“E ere ratou i to teie nei ao”
Pene 21
“E ere ratou i to teie nei ao”
1. a) Eaha ta Iesu i ani atu na roto i te pure, no ta ˈna mau pǐpǐ i te ahiahi na mua ˈˈe i to ˈna poheraa? b) No te aha e mea faufaa ‘ia ore ia faaau atu i teie nei ao’?
I TE AHIAHI na mua ˈˈe e tuuhia ˈtu ai oia i nia i te pou, ua pure atu Iesu ma te uˈana mau no ta ˈna mau pǐpǐ. Ua ite hoi oia e e faatupu o Satani i te tamataraa rahi riaria i nia ia ratou, ua parau atu oia i to ˈna Metua e: “Aore au i pure ia oe e ia hopoi ê atu oe ia ratou i teie nei ao, ia tiai mai râ oe ia ratou eiaha ei ino. E ere ratou i to teie nei ao, mai ia ˈu nei hoi e ere i to teie nei ao.” (Ioane 17:15, 16). No te aha râ e mea faufaa roa ia faaatea ê mai i to teie nei ao? No te mea o Satani te faatere i teie nei ao. E te feia atoa i roto i teie nei ao tei raro aˈe ïa ratou i te faatereraa a te Diabolo (Ioane 14:30; Ioane 1, 5:19). E mea faufaa roa ïa, ia ite papu te mau kerisetiano atoa e eaha te auraa te parau e ‘ere ratou i to teie nei ao’. Tera râ, eaha te auraa o te parau e e ere o Iesu i to teie nei ao?
2. Eaha te auraa i te mea e ‘e ere Iesu i to teie nei ao’?
2 Aita mau o Iesu i faataa ê ia ˈna iho i te mau taata atoa. I te mea e ‘e ere o ˈna i to teie nei ao’, e ere ïa no te mea e aita o ˈna e here ra i te mau taata no to ˈna ra tau. Te haere noa ra hoi oia i tera e tera oire no te faaite atu ia ratou i te parau apî maitai no te Basileia o te Atua. Ua faaora oia i te mau maˈi, ua faaaraara i te mata o te feia matapo, ua faatia i te feia pohe e ua horoa roa ˈtu hoi i to ˈna ora no te mau taata atoa. Teie râ, aita roa ˈtu oia e hinaaro ra e pee i te huru o te feia iino e te mau ohipa ino e tano i te feia e faatupu nei i te hinaaro o teie nei ao. Ua faaara râ oia i te feia e faaroo maira ia ˈna ia haapao maitai i te mau hinaaro taiata, i te hinaaro i te mau maitai materia e i te mau hinaaro miimii mai te hanahana (Mat. 5:27, 28; 6:19-21; Luka 12:15-21; 20:46, 47). Maoti i te rave i te huru oraraa o te mau taata tei atea roa i te Atua, ua haere râ Iesu na nia i te mau eˈa o Iehova (Ioane 8:28, 29). No reira, noa ˈtu â ïa e e ati Iuda oia, aita o ˈna i faaô atu i roto i te mau aroraa politita e tupu ra i rotopu ia Roma e te nunaa ati Iuda.
“E ere i to teie nei ao to ˈu Basileia”
3. a) Eaha te pariraa ta te mau aratai haapaoraa ati Iuda i pari atu ia Iesu i mua ia Pilato, e eaha te tumu? b) Eaha te faaite mai e aita o Iesu i hinaaro ia riro mai oia ei arii no te taata?
3 Noa ˈtu â râ, ua pari atu te mau ati Iuda toroa teitei ia Iesu i te haafifi i te mau faufaa a te nunaa. Ua rave ratou e ia tapeahia oia e ia arataihia oia i mua ia Ponotio Pilato, te tavana rahi roma. Oia mau, te mea o ta ratou e ore ra e au i roto i te haapiiraa a Iesu, o te mea ïa e te faaite tahaa nei oia i ta ratou haavare. Teie râ, no te turai i te tavana rahi ia ohipa mai, ua faanaho atura ratou i te pariraa i muri nei: “Ua ite aˈenei matou i teie nei taata i te haapiˈoraa i teie nei fenua, e te faaoreraa i te taoˈa aufau na Kaisara, e te parauraa ia ˈna iho e, o te Arii ra oia o te Mesia.” (Luka 23:2). Teie râ, hoê matahiti na mua ˈˈe, i to te nunaa hinaaroraa e faaarii ia ˈna, ua patoi atu Iesu i te reira (Ioane 6:15). Ua ite oia e e ua maitihia o ˈna ei Arii i nia i te raˈi aitâ râ i tae i te taime e faaariihia ˈi oia e ua ite atoa oia e e haaparahihia oia i nia i te terono, eiaha na roto i te faanahoraa demotaratia eiaha atoa na roto i te farii-maitai-raa a te nunaa, na roto râ ia Iehova.
4. Eaha te tiaraa ta Iesu i rave no nia i ‘te aufauraa i te mau tute na Kaisara’?
4 No nia i te afauraa i te mau tute, e toru mahana na mua ˈˈe e tapeahia ˈi Iesu, ua tamata mau te mau Pharisea i te imi i te ravea ia parau Iesu i te mau parau tano ore. No te pahono i ta ratou uiraa no te râmâ, ua parau atu Iesu e: “A faaite mai i te hoê moni veo (hoê moni roma). No vai te hohoˈa e te parau i nia iho?” I to ratou râ na ô atura e: “No Kaisara”, ua parau atura Iesu ia ratou e: “E hopoi maore, ta Kaisara ia Kaisara ra, e ta te Atua, e hopoi ïa i te Atua ra.” — Luka 20:20-25.
5. a) Eaha te haapiiraa ta Iesu i horoa i ta ˈna mau pǐpǐ i te taime i haruhia ˈi oia? b) Mea nafea to Iesu faataaraa ˈtu ia Pilato i te tumu i na reira ˈi oia?
5 Te ohipa i tupu i te taime a haruhia ˈi oia ua navai noa ïa no te faaiteraa e aita oia e faatupu ra i te orureraa i te hau Roma e aita atoa hoi oia e hinaaro ra ia na reira ta ˈna mau pǐpǐ. Ua haere mai râ te mau faehau roma e te mau ati Iuda e haru ia ˈna ma te ˈoˈe e te raau (Ioane 18:3, 12; Mareko 14:43). I to Petero iteraa ˈtu i te reira, ua rave atura oia i te ˈoˈe e ua tairi atura i te hoê o te mau taata, e motu ê atura to ˈna tariˈa atau. Ua aˈo atura Iesu ia Petero i te na ôraa e: “A oomo i to ˈoˈe i roto i te vehî; o te rave hoi i te ˈoˈe ra, e pohe ïa i te ˈoˈe.” (Mat. 26:51, 52). I te poipoi aˈe, ua faataa ˈtura Iesu ia Pilato i te tumu oia i na reira ˈi ma te parauraa ˈtu e: “E ere i to teie nei ao to ˈu Basileia; ahiri no teie nei ao to ˈu basileia, ua faaitoito ïa tau mau taata ia ore au ia tuuhia ˈtu i te rima o te ati Iuda; e ere râ to ˈu basileia i to ǒ nei.” — Ioane 18:36.
6. Eaha te faaotiraa o te haavaraa?
6 I muri aˈe i te hiˈopoaraahia te mau parau, ua parau atura Pilato e aore “roa a ˈna e hara i itea” no nia ia Iesu. Noa ˈtu â ïa e ua ite oia e aita ta ˈna e hara, ua farii oia i te aniraa a te nahoa e ua tuu atu oia ia Iesu i nia i te pou. — Luka 23:13-15; Ioane 19:12-16.
Ua pee te mau pǐpǐ i te taahiraa o to ratou Fatu
7. Mea nafea te mau kerisetiano matamua i te faaiteraa e ua haapae ratou i te hinaaro o teie nei ao, a here noa ˈi ratou i to ratou taata-tupu?
7 Te hohoˈa o te kerisetianoraa matamua o te itehia nei i roto i te Bibilia e i roto atoa i te tahi atu â mau buka aamu te faaite maira ïa te reira e ua taa maitai i te mau pǐpǐ a Iesu i te tiaraa o ta ratou e rave ia ore ratou ‘ia faaau atu i teie nei ao’. Ua faaitoito noa ratou no te haapae i te feruriraa o teie nei ao. I te mea hoi e, ua faarue ratou i te mau peu faaanaanataeraa iino e te hairiiri o te tahua taaro e te teata taata ora roma, ua faarirohia ratou ma te faaooo ei mau taata au ore roa ratou i te huitaata nei. Tera râ, maoti i te riri atu i to ratou taata-tupu, ua horoa te mau kerisetiano i to ratou puai no te tauturu ia ratou ia fanaˈo atoa ratou i te ora o ta te Atua i pûpû mai na roto i to ˈna aroha.
8. a) Eaha ta te mau kerisetiano matamua i faarerei no te mea e ‘e ere ratou i to teie nei ao’? b) Nafea râ ratou ia faariro i te mau tia politita e te aufauraa i te mau tute? No te aha?
8 Mai to ratou Fatu, ua hamani-ino-pinepine-atoa-hia ïa te mau kerisetiano na te mau tia o te faatereraa tei ore e maramarama maitai (Ioane 15:18-20). Tera râ, i te matahiti 56, ua papai atu te aposetolo Paulo i to ˈna mau taeae kerisetiano no Roma no te turu-uˈana-raa ˈtu i te aˈoraa a Iesu. Ua faaitoito atu oia ia ratou ia auraro “i te feia mana toroa ra”, te mau tia politita, “aore roa hoi e mana maori râ no ô mai i te Atua ra”. Oia mau, e ere na Iehova i haamau i te mau faatereraa o te amuiraa o te mau mea nei, ua tupu râ te reira no te mea e ua farii oia. Ua faataa o Paulo e taua feia mana ra “ua haapaohia ïa e te Atua”, te auraa ra ua tohu aˈena te Atua e ua ite atea oia i roto i tei hea faanahoraa te mau mana e tia mai ai. No reira, o “te feia mana” ïa “tei haapaohia e te Atua” no teie tau, a tiai noa ˈtu ai i te Basileia o te Atua, o ta ˈna i horoa ia Iesu Mesia ra, ia riro mai ei faatereraa hoê roa no te fenua nei. No reira Paulo i aˈo atu ai i te mau kerisetiano ia faaite i te mau tia o te faatereraa i te hanahana e au no ratou e ia aufau i te mau tute ta ratou e titau mai. — Roma 13:1-7; Tito 3:1, 2.
9. a) E tia ia tatou ia haapao i te aha no te faataaraa i to tatou auraroraa i te “feia mana toroa”? b) Mea nafea ta te Tuatapaparaa faaiteraa mai e ua pee mau te mau kerisetiano matamua ma te haapao maitai i te hiˈoraa o Iesu?
9 Teie râ, aita o Paulo i parau ia ratou ia auraro taatoa ˈtu ratou i taua feia mana ra ma te ore e haapao i te Atua, ta ˈna Parau e to ratou haava manaˈo kerisetiano. Aita; ua ite papu ratou e o Iehova anaˈe ta Iesu i haamori, e aita oia i faatia i te nunaa ia faaarii ia ˈna e ua faaue oia ia Petero e ia oomo ta ˈna ˈoˈe i roto i te vehî. No reira te pee mau ra ratou i to ratou Fatu. Teie te parau e taiohia i roto i te hoê buka aamu (On the Road to Civilization — A World History, a Heckel e o Sigman, i te api 237, 238): “Ua patoi te mau kerisetiano i te rave i te tahi mau ohipa i faahepohia i te huiraatira roma. Te manaˈo ra (...) te mau kerisetiano e te raveraa i te tau faehau o te hoê ïa haaviiviiraa i to ratou faaroo. Aita ratou i farii i te hoê noa ˈˈe hopoia politita. Ua patoi ratou i te haamori i te emepera.”
10. a) Na te aha i faatupu i te opuaraa i ravehia e te mau kerisetiano no Ierusalema i te matahiti 66? b) Mea nafea te reira i te riroraa mai ei hiˈoraa no tatou?
10 Aita roa ˈtu te mau pǐpǐ a Iesu i faaô atu ia ratou i roto i te mau aroraa politita e o te nuu no to ratou ra anotau. I te matahiti 66, ua patoi atu te mau ati Iuda e faaea ra i te mataeinaa roma no Iudea i te faatereraa a Kaisara. Aita i maoro roa, ua haaati atura te nuu roma ia Ierusalema. Eaha ïa te ohipa i ravehia e te mau kerisetiano e faaea ra i roto i te oire? Ua haamanaˈo ratou i te aˈoraa a Iesu e faaea noa i rapae eiaha e faataupûpû i rotopu i te mau nuu enemi. No reira, ua horo ratou i nia i te mouˈa no Pella i te tahi pae o te Ioridana ia hoˈi anaˈe te nuu roma maa taime iti (Luka 21:20-24). Na roto i to ratou amui-ore-raa ˈtu i roto i te mau ohipa a to te ao nei, ua riro atura ratou ei hiˈoraa maitai no te mau kerisetiano no a muri aˈe.
Te amui-ore-raa te mau kerisetiano o te tau hopea nei i roto i te mau ohipa o teie nei ao
11. a) Eaha te ohipa rû e ravehia nei e te mau Ite o Iehova? b) No nia i te aha ratou e faaite ai i to ratou vai-amui-ore-noa-raa i roto i te mau ohipa o teie nei ao?
11 Ia au i te faaiteraa a te aamu no to tatou nei tau, te vai ra anei i roto teie “tau hopea”, mai te matahiti 1914 mai, te hoê pǔpǔ taata tei pee i taua mau kerisetiano matamua ra tei ore i amui i roto i te mau ohipa o teie nei ao? E, tera te ohipa i ravehia e te mau Ite o Iehova. I te mau fenua atoa, ua haa ratou no te pororaa i te Basileia o te Atua mai te tiaturiraa hoê roa no te faatupuraa i te hau, te maitai rahi e te oaoa o te vai maoro mai no te mau taata atoa e here ra i te parau-tia (Mat. 24:14). Teie râ, aita ratou i amui noa ˈtu i roto i te mau aroraa a te mau nunaa.
12. a) Mea nafea te amui-ore-raa te mau Ite o Iehova i taa ê ai i te haerea o te mau upoo faatere haapaoraa? b) Mea nafea te iteraahia e eita te mau Ite o Iehova e amui atu i roto i te politita?
12 Taa ê atu i te reira, ua faaô atu te mau upoo faatere haapaoraa o te amuiraa faaroo kerisetiano i roto i te politita o teie nei ao. I roto i te tahi mau fenua, te ohipa nei te mau aratai haapaoraa no tera e tera tia politita i roto i te mau maitiraa. Te tahi pae i roto ia ratou, e tia politita ïa. Te tahi pae râ te haavî nei ïa ratou i te mau taata politita ia fariihia ta ratou mau tabula ohipa ia au i ta ratou e hinaaro ra. I te tahi atu mau vahi ra, ua apiti atu te mau aratai haapaoraa i “te pǔpǔ e tapea tamau noa nei i te faatereraa i haamau-aˈena-hia” e te mana faatere, area te mau perepitero e te mau faatere hau “no roto i te taatiraa politita e hinaaro ra e faaô mai i te tahi mau mea” ra te turu ra ïa i te mau aroraa o te haa nei no te faataahuri i te tahi pae. No reira, noa ˈtu eaha te fenua o ta ratou e faaea ra, eita te mau Ite o Iehova e amui atu i roto i te ohipa politita. Eita atoa ratou e opani ra i te feia e faaea ra na pihai iho ia ratou ia ore e faaô atu i roto i te hoê pǔpǔ, ia titau i te hoê parahiraa aore ia maiti. I te mea hoi e ua parau mai Iesu e ‘e ere ta ˈna mau pǐpǐ no teie nei ao’, eita atoa ïa te mau Ite o Iehova e faaô noa ˈtu i roto i te hoê noa ˈˈe ohipa politita.
13. Eaha te tiaraa ta te mau Ite o Iehova i rave no nia i te mau tamaˈi?
13 Mai ta Iesu hoi i tǎpǔ mai, e rave rahi te taime to te mau nunaa faatupu-noa-raa i te tamaˈi i te “tau hopea nei”. Tae noa ˈtu i te mau pǔpǔ rii nainai i roto i te hoê nunaa ua rave atoa ratou i te mauhaa no te aro te tahi e te tahi (Mat. 24:3, 6, 7). I mua i teie huru tupuraa, eaha te tiaraa i ravehia e te mau Ite o Iehova? I roto i te mau fenua atoa o te ao nei, ua matau-maitai-hia ratou no te mea eita ratou e amui atu i roto i te mau ohipa atoa o teie nei ao. No reira, ia au iho â i te hohoˈa i ravehia e Iesu e tei rave-atoa-hia e ta ˈna mau pǐpǐ matamua, te faaite ra Te Pare Tiairaa i roto i te neneiraa beretane no te 1 no novema 1939 e: “Te feia atoa i te paeau o te Fatu, eita ïa ratou e amui noa ˈtu i roto i te mau ohipa a te mau nunaa e tamaˈi noa ra; e turu râ ratou ma te itoito mau i te Teotaratia Rahi ra [o Iehova] e i to ˈna Arii [o Iesu Mesia].” Te faaite mai nei te mau ohipa atoa e te tapea noa nei te mau Ite o Iehova i taua tiaraa ra. Aita oia i vaiiho i te politita e te mau tamaˈi o teie nei ao, te tumu no te mau amahamaharaa, ia ofati i te mau auraa taeae e taai ra ia ratou i roto i te haamoriraa a Iehova noa ˈtu e vahi ê to te tahi e te tahi. — Isa. 2:3, 4; hiˈo Korinetia 2, 10:3, 4.
14. a) No te mea e eita ratou e amui atu i roto i te mau ohipa o teie nei ao, eaha ta te mau Ite o Iehova i patoi atu i te rave? b) Mea nafea ratou i te faataaraa te tumu o to ratou tiaraa?
14 Te faaite mai nei te aamu o teie tau e aita te mau Ite o Iehova i patoi noa i te oomo i te ahu faehau e i te rave i te mau mauhaa tamaˈi. Ua hau atu i te afaraa o te senekele i teie nei, ua patoi atoa ratou i te tavini noa ei melo o te ore e tamaˈi no te nuu aore ra i te rave i te tahi mau ohipa no te monoraa i te taviniraa faehau. No te aha râ? I muri aˈe i to ratou iteraa i te mau titauraa atoa a te Atua, ua maiti ratou ma te ite papu maitai. Aita hoê aˈe taata i faaue ia ratou e tera te haerea te tia ia ratou ia pee. Eita hoi ratou e opani i te tahi pae ia rave i ta ratou e hinaaro ra. Teie râ, i te titauraahia ia ratou ia faaite i to ratou tiaraa, ua faataa te mau Ite o Iehova e, i te mea hoi e ua pûpû ratou ia ratou no te Atua, ua manaˈo ratou e e mea tia ia faaohipa ratou i to ratou tino no ta ˈna taviniraa e eita ta ratou e nehenehe e tavini i te mau fatu no te fenua nei, no te mea e patoi nei ta ratou mau ohipa i te opuaraa a te Atua. — Rom. 6:12-14; 12:1, 2; Mika 4:3.
15. a) Eaha tei farereihia e te mau Ite o Iehova no te mea aita ratou i faaau atu i teie nei ao? b) Noa ˈtu e ua tapeahia ratou i roto i te fare auri, mea nafea te mau faaueraa tumu i te aratairaa i te mau kerisetiano?
15 Ua faaite o Iesu e eaha te faahopearaa no to ratou huru haerera na roto i teie parau e: “No te mea râ e e ere outou i to teie nei ao, (...), e riri mai ai teie nei ao ia outou.” (Ioane 15:19). E rave rahi mau Ite o Iehova tei tapeahia i te fare auri no te mea aita ratou i hinaaro e ofati i to ratou tiaraa kerisetiano, oia hoi te oreraa e amui i roto i te mau ohipa o teie nei ao. Ua hamani-ino-roa-hia te tahi pae, te tahi taime e tae roa ˈtu i te pohe. E rave rahi tei tapea i taua tiaraa ra e rave rahi matahiti i roto i te fare auri. No reira, te buka Mau Faufaa e haavîraa i Auschwitz (beretane), a Anna Pawelczynska (api 89), i faaite ai e: “Ua ite maitai te taata atoa e eita roa ˈtu te hoê Ite o Iehova (i roto i te aua haamauiuiraa) e rave i te hoê ohipa e faahape i ta ˈna tiaturiraa faaroo, eita atoa oia e rave i te hoê noa ˈˈe ohipa no te faaino i te tahi taata ê atu, noa ˈtu e taparahi taata aore ra e taata toroa S.S. E rave râ oia ma te faaitoito i te mau huru ohipa atoa, noa ˈtu e eaha te huru, eiaha râ ei ohipa e ofati i to ˈna amui-ore-raa i te pae morare.”
16. a) Te haere nei te mau nunaa atoa i hea, e eaha te mea ta te mau Ite o Iehova e tia ia haapao maitai? b) No te aha e mea faufaa ia faaatea ê mai i teie nei ao?
16 Ua ite te mau Ite o Iehova e e haere tia atu te mau nunaa atoa i roto i te “tamaˈi i taua mahana rahi o te Atua Puai hope ra”, o te tupu atu i Aramagedo. Ma te tahoê mau, ua rave te mau tavini o Iehova i te pae o to ˈna Basileia mesia. No reira ratou i faaitoito ai eiaha ratou ia faaô atu i roto i te hoê tupuraa o te faariro ia ratou ei enemi no taua Basileia ra (Apo. 16:14, 16; 19:11-21). Te haapao maitai nei ratou i te mau parau ta Iesu i faahiti no nia i ta ˈna mau pǐpǐ mau e: “E ere ratou i to teie nei ao.” Ua ite ratou e ua fatata teie nei ao i te mou e te feia anaˈe tei haapao i te hinaaro o te Atua o ratou te ora e a muri noa ˈtu. — Ioane 1, 2:15-17.
Ei haapoto-noa-raa
● Mea nafea to Iesu faaiteraa e eaha te auraa i te mea e ere ratou i to teie nei ao?
● Eaha ta tatou i ite i te huru o te mau kerisetiano matamua no nia 1) i te hinaaro o teie nei ao? 2) i te mau tia politita e te aufauraa i te mau tute? 3) i te tau faehau?
● Mea nafea te mau Ite o Iehova no teie tau i te faaiteraa i to ratou tiaraa kerisetiano, oia hoi te oreraa e amui i roto i te mau ohipa o teie nei ao?
[Uiraa haapiiraa]
