Pene 18

Ia faaohipa anaˈe na tatou i te paieti i roto i to tatou utuafare

1. a) I muri aˈe i to ratou iteraa i te mau faaueraa tumu no nia i te faaipoiporaa, eaha te mau tauiraa ta te mau taata e rave rahi i faatupu? b) E no te hoê kerisetiano, eaha atoa te auraa o te oraraa utuafare?

 I ROTO i te mau parau mau mahanahana ta tatou i ite mai a haamata ˈi tatou i te tuatapapa i te Bibilia, te vai ra ïa te mau haapiiraa no nia i te faaipoiporaa e no nia i te oraraa utuafare. Ua farii tatou ia Iehova ei Tumu no te faaipoiporaa, e ua ite aˈera hoi tatou e ua papai oia i roto i te Bibilia i te mau aˈoraa faahiahia roa ˈˈe no nia i te oraraa utuafare. A ite ai ratou i taua mau aˈoraa ra, ua faarue ihora e rave rahi mau taata i te peu taiata e ua haamana i to ratou faaipoiporaa, e e nehenehe mau â tatou e haapopou ia ratou. Teie râ, te titau maira te oraraa utuafare kerisetiano hau atu â i te reira. Te faaau atoa maira te reira i to tatou huru i nia i te tamauraa o te mau taairaa i roto i te faaipoiporaa, i ta tatou huru faaohiparaa i ta tatou mau hopoia i roto i te utuafare e to tatou huru i nia i te mau melo o to tatou utuafare. — Eph. 5:33 e tae atu i te 6:4.

2. a) Te feia i ite i te Bibilia, te faaohipa noa ra anei ratou i ta ˈna mau aˈoraa i roto i to ratou oraraa utuafare? b) Mea nafea to Iesu e to Paulo faaiteraa e mea faufaa mau ia faaohipa i te reira?

² E rave rahi milioni taata tei ite maitai e eaha ta te Bibilia e parau ra no nia i taua mau tumu parau nei. Teie râ, ia farerei ratou i te tahi mau fifi i roto i to ratou oraraa utuafare, eita ratou e faaohipa i ta ˈna mau aˈoraa. E o tatou? Eita e ore e, aita hoê noa ˈˈe i rotopu ia tatou nei teie e hinaaro ia riro mai te mau taata ta Iesu i faautua no te mea te faahuru ê ra ratou i te ture e faaue ra i te  mau tamarii ia faahanahana i to ratou mau metua, ma te manaˈo hoi e ia faahua paieti ratou ra, e navai noa ïa (Mat. 15:4-9). Eita tatou e hinaaro e riro mai te mau taata e hohoˈa paieti noa to ratou, e e moehia râ ia ratou i te faaohipa i te reira i nia “i to ratou iho fetii”. Eita, te hinaaro nei râ tatou e faaohipa i te paieti mau o tei riro hoi ei “taoˈa rahi mau”. — Tim. 1, 5:4; 6:6; Tim. 2, 3:5.

Ia vai tamau noa te faaipoiporaa

3. a) Eaha te itehia nei i roto i te mau faaipoiporaa e rave rahi, eaha râ te tia ia tatou ia opua? b) Ma te tauturuhia e ta outou Bibilia, a pahono mai i te mau uiraa i uihia ˈtu i roto i te paratarapha no nia i te vai-tamau-raa o te faaipoiporaa.

³ E pinepine noa ˈtura i te itehia te mau taairaa i rotopu i na taata faaipoipo i te paruparu. Te opua taue nei hoi te tahi mau taata tei oti i te faaipoipo a 20, 30 aore ra 40 atura matahiti, i te “faaea” i te tahi atu tane aore ra vahine. I te tahi aˈe pae, e ere i te mea varavara faahou ia faaroo i te parau no te tahi mau taata faaipoipo apî tei faataa i muri aˈe te tahi noa tau avae faaipoiporaa. Teie râ, noa ˈtu eaha te huru o te mau taata e haaati nei ia tatou, e tia ia tatou ia hinaaro mau e ia auhia mai tatou e Iehova, te Atua o ta tatou e haamori nei. Eaha râ hoi ta ta ˈna Parau e faaite mai nei no nia i taua tumu parau ra?

 Ia faaipoipo te hoê tane e te hoê vahine, e faaea tahoê noa raua e hia maororaa (Roma 7:2, 3; Mareko 10:6-9)?

 Eaha te tumu hoê roa e faatiahia ˈi te faataaraa i mua i te aro o te Atua (Mat. 19:3-9; 5:31, 32)?

 Eaha to Iehova manaˈo i nia i te faataaraa o te ore e faatiahia e ta ˈna ra Parau (Mal. 2:13-16)?

 Te faaue maira anei te Bibilia i te mau kerisetiano ia faataa no te faatitiaifaro i to ratou mau fifi (Kor. 1, 7:10-13)?

4. No te aha vetahi mau faaipoiporaa e vai maoro ai, noa ˈtu te mau huru e itehia nei i roto i teie nei ao?

⁴ No te aha vetahi mau faaipoiporaa e vai maoro ai, area te tahi pae ra aita ïa, noa ˈtu e te parau ra na taata faaipoipo e e nau kerisetiano raua? Parau mau, e manuïa rahi aˈe te faaipoiporaa ia tiai te tane e te vahine ia taeahia ia raua te huru paari mau a faaipoipo atu ai. Taa ê atu i te reira, mea faufaa roa atoa ia faaipoipo i te hoê hoa e anaanatae ra i te mau mea e anaanatae-atoa-hia e tatou iho e o ta tatou hoi e nehenehe e faaite tahaa ˈtu i to tatou  mau manaˈo. Mea faufaa roa ˈtu â râ ia faaohipa tatou iho i te paieti mau. Te taata e here mau ra ia Iehova e o tei papu maitai ia ˈna e ua afaro to ˈna mau haerea, te vai ra ïa ia ˈna ra te hoê niu faahiahia mau no te faatitiaifaro i te mau fifi e nehenehe e tupu mai (Sal. 119:97, 104; Mas. 22:19). Eita to ˈna taatiraa e faainohia i roto i to ˈna hohonuraa e te feruriraa e turai ia ˈna ia manaˈo e e nehenehe noa ta ˈna e faaore i te reira na roto i te faataa-ê-raa aore ra te faataaraa mai te peu noa ˈtu e e tupu mai te tahi fifi. Eita atoa oia e rave i te mau hapa a to ˈna hoa ei hororaa na ˈna no te ore e amo i ta ˈna iho hopoia. E haapii râ oia i te faaruru i te mau fifi o te oraraa nei, ia nehenehe ia itea ia ˈna te mau ravea no te faatitiaifaro i te reira.

5. a) E taai-maitai-hia to tatou manaˈo no nia i te faaipoiporaa i nia i to tatou taiva-ore-raa ia Iehova, i roto i tei hea tuhaa? b) Noa ˈtu â ïa e tei mua tatou i te mau fifi ino mau, eaha te mau haamaitairaa te noaa mai ia tatou ia tapea papu tatou i te mau faaueraa tumu a Iehova?

⁵ Mai ta tatou iho hoi i ite, te parau nei te Diabolo e mai te peu e e roohia tatou iho i te mau ati e rave rahi, eita ïa tatou e tâuˈa faahou i te mau haerea o Iehova e e riro hoi tatou i te faaoti e mea maitai aˈe e na tatou iho e opua eaha te mea maitai aore ra te mea ino. Te feia râ e faaite i to ratou haapao maitai no Iehova, eita roa ˈtu ïa ratou e na reira (Ioba 2:4, 5; Mas. 27:11). Aita te rahiraa o te mau Ite a Iehova, tei faaoromai i te hamani-ino-raa a to ratou hoa aita i roto i te parau mau, i faarue i te mau faaauraa ta ratou iho i farii a faaipoipohia ˈi ratou (Mat. 5:37). I muri aˈe e rave rahi matahiti, ua oaoa roa vetahi o ratou i te iteraa i to ratou hoa ia apiti atoa mai ia ratou no te tavini ia Iehova (Kor. 1, 7:16; Pet. 1, 3:1, 2). Area te feia aita to ratou hoa e horoa maira i te hoê tapao o te hoê tauiraa e te feia tei faaruehia e to ratou hoa faaipoipo no to ratou mau-maite-raa i to ratou faaroo, te ite atoa ra ïa ratou iho e ia haapao anaˈe ratou i te mau faaueraa tumu a te Atua, e mau haamaitairaa e rave rahi ïa ta ratou i ite atu. Nafea hoi te reira? Inaha, ua fatata roa ˈtu â ratou ia Iehova, maoti te fifi e itehia ra e ratou. Ua haapii ratou e nafea ia faaohipa i te mau huru o te Atua, noa ˈtu te fifi. Te faaite maira to ratou oraraa i te mana o te paieti. — Sal. 55:22; Iak. 1:2-4; Pet. 2, 1:5, 6.

 E tia i te taata taitahi ia haapao i to ˈna tiaraa

6. Ia oaoa mau to tatou faaipoiporaa, eaha te tia ia tatou ia faatura?

⁶ Parau mau, ia oaoa mau tatou i roto i te faaipoiporaa, eita ïa e navai ia faaea amui noa te tane e te vahine. Eita, e tia râ ia raua tataitahi ia faatura i te mana i haamauhia e Iehova. Ia na reira raua e vai noa mai ïa te nahonaho-maitai-raa e te hau i roto i te utuafare. — Kor. 1, 11:3; Tito 2:4, 5; Mas. 1:8, 9; 31:10, 28.

7. Nafea ia faaohipa i te mana i roto i te utuafare?

⁷ Nafea ia faaohipa i te mana? Ia au maite ïa te reira e te mau huru o Iesu Mesia. Ua faaite papu maitai mai Iesu i to ˈna tiaraa i te pae no te tururaa i te mau haerea o Iehova; oia mau, mea au na ˈna te parau-tia e mea riri roa na ˈna ia ore te ture ia faaturahia (Heb. 1:8, 9). Eita râ te reira e tapea ia ˈna ia here i ta ˈna amuiraa, ia horoa ˈtu i te mau aˈoraa e hinaarohia ra e ana e ia aupuru ia ˈna. Maoti hoi i te riro ei taata teoteo e te tâuˈa ore i te taata, ua riro oia ei taata “mǎrû e te haehaa te aau”, ia nehenehe te feia e auraro i to ˈna mana ‘ia ite i te tamahanahana’. (Mat. 11:28, 29; Eph. 5:25-33.) Ia na reira te hoê tane e e metua tane atoa hoi i nia i to ˈna utuafare, mea papu maitai iho â ïa e te auraro ra oia iho i te Mesia, tei vaiiho mai i te hiˈoraa maitai roa no nia i te faaohiparaa i te paieti. E tia atoa i te mau metua vahine kerisetiano, ia faaite i taua mau huru nei i roto i to ratou mau auraa e ta ratou mau tamarii.

8. a) No te aha te mau huru raveraa kerisetiano e ore ai e faatupu mai i te mau faahopearaa e tiaihia ra i roto i te tahi mau utuafare? b) Eaha ïa te tia ia tatou ia rave mai te peu e tei roto tatou i taua huru tupuraa ra?

⁸ No te huru tiaraa taata hara e ite-atoa-hia ra e te huitaata atoa nei, e nehenehe te mau fifi e tupu mai. E riro paha vetahi mau taata i te au ore roa i te aratairaa a te tahi pae hou te hoê o te mau melo o to ratou utuafare e haamata ˈi i te haapii i te Bibilia. I te tahi taime, mai te huru ra ïa e eita te mau parau maitai e te mau huru hamani maitai e tâuˈahia mai. Parau mau, ua ite tatou e te faaue mai nei te Bibilia ia tatou ia haapae roa “te iria, e te riri e te avau e te faaino”. (Eph. 4:31.) Teie râ, mai te peu e tei mua tatou i te mau taata aita e taa maira, nafea  ïa tatou? Inaha, eaha to Iesu huru i mua i te mau fifi ino roa? Aita oia i pee i te huru o te feia e haamǎtaˈu maira e e faaino maira ia ˈna. Aita, ua tuu noa oia i te reira i roto i te rima o te Atua, ma te faaite papu mai e te tiaturi mau ra oia ia ˈna (Pet. 1, 2:22, 23). Oia atoa, ia tupu mai te tahi mau fifi mau i roto i to tatou utuafare, e faaite ïa tatou i to tatou paieti ma te fariu tia ˈtu i nia ia Iehova e ma te pure ia ˈna ia tauturu mai ia tatou, maoti hoi i te faaohipa i te mau ravea matauhia i roto i teie nei ao. — Mas. 3:5-7.

9. Maoti hoi i te faahapa noa ˈtu, eaha te ravea ta te mau tane kerisetiano e rave rahi i haapii i te faaohipa?

⁹ Parau mau, eita te mau tauiraa e tupu oioi noa mai mai ta tatou e hinaaro, ua riro noa râ te mau aˈoraa bibilia ei mea faufaa mau. E rave rahi mau tane tei amuamu i te mau hapa a ta ratou mau vahine, tei ite i teie nei i te tahi mau tauiraa maitai roa, i to ratou iho taa-maitai-raa eaha te huru o te Mesia i nia i ta ˈna amuiraa. Oia mau, e ere hoi te mau taata i roto i ta ˈna amuiraa i te mau taata hapa ore. Teie râ, mea here na Iesu ia ˈna, ua horoa ˈtura oia i te hiˈoraa maitai e ua tae roa oia i te horoa i to ˈna ora no ˈna. I te tahi aˈe pae, e faaohipa oia i te mau Papai no te tauturu ia ˈna ia maitai atu â, ia nehenehe oia i te pae hopea ia auhia mai e a ˈna (Eph. 5:25-27; Pet. 1, 2:21). Ua faaitoito to ˈna huru hau atu i te hoê tane kerisetiano ia riro atoa ei hiˈoraa e ia tauturu atoa ˈtu ma te here i ta ˈna vahine ia haere i mua. E faatupu taua mau huru raveraa nei i te mau faahopearaa tei hau atu i te maitai ia faaauhia i te mau faahopearaa e noaa mai ia faahapa noa ˈtu oia i to ˈna hoa aore ra ia ore roa ˈtu oia e paraparau faahou atu ia ˈna.

10. a) Nafea te hoê tane e e metua tane atoa hoi (noa ˈtu e te parau ra oia e e kerisetiano oia) e nehenehe ai e haafifi i te oraraa o te mau melo o to ˈna utuafare? b) Eaha ta tatou e nehenehe e rave no te haamaitai atu â i te huru tupuraa i roto i te utuafare?

¹⁰ Parau mau, e nehenehe atoa te mau hapa a te tane e metua tane atoa hoi o te utuafare e riro ei tumu no te mau fifi e tupu mai. Eaha ïa te tia ia rave mai te peu e aita oia e tâuˈa ˈtura i te mea e hinaarohia ra e to ˈna utuafare i te pae no te here, aore ra ia ore oia e faaohipa mau i ta ˈna mau hopoia, ma te faanahoraa paha i te hoê tauaparauraa bibilia e te utuafare aore ra te tahi atu mau ohipa i roto i  to ˈna utuafare? E mau faahopearaa maitai tei noaa i te tahi mau utuafare i to ratou paraparau-tahaa-raa, e ma te faatura hoi, no nia i taua fifi ra (Mas. 15:22; 16:23; 31:26). Teie râ, noa ˈtu â ïa e eita e maitai roa mai mai ta tatou i manaˈo, e nehenehe tatou tataitahi e faaitoito no te haamaitai â i te oraraa i roto i te utuafare ma te faaohipa tatou iho i te hotu o te varua e ma te hamani maitai i te tahi atu mau melo o te utuafare. Eita tatou e haere i mua ia tiai noa tatou e na te tahi pae noa e rave i te taahiraa avae matamua, e tia râ ia tatou iho ia faaohipa i to tatou iho tiaraa; ia na reira tatou, te faaite atoa ra ïa tatou e te faaohipa ra tatou i te paieti i roto i to tatou utuafare. — Kol. 3:18-20, 23, 24.

I hea roa e itea ˈi te mau pahonoraa

11, 12. a) Nafea Iehova ia tauturu mai ia tatou ia faatitiaifaro i to tatou mau fifi i te pae no te utuafare? b) Mai te peu e e hinaaro tatou e fanaˈo roa i ta ˈna tauturu, eaha ïa te mea maitai ia rave?

¹¹ No nia i te tumu parau i te pae no te utuafare, mea rahi roa ïa te mau taata toroa aˈo to ratou. Tatou râ, ua ite tatou e o te Parau a te Atua te pû maitai roa ˈˈe o te mau aˈoraa, e te haamauruuru nei tatou ia Iehova i te mea e te tauturu mai nei oia ia tatou ia faaohipa i te reira na roto i te arai o ta ˈna faanahonahoraa ite-mata-hia. Te fanaˈo maitai ra anei outou i te tauturu ta ˈna e faaau maira? — Sal. 119:129, 130; Mika 4:2.

¹² Taa ê atu i te mau putuputuraa a te amuiraa, te haapii tamau ra anei outou i te Bibilia e to outou utuafare? Te mau utuafare e na reira nei i te mau hebedoma atoa, e riro mau hoi ratou i te tahoêhia i roto i ta ratou haamoriraa. E faufaa atu â to ratou oraraa utuafare a ite noa ˈi ratou e mea nafea ia faaohipa i te Parau a te Atua i roto i to ratou oraraa. — hiˈo Deuteronomi 11:18-21.

13. a) Ia uiui anaˈe tatou i te tahi mau uiraa taa maitai i te pae no te faaipoiporaa aore ra no te utuafare, i hea e itehia ˈi ia tatou te mau pahonoraa? b) Na te aha e aratai i te taatoaraa o ta tatou mau faaotiraa?

¹³ E riro paha outou i te uiui i te tahi mau uiraa taa maitai, i te pae no te faaipoiporaa aore ra i te pae no te utuafare. Ei hiˈoraa, eaha to outou manaˈo no nia i te mau ravea no te faataimeraa i te fanau i te tamarii? E nehenehe anei te hoê kerisetiano e faaohipa i te tahi ravea ia  ore roa ˈtu ta ˈna tamarii ia noaa faahou mai? E nehenehe anei e haamarua i te hoê tamarii mai te peu e e riro taua tamarii ra ei huma ia fanauhia mai? Aita anei e vai ra te tahi mau taotiaraa i roto i te mau taatiraa i te pae tino i rotopu i te tane e te vahine? Mai te peu e aita te hoê taurearea e anaanatae ra i te mau tumu parau i te pae varua, e tia ïa ia faahepohia ˈtu ia ˈna ia apiti mai i roto i te haamoriraa a te utuafare e tae roa ˈtu i nia i tei hea faito? Eita e ore e e manaˈo to outou no nia i taua mau uiraa tataitahi nei. Teie râ, e nehenehe anei ta outou e pahono mai ia au i te mau faaueraa tumu a te Bibilia? Inaha, ia ite mai na outou e ua tuatapapahia teie nei mau tumu parau taatoa i roto i te mau api o Te Pare Tiairaa. Ia haapii atoa na outou i te faaohipa i te mau index (buka faahororaa) e mai te peu e aita ta outou e vea aore ra e buka o ta outou e hinaaro ra i to outou fare, a haere atu a heheu i roto i te mau buka o te vahi vairaa buka a te Piha o te Basileia. Eiaha râ ïa outou e manaˈo e e pahono-noa-hia mai i te uiraa tataitahi ma te hoê e aore ra te hoê aita. I te tahi taime, na outou iho aore ra na outou e to outou hoa faaipoipo e maiti. A faaitoito i te rave i te mau opuaraa o te haapapu mai i to outou here no Iehova e no te mau melo o to outou utuafare, e oia atoa hoi to outou hinaaro mau ia auhia mai outou e te Atua. Ia na reira outou, e ite papu mai ïa o Iehova e te feia atoa ta outou i matau maitai e te faaohipa mau ra outou i te paieti, eiaha noa i te vahi taata, i roto atoa râ i to outou utuafare. — Eph. 5:10; Roma 14:19.

Ei haapoto-noa-raa

● Ua taai-maitai-hia to tatou haapao maitai i te mau faaauraa o te faaipoiporaa i to tatou taiva-ore-raa ia Iehova i roto i tei hea tuhaa?

● Mai te peu e tei mua tatou i te tahi mau fifi i te pae no te utuafare, eaha te nehenehe e tauturu mai ia tatou ia rave i te mea e auhia mai e te Atua?

● Noa ˈtu â ïa e eita te tahi mau melo o to tatou utuafare e amo ra i ta ratou hopoia, eaha ta tatou e nehenehe e rave no te haamaitai atu â i te oraraa?

[Uiraa haapiiraa]