Pene 11

‘E tamau anaˈe na i te imi na mua i te Basileia’

1. a) No te aha Iesu i parau ai e e imi na mua i te Basileia, hau atu i te 1 900 matahiti i teie nei? b) Eaha te uiraa ta tatou e tia ia ui?

 HAU ATU i te 1 900 matahiti i teie nei, i roto i te hoê oreroraa parau ta ˈna i horoa i Galilea, ua aˈo atu o Iesu i te feia e faaroo maira ia ˈna i te na ôraa e: “E mata na râ outou i te imi i te basileia o te Atua, e te parau-tia na ˈna.” No te aha râ oia i na reira ˈi i te parau? Eita anei oia e faaariihia tau senekele noa i muri aˈe? Oia. Teie râ, na roto i te Basileia a te Mesia e faatiamâ ˈi Iehova i to ˈna iˈoa moˈa e e faatupu ai oia i ta ˈna opuaraa faahiahia mau no te fenua nei. Te taata o te haafaufaa i taua ohipa ra, e tuu atu ïa oia i taua Basileia ra i te parahiraa matamua i roto i to ˈna oraraa. E ohipa papu mau hoi te reira i te senekele matamua, e ua haapapu-faahou-hia i teie mahana no te mea te faatere nei te Basileia. Te faaite ra anei to outou huru oraraa e te imi na mua ra outou i te Basileia o te Atua? — Mat. 6:33.

2. Eaha te mau ohipa ta te mau taata e maimi uˈana nei?

² Mea anaanatae roa na te rahiraa o te taata i te tahi atu mau ohipa. Te imi uˈana nei ratou i te moni e tae noa ˈtu i te ahu, te maa e te tahi atu mau taoˈa aore ra ohipa e navenave ai ratou ra o te hoohia mai hoi e ratou (Mat. 6:31, 32). Te faaite nei to ratou huru oraraa e mea anaanatae rahi na ratou ia ratou iho e i te mau ohipa e navenave ai ratou ra. I roto i to ratou oraraa, ua tuu ratou i te Atua i te piti o te parahiraa mai te peu e te tiaturi ra ratou ia ˈna.

3. a) Ia au i te mau parau a Iesu, eaha te mau taoˈa faufaa e tia i ta ˈna mau pǐpǐ ia imi, e no te aha? b) No te aha eita ratou e haapeapea rahi roa no to ratou mau hinaaro i te pae materia?

 ³ Ua horoa râ Iesu i teie aˈoraa i ta ˈna mau pǐpǐ: “Eiaha e haapue noa i te taoˈa na outou i teie nei ao.” Oia hoi, eita taua mau taoˈa ra e vai e a muri noa ˈtu. Ua parau faahou atu oia e: “E haapue râ i te taoˈa na outou i te raˈi”, ma te tavini ia Iehova. Ua faaitoito atu oia ia ratou ia tapea i te hoê mata “maitai”, ia vai to ratou feruriraa taatoa i nia i te hoê noa ohipa, oia hoi: te faatupuraa i te hinaaro o te Atua. Ua parau oia ia ratou e: “O outou nei hoi, e ore e tia ia faaroo i te Atua e te Mamona.” Tera râ, nafea ïa tatou no to tatou mau hinaaro i te pae materia, mai te maa, te ahu e te nohoraa? Teie te manaˈo o Iesu: “Eiaha e tapitapi i to outou ora.” Ua huti oia i te ara-maite-raa o ta ˈna mau pǐpǐ i nia i te mau manu ta te Atua e faaamu ra. Ua aˈo atu oia ia ratou ia huti atoa ratou i te hoê haapiiraa no nia i te mau tiare ta te Atua e faaunauna nei. Eaha ˈtu â ïa no te mau taata maramarama o te tavini nei ia Iehova, e ere anei ïa ratou i te mea faufaa aˈe i te tahi atu mau mea i poietehia? Ei faahoperaa, ua na ô atura Iesu e: “E mata na râ outou i te imi i te basileia o te Atua, e te parau-tia na ˈna; e amui-atoa-hia mai taua mau mea [hinaarohia] ra ia outou.” (Mat. 6:19-34). Te tiaturi ra anei outou i te reira? Te haapapu ra anei ta outou mau ohipa i te reira?

Eiaha roa ˈtu ia aramoinahia ia outou i te parau mau o te Basileia

4. Ia haapeapea rahi roa anaˈe te hoê taata no te mau taoˈa materia, e nehenehe te reira e aratai ia ˈna i hea? A horoa mai i te hoê hiˈoraa.

⁴ Te taata e haapeapea rahi roa i to ˈna feruriraa no te mau ohipa materia, e nehenehe hoi oia e roohia i te ati. E riro paha te hoê taata i te parau e mea anaanatae roa na ˈna i te parau no nia i te Basileia; teie râ, mai te peu e e tuu oia i te tahi atu mau ohipa i te parahiraa matamua i roto i to ˈna mafatu, e nehenehe ïa te parau  mau o te Basileia e aramoina roa i roto i to ˈna mafatu (Mat. 13:18, 19, 22). No reira i te hoê mahana, ua ani maira te hoê taata moni roa ia Iesu e: “Eaha vau e noaa ˈi te ora mure ore?” I mua i te pahonoraa a Iesu, ua faaite atura oia e e taata maitai oia i te pae morare e e haerea tia hoi to ˈna i nia i to ˈna mau taata-tupu. Teie râ hoi te fifi: Mea faufaa rahi roa na ˈna ta ˈna mau taoˈa. Eita ta ˈna e nehenehe e faarue i te reira no te pee atu i te Mesia. Inaha, e nehenehe hoi oia e riro mai ei arii i pihai iho ia Iesu i roto i te Basileia i nia i te raˈi, aita râ oia i farii i te reira. Ua parau atura Iesu e: “Te faaô taiata o te feia taoˈa rahi i te basileia o te Atua e!” — Mareko 10:17-23.

5. a) Ia au i te mau parau a Paulo, e mauruuru noa ïa o Timoteo i te aha, e no te aha? b) Nafea o Satani ia faaohipa i te “nounou taoˈa” ei marei ino mau?

⁵ Tau matahiti i muri aˈe, ua papai aˈera te aposetolo Paulo ia Timoteo i Ephesia, te hoê oire faufaa roa i te pae tapihooraa tauihaa. Teie ta ˈna i faahaamanaˈo atu ia ˈna: “Aita roa hoi a tatou e taoˈa i hopoia mai i teie nei ao; e ua itea-papu-hia hoi e aita roa e taoˈa e tia ia hopoia atoa ia haere ê tatou ra. E teie nei, e maa ta tatou, e te ahu, ia mauruuru tatou i te reira.” E mea maitai hoi ia rave i te ohipa ia noaa mai ia tatou i te ‘maa e te ahu’ e au ia tatou e to tatou utuafare. Ua faaara ˈtu râ o Paulo e: “Area te feia e mârô e ia rahi te taoˈa, e roohia ïa i te ati, e te marei, e te nounou maamaa e rave rahi, e ino ai te taata ra, e topa taue ai te taata i roto i te ino rahi faarue roa ra, e te pohe mure ore.” Mea aravihi roa o Satani. E haamata rii mǎrû noa oia i te faahema i te hoê taata, e i muri iho, e faarahi noa ˈtu oia i te mau tamataraa. Ei hiˈoraa, e pûpûhia ˈtu paha na te hoê kerisetiano i te hoê tino moni hau atu te roaa ra ia ˈna iho, te hoê ohipa moni maitai aˈe, e nehenehe râ te reira e faaiti i te taime i faataahia e ana no te mau ohipa i te pae varua. Mai te peu e eita tatou e ara, e nehenehe ïa te “nounou moni” e haamoe i to tatou hinaaro i te mau faufaa o te Basileia. Mai ta Paulo i parau, “ua taa ê roa hoi te tahi pae i te parau nei i te titau-noa-raa i te reira [te nounou moni], e ua patiatia  pupu roa ia ratou iho i te oto e rave rahi”. — Tim. 1, 6:7-10.

6. a) Mai te peu e eita tatou e hinaaro e topa i roto i taua marei ra, eaha ïa ta tatou e rave? b) E haerea tano anei te reira, ia hiˈohia te huru o te ao nei i te pae faanavairaa faufaa?

⁶ No to ˈna aroha rahi i to ˈna taeae kerisetiano ra o Timoteo, ua aˈo atura ïa o Paulo ia ˈna i te na ôraa e: “E maue ê oe i te reira”. Ua parau atoa oia e: “Rohi hua oe i te rohiraa maitai ra i te faaroo.” (Tim. 1, 6:11, 12). E tia ia tatou ia tutava uˈana mai te peu e eita tatou e hinaaro e pee atu i te huru oraraa materia o te ao e haaati ra ia tatou. Teie râ, mai te peu e e aro tatou no to tatou faaroo, eita roa ˈtu ïa Iehova e faarue mai ia tatou. Noa ˈtu te hoo rahi o te oraraa aore ra te huru tupuraa e itehia ra i te pae no te ohipa, e haapao mai iho â oia ia noaa mai ia tatou i te mau mea e hinaaro-mau-hia ra e tatou nei. — Heb. 13:5, 6.

Te hiˈoraa o te mau pǐpǐ matamua

7. I to Iesu tonoraa ˈtu i ta ˈna mau aposetolo e poro i Iseraela, eaha te mau faaueraa ta ˈna i horoa ˈtu na ratou? No te aha e mea tano mau taua mau aˈoraa ra i taua taime ra?

⁷ I muri aˈe i to ˈna faaineine-maitai-raa ia ratou, ua tono atura Iesu i ta ˈna mau aposetolo e poro i te parau apî maitai i Iseraela. Teie hoi ta ratou parau anaanatae mau: “Te fatata mai nei te basileia o te ao”. Oia mau, tei rotopu o Iesu Mesia iho, te Arii i faatavaihia, ia ratou. I te mea hoi e te tavini ra te mau aposetolo i te Atua, ua faaitoito atura Iesu ia ratou ia tiaturi i to ˈna Metua, ma te ite e e aupuru maitai mai oia ia ratou. No reira ˈtura hoi o ˈna i parau ai e: “Eiaha ei taoˈa e hopoihia i to outou tere, eiaha ia taipiti raau, eiaha ei pute, eiaha ei pane, eiaha ei moni, eiaha ia taipiti ahu fafao i te taata hoê. E te fare e farii mai ia outou, ei reira parahi ai, e reva noa ˈtu outou.” (Mat. 10:5-10; Luka 9:1-6; 10:4-7). E haapao iho â ïa o Iehova e ia haamâha mai te mau taeae Iseraela, tei matau hoi i te farii maitai i te mau taata ěê, i te mau mea e hinaarohia ra e to ˈna mau tavini.

8. a) No te aha Iesu i taui ai i ta ˈna mau aˈoraa na mua noa ˈˈe i to ˈna poheraa? b) Eaha râ te tia ia vai noa i te parahiraa matamua i roto i to ratou oraraa?

 ⁸ Na mua iti aˈe i to ˈna poheraa, ua faaite atura Iesu i ta ˈna mau aposetolo e, i teie nei, e ohipa ratou i roto i te mau huru tupuraa taa ê mau. Oia mau, no te opaniraa a te hau, eita ˈtura ïa ratou e fariihia i Iseraela mai mutaa ihora. Hau atu â, ua fatata roa te taime ratou e haere ai e poro i te parau o te Basileia i te mau nunaa e ere i te ati Iuda. No reira, e tia ˈtura ïa ia ratou ia rave i te “pute” e te “pane”. Eita râ ratou e faaea i te tamau i te imi na mua i te Basileia e te parau-tia a Iehova, ma te tiaturi e e haamaitai mai oia i te mau tutavaraa ta ratou e rave ia noaa mai te maa e te ahu e hinaarohia e ratou. — Luka 22:35-37.

9. a) Mea nafea to Paulo raveraa ia vai noa te Basileia i te parahiraa matamua i roto i to ˈna oraraa? b) Mea nafea to ˈna haapaoraa i to ˈna mau hinaaro i te pae materia? c) Eaha te mau aˈoraa ta ˈna i horoa no taua tuhaa ra?

⁹ Ua horoa mai te aposetolo Paulo i te hoê hiˈoraa faahiahia mau no te faaohipa i teie aˈoraa a Iesu. Oia mau, ua haamau aˈera Paulo i to ˈna oraraa i nia i ta ˈna taviniraa (Ohi. 20:24, 25). Ia ˈna i haere e poro i roto i te hoê fenua, ua hamani oia i te ie, ei imiraa na ˈna. Aita oia i tiai noa e na vetahi ê e haapao mai i to ˈna mau hinaaro i te pae materia (Ohi. 18:1-4; Tes. 1, 2:9; Kor. 1, 9:18). Teie râ, ua farii oia ma te mauruuru roa i te farii-maitai-raa e te mau taoˈa i pûpûhia mai e te feia e hinaaro ra e faaite i to ratou here e to ratou mauruuru ia ˈna (Ohi. 16:15, 34; Phil. 4:15-17). Aita oia i faaitoito i te mau kerisetiano, vahine aore ra tane, ia ore e haapao i ta ratou mau hopoia utuafare no te haere e poro, ia amo râ ratou i ta ratou mau hopoia huru rau ma te aifaito maitai. Ua faaitoito oia ia ratou ia rave i te ohipa, ia here i to ratou utuafare e ia horoa noa na vetahi ê (Eph. 4:28; Tes. 2, 3:7-12; Tito 2:3-5). Ua faaitoito atoa oia ia ratou ia tiaturi papu i te Atua eiaha râ i ta ratou mau taoˈa materia, e ia faaite na roto i to ratou huru oraraa e te ite ra ratou e eaha mau na te mau ohipa faufaa roa ˈˈe i roto i te oraraa. Ia au i te mau haapiiraa a Iesu, e tia ïa ia ratou ia imi na mua i te Basileia e te parau-tia a te Atua. — Phil. 1:9-11.

 E ara ia riro noa te Basileia ei tapitapiraa matamua na outou i roto i to outou oraraa

10. a) Eaha te auraa o te parau ra ‘e imi na mua i te Basileia’? b) Eaha râ ta tatou e haapao atoa?

¹⁰ E hia taime ta tatou iho e horoa nei no te faaiteraa i te parau apî maitai o te Basileia i to tatou mau taata-tupu? Tei te huru iho â ïa o to tatou oraraa. Teie râ, te mea faufaa roa ˈˈe, o te hohonuraa ïa o to tatou mauruuru. Eiaha ia moehia ia tatou e aita roa ˈtu Iesu i parau e: ‘A imi i te Basileia mai te peu e aita ˈtu ta outou e ohipa.’ Ua ite râ oia i te faufaaraa o te parau no te Basileia, e no reira oia i faataa ˈi eaha mau na te hinaaro o to ˈna Metua i te na ôraa e: “E titau râ outou i te basileia o te Atua”; aore ra, ia au i te aposetolo Mataio: “E mata na râ outou i te imi i te basileia o te Atua, e te parau-tia na ˈna.” (Luka 12:31; Mat. 6:33). E tia iho â i te rahiraa o tatou ia rave i te hoê ohipa no to tatou mau hinaaro i te pae materia aore ra no te mau hinaaro o to tatou utuafare. Mai te peu râ e e faaroo hohonu mau to tatou, e haamau ïa tatou i to tatou oraraa i nia i te ohipa o te Basileia ta Iehova i horoa mai na tatou, ma te haapao atoa hoi i ta tatou mau hopoia i te pae no te utuafare. — Tim. 1, 5:8; Mas. 29:15.

11. a) Eaha te parabole ta Iesu i horoa no te faaiteraa e eita pauroa te taata e nehenehe e pûpû hoê â rahiraa taime i roto i te pororaa i te Basileia? b) Eaha te mau huru te tia ia haapaohia?

¹¹ Mea rahi aˈe te taime ta vetahi e horoa no te taviniraa i ta te tahi pae. Teie râ, i roto i ta ˈna parabole no nia i te mau huru repo taa ê, ua faaite maira Iesu e te mau mafatu atoa tei faahohoˈahia i te repo maitatai, e hotu mai iho â. Mai te aha râ te huru? Mea taa ê to te tahi huru i to te tahi huru. E tia ïa ia hiˈohia te paari, te oraora-maitai-raa e te maˈi aore ra te mau hopoia i te pae no te utuafare. Mai te peu râ e ua î roa to tatou mafatu i te mauruuru rahi, e nehenehe noa tatou e rave hau atu â. — Mat. 13:19, 23.

12. Eaha te tapao maitai roa i te pae varua ta te mau taurearea e nehenehe e feruri?

¹² Mea maitai ia haamau i te tahi mau tapao no te faarahi atu â i ta tatou taviniraa o te Basileia. E nehenehe  te mau taurearea e feruri i nia i te hiˈoraa maitai roa o Timoteo, te hoê kerisetiano apî itoito mau (Phil. 2:19-22). Eaha ˈtu â te ohipa maitai aˈe ta ratou e nehenehe e rave maoti hoi te taviniraa ma te taime taatoa, ia oti ta ratou tau haapiiraa? E mea faufaa atoa no te feia paari aˈe ia titau i te mau tapao i te pae varua.

13. a) O vai te nehenehe e faataa e eaha ta outou iho e nehenehe e rave i roto i te taviniraa a te Atua? b) Mai te peu e te imi na mua nei iho â tatou i te Basileia, eaha ïa ta tatou e faaite?

¹³ Eiaha tatou e faaino ia vetahi ê na roto i te parauraa e e nehenehe ta ratou e rave hau atu â, e turai râ te faaroo mau ia tatou ia tutava ia haere tatou iho i mua i roto i te taviniraa i te Atua ia au i ta tatou iho e nehenehe e rave (Roma 14:10-12; Gal. 6:4). Mai tei itehia i roto i te aamu o Ioba, te parau nei o Satani e mea haapeapea rahi aˈe na tatou i ta tatou mau taoˈa, i to tatou iho vai-maitai-raa. Ia au i ta ˈna parau, te tavini noa nei tatou i te Atua ma te miimii. Mai te peu e te imi mau ra tatou i te Basileia na mua ˈˈe i te mau mea atoa, e haapapu atoa ïa tatou e e haavare ino mau o Satani. E faaite atoa tatou e e ere te mau taoˈa materia aore ra to tatou iho vai-maitai-raa, te ohipa faufaa roa ˈˈe na tatou i roto i to tatou oraraa, o te taviniraa râ i te Atua. E faaite ïa ta tatou mau parau e ta tatou mau ohipa e te here hohonu nei tatou ia Iehova, te turu papu nei tatou i ta ˈna faatereraa arii mana-hope e mea here na tatou i to tatou taata-tupu. — Mas. 27:11; Ioba 1:9-11; 2:4, 5.

14. a) No te aha e mea faufaa ia faataa i te hoê tabula ohipa no te pororaa? b) E hia taime ta te mau Ite e rave rahi e pûpû nei no ta ratou taviniraa, e no te aha?

¹⁴ E nehenehe te hoê tabula ohipa tatuhaa-maitai-hia e tauturu ia tatou ia faarahi atu â i ta tatou ohipa e rave nei. E ‘taime haapaohia’ aore ra e “tau mau” ta Iehova iho no te faatupuraa i ta ˈna opuaraa, e e tia hoi ia tatou ia pee i to ˈna hiˈoraa (Ex. 9:5; Mareko 1:15; Gal. 4:4). Mai te peu e e nehenehe, mea maitai roa ia poro hoê aore ra e rave rahi taime i roto i te hebedoma, i te mahana i faataahia e outou. I roto i te ao taatoa nei, e rave rahi tausani Ite o Iehova tei rave i te taviniraa pionie tauturu e teie e horoa nei e piti hora aore ra hau atu i te mahana tataitahi i roto i te pororaa. Te rave nei ratou i te reira  i roto i te matahiti taatoa aore ra e rave rahi taime i roto i te matahiti. Te tahi mau tausani ê atu, te tavini nei ïa ratou ei pionie tamau e te horoa nei ratou fatata e toru hora i te mahana no te poro i te Basileia. Te tahi pae ra, e pionie taa ê aore ra e mitionare ratou e ua hau atu ïa te taime ta ratou e horoa nei no te taviniraa. E nehenehe tatou e imi i te mau ravea atoa no te faaite i te tiaturiraa no nia i te Basileia i te feia atoa e faaroo mai (hiˈo Ioane 4:7-15). E tia i te taata taitahi ia feruri maitai i nia i te faufaaraa mau o te parau tohu a Iesu e na ô ra e: “E e parau-haere-hia te evanelia o te basileia nei e ati noa ˈˈe teie nei ao, ia ite te mau fenua atoa: o te hopea ihora ïa i reira ra.” E hinaaro ïa tatou e tahoê atoa ˈtu i roto i teie ohipa ia au i ta tatou e nehenehe e rave. — Mat. 24:14; Eph. 5:15-17.

15. I to outou manaˈoraa, no te aha e mea tano mau iho â te aˈoraa i papaihia i roto i te Korinetia 1, 15:58 no ta tatou taviniraa?

¹⁵ I roto i te mau fenua atoa o te ao nei, noa ˈtu e eaha to ratou nunaa, te ohipa nei te mau Ite o Iehova ma te tahoê i roto i teie taviniraa faahiahia roa. Te haapao nei ratou i teie aˈoraa faauruahia a te Bibilia e na ô ra e: “Ia itoito outou, eiaha e aueue, ia rahi â te rave i te ohipa a te Fatu eiaha e faaea, ua ite hoi outou e, e ere i te mea faufaa ore te ohipa a te Fatu ta outou e rave na.” — Kor. 1, 15:58.

Ei haapoto-noa-raa

● I te mea hoi e ua faaitoito mai Iesu ia tatou ia imi na mua i te Basileia, eaha ïa ta tatou e tuu i te piti o te parahiraa?

● Nafea tatou ia haapao i to tatou mau hinaaro e te mau hinaaro o to tatou utuafare? Eaha te tauturu ta Iehova e horoa mai nei i roto i teie tuhaa?

● Mai te peu e te tahoê nei tatou i roto i te taviniraa o te Basileia, mea faufaa anei te taime ta tatou e horoa nei no te reira? No te aha?

[Uiraa haapiiraa]