Pene 15

Nafea Iehova ia aratai i ta ˈna faanahonahoraa?

1. Eaha te mau haamaramaramaraa ta te Bibilia e horoa maira ia tatou no nia i te faanahonahoraa a te Atua, e e tano te reira ia tatou i nia i tei hea tuhaa?

 I ROTO i te mau Papai i faauruahia e te Atua, ua vaiiho mai Iehova i te ravea e taa ˈtu ai ia tatou i te parau no ta ˈna faanahonahoraa faahiahia mau i nia i te raˈi (Isa. 6:2, 3; Ezek. 1:1, 4-28; Dan. 7:9, 10, 13, 14). Noa ˈtu â ïa e eita tatou e nehenehe e ite atu i te mau varua, te faaite maira râ oia ia tatou i te ohipa ta te mau melahi moˈa e nehenehe e faatupu i nia i te feia haamori mau i te fenua nei (Gen. 28:12, 13; Arii 2, 6:15-17; Sal. 34:7; Mat. 13:41, 42; 25:31, 32). Hau atu, te faataa maira te Bibilia i te parau no nia i te tuhaa ite-mata-hia o te faanahonahoraa a Iehova e te tauturu mai nei hoi ia tatou ia taa e e nafea ra oia ia aratai i taua faanahonahoraa ra. Mai te peu e ua noaa mau ia tatou i te maramarama i te pae varua no nia i taua mau mea ra, e riro ïa te reira i te tauturu ia tatou “ia au to [tatou] haerea i te Fatu [Iehova] i te mau mea atoa e mauruuru ai ra”. — Kol. 1:9, 10.

Nafea te tuhaa ite-mata-hia e taahia ˈi?

2. Mai te Penetekose mai o te matahiti 33 ra, o vai te amuiraa a te Atua?

² 1 545 matahiti te maoro to te nunaa Iseraela riro-noa-raa ei amuiraa na te Atua. Aita râ hoi ratou i haapao i te faufaa o te Ture e aita atoa i farii i te Tamaiti iho a te Atua. No reira ˈtura Iehova i faatupu ai i te hoê amuiraa apî o ta ˈna i faaau atu i te hoê faufaa apî. Te faahohoˈa ra te mau Papai i taua amuiraa ra i te “vahine faaipoipo” a te Mesia, oia hoi te mau 144 000 taata ta te  Atua i maiti no te tahoê atu ia ratou i ta ˈna Tamaiti i roto i te mau raˈi (Eph. 5:22-32; Apokalupo 14:1; 21:9, 10). Ua faatavaihia to ˈna mau melo matamua i te varua moˈa, i te mahana o te Penetekose o te matahiti 33. Na roto i te arai o to ˈna varua, ua horoa maira o Iehova i te mau haapapuraa taa maitai e tera mau te amuiraa ta ˈna e faaohipa no te faatupu i ta ˈna opuaraa. — Heb. 2:2-4.

3. I teie mahana, o vai te mau melo o te faanahonahoraa ite-mata-hia a Iehova?

³ I teie mahana, hoê noa toea o na melo 144 000 teie e ora nei â i nia i te fenua nei. Teie râ, ia au i te mau parau tohu bibilia, ua apitihia mai te hoê nahoa rahi o te mau “mamoe ê atu” no te rave tamau i te ohipa e o ratou. Ua tahoê o Iesu Mesia, te Tiai mamoe maitai, i te mau “mamoe ê atu” e te toea o ta ˈna mau pǐpǐ faatavaihia e te varua, ia riro ratou ei “hoê aˈe nǎnǎ” i tahoêhia i raro aˈe i te raau a te “Tiai mamoe [hoê]” ra, oia hoi o Iesu Mesia iho (Ioane 10:11, 16; Apo. 7:9, 10). Ua riro atura ïa na pǔpǔ kerisetiano e piti nei ei hoê anaˈe ra faanahonahoraa tahoêhia, te faanahonahoraa ite-mata-hia ta Iehova e faaohipa ra i to tatou nei tau.

Te mau faanahoraa teotaratia

4. Na vai e faatere ra i taua faanahonahoraa ra, e nafea oia e faatere?

⁴ Te haapapu maitai maira te parau a te Bibilia, oia hoi “te ekalesia o te Atua ora ra” e na vai mau na e faatere i taua faanahonahoraa ra. Oia mau, e faanahonahoraa teotaratia oia aore ra e faanahonahoraa faaterehia mai e te Atua. Te faatere mai nei Iehova i to ˈna nunaa na roto i te arai o te Fatu ra o Iesu Mesia, ta ˈna i haapao ei Raatira itea-ore-hia e te taata nei o te amuiraa, e oia atoa hoi na roto i ta ˈna iho Parau faauruahia mai, te Bibilia. — Tim. 1, 3:14, 15; Eph. 1:22, 23; Tim. 2, 3:16, 17.

5. a) Na te aha e haapapu ra e ua faaterehia mai te amuiraa kerisetiano mai nia mai te raˈi i te senekele matamua ra? b) Na te aha e haapapu maira e o Iesu noâ te Upoo o te amuiraa?

⁵ Ma te papu mau, ua ohipa mai taua huru aratairaa teotaratia ra i te mahana Penetekose o te matahiti 33 ra, a turai ai te varua moˈa i te mau melo matamua o te amuiraa ia haamata i te ohipa (Ohi. 2:1-4, 32, 33). Ua papu-atoa-hia te reira a aratai ai te melahi a Iehova i te  mau tereraa ohipa ia ô atu te parau apî maitai i Afirika (Ohi. 8:26-39), a horoa roa ˈtu ai Iesu iho i te mau faaueraa no nia i te tauiraa o Saulo no Tareto, e i muri iho, i te haamataraa te ohipa mitionare i roto i te mau taata e ere i te ati Iuda (Ohi. 9:3-7, 10-17; 10:9-16, 19-23; 11:12). Aita râ hoi te mau faaueraa e au no te tere-maitai-raa te amuiraa i horoa-noa-hia mai ma te hoê huru taa ê mau. I roto i te roaraa o te tau, ua ore te mau reo no te raˈi mai, te faraa mai te mau melahi e te mau ǒ semeio i faatupuhia e te varua. Inaha, ua tǎpǔ mai hoi o Iesu i ta ˈna mau pǐpǐ haapao maitai e: “E inaha, tei pihai atoa iho ïa vau ia outou, e tae noa ˈtu i te hopea o teie nei ao.” E, te haapapu maira te mau ohipa i tupu e ua tapea mau oia i ta ˈna parau (Mat. 28:20; Kor. 1, 13:8). Oia mau, aita noa te mau Ite o Iehova i farii mai to ˈna mana, eita râ hoi e tia ia ratou ia tamau â i te poro i te parau no nia i te Basileia i mua i te patoiraa uˈana ta ratou i farerei mai mai te peu e eita o ˈna e tauturu mai ia ratou.

6. a) O vai te mau melo o “te tavini haapao maitai e te paari”? Na te aha e haapapu maira ia outou? b) Eaha te ohipa ta Iesu i faaue mai i taua tavini ra?

⁶ Na mua iti noa ˈˈe i to ˈna poheraa, ua faahiti atura Iesu i ta ˈna mau pǐpǐ i te parau no te hoê “tavini haapao maitai e te paari”. Na nia i to ˈna tiaraa Fatu, e horoa mai oia iho na taua “tavini” ra i te tahi mau hopoia taa ê. Ia au i te faataaraa parau a Iesu, mai te huru ra ïa e te ora noa ra te “tavini” i faahitihia ra te parau ia reva ˈtu to ˈna Fatu i nia i te raˈi, e e ora noa mai â oia ia hoˈi mai te Mesia. Eita roa ˈtu roa ïa e tano teie huru faataaraa parau i nia i te hoê taata. E tano maitai râ te reira i te amuiraa kerisetiano, i te mau pǐpǐ haapao maitai i faatavaihia e te varua i roto i to ratou taatoaraa. Ma te papu e e hoo faahou mai oia ia ratou maoti i to ˈna iho toto, no reira ˈtura ïa oia i faariro ai ia ratou paatoa ei “tavini” na ˈna. Ua horoa ˈtu oia na ratou i te tahi ohipa, ma te faaue atu ia ratou paatoa ia haere e faariro i te taata ei pǐpǐ e a faatamaa tamau atu ai ia ratou i te pae varua, oia hoi i te horoaraa ˈtu na ratou i te “maa [varua] i te hora mau ra”. Ua haapapuhia ratou i roto i ta ratou ohipa e te varua moˈa, i te mahana Penetekose i te matahiti 33 ra. — Mat. 24:45-47; 28:19, 20; Kor. 1, 6:19, 20; hiˈo Isaia 43:10.

7. a) Eaha te mau hopoia rahi mau ta te “tavini” e amo ra i teie mahana? b) No te aha e tia mau ai ia tatou ia haafaufaa i te haapiiraa i horoahia mai na roto i taua arai ra?

 ⁷ Ia hoˈi mai te Fatu ra, mai te peu e te rave mau ra te “tavini” i ta ˈna ohipa, e riro ïa oia i te horoa mai na ˈna i te mau hopoia rahi atu â. I roto i te roaraa o te mau matahiti i muri aˈe, e ravehia hoi te hoê ohipa pororaa no nia i te Basileia i roto i te ao taatoa nei e e haaputuputuhia te hoê “feia rahi roa” o te mau taata haamori ia Iehova no te ora ˈtu i te “ati rahi”. (Mat. 24:14; Apo. 7:9, 10.) E hinaaro atoa te mau taata o taua “feia rahi roa” i te maa varua, e na ta tatou “tavini”, oia hoi na te mau tavini a te Mesia i faatavaihia e te varua moˈa e horoa mai taua maa varua ra na ratou. Mai te peu e e hinaaro tatou ia farii mai Iehova ia tatou, e tia ia tatou ia farii i te haapiiraa ta ˈna e horoa maira na roto i taua arai ra e ia faaau maite to tatou oraraa i nia i taua haapiiraa ra.

8, 9. a) I te senekele matamua, o vai tei haapaohia no te faatitiaifaro i te mau tumu parau i te pae no te haapiiraa e no te horoa i te mau aratairaa i hinaarohia ra e te mau kerisetiano no te poro i te parau apî maitai? b) Eaha te huru faanahoraa mai te reira te huru e vai ra i to tatou nei tau?

⁸ I te tahi mau taime, e faahitihia mai iho â te tahi mau uiraa i te pae no te haapiiraa aore ra no te fanahonahoraa. Nafea ˈtura ïa mai te peu e e tupu mai te reira te huru? Te faatia maira te pene ahuru ma pae o te buka Ohipa e mea nafea te hoê aimârôraa, no nia i te tahi mau huru e titauhia i te mau taata e ere i te ati Iuda i farii i te kerisetianoraa, ia faaî. Ua faaitehia ˈtu taua ohipa nei i te mau aposetolo e i te mau matahipao no Ierusalema, tei riro hoi ei tino aratai. E ere taua mau matahiapo ra i te mau taata aita e hapa. E hape atoa ratou i te tahi taime (hiˈo Galatia 2:11-14). Ua manaˈo aˈera râ te Atua e e mea maitai ia faaohipa ia ratou. E inaha, hiˈopoa ˈtura ratou i ta te mau Papai i faauruahia mai e parau ra no nia i te tumu parau i tuuhia mai e ua haafaufaa maite aˈera i te faaiteraa a te varua moˈa o te Atua, tei faatia e ia haamatahia te ohipa kerisetiano i rotopu i te mau taata e ere i te ati Iuda, e inaha, faaoti atura ratou i ta ratou parau. Ua haamaitai mai te Atua i taua huru faanahoraa ra (Ohi. 15:1-29; 16:4, 5). I te tahi aˈe pae, ua tono atoa te tino aratai i te mau kerisetiano no te faahaere i te  ohipa pororaa i te parau apî maitai i mua, ia au maite i te faaueraa a te Fatu. — Ohi. 8:14; Gal. 2:9.

⁹ I to tatou nei tau, te vai nei i roto i te Tino aratai te mau taeae faatavaihia e te varua moˈa e no roto mai hoi ratou i te mau fenua e rave rau. Te vai nei oia i te pu iho o te ao taatoa nei a te mau Ite o Iehova. Te tavini nei oia ma te haapao maitai i te mau faufaa o te haamoriraa viivii ore i raro aˈe i te faatereraa a Iesu Mesia. Hoê â manaˈo to te mau kerisetiano o te Tino aratai e to te aposetolo Paulo tei apee i te mau aˈoraa pae varua ta ˈna i horoa ˈtu i to ˈna mau taeae kerisetiano ra i te na ôraa ˈtu e: “E ere râ mai te mea e o matou te fatu o to outou faaroo, ei tauturu râ matou i to outou oaoa; e mau faaroo hoi to outou.” — Kor. 2, 1:24.

10. a) Mea nafea te mau matahiapo e te mau tavini tauturu ia nominohia? b) No te aha e tia mau ai ia tatou ia tahoê maite atu i te feia e faaî ra i taua mau tiaraa ra?

¹⁰ Te farii nei te mau Ite o Iehova i roto i te ao taatoa nei i taua faanahonahoraa teotaratia ra. Te tahoê atu nei hoi te mau amuiraa atoa ia ˈna. Te vaiiho nei ratou e na te Tino aratai te hopoia te nominoraa i te mau matahiapo e te mau tavini tauturu e haapao nei i te tere-maitai-raa o te mau amuiraa. Ua maitihia taua mau taata ra no te faaî i taua mau tiaraa ra ia au i tei hea mau huru? Ua papai maramarama-maitai-hia te mau huru e titauhia i roto i te Bibilia. E hopoia teimâha mau ta te mau matahiapo e faaoti i te mau parau nominoraa e tae noa ˈtu hoi i te feia e faatia i taua mau nominoraa ra i mua i te aro o te Atua no te pee i te taatoaraa o taua mau huru e titauhia ra (Tim. 1, 3:1-10, 12, 13; 5:22; Tito 1:5-9). Aita ˈtura ïa e polititaraa aore e maitiraa e ravehia i roto i te mau amuiraa. Teie râ, mai te mau aposetolo i te senekele matamua, e pure te mau tiaau e haapao i te parau no te tuu atu i te mau nominoraa e te feia e faaoti i muri iho i te mau nominoraa, ia noaa mai ia ratou i te tauturu a te varua o te Atua e e vaiiho hoi ratou e na te Parau i faauruahia mai e aratai ia ratou (Ohipa 6:2-4, 6; 14:23; hiˈo Salamo 75:6, 7). Ia au i to tatou huru i mua i te mau aratairaa a te mau matahiapo, e faaite ïa tatou e mea faufaa rahi mau na tatou taua mau ‘ô taata’ ra ta Iesu  iho i pûpû mai ma te here no te tauturu ia tatou, ia noaa ia tatou paatoa i “te faaroo hoê” ra. — Eph. 4:8, 11-16.

11. a) Eaha te tiaraa faufaa roa a te mau vahine i roto i te faanahoraa teotaratia? b) I tei hea taime ratou e tapoˈi ai i to ratou upoo, e no te aha?

¹¹ Te haapapu mai nei te mau Papai e i roto i te amuiraa, ua haapaohia te mau tane no te hiˈopoa. Aita râ te Bibilia e haafaufaa ore ra i te mau vahine. Inaha, e rave rahi hoi o ratou o te riro atu ei feia aiˈa no te Basileia. Hau atu, te turu nei te mau vahine kerisetiano i te roo maitai o te amuiraa na roto i to ratou haerea haehaa e te viivii ore e na roto atoa i te rave-maite-raa i te ohipa ei maitai no to ratou utuafare (Tito 2:3-5). I te rahiraa o te taime, e tuhaa rahi roa ta ratou i te pae no te maimiraa i te mau taata i anaanatae mai e no te aratairaa mai ia ratou i roto i te faanahonahoraa a te Atua (Sal. 68:11). Tera râ, i roto i te amuiraa, ua haapaohia te mau tane i nominohia no te horoa i te haapiiraa (Tim. 1, 2:12, 13). Mai te peu noa ˈtura e i roto i te hoê putuputuraa i faanahohia e te amuiraa aita e tane e faaî ra i te mau huru i titauhia, e tia ïa i te hoê vahine ia tapoˈi i to ˈna upoo ia peretiteni i te putuputuraa aore ia faaoti oia i te pure *. Ia na reira oia, e faaite ïa oia i to ˈna faatura no te faanahoraa i ravehia e Iehova, mai ia Iesu i vaiiho mai te hiˈoraa no te mau kerisetiano atoa, i to ˈna iho auraroraa ˈtu i to ˈna Metua. — Kor. 1, 11:3-16; Ioane 8:28, 29.

12. a) Iau au i te Bibilia, eaha te huru ta te Bibilia e titau maira i te mau matahiapo ia faatupu ia au i to ratou tiaraa? b) Te fanaˈo nei te mau kerisetiano atoa i tei hea haamaitairaa faufaa mau?

¹² I roto i teie nei ao, e haafaufaahia te taata tiaraa teitei to ˈna. I roto râ i te faanahonahoraa a te Atua, teie  ïa te ture: “O tei iti roa hoi i roto ia outou na, o te hau ïa.” (Luka 9:46-48; 22:24-26). No reira te mau Papai i faaitoito ai i te mau matahiapo eiaha e faatere mai te mau raatira ra te huru i nia i te mau taata aiˈa o te Atua, ia riro râ ratou ei hiˈoraa no te nǎnǎ (Pet. 1, 5:2, 3). E ere noa na te hoê pǔpǔ iti i maitihia, na te taatoaraa râ o te mau Ite o Iehova, te tane e te vahine, te hopoia faufaa roa i te tiaraa ˈtu no te mana teitei o te ao nei, i te faahitiraa ma te haehaa i te parau i to ˈna iˈoa e i te faaiteraa ˈtu i te mau taata i te mau vahi atoa i te parau no nia i to ˈna Basileia.

13. Ia au i te mau irava bibilia i horoahia ˈtu ei faahororaa, a pahono mai i te mau uiraa i faaitehia ˈtu i te hopea o te paratarapha.

¹³ E tia hoi ia tatou ia uiuihia e: “Te papu ra anei ia tatou e mea nafea Iehova ia faatere mai i ta ˈna faanahonahoraa ite-mata-hia? Te faaite ra anei to tatou haerea, ta tatou mau parau e ta tatou mau ohipa i to tatou aau mehara?” E rave anaˈe i te taime no te hiˈopoa ia tatou iho ma te feruri maite i nia i te mau manaˈo i faaitehia ˈtu i muri nei:

 Mai te peu e e auraro mau tatou i te Mesia mai te Upoo o te amuiraa, eaha ïa te tia ia tatou ia rave ia au i te mau irava bibilia i muri nei? (Mat. 24:14; 28:19, 20; Luka 21:34-36; Ioane 13:34, 35)?

 Mai te peu e e hinaaro ratou ia hotu mai, e tia ïa i te mau melo atoa o te amuiraa kerisetiano ia tiaturi i te Atua e i te Mesia, i roto i tei hea auraa (Ioane 15:5; Kor. 1, 3:5-7)?

 Te mau tutavaraa ta te mau matahiapo e rave ra no te faatitiaifaro i te mau feruriraa o vetahi mau taeae e no te tauturu ia ratou ia hiˈo i te mau mea mai te tahi atu mau melo o te faanahonahoraa, e faarirohia ïa te reira ei mau tapao no te maitai no ǒ mai ia vai ra (Eph. 4:7, 8, 11-13; Kor. 2, 13:11)?

 Ia farii tatou ma te aau mehara i te maa varua ta tatou i fanaˈo nei na roto i te arai o te “tavini” e ta ˈna Tino aratai, te faatura ra ïa tatou ia vai? Eaha ïa te auraa mai te peu e e faaino tatou ia ˈna na roto i te mau parau tano ore (Luka 10:16; faaau i te Ioane 3, irava 9, 10)?

  No te aha eita roa ˈtu e tia ia tatou ia amuamu i te mau matahiapo (Ohi. 20:28; Roma 12:10)?

14. a) Eaha ta to tatou huru i mua i te faanahonahoraa teotaratia e faaite maira? b) I roto i taua tuhaa ra, eaha te ravea e vai ra ia tatou nei no te faaite e e haavare mau ta te Diabolo e no te faaoaoa i te mafatu o Iehova?

¹⁴ Na roto i te arai o ta ˈna faanahonahoraa ite-mata-hia i raro aˈe i te aratairaa a te Mesia i haapaohia e Upoo o Iehova e aupuru mai ia tatou i teie nei mahana. No reira, te faaite maira ïa to tatou huru i nia i te faanahonahoraa ma te faufaa mau e eaha to tatou tiaraa no nia i te parau o te mana arii o te Atua (Heb. 13:17). Te faahua parau ra hoi o Satani e ta tatou tapitapiraa matamua o tatou iho ïa. Teie râ, ia rave tatou i te mau mea atoa mai te titauhia ra, ma te ore e faahiti i te parau e e rave i te mau mea e huti i te manaˈo i nia ia tatou iho, e haapapu ïa tatou e e haavare mau te Diabolo. Mai te peu e e faaite tatou i to tatou here e to tatou faatura ‘i to tatou mau aratai’, ma te pee i to ratou faaroo, e ma te patoi i te riro mai ei feia e “haapopou faarearearaa ˈtu i te taata ia roaa te taoˈa”, e faaoaoa ïa tatou i te mafatu o Iehova (Heb. 13:7; Iuda 16). Ma te faatura mau i te faanahonahoraa a Iehova i te raveraa i te ohipa ta ˈna e faatere maira ma to tatou mafatu atoa, e faaite papu mau ïa tatou e o Iehova to tatou Atua e ua tahoê-mau-hia tatou i roto i ta ˈna haamoriraa. — Kor. 1, 15:58.

[Nota i raro i te api]

Ei haapoto-noa-raa

● O vai teie mahana te faanahonahoraa ite-mata-hia a Iehova? E eaha ta taua faanahonahoraa ra tapao e titau ra?

● O vai te upoo i haapaohia e te Atua no taua faanahonahoraa ra? Mea na roto i tei hea mau ravea ite-mata-hia oia ia horoa mai i te mau aˈoraa aroha mau?

● E tia ia tatou ia atuatu i tei hea mau huru i te pae no te mau hopoia e tae noa ˈtu i te pae no te feia e amo ra i taua hopoia ra?

[Uiraa haapiiraa]