Pene 22

A tamau â i te faaite i te Parau a te Atua ma te itoito

1. a) Eaha te parau apî maitai ta te mau pǐpǐ a Iesu i poro haere i te mahana Penetekose i te matahiti 33, teie râ eaha te huru o te mau upoo faatere e te mau matahiapo i rotopu i te mau ati Iuda? b) Eaha te mau uiraa ta tatou e nehenehe e uiui no taua ohipa ra?

 HAU ATU i te 4 000 matahiti o te aamu o te huitaata nei, aitâ i itehia aˈenei te mau tupuraa faahiahia mai tei tupu aˈenei. Iesu Mesia, te Tamaiti iho a te Atua, tei faatavaihia no te riro mai ei Arii no te fenua atoa nei. Noa ˈtu â ïa e ua taparahihia oia na nia i te faaueraa a to ˈna mau enemi i te pae faaroo, ua faatia maira Iehova ia ˈna mai te pohe mai. Na roto ia ˈna, e nehenehe ai e tupu te ora e tae roa ˈtu i te oraraa e a muri noa ˈtu. Teie râ, i te pororaa te mau pǐpǐ haapao maitai a Iesu i taua parau apî maitai ra, ua farerei atu ïa ratou i te hoê patoiraa uˈana. Tapeahia ˈtura e piti aposetolo na mua, e i muri iho ua tapea-pauroa-hia ˈtura ratou i te fare auri. Ua tairihia ratou, ua faauehia mai ratou e eiaha e parau faahou i te taata na nia i te iˈoa o Iesu (Ohipa 4:1-3, 17; 5:17, 18, 40). Eaha ïa ta ratou ohipa i rave? Ahiri e o outou tera, eaha ïa ta outou ohipa e rave? E tamau noa anei outou i te poro ma te itoito?

2. a) Eaha te parau apî faahiahia ˈtu â te tia ia haapararehia i teie mahana? b) Na vai ïa e haaparare i taua ohipa ra?

² I te matahiti 1914, ua tupu faahou â te hoê ohipa faahiahia roa ˈtu. I taua taime ra hoi te Basileia o te Atua tei haamanahia i nia i te raˈi i te horoaraahia atu ia Iesu Mesia ra. I reira ïa o Satani e ta ˈna mau demoni i huriraahia mai i te fenua nei (Apo. 12:1-5, 7-12). Haamata ihora te mau mahana hopea o te amuiraa o te mau mea  ino. Na mua ˈˈe e mou roa ˈtu ai te ui i ite i te mau tupuraa o te matahiti 1914, e haamou te Atua i te amuiraa a Satani (Mat. 24:34). E horoahia ïa na te feia o tei ora mai i te ora mure ore. Ia au i te opuaraa tumu a te Atua, e riro mai te fenua taatoa ei paradaiso. Mai te peu e, e ua mau papu outou i taua parau apî maitai ra, ia papu atoa ïa ia outou e e hopoia na outou i te faaiteraa ˈtu i te reira i to outou mau taata-tupu (Mat. 24:14). Eaha râ te mea o ta outou e ite atu?

3. a) Eaha te huru o te taata i mua i te parau no te Basileia? b) Eaha te uiraa te tia ia tatou ia pahono?

³ E farii maitai mai paha te tahi mau taata ia outou no te mea e te poro ra outou i te Basileia. Area te rahiraa o te taata ra eita ïa ratou e tâuˈa mai (Mat. 24:37-39). E faaooo mai paha te tahi pae ia outou aore ra e patoi etaeta mai. Mai ta Iesu iho hoi i faaite mai, e riro atoa to outou iho fetii i te patoi mai ia outou (Luka 21:16-19). E nehenehe atoa outou e farerei i te reira i te vahi raveraa ohipa aore ra i te fare haapiiraa. I roto e rave rahi mau fenua, ua opani te faatereraa ma te tia ore i te mau ohipa a te mau Ite o Iehova. Mai te peu e noa ˈtu e e faaruru atu outou i te hoê o taua mau huru patoiraa ra, aore ra te taatoaraa, e tamau noa anei outou i te faaite i te Parau a te Atua ma te itoito?

4. E navai noa anei ia opua noa no te tamau â i te tavini i te Atua ma te haapao maitai?

⁴ Aita ïa e feaaraa e te hinaaro mau nei outou e riro mai ei tavini itoito no te Atua. Teie râ, ua faarue te tahi mau taata tei manaˈo e e nehenehe ta ratou e faaruru i te mau tamataraa atoa i te pǔpǔ o te feia poro o te Basileia. Te tahi mau kerisetiano, mea mamahu roa ratou, teie râ aita ratou i faaea i te tavini i te Atua ma te itoito. Nafea outou ia faaite e tei roto atoa outou i te feia o te “mau papu nei i te faaroo”? — Kor. 1, 16:13.

Eiaha tatou e tiaturi i nia i to tatou iho puai

5. a) Eaha te titauraa tumu ta tatou e tia ia rave no te riro mai ei tavini haapao maitai no te Atua? b) No te aha e mea faufaa mau te mau putuputuraa?

⁵ E tia mau â ia tatou ia faaohipa e rave rahi mau titauraa no te riro mai ei tavini haapao maitai no te Atua.  Teie râ, ua riro taua mau titauraa ra ei tumu hoê roa: oia hoi to tatou tiaturiraa ia Iehova e i ta ˈna opuaraa. Nafea tatou e nehenehe ai e faaite i taua huru tiaturiraa ra? E faaite aˈena ïa tatou i te reira na roto i te amuiraa mai i roto i te mau putuputuraa a te amuiraa. Te faaitoito mai nei te mau Papai ia tatou e eiaha e faarue i te reira (Heb. 10:23-25). Te mau Ite o Iehova tei tapea tamau noa ˈtu te huru tâuˈa ore a te feia e haaati ra ia ratou aore ra te mau hamani-ino-raa, te faaitoito noa nei ratou i te haere tamau atu i taua mau putuputuraa ra. Oia mau, e nehenehe taua mau putuputuraa ra e horoa mai i te ite hau atu no tatou, no nia i te mau Papai, e e ere râ na te hinaaro noa e haapii mai i te mau mea apî anaˈe i huti mai ia tatou (hiˈo Ohipa 17:21). Oia mau, e tauturu atoa mai te reira ia tatou ia haafaufaa i te parau mau o ta tatou hoi i ite aˈena e e haaputapû ia tatou no te faaohiparaa i te reira. Auaa taua mau putuputuraa ra i mau papu ai te hiˈoraa o Iesu i roto i to tatou feruriraa e i roto atoa i to tatou mafatu (Eph. 4:20-24). E haafatata atoa te mau putuputuraa ia tatou i to tatou mau taeae kerisetiano e e horoa atoa mai hoi i te puai o ta tatou e hinaaro ra no te haapao-tamau-raa i te hinaaro o te Atua. Taa ê atu i te reira, e aratai te varua o Iehova ia tatou na roto i te arai o ta ˈna amuiraa, e mea na roto i taua varua ra o Iesu e faaea mai ai i rotopu ia tatou ia putuputu anaˈe tatou ma to ˈna ra iˈoa. — Apo. 3:6; Mat. 18:20.

6. I te vahi e opanihia ˈi ta ratou pororaa, mea nafea te mau Ite o Iehova ia faatupu i ta ratou mau putuputuraa?

⁶ Te haere tamau ra anei outou i taua mau putuputuraa ra e te faaohipa ra anei outou i roto i to outou oraraa te mau mea atoa o ta outou i haapii mai? I te mau fenua e opani-etaeta-hia te mau Ite o Iehova, i te tahi taime e tia ia amuimuihia tau taata rii noa i roto i te mau fare. I roto i te reira tupuraa, e tauiui-pinepine-noa-hia ïa te vahi e te hora putuputuraa e e ere atoa hoi i te mea ohie. No reira, e tupu ïa te tahi mau putuputuraa i te maororaa po. Noa ˈtu â ïa te reira mau huru tupuraa e te mau fifi e nehenehe e tupu mai, e imi iho â te mau kerisetiano haapao maitai i te mau ravea atoa no te haere atu i te mau putuputuraa atoa.

7. a) Nafea tatou e nehenehe ai e faaite e te tiaturi ra tatou ia Iehova? b) Nafea te reira e nehenehe ai e tauturu mai ia tatou ia tamau noa i te faaite i te parau ma te itoito?

 ⁷ E faaite atoa tatou e te tiaturi mau ra tatou ia Iehova na roto i te pure tuutuu ore, eiaha no te mea e e peu matauhia te reira e tatou, no te haapapuraa râ e e te hinaaro mau ra tatou i ta ˈna tauturu. Te na reira ra anei outou? Ua pure Iesu e rave rahi taime i roto i ta ˈna taviniraa i te fenua nei (Luka 3:21; 6:12, 13; 9:18, 28; 11:1; 22:39-44). I te ahiahi na mua ˈˈe a tuuhia ˈtu ai oia i nia i te pou, ua faaue atu oia i ta ˈna mau pǐpǐ i te na ôraa e: “E ara e e pure hoi, ia ore outou ia roohia i te ati.” (Mareko 14:38). Mai te peu e e ite noa ˈtu tatou e e rave rahi te mau taata no to tatou nei tau aita e farii mai nei i te parau no te Basileia, eita paha e ore tatou i te manaˈo e e faaiti mai ta tatou taviniraa. Hau atu i te reira, mai te peu e e faaooohia mai tatou e te taata aore ra ia farerei tatou i te hoê hamani-ino-raa rahi mau, peneiaˈe paha tatou i te hinaaro eiaha e parau faahou no te aperaa i te mau fifi e tupu mai. Teie râ, mai te peu e pure tatou i te Atua ma te aau mehara ia horoa mai oia i to ˈna varua no te tauturu ia tatou ia tamau noa tatou i te parau ma te itoito, e paruru mai oia ia tatou eiaha ia topa i roto i taua tamataraa ra. — Luka 11:13; Eph. 6:18-20.

Te mau ite itoito

8. a) No te aha tatou e anaanatae ai i te buka a te mau Ohipa? b) A pahono i te mau uiraa i te hopea o te paratarapha e a faaite mai e no te aha teie mau haamaramaramaraa e riro ai ei mea faufaa no tatou?

⁸ Te anaanatae mau nei tatou iho i te aamu e vai ra i roto i te buka a te mau Ohipa. Inaha, te faatia ra oia e mea nafea te mau aposetolo e te mau pǐpǐ matamua, mai ia tatou atoa nei hoi te huru, i te faarururaa i te mau fifi e te faaiteraa e mea itoito iho â ratou e e mau Ite haapao maitai mau ratou no Iehova. Te titau atu nei matou ia outou ia hiˈopoa i te hoê tuhaa o taua aamu ra na roto i teie mau uiraa i muri nei e te mau irava bibilia i horoahia ˈtu ei faahororaa e na outou ïa e feruri e nafea outou iho e faufaahia ˈi i te mea o ta outou e taio ra.

 E aivanaa anei te mau aposetolo? E mau taata mǎtaˈu ore anei ratou, i te mau taime atoa (Ohipa 4:13; Ioane 18:17, 25-27; 20:19)?

  Na te aha i turai ia Petero ia faaite i te parau ma te itoito i mua i te tiribuna ati Iuda tei haapohe i te Tamaiti a te Atua tau hebedoma na mua ˈˈe (Ohipa 4:8; Mat. 10:19, 20)?

 I te mau hebedoma na mua ˈˈe a tia atu ai ratou i mua i te Sunederi, eaha ta te mau aposetolo i rave (Ohipa 1:14; 2:1, 42)?

 I to te mau aratai haapaoraa faaueraa mai ia raua e eiaha e poro faahou ma te iˈoa o Iesu, eaha ta Petero e ta Ioane i parau atu (Ohipa 4:19, 20)?

 I muri aˈe i to raua faaoraraahia, o vai ta raua i ani atu no te tauturu ia raua? Ua ani anei raua i te Atua ia faaorehia te hamani-ino-raa? Mai te peu e aita, eaha te ohipa ta raua i ani atu (Ohipa 4:24-31)?

 Mea nafea Iehova ia tauturu atu i to ˈna mau tavini ia tamata anaˈe to ratou mau enemi i te haafifi i te ohipa pororaa (Ohipa 5:17-20, 33-40)?

 Mea nafea to te mau aposetolo faaiteraa e e ua taa ia ratou te tumu i tuuhia mai ai ratou i rapae (Ohipa 5:21, 41, 42)?

 I te haaparareraahia te mau pǐpǐ e te hamani-ino-raa uˈana, eaha te ohipa ta ratou i tamau noa i te rave (Ohipa 8:3, 4; 11:19-21)?

9. a) Eaha te mau faahopearaa tiaturi-ore-hia tei noaa i te mau pǐpǐ matamua i roto i ta ratou taviniraa? b) No te aha tatou e anaanatae ai i ta ratou ohipa?

⁹ Aita ïa i vai moe noa te mau tutavaraa ta te mau pǐpǐ matamua i rave no te haaparareraa i te parau apî maitai. Tau 3 000 pǐpǐ tei bapetizohia i te mahana Penetekose i te matahiti 33. I muri aˈe i te reira, “te feia râ i faaroo i te Fatu ra, e rave rahi roa ˈtura ïa tei amui mai ia ratou ra, te tane e te vahine atoa hoi”. (Ohipa 2:41; 4:4; 5:14.) I muri iho, faaroohia ˈtura e ua riro o Saulo no Tareso te hoê o te mau taata hamani ino rahi, ei kerisetiano e te faaite ra oia i te parau mau ma te itoito. I muri aˈe matau-maitai-hia ˈtura oia i nia i te iˈoa o Paulo (Gal. 1:22-24). Aita taua ohipa ra i haamata i te senekele matamua, i oti. I teie “mau mahana hopea”, ua parare roa ïa taua ohipa ra e ua tae roa i te hopea mai o te fenua. No reira, ua riro atoa te reira ei hopoia na tatou, i te faaohiparaa i te reira, e nehenehe ta tatou e huti mai i te hiˈoraa i vaiihohia mai e te mau Ite haapao maitai tei tavini aˈena na mua ia tatou.

10. a) Eaha te mau taime ta Paulo i haafaufaa no te pororaa? b) Mea nafea outou ia faaite i te parau no te Basileia i to outou mau taata-tupu?

 ¹⁰ I to ˈna iteraa i te parau mau no nia ia Iesu Mesia, aita o Paulo i haamarirau. “Ua parau atura oia ia Iesu (...) faaite atura e o te Tamaiti ïa a te Atua.” (Ohipa 9:20). Ua mauruuru roa oia i te Atua i te faaiteraa mai ia ˈna i to ˈna maitai faito ore, i reira to ˈna iteraa e e hinaaro mau iho â to te ao atoa nei i te parau apî maitai tei noaa ia ˈna. No te mea hoi e e ati Iuda o ˈna, ua haere atu oia i roto i te sunago ia au i te peu o taua anotau ra, i te vahi e putuputu ai te mau taata no to ˈna nunaa, no te faaite atu ia ratou i te parau. Ua haere atoa oia e poro na tera e tera fare e ua haaferuri atoa oia i te mau taata i te vahi hooraa ra. Hau atu â i te reira, ua ineine atoa oia no te haere atu i roto i te mau tuhaa fenua apî no te poro i te parau apî maitai. — Ohipa 17:17; 20:20; Roma 15:23, 24.

11. a) A vai itoito noa ˈi oia, mea nafea to Paulo faaiteraa i to ˈna aravihi i roto i ta ˈna huru pororaa? b) Nafea tatou ia faaite hoê â huru maitai ia poro tatou i te mau melo o to tatou fetii, to tatou hoa rave ohipa aore ra to tatou mau hoa haapiiraa?

¹¹ A faaitoito noa ˈi oia, ua ite o Paulo i te faaite i to ˈna aravihi, e e tia atoa ia tatou ia na reira. Inaha, ia parau anaˈe o ˈna i te ati Iuda, e faahiti oia i te mau parau tǎpû ta te Atua i parau atu i to ratou mau tupuna. I mua i te mau taata Heleni, e parau ïa oia no nia i te mau mea o ta ratou i ite. I te tahi taime e faatia atoa oia e mea nafea to ˈna iho iteraa i te parau mau, ma te faaite atoa ˈtu i te parau. Te faataa ra o Paulo e: “No te evanelia i na reira ˈi au, ia noaa atoa ia ˈu i ta te evanelia ra.” — Kor. 1, 9:20-23; Ohipa 22:3-21.

12. a) Noa ˈtu to ˈna itoito, eaha ta Paulo i rave ia ore oia e turai i to ˈna mau enemi ia aro tamau noa mai ia ˈna? b) I tei hea huru tupuraa tatou e pee ai i to ˈna hiˈoraa, e nafea? c) No hea mai te puai e faaitoito mai ia tatou ia tamau noa i te faaite i te parau ma te itoito?

¹² Ia farerei anaˈe te parau apî maitai i te mau patoiraa, e riro ïa i te mea maitai aˈe ia haere atu i te tahi vahi ê e poro ai aore ra e haere atu maa taime iti i roto i te tahi mau tuhaa fenua taa ê, aita o Paulo i haamarirau i te na reira. Aita oia i turai i te mau enemi o te parau mau ia aro mai ma te tuutuu ore (Ohipa 14:5-7; 18:5-7; Roma  12:18). Teie râ, aita roa ˈtu oia i haama noa ˈˈe i te parau apî maitai (Roma 1:16). Ma te papu maitai, aita roa ˈtu o Paulo i oaoa i te faaoromairaa i te parau ino, e tae noa ˈtu i te hamani-ino-raa a to ˈna mau enemi, tera râ ‘ua noaa ia ˈna te itoito maoti to ˈna Atua’ no te tamau-noa-raa i te poro. Noa ˈtu te mau fifi, te faataa ra oia e: “Ua turu maira râ te Fatu ia ˈu, ua faaitoito maira, ia itea-roa-hia te parau.” (Tes. 1, 2:2; Tim. 2, 4:17). Te tamau noa mai nei te Fatu ra o Iesu te upoo o te amuiraa kerisetiano, i te horoa mai i te itoito e au no tatou no te raveraa i te ohipa o ta ˈna i faaite no to tatou nei tau. — Mar. 13:10.

13. Nafea e itehia ˈi te itoito o te mau kerisetiano, e no hea roa mai te reira?

¹³ E tia roa ia tatou ia tamau noa i te faaite i te Parau a te Atua ma te itoito, mai ia Iesu Mesia e te tahi mau tavini haapao maitai o te Atua tei ora na i te senekele matamua. E ere ïa te auraa e mea etaeta e aore ra e mea faahepo tatou. Aita e faufaa ia faatura ore i te taata aore ra ia onono i te faaite atu i te parau i te feia eita e hinaaro ra. Tera râ, eita te etaeta o te taata e faaotohe ia tatou. Eiaha atoa tatou e vaiiho ia haaparuparuhia mai tatou e te patoiraa eiaha atoa e faatia ia ˈna ia haamamû i to tatou vaha. Mai ia Iesu, e faaite atoa tatou i te Basileia o te Atua mai te faatereraa hoê roa no te fenua taatoa. E parau anaˈe tatou ma te tiaturi mau, no te mea e e mau tia tatou no Iehova, te Arii hanahana o te ao atoa nei, e no te mea e ere na tatou iho te parau o ta tatou e parau ra, na ˈna râ. — Phil. 1:27, 28; Tes. 1, 2:13.

Ei haapoto-noa-raa

● No te aha e mea faufaa ia haaparare i te parau no te Basileia i te rahiraa o te taata? Eaha te mau huru o ta tatou e nehenehe e farerei atu?

● Nafea tatou ia faaite e e aita tatou e tiaturi nei i nia i to tatou iho puai no te taviniraa ia Iehova?

● Eaha te haapiiraa faufaa ta tatou e nehenehe e huti mai no roto mai i te buka a te mau Ohipa?

[Uiraa haapiiraa]