Pene 14

‘E faaau atu vau i te hoê faufaa e o outou no te hoê basileia’

1. I te rui oia i pohe ai, eaha te mau tiaturiraa ta Iesu i horoa ˈtu na ta ˈna mau aposetolo?

 I TE rui oia e haapohehia ˈi, ua parau atura Iesu i ta ˈna mau aposetolo haapao maitai e: ‘E rave rahi te parahiraa mau i te fare o tau Metua ra. Te haere nei au e haamaitai i te hoê vahi no outou, ei reira atoa outou i te vahi e parahi ai e au ra.’ I tau po ra, ua parau faahou atura oia ia ratou e: “E mai tau Metua i haapao i te tahi basileia no ˈu ra; ua haapao atoa vau ia outou.” (Ioane 14:2, 3; Luka 22:29). Na roto i teie mau parau, te horoa ˈtura oia ia ratou ra i te mau ravea faahiahia roa.

2. E hia rahiraa taata e faatere atu e te Mesia i roto i to ˈna Basileia i nia i te raˈi?

² Aita râ Iesu i hinaaro ra e parau e o ta ˈna mau aposetolo anaˈe te faatere atu i pihai iho ia ˈna i roto i to ˈna Basileia i nia i te raˈi. I muri aˈe, ua itehia ihora e ua horoahia taua hopoia faahiahia ra i te 144 000 taata i hoohia mai no te fenua nei (Apo. 5:9, 10; 14:1, 4). Te vai ra anei i teie mahana te mau taata e hinaaro ra ia noaa ia ratou i taua hopoia ra?

Te haaputuputuraa o te feia aiˈa no te Basileia i te raˈi

3. I roto i ta ˈna taviniraa, eaha ta Iesu i faataa ˈtu i te mau taata e faaroo maira ia ˈna?

³ I muri aˈe i to Ioane Bapetizo tuuraahia ˈtu i roto i te fare tapearaa e Heroda Anitipa, ua haamata ˈtura Iesu i te hoê pororaa rahi ma te huti i te ara-maite-raa i te mau taata e faaroo maira ia ˈna i nia i te parau o ‘te basileia o te mau raˈi ra’. (Mat. 4:12, 17.) Ua faata ˈtura oia ia ratou  e e nehenehe ratou e ô i roto i teie Basileia, area ta ˈna mau pǐpǐ râ, ua rave aˈera ïa ratou i te mau tutavaraa uˈana mau e taeahia ˈtu ai ia ratou taua tapao ra. — Mat. 5:3, 10, 20; 7:21; 11:12.

4. a) I anafea ra to te mau pǐpǐ matamua a Iesu faatavairaahia i te varua moˈa? b) Nafea tatou e papu ai e mai reira mai te haapao-taa-ê-raahia te parau no te haaputuputuraa i te feia aiˈa o te Basileia?

⁴ I te Penetekose o te matahiti 33, ua faatavaihia te mau pǐpǐ matamua i te varua moˈa (Ohi. 2:1-4; Kor. 2, 1:21, 22). I reira hoi te faaiteraahia te mau faanahoraa ta te Atua i rave e noaa atu ai te tahi mau taata te ora e aratai tia ˈtu i nia i te pohe-ore-raa i roto i te raˈi. Ua faaohipa ihora hoi Petero i “te mau taviri o te [basileia o te mau raˈi]” no te faaite na mua ˈtu taua ite ra i te mau ati Iuda, i muri iho i to Samaria, e na reira hoi i te mau taata o te mau nunaa aore ra te mau Etene (Mat. 16:19). I reira hoi te haapao-maite-raahia i te parau no te faaineineraa i te faatereraa e aratai i te huitaata nei hoê tausani matahiti te maoro. Inaha hoi, no taua feia aiˈa o te Basileia ra, no te “feia moˈa”, no te feia “i maitihia no te ora i nia i te raˈi” *, fatata te taatoaraa o te mau rata i faauruahia mai e te Atua i roto i te mau Papai heleni kerisetiano.

5. Ua maitihia anei te mau pǐpǐ no te ora ˈtu i nia i te raˈi no te mea e mea maitai aˈe ratou i te mau tavini o te Atua i ora na na mua ˈˈe ia ratou?

⁵ Mai te peu e ua titauhia ratou no te ora ˈtu i nia i te raˈi, e ere ïa no te mea e mea maitai aˈe ratou i te mau tavini a te Atua i pohe na mua ˈˈe i te Penetekose o te matahiti 33 (Mat. 11:11). Eita, no te mea râ, ua haamata Iehova i reira i te maiti i te feia e faatere atu ei arii i pihai iho ia Iesu Mesia. I roto i te roaraa o na senekele hoê ahuru e ma iva i muri i taua taio mahana ra, hoê anaˈe ïa titauraa e vai ra, oia hoi te titauraa e ora ˈtu i nia i te raˈi. E tapao hoi teie no te haamaitairaa a te Atua i te tahi noa mau taata tei taotiahia te numera no te faatupu i ta ˈna  mau opuaraa arataihia e to ˈna paari e to ˈna aroha. — Eph. 2:8-10.

6. a) No te aha te maitiraa no te ora ˈtu i nia i te raˈi e hope ai ia tae i te hoê mahana? b) Na vai e haapao ia tupu atoa te parau tohu no nia i te “feia rahi roa”, e eaha mau na te ohipa i tupu?

⁶ I roto noa i te roaraa o te tau, e taea-roa-hia ˈi te numera taotiahia e te iti hoi o te 144 000. Na mua ˈˈe râ, e tia i taua Iseraela varua ra ia tapaohia ei haapapuraa e ua farii mai te Atua ia ratou (Apo. 7:1-8). I roto noa i taua area taime ra, maoti to ˈna varua moˈa o Iehova i horoa mai ai i te hoê ite papu mau no nia i ta ˈna parau, i ta ˈna faanahonahoraa. Ia na reira oia, e aratai ïa oia i te mau ohipa no te faatupu i te tahi â tuhaa o ta ˈna opuaraa i faaitehia i roto i te Apokalupo 7:9-17. Papu maitai, e “feia rahi roa” no roto mai i te mau nunaa atoa tei haaputuputuhia e te nehenehe hoi e atuatu i te tiaturiraa otahi roa, oia hoi te oraraa ˈtu mai roto atu i te ati rahi e taeahia ˈtu ia ratou i te huru taata tia roa no te ora ˈtu e a muri noa ˈtu i roto i te hoê paradaiso i nia i te fenua nei. Ia feruri tatou i nia i te mau ohipa i tupu, mai te huru ra ïa e, ua hope te titauraa no te ora ˈtu i nia i te raˈi i te mau matahiti 1935 ra, a papu-maitai-hia ˈi e te tiaturiraa o te “feia rahi roa”, te oraraa ïa i nia i te fenua nei. Mai reira mai, ua amui maira e rave rahi mirioni feia haamori ia Iehova e tiaturi ra ma to ratou mafatu atoa e ora e a muri noa ˈtu i nia i te fenua nei e te mau tausani kerisetiano o te toea o te pǔpǔ taata e ora ˈtu i nia i te raˈi e te iti roa hoi te numera.

7. E maiti-faahou-hia anei te tahi mau taata no te ora ˈtu i nia i te raˈi i teie mahana, e no te aha?

⁷ E tia anei ia tatou ia faaoti e aita te Atua e titau faahou ra i te taata no te ora ˈtu i nia i te raˈi? Mai te peu e aitâ te mau kerisetiano e atuatu ra i taua tiaturiraa ra i tapaohia ˈtura e te tapao taati, e nehenehe hoi vetahi pae o ratou e taiva, e inaha, e maitihia ˈtura ïa te tahi pae no te mono mai ia ratou. Teie râ, ia feruri-maitai-hia, mea varavara roa teie huru ohipa i te tupu.

Nafea hoi ratou e ite ai?

8. Na roto i tei hea mau parau to Paulo faataaraa mai e e ite te mau taata i faatavaihia e te varua i te reira?

⁸ Te horoa mai nei te varua o te Atua na te mau  kerisetiano i bapetizohia e tei titauhia hoi no te ora ˈtu i nia i te raˈi, i te haapapuraa mau e ua farii te Atua ia ratou ei mau tamarii varua na ˈna. Ia ˈna i papai atu i te “feia moˈa” i Roma, ua faaite atura hoi Paulo e e tupu iho â mai te reira te huru. Teie ta ˈna huru faataaraa mai i te huru tupuraa i farereihia na e te taatoaraa o te mau kerisetiano mau: “O te feia atoa hoi i arataihia e te [v]arua o te Atua ra, e tamarii anaˈe ïa ratou na te Atua. E ere hoi i te varua tavini tei noaa ia outou ia mǎtaˈu faahou; o te [v]arua faatamarii râ tei noaa ia outou, i parau ai hoi tatou, E Aba, e tau Metua. O te [v]arua iho hoi, e to tatou atoa nei varua, o tei faaite ïa e, e tamarii tatou na te Atua. E tamarii ra, e feia tufaa ïa; e feia tufaa i te Atua ra, e feia tufaa tatou e te Mesia; te pohe apipiti nei hoi tatou e oia atoa, ia haamaitai-apipiti-hia tatou e oia atoa hoi.” — Rom. 1:7; 8:14-17.

9. Mea nafea te ‘varua iho i faaite mai’ i te feruriraa o te mau taata e e mau tamarii mau ratou na te Atua?

⁹ E tapao mai tatou i roto i taua irava ra e piti huru auraa taa ê o te parau ra “varua”: a tahi, i roto i te parau ra “te [v]arua iho”, i muri iho i roto i te parau ra “to tatou atoa nei varua”. Te auraa o teie parau matamua, o te puai ohipa e te ite-ore-hia ïa o te Atua. Na ˈna i tuu mai i roto i te feruriraa o te mau tamarii varua a te Atua i te tiaturiraa mau e ua fariihia ratou e a ˈna e tamarii tiamâ na ˈna. E te vauvau atoa maira taua varua ra i ta ˈna faaiteraa i roto i te Parau faauruahia a te Atua, te Bibilia, o te riro hoi, mai te peu e e tia ia parauhia, ei rata ta te Atua iho i faatae mai nei na ta ˈna mau tamarii varua (Pet. 1, 1:10-12). Ia taio te feia i faatavaihia e te varua moˈa i roto i te mau Papai i te mau parau i faataehia ˈtu i te mau tamarii varua a te Atua ra, e riro hoi te reira i te faatupu ia ratou i te tahi ohipa; e parau hoi ratou ma te tia mau e: ‘No ˈu taua parau ra.’ Na roto i te tahi mau huru tupuraa huru rau, e haapapu mai te puai ohipa o te Atua i to ratou feruriraa e, oia hoi te puai e faaitoito ra ia ratou no roto mai i to ratou maramarama e to ratou mafatu e e mau tamarii iho â ratou na te Atua. Ia au i ta te varua a te Atua e faaau mai, e haamau ratou i to ratou feruriraa e to ratou mafatu i nia i te tiaturiraa e pûpûhia maira ia ratou ra, oia hoi te riroraa ei feia aiˈa e te Mesia,  e e farii mau hoi ratou i te mau hopoia e titauhia ra e te mau tamarii varua a te Atua. — Phil. 3:13, 14.

10. a) Eaha te mau huru e ore e navai e itehia ˈtu ai e ua faatavaihia te hoê kerisetiano i te varua moˈa aore ra aita? b) Eaha te hiˈoraa o te mau “mamoe ê atu” i te parahiraa i haapaohia no ratou i roto i te opuaraa a te Atua?

¹⁰ Mai te reira atoa anei no outou? Mai te peu e e, ua noaa ia outou i te hoê haamaitairaa taa ê mau. Teie râ, eiaha roa ˈtu te hoê noa ˈˈe kerisetiano e faaoti e ua faatavaihia oia i te varua no te mea noa e mea au roa na ˈna te mau tumu parau hohonu i te pae varua, aore ra mea here roa na ˈna to ˈna mau taeae. Papu maitai, tera mau hoi te mau huru te tia ia itehia i roto e rave rahi mau “mamoe ê atu”. Inaha hoi, no ratou atoa te mau irava o te mau Papai e tano no te feia aiˈa i te Mesia, aita râ hoi ratou e titau ra i te hoê mea ta te Atua i ore roa ˈtu i haapao no ratou (hiˈo Numera 16:1-40). Te tiaturi nei ratou i te opuaraa matamua a te Atua no nia i te fenua, e te faaitoito nei to ratou aau mehara ia ratou ia haa ma te tiaturi e e tuhaa atoa ta ratou i reira.

Te feia e rave i te pane e te uaina ma te au

11. O vai te putuputu atoa mai i roto i te oroa haamanaˈoraa i te poheraa o Iesu i te mau matahiti atoa, e no te aha?

¹¹ I te mau matahiti atoa, i te 14 no Nisana, i muri aˈe i te taperaa mahana, e faahaamanaˈo te mau kerisetiano faatavaihia na nia i te fenua taatoa nei, i te poheraa o Iesu Mesia, ia au maite te mau faaueraa ta ˈna i horoa ˈtu i ta ˈna mau aposetolo ra (Luka 22:19, 20). E amui atoa mai te mau “mamoe ê atu” i taua Oroa haamanaˈoraa ra, eiaha no te amu i te pane e te inu i te uaina, e mau ite faatura noa ra.

12. Mea nafea to te tahi mau kerisetiano no Korinetia ereraahia i te faatura i te oroa amuraa maa a te Fatu ra?

¹² E ere roa ˈtu te reira i te hoê oroa faaroo aita to ˈna e auraa. E ere, e oroa faufaa roa hoi teie. I te senekele matamua, ua faatae atura o Paulo i te tahi mau aˈoraa etaeta mau i te mau kerisetiano no Korinetia, i Heleni, no te mea eita roa ˈtu vetahi pae o ratou i faatura i taua oroa haamanaˈoraa ra ma te tia mau. Ua papai atura oia e: “E teie nei, o te amu i teie nei pane e o te inu i te aˈua  a te Fatu nei ma te au ore ra, e hara ïa i te tino e te toto o te Fatu.” Eaha ïa te mea i ‘au-ore-hia ˈi’ ratou? Teie ïa, aita ratou i faaineine maitai i to ratou mafatu e i to ratou feruriraa no taua oroa ra. A tahi, e mau amahamaharaa te itehia nei i roto i ta ratou amuiraa. Hau atu, e tamaa hua na vetahi pae o ratou e e inu hua na hoi na mua ˈˈe taua putuputuraa ra. Eita roa ˈtu na ratou i te mea tâuˈa i te oroa a te Fatu. Eita ˈtura hoi ta ratou e nehenehe e ite i te auraa hohonu mau o te pane e o te uaina. — Kor. 1, 11:17-34.

13. E taipe te pane e te uaina e faaohipahia i roto i te Oroa haamanaˈoraa no te aha?

¹³ Eaha mau na râ hoi taua auraa ra? E ere ïa te auraa e, na roto i te tahi semeio, e taui te pane e te uaina. Oia mau, eita o Iesu e faatusia noa ia ˈna i to te mau taime atoa e faatupuhia ˈi te Oroa haamanaˈoraa. Te parau ra hoi te mau Papai e: “Oia atoa te Mesia, a hoê aˈenei o ˈna pûpûraahia ei tusia ia hopoi ê oia i te hara a te taata e rave rahi”. (Heb. 9:28; 10:10; Roma 6:9.) Inaha hoi, e pane faahopue-ore-hia ra e te uaina uteute, e mau taipe anaˈe teie. Te faahohoˈa ra hoi te reira i te tino materia o ta Iesu i pûpû ei tusia e te toto ta ˈna i manii. E e mau mea faufaa roa hoi taua tino e taua toto ra! Ua pûpû Iesu i to ˈna tino taata hara ore ia nehenehe e noaa i te taata i te ora mure ore (Ioane 6:51). Area te toto ta ˈna i horoa ra, e piti ïa to ˈna faufaa: A tahi, e tamâ oia i te hara a te mau taata e tiaturi ia ˈna, e te piti, e haamana oia i te faufaa apî e tahoê i te Atua e te Iseraela varua, o te mau kerisetiano faatavaihia i te varua moˈa ra (Ioane 1, 1:7; Kor. 1, 11:25; Gal. 6:14-16). Oia mau, maoti taua mau ô faufaa mau ra te mau melo o te “nǎnǎ iti” e nehenehe ai e faarirohia e te Atua ei feia parau-tia. E au ra e ua haafanaˈohia ratou i te tiaraa taata parau-tia (Luka 12:32). Maoti te reira, e nehenehe atura ïa oia e faatavai ia ratou e te varua moˈa ei mau tamarii na ˈna ia nehenehe ratou e apiti atu i roto i te tiaraa hui arii i nia i te raˈi i pihai iho i te Mesia. I te mau matahiti atoa, ia haapapu taua mau kerisetiano ra i to ratou tiaturiraa e ora i nia i te raˈi na roto i te raveraa i te pane e te uaina i te Oroa haamanaˈoraa, e faatupu â ratou i te manaˈo mehara e te papu no te “faufaa apî” o te Mesia hoi te arai. — Heb. 8:6-12.

 “E haere atoa matou i ǒ [outou] na”

14. a) No te aha te mau “mamoe ê atu” e ore ai e amu i te pane e inu i te uaina, oia hoi te mau taipe e faaohipahia i roto i te Oroa haamanaˈoraa, e eaha ta ratou e tiai ra ma te oaoa mau? b) Eaha to ratou manaˈo i to ratou taatiraa ˈtu i te toea o te feia aiˈa o te Basileia?

¹⁴ A papu ai ratou i te ohipa ta Iehova e rave ra no ta ˈna mau tavini i faatavaihia, ua amui maira te mau “mamoe ê atu” ia ratou, i te na ôraa e: “E haere atoa matou i ǒ [outou] na: ite aˈenei matou e, tei ia outou te Atua.” (Zek. 8:20-23). Aita noa teie nau pǔpǔ i putuputu amui, te poro apipiti atoa râ raua i te parau apî maitai no nia i te Basileia na te fenua atoa nei. Noa ˈtu e eaha, eita te mau “mamoe ê atu” e ô i roto i te “faufaa apî” ta te Atua i faaau mai i te Iseraela i te pae varua, e eita atoa e ô i roto i te “faufaa apî (...) i haapao[hia] (...) [no te hoê] basileia” ta Iesu i faaau atu i te feia i titauhia no te ora ˈtu i pihai iho ia ˈna i roto i te raˈi. No reira, mea tano iho â ia ore ratou e amu i te pane e e inu i te uaina, oia hoi teie mau taipe e faaohipahia i roto i te Oroa haamanaˈoraa (Luka 22:20, 29). E a taeahia ˈtu ai i te “faufaa apî” i ta ˈna tapao e titau, na roto i te haaputuputuraa i te mau melo hopea o te “nǎnǎ iti” i roto i te Basileia i nia i te raˈi, te taa ra ïa i te mau “mamoe ê atu” e e fatata roa ratou i te ite i te mau haamaitairaa ta taua Basileia ra e faaherehere maira no ratou i nia i te fenua nei. Ua riro ei haamaitairaa na ratou te taviniraa i te Atua ma te tahoê atu i te toea haapao maitai o te feia aiˈa o te Basileia i te mau “mahana hopea”.

[Nota i raro i te api]

Ei haapoto-noa-raa

● No te aha hoi te mau Papai heleni kerisetiano i faahiti rahi ai te parau no nia i te tiaturiraa e ora i nia i te raˈi?

● Nafea te mau kerisetiano i faatavaihia e ite ai e ua farii te Atua ia ratou ei mau tamarii na ˈna? Eaha te auraa o te mau taipe ta ratou e rave i roto i te Oroa haamanaˈoraa?

● Nafea te mau “mamoe ê atu” e haapapu e ua tahoê-mau-hia ratou i te “nǎnǎ iti”?

[Uiraa haapiiraa]