Pene 10

Te hoê basileia “o te ore roa e mou”

1, 2. a) Eaha ta te mau ohipa i roto i te ao nei e haapapu nei i te mau mahana atoa, e eaha te itehia ra? b) Eaha te ravea hoê roa no te arai i te mau fifi o te ao nei?

 TE HAAPAPU nei te mau ohipa e tupu ra i roto i te ao nei i te mau mahana atoa e, aita te taata nei i ite i te oaoa ia ˈna i faarue i te mana arii o Iehova, ei faatere ia ˈna iho. Aita roa ˈtu te hoê noa ˈˈe faatereraa taata nei i horoa mai i te mau haamaitairaa i te mau huru taata atoa. Noa ˈtu to ˈna ite aravihi faahiahia roa, aita te taata nei i manuïa i te tatara roa i te parau no te hara, te maˈi e aita atoa hoi i nehenehe e faaore i te pohe. Teie râ, te hamani noa nei te mau nunaa i te mau mauhaa tamaˈi apî hau roa ˈtu i te riaria. Te maraa noa nei te ohipa taparahi taata. Ia amui-anaˈe-hia te aravihi a te mau ravea apî, te miimii e te taa ore o te taata, e horoa mai ïa te reira i te viiviiraa o te fenua, o te pape e o te reva. No te hoo rahi e maraa noa ra e te ohipa ore, e rave rahi mau taata teie e fifi nei ia noaa mai ia ratou i te mau ohipa e hinaarohia e ratou i roto i to ratou oraraa. E tia mau iho â ïa ia itea mai i te taata nei i te hoê ravea no te arai i to ˈna mau fifi. — Koh. 8:9.

² Eaha ïa taua ravea ra? O te Basileia ïa o te Atua ta Iesu i haapii i ta ˈna mau pǐpǐ ia pure (Mat. 6:9, 10). E mauruuru rahi roa ïa tatou ia ite tatou e ua fatata roa mai te tamahanahanaraa maoti taua Basileia ra.

3. a) No nia i te Basileia, eaha te ohipa i tupu i te matahiti 1914 ra i nia i te raˈi? b) No te aha e mea faufaa mau â te reira no tatou?

³ Ua ohipa ê na mai te Basileia o te Atua tei faaterehia  e Iesu Mesia, i te matahiti 1914 ra *. I taua matahiti ra, ua tupu te mau ohipa ta Daniela i ite i roto i te hoê orama no nia i te mau ohipa e tupu a muri aˈe i roto i te raˈi. Ua horoa aˈera “to te mau mahana tahito ra”, oia hoi te Atua ra o Iehova, i roto i te rima o te Tamaiti a te taata, o Iesu Mesia, i “te mana, e te hinuhinu, e te basileia no ˈna, ia auraro mai te mau taata atoa, e te mau fenua atoa, e te reo atoa ia ˈna”. Ia au i taua orama ra, ua papai o Daniela e: “To ˈna mana, e mana mure ore ïa, e ore ïa e mou, e to ˈna basileia, e ore ïa e pau.” (Dan. 7:13, 14). Maoti taua Basileia nei te Atua e faatia ˈi i te mau taata mea here na ratou i te parau-tia, ia tamata i te mau haamaitairaa e rave rau ta ˈna i faaau mai i te fetii taata nei, ia ˈna i tuu i to tatou na metua matamua i roto i te paradaiso.

4. Eaha te mau mea ta tatou e anaanatae mau nei no nia i te Basileia e no te aha?

⁴ Te anaanatae hohonu nei te feia haapao maitai e auraro nei i teie Basileia, i te faanahoraa e te huru ohiparaa a teie faatereraa. Te hinaaro nei ratou e ite e eaha ta ˈna e rave nei i teie mahana e eaha ta ˈna e faatupu a muri aˈe, oia atoa, eaha ta ˈna e titau nei ia ratou. E tuatapapa maitai ïa ratou i taua tumu parau nei inaha, e rahi noa ˈtu â hoi to ratou mauruuru i taua Basileia ra, e e faaohipa ratou i te mau huru e titauhia no te faaite atu i te reira ia vetahi ê. — Sal. 48:12, 13.

Te hoê tuatapaparaa o te faaitoito

5. a) Ia au i te mau Papai, ua riro te Basileia o te Mesia ei faaiteraa i te mana arii o vai? b) Ia haapii anaˈe tatou i te tahi mau mea no nia i taua Basileia ra, eaha ta te reira e faatupu i nia ia tatou?

⁵ Te faaite na mua mai nei te hoê tuatapaparaa mai teie te huru e ua riro te Basileia Mesia ei faaiteraa i te mana arii o Iehova. Na ˈna hoi i horoa i “te mana, e te hinuhinu, e te basileia” i ta ˈna Tamaiti. No reira, i muri aˈe i te haamauraahia te Basileia, teie ta te tahi mau reo i te raˈi ra i parau ma te tano maitai e: “O te basileia ra  o teie nei ao ua riro ei basileia no to tatou Fatu [te Atua ra o Iehova] e no ta ˈna ra Mesia, e e vai ïa te hau ia ˈna [Iehova] e a muri noa ˈtu.” (Apo. 11:15). No reira, te mau mea atoa ta tatou e haapii no nia i te Basileia e te mau mea atoa ta ˈna e faatupu, e riro ïa i te haafatata roa ˈtu â ia tatou ia Iehova. E faatupu hoi te reira i roto ia tatou i te hinaaro e auraro i ta ˈna faatereraa e a muri noa ˈtu.

6. No te aha tatou e oaoa taa ê ai i to Iehova maitiraa ia Iesu no te faatere na nia i to ˈna iˈoa?

⁶ Auê hoi te faahiahia e i te mea e ua tuu Iehova ia Iesu Mesia i nia i te terono ia faaohipa oia i te faatereraa na nia i to ˈna iˈoa. E hau aˈe to Iesu ite i to tatou mau hinaaro ia tatou nei, no te mea ua riro oia ei ‘rave ohipa’ i faaohipahia e Iesu no te hamani i te fenua nei e te taata atoa nei. Hau atu â, i te omuaraa iho â o te aamu taata nei, ua faaite oia i ‘to ˈna here i te mau tamarii a te taata ra’. (Mas. 8:30, 31; Kol. 1:15-17.) No te rahi o to ˈna aroha i haere mai ai oia i nia i te fenua nei e i pûpû ai i to ˈna ora ei hoo i te huitaata nei. Ua horoa maira hoi oia i te ravea e tiamâ ˈi tatou i te faatîtîraa a te hara e te pohe, e te ravea e noaa ˈi ia tatou te ora mure ore. — Mat. 20:28.

7. a) Taa ê atu i te mau faatereraa a te taata nei, no te aha teie faatereraa e vai ai e a muri noa ˈtu? b) Eaha te taairaa i rotopu i te “tavini haapao maitai e te paari” e te faatereraa i nia i te raˈi?

⁷ Teie Basileia, o te hoê ïa faatereraa o te mau papu e o te vai e a muri noa ˈtu. E tiaturi tatou i te reira no te mea eita Iehova iho e roohia i te pohe (Hab. 1:12; Sal. 146:3-5, 10). Taa ê noa ˈtu i te mau arii o te fenua nei, eita atoa o Iesu Mesia, ta Iehova i horoa ˈtu te mana, e roohia i te pohe (Roma 6:9; Tim. 1, 6:15, 16). 144 000 mau taata ê atu, mau tavini haapao maitai no roto mai “i te mau opu atoa, e te mau reo atoa, e te mau nunaa atoa, e te mau fenua atoa” o te apiti atu ia Iesu Mesia i nia i te mau terono i te raˈi ra. Eita atoa ratou e roohia i te pohe (Apo. 5:9, 10; Kor. 1, 15:42-44, 53). Te tuhaa rahi o ratou, tei nia ê na ïa i te raˈi, area te toea ra, ua riro ïa ei “tavini haapao maitai e te paari” i  nia i te fenua nei, te hoê pǔpǔ kerisetiano e turu nei ma te faaroo mau i te mau faufaa o taua Basileia nei, i nia i te fenua nei. — Mat. 24:45-47.

8, 9. a) Eaha te mau tumu amahamaharaa e te ino ta te Basileia e haamou roa? b) Mai te peu e eita tatou e hinaaro e riro mai ei enemi no te Basileia o te Atua, e faataa ê mai ïa tatou i tei hea mau faanahoraa?

⁸ Ua fatata roa mai te taime ta Iehova i faataa i reira oia e faaue ai i ta ˈna mau nuu e faatupu i ta ˈna mau haavaraa no te tamâ i te fenua nei. E haamou roa ratou i te mau taata atoa, tei opua maite e ore e hinaaro e ite e o vai mau na te Atua, e ore e farii i ta ˈna faatereraa e e haafaufaa ore i te mau ravea here mau ta ˈna i rave na roto i te arai o Iesu Mesia (Tes. 2, 1:6-9). O te mahana ïa te reira o Iehova, te taime tiai-noa-hia i reira oia e faatiamâ ˈi i ta ˈna faatereraa i roto i te ao taatoa nei.

⁹ E haamou-roa-hia te haapaoraa hape e tae noa ˈtu te mau faatereraa taata atoa e ta ratou mau nuu, tei faaterehia e te Arii ino e te itea-ore-atoa-hia o teie nei ao, e a muri noa ˈtu. Te mau taata atoa i faaite e no teie nei ao ratou, na roto i te oraraa i te hoê huru oraraa miimii, tia ore aore ra viivii, e riro ïa ratou i te haamou-roa-hia. E tapeahia o Satani e ta ˈna mau demoni hoê tausani matahiti te maororaa, e eita ˈtura hoi ratou e nehenehe e faahema noa ˈtu i te mau taata o te fenua nei. Auê ïa hau no te feia atoa mea au na ratou i te parau-tia e! — Apo. 18:21, 24; 19:11-16, 19-21; 20:1, 2.

Ta ˈna mau tapao — Nafea e naeahia ˈi

10. a) Nafea te Basileia a te Mesia ia faatupu i te opuaraa a Iehova no nia i te fenua nei? b) Eaha ïa te auraa o te reira no te mau taata e ora mai i nia i te fenua nei?

¹⁰ E faatupu te Basileia o te Mesia i te taatoaraa o te opuaraa matamua a te Atua no te fenua nei. Aita hoi te taata nei i manuïa i te faatupu i te reira (Gen. 2:8, 9, 15; 1:28). No reira, “taua ao [fenua] a muri nei” i tuuhia ˈi i raro aˈe i te faatereraa a te Tamaiti a te taata nei, o Iesu Mesia. Te feia atoa e ora ˈtu i te haavaraa a Iehova  i nia i teie amuiraa o te mau mea nei, e tahoê ïa ratou no te rave i te ohipa i raro aˈe i te faatereraa a te Mesia, to ratou Arii, ma te oaoa i te faatupu i te mau mea atoa ta ˈna i faaue mai ia ratou ia nehenehe te fenua atoa nei ia riro ei paradaiso (Heb. 2:5-9). E oaoa te mau taata atoa i ta ratou iho ohipa e i te hotu rahi o te fenua nei. — Sal. 72:1, 7, 8, 16-19; hiˈo Isaia 65:21, 22.

11. a) Nafea te huru taata hapa ore i te pae tino e i te pae feruriraa, ia horoahia mai no te mau taata e ora ˈtu i raro aˈe i taua Basileia ra? b) Eaha ihora ïa te mau faahopearaa?

¹¹ Ua poietehia o Adamu raua o Eva ma te hapa ore, e te opuaraa a te Atua, ia î ïa te fenua i to raua huaai, o te fanaˈo paatoa i te huru taata hapa ore i te pae tino e i te pae feruriraa. I raro aˈe i te faatereraa a te Basileia, e tupu mau taua opuaraa ra. No taua tumu ra hoi te Mesia e faaohipa ˈi eiaha noa te tiaraa Arii, te tiaraa Tahua Rahi atoa râ. Ma te faaoromai, e tauturu atu oia i ta ˈna mau tavini haapao maitai ia faufaahia ratou i te tusia taraehara o to ratou iho ora taata. I reira hoi te mata o te matapo ra e araara ˈi e te tariˈa o te tariˈa turi ra e faaroo ai. E hoˈi faahou mai te tino i ino roa i te ruhiruhia aore ra i te maˈi i te apîraa. Eita te maˈi e ite-faahou-hia, e oaoa râ te taata atoa i te tino oraora maitai ra. E tae hoi te mahana i reira te taata e ore ai e nehenehe e parau faahou e: “Ua paruparu vau i te maˈi”, no te mea e tiamâ mai te feia mea mǎtaˈu na ratou i te Atua, i te utua o te hara e ta ˈna mau faahopearaa iino mau. — Hiˈo Isaia 33:22, 24; 35:5, 6; Ioba 33:25; Luka 13:11-13.

12. a) Eaha ta te huru hapa ore o te taata nei e titau â? b) Nafea hoi te reira ia faatupuhia, e eaha ihora ïa te faahopearaa?

¹² Teie râ, ia noaa ia tatou taua huru taata hapa ore ra, ia hau atu ïa i te hoê tino e i te hoê feruriraa maitai. E tia atoa hoi ia tatou ia faaohipa i te mau huru maitai o Iehova, no te mea ua hamanihia te taata nei ‘ia au i te huru o te Atua, ia au i to ˈna iho hohoˈa’. (Gen. 1:26.) E tia ˈturaa ïa i te mau taata ia haapiihia. E ora ˈtu ratou i roto i te faanahonahoraa apî i reira “te parau-tia” e vai mau ai e, ia au i te faaiteraa a te peropheta ra o Isaia,  e “haapii to te ao nei i te parau-tia i reira”. (Pet. 2, 3:13; Isa. 26:9.) E aratai tia ˈtu teie huru i te hau, hau e itehia i rotopu i te mau taata o te mau nunaa atoa, te mau hoa, te mau melo o te hoê utuafare e i te Atua iho (Isa. 32:17; Sal. 85:10-13). Te feia atoa e haapii i te parau-tia, e ite mǎrû noa ïa ratou eaha te hinaaro o te Atua ia ratou. Ia mau papu te here i te mau eˈa o Iehova i roto i to ratou mafatu, e pee noa ïa ratou i te reira i roto i to ratou oraraa taatoa. Ua nehenehe te taata tia ra o Iesu e parau e: “Aore hoi au i faaea i te rave i te mea e mauruuru ai oia ra.” (Ioane 8:29). Auê te oraraa i te oaoa e, ia na reira anaˈe te mau taata atoa!

Te mau huru tupuraa e itehia nei

13. A faaohipa i te mau uiraa i horoahia ˈtu i nia nei ei haapapuraa e eaha ta te Basileia e faatupu e eaha atoa te tia ia tatou iho ia rave?

¹³ Ua ite ê na te feia faaroo mau i te tahi mau huru tupuraa faahiahia mau a te Basileia. E faahaamanaˈo mai te mau uiraa e te mau irava bibilia i muri nei vetahi o taua mau tupuraa ra e vetahi mau ohipa e tia i te mau taata e ora ˈtu i raro aˈe i taua Basileia ra, ia rave mai teie atu nei:

 O vai ta te Arii i aro na mua, e eaha ˈtura ïa te mau faahopearaa (Apo. 12:7-10, 12)?

 I muri noa ˈˈe i to ˈna faatoroaraahia, ua haaputuputu mai te Mesia i te mau melo hopea o tei hea pǔpǔ (Mat. 24:31; Apo. 7:1-4)?

 Ia au i ta ˈna mau parau tohu i roto i te Mataio 25:31-33, eaha te tahi ohipa ta Iesu e rave i muri aˈe oia e faarirohia ˈi ei Arii e na mua ˈˈe oia e haamou ai i te mau taata paieti ore ra?

 Nafea taua ohipa ra e tupu ai? Na vai e rave i te reira (Mat. 24:14; Sal. 110:3)?

 No te aha te mau enemi i te pae politita e i te pae faaroo, i ore ai i manuïa i te tapea i taua ohipa ra (Ohi. 5:38, 39; Zek. 4:6)?

 Maoti te ohipa haapiiraa e ravehia nei i teie mahana, eaha  te mau tauiraa tei ite-ê-na-hia i nia i te mau taata e auraro ra i te faatereraa a te Basileia (Isa. 2:4; Kor. 1, 6:9-11)?

Te vai-mau-raa o te Basileia

14. a) E faatere mai te Mesia e hia maororaa? b) Eaha ta ta ˈna faatereraa e faatupu mai?

¹⁴ Ia oti o Satani e ta ˈna mau demoni i te hurihia i roto i te abuso, e faatere mai ïa o Iesu Mesia e ta ˈna mau arii 144 000 tei apitihia mai ia ˈna hoê tausani matahiti te maororaa (Apo. 20:6). I roto i taua area taime ra, e arataihia ïa te mau taata i nia i te faito o te huru taata hapa ore. Te mau faatereraa, mana aore ra puai o te patoi ia Iehova, e riro ïa i te haamou-roa-hia. I reira Iesu e horoa ˈtu ai i te Basileia i to ˈna Metua ra, “ia riro te Atua i nia iho i te mau mea atoa i te mau vahi atoa ra”. — Kor. 1, 15:24, 28.

15. No te aha e parauhia ˈi e ‘e ore roa [taua Basileia ra] e mou’?

¹⁵ E riro hoi te huru iho o Iesu ia au i te fenua nei, i te taui, area to ˈna ra mana “e ore ïa e mou” e to ˈna ra Basileia “e ore ïa e pau”. (Dan. 7:14.) Eaha ïa te auraa o te reira? Oia hoi, eita roa ˈtu te mana e riro atu i te tahi noa ˈˈe faatereraa e opuaraa taa ê ta ratou. Hau atu, eita roa ˈtu te mau ohipa ta te Basileia i faatupu ‘e mou’. E vai mai hoi ta te Basileia i rave no te faatiamâ i te iˈoa o Iehova e tae noa ˈtu ta ˈna opuaraa no te fenua nei, e a muri noa ˈtu.

[Nota i raro i te api]

Ei haapoto-noa-raa

● No te aha o te Basileia o te Atua te ravea hoê roa no te faatitiaifaro i te mau fifi o te huitaata nei? Afea ra to ˈna haamataraa i ta ˈna faatereraa?

● Eaha te mau huru faahiahia mau o taua Basileia ra, e eaha ta ˈna e faatupu mai? No te aha?

● Eaha te mau ohipa ta te Basileia i rave ta tatou e nehenehe e ite mai teie atu nei? Eaha ta tatou tuhaa i roto i taua ohipa ra?

[Uiraa haapiiraa]

 [Hohoˈa i te mau api 84, 85]

 E haapii te mau taata i te parau-tia