ te hiˈoraa ta Iesu i horoa mai no nia i te haamoriraa (Luka 4:8)?

12. No te aha e mea tano mau â ia parau atu Iesu i to ˈna Metua mai “te Atua [hoê] mau ra”?

¹² Noa ˈtu â ïa e i roto i te mau Papai e parauhia e “e atua” o Iesu, aore ra “e Atua puai”, ua faahanahana râ oia i to ˈna Metua ma te parau e “tau Atua ra e to outou Atua”. (Ioane 1:1; 20:17; Isa. 9:6.) Hoê â to ˈna manaˈo e to Mose tei parau na e: “O Iehova anaˈe ra te Atua; e aita ˈtu.” (Deut. 4:35). Auê ïa taa-ê-raa i rotopu ia Iehova e te tahi atu mau “atua” ta te mau taata e haamori nei, mai te mau idolo, te mau taata tei faarirohia ei atua e te Diabolo ra o Satani! Mai ta Iesu i parau, o Iehova anaˈe “te Atua [hoê] mau ra”. — Ioane 17:3.

‘E haere anaˈe na ma te iˈoa o Iehova’

13, 14. Eaha mau na te auraa te parau ra “ite” ia Iehova e ‘haere ma te iˈoa o Iehova’?

¹³ I muri aˈe i to ratou vai-maoro-noa-raa i roto i te feaaraa no nia i te huru mau o te Atua, e rave rahi mau taata tei oaoa roa i to ratou ite-matamua-raa i te iˈoa iho o te Atua, oia hoi o Iehova, i roto i ta ratou Bibilia (Ex. 6:3). E fanaˈo maoro atu râ ratou i taua mau haamaitairaa ra ia ‘haere ratou ma te iˈoa o Iehova e a muri noa ˈtu’. (Mika 4:5.) Mea faufaa roa ˈtu â te reira i te ite-noa-raa i te iˈoa iho o Iehova aore ra i te parauraa e e Ite o Iehova tatou.

¹⁴ Ma te faaite mai i te faufaaraa o te iˈoa o te Atua, teie ta te Salamo 9:10 e parau ra: “Te feia i ite i to oe ra iˈoa, e tiaturi ïa ia oe; (...) e Iehova.” Eaha ïa te auraa  o te reira? Hau atu ïa i te ite-noa-raa i to ˈna iˈoa, no te mea e nehenehe tatou e ite i te reira ma te ore roa ˈtu e tiaturi ia Iehova. “Ite” i te iˈoa o te Atua oia ïa te auraa ia papu maitai tatou eaha te huru o te Atua ra o Iehova, te faaturaraa i to ˈna mana e te auraroraa i ta ˈna mau faaueraa. Oia atoa, ‘haere ma te iˈoa o Iehova’ oia ïa te auraa te pûpûraa ˈtu ia tatou no ˈna, te tiaraa ˈtu no ˈna ei taata haamori no ˈna e te ora-mau-raa ia au i to ˈna hinaaro (Luka 10:27). Te na reira ra anei outou?

15. Mai te peu e e hinaaro tatou e tavini ia Iehova e a muri noa ˈtu, eaha te mea e titauhia hau atu i te faaohipa-noa-raa?

¹⁵ Mai te peu e e hinaaro tatou e tavini ia Iehova e a muri noa ˈtu, eiaha noa ïa e no te mea e e tia ia tatou ia na reira. Teie te aˈoraa a te aposetolo Paulo ia Timoteo, tei tavini na ia Iehova e rave rahi atura matahiti: “E haamataro hua râ oe i te paieti.” (Tim. 1, 4:7). No roto roa mai te huru paieti, oia hoi te haamori-mau-raa i te Atua, i te mafatu. No roto mai oia i to tatou mauruuru ia ˈna. Te “paieti” oia atoa ïa te faatura-hohonu-raa ia Iehova. E itehia oia na roto i te hoê huru aroha no roto mai i te hoê manaˈo mauruuru hohonu i te Atua e i ta ˈna mau ohipa i rave. E no taua “paieti” ra tatou e hinaaro ai e ia faatura-rahi-hia to ˈna iˈoa e te taatoaraa. Mai te peu e hinaaro tatou e haere ma te iˈoa o Iehova, te Atua mau ra, e a muri noa ˈtu, e tia ia tatou ia faaohipa i te “paieti”, e e faariro i te reira ei tumu mau no to tatou oraraa. — Sal. 37:4; Pet. 2, 3:11.

Ei haapoto-noa-raa

● Mai tei hea huru Atua o Iehova? Eaha te mau haamaitairaa e nehenehe e noaa mai i te iteraa tatou i to ˈna mau huru tataitahi?

● Nafea tatou e nehenehe ai e tauturu i te tahi atu mau taata ia haapii i te parau mau no nia i te Atua?

● Eaha te auraa o te parau ra “ite” ia Iehova e ‘haere ma to ˈna iˈoa’?

[Uiraa haapiiraa]