Pene 13

E feia rahi roa tei mua i te terono o Iehova

1. a) E roohia te mau tavini a te Atua i ora na na mua ˈˈe i te kerisetianoraa e te 144 000 melo i te aha hou e noaa ˈi ia ratou te re? b) Eaha to mua i te “feia rahi roa” o te mau taata e ora ˈtu ia tupu te “ati rahi”?

 NOA ˈTU â ïa e ta ratou tapitapiraa matamua te faatupuraa ïa i te hinaaro o te Atua, ua pohe paatoa te mau tavini haapao maitai a Iehova, mai ia Abela e tae noa ˈtu ia Ioane Bapetizo, ma te tiai noa i te tia-faahou-raa. E tia atoa i te mau melo 144 000 e apiti atu i te Mesia i roto i to ˈna Basileia i te raˈi ia pohe hou te re e noaa ˈi ia ratou. Teie râ, ua ite aˈera te aposetolo Ioane i roto i te hoê orama i te hoê feia rahi roa e ora ˈtu mai roto atu i te “ati rahi” e e noaa hoi ia ratou i te tiaturiraa no te ora mure ore ma te ore roa ˈtu e pohe. — Apo. 7:9-17.

UA ITEHIA E O VAI “TE FEIA RAHI ROA”

2. Mea nafea te taa-maite-raahia te auraa o te parau no nia i te “feia rahi roa” o te Apokalupo 7:9?

² E rave rahi senekele te maoro, te vai-moe-noa-raa te auraa o te parau no nia i teie “feia rahi roa”. Teie râ, na te ite i noaa riirii mai i nia i te mau parau tohu no nia i taua tumu parau ra i faaineine i te eˈa. E, i te matahiti 1923 ra, ua taahia ˈtura e te mau “mamoe” o te parabole a Iesu i faahitihia i roto i te Mataio 25:31-46 e te mau “mamoe ê atu” ta ˈna i faahiti i te parau ia au i te Ioane 10:16, o te mau taata ïa e nehenehe e ora e a muri noa ˈtu i ǒ nei iho, i nia i te fenua nei. I te matahiti 1931 ra, ua taahia aˈera e te mau taata no ratou te parau i faahitihia i roto i te Ezekiela 9:1-11, e o te tapaohia hoi te rae e te taata e farii inita ta ˈna a te papai  parau ra, o te mau “mamoe” ïa e faahitihia ra i roto i te Mataio pene 25. E, i te matahiti 1935 ra, te “nahoa rahi” aore ra “feia rahi roa” o te Apokalupo 7:9-17, o te mau “mamoe” ïa o te parabole a Iesu no nia i te mau mamoe e te mau puaaniho. Parau mau, ua ite-aˈena-hia te tahi mau “mamoe” i te matahiti 1923 ra, i te matahiti 1935 noa râ to ratou numera i te maraa-oioi-raa. I teie mahana, te faaitoito nei e rave rahi mirioni taata i te amui mai i roto i taua “feia rahi roa” o te mau “mamoe ê atu” e fanaˈo nei i te haamaitairaa a te Atua.

3. No te aha te “tia-noa-raa [ˈtu]” te “feia rahi roa” “i mua i te terono”, e ere ïa te auraa e e pǔpǔ taata ratou no nia i te raˈi?

³ Mea taa ê te “feia rahi roa” i te mau 144 000 melo o te Iseraela pae varua, tei faahitihia te parau i nia ˈtu i roto i teie noâ pene o te Apokalupo. I roto i ta ˈna orama, aita o Ioane i ite i taua “feia rahi” ra i nia i te raˈi. To ratou “tia-noa-raa i mua i te terono [na roto i te reo heleni: énôpion tou thronou, oia hoi te auraa “i raro aˈe i te mata o te terono”]” o te Atua, eiaha ïa tatou e faaoti e tei nia ratou i te raˈi. Eiaha roa ˈtu, “tei raro aˈe râ ratou i te mata” o te Atua, tei parau mai e te hiˈo noa maira oia i te mau tamarii a te taata mai te raˈi mai (Apo. 7:9; Sal. 11:4; hiˈo Salamo 100:1, 2, e tae noa ˈtu i te Luka 1:74, 75 e Ohipa 10:33, Kingdom Interlinear). Eita atoa e titauhia ra i “te mau fenua [te mau nunaa] atoa” ia haere roa ˈtu i nia i te raˈi no te tia ˈtu i mua i te terono o te Mesia (oia hoi “i mua i to ˈna aro”), mai ta te Mataio 25:31, 32 e faataa maira. E, e ere roa ˈtu te “feia rahi roa, e ore roa e pau ia taio” i te hoê pǔpǔ taata no nia i te raˈi, ia faaauhia i te Apokalupo 7:4-8 e te 14:1-4, i reira te haapapuraahia mai te numera tia o te feia i maitihia i nia i te fenua nei no te haere atu i nia i te raˈi.

4. a) Eaha “te ati rahi” mea na reira mai te “feia rahi roa” i te oraraa mai? b) Ia au i te Apokalupo 7:11, 12, o vai teie e hiˈo mai nei i te “feia rahi roa” e teie e apiti mai nei ia ˈna no te haamori i te Atua?

⁴ I roto i ta ˈna faataaraa parau no nia i te feia rahi roa, teie ta Ioane i papai: “O te feia i haere mai mai roto mai i te ati rahi ra.” Oia mau, e ora ˈtu ratou mai roto atu i te ati rahi ta to tatou nei palaneta i ore â i ite aˈenei  (Apo. 7:13, 14; Mat. 24:21). Eita roa ˈˈe te feia e ora ˈtu mai roto atu i taua mahana riaria o Iehova ra e feaa noa ˈˈe i nia i te parau no te tumu o to ratou mau faaora. Ia au i te orama a Ioane, ia faaite taua feia rahi ra i to ratou mauruuru i te Atua e i te Arenio i faaora mai ia ratou, e tahoê mai ïa te taatoaraa o te mau mea ora haapao maitai atoa e parahi ra i nia i te raˈi, i to ratou reo i to te feia rahi roa no te haamori i te Atua hoê roa i te na ôraa e: “Amene; O te arue, e te hanahana, e te paari, e te haamaitai, e te tura, e te mana, e te puai, ei to tatou Atua ïa e a muri noa ˈtu. Amene.” — Apo. 7:11, 12.

Te mea e ora ˈi ratou

5. Nafea tatou e nehenehe ai e ite i te mau huru i titauhia no te faaô atu i roto i te “feia rahi roa” e paruruhia mai? b) Ia pahono mai outou i te mau uiraa e uihia mai i te hopea o te paratarapha, a faataa mai eaha tei titauhia i te feia e ora ˈtu i te “ati rahi”.

⁵ E faaorahia te “feia rahi roa” ia au i te mau titauraa parau-tia a Iehova. Te faataa papu maira te mau parau tohu i te mau huru taa maitai o te mau taata i faaorahia mai. No reira, te feia mea au na ratou te parau-tia, e nehenehe ïa ta ratou i teie nei â e haa ia nehenehe ratou e ora ˈtu. Ua faahiti aˈena tatou i te mau irava i muri nei. I teie nei râ, ia tuatapapa maite na outou i te reira ma te faaau i te tahi atu mau irava i horoahia mai ei faahororaa, a feruri maite noa ˈtu ai i nia i te mea ta outou e tia ia rave no te faaau i to outou oraraa i nia i taua mau faataaraa o te mau mea i tohu-atea-hia mai.

 Te mau “mamoe ê atu”. (Ioane 10:16.)

 Eaha te tia i te taata e faaroo mau ra i te reo o Iesu, ia rave (Ioane 10:27; Mat. 9:9; Eph. 4:17-24)?

 Nafea tatou e nehenehe ai e faaite e e farii mau ra tatou ia Iesu Mesia ei “tiai hoê ra” no tatou? (Mat. 23:10, 11.)

 Te mau “mamoe” i roto i te parabole no nia i te mau mamoe e te mau puaaniho (Mat. 25:31-46).

 O vai ma te mau “taeae” o te Mesia ta taua mau “mamoe” ra e hamani maitai ra (Heb. 2:10, 11; 3:1)?

  I roto i tei hea mau tupuraa fifi roa to ratou titauraahia ia tahoê atu i te mau taeae o te Mesia e vai ra â i nia i te fenua nei? E eaha te ohipa ta ratou e turu ra ma te ore e taiva (Apo. 12:12, 17; Mat. 24:14; 28:19, 20)?

 Te mau taata e ora ˈtu e tei tapaohia e te taata farii inita a te taata papai parau ra (Ezek. 9:1-11).

 Nafea ratou e haapapu ai e aita roa ˈtu ratou e turu nei i te mau mea faufau i ravehia i roto i te amuiraa faaroo kerisetiano, e faahohoˈa ra i teie mahana i te Ierusalema taiva (Apo. 18:4, 5)?

 Eaha to roto i “te tapao” e faataa ê ra ia ratou i te mau taata e faahua parau ra e e kerisetiano ratou e o te riro hoi i te faaora ia ratou (Pet. 1, 3:21; Mat. 7:21-27; Ioane 13:35)?

6. I roto i ta ˈna faataaraa parau no nia i te “feia rahi roa”, nafea o Ioane e tauturu mai ia tatou ia taa e no te aha ra oia i paruruhia ˈi?

⁶ Te horoa mai nei te faataaraa parau no nia i te “feia rahi roa” e itehia ra i roto i te Apokalupo 7:9-15 i te tahi atu â mau haamaramaramaraa faufaa mau. Inaha, na roto i teie faataaraa mai i te huru o te “feia rahi roa” i muri aˈe i te “ati rahi”, te huti atoa ra te mau papai i to tatou manaˈo i nia i te tahi mau tumu faufaa mau no reira hoi ratou i paruruhia ˈi.

7. Eaha te ohipa i ravehia nei e te mau melo o te “feia rahi roa” na mua ˈˈe i te “ati rahi”, e na te aha e haapapu maira i te reira?

⁷ Noa ˈtu â ïa e no roto mai ratou i te mau nunaa atoa, te mau opu atoa, te mau taata atoa, te mau reo atoa, te faataahia maira te parau no te mau melo no te feia rahi roa i “te tia-noa-raa i mua i te terono”, i te tahoêraa i to ratou reo no te arue ia Iehova, Tei parahi i nia i te terono, ei Arii Mana hope o te ao nei. Ua faaite ratou na roto i to ratou huru oraraa e te turu papu ra ratou i ta ˈna faatereraa. Ua “horoi” atoa ratou “i to ratou ahu, e ua teatea, i te toto o te Arenio ra”, ei haapapuraa e e mea hinaaro mau na ratou te mau maitai o te tusia taraehara o Iesu, te Arenio a te Atua (Ioane 1:29; Ioane 1, 2:2).  Ma te faaroo, ua pûpû ratou ia ratou no te Atua i nia i te niu o taua tusia ra, e ua faataipe ratou i taua opuaraa na ratou ra na roto i te bapetizoraa ia ratou i roto i te pape, e inaha, i teie nei, e tiaraa viivii ore atura ïa to ratou i mua i te aro o te Atua, ia au i te teatea o to ratou mau ahu. Aita roa ratou i tapea ia ratou i te faaite tahaa noa i mua i te taatoaraa i to ratou faaroo i roto i te Tamaiti a te Atua (Mat. 10:32, 33). Ia au i taua mau manaˈo ra, te itehia ra ratou i roto i te hiero varua o te Atua, i roto i to ˈna fare i pûpûhia no ta ˈna haamoriraa i roto i te ao nei. Oia mau, te tavini ra taua mau taata haamori ra i te Atua “[ma te hoê taviniraa moˈa] i te rui e te ao”. No reira, ua itehia ratou ei mau taata e ore roa ˈtu e taiva i te haamoriraa mau e e mau taata poro no to ˈna Basileia. — Isa. 2:2, 3.

8. Ia fanaˈo mau tatou i taua mau haamaramaramaraa ra, eaha te tia ia tatou ia rave?

⁸ No outou anei te mau haamaramaramaraa o teie mau parau tohu? E tia anei ia outou ia taui i to outou huru oraraa i roto i te tahi mau tuhaa ia au maite â oia teie mau faataaraa parau? Mai te peu e e tia, teie ïa te taime tano.

Te oraraa i roto i te hoê paradaiso varua

9. Mea nafea to Ioane faataaraa mai i te mau haamaitairaa varua e fanaˈohia nei e te “feia rahi roa”?

⁹ Te tiaturi ra anei outou e tei roto atoa outou i teie “feia rahi roa” o te mau taata e ora ˈtu? Mai te peu e e ua faaau outou ia outou i nia i te mau haerea tia o Iehova, e tia ïa ia outou mai teie atu nei ia haamata i te fanaˈo i te mau huru oraraa i tupuhia mai e tei haapoto-noa-hia te parau na roto i te parau ra “paradaiso varua”. Ua faaroo te aposetolo Ioane i teie parau tǎpǔ e na ô ra e: “E ore ratou e poia faahou, e ore hoi e poihâ faahou: e ore hoi ratou e tiaria e te mahana e te veavea. Na te Arenio hoi tei parahi i ropu i te terono ra e faaamu ia ratou, e e aratai hoi ia ratou i te mau pape ora pihaa ra; e na te Atua e horoi hua i to ratou roimata.” (Apo. 7:16, 17). Nafea ïa te reira e itehia ˈi no outou iho?

10. a) I te pae varua, aita te “feia rahi roa” i ‘poia e i poihâ faahou’, i roto i tei hea auraa? b) Te ite atoa ra anei outou i te reira?

 ¹⁰ Na mua ˈˈe outou e fanaˈo ai i te aupuraa aroha mau a te Mesia, te Tiai mamoe maitai, ua poia anei outou e ua poihâ anei outou i te parau-tia (hiˈo Mataio 5:6)? Mai te peu e e, te hiai ra ïa outou i te mea ta Iehova anaˈe ra i nehenehe e horoa mai na outou na roto i te arai o ta ˈna Tamaiti. E a ite ai outou i te parau no nia i te mau haerea tia o te Atua, no nia i to ˈna hinaaro e haamou i te feia paieti ore e to ˈna atoa hamani maitai i te mau huaai a Adamu na roto i te horoaraa mai i te ravea e faaora ia ratou, mea papu maitai e a tahi ra outou e oaoa mau ai i roto i to outou oraraa. Ua tamau â te maa e te pape varua no roto mai i te parau a te Atua ta te faanahonahoraa a te Atua i horoa mai no outou, i te faatupu i roto ia outou i te hoê oaoa hohonu mau (Isa. 65:13, 14). Hau atu, mai te peu e ua pûpû outou ia outou no te Atua na roto i te arai o te Mesia, e tumu papu ïa ta outou i teie nei no te ora (hiˈo Ioane 4:32-34). Hau atu, te vai ra ïa i mua ia outou i te tiaturiraa oaoa mau e ora e a muri noa ˈtu i nia i te hoê fenua i faarirohia ei paradaiso, e na te Arenio e aratai i te “feia rahi roa” “i te mau pape ora pihaa ra”.

11. a) ‘E ore ratou e tiariahia e te veavea mahana’ i roto i tei hea auraa? b) Eaha te faufaaraa mau o te reira no outou?

¹¹ Mai te mau “mamoe” i tiaturi papu, te paruruhia ra e te arataihia ra hoi te mau melo o te “feia rahi roa” ma te hau e te Tiai mamoe maitai. No reira, ei faaauraa parau, ‘e ore hoi ratou e tiaria e te mahana e te veavea’. Eiaha râ outou e faaoti e mai te peu e no roto outou i te “feia rahi roa”, eita ïa outou e hamani-ino-hia e to teie nei ao. Eiaha, te auraa râ o teie mau parau, ua paruruhia ïa outou i te tahooraa a te Atua e au i te veavea mahana ra. Hau atu, ‘ia haamairi’ mai te Poiete i te haamouraa i nia i te mau taata paieti ore, aita ïa outou to roto i te feia e haamouhia. E nehenehe hoi taua haamaitairaa taa ê ra e vai mai e a muri noa ˈtu. — Ezek. 38:22, 23; hiˈo Salamo 11:6; 85:3, 4.

12. Nafea te Atua ia horoi mai teie atu nei i to outou roimata?

¹² No reira, mai te peu e to roto mau outou i teie “feia  rahi roa”, e rave rahi roa ïa mau tumu e oaoa ˈi outou. Oia mau, te vai ra hoi ia outou ra te tiaturiraa faahiahia mau i te iteraa ˈtu i te haamouraa o te feia paieti ore e te ite-atoa-raa outou i to outou tino e to outou feruriraa ia tiamâ roa mai i te mau faahopearaa peapea mau a te hara. Hau atu, mai teie atu nei, eita outou e mauiui faahou i te mau ati e faateimaha nei i te rahiraa o te taata no te mea aita ratou e ite o vau mau na te Atua. E, te ite nei hoi outou i te oaoa e itehia nei e te nunaa o Iehova to ratou Atua (Sal. 144:15b). Mea na reira ïa outou ia haamata i te ite i te tupuraa i te parau tohu i muri nei e na ô ra e: “E na te Atua e horoi hua i to ratou roimata.”

13. Na te aha e faarahi atu â i te mau oaoa o te paradaiso varua i roto i te tausani matahiti faatereraa a te Mesia?

¹³ E ora ˈtu te paradaiso varua i te hopea o te amuiraa o te mau mea nei, e na reira atoa te “feia rahi roa”. Mai te peu e tei roto outou i taua “nahoa taata” ra, e tamau â ïa outou i te fanaˈo i te hoê maa varua hinuhinu maitai i roto i te roaraa o na matahiti faatereraa hoê tausani a te Mesia. E hohonu roa ˈtu â to outou ite no nia i te Atua ia tamau noa outou i te ite atu i ta ˈna opuaraa hanahana i te tupu-mau-raa. E rahi atu â to outou oaoa ia farii atu outou i te mau taata pohe e faatia-faahou-hia mai e o te tahoê mai e o outou i roto i te haamoriraa mau. E mauruuru roa te taatoaraa o te mau tavini haapao maitai a te Atua i te mau haamaitairaa pae tino e noaa ia ratou e ia ite roa ˈtu ratou i te tapao o te aroha rahi o Iehova i nia ia ratou. — Isa. 25:6-9; Iak. 1:17.

Ei haapoto-noa-raa

● Te tahoê ra te Bibilia i te “feia rahi roa” i tei hea huru tupuraa rahi mau, e nafea?

● Mai te peu e e hinaaro mau tatou e faaô atu ia tatou i roto i teie feia rahi roa e fanaˈo i te haamaitairaa a te Atua, eaha te tia ia tatou ia rave?

● Eaha te faufaaraa o te mau haamaitairaa o te paradaiso varua no outou?

[Uiraa haapiiraa]