Pene 20

Te ora e te toto — Mea moˈa anei te reira no outou?

1. a) Eaha to te Atua manaˈo no nia i te ora? b) Nafea tatou e nehenehe ai e faaite e mea faufaa na tatou te ora ta te Atua i horoa mai no tatou?

 EITA e maerehia e mea taa ê te manaˈo o te Atua no nia i te ora i to teie nei ao. Oia mau, no te Atua, mea moˈa te ora o te taata. Mai te reira atoa anei to outou manaˈo? No te Atua “oia iho hoi tei horoa mai i te ora, e te aho, e te mau mea atoa, i te mau mea atoa nei”, tatou e ora ˈi. (Ohipa 17:25-28; Sal. 36:9.) Mai te peu e te reira atoa to tatou manaˈo, e ara ïa tatou i te faaora ia tatou iho. Teie râ, eita tatou e ofati i te ture a te Atua no te faaora ia tatou i teie nei oraraa, no te mea mea faufaa roa na tatou te ora mure ore ta te Atua i tǎpǔ mai i te feia atoa e faaroo mau i ta ˈna Tamaiti. — Mat. 16:25, 26; Ioane 6:40; Iuda 21.

2. Na roto i to ˈna huru i nia i te ora, to vai huru ta te ao nei e turu ra, e riro te reira i te faatupu mai i tei hea huru manaˈo?

² I te tahi aˈe pae, ua faaite maira Iesu e e “taparahi taata” te Diabolo ra o Satani, te raatira o teie nei ao “mai te matamua mai â”. (Ioane 8:44; 12:31.) Oia mau, mai to ˈna patoiraa mai â to ˈna faaôraa mai i te pohe i roto i te huitaata. Te itehia ra to ˈna iho huru manaˈo i roto i te aamu o te ao nei tei î i te haavîraa uˈana. Ua ite atoa râ Satani i te rave mai i te tahi mau huru taa ê. No reira vetahi mau “taata aravihi”, turaihia e to ˈna huru feruriraa, e parau mai ai ia outou e, mai te peu e mea maitai ia faaohipa i te hoê haapaoraa, e tia râ ia outou ia pee i ta ratou mau aˈoraa maoti hoi i te pee i te Bibilia  mai te peu e te fifihia ra to outou ora (hiˈo i te Korinetia 2, 11:14, 15). Mai te peu e te fifihia ra hoi to outou ora, eaha ta to outou mafatu e maiti? Aita e faufaa ia parau atu e to tatou hinaaro rahi roa ˈˈe, ia auhia mai tatou e Iehova.

3. a) No te aha e tia ˈi ia tatou ia haapao taa ê i ta te Bibilia e parau maira no nia i te toto? b) A taio i te Genese 9:3-6 e te Ohipa 15:28, 29, e a pahono mai i te mau uiraa o te paratarapha?

³ Te faaite maira te Parau a te Atua i te auraa fatata roa e vai ra i rotopu i te ora e te toto, ia parau oia e: “Tei te toto hoi te (...) ora [aore ra te nephe] e ora ˈi te mau mea atoa ra.” Mai te ora e riro ei mea moˈa, ua haamoˈa atoa ïa te Atua i te toto. Na ˈna te toto e e nehenehe noa te reira e faaohipahia mai ta ˈna e hinaaro (Lev. 17:3, 4, 11; Deut. 12:23). No reira, e tia roa ˈtura ïa ia tatou ia tuatapapa maite i te mau faaueraa ta te Atua i horoa mai no nia i te toto.

 A taio i te Genese 9:3-6

 Eaha te mau peu matauhia i to outou fenua, te tia ia outou ia haapao maitai ia ore outou ia amu i te toto animala?

 Ia au i tei parauhia i roto i te irava 4 no nia i te toto animala, eaha to outou manaˈo ia inuhia te toto taata, (mai tei ravehia na i Roma, ia tupu te mau aroraa i rotopu i te mau taata taputô)?

 Ia au i te mau irava 5 e te 6, e tia ˈtu te taata e haamanii i te toto i mua ia vai?

 A taio i te Ohipa 15:28, 29

 Te hinaaro ra anei teie irava e parau e e tano noa teie mau faaueraa no te hoê tau taotiahia? No tatou atoa anei teie parau?

 To roto atoa anei te toto taata i teie faaueraa?

 Mai te peu e hinaaro-ru-hia, eita anei ïa e nehenehe e faaohipa i te toto?

4. Ia au i te mau Papai, eaha paha te tia ia tatou ia rave ia ore tatou ia roohia i te utua toto?

⁴ No nia i te toto taata, mea hape roa ia manaˈo tatou  e e eiaha noa e taparahi i te taata, no te vai tiamâ noa. Oia mau, te faaite maira te mau Papai e mai te peu tei roto tatou i te hoê faanahoraa e hara toto ta ˈna, e tia ïa ia tatou ia faaatea ê roa mai eiaha tatou ia amui atoa ˈtu i roto i ta ˈna mau hara (Apo. 18:4, 24; Mika 4:3). Ia faaatea oioi mai tatou, e tia ˈi.

5. Eaha te auraa ta te Bibilia e faatupu ra i rotopu i to tatou itoito i roto i te taviniraa e ta tatou hopoia no nia i te toto o to tatou taata-tupu?

⁵ Ua faaue atu te Atua i to ˈna mau tavini ia faaara i to ratou mau taata-tupu no nia i te haamouraa e fatata mai nei, ia tupu anaˈe te ati rahi. No reira, mai te peu e eita ratou e hinaaro ia roohia mai ratou i te utua toto, e tia ïa i te feia e haamori i te Atua ia poro i teie parau (hiˈo Ezekiela 3:17-21). Ua faariro te aposetolo Paulo ia ˈna ei amutarahu na te mau huru taata atoa no te taviniraa tei horoahia mai na ˈna. E ere atura ïa ei hopoia faahou na ˈna to ratou toto, ia faaite oia i te mau parau atoa no nia i te mau faaueraa a te Atua ei ora no ratou (Roma 1:14, 15; Ohipa 18:5, 6; 20:26, 27). Te haapapu maira anei to outou huru itoito i roto i te taviniraa e ua taa maitai ia outou te hopoia i pûpûhia mai i te mau Ite o Iehova atoa ra?

6. Eaha te auraa e vai ra i rotopu i te aperaa i te mau ati e te faaturaraa i te huru moˈa o te ora?

⁶ E tia atoa ia tatou ia feruri i te mau ati pohe manaˈo-ore-hia. I raro aˈe i te ture a Mose, aita te mau taata e faatupu na i te ati o tei haapohe i te hoê taata, i riro ei mau taata tiamâ; e faautuahia ratou (Exo. 21:29, 30; Deut. 22:8; Num. 35:22-25). Ia haafaufaa anaˈe tatou i te faaueraa tumu o taua ture ra, e ara ïa tatou eiaha tatou e faatupu i te hoê ati o te nehenehe e haapohe i te hoê taata na roto i ta tatou huru faahororaa i te pereoo, i te raveraa tatou i te mau ohipa ma te feruri ore aore ra ma te farii-noa-raa i te tahi mau mea atâata mau i roto i to tatou fare aore ra i nia i ta tatou vahi raveraa ohipa. Te faaite maira anei to outou haerea i to outou faatura i te huru moˈa o te ora?

 Te faaohiparaa i te toto no te rapaau

7. a) E tano anei te mau pâmuraa toto i te huru moˈa o te toto? b) No te aha e ere i te mea tano ia taotiahia i te faaohiparaa i te faaueraa e titau mai nei ia tatou e ‘eiaha e amu i te toto’ ia au i te mau faaohiparaa matauhia i te senekele matamua?

⁷ Noa ˈtu â ïa e eita taua ohipa nei i te ohipa apî, i te senekele XX te faarahiraahia i te faaohipa i te mau pâmuraa toto no te haamaoro atu â i te oraraa o te taata. Ua faaohipahia te toto taatoa, aore ra vetahi mau tuhaa o te toto. Parau mau, eita taua huru rapaauraa nei e haapapu mai e e ora iho â te taata maˈi. Inaha, e nehenehe hoi e pohe ia faaohipahia te toto. Teie râ, teie te tahi uiraa faufaa roa: Te faaueraa a te Bibilia no nia ‘i te oreraa e faaohipa i te toto’ e tano anei ïa no teie huru rapaauraa? E, e tano! Te taata e pâmu i roto i to ˈna tino te toto taata aore ra animala, te ofati ra ïa oia i te ture a te Atua, ma te ore e faatura i te huru moˈa o te toto (Ohipa 15:19, 20). Aita e mea e faatia ra ia tatou ia taotia i te faaueraa ‘eiaha e amu i te toto’, i nia i te mau faaohiparaa noa e ravehia ra i te senekele matamua, ma te faaore i te mau ravea rapaauraa apî. A feruri na: O vai te nehenehe e parau e eita te faaueraa a te Atua no nia i te taparahi taata e opani ia taparahihia te hoê taata na roto i te raveraa i te pupuhi, no te mea noa e no muri iho roa mai te pupuhi i hamanihia mai? Mea tia anei ia manaˈo e e tano noa te faautuaraa no nia i te taero ava no te mau ava matauhia i te senekele matamua, eiaha râ no te mau ava o teie tau? Aita to te mau taata e hinaaro mau ra ia auhia mai ratou e te Atua e manaˈo feaa no nia i te auraa o te faaueraa e faaitoito ra ia ratou e ‘eiaha e amu i te toto’.

8. a) Nafea outou e nehenehe ai e ite e e tano anei tera aore ra tera huru rapaauraa i te hoê kerisetiano? b) Ia parau te hoê taote e ia iritihia te hoê tuhaa o to outou iho toto e a faaherehere atu ai no te faahoˈi faahou mai i roto i to outou tino ia tâpû-noa-hia ˈtu outou, eaha te mau faaueraa tumu bibilia te nehenehe e tauturu mai ia outou ia rave i te hoê opuaraa maitai? c) Eaha te manaˈo ta te hoê taata e nehenehe e parau no nia i te hoê rapaauraa e titau e ia faahaerehia to ˈna toto i roto i te hoê matini i rapae au mai i to ˈna tino?

⁸ Teie râ, e nehenehe ïa te tahi mau uiraa e tupu mai no te papu ore o te tahi mau rapaauraa. Nafea outou e  nehenehe ai e faatitiaifaro i te reira? Na mua roa ˈˈe, a ani atu i to outou taote ia faataa papu mai eaha mau na te rapaauraa ta ˈna e horoa maira no outou. I muri iho, a pure ia Iehova ia tauturu mai oia ia outou ia hiˈopoa maite i te reira ia au i te mau faaueraa tumu a te Bibilia. E riro paha te hoê taote i te ani mai ia outou e ia tatarahia e ia faahereherehia te hoê tuhaa o to outou toto ia hinaaro-noa-hia ˈtu mai te peu e e tâpû-noa-hia ˈtu outou. E farii anei outou? Ia haamanaˈo na outou e, ia au i te ture a Mose, e tia ia niniihia te toto e tatarahia mai roto mai i te hoê mea ora, i nia i te repo (Deut. 12:24). Parau mau, aita tatou i raro aˈe faahou i taua mau ture ra i teie mahana, e nehenehe râ ta tatou e huti mai i teie faaueraa tumu: Mea moˈa te toto, e ia iriti-anaˈe-hia mai na roto i te hoê tino, e tia ïa te reira ia faahoˈihia ˈtu na te Atua ma te ninii atu i nia i to ˈna taahiraa avae, oia hoi te fenua (hiˈo Mataio 5:34, 35). Mea tano anei ïa ia haaputuhia te hoê tuhaa o to outou toto (no te hoê noa taime poto) e a tuu faahou atu ai i roto i to outou tino? Teie nei, nafea ïa outou, ia parau anaˈe mai te taote e i roto i te hoê tâpûraa aore ra te tahi atu rapaauraa, e faatahehia to outou toto e tae atu ai i roto i te tahi mau matini e vai ra i rapae au i to outou tino, e e faahoˈi-tia-hia ˈtu ai i roto i to outou tino? E farii anei outou i teie huru rapaauraa? Ma te haava manaˈo maitai, ua manaˈo te tahi mau kerisetiano e e nehenehe ratou e farii i te reira, ia tuuhia ˈtu iho â râ te hoê taoˈa e ere i te toto no te faatere i te matini. Oia mau, ua faariro ratou i taua ravea i rapaeau i to ratou tino ra ei ravea no te faaroa ˈtu â i te tereraa o to ratou toto. Parau mau, mea rahi te mau huru tupuraa, na outou râ e maiti. E na roto i ta outou huru maitiraa, ei haava manaˈo maitai ïa to outou i mua i te Atua e tia ˈi. — Pet. 1, 3:16; Tim. 1, 1:19.

9. a) Eaha te tia ia outou ia rave ia papu maitai outou e te faatura-mau-hia ra anei ta outou opuaraa ‘eiaha e amu i te toto’? b) Noa ˈtu e tei roto tatou i te hoê fifi manaˈo-ore-hia, nafea tatou e nehenehe ai e ape i te hoê aparauraa au ore? c) Ia faahepo mai te hoê taote aore ra te tiribuna ia pâmuhia mai te toto i roto ia outou, e nafea ïa outou?

⁹ Ia papu maitai ia outou e e faatura mai to outou taote i ta outou opuaraa i te ‘ore e amu i te toto’, eiaha ïa outou e tiai ia tupu mai te hoê fifi i reira ïa outou e parau  atu ai ia ˈna. Mai te peu noa ˈtu e e tapeahia outou i te fare maˈi, a papai roa ˈtu ta outou aniraa ia ore te toto ia pâmuhia mai i roto ia outou, e a parau roa ˈtu i te taote e rapaau ra ia outou. Nafea râ ïa outou mai te peu e e fifi manaˈo-ore-hia? E riro outou i te ape i te tahi mau aparauraa au ore ia faataa ˈtu outou i to outou tiaraa ma te faatura e ma te au maitai i te taote e ia ani atu outou ia ˈna ia faaohipa i to ˈna aravihi no te tauturu mai ia outou e ma te faatura mai i to outou haava manaˈo (Mas. 15:1; 16:21, 23). E mai te peu e e faahepo mai tera aore ra tera melo no roto i te mau taote ia tatou ia farii i te reira, ma te parau mai e e fifihia to tatou ora ia ore tatou e farii i te toto? I reira râ, e tia ïa i to tatou faaroo i roto i te mau eˈa tia o te Atua, ia faaitoito mai ia tatou. E tauturu mai to tatou haapao maitai ia Iehova, ia faaruru atu tatou i te reira ma te ore e topa, no te mea ua opua tatou e auraro ia ˈna eiaha râ i te taata. — Ohipa 5:29; hiˈo Ioba 2:4; Maseli 27:11.

Te hoe tumu parau faufaa roa

10. No te aha te manaˈo ra e e faaora te pâmuraa toto i te taata e ore ai e taui i to tatou manaˈo no nia i taua tumu parau ra?

¹⁰ I te tahi taime, te manaˈo ra te feia aitâ i ite e o vai mau ra o Iehova e ua arataihia te mau parau e hohorahia ra no te turu i te pâmuraa toto i te faatura hohonu o te huru moˈa o te ora. Area te rahiraa o te feia e faahiti ra i taua parau ra, te tapiri nei ïa ratou i to ratou mata i nia i te ohipa taparahi taata e ravehia na roto i te haamaruaraa tamarii. I te tahi aˈe pae, mea hau aˈe to Iehova ite no nia i te ora e no nia i te toto i to te mau “taata aravihi” atoa i te pae rapaauraa. Ua riro ta ˈna mau faaueraa atoa i te mea faufaa no tatou, inaha e faaora te reira ia tatou i teie nei e a muri atu (Isa. 48:17; Tim. 1, 4:8). Te itehia ra anei te reira i roto i te faaueraa e titau maira ia tatou e ‘eiaha e amu i te toto’?

11. a) Ia au i te mau faaueraa a Iehova, eaha te faaohiparaa hoê roa ta te mau Iseraela e nehenehe e rave no nia i te toto? b) No te aha te reira e riro ai ei mea faufaa roa no tatou, te mau kerisetiano?

¹¹ Ua faaite mai hoi Iehova e mea faufaa mau ia faatura i te huru moˈa o te toto ia ˈna i parau no nia i te  faaohiparaa hoê roa i te toto e: “Tei te toto hoi te maa ora e ora ˈi te mau mea atoa ra, i haapao ai au i te reira o ta outou ïa e hopoi i nia i te fata ei taraehara na outou iho, o te toto hoi tei riro ei taraehara no te taata: i parau ai au i te tamarii a Iseraela e, eiaha roa te hoê o outou e amu i te toto.” (Lev. 17:11, 12). Oia hoi, ua faahohoˈahia te taatoaraa o te toto animala i niniihia i mua i te fata a Iehova, ia au i teie mau parau, i te toto faufaa o Iesu Mesia (Heb. 9:11, 12; Pet. 1, 1:18, 19). No reira, te haapapu maira ïa te ture a te Atua e opani ra i te tahi atu mau faaohiparaa i te toto, i te huru moˈa o te toto o Iesu. Te taahia ra hoi e ia ore te toto ia faaohipa-maitai-hia, te faaite maira ïa te reira i te faatura-ore-raa i te mau faaauraa ta Iehova i rave no te faaora ia tatou na roto i te arai o ta ˈna Tamaiti.

12. I mua i te pohe, no te aha eita te kerisetiano mau e faaohipa i te toto ma te tia ore, ma te tiaturi e e ora mai oia?

¹² Ia roo anaˈe to tatou ora i te fifi, e riro mau ïa tatou ei matapo i te pae varua, ia fariu ê tatou i te Atua. Noa ˈtu â ïa e mea faufaa roa na tatou te ohipa a te mau taote haapao maitai, eita tatou e aro faufaa ore noa no te haamaoro atu â te tahi tau mahana aore ra te tahi tau matahiti, ma te ofati i te ture a te Atua, mai te mea ra ïa e teie anaˈe oraraa te mea faahiahia roa no tatou. Eita, te tiaturi nei râ tatou i roto i te faufaa o te toto i maniihia e Iesu e i roto i te ora mure ore ta taua toto ra i horoa no tatou. Ua papu maitai ia tatou e noa ˈtu e e pohe ratou, e noaa i te mau tavini haapao maitai a te Atua i te ora mure ore. — Ioane 11:25; Tim. 1, 4:10.

Ei haapoto-noa-raa

● No te aha e mea moˈa te ora e te toto? Eaha te tumu te ao nei e ore ai e manaˈo mai te reira te huru?

● Nafea tatou ia faaite e te faatura ra tatou i te huru moˈa o te toto animala?

● Nafea tatou paatoa ia faaite e e mea moˈa na tatou te ora o te taata? Tae roa i nia i tei hea faito e riro ai te reira ei mea faufaa na tatou?

[Uiraa haapiiraa]